يسلموو كاتبتنا الجميله على البارت الرائع…
وش فيهم رجال هـ الروايه صاروو كذا… يعني بطلاتنا لازم يعصرون على نفسهم ليمونه عشان يهضمون تصرفاتهم .. وكلهم في كوم وفراس وهيثم في كوم اثنينهم يبي لهم علقات محترمه…
هيثم بدا الحساب بدري مع اسماء بيطلع عليها ملاحقتها له ببيع السوق…
فراس نقدر نقول انه يهرب من مشاعره اللي بدت تظهر حق غاده بس حرام يحرمها من هالمناسبه وهذا اخوها الوحيد… بس اتوقع اهو يخاف يتركها لحالها مع احد
بـ اعتقاده انها راح تخبر عن اللي تعرفه…
ننتظر ونشوف ابتسام وش راح تسوي…
كاتبتنا الرائعه ربي يسعدك ويوفقك…
وبـ إنتظارك دائماً…

السلام عليكم عزيزتى متمللة
فصل مثير و شيق و اسمتعت به جدا لكن فراس قهرنى بمعاملته السيئة لغادة و صعبت عليا جدا لما تمنت أن تكون بيجامة فراس
"( ارخت جسمها ع الطاولة وهي تتنهد بحب ) جعلني بجامة سوداء ياشيخ .."
فى انتظار الفصل القادم لمتابعة ما ستفعله ابتسام و ام فراس لزيارة غادة فى الفيلا
شكرا جزيلا على ابداعك و تميزك

" تشابتر تسعة وخمسين "
دلل نفسك وحن عليها
لاتكن جالب الهموم إليها
ان كان مسك الزمان بضر !
لاتكن انت والزمان عليها

دخـل للبيت بعد الملكة .. طالعته ام فراس باستغراب : بدر ... اخوك وينه ؟
بدر : آخوي مين ؟
ام فراس : فراس
بدر : راح لبيته من زمان .. ( تثاوب ) المهم انا سكرت الضيافه والباب الرسمي وبطلع انام اللحين... تصبحين على خير
ام فراس تضايقت بجد .. كانت متوقعته اقل شي يدخل تتفاهم معه , ماكان لها خلق تدق تكلمه ولان راسها صدع اليوم بما فيه الكفاية ارسلت له رسالة وافية /
( أنا اليوم بعد الشين هديت ابتسام ..
بكرة الصبح بتجيكم للفيلا تشوف اختها ومايحق لك تمنعها برضاي عليك يايمه بلا مشاكل
وانا بجي معها بعد ..
والله يهديك على فعلتك اليوم واتمنى ماتتكرر بالزواج )
وراحت تنـام ..
***
الصبـــاح ... صحت غادة من النوم مثل كل يوم بدري /
بدت هالحالة تمـوتها داخليا ... فتحت الشباك بكسل تراقب الحديقة الواسعة الفارغه , قررت تطلع تفطر برا لعلها تشم هواء شوي يجدد روحها . نزلت بكسل تجر رجلها للمطبخ تسوي قهوتها الصباحية اللي هي طاقة يومها طلعت لبرا وهي تتمشى مع جو الصبح والنسيم يلفح وجهها .. لاحظت ان الجو هنا أحسن من جو أي مكان ... يمكن لأنه برا الرياض شوي بمنطقة فارغة نوعا ما ... انبهتت وهي تنتبه للجرس يرن ... كبست بعيونها مب مستوعبة هذا صوت يرن ... صوت الجرس ؟!! اول مرة تسمع جرس الفيلا .... وكانت بالحديقة انتبهت لاصوات برا الباب .. اصوات شوشرة.. بلعت ريقها وهي خايفة بجد ! من راح يكون هنا بهالحزة .... اذا فراس الوحيد اللي يجي ومعاه مفتاح .. ( روقي غادة يمكن نسى مفتاحة ) حملتها رجلها وهي تمشي بخوف ناحية الباب وتسأل بصوت مرتجف ..: مـــ ... مين ؟!
ابتسام اللي حست ان كلش حولها احسن لما سمعت صوتها : غادة هذا انا ابتسام !!
غادة كبست بعيونها مب مصدقة : ابتسآم ؟!! ( فتحت الباب دون تفكير )
دخلت ابتسام وجمبها ام فراس ... ضمتها غادة بشوق وفرحة وهي تنطق بوناسة : مو مصدقة كيف جيتي لهنا ؟! ( زادت فرحتها وهي تشوف ام فراس تفك نقابها ) خاااالتي ... كيفك ؟!
ابتسام : شلونك عيوني ..؟ ( طالعتها من فوق لتحت .. ناااحفة جدا ) ليش صحتك كذا ؟! ناحفة مرة
غادة ابتسمت بطبيعية مصطنعة : رجيــــم حبيبتي رجيييم
ام فراس : ناقصك رجيم انتي بعد ؟
غادة : هههه ايه والله هالفترة في بيتكم سمنت آكل خالتي مايتفوت ... فاللحين جالسه ارجع للنظام... تفضلوا تفضلوا حياكم
***
عــند فراس /
دخل الشركة ... استقبله السكرتير وليد : هلا والله طال عمرك نورت ( كمل بربكة ) ضيوفك وصلوا من ربع ساعة .. حاولت اتصل فيك بس ماترد
فراس بضيق : وليش واصلين بدري كذا ؟! موعدنا اللحين بالضبط
وليد : الظاهر مستعجلين وراهم شغل ضروري
فراس تنهد : حصل خير جوالي من امس طافي ماقدرت ارد عليك ( طلع جواله من جيبه وهو يرميه على وليد ) انا داخل اشوفهم خذ جوالي يشحن
وليد : حاضر
***
بعد ماضيفتهم غادة على القهـوة .... طالعت ابتسام وام فراس بعض .. ثم نطقت ابتسام وهي تجلس فنجالها : غـادة ليش ماجيتي امس ؟!
غادة عقدت حواجبها مو فاهمه : أمس ؟ ليش شالمناسبة امس ؟
ام فراس ارتفع ضغطها من ولدها ... : ...............
ابتسام بقهر : امس كان ملكة هيثم واسماء ! ماكنتي تدرين ؟!
غادة فتحت عيونها بقهر .. ( من وين ادري من الجدران ؟ ) لكنها تداركت الموقف وهي مو ناقصة زيادة مشاكل مع فراس .. ابتسمت بعفوية : اها امس ملكتهم ؟ لا والله مادريت .. ( كملت بربكة مصطنعة ) امس كنت تعبانة مسكتني حمى الله لايوريكم تو تشاليت اليوم .. وانا اقول وش فراس مخبي علي ؟ اكيد مابغى يقهرني بهالمناسبة وانا طايحة مقدر اقوم حتى ... خبرك ابتسام انا الحمى لامسكتني طرحتني
ابتسام رفعت حاجبها : مو عذر مايقولك !
غادة : ابتسام اقولك معاي حمى .. يعني لي يومين مو حاسه بأحد
ام فراس اللي كانت على نياتها اكثر من ابتسام : بجد ؟ سلامتك حبيبتي ليش ماقالي نجي نهتم بك ؟ ضليتي لحالك وهو بالملكة
غادة ابتسمت: الله يخليك ياخالتي .. كيف تجون وهي ملكة اسوم , وبعدين فراس ماقصر قام باللازم ( ابتسمت بحيوية ) ياحليلها أسوم تملكت ياقلبي عليها ... ايوهىآيش شخبار الملكة تكفون سوالف تفتح النفس يكفي لي يومين مغيبة عن العالم
ابتسام وهي حاسه ان هالكلام كله كذب : اها معاك حمى ؟ اللحين تشاليتي معناها العرس بتحضرين أكيد !! الا اذا الحمى راح ترجع لك فجأة !
غادة مستحيل تكذب على ابتسام .. بلعت ريقها وهي تنطق بربكة : آيه ان شاء الله بحضر ..
ام فراس : يله تعالي نعطيك علوم اسوم وملكتها
***
فراس /
بعد الإجتماع دخل مكتبه وهو ياخذ جواله اللي تم شحنه .. جلس باسترخاء ع كرسيه وهو يتصفح الرسايل ... ماطال استرخائة وهو يوقف مباشرة لما انتبه لرسالة امه !! مرسلتها من امس ؟ طالع الساعة 10 ...... متآخر مرة اكيد راحوا !!!
طلع مباشرة وهو ينزل الدرج بخطوات متسارعة وخطوات واسعة حتى ركب سيارته وهو يضرب الطبلون .. الفيلا بعيدة متى راح يوصل ؟!!! لعن وشتم كل سياره واشاره بطريقة ....... فتح جواله وهو يدق على امه .... لكن يرن ويرن ويرن ومافيه رد ....
رمى جواله وهو ينطق بقهر : مرة نايف هذي زودتها !! بكل مكان طالعه لي !! عرق اختها ناطبها ... بس ماعليه
فحطت سيارته وهي توقف قدام الفيلا ... نـزل والشر بعيونه لما انتبه لسواق نايف متكي قدام الباب , دخل وهو يضرب الباب وراه بقوه ...
غادة اللي كانت جالسة تشرب الشاهي وتسولف معهم .. ارتبكت من صوت الباب , وقفت مباشرة وهي تنطق : هذا فراس بنبهه مايدخل ...
تفاجأت من جيته عقب هالاسبوع أكيد عرف ان احد بيجيها وجاي يتأكد ... اسرعت تطلع للحديقة تستقبله قبل يدخل البيت ... انتبهت للشر بعيونه وأول ماشافها قبض ذراعها بقسوة وهو يسحبها له وينطق بين اسنانه : مـن سمح لك تضيفين آحد بالبيت من غير شوري !
غادة وهي كانت متوقعه هالعصبية .. حاولت تكون هادية قد ماتقدر وهي مكشرة وجهها من الم يده اللي تعتصر ذراعها : أمك واختي واقفين عند الباب .. اتركهم برا يعني .. ؟
: فراس
افلت ذراعها وهو ينتبه لامه تطلع ووجهها بشوش بشكل ماتوقعه ... غادة تنهدت بضيق وهي تبعد عن طريقها على جمب وهو يسلم على امه وينطق بعتب : هلا يمه .. كلامي لهالدرجة مايسوى ؟ اقولك لحد يجي واحصلكم قدامي
ام فراس ابتسمت : ماتبي تخوفنا عليها ؟ بس ترا غلطان شفيها لو علمتنا ان غادة مريضه كنا عذرناها
عقد حواجبه وهو ينطق بنرفزه : منو مريض ؟! ( التفت لغادة اللي نطقت بربكة وهي تضحك وتغمز له عشان يفهم )
غادة : ههههه ههه ؟ شفيك ناسي ان لي يومين حمى عشان كذا ماقدرت احضر الملكة !
فراس طــــالعها بنص عين ... وهو يشد قبضته ورجع يطالع امه وهو يسأل : مرة نايف داخل ؟
ام فراس : آيه داخل ... تبي ناخذ لك طريق ؟
فراس بنرفزه : لا لاتاخذون لي طريق لان حضرتها بتنقلع اللحين من بيتي ..
ابتسام اللي من طلعت ام فراس لحقتها عند الباب تحاول تفهم شصاير برا .. نطقت بقهر من كلامه : آبفهم وش اللي موترك لهالدرجة ماتبينا ندخل بيتك ! وقت تطلع اختي من هالبيت وقتها ماراح اسأل عن بيتك حتى ... بس دام اختي عندك البيت بيتي
فراس رفع حواجبه بدهشة ... ام فراس وغادة اللي عارفين فراس ارتبكوا من رد ابتسام ومن ردة فعله , اما ابتسام كانت واقفة ورا باب البيت وتسمع كلامه وظنونها تاكدت انه حارم غادة .. وثقتها مفرطة ومستحيل تخاف منه ....
فراس بهدوءه المهيب نطق : انتبهي لكلامك يا ام عبدالرحمن .. كلمتك اللي تطلع منك خصوصا إذا كنتي مرة تعبر عن انك متربية صح او العكس .. ( كمل بشدة ) خصوصا اذا كان الكلام موجه لي!! واللي مثلك كل ماقابلتني واجهتني بهالكلام مايضايقوني ... بالعكس ارحمك احس عندك مشاكل وجالسه تفرغينها .. بس انا اقول مو كل الناس نايف ومرة ثانية خليك مأنتكة معي ترا بداية الحروب كانت مجرد كلام ! وسبب ان اختك في بيتي اللحين كان كلام يشبه كلامك
غادة ارتبكت فراس وابتسام مايتواجهون نهائي ... نطقت بتوتر وهي تطالع فراس برجاء : فراس خلاص راح ..
قاطع صوتها ابتسام ردت بهدوء : أنت على شنو شايف نفسك ؟ على فكرة يوم عن يوم اتأكد قد ايش انت مريض
فراس بثقة وكبر: شايف نفسي شخص مهم اقتصاديا ودوليا .. انتي اللي على شنو شايفة نفسك ؟ تزوجتي تاجر وصرتي تحسين أنك تقدرين تحطين راسك براس الكل ... بس انا اقول خطوتين ورا ماراح تضرك لانك ماتعرفيني .. انا اكسرك ! ( كمل مباشرة ) واللحين من غير مطرود .. تأكدتي ان غادة بخير ؟ اجل بعد اذنك خلي هالنهار يمضي على خير وسواقك برا ينتظرك
ابتسام : مو أنت اللي بتطردني ! ومو انت اللي بتكسرني .. مالك سلطة علي عشان تتمادى بالكلام
فراس : لا شكلك بجد تحسبيني متربع ببساطك .. هذا بيتي ! بس اذا حابه تشوفين انا قد كلمتي ولا لا ماعندي مانع ترا ..
غادة بقهر : فراس خـلاص ! اتركها شوي ما ..
التفت لها بنظرة حادة الجمتها ونطق كلمته: مب احسن لك بعد انتي !
ام فراس بضيق : فراس مايصلح ترادد لك مره ..!
فراس بانفعال وهو ياشر للباب : هذي مره هذي ؟! ( التفت لغادة ) ادخلي لاختك سكتيها احسن لها !
غادة ماصدقت دخلت على طول وهي تكلم ابتسام بقهر : ابتسام انتي من جدك ! ليش كلمتيه كذا ؟
ابتسام بقهر : لأنه ماعاد استحى ! جاي بيطردنا سلامات ... مفروض ننحرم منك تماما عشان حضرته
غادة تنهدت : ابتسام معليش بس انتي روحي اللحين تكفين لاعاد يتوتر الجو اكثر
ابتسام رفعت حواجبها : موافقة مع كلامه يعـني ...
غادة بيأس : مو سالفة موافقة أو لا ... سالفة انا اعرف شي وانتي تعرفين شي ..
ابتسام : اسمعيني لايكون تحسبيني صدقت سالفة انك مريضة وحمى ومدري ايش ؟ الظاهر الكلام اللي انفضحنا به امس كله مضبوط ... وانتي مو ..
قاطعتها غادة وهي منقهره بجد من نفسها : ابتسام رجاء ... خلاص لاعاد تشيلي همي , خليك بنفسك وببيتك وبس ... وخليني انا بنفسي وببيتي
ابتسام : تسمين هذا بيت ؟
غادة وهي ضاغطة نفسها : آيـــه بيت .. وانا مرتاحة ومبسوطة , وتكفين سواء ماحضرت ملكة او زواج او غيره حتى لو اختفيت من على هالدنيا لاعاد تتدخلين فيني
ابتسام اللي انجرحت وهي تنطق ببرود : هذا كلامك ؟
غادة بقهر : آيه ..
ابتسام : للأسف ماتوقعتك جبانة لهالدرجة .. حتى لما ظلمك احمد حاربتي عشان بنتك ؟ واذا راح تتركينه يفرض سيطرته عليك كذا .. معناها شخصيتك عدم بجد .. انا رايحة بيتي اسفه اللي تدخلت بحياتك
لبست ابتسام عبايتها وطلعت ... بينما غادة جلست على اقرب كرسي وهي تمسح على وجهها ( مبروك غادة .. خسرتي كل أهلك رسميا .. اولها هيثم واللحين ابتسام .. ) : ........
بـــرا /
طلعت ابتسام مباشرة وهي تمر من جمبه ... ام فراس التفتت له : فراس لاتزيدها على غادة .. وتعال بعدين نتفاهم على المهزله اللي صارت هنا !
طلعت امه ورا ابتسام يرجعـــون .. بينما هو تنهد بضيق وهو يرفع عيونه للفيلا .. مشى بهدوء وهو يدخل كانت جالسة على كرسي دون ظهر بالصالة ومعطيته ظهرها وشعرها الطويل المموج الملفت منتثر على ظهرها ومنزله راسها بقهر وبيدها اليمنى ضامه ذراعها اليسرى .. لما انتبهت لصوت مشي وراها عدلت جلستها وهي تمسح دموها مباشرة وتتنفس الهواء حولها وقفت وهي تلتفت له .... كان يطالعها بهدوء بينما هي نطقت تكسر الصمت : مبروك زواج آسماء .. ( كملت بقهر ) قبل تروح انتظر بعطيك هديتها وصلها عني بالنيابة
فراس وهو مستغرب هدوئهـا توقعها تنفعل لما تعرف ان الملكة فاتتها .. لكن تجاهل هذا كله وهو يسأل : زل لسانك بشي وآنتي مع اختك ؟
غادة فهمت قصده .. فاكتفت انها ترد السؤال بحجمه : لا . . مازل ولا راح يزل تطمن
فراس باستنكار : أتطمن لمين ..؟ للي سارقه ملفاتي وجايه تهددني بها ؟
غادة بقهر : اللي فات مات فراس .. ( كملت بندم ) رغم ان اللي فات كثيييير كثيير لكن لازم يموت عشان ماتفوت اشياء اكثر وأكثر ..لان العمر مرة وحده لازم نتعلم من اخطائنا بسرعة لأن الفرصه ماراح تتكرر ( كملت بانفعال مهموم ) لانه لازم كذا ..
فراس رفع حواجبه : اللي فات مات ؟
غادة بقهر من نبرته الغير مصدقة : ايه لأن انا اللحين مو أنا قبل .. لأن الاشياء اللي ندمت عليها عدلتها عشان كذا مافيه فايدة نسترجعها اللحين .. ( كملت بقصد ) مافيه فايده نستحي منها لأني تعاملت معها وخلاص .. اللي فات مات لاني صرت اعرفك اكثر .. وآفهمك اكثر .. ومستوعبتك آكثر ..
فراس : واضح مستوعبتني ...
غادة وبعيونها لمعه غريبة : آيه .. لأني خسرت ابتسام وبنتي وامك وكل شي .. رغم كذا كل شي خسرته يصير كانه مكسب لما تجي تخفف عن خسارتي بشوفتك بس .. بس بشوفتك احس ان هالخسارات تسوى ..( نزلت دموعها بغصه وهي تنطق بقهر بينما عيون فراس توسعت بدهشة من الشعور اللي رجع يجتاحه ) طز بالملكة ... طز بالزواج .. مابي هذا كله آبيك بس تسامحني وتفهم أني مستحيل اضرك .. والله مستحيل
فراس مع كل كلمه تقولها عسر الهضم على قولته رجع يمسكه .. بلع ريقه وهو مشدود لعيونها اللامعة وفمها اللي يرتجف وهي تتكلم .. والأهم ؟ كلامها اللي تقوله يحسسه انه مهم ولأول مرة : .........................................
غادة رفعتلا عيونها له وانسابت دمعة : لما تشوفني أتكلم معك وانا ماعندي سالفة مثل العادة .. وقتها حاول تستوعب وش كثر آحب وقتي معك وما أبيه ينتهي .. ومستعدة ابيع الكل عشان هالوقت بس .. عارفة ماعندي طريقة محترمة اتسلل فيها لجروحك واخفف همك .. بس .. هذا اللي صار
فراس عقد حواجبه بضيق .... وهو يحس بنفس الضيقة تمسكه .... غادة بقلق : فراس شفيك ..؟! ( اسرعت ناحيته وهي تمسك كتفه ) فيك شي ؟
فراس ولمستها سرت بقشعريرة بكل جسمه .. ازاح بكتفه عنها وهو يجلس ويمسك ناحية صدره وينطق بضيق : عندك حاجه للهضم ..؟
غادة : هضم ..؟ عسر هضم مرة ثانية ؟! ايش سالفة هالعسر الهضم اللي يجيك كل ماتجيني!
فراس انبهت .. فتح عيونه وهو يطالعها بصدمه : هــــــــاه ؟!!!!
غادة وهي تنتبه له يطالعها .. قالت بشرح : آيه آخر مرة عسر هضم .. عاد هالمرة وش ماكل بعد ؟
فراس انصدم بجد .. صحى متأخر ما امداه ياكل شي , تذكر سؤال الدكتور ( وش نشاطاتك وقت يمسكك الخفقان ؟ ) رجع يطالعها وهي عاقده حواجبها وتطالعه بقلق .... ( نشاطاااتي غادة !!! ) : ........................
غادة تنهدت بضيق : رايحه اسوي لك شاهي اخضر ..
فراس قاطعها : اوقفي ! ( غادة استغربت .. بينما هو وقف بضيق ) لاتسوين شي راح امشي
قبل يطلع قاطعته بصوتها : انتظر دقيقة اجيب هدية اسوم
تجاهلها وهو يضرب الباب وراه ويطلع وهو في حالة ذهــــول ...!! حتى أنه ماعرف يفسر .. معقولة شخص يكون عنده حساسيه من شخص ؟! حرك سيارته وهو يبعد عنها وعن الشعور اللي تبعثه معها ..
***
نايف كان جالس بالصالة وهو بالش وسط المبزرة .. اللي جويع واللي يبي يغير , وابتسام طالعه من بدري مايدري لوين ! دق عليها بطفرة اعصاب ماترد : .............
طالع الساعة قربت من 12 ... تافف وهو يربت على ظهر عبدالرحمن اللي منفجر صياح : يالييييييل راسسسي خلاص ... ياتقول وش فيك ياتسكت !
عبدالرحمن انفجر بالبكاء بعد كلمة نايف ... همس نايف باحباط : يابابا خلاص
انتبه للباب ينفتح راح مباشرة وهو ينتبه لها تدخل وبيدينها اكياس وانحنت عند الباب تنزع جزمتها .. نطق بطفرة : بـــــدري ياشيخة ... تعالي شوفي عيالك فجروا راسي بصياحهم !
ابتسام كانت مأتشه نطقت بهدوء : طيب !
نايف وهو يهز عبدالرحمن على كتفه : ووين كنتي طالعه من صبح للحين الظهر ..؟ وانا بلشت معهم وجويع وحالتي حالة .. تعرفيني اكثر شي اكرهه اني أأخر وجباتي !
ابتسام رفعت الاكياس بيدها : هذا الغداء معي .. ( تنهدت بضيق ) ولا تسألني رجاء اللي فيني كافيني ( نزعت عبايتها وهي تسحب عبدالرحمن منه ثم نطقت بقهر ) ناايف مو واضح الولد زعلان لانه يحتاج يغير له ؟
نايف : وانا وش يعرفني كيف يغير للبزارين ! هذا شغلك يا أمهم
ابتسام حطت الاكياس : هذا غداء من المطعم ! حطه بصحون وتغدوا انا بصعد اشوف هالبزارين واضح جويعين ووصخين وحالتهم حاله
نايف : بحتريك نتغداء سوا
ابتسام : ماعليك مني شبعانه اهم شي رنيم تكفى خلها معك تتغدا
نايف زفر : زيـــن ..
صعدت ابتسام لفوق مع توأمها وهي تبدل لهم وتشبع بطنهم .. وناموا مباشرة نزلت وهي تجلس على طاولة الأكل جمب رنيم وتمسح على شعرها بحنان : شبعتي ماما ؟
رنيم ببراءة هزت راسها بايه ... ابتسام : اجل يله نغسل وجهك
نايف طالعها بنظرات مستنكره وهو ياكل : ابتسام بجد فين كنتي .. ؟ وش المشوار الضروري على هالصبح
تنهدت ابتسام بضيق : رحت ازور غادة .. ولانها ساكنه بالفيلا برا الرياض طولت
نايف : اهاااا ..كان اخذتي رنيم معك طيب حرام تشوف امها
ابتسام : نسيت .. ( تنهدت ) راح اخذ رنيم اللحين اغسلها وبقيل معها حدي نعسانه
نايف : تغدي طيب ..
ابتسام : منغثه نايف مرة مالي خلق الأكل
نايف بحرص : مريضة ابتسام ..؟
ابتسام ابتسمت ابتسامه صفراء تطمنه : شوي بس .. بنام وبرتاح ( ألتفتت لرنيم وهي تاخذها معها وتصعد )
***
لــؤي لما حس الشمس باردة بداية العصر آخذ مايا وطلعوا لحديقة الحي .... انتبه لسيارة فراس تمر قدامه , تنهد وهو ياخذ جواله يدق عليه ... رد فراس : هلا لؤي كويس دقيت انا جايك بال ...
قاطعه لؤي : عارف شفتك ... ارجع انا بالحديقة مو بالبيت
فراس : اهـا ... ماشي يله راجع
سكر السماعة بعد فترة رجعت سيارته ... ونـزل هو وجلس جمبه على العشب : غربية طالع من البيت
لؤي اللي كان جالس بملل : قلت آخذ مايا تتنفس شوي دام الشمس مب حارة
فراس تسند بيدينه على العشب وهو يمدد رجله ورفع راسه للسماء : الجو رايق اليــوم .. يا زين من طلع للبر يومين دام الشمس باردة
لؤي : وش يمنعـك .؟ اطلع يومين اكشت
فراس : مشغول مقدر .. ( التفت لمايا اللي كانت تلعب بالعابها قدامهم ) مشى حالها مع المربية ؟
لؤي : آيه حمدالله .. وتواعدت معها نفس الشي عشان الزواج
فراس : وتواعد معها يوميا مافيها شي .. اطلع تنفس انت شف شغلك
لؤي : ما أظن عندي شغل آهم من بنتي .. امس طلعت من العرس مع آهلي للبيت وش استفدت ؟ ولا شي
فراس ارخى راسه بين كتوفه وهو يسترخي : رايح لآهلك عقب عرس أكيد ماحتستفيد ..آكبر فايدة هي فلانة لبست زي فلانة
لؤي رفع حواجبه : ظنك ..؟ لا ابشرك عندهم علوم آهم .. عندهم خويي مستحل السوالف آمس
فراس ابتسم بسخرية : ما راح استغرب
لؤي : طبعا ماراح تستغرب وآنت ماتركت زوجتك تحضر ملكة آخوها ... آصدع انت ؟ ليش ماجبتها ؟ لايكون للحين مصدق نفسك بتحبسها
فراس : ماني مصدق نفسي ولا حاجة ... اساسا ماعاد فيه فايدة صاروا يروحون لها هناك
لؤي : طبعا بيروحون لها .. آجل بينحرمون منها طول العمر ؟ فانت اكسر هالخشم شوي واتركها تطلع برضاك احسن مايجونها غصب عنك
فراس : والله يالؤي انا مافيه شي يصير غصبـن عني , بس الحشيمة لعمي عبدالرحمن مو لها
لؤي : اختها اجل اللي جايتك ؟
فراس : آيه رجعت للبيت حصلتها .. ثم طولت لسانها ثم طردتها
لؤي فتح عيونه : وتقول الحشيمة لعمك عبدالرحمن ؟ آي حشيمة وآنت طاردها !
فراس : انت اصقه ؟ ماقلت طردتها ! قلت طولت لسانها ثم طردتها ... ركز شوي
لؤي : حتى ولو ! ضيفتك تعتبر
فراس : والله الضيف يجلس باحترامه ولا الباب ياسعه وياسع غيره
لؤي بشفقة : حرام عليك .. فوق انك حارم البنت من ملكة اخوها بعد تطرد اختها قدامها
فراس ضاق من طاريها : آقول لؤي !؟
لؤي استغرب انقلاب لهجته : قول ..
فراس وهو يحوس بفمه : عمرك ضقت من الجلسة مع احد
لؤي : اوهووووه ياكثرهم
فراس : لا لا مو ضيقة طبيعية .. ضيقه تخنقك تخليك غصب عنك ماتقدر تجلس معه
لؤي عقد حواجبه : كيف يعني ؟
فراس وهو يضيق عيونه وهو يطالع السماء ويحاول يوفي بشرحه : يعـني تحس نفسك يضيق فجأة ودوخة ومعدل خفقانك يرتفع بشكل مخيف .. يعني تحس لو ماتطلع اللحين من هالإنسان يمكن يوقف قلبك معاذ الله .... شي يشبه الحساسيه كذا , فيه حساسية من بعض البشر ؟
لؤي لاح بعيونه حول المكان وهو يحاول يستوعب .. قرب بجلسته جمب فراس النصف مستلقي وهو يسأل : هالحالة تجيك مع من قلت لي ؟
فراس بعفوية : مع غادة .. ( كمل بضيق ) ظنك اني كرهتها لهالدرجة ؟ اليوم احاول اتكلم معها طبيعي ماقدرت احس نفسي بختنق لو اجلسه دقيقة وحده بعد
لؤي ابتسم بوسع وهو يحبس ضحكته .. ويحاول ينطق بين ضحكة مكتومة : تحس الدنيا تدور ؟ وكلش مشوش وفجأة تمسكك فهاوة غريبة
فراس بتأييد : آيه تقريبا
لؤي ماتحمل اطلق ضحكته : هههههههههههههههههههههههههههههههههههههههههههههههههههههههههههه ههههههههههههههههههههه !!!
فراس عقد حواجبه : سلامات لؤي انهبلت ؟
لؤي : هههههههههههههههههههههه والله محد انهبل غيرك ... آقول فراس انت اللحين ماراح تصدق كلامي بس راح احلف لك انه صدق
فراس بعصبية خفيفة : شيضحكك طيب ؟
لؤي ابتسم بوسع وهو يتمغط وينطق بوناسة : والله ياطويل العمر .. هالحالة تجيني مع أم هالحلوه < وهو ياشر بعيونه لمايا
فراس عقد حواجبه ثم نطق : سحر يعني ؟ لا غادة حيوانة بس ماوصلت للسحر
لؤي ضربه براسه بخفة وهو ينطق بقهر : آقول تلايط قال سحر قال ... هذا ياشاطر آسمه حب انت صرت تحب سجينتك المسكينه
فراس سرت قشعريرة كامله بكل جسمه .. نطق بنفور : لؤي مزحك مايونس ترا ! ( مسح على كتوفه وهو ينطق بنفور ) قشعر بدني الله يلعن بليسك
لؤي رفع حواجبه : راح أأجل الشماته لين تتجاوز الصدمة يامسكين .. بس ههههههههه ( حاول يمسك نفسه ) تبي علاج لهالحالة ؟
فراس عقد حواجبه : والله الشرهه مو عليك .. الشرهه علي اللي احسبك دكتور وجالس اتطبب عندك
لؤي : والله اذا جينا للصدق انا دكتور بهالأمور .. عموما تبي تتأكد سو خطوة قدام وراح تفهم
فراس وهو فعلا ضاق : سكر الموضوع انسى اني قلت لك ... انت شايفني راعي هالعلوم تجلس تفلسف فوق راسي
لؤي : لا والله ياخوي ما اشوفك راعي هالعلوم والله يعظم اجرها ويكتبه لها ولا يضيع صبرها .. بس هذا اللي صار
فراس بجدية : اولا انا عندي قوانين بحياتي ما اتجاوزها .. اذا حبيت حبيت بالهون حتى آهلي فهي مستحييل .. واذا قربت ما ابالغ ف القرب .. واذا اشتقت لأحد تذكرت اني ممكن افارقه بيوم .. انا موطد نفسي على الفقد فخرابيطك هذي كلها مستحيله
لؤي : واذا تعلقت نفسك فيها .؟
فراس باشمئزاز : يخي كل تبن وش اتعلق فيها صاحي انت ... ! تعلقت باشياء اعظم وماعطيتها نفسي عشان اتعلق بهالبزر
لؤي : وبعدين وش هالسلبية بمشاعرك ارخ شوي !
فراس : والله ضربه وحده على الراس تكفي .. وانا ماراح اعطي أي انسان ثقل بحياتي ماراح اقدر اعوضه وقت يفارق هالدنيا
لؤي بحزن على خويه : فراس لاتخلي تجربة ابوك تعقدك من الحياة .؟ الله يرحمه ويحسن له بس لايصير عندك رهاب من الموت
فراس : ماعندي رهاب ولا غيره .. بس حتى دون الموت هالناس اللي يتقلبون مثل الطقس مستحيل اعلق نفسي فيهم بيوم ! مثلا يوم تسرقني ويوم ترا خلاص تايبه هذي اللعبة مستحيل اصدقها
لؤي : ماراح اتعب نفسي معك والله بيجي يوم تفهم هالشي من نفسك
فراس بتشديد : حلم ابليس بالجنة .! ( ارخى راسه تماما على العشب وهو يغمض عيونه ويدينه شابكها تحت راسه وهو يمنع نفسه يفكر حتى بكلام لؤي اللي اعتبره سابع مستحيلات )
اما لؤي ابتسم وهو يشوفه مغمض وهو داخل نفسه فاهم هالشعور وحافظه ...
***
اليــوم التالي _ صباح بيت ام فراس /
كان بدر جالس على طاولة الفطور وقدامه آيباده يتجول بالسوشل ميديا ويشرب قهـوته ... وامه بالكرسي على يمينه تكلم بالجوال .... من زمـان مافتح السوشل ميديا , فتح صفحة ( ميهاف الشمري ) حصل تحديثات كثيــــرة من آخر مرة كان هنا ... جذبه آخر حاجة نزلــتها ... صورة إيجابية من تصويرها لزرعة بطاولة .. وجمبها كتاب وقهـوة , كتبت تحتها :
يجب أن ندافع عن سخافة الحياة , ندافع عن حق الإنسان في أن يجيء غير منتبه وغير مضطر للركض وملاحقة هذا العالم المجنون والتخلي عن هوسه بالمواكبة .. نحتاج معرفة أقل وخيارات أبسط يجب أن يشعر الإنسان الذي يخرج من بيته لأجل شراء بيجاما شتوية .. بأنه يخرج في مهمة نبيلة , مهمة الحفاظ على إنسانيته من التشيؤ والانمساخ من فرط التلوث بأخبار العالم . اخرج الآن , اشتر بيجاما قطنية . جرب ان ترسم وجها مضحكا على ثمرة ليمون , جرب ان تتخلف عن مناسبة اجتماعية ثقيلة لأجل ان تمارس نط الحبل , جرب أن تخرج في الصقيع لكي تنفخ على الزجاج البارد وترسم على البخار المتكثف قلوبا مكسرة
بثينة العيسى
قبل يومين أتخذت قرار مماثل :
سأمارس حياتي بسخافة , واتخفف من طموحاتي وجديتي , لبقية هذا العالم ( على الأقل )

ابتسم بدر وهو يقرا .. , أتوقع سخافة حياتها ماتتضمني , ماراح استغرب اذا مسحتني من حياتها اساسا ... انتبه لصوت امه متضايق وهي تسكر السماعة : لا حول لله ... ياربي وش هالناس منهبله هالايام !
بدر سكر ايباده وهو يلتفت لها : سلامات يمه شفيك ؟ من كنتي تكلمين ؟
ام فراس : اكلم مرة نايف .. وجالسة تعلمني برغبات اخوها وشروطه , شي ينبلع وشي ماينبلع ! ومدري كيف اسماء ذحين بتفهم هالحكي كله
بدر عقد حواجبه : يتشرط بوش ؟ ماله دخل يتشرط حاليا بشي ... ياخذه لبيته وهناك يتشرط مثل مايبي
ام فراس : ان شروطه كلها بأمور قبل الزواج .. مايبي زفه !
بدر : طقاق يطقه لاينزف بنتنا بنزفه ولاخلصت تجيه
ام فراس : هذي المصيبة مايبيها هي تنزف بعد ... اساسا مايبي الدخلة والزواج بيوم واحد , يقول قبل الزواج على راحتكم اختاروا يوم ندخل فيه
بدر رفع حواجبه : وش هالهبال ..؟ سلامات زواج دون عروسة من بيحضر ؟
ام فراس : عاد اسماء حجزت زفتها . . بتموت قهر لو تدري
بدر : لاتدري ! كلموا هالمتخلف هذا وبنتنا حنزفها وهو كيفه
ام فراس : ابتسام حجزت قاعة مو فندق .. على اساس هو مايبي حوسة فندق ودام الدخلة قبلها يقول تجي البيت وبس , وانا الصدق مستحية من ابتسام يكفي سواد وجهي معها بسبب فراس ماقدرت اعارضها
بدر : فراس وزوجته شي وهالموضوع شي لاتلخبطون الدنيا ... وبعدين انتي شوفي اسماء قبل وترا صارت زوجته يعني تتفاهم معه لو تكلمه هي ماظنيته يرفض ... إلا اذا كان لهالدرجة ماعنده ذوق
ام فراس تنهدت بضيق : الله يسهل ... وين فراس بعد من امس اشحذه خل اعطيه العلوم
بدر وهو يوقف : انا طالع الدوام .. وفراس لاتقولين له احسن راح يرفع القبعه لهالشروط السامجة وقتها بتموت اسوم صدق والله شكلها هجت من فراس لفراس ثاني
طـلع برا لدوامه بينما أم فراس جلست باحباط .. وهي مو عارفه وش تلتفت له بالضبط , قررت تاكل حبوبها وتنام قبل تصحى اسماء ويصدع راسها معها طول اليوم
***
لــؤي /
تنهد بضيق وهو يسكر السماعة من ميهاف اللي طلباتها ماخلصت .. ومتعودة طول عمرها لؤي اللي يسوي طلباتها هذي هو اللي يعرف مكان مصممين فساتينها ودايم تطلب على حسابه .. وكان ينتظر المربية تجي عشان يطلع لهالشغلات كلها ....
اثناء ماهو لابس بدلته وجالس ينتظر ... كشط لمايا صوره بجواله وقرر يرسلها لسارا لعلها ..تحن
رن جواله مباشرة .... رد عليها : لو عارف من زمان ارسلت الصوره
تنهدت سارا بشوق : ياحلوها ... صاحية هي اللحين ؟
لؤي : آيه صاحية
سارا : حط السماعة عندها بكلمها ..
لؤي : افتحي مكالمة فديو وبس شوفيها مرة وحده وهي تشوفك
سارا دون ترد فتحت فعلا مكالمة فديو .. ابتسم لؤي لما شافها كانت جالسة بمقهى والناس يمرون وراها وهي بطلتها البسيطة .. قالت بكئابة : فينها ؟
وقف لؤي وهو يجلس جمب مايا ويحط الكاميرا عندها .. ابتسمت سارا فور ماشافتها وهي تكلمها : ماياا ياحلوتي .... ( انخنق صوتها ) شمسويه ؟
مايا كانت تطالعها بهدوئها المعتاد كطفله .. ومجرد تمد يدها للجوال تحاول تلعب فيه .... لؤي ابعد الجوال من يدها : هههههههه خطا يابابا .. ( وقف وهو يحط الكاميرا عند وجهه ) شفتيها خلاص .؟
سارا بقهر : لؤي رجعها ... اشوفك ماتسوي شي لا انت فاتحت ابوك ولا تركت بنتي لي ,
لؤي : بنتي راح تتم السنتين قريب ومن انولدت للحين هذي أول فترة اجلسها معها .. طبعا راح اشبع منها على راحتي قبل أي شي يعكر صفوي معها
سارا التفتت لشخص جمبها وهي تنطق : تفضل تايوان ... لقد تاخرت بحق !
لؤي رفع حواجبه وهو يسأل بهدوء : تايوان ؟
سارا رجعت للجوال : راح اسكر عندي موعد اللحين
لؤي وهو فعلا انجرح من حركتها نطق بقهر : انا جالس على جمر أنتظر منك بس تتفاهمين معاي .. وانتي مو هامك وكل يوم طلعات مع ما ادري مين ؟!
سارا بتفادي لكل هالكلام : قلت لك عندي معاه موعد مهم .. ( نطقت بعجل ) مضطره اسكر اللحين
وسكرت .... لؤي شد بقبضته على جواله وهو يحس بغميصه تخنقه , كانه جالس يحارب على ولا شي .... هو جالس هنا على جمر وهي تطلع وتواعد وتنبسط .....
***
اســـماء /
صحت من النوم على أذان العصر .. وهي تصلي الصلاوات اللي فاتتها وتنزل لتحت حصلت أمها جالسة مع اخوانها الصغار : هاااي مامي
ام فراس : يقولون السلام !
اسماء زفرت وهي تجلس : آلسلام عليكم ورحمة الله وبركاته .. كويس كذا ؟
ام فراس : وعليكم السلام ورحمة الله وبركاته ( ألتفتت لياسمين وآنس ) انس ياسمين اطلعوا شوفوا لكم شغل ابي اختكم
انس : ترا بطلع مع الجيران ندوح بالحارة
ام فراس : روح بس لاتطول
اول ماراحوا اسماء اللي كانت ضامه الوساده لصدرها وسادحه راسها على الكنبه : شالسالفة يمه ؟ ( ابتسمت بوسع ) بتعطيني نصائح الزواج ؟
ام فراس : نصائح الزواج ابشري بها يوم عرسك ان شاء الله ... اللحين ابي اقولك كم شغله
اسماء عقدت حواجبها : شغلة شنو ؟
ام فراس تنهدت : ابتسام اليوم اتصلت علي ... اخوها عنده كم طلب
اسماء تنهدت بحب : طلباته اوامر ... وش يبي بس ؟
ام فراس : ايه الله يكملك بعقلك طلبات الرجال اوامر على زوجته ! .... طلباته هي انك ماتنزفين
اسماء كبست عيونها مره .. مرتين .. ثلاثة .. : نعـم ؟!!!! كيف ؟
ام فراس : مايبيك تنزفين لأن يوم دخلتك ماراح يكون بنفس يوم الزواج .. قبله باي يوم ع راحتك
اسماء : هذي ماعندي مانع فيها !!! بس ليششش ليـــــــــش ماننزف ؟!! معيوبين ولا مريضين ولا مشوهين ؟! كوشتي ميهاف شاريتها مكلفتها مرررره وانا مصممتها وعاجبتني ابي احطها بالقصر ..... ( كملت بانفعال ) ابي زفففه ابي زفه
ام فراس : والله هذي طلباته
اسماء : وانتي لايكون وافقتي ! قولي لا بنتنا تبي زففففه وش ذالقهر الواحد يتزوج مره وحده بس ترا
ام فراس : ماقدرت ارفض ... اساسا كلمتني ابتسام عقب موقف بايخ عشان غادة واستحيت وماقلت شي
اسماء : وانا وش ذنبي في غادة ولا غيرهــــــا ؟!! انا بنزف يعني بنزف يعني بنزف ..وماراح اتنازل عن هالشي لو ايش
ام فراس : اسماء اعقلي .. راح تتطاقين مع الرجال من بدايتها عشان زفه
اسماء : ماااما نفسي فيها والله ... زفـــــتي , وبعدين صديقاتي كلهن واعدتهن اشوفهن يوم العرس واوريهن رجلي ماراح يحصلوني !!!!
تـــو ام فراس بتتكلم ماقدرت وسط انفعال اسماء وهي توقف : اللحين اللحين اتصلي على ابتسام قولي طلباتكم مرفوضه ! والزفه ابيها لو تاخذون روحي ارحم من زفتي ...
ام فراس : خلاص روقي شوي ثم بدق
اسماء بانفعال شنيع : اللــــــــــــــــحيـــــــــــن !!!!
ام فراس استسلمت وهي تقول : جيبي جوالي تحصلينه على طاولة الطعام
رحت اسماء مباشرة تجيبه وهي لازقه اذنها عند اذن امها تحتري رد ابتســام .. ابتسام كانت نايمة صحت على صوت الجوال استغربت انها نايمة للحين تنحنحت تحاول تعدل صوتها وهي ترد : هلا أم فراس
ام فراس وهي تحاول تبعد اسماء اللي كتمتها : هلا ام عبدالرحمن ... شخبارك وشخبار الصغار؟
ابتسام وهي منومتهم جمبها : بخير جعلك بخير ..
ام فراس انحرجت من صوتها : شكلي صحيتك ؟
ابتسام ضحكت بخفه : ههههه آيه بس جزاك الله خير ماصليت مدري كيف نمت لهالوقت ...
ام فراس : خلاص اجل روحي صلي وارتاحي واكلمك بعدين
ابتسام باصرار : لا لا... سمي آمريني وش بغيتي ؟ اذا بتكلميني باللي صار اليوم صدقيني انا ما احط هالموضوع حاجة شخصيه بينا وما اشكك بغلاتك واعرف انك مو راضيه
ام فراس تنهدت باحباط : آيه هذا موضوع ثاني راح اتركه لوقته ... بس انا تو كلمت اسماء عن طلبات اخوك , وافقت على طلب وعيت على الثاني ... وانا لو عارفه ان في طلبها هبال كان ماكلمتك بس البنت من حقها تفرح زي باقي البنات
ابتسام وهي مالها خلق هذا كله نطقت باستسلام : ايش ماوافقت عليه ..؟
ام فراس : الزفه ... تبي تنزف واذا هو مايبي مو مشكلة تنزف لحالها
اسماء نغزت امها وهي تاشر لها وتهمس : لاااا ... كلنا كلنا ننزف
ام فراس سكتتها وهي تسمع رد ابتسام : والله يا أم فراس مدري .. انا اعرف اخوي عنيد وراسه يابس بس راح احاول
ام فراس : وانا ماراح اطلب منك اكثر من محاوله .. قولي هذي رغبتها وان شاء الله خير
ابتسام : إن شاء الله ...
ام فراس : يله آجل بينا تواصل باذن الله
ابتسام : سلام
سكرت السماعة وهي تفرك عيونها بتعب وتحس بإرهاق بجـد ... دخلت الحمام تغسل وجهها وتتوضى وهي تصلي وتستغفر لانها اخرت الصلاة ... دقت على نايف تشوف وينه رد عليها : هلا حبي
ابتسام : هلا ياقلبي .. وينك ؟
نايف : تو طالع من المسجد وبروح للبريد استلم كم غرض ثم المعرض ثم جاي البيت
ابتسام : اهـا .. راح تتعشى بالبيت يعني ؟
نايف : باذن الله ( تغير صوته للضحكه ) شالسالفه صوتك نوم شكلي نقلت لك العدوى
ابتسام : والله مو عارفه كيف نمت كذا انصدمت لما صحيت وشفت الساعة .. حاسه راسي ثقيل بشكل
نايف : سلامة راسك .. خذي لك حبه وارتاحي والعشاء راح اجيب معاي
ابتسام : لا لا لا ! مافيه داعي راسي ثقيل من النوم ... اللحين اشرب قهوتي واصحصح ( ابتسمت ) وبعدين عندي وصفة محشي بتعجبك
نايف : ياســــلااام ... ( تدرج صوته لرنه ناعمه غزليه ) وياليت مع المحشي تنومين البزارين بدري .. دامك شبعانه نوم خل استغل طاقتك
ابتسام : ههههههه من اللحين مش بوزك .. نايمين طول المغرب ماراح ينامون بدري لو ايش
نايف : ياليييل العلل .. وبعدين دحوم ومشعل ماعليهم عتب ! اهم شي العله ام عيون مايمديني اميل شوي احسها رادار فوق راسي
ابتسام وهي تطالع رنيم اللي قدام التلفزيون : هههههههههههه هذي شكلها صاحية من صبح بتنام ماعليك
نايف : طيب انا عندي مكالمه انتظار بسكر .. تامريني شي وانا جاي ؟
ابتسام : راح ارسلك المقاضي جبها معك النواقص واجد
نايف : تمــام .. يله سلام
سكرت ابتسام وهي ترتب وضع البزران وتسوي لها قهـوة وتستعد للأعظم ... جلست على طاولتها وهي تتنهد وتضغط على اتصال جاها صوته الهادي : هلا بالغالية
ابتسام : هلا فيك ... دامني غاليه آجل اطلب براحتي ؟!
هيثم : هههه استغلال على طول ! آمريني ؟
ابتسام : وصلت طلباتك حضرتك ... وردوا علي
هيثم عقد حواجبه : دامك اتصلتي اجل فيه مشكلة !
ابتسام : البنت مصره على الزفه .. حتى لو لحالها
هيثم باستنكار : كيف مصره .؟
ابتسام وهي تحاول تفهمه : يا اخوي ياحبيبي انت ماتعرف اسوم .. البنت حبوبه وعسل بس هي عايشه عند اهلها محد يقولها لا .. حتى امها تستتر فيها يعني من رايي ياقلبي تهونها هالمرة وتتنازل عشانها تبي تنزف اتركها تنزف
هيثم : اذا هي عايشه عند اهلها محد يقولها لا انا عايش بقناعاتي .. وقناعاتي اكتسبها عن مبدأ , والزفة مامنها فايدة وش الداعي لها ؟
ابتسام : كيفها هي بنت ومبسوطة وتبي تنزف ... ماراح تخرب الدنيا اذا انزفت
هيثم : لا ماراح تخرب .. بس راح تخرب اذا من بدايتها هامتها الزفه اكثر من رضاي
ابتسام : يالله .. ( تنهدت ) عشان خاطر ام عبدالرحمن طيب ؟
هيثم : عشان خاطر ام عبدالرحمن خلاص لاعاد تتدخلين بالسالفة .. انا علمي براسي
ابتسام : شلون يعني ؟
هيثم : خلاص انا تعبتك بالتجهيزات وكلش يكفيك .. هالموضوع عندي
ابتسام وهي فعلا مالها خلق : خلاص على راحتك .. تجي تتعشى معنا اليوم ؟
هيثم : فيه العافية بس عندي شفتات مقدر ..
ابتسام : أيه على طاري اخذت اجازتك .؟
هيثم : تو بدري باقي اسبوعين .. راح اخذها قبل الزواج بكم يوم
ابتسام : اوكيه .. بالتوفيق ياعمري
هيثم : يله سلام
سكــــر هيثم السماعة وهو يدخل مكتبه ويقفل الباب ويجلس بهدوء ... وهو يفتح جواله مره ثانية ويتصل على رقم ( فراس الشمري ) .... جاه الرد بصوت فراس الرسمي : الـو
هيثم : السلام عليكم
فراس : وعليكم السلام ياهلا ومرحبا .. دقيت بوقتك حياك تعشى معي
هيثم بابتسامة : والله مانعيف .. انت وين بس ؟!
فراس : طـالع من واحد .. راح ارسلك عنواني
هيثم : حــلو ... يله اجل مسافة الطريق
فراس : على خيـــر
سكر السماعة وهو ينطق للسواق اسم المطعـم ... يكره يعزم بمطاعم بس ولا بيت من بيوته بخاطره يدخله هالكم يوم ..
***
ميهاف : يستهـــبل زوجك ؟
اسماء وهي بالسماعة وتتحرك بانفعال بالمكان : شايفة ! بغيت اموت قهـر .... كلمتهم امي ومدري وش بيصير بعد !
ميهاف تنهدت : وانتي بعد لاتزودينها .. اذا هو رفض راح تموتين مثلا ؟ خليها برضاك احسن
اسماء : لااا تخيلي ماننزف ..... ونتصور وذكريات اهلي و و ...
ميهاف : يا بنت الحلال الزفه مو اساس التوفيق ... مليون وحده انزفت اطلق زفه وتطلقت عقب شهر , يمكن هاللي ماينزفن سالمات من الحسد وحياتهن بخير
اسماء : حتــــــــــــى ولو ! انا وعدت صديقاتي خلاص
ميهاف : صدق انك مارجه ... يوم زواجك وش همك بصديقاتك عليك من الرجال !
اسماء : علي منهم كلهم !
ميهاف تثاوبت : المهم اسوم انا بسكر .. حلطمتك فجرت راسي وانا بنام
اسماء : تنامين من اللحين صدق انك دجاجة !
ميهاف : لا يختي وراي بكرة اطلع مع ابوي للشركة ابي اقوم بدري
اسماء : شعندك انتي هاليومين مداومه رسمي مع ابوك ... كل ما اكلمك قلتي لي رايحة للشركة
ميهاف : آيه ابوي جالس يفهمني كلش ومصر كل شوي اروح معه .. ( تنهدت ) يوديني يوميا يخاف اتراخى واهون ولأني كل شوي اهون بهم
اسماء : خلاص روحي نامي ... تصبحين على خير
ميهاف : وآنتي من اهله
***
جــلسة المطعـم /
كان هيثم طلب سلطـة فرنسية قدامه , عكس فراس اللي كان طبقة أدسم ستيك من رز مقلي .... وكـان التلفزيون تبع المطـعم شغال على الأخبار ... وتذيع اخبار عن تفجيرات بالعراق , هيثم باستياء : شيعــــة أكيد .. هالفترة مستلجين الله يتمم علينا الأمن بس
فراس اللي ماكان يم التلفزيون التفت له وهو ينتبه للخبر : اذاعوا انه شيعي ؟
هيثم : لا بس العراق نصها شيعه .. الاسرائليين لو بيدمرون ماراح يفجرون نفسهم راح يجون بدبابات ويقصفون
فراس رجع ياكل وهو يرد باختصار : الله يعينهم
: جيــــت !
التفتوا للؤي ... هيثم ببشاشه وقف وسلم عليه : هلا والله ومرحبا
فراس : دق علي وقلت له نتعشى فعزم يمرنا
لؤي وهو يجلس : لو عارف نقاشاتكم سياسة ماجيت عاد .. وش جوكم نسايب وقدامكم زواج وتسولفون عن سياسه ونكد !
فراس وهو ياكل لقمته : عاد لؤي تصنيفه ثاني تماما .. تصنيفه بكاء على الاطلال وهالعلوم
لؤي : والله حتى نقاش العراق يعتبر بكاء على الاطلال .. الله يعينهم من بعد صدام حسين ماعاد صار فيه حكم
هيثم بتاييد : آيه والله
فراس بانكار : الآهبل صدام حسين ؟ من جدكم اساسا بداية الدمار كان هو
لؤي وهو متعود على هالنقاش اللي دايم هو وفراس اضداد فيه : ياليييييل خلاص فهمت سكر النقاش
هيثم : ههههههه ليش شالسالفة ؟
لؤي : راح عمري مع هالمتخلف عند هالموضوع .. كل مايجي طاريه هو يكرهه وانا مو سالفة ادعمه بس كنت مقتنع انه كان له دور قوي ضد اسرائيل
هيثم : بس برضو هو يعتبر سبب الدمار اللي تعيشة منطقة الشرق الأوسط والمسلمين والعرب بشكل خاص .. هو سبب كل هذي الحروب
فراس : من جد والشرارة الاولى كانت الكويت ! يعني بالله انسان فيه عقل يغزو دولة غزو كامل بسبب بير نفط ؟!!
هيثم باستغراب : هو غزاهم عشان بير نفط ولا عشان كلام النائب الكويتي ؟
لؤي : كلها اتوقع .. هو غزوة للكويت مو موضوعنا انا اتكلم عن موقفه ضد اسرائيل اطلق عليهم 39 صاروخ ! مستوعب يارجال !
فراس ببرود : مستوعب ان اللي يحسبونه بطل هم ناس بسيطة جدا
هيثم : بس مافيه مانع يعتبرونه بطل .. وعموما فيه ابطال كثيرين مثل روزفلت وستالين وهتلر لكن مشكلتهم انهم كانو ديكتاتوريين دمويين .. مو شرط انك بطل انك على حق يعني
فراس : كل اللي ذكرتهم عندهم فن إيهام الجماهير .. وطبعا مايحتاج العالم يحبون اللي يوهمهم هذا يحطونه بطل على المستريح .. واللي يحاول يقشع هالأوهام يصير ضحيه .. دنيا منكوسة
وأستمر النقاش بيـــن وجهات نظرهم عن الوطن العربي .. واللي كان كل واحد فيهم له مبدأ حاد يناسب عقله الموزون
بعــد ما انتهى هيثم من عشاه نطق : انا ماشي .. بس معليش فراس ابيك بكلمه قبل اطلع ؟
لؤي ابتسم : ههههه مضايقكم اطس ؟
هيثم : لا والله ارتاح انا ماشي عموما بس ..
قاطعه لؤي : امزح يارجال خذوا راحتكم
وقف فراس وهو يطلع معه لبوابة المطعـم .. فراس : هـلا , صاير شي ؟
هيثم : والله ما أدري اذا صاير او لا ... اختي اليوم كلمتني ان الحريم عندهم اعتراضات على كم طلب انا طلبته ( تنهد وهو يستوفي كلامه ) شوف اختك على عيني وراسي والله ( فراس شد قبضته وهو يحبس اعصابه ) بس انا طلبت كم طلب ومقتنع فيها ومصر .. انا طلعت اختي من الموضوع وعارف حكي الحريم مايجي بنتيجة ....
فراس : وهالطلب وشهو ؟
هيثم : ما أبي الزفه .. لا لي ولا لها
فراس رد عليه مباشرة : حقـك واعتبر الموضوع منتهي ومعليش على الإحراج
هيثم : لا احراج ولا شي يا ابو فهاد .. وصدقني مو صاير شي بس بصفتك كبير اهلك حبيت اتكلم معك مباشرة وينتهي الموضوع
فراس : وانا قلت لك الموضوع منتهي
هيثم : الله يسلمك وكثير خيرك لا اتعبناك
فراس ابتسم بمجاملة دون يرد بينما هيثم ركب سيارته ومشى .. بينما فراس اختفت ابتسامته مباشرة وهو يرجع يدخل المطعـم استقبله لؤي بتعليقة : خلصت برزتكم ؟
فراس بهدوء وهو يجلس : خلصت
لؤي ابتسم : شكلها برزة ماتطمن وجهك انقلب
فراس زفر : لا انقلب ولا شي ... انت شعندك سهران اليوم ماراح ترجع لبنتك ؟
لؤي : طلعت مع اهلي اقضي مشاويرهم من عصر وللحين مارجعت المربية عندها ... فدامني طالع طالع خل ابرد خاطري بوجبة
فراس : وانت اللي معتكف اسبوع واكثر ....؟ فجاة كذا صارت الدنيا سهالات
لؤي تنهد بضيق : وضايق خلقي من البيت ابي اشم هواء
فراس : وللحين مالقت حل لبلوتك ؟
لؤي : والله بلوتي راح اتعامل معها لحالي ... سارا ما راح اتوقع منها شي بعد اليوم , ( تمتم بقهر ) اساسا معاد اهتم
فراس : اساسا انا من البداية اشوفها انسانه ماتنطاق ! مدري كيف انت طايقها للحين .
لؤي : انا كل شي عندي ايزي لحد ماكلمتها اليوم .. انكتمت بجد , انا احترق وهي متكية بالمطاعم مع ما ادري مين
فراس رفع حواجبه : وهذي مزعلتك ؟ ( ابتسم بسخرية ) ليش وش كنت تحسبها ؟ حارسة البيت ؟
لؤي : عارف انها تطلع وتشتغل .. بس هذا كانها مواعيد !
فراس : يارجال خل عني .. الكتاب واضح من عنوانه
لؤي بضيق : قد ما كنت احلم اني اكون معها وبنتنا وعايشين سوا ومبسوطين .. بس ماعاد انتظر شي الله يوفقها بطريقها
فراس : ويوفقك أنت مع احسن منها ! ( رفع عيونه للساعة ) المهم لؤي خذ راحتك انا ماشي , تامر شي ؟
لؤي : وين وين ..؟ اجلس يخي نتكي ونرجع سوا بعدين
فراس : ودي والله بس عندي مشوار بعد قبل ارجع انام .. فخلها بعدين
لؤي : براحتك اجل
طـلع فراس من المطعم وهو يركب سيارته ... ويتجه بها لبيت آهله ... بعد مرور مشوار الطريق وصل على الساعة 12 ... دخل وهو ينتبه لهم مجتمعين على تحلية بالصالة : السلام عليكم
: وعليكم السلام ورحمة الله وبركاته
ام فراس : تعال ارتاح اجلس ( نغزت اسماء ) قومي جيبي لاخوك صحن يحلي
فراس خز اسماء بنظرة وهو يجلس .. اسماء كبست بعيونها : ليش تطالعني كذا ؟
فراس التفت لانس وهو يتجاهلها : جالس اليوم انت وربعك عند مقدمة الباب صح ؟
انس : آيه بس ماطولنا
فراس : طولتوا ولا ماطولتوا ... النخل في المقدمة ابعدوا عنه الطين والزرع مدعوس كله !
انس : مب انا والله هم
فراس : ضيوفك تتحمل انت .. ودك اجيبهم من بيوتهم احاسبهم مثلا ! وبكرة مع العامل سووا الطين واقطعوا الزرع اللي خرب
انس : ان شاء الله
بدر اللي كان بالكنبة الثلاثية جالس بشكل جانب وماد رجله وعلى الايباد التفت لهم : ومن قال انكم ماطولتوا كل ماجيت اشوفكم عندها
انس اشر له يسكت وهو يأشر بعيونه لفراس : ...............................
اسماء جلست صحن الحلا قدامه وهي تنطق : بالعافية .. ترا صنع ايديا وحياة عينيا
بدر : لان مافيها فرن .. نقطة ضعفك الفرن اجل !
انس : فيها طعـم غريب
اسماء سحبت صحنه منه : وخخر ما اعجبك الطعم غريب لاتاكل !!
انس وهو يتثاوب : احسن اشبعي به اصلن بقوم انام
فراس انتبه لياسمين اللي غفت على الكنبه , ناداها : ياسمين .... ياسمين ( كبست عيونها تنتبه له ) قومي نامي بغرفتك وش منومك هنا
ياسمين هزت راسها وهي توقف وتقوم وهي نص نايمة ... اما فراس طالع اسماء وهو يسأل بهدوء مهيب : اسماء .. وش اعتراضاتك على طلبات رجلك ؟
اسماء نشبت حصا بحلقها آخر شي كانت تبيه الموضوع يوصل فراس حق انه يخزها من دخل ..... تلعثمت وهي تقول : آي طلبات !
فراس بنبرة وعيـد : اسمعي يا اسماء بلا لف ودوران .. غلطاتك كلها كوم والغلطة اللي تغلطينها وانتي جالسة تمثلين تربية بيتنا قدام رجال غريب كوم !! وبما انك اللحين تزوجتي حطي هالكلمتين خرز باذنك .. وجلال الله وعزته لو تطلع منك حركه تضايقه منك او تحطينه بوضع يجي يحاسبنا فيه لاكسر لك خشمك وراسك !! ( اشتدت نبرته وهو يكمل ) انا مــــا عندي بنات يعصن او يقولن لا .. اذا قال لك السماء خضرا تقولين له ايه ان شاء الله !!
اسماء بقهر وصوت خافت : بس انا ماقلت شي ... بس ابي زفه
فراس بشدة : الله يمحقها زفه اذا بتخلي الولد يجيني متضايق بسبب ايش ؟ بسبب البزر تبي زفه .... انا مقتنع تماما انك ماتربيتي مضبوط بس احسن لك تضبطين نفسك لأن أي شكوى ثانيه تجيني بعد ماتلومين الا نفسك ..... هذا وانتي توك مارحتي بيته فشلتينا
اسماء وهي منقهره : يعني مافيه زفه !
فراس ارتفع صوته : حماره انتي ماتسمعين .؟!!! الله يلعن الزفه واللي اخترعها .. انا احاكيها من هنا تجيني من هنا ...!! ايه ايه مافيه زفه واذا مايبي عرس بعد مافيه عرس وقفت عليك انتي تنزفين !؟ احد قالك عقد الزواج مايتم الا بزفه ..؟
اسماء بخنقة : بس انا نفسي فيها
ام فراس قبصتها وهي تهمس لها : أسكتي خلاص !!
بدر اللي كان يتابع بصمت : وحضرة الدكتور وش اللي معقده من الزفه لهالدرجة ؟ عشان خاطر البنت مافيها شي
فراس : انت تلايط ! اصلن محد خرب طبعها غيرك ..... بعذره مايبي زفه انا لو مكانه قلت مافيه زفه !!! هذا انت تزوجت باكبر زفه وش غير هذا من حياتك ؟ يمكن حالك اللحين هو عين لقطتها وانت تمشي كنك طاووس عند الحريم .... حمدالله والشكر !
ام فراس : وهو ليش مكبرها طيب ؟ حنا بس سالنا اذا عادي او لا .... ماتحمل كل هذا
فراس : ماكبرها ! مثل ما سألتوا هو جا وجاوبني .... اللي مكبرها اللحين هو انا عشان بعض الناس يفهمون ان الزواج مو لعبه ويفهمون مسؤولياتهم .... ( كمل وهو متنرفز ) لا ومن الفلاحة ماخطبها الا واحد لابس العقل لبس يعني ماراح يفوت لها ولا غلطة وحنا ما شاء الله عندنا نموذج مليان عيوب
ام فراس : فرااااس ! خلاص يا امي وش سوت البنت عشان تستاهل كل هذا ..؟ ( التفتت لاسماء اللي كانت بدت تنخنق من كلامه ) اسماء عاقله وفاهمه هي بس سالت عن شي فنفسها وبس
فراس وقف : عموما هو سالني وانا قلت له تم مافيه زفه ولا غيره .. اتفقوا على الباقي مع اخته وخلوا هالعرس يمضي على خير
وطـــلع وفور ما طلع انهمرت دموع اسماء شلال ...... تنهد بدر وهو يوقف ويجلس القرفصاء جمبها ويده على كتفاء : اسوم قلبي ( لفطت اسماء بيده وهي توقف وتصعد مباشرة دون ترد على احد )
هز بدر راسه وهو يكلم امه : وفراس هذا اسلوب يكلم فيه بنت عرسها عقب ثلاث اسابيع ! حطم نفسيتها
ام فراس بضيق : اخوك مايحب الغلط وانت تعرف ... اكيد ماتحمل ان احد ينتقده
بدر : يمه روحي لاسوم اللحين اهم شي احسها مسكينه
ام فراس : اروح لها بعدين هي اذا ضاقت محد يتحركش فيها .. بكرة بتكون احسن
بدر : الله يسمع منك .. يله انا بصعد انام بعد تصبحين على خير
ام فراس بحب : وانت من اهله
عــــند اسماء /
كانت معبيـــــــــــــة غيظ وقهر وحره وطفرة اعصاب ... وهي ترمي جوالها على الجدار حتى انكسرت شاشته وهي تحس بكئابة .. كئابة كوشتها وزفتها .. كئابة كلام فراس واسلوبه
انسدحت بحره وهي تنطق بقهر : مالت عليك ياحيوان .. حقير جاي بس يهاوش ( شهقت بين دموعها ) وهيثم هاللي رايح يركض له مايدري انه عديم مشاعر كذا .. بس الصباح رباح .. زفتي ابيها يعني ابيها
***
اليـــــوم التالي /
صحى هيثم من النوم على صوت المنبه وهو يفرك شعره المبعثر والباهت خصوصا مع أشعة الشمس ... غسل وجهه ولبس لبس المستشفى وهو يترك بالطوه على يده بنية يلبسة هناك .. جهز قهـوته وهو يطلع من شقته اللي صارت أنيقة هالفترة مع تعديله على بعض الاماكن واجتهاد ابتسام بالمطبخ ... لكن للحين مافيه لمسه تخصها ..
نـزل وهو يركب سيارته ويحركـها .... لحد ماوصل لمواقف الموظفين وهو يوقف سيارته ويدخــل.. الاستقبال : مرحبا دكتور هيثم
ابتسم هيثم بمجاملة : هلا والله .. كيف الأجواء اليوم ؟!
الاستقبال : كل حاجة تمام
كمل طريقه وهو يلبس معطفه اللي كان تاركه ع ذراعه ... اثناء ماهو يوقف عند البورد يشوف المستجدات انتبه لصوت وراه بنغمة معروفة : هيثم
وقف مكانه للحظة .. الصوت يعرفه , بس هذي هي المصيبة !!
رجعت تنطق بصوت هادي : تسمعــــني ... ؟
هيثم اطبق شفتيه على بعض بقهر .. وهو يستجمع نفسه ويلتفت ويحصلها قدامه بقامتها القصيره وشكلها المعروف بالعباية كانها مراهقة .... ومغطية وجهها بالفعل : ...............
نطقت بربكة : صبـــــاح الخير
هيثم وهو يحس لو يفلت اعصابه حبه بس قتلها .... نطق بهدوء يكاد يفلت : شتسـوين هنا !
اسماء بتبرير : ابي اكلمك بحاجة ضرورية .. وانت ماترد ع جوالك , وبما انا تملكنا خلاص مافيه مانع
هيثم ونظراته الحادة تطالعها دون ترمش ... نطق بحـدة : انا بسوي نفسي ماشفتك وبكمل طريقي .. وانتي ترجعين اللحين من وين ماجيتي
اسماء باصرار : بس انا جايه اكلمك عـــن حاجه
هيثم طلع جواله مباشرة وهو يفتش بالارقام : خليك مكانك اخوك بيجي ياخذك
اسماء قاطعته مباشرة : لا لا لا وش اخوي ! شسالفتك انت واخوي كل حاجة ...
قاطع كلامها شكله وهو يرفع السماعه لاذنه ينتظر الرد .... اسماء بلعت ريقها وهي تنطق مباشرة : بطلع ...... بطلع خلاص لاتكلمه !
اشر بعيونه لباب المستشفى : وش تنتظرين ؟!
اسماء برطمت بقهر وهي تمشي تطلع .... بينما هيثم نزل جواله اللي ما اتصل على احد اساسا مجرد تهديد , رجع جواله لجيبه وهو يمشي بخطوات حاذقه حتى وصل لمكتبه وهو يرمي الاغراض بيده ويمسح ع شعره بطفرة اعصاب ..... وهو يحس بيموت من الحرة !! مو متخيل كيف بكل بساطة تجي متى مابغت رغم انه وضح لها بكل الطرق انه يتضايق من هالحركات ....................... ارخى جسمه على كرسيه حتى تراجع ع ورا من ثقل جسمه وهو يسحب جواله بقهر ويدق على رقم ابتسام جاه صوتها : هلا هيثم
هيثم مباشرة : هلا ! ماحطول عليك بسألك الجماعة ردوا لك خبر عن الموعد ؟
ابتسام : لا والله للحين محد قالي شي !
هيثم بعصبية : ليش للحين محد قال شي وش يحترون ؟!
ابتسام بربكة من عصبيته : خلاص راح اكلمهم اسألهم
هيثم : لا تسألين ! قولي لهم قبل الزواج بيوم وخلاص .... سنه يقررون
ابتسام : انت ليش معصب اللحين ؟
هيثم وهو يحاول يهدي نفسه : مو معصب ...
ابتسام : طيب ليش قبلها بيوم دام قبلها قبلها خلها قبلها بكم يوم
هيثم : انا قررت قبلها بيوم يكفي وزياده ... انتي عطيهم خبر وبس
ابتسام باحترام لتوتره الواضح : ان شاء الله
سكر هيثم السماعة وهو يرمي جواله وحركتها للحين ضاربه اعصابه ضرب ..
***
دقت ابتسام على ام فراس : هلا والله ابتسام
ابتسام : هلا بك زود .. شلونك وشخبارك وشخبار العروسة . ؟
ام فراس : العروسة ماعليها مبسوطة
ابتسام : آيه انا احتريتكم تردون لي عن موعد الدخلة بس انتو طولتوا الله يهداكم .. فترا الولد قرر ومشى الحال ... قبل الزواج بيوم ؟
ام فراس : وانا موافقة ماعندي مشكله اللي يريحكم
ابتسام : خلاص اجل اتفقنا
ام فراس : على خير
سكرت ابتسام السماعة وهي تتنهـد بضيق وتقوم من النوم اليوم بعد طولت بالنومة الظاهر عدوى نايف بجد اشتغلت ... كانت الساعة 11 صباح بس بالنسبه لها متأخر !
انسحبت من سريرها وهي تبدا تجهز للغداء وتشوف عيالها وتبدا مسؤولياتها
عـــند اسماء دخلت ام فراس غرفتها : اسوم ؟
اسماء اللي كانت ممدة رجولها على جلستها باحباط : هلا
ام فراس دخلت وهي تجلس قدامها : شخبار العروسة ليش مبرطمة ؟
اسماء وهي شوي وتبكي : كان نفسي أنزف ..
ام فراس ضمتها بحنان : حبيبتي ياناس الصغيره بتتزوج ..
اسماء طوقت خصر امها بيديها وهي مسنده راسها على صدرها ونزلت دموعها : والله ياماما كانت احلامي اكبر من أني اروح بيته وخلاص
ام فراس : ولا يهمك ياعيوني خلي بس الزواج يخلص وانا بسوي لك احلى زفه بالبيت وبعزم الكل ... مبسوطة ؟
اسماء : ابي بثوبي الابيض !
ام فراس : والبسي ثوبك الابيض ياعمري
اسماء وهي منغمصه صدق : مو زي يوم زواجي .. والله انقهرت
ام فراس : يا قلب أمك انتي التوفيق اهم شي , يعني انتي المهم اللحين رجلك وش عليك من الناس شافوك بزفه ولا لا
اسماء : مااامااا افهميني خاطري فيها
ام فراس : طيب الرجال عنده غيره مايبيك تنزفين .. نقوله لا ليش تغار ع بنتنا ؟!
اسماء بقهر وهي تتذكره اليوم : امحق ..
ام فراس : اووه اسماء ! عيب صدق انك انانية ( ابتسمت ) عاد انا جاية اقولك بتروحين عند قبل الزواج بيوم
اسماء : مين قال ؟!
ام فراس : تو ابتسام دقت علي وقالت لي .. فيله قومي تنشطي نجهز اغراضك ونبدا نرتبها ببيته ولا ناويه تنكبين نفسك باخر ساعه
اسماء هزت راسها : ان شاء الله ..
خذتها ام فراس معها وهي تحاول تروح عنها .. ومقدره نفسية بنتها واحلامها الصغيره ..
***
مـــرت الأيام ويوم يلحق يوم ..
فراس على حاله .. من آخر مرة ماقرب الفيلا ولا فكر .. ابتعادا عن أي حساسية ممكن تصيبه ( لا قدر الله ) من قربه منها ..!
غادة كانت تعيش وحدتها بهدوء وصمت .. .وتحس نفسها مهمومة بشكل من غيبته هو بالذات ماتدري ليش فجأة قرر معاد حتى يطل عليها ..
اسماء تتجهز ويوميا ام فراس وميهاف معها يروحون لشقتها يجهزون اغراضها ويرتبونها ببيت هيثم
هيثم احتراما لزياراتهم هالفترة اعتزل شقته وتركها لهم لحد مايخلصون وصار يجلس بالمستشفى على طول حتى النوم
***
صبـــــاح يوم هيثم وأسماء ... اسماء من صحت من النوم وهي مو مستوعبة انه يومها خلاص ورغم دراميتها كل هالفترة بالزعل عشان زفتها اللي طارت ... وقت وصل الجد نست كل هذا وتزينت بمشاعر رهبة مع حماس مع فرحة وهي مو عارفة شتسوي بالضبط حتى انها وكلت كل شي لميهاف لانها مره عايش رهاب !
ميهــــاف كانت مع اسماء وام فراس وصلوا لبيت هيثم .... ميهاف اول مادخلت زغلطت بحماس وابتسام اللي كانت موجودة ضحكت بمرح : هههههههههههههههههههه حياكم هلا والله .. ( التفتت لاسماء اللي ورا امها ) هلا بالقمر حياك
اسماء بربكة طبيعية : هههه هلا فيك .. ( بلعت ريقها وهي تمسح بعيونها على الشقة العصرية تماما . . الوان رتيبة دون أي تمرد باي لون وكل حاجة مرتبة باناقه )
ميهاف وهي تتجول بالشقة : اسوم اللحين هذا بيتك ؟ والله وكبرتي وصار عندك بيت
ام فراس : ترا عزمت عمتك وبناتها
اسماء : مافيه مشكلة حياهم .. ( ألتفتت لميهاف ) الكوافيرا متى بتجي .؟
ميهاف : بتجي بتجي بس انتي روقي ( ألتفتت لابتسام ) ابتسام وين غرفتهم عشان نجلس تتجهز عاد
ابتسام : حياكم تعالوا
دخلتهم ابتسام الغرفة اللي كان نظامها عصري جدا .. رفعة بنص الغرفة تحتوي السرير الواسع الدائري , وبزوايا الغرفة مرتبة الدواليب والجلسة ومكتبه برضوا بنفس الغرفة .... اسماء كانت الغرفة بعيدة عن ذوقها بس كانت انيقة فعلا ....
ابتسام : هاه شرايك فيه شي ما اعجبك عاد خلاص تفاهمي مع الأخ انا اسحب يدي دامك وصلتي له !
اسماء بحياء غريب عليها : لا والله تجنن ما شاء الله
ام فراس كانت مادخلت معهم وهي تدق على فراس .. جاها صوته : سمي يمه
ام فراس : سم الله عدوك .. شخبارك ؟ وينك يومين ماعاد تطل ولا اشوفك
فراس : قبل امس طرت علي سفره وتو رجعت اليوم ... المهم انتو شخباركم ؟وصلتوا اسماء ؟
ام فراس : آيه تو دخلنا بيتها .. والبنات كلهم معها اللحين , وابي كان اقولك تجيب غادة تتونس معاهن
فراس تنهد بضيق : يمه راح نضطر نزعل بعض كل يوم عشان هالموضوع ؟
ام فراس : الله لايجيب الزعل وش موضوعه .. زواج اخوها يحق لها تجي تبارك وتجلس مع هالبنات
فراس : ما أقدر .. اساسا الفيلا لحالها مشوار وش بياخذني اجيبها واوديها
ام فراس : بروح انا والسواق نجيبها انت ارتاح
فراس : انتي خليك مع اسماء اليوم .. واساسا ليش مجتمعين عندها بنات واجد ! البنت رايحه تبسط معهن ولا تجهز بيشغلونها على الفاضي ... فراغه صدق
ام فراس : يعني ماراح تجيبها ؟
فراس : لا ماراح اجيبها ... واسماء تنشغل بعمرها احسن ! وانا عقب صلاة العشاء مباشرة بجي ياليت يكون مقلاط الحريم خلص وقتها
ام فراس : على خير ...
سكرت السماعة وهي تدخل للبنات المجتمعين حول اسماء .. ابتسمت لام عبدالمجيد ووداد ( سجى ممنوع تجي باوامر ابتسام ) واريج و مرام : هلا والله حياكم
اريج بوناسه : نووورة امانه امانه طلع الولد ذويق شقته تفتح النفس
وداد : هههههههه تصدقون عاد ماني متخيلة اسوم متزوجة مررره مو لايق !
ام فراس : هشش لا تقولين كلمه تشبينها عليك اللحين .. زين انها بالحمام ماتسمع
اريج : ماعلي منها طقاق !
طلعت اسماء وجلست مع اهلها دقيقة وهي مو يمهم كلها ادرنالين مو عارفه كيف تعبر عنه ... اول ماوصلت الكوافيرا قامت منهم وهي تجهز وميهاف فوق راسهم تعلمهم بكل شي وكانت هي المشرفة تقريبا على طلة اسمـــاء ...
على اذان المغرب كانت اسماء انتهت من مكياجها اللي كان مزين بالروج الأحمر الناصع والكحل الفرنسي على عيونها البريئة ومكياجها زادها طفولة ولطافه ... شعرها الاشقر لاخر رقبتها موجته على طريقة التسعينات مثل ماقالت حتى صار لنص رقبتها .... دخلت تلبس فستانها وطلـعت وهي طلتها كملت كان الفستان المنفوش لايق على جسمها الضئيل ... نفشته علىطولها معطيها اطلالة طفولية بجد ... لبست حلق لؤلؤ وهي توقف بمسكتها وتبلع ريقها وتسأل اللي حولها بتوتر : حـــلو ..؟!
ابتسام : ما شاء الله تبارك الرحمن حبيت الفستان مرة جنان
ام فراس لمعت عيونها وهي تقرب منها وتضمها بحنان : والله وعشت وشفتك عروسة .. الله لايحرمني منك يارب قمر ياعمري قمر
ياسمين ضمتها مع ام فراس .. اسماء : ماااماا ياسمين والله بصيح اتركوني
ميهاف سحبتها : هههههههههههه لا لاتصيحين تعبنا على المكياج والله
وداد شغلت لها أغنية فرحاوية وهي تنطق بحماس : بحق ماترقصون لها ارقصوا تستاهل زين البنات !!
اسماء جلست بمكانها المقرر لها بالجلسة الناعمة بغرفة النوم .. والبنات قاموا يرقصون لها بحماس ,, سحبتها ميهاف ترقص غصب مع ام فراس .. واسماء اكتفت بحركات ناعمة لان الفستان مسبب لها صعوبة بالحركة ...
بينما اريج ومرام جهـزوا الكيكة والعصير وجلسوه مكانه وهم يحتفلون معها من قلبهـــم .. , قبل اذان العشاء بدا الكل يروح لبيته ماعدا ابتسام وام فراس وياسمين ....
ميهاف وقفت عند اسماء قبل تطلع وهي تهمس لها : تركت لك قميص ناعم بالدرج الوسطاني البسيه اليوم .. ( كملت بخبث ) هذا في حال احتجتيه
اسماء ولع وجهها وهي تهمس لها بقهر : ميهاف لاتوتريني ياسخيفة .. دون شي بموت من الخوف
قاطعتها ميهاف وهي تحضن يدها : ماعليك ماعليك . . روقي اعصابك واسترخي اهم شي التوتر راح يحوس عليك كل شي .. ( كملت بهمس ) وعشان ترتاحين مو الــكل يصير معهم شي من أول ليلة يعني يمكن تسلمين اليوم وفي حال حصل شي خليك مستعده
اسماء بلعت ريقها بصعوبة وهي تحس بتوتر فضيع .. طلعت ميهاف وهي تحس قلبها طلع معها ميهاف اللي كانت معها خطوه بخطوه بكل حاجة لحد اللحين , ميهاف اول مانزلت انتبهت لرجالين جمب بعض فراس وبدر .... كانت هي بآخر ادرج وهم يصعدون بنصه .. بدر عرفها مباشرة وهو متعلقه عيونه بعيونها .............
ميهاف بلباقة سلمت : السلام عليكم
فراس من الصوت عرفها كانت عيونه بالارض وهو يرد : وعليكم السلام ورحمة الله ... شلونك ميهاف ؟
ميهاف : حمدالله بخير .. على البركة زواج اسوم
فراس وهو يخز بدر : يبارك فيك يارب
ميهاف بقهر من تجاهله قالت : انا السواق ينتظرني تحت .. في امان الله
فراس : ليش السواق بدر موجود اذا حابه يرجعك ؟!
ميهاف : لا تسلم مافيه داعي السواق وصل خلاص
وطلعت .. بينما فراس التفت لبدر بنص عين وهو ينطق : ما شاء الله عليك
بدر بقهر : وش تبيني اقول !
فراس : لاتقول شي خلك جدار ( وصعد لفوق )
دخــل مع بدر الشقة بعد ما دخلت ابتسام غرفة جانبية وبدر ابتسم مباشرة لما شافها بالفستان الابيض وواضح مرتبكة وجمب امها اللي قامت لما شافتهم : هلا والله جيتوا
بدر جلس مكان امه وهو يحاوط كتوفها : وش هالحلا كله اسوم تجننين ( حضن يدها اللي كانت شادتها على المسكه وهو يبوسها ) يابخته فيك والله .. بس ترا حتى لو تزوجتي تظلين دلوعتي هو يدور له دلوعه غيرك
اسماء وهي استرخت لما شافت بدر : هههههههه .. ( كملت بدلع ) لا بجحدك خلاص مابيك !
بدر : لا تخليني اتهور اقتل زوجك عشان تضلين عندنا !
اسماء شهقت : بسم الله عليه
بدر : اوهوووه من اللحين بسم الله عليه وحركات
فراس اللي كانت جمب امه ويطالعهم واقف .. نطق بهدوء : بدر ابعد شوي
بدر ابعد يده عن كتوفها بس مازال جمبها وهو يبعد شوي لانه كان لازق فيها .. فراس جلس بكرسي مقابلها تقريبا .. وهو يمد يده يحضن يدها الناعمة بيد وبيده الثانية يمسح على ظهر يدها و ابتسم ابتسامه بسيطة زينت ثغره وهو ينطق بصوت ناعم : مبروك لك عرسك جعل ربي يهنيك .. ( تنهد ) انا ادري انك زعلانه علي بس انا ماقلت اللي قلته إلا لاني اعتبرك تمثليني .. الله يشهد علي اني ماعمري شفتك اختي .. من توفى ابوي الله يرحمه وانا احسك بنتي .. ( رجع يبتسم ) وتخيلي مشاعر ابو يجيه احد يشكي له بنته .. انا ابيك قمة أسوم ولا يهون علي احد يتكلم عنك ..
اسماء وهي تأثرت بجـد .. : وانا آسفة بعد لأني ازعجتك عند موضوع سخيف .. ( لمعت عيونها وهي تستشعر حنانه) واسفه على كل مره ازعجتك فيها .. وانا يشهد علي ربي احسك زي أبوي .. ليش احسك بعد ؟ انت ابوي !
فراس ابتسم وهو يرفع يده عن ظهر يدها ويمسك ذقنها بنعومه : بالضبط .. واي حاجة تصير لاسمح الله انتي في وجهي مو وجه غيري .. وانا بس لو اتخيلك واقفة قدامي تقولي زوجي ضايقني ما أدري وش ممكن اسوي .. اسأل الله ماينتقم مني فيك ويجعل ايامك سعد وهناء يارب .. وانا ماوافقت على هيثم إلا اني اشوفه رجال بيحفظك ويعزك ولو يوم احس بغير هالإحساس ماراح اتركك له لو يموت
اسماء نزلت دموعها وعيونها معلقه فيه : ...........
فراس استرسل بكلامه : هيثم حالته المادية كويسة .. بس مو مثل اللي انتي تعيشينه , انتبهي تحطمين فيه بالمظاهر او غيره .. عيشي حياته حتى لو كانت بسيطة ولا تضغطين عليه فحاجة ممكن مايقدر عليها .. لأن كرامة الرجال صعبه واذا انجرحت مستحيل يسامحك فانتبهي ..
اسماء وهي تحاول تمسح دموعها .. وام فراس اللي كانت تمسح دمعها وبدر حاوطها من كتوفها لما شافها تبكي : .....................
فراس : واعرفك بصلتك محروقه بس انتبهي تثورين اذا شفتيه ثاير .. واذا شفتيه غلط داوي غلطته بالصبر .. خليك له الارض يكون لك السماء .. وخليك له معاد يكون لك عماد .. احفظي دينه وبيته وشرفه لاتخلينه يشوف منك الا الطيب .. ( ضرب على يدها بخفه اختتام لكلامه ) والله يسخركم لبعض
اسماء ودموعها رسمت شلالات على خدها : من عيوني ان شاء الله ..
فراس وهو يمسح دموعها : يابنت الحلال لاتطيرين الرجال بهالدموع هدي ..
اسماء هزت راسها بانكار : مقدر والله باشتاق لكم ( ضمت فراس وهي تستشعر قد ايش طلع فعلا ابوها )
فراس تنهد وهو ينحني لراسها يبوسه ويبعدها بخفه : امسحي هالدموع وانبسطي خلاص ماتسوى علينا ترا
اسماء بلعت ريقها وهي تمسح دموعها ... فراس التفت لامه اللي كانت حالتها اسوأ من اسماء : بعد انتي يمه من جدكم ! بيوصل الولد اللحين بيحسبنا عازميه على عزاء مو عرس
ام فراس وهي ماتمالكت نفسها وهي تشوف هالمنظر الحميم بين عيالها : الله يخليكم لي يارب ويسعدكم بحياتكم . . . آممين
دق جوال فراس .. طالع المتصل وهو يوقف : هذا الرجال وصل ( رد ) هلا ابو مشعل
هيثم : انا تحت الدار امان اصعد ؟!
فراس : ايه الدار امان حياك ( سكر السماعة وهو يلتفت لامه وياسمين ) يله البسوا بنسلم عليه وبنطلع
اسماء بهلع : لا امي تجلس شوي تكفون لاتروحون كلكم فجأة
بدر : والله ان طلعنا بكرامتها ولا طردنا انتي شايفه عمرك ؟!
اسماء : بلييييييييز ..
فراس : اسماء وامي بتنام عندكم بعد .؟ خلاص دبري عمرك ماراح ياكلك ترا ..
ام فراس : وبعدين ابتسام موجودة عندكم ماراح تطلع اللحين ارتاحي
اسماء بزعل : يعني هو اهله موجودين وانا لا
سكتت وهي تنتبه للباب ينفتح ... دخل هيثم وعيونه بالارض مرتبك من جو اهلها كلهم موجودين , كان بالبشت وطلته كامله .. : السلام عليكم
اسماء شدت على مسكتها وهي تستشعر الصوت اللي انتظرته كل هالفترة : .......
فراس : حياك الله تفضل مافيه احد غريب
دخل هيثـــم وهو يسلم مباشرة على ام فراس ويبوس راسها : بالخير خاله شلونك ؟!
ام فراس : بخير ياولدي .. انت كيفك ؟
هيثم ابتسم ابتسامته الهادية البسيطة :حمدالله بخير
طالع ناحية اسماء اللي كانت جالسة ومنزله عيونها .. تبي تختلس نظرات لكن وجود اهلها موترها ...
فراس التفت لاهله : يله مشينا ..
طلعـوا اهلها كلهم مره وحده ... بينما هيثم انحنى لراسها وطبع بوسه ناعمه وهو يجلس بمكانه جمبها بمسافة معقولة : مبروك .
اسماء رفعت عيونها البريئة له بربكة : يبارك فيك
هيثم أول مرة يحس انه يقدر يتأملها براحة ... كل مرة تكون ظروف مضايقه له , كانت طفولية بجد وطالعة ملاك صغير بفستانها وطلتها الناعمه ...
طلعت ابتسام بهاللحظة من الغرفه الجانبية : كولولولوليش الف الف مبروك .. ترا اقتحمت لاني حسيت ام فراس طلعت ونستني وخفت تتهورون !
هيثم وقف يسلم عليها : هههه هلا ام عبدالرحمن شمجلسك للحين ؟!
ابتسام : اتطمن عليكم وابارك لكم وبذلف اللحين نايف تحت ... يله الف مبروك حبيبي ( ألتفتت ) الف مبروك اسوم الله يسعدكم
ابتسم هيثم بمجامله وابتسام طلعت بينما هو تنهد وهو يرجع يجلس ويطالعها من فوق لتحت .. وشكلها كان جذاب بجد : ما شاء الله تبارك الرحمن .. وش هالحلا كله مرة وحده ؟
اسماء ابتسمت برضاء وهي تطالعه بعيون تلمع وهي تشوفه .. وقلبها يضرب فيها وهي مو مصدقه : ماعليك قصور ..
هيثم وغضبه كله طفى .. مايقدر يعاتبها وهو اللي كان ناوي بعد ماشافها بهالملائكية قدامه , حضن يدها : واخيرا شفناك بالحلال ؟!
اسماء ضحكت بنعومة وشقاوه : هههههههه انا شايفتك حلال من أول نظرة
هيثم رفع حواجبه : وااضح
اسماء تنهدت وهي ترفع يده لخدها الناعم : اقرصني عشان اتأكد ان هذا مو حلم .. ( تنهدت بحب ) والله مو مصدقه عيني اني انا وياك سوا
هيثم بكل بساطة بيده اللي رفعها لخدها قرصها .. اسماء : اااا !! ( افلتت يده اللي مازالت متعلقه بخدها : صدقتي اللحين ؟!
اسماء مسحت على خدها بالم : تتعععووور !!
هيثم سند يده على الكرسي وهو يقرب منها : شوي فيك على حركتك قبل اسبوعين .. ولا ؟!
اسماء بلعت ريقها : هاه ؟! قبل اسبوعين مو عارفه ليش عصبت .. كنا متملكين ( كملت بقهر ) وبعدين ليش ماترد ع جوالك ؟!
هيثم : وش طعـم الزواج وانا كل يوم اسمع صوتك واشوفك !
اسماء بانحراج : عاد صار وصار
هيثم : ايه وايش كنتي جايه تقولين ..؟ الزفه صح ؟!
اسماء بسحى على وجهها : آيه الزفه .. بس خلاص ماتهم ( طالعته ) اهم شي انا وانت اللحين
هيثم : من أول كان .. ( طالع بانحاء البيت ) شفتي البيت ولا امشيك عليه ؟!
اسماء : شفته ورتني ابتسام .. يجنن صدق
هيثم : بخاطرك شي معين قولي بما انك ما اخترتي شي
اسماء مباشرة : لا لا .. كلش يجنن دامه ذوقك فهو ذوقي
هيثم ابتسم : كويس آجل ..
اسماء : .....................
هيثم بدا التوتر يخنقه .. مو عارف شيسوي اللحين ؟ واسماء نفس الشي .. حماسهم لشوفة بعض تحول لصمت في ظل الموقف المربك ... هيثم طالع بالطاولة قدامهم : بتاكلين ؟
اسماء : هاه .... لا حمدالله.. . و .. وانت ؟
هيثم : لا ..
اسماء تذكرت كلام ميهاف وهي للحين متوترة بجد .. بلعت ريقها وهي تنطق بربكة وهي توقف بفستانها اللايق عليها : اا .. اجل انا بروح ابدل
هيثم اللي كان التوتر متمكن منه بشكل آكبر منها نطق بهدوء : اكيد خذي وقتك تفضلي
اسماء لقت مهرب كويس .. مشت بفستانها وفجأة تسارعت مشيتها حتى دخلت غرفة النوم واختفت من قدامه وهي تسكر الباب وقفت لفترة قدام المراية وصدرها يرقى وينزل بصعوبة وهي تحاول تهدي نفسها ( احس اني انجنيت وانا افكر بس .. واذا طلع كلام ميهاف صح وهو مايفكر بشي اليوم ! بس حتى في موقف مربك بجنون كذا .. اسماء اني ماعدتي بزر أي حاجة بتصير بتكون حاجة طبيعيه فهدي اعصابك هذا هيثم الحب اللي انتظرته وحاربت عشانه كل هالفترة ... روقي .. روقي ) .... فتحت الدرج اللي قالت لها ميهاف وحمدت ربها على ميهاف اللي ماصعبت المهمة وكان القميص ساتر .... نزعت الفستان وهي تلبس قميص ناعم عفيف ابيض و شعرها الاشقر اسدلته على وجهها بتلفيفاته دون تزيل المكياج تعطرت بعطر ساحر من اختيار ميهاف وهي مو عارفه كيف تطلع اللحين ... تنهدت وهي تفتح الباب وتحس الهواء وقف لما التفت لها بعيونه الرمادية يطالعها ... هيثم بلع ريقه وهو يشوفها .. شكلها كان ناعم وملفت فعلا .. حاولت تكون طبيعيه وهي تنطق : نافذة غرفة النوم تجنن .. واسعه والمنظر مره يفتح النفس
هيثم اللي اعصابه بدت تلعب فيه وهو يحس بعجزه بهالمواقف يتمنى يطلع للمستشفى ويجري عملية عشر ساعات متواصله ولا يجلس بهالجو دقيقة نطق بهدوء : اها .. كويس اعجبتك
انتبهت له يوقف . . سالت بتوتر : وين ؟
هيثم اللي كان بشته نزعه بالفعل وبيده : راح ابدل بعد انا ارتاحي
اسماء هزت راسها : اها .. اوك
دخل هيثم غرفة النوم وهو يسكر الباب ويرخي ظهره ع الباب وبغضب من نفسه ( هيثم شقاعد تسوي انت ! مهبول بزر ؟ ) فك ثوبه وهو يعلقه ويحس باعصابه متوترة بشكل مب طبيعي دخل الحمام وهو يغط راسه تحت الموية ثم يوقف ويطالع نفسه بالمراية .. يحس الموية هدته شوي
عــند اسماء كانت جالسة بالجلسة بالصالة وهي سافطه ساقها تحت فخذها ويدينها على فخذها وجالسه بنظام ومرتبكة بجد ( انا متوترة بجد ليت امي ماراحت .. اهه بطني يوجعني ! سويت كل شي ؟ صح ؟ فرشت اسناني تعطرت تنظفت خلاص ! وخسرت اربع كيلو قبل الزواج يعني ارتااحي ... مقدر احسني خايفة صدق – تعلقت عيونها بباب الغرفة وهي تحسه طول – طبيعي اخاف طيب كل البنات كذا ..- شدت على قبضتها على قميصها الناعم ) بس يضل مستحيل مع كل هالتوتر .. شاسوي ياربي ؟ )
: لا تحوسي في قميصك ماله ذنب
رفعت راسها وهي تنتبه له لابس سروال قطني كحلي مضغوط من اطرافه وبلوزه بياقه مفتـــوحه بقوه حتى ان مقدمة صدره المفتول واضحه وكتوفه .. وعلى راسه فوطه يفرك بها شعره اللي تبلل .. اسماء توترت من شكله اللي كان قمة بالجاذبية وشعره بلونه الملفت مبلول تورد خدهــا بقوه .. : .........
التفت ناحية الساعة كانت ( 9 حكم ) تنهد : شمجلسنا اللحين ..؟ قومي ننام ..
اسماء ووجهها انصبغ ردت بتوتر : اا .. بتنام اللحين يعني ؟ طب لحظة نتكلم شوي تو بدري ..
هيثم بهرب من الموقف تنهد : معليش اسماء اعو ضك بعدين .. بس لي كم يوم نومة المستشفى ماتريح
اسماء نزلت راسها باحباط : اوكيه نوم العافية .. بكرة نتكلم اجل
هز هيثم راسه بهدوء واسماء وقفت معه وهم يدخلون غرفتهم .. وقف عند الليتات يطفيها تماما .. وهو يتوجه ناحية زاويه من السرير ويعطيها ظهره وينام .. رغم انه مانام كان نايم بدري امس ومشكل مريح بفندق لكن التوتر عطاه هالذريعه وعدم تعوده على عشرة ووجود شخص جنبه بحياته كان موتره اكثر : ................
اسماء راحت لطرفها وانسدحت وهي تغرق بتفكيرها ( كويس كذا صح ؟ ماكنت مستعده نفسيا اساسا .. رغم اني منقهره ان الليلة خلصت كذا بس فيه ايام واجد جايه .. ) التفتت ناحيته وهي تشوف ظهره الطويل غيرت ناحيتها وهي تقابل ظهره بوجهها وتتأمله وتحاول تستوعب حياتها الجديدة ... رغم انها استغربت هدوئه حسته بزيادة ؟ بالبداية تكلم عادي بس فجأة سكت ...... ظلت تطالعه لحد ماغرقت بالنوم بينما كان هيثم مكبس عيونه للأخير .. وفي ظل غرفته المظلمة الا من نور النافذة للقمر .. كان مرتبك حتى انه يلتفت ويشوف المخلوقة اللي نايمة جمبه .. ولآخر الليل جافاه النوم ..
***
الصبــــاح /
هيثم ماغفى الا على الساعة 4 ... فغرق بنومته حتى انه ماصحى يصلي الفجر , ولا اسماء صحت بطبيعة الحـــال ....
الساعة 9 صباح فتحت اسماء عيونه وهي تجلس من نومها .. تلفتت حولها وهي تشوف تأثير الشمس على الغرفة واضائتها غير .. التفتت للي نايم جمبها على نفس وضعه من امس وشعره الاشقر الرمادي الاشعث متناثر على جبينه بشكل يجذب .. ابتسمت وهي تحبس ابتسامتها بيدها على اثر وجوده جمبها ..... سحبت نفسها من السرير وهي تفتح الدولاب بهدوء تام عشان ماتزعجه وتسحب لها فستان وتدخل الحمام على اطراف اصابعها وتحس مشاعرها متجدده بشكل فضيع .. فتحت الدرج بحماس تبي غرض معين ماحصلته .. فتحت دروج ثانيه تدوره ماحصلته ... تاففت شكلها نســته .. رجعت تجلس على التسريحة وهي تفتح علبة كلها خواتم الماس وذهب وفضة ... وتبي تختار لها حاجة تناسب بهاللحـــظة فتح هيثم عيونه ببطء وهي يستقعد بجلسته ويتثاوب .. : صبـاح الخير
انخز وهو ينتبه للطفلة الكبيرة اللي جالسه على تسريحته وملتفته له بابتسامه مشرقة .. آآه تذكر صح امس كان زواجهم , من اليوم راح يصبح عليها .. كان وجهها يشع حيوية بالصبح : قمتي ؟
اسماء بانتعاش : آيــوه قمت .. ( كبست بعيونها وهي بس تطالعه بهيئته المبعثره وهو تو صاحي من النوم .. وبلوزته بالياقة العملاقة )
هيثم ارتبك من نظرتها له وقف وهو يطالع الساعه : صليتي الفجر ؟!
اسماء : آيه تو لما قمت صليت .. انت صليت ؟
هيثم : لا بصلي اللحين وعقب خل نطلع نفطر
اسماء هزت راسها بموافقة : اوكيه
لما انتبهت له يدخل الحمام يتوضى ويصلي .. تنهدت بحب لحياتها الجديده رغم انها للحين تحس باحباط انها حتى ماجربت .. لمسه حنونه منه : ...............
استغلت الفرصة تطـلع من الغرفة وهي تسحب جوالها .. فتحته وهي تدق على رقم ميهاف جاها صوت ميهاف المتحمس : الــــــــــــــــو !!!!! اسماااء .... داقه هالوقت ؟! صباحية مباركة ياعروسة يادبه ايه شخبارك شلونك ؟ ابي كل شي بالتفصصصيل الممممل لو سمحتي
اسماء وهي توطي صوتها عشان مايسمعها : هههه هش يختي بسرعه بقولك شي ع السريع خلي هالعلوم بعدين ..
ميهاف : اخس طلع عند اسماء صوت هادي ما اعرفه ... من متى .؟!!!
اسماء : اسمعي .. تذكرين الهدية اللي شريتها له معك ؟
ميهاف : آيه
اسماء باحباط : نسيتها ببيتنا ... تقدرين تمرين تجيبينها لي ؟ تعرفين مقدر اوصي امي احراج بتقول ليش وكيف شريتيها !
ميهاف : خلاص ولا يهمك ياقلبي
اسماء : يله اجل اليوم تكفين حاولي تجيبينها بس مو اللحين لأن بنطلع اللحين
ميهاف بفضول : وين بتطلعون ؟
اسماء : افف يله مع السلامة
سكرت السماعة وهي تدخل جوالها شنطتها اللي اختارتها لطلعتهم .. طلت على غرفة النوم حصلته واقف قدام التسريحة بثوبه السعودي الابيض دون غتره ويمسح على ذقنه بالعطر , ثم استلم ساعته وهو يزين بها معصمه ... انتبه لها تتامله عند الباب التفت وهو يبتسم ابتسامه ناعمه تناسبه : معــــجبه .؟!
اسماء رفعت حواجبها : حيــل ..
هيثم سحب مفاتيح سيارته وهو يرد : يله عاد مشينا لا نتأخر
اسماء لما اقبل لها عند الباب كانت تنتظر شي .. اقلها بوسة خد او لمسة يد .. لكن مر مرور الكرام دون شي .. حست باحباط بجد : .............
خذت عبايتها وهي تحاول ماتتضايق على اشياء كذا يمكن هذا طبيعي عادي : .........
لبست وهي تطلع معه كانت تتحمس للتفاصيل الصغيره .. مثل فرشاة اسنانها اليوم لما استعملتها جمب فرشاة اسنانه حقيقة انها بتركب جمبه بالسيارة .. حقيقة انها زوجته كلها تبعثر مشاعرها ... لما ركبت سيارته كانت ريحتها تعج بريحته المألوفة .. اول ماركب دق جواله رفعه وهو يبتسم وينطق لها : هذي ابتسام ( ثم رد ) هلا ابتسام
ابتسام : لا اشوى صوتك صاحي ! صباحية مباركة يابعد قلب اختك
هيثم وهو يطلع بالسياره من المواقف ويمشي بالطريق : يبارك فيك
ابتسام : شخبارك وشخبار العروسة مبسوطين ؟!
هيثم وهو يلتفت لها وهي تطالعه : كلنا بخير .. امريني ؟
ابتسام : امرك على طول ! فهمت اني مضايقه خصوصيتك بس حبيت اقولك ترا غداكم بيوصلكم اليوم من عندي والفطور والله دقيت عليك ارسله بس مارديت والسواق انلطع ورجع
هيثم : ليش كلفتي على حالك مافيه داعي ؟
ابتسام : مافيها كلافه ولا شي .. بيتك مافيه شي وش بتاكلون يعني !
هيثم : يعطيك العافية ماتقصرين
ابتسام : يله اجل اخليك اللحين براحتك
هيثم سكر السماعة وهو ينطق : غدانا برعاية مطبخ ابتسام اليوم
اسماء : ياحليلها شايله همنا
هيثم : تشيل هم الكل ابتسام طول عمرها كذا
اسماء : و غادة ؟ ... علاقتك معها ما احسها زي علاقتك مع ابتسام
هيثم ماحب يتنكد بهالمواضيع بهالوقت فرد باقتضاب : ابتسام هي الكبيرة وهي اللي دايم تشيل همي وتتواصل معي عشان كذا هي غير
اسماء حست من رده ان مافيه عداوه بينه وبين غادة : اهـــا .. هيثم كلمني عن اهلك , احس لا انت ولا ابتسام ولا حتى غادة تتكلمون عنهم
هيثم : مافيه شي اتكلم عنه .. كلهم تعرفينهم امي ماتت بعد ماولدت غادة وابوي مات قبل خمس سنين من السرطان
اسماء انقهرت من سؤالها اللي فتح مواجع : آسفة مو قصدي اسالك
هيثم ابتسم يطمنها : لا عادي مافيها شي .. بس قصدي ان مافيه حاجة مهمه اقولها , انتي تكلمي عن اهلك
اسماء : همممم اهلي بابا مات وانا صغيره ما اذكر منه شي مره
هيثم : كيف مات ؟
اسماء : موته طبيعيه مافيه سالفة يعني .. وماما هي ماما انسانه طيبة مرة و عندها الموت اهون من ان احد يزعل عليها , وبعدين فيه فراس هذا مكانة ابوي حتى سلطته يحس نفسه ابونا يتسلط بشكل يمغث .. وبعده بدر هذا الحب كله يعني احب اخواني لي , ثم انس مراهق للحين ماهو فاهم نفسه بس طموحه يكون زي فراس .. وياسمين هذي هدوء زايد
هيثم : الله يخليهم لك يارب
اسماء بحب : ويخليك لي
ابتسم هيثم دون يرد وهو يوقف عند المطعم الصباحي باطلالة منعشة : يله انزلي
انقهرت اسماء من تجاهله لجملتها بس سلكت برضوا وهي تنزل معه عشان يفطرون ... وكانت محادثاتهم على الفطور عشوائية واغلبها كانت عن المكان والاطباق ... وهذا اللي قهر اسماء مافيه رومانسية اللي هي تبيها ....
***
المغـــــــرب /
قرر فراس يمر على الفيلا لان مو معقوله تمر اسبوعين مامر .. دخل الفيلا الهادية تماما وهو يفتح الباب الرسمي وينادي : غااادة ؟!
غادة اللي كانها مرمية في بير وتو سمعت صدى .. كانت تو تروشت بغرفتها رمت فوطه ع شعرها المبلول وهي تنزل الدرج بخطوات متسارعه وترد : هلا !
فراس سبقتها ريحتها له .. ريحة عطر خفيف بالليمون المنعش , رجعت الحاله تعاوده بس بالخفيف ... نطق بهدوء : ناقص البيت شي .؟
غادة باحباط : ايه ناقص كم غرض ..
فراس : ارسليها لي برساله وراح اوصيها لك
غادة : كيف ؟ بجوالي السحري ؟
فراس انتبه ان جوالها مب معها زفر : اللحين طيب اعجلي اكتبيها بورقه هاتيها
غادة : طيب
دخلت المطبخ بينما هو جلس على كنب الصالة وهو يطالع انحاء الفيلا الصماته الا من خشخشة بسيطة بالمطبخ .... بعد خمس دقايق جت بورقة وعطته اياها دخلها جيب ثوبه وهو ينطق بهدوء : راح توصلك بكرة
غادة وهي تلعب بيدها : فراس ..
فراس : ايوه
غادة تنهدت بضيق وهي تجلس بمكان بعيد عنه تقريبا : والله ماراح تندم .. وعد مني لو تبي اللي هو راح اعطيك .... وصدقني ماراح يصير شي مايعجبك
قاطعها فراس : غادة تراني اتنرفز من اللي قعدون يلمحون ويلفون يمين ويسار ياتتكلمين ياتسكتين !
غادة اختصرت وهي تقول : اذا جا عرس اسماء ابي احضر ( كملت بقهر ) والله انكتمت من جو البيت ابي اشوف العالم
فراس ظل يطالعها دون يرد : .................
غادة : ولا راح اطول اذا تبي بس بروح ..
فراس بهدوء : طيب وش تنتظرين ليش مالبستي ؟
غادة كبست بعيونها : كيف يعني !
فراس : عرس اسماء ذالليل .. بتروحين اعجلي البسي
غادة كبست بعيونها مليون مرة ماصدقت : جد ؟ جد ؟ !!
فراس بنفور : اغير رايي يعني .....؟
غادة مباشرة : لا لاتغير رايك ولا شي ( قامت مباشرة وهي تركض تصعد الدرج وهي مو مصدقة انه وافق وانها بتطلع وانها بتشوف العالم ولا راح يفوتها شكل اسوم وهي عروسه )
فراس بناءا على موقفها معه اخر راح يكون حقير اذا تركها ... عشان كذا تنـــازل وبشكل عجيب حس نفسه مرتاح لروحتها وماقتله الشك زي كل مرة : ...................
فتح التلفزيون يتابعه على ماتخلص لانه فهم تماما انها مطوله ...... بعد ساعه و .. نزلت الدرج بعد ماخلصت بفستانها لأميري الزهري الحالم .. بقصة صدر مغريه شعرها الطويل بشكل مبالغه لاردافها كانت ملففته بشكل ناعم حتى وصل لآخر ظهرها .. وكثافته وطوله معطيها طله ساحره ... فستانها المنساب على طولها كان رايق .. مكياجها كان بدرجات ناعمه من الوردي الحالم ومكياجها ملفت تماما .. فراس انحبست انفاسه من شكلها وهي تنزل الدرج وهي ماسكه طرف فستانها .. تذكر فراس كلام لؤي اليوم ينسج بعقله .. وكلامه كان معقول جدا للحاله اللي تركته مو عارف يطرح عينه عنهاوصلت لتحت وهي تبتسم ابتسامتها الشقيه وهزت كتوفها وهي تسأل : يله نروح ؟!
فراس كبس بعيونه ... وهو يشيح بنظره بضيق وهو يوقف ويسحب شماغه ويطلع : يله .. .
غادة مب مصدقة انها بتطلع من هالمكان ... وفراس مب مصدق هالمشاعر الغريبة اللي تجتاحه حتى انه ظل فاتح الدريشة طول الطريق عشان يتنفس من الكتمه اللي اجتاحته .. وغادة ماتكلمت وهي تطالع الشوارع وتحس بحيوية اخيرا طلعت ! اخيرا كشخت .. اخيرا اشياء كثيرة .؟
انتبهت لهم يوقفون عند فندق توقعته فندق القصر لكنه نطق : خليك هنا دقيقة وراجع
غادة : ليش مو هذا القصر ؟
فراس : لا ( ونزل وهو يترك السياره تشتغل عشان التكييف )
غادة عقدت حواجبها لايكون ساكن هنا وتاركها لحالها بفيلا كنها القصر .....!!!
***
في الـفندق الخاص بالزواج /
إبتسام
كانت جالسة مع ام فراس وهي تسأل بحيوية : كلمتيهم اليوم ؟
ام فراس : لا والله مقدر اكلمهم من اول يوم ماراح تفضى لي
ابتسام : هههه انا كلمتهم عشان غداهم اليوم .. وابشرك مبسوطين والحمدالله الله يوفقهم
ام فراس : حمدالله والشكر لك ياربي
وداد : عاد ابتسام الله الله ببنتنا انتبهوا لها
ابتسام : شيلوا يديكم منها خلاص ماعاد صارت بنتكم صارت بنتنا
ام نايف : وين ميهاف يا وداد ؟
وداد : تفهم التفتيش وش لازم يسون
ام نايف : اها
ابتسام : هذي هي جـــت .. ومعها سجى بعد
وداد : سجى وهالفستان مب صاحية ! امي بغت تموت يوم قالت لها انها بتلبس هاللون
ام فراس : هههههههههه سجوي عاد قمر وش مالبست يلبق لها اتركوها
ميهاف وصلت لهم
كلمت ام فراس : خالتي معليش مفتاح بيتكم ؟
ام فراس استغربت : ليه .؟
ميهاف : ولا اقولك خلاص انا عقب الزواج اليوم برجع معك البيت العروسة ناسيه شي مهم هناك
ام فراس : هاو وليش ماكلمتني ؟
ميهاف : ماتبي تتعبك وانا بمرها بمرها عندي حاجه لها
ام فراس : خلاص وقت نرجع ارجعي معي وخذيه
ميهاف : تمام حلو

***
عـــند اسماء :
كان راسها يوصل لصدره بالكاد وهي واقفة جمبه بفستانها الابيض الناعم القصير وماسكه غترته وهو واقف قدام المراية ويسكر ازرار ثوبه .. التفت وهو ياخذ الغتره من يدها وهو يبتسم على ابتسامتها المرسومة وهي تطالعه : وش سالفة هالابتسامه طول اليوم ؟
اسماء تنهدت وهي تترفع وتجلس على طرف التسريحة : مبسوطة اني جمبك
هيثم ثبت المشلح على كتفه وهو يرش عطره ويلتفت لها : يله انا رايح احضر عرسنا
اسماء ابتسمت : هههههههههه شايف قد ايش غريب ! .. وبتطول ؟
هيثم : لا بطلع قبل العشاء .. وش مشتهيه اعشيك ؟
اسماء تمنت تقول عليك بس استحت : ع ذوقك حياتي
هيثم طلع من الغرفة وهو يحبطها للمرة المليون اليوم .. كل ماتوقعت منه حركه ماتحصل شي , التفتت للتسريحة وهي تطالع نفسها بالمراية معقوله ماتكون جذابه بشكل كافي ..؟
سمعت صوت الباب يتسكر وهي تتنهد باحباط : ...................
***
دخل فراس السياره بعد ماغير لبسه لثوب وغتره بيضاء وريحة عطره تعج بالمكان ... غادة كان طول فعلا عليها بس ماعلقت .... سالت بربكة : انت ساكن هنا ؟
فراس وهو يحرك السياره : آيه مؤقتا
غادة ماردت وهي تحس بجرح بجد .. ع بالها تاركها لحالها عشان امه , طلع تاركها دون سبب .. او يمكن لانه يكرهها بشكل هي نفسها ماتتصوره .. : .............
استغربت لما وقفـــوا قدام بيت اهله ونطق وهو ينزل : انزلي
استغربت وهي تنـزل وتساله : شنسوي هنا ؟
فراس وهو من لما شافها بالبيت حس بحاجة ناقصه لبسها الناعم ... فتح الباب ودخل دون يرد , لحقته غادة باحباط وهي متحسسه من هالبيت واثاره الحلوه فيها ... ظلت تطالع بالصالة والحديقة اللي ياما جلست فيها جلسات حلوه مع ام فراس .... انتبهت للبيت طافي كله مافيه احد ... لحقته لفوق وانتبهت له يدخل غرفته .. دخلت وهي تسال : فراس بجد شنسوي هنا ؟
فراس فتح دولابه وهو يطلع علبة الطقم ويلتفت لها : فكي عبايتك
غادة ارتعبت : ليش ماراح نروح ؟!!!
فراس بضيق : راح نروح بس فكي اللحين
غادة بتردد فكت عبايتها وفراس يحس معدل نبضه ارتفع مع رجوع اطلالتها الساحرة وهي واقفة بفستانها الاميري .... وكل تفكيره ان كويس اسماء ماراح تنزف ولا ماكان لها مكان جمب هالكمال .. برأيه ,
غادة ارتبكت من نظراته لها مسحت بالفستان بيدها : مو حلو ؟
فراس فتح علبة الطقم وهو يمدها لها ويحاول يكون طبيعي وهو ينطق : حلو بس ناقصه هذا
غادة تعرف هالعلبة .. علبة طقم الماس ام فراس , حصلتها لما كانت تفتش بغرفته وانشهبت بجمال الطقم .. مسكتها باناملها الفارغه من آي حلي وهي تفتحه نطقت بصدمة وهي تطالعه : لي ؟
فراس وهو ينتبه لتعابير الانجذاب للطقم : أعجبك ..؟
غادة بانفعال وهي تحس قلبها بيوقف : جدا جدا جدا جدا .. اعجبني موت , ( تقوست حواجبها وهي تنشد للطقم ) مو مصدقة انه لي .. ( رفعت عيونها اللامعه له ) بجد شكرا مو عارفه حتى شاقول احلى هدية جتني بحياتي كلها ..... ( لانت نبرتها ) كيف اشكرك .؟
فراس وهو منجذب لها بهاللحظة بشكل خيالي .. تحت قناع بروده هو فعلا يعتقد انها اجمل مخلوقه شافها بحياته .. : البسي اجل خل نمشي
غادة وعيونها معلقه ببريق الطقم .. مشت ناحية تسريحته وهي تجلس الطقم وتحاول تلبس قلادته الفخمة ولقت صعوبة وسط كثافة شعرها وثقله ... فراس لاحظها وهي يادوبها تشيل شعرها عشان تلبسه ... زفر وهو يمشي ناحيتها ! وقف فجأة ! لا فراس لاتنجن لاتقرب لهالدرجة ......... نطق بهدوء : احتريك تحت
وطلع مباشرة ... اما غادة بصعوبه اخيرا لبست مشت باناملها على نحرها المزين ببريق الطقم الملفت ... كملت الطقم بالحلق والسوارة والخاتم .... وكانها مصره تلعب باعصابه دون علمها طلعت لبرا حصلتها واقف عند الدرج ... وقفت قدامه وهي تدور حول نفسها بالفستان وتستقر يدها ع نحرها : شرااايك ..؟! مررره خيالي ( نزلت عيونها لطقمها ) يالله مو عارفه قد ايش اوصف جماله
فراس حبس انفاسه من شكلها لما دارت ع نفسها وشعرها الطويل الكثيف يدور حولها ...... نزق فيها بعصبية من طفرته : متاخر دون شي وانتي جالسه تطامرين !! ( نزل الدرج وهو يتحلطم ) بزر ماتنعطى وجه اعجلي علي
وسكر باب البيت باقوى ماعنده وراه .... غادة ما اهتمت حتى انساجمها مع الطقم مخدرها عن كلش ..
***
قاعة الزواج /
وسط انسجام الكل ومحد مشغول نظرا لكون مافيه زفه ... الكل مفترغ وجالس برواقة , سجى لقتها فرصة كالعادة وابتسامتها مرسومة لما ماحصلت غادة موجودة ..... التفتت لام فراس : خالتي وينها غادة ؟ معقولة بعد زواج اخوها ماتجي ّ
ام فراس انحرجت وهي تتنهد بضيق دون ترد : ....................
ابتسام كانت موجوده بس مافكرت تدافع لانها معباه من غادة ومنقهره منها : ............
ميهاف بضيق : من جد ليش كمان ماحتحضر الزواج ؟ والله فاقدينها كم لنا ماشفناها
سجى : وليش مافيه زفه بعد ؟
ام فراس : العريس والعروسة مايبون .. خل يرتاحون اليوم
كبست اريج بعيونها وهي تاشر لمرام : شوفي شوفي ام شعر اللي عند العبايات !
مرام : أي وحده ..؟
اريج : اللي لابسه وردي ... ( شهقت لما التفتت البنت ) غااااااااادة !
التفتوا كلهم وهم ينتبهون للي جذبت الانظار بدخولها بشعرها الملفت وطلتها .. والأهم جسمها المزين بأغلى طقم الماس لهالسنة .. والوحيد من نوعه
ام فراس وقفت ببشاشه وهي تروح ناحيتها : غاااااادة ؟!
غادة وابتسامتها مافارقتها : خالتي .... شلونك ؟!
ام فراس : جيتي ؟! والله مو مصدقة انك جيتي
غادة ( عقب شنو ) : ههههههههه وليش ما اجي ؟ كان معاي حمى الملكة اللحين بخير اكيد بجي ( كملت بحماس ) فين اسوم ؟
ام فراس : ليش ماتدرين ؟! ماراح ينزفون وامس دخلوا
غادة كبست بعيونها : بجد ؟! لا والله اول مرة ادري
ام فراس انبسطت من قلب وهي تنتبه لطقم فراس عليها .. ابتسمت : ماعليك ( حضنت ذراعها ) تعالي بعرفك على ربوعي
خذتها ام فراس وهي تمشي ناحية صديقاتها : هذي زوجة ولدي فراس غادة ..
سجى من بعيد كانت تطـــــالع وهي منقهره وبتموت حره .. على اللي خذت كل الانتباه لما دخلت : ....................................
والتعليقات حولها تزيدها غيظ خصوصا ميهاف لما قالت : ما شاء الله على غادة كانها حورية بهالفستان
وداد : من جد الله يحرسها لا وام فراس تهايط بها ... تغبر البنت وتعوذها لايجيها شي
ابتسام ارتاحت نفسيا لما شافتها جت .. وراحتها زادت لما انتبهت لها تضحك من قلب مع ام فراس من بعيد , واخيرا ام فراس وصلت : هذولي مايبون تعريف اهلنا
غادة وهي مبسوطة مبسوطة مبسوطة من قلب , سلمت عليهم بحميمية الا سجى ... ولما وصلت لابتسام كان سلامها عليها بارد ثم استاذنت تروح تكلم وحده تنهدت بضيق وهي تجلس جمب ام فراس ....
وداد بحماس : غادة يادبه وينك مختفية هالفترة !
غادة وهي تنتبه لسجى حطت رجل على رجل بجلسة انيقة وهي تقول بقصد : خبرك تو نقلنا والمنطقة بعيدة .. وتعبت يوم الملكة يعني هالفترة كلها كان مشغولة
سجى : لهالدرجة ؟ ليتني اصدق
غادة : لا والله عارفه اني مقصره بحق اسوم ... بس معليش ازورها بعدين لحالي
ميهاف كبست بعيونها : غاادة امانه من وين جبتي هالطقم !؟ تعبت ادور حاجة زي كذا
وداد : لا والله انا حصلته في محلات برا بس كان غالي مرة
غادة انبسطت لما حست ان ذوقه كان بهالإذهال ولما عرفت ان سعره غالي ... نطقت بحياء : ما أدري والله هذا طقم فراس
اريج : اهااااااااااا قولي كذا وبسس ....
مرام : نعنبوه ولد خالتي وش هالذوق .. اجهر عيوني بلمعته
سجى انسحبت من الجلسة وغادة ابتسمت بفرحة انها قدرت تقهرها .. ابتسمت للبنات وهي توقف : انا بالإذن ابي ابتسام شوي
وقفت ووهي تمشي وتجذب الكل بمشيها .. وصلت لعند طاولة ابتسام اللي مع ناس كانت وقالت بربكة عكس ثقتها من شوي : إبتسام ممكن دقيقة ؟!
ابتسام التفتت لربعها : لحظة بس ( وقفت وهي تبعد عنهم مع غادة والتفتت بصرامة ) خير شتبين ؟
غادة بضيق : ما ابيك تزعلين من آخر مرة ... انتي عارفه يا ابتسام وضعي وعارفه فراس ومابيك كان تتمشكلين معه
ابتسام : لا عز الله افلحتي !
غادة برجاء : لا يا ابتسام الا انتي تزعلين ... اللي فيني كافيني والله
ابتسام : غادة رجاء حاليا مالي خلقك ... روحي لفراس خليه ينفعك !
وراحت تاركتها باحباطها .. تنهدت غادة بضيق وهي ترجع لعند البنات ما امداها تجلس سحبتها ميهاف : تعالي طلبت شوط على شرفك ارقصي !
غادة كبست بعيونها : وش شوطه ..؟!
ميهاف : والله هذا كله يبي له شوط وبعدين امزح مو انا طلبته ام فراس طلبته يله بشاوعك
غادة ابتسمت بامتنان لان سعادة هاليوم مافاتتها صعدت مع ميهاف والمطربة بدت تتغنى بانغام الاغنية اللي كانت مناسبه غادة :
وردة ولابسة الوردي ماخلت عقل عندي
وردة ولابسة الوردي ماخلت عقل عندي
يمكن اقلب الدنيا اذا باستني من خدي
يمكن اقلب الدنيا اذا باستني من خدي
وردة ولابسه الوردي ماخلت عقل عندي
يمكن اقلب الدنيا اذا باستني من خدي
عااااششششو , عاشت ام الوردي
صعدت اريج ومرام معها وهي ترقص بهز خفيف ناعم نظرا لان ثوبها ماساعدها بالمرة
عليها عيون قتاله واللي يصادقها هنيا له
وما ابالغ اذا اقلكم يموت اللي توقف قباله
وردة ولابسه الوردي ماخلت عقل عندي
يمكن اقلب الدنيا اذا باستني من خدي
تخبل هاي البنيه احلى من القمر هيا
تتمشه العصر طلعت سوت هزة ارضية
اويلي وردة ولابسه الوردي ماخلت عقل عندي
يمكن اقلب الدنيا اذا باستني خدي
صعدت ام فراس تنقط لها وميهاف وهي فرحتها اليوم كملت بحضور غادة .. غادة مسكت يدها وهي ترقص معها
اذا في يوم تتحسر نظام الكون يتغير
اذا في يوم تتحسر نظام الكون يتغير
وردة ولابسة الوردي ماخلت عقل عندي
يمكن اقلب الدنيا ذا باستني من خدي
سبحان اللي سواها احلى بنية خلاها
سبحان اللي سواها احلى بنية خلاها
مجننة كل من تحبه وقاعد حظة وياها
مجننة كل من تحبه وقاعد حظة وياها
عاشو الصبايا عاشو
غادة اشتغل هز الكتوف بينها وبين ميهاف بحماس وهن كلهن تنطبق عليهن اغنية ام فراس
اويلي يايمه وردة ولابسة الوردي ماخلت عقل عندي
يمكن القلب الدنيا اذا باستني من خدي
عسى بتنقص شفايفها اقصر لمن اوصفها
احسن شي اتانيها ولمت تطلع اخطفها
وقف اللحن ووقف الرقص وغادة باست راس ام فراس وهي تنطق بحب : تسلمين لي ياخالة والله فرحتي اليوم بالدنيا
ام فراس : وانا فرحتي اكثر حبيبتي
ميهاف اللي اجتهدت بالرقص كالعادة : هههههه غدو طلعتي تعرفين ترقصين يالوردة !
غادة بثقة : طبعااا هذا وفستاني متعب
**
هيثم ماطول فعلا جلس معهم اول ما وصل العشاء وقف .... فراس : وين بدري ؟
هيثم : لا راجع اسماء بالبيت لحالها
فراس ابتسم : من اللحين نخاف عليها ابو مشعل ؟!
هيثم استحى : هههه لا والله مو كذا بس شبعان بجد
فراس : حقك الله معك .. وسلم لي على اسماء
هيثم : يوصل
ركب هيثم سيارته وهو يترك مشلحه ع جمب حتى وصل للشقة صعـد والمشلح بيده فتح الباب , دخل ماحصلها قدامه مباشرة .. نادى : اســـماء
اسماء : هنا هنا بجي ( طلعت من غرفة النوم وهي مبتسمة ) تاخرت !
هيثم وهو يدخل يعلق مشلحه : هذا وانا طالع بدري ( ألتفت لها ) اخوانك يسلمون عليك
اسماء : الله يسلمهم يارب ( جلست على طرف السرير وهي تكلمه ) وشخبار العرس ؟
هيثم حاس بفمه : ابد عادي مافيه شي ينقال ( اخذ بجامته وهو يكلمها ) ببدل وجايك
بلعت اسماء ريقها بترقب : خذ راحتك
اول مادخل الحمام نقزت للتسريحة تنكش شعرها بشكل ملفت وهي ترش عطرها وترجع تجلس مكانها قبل يطلع .. اول ماطلع ابتسمت له دون تتكلم كالعادة : ..........
هيثم ظل يطالعها ومعدل التوتر ارتفع بشكل مرعب بالنسبة له .. بلع ريقه وعطاها ظهره وهو يمشي ناحية الانوار وينطق بتوتر : ما اقدر انام اذا فيه اضاءة فبسكرها بعد اذنك
اسماء بربكة : ايه عادي مافيه مشكلة
سكر الاضاءة تماما ... اسماء كانت بمكانها شاده على يدينها وغمضت عيونها بربكة وهي تترقب ..... تفاجئت بجسم ينرمي على السرير .. انتظرت .. انتظرت ... لما التفتت انتبهت له معطيها ظهره ونايم .. بلعت ريقها وهي تنطق : هيثم ؟
هيثم: همممممم
اسماء : نمت .؟
هيثم : بنام ابي اصحى بدري .. نامي انتي بعد
اسماء انقهرت منه بجد نطقت بقهر : معليش تقوم شوي .. ما امدانا نتكلم حتى
هيثم وهو كاره نفسه على هالعجز والرهبه اللي ماتوقعها : بكرة اسماء ..
اسماء برطمت بقهر وهي تستلقي معطيته ظهرها وشوي وتبكي من غميصتها .. وهي تهمس بنفسها ( غبي غبي ... )
***
لـــؤي رجع لبيته بعد العشاء لانه مستعجل على مايا اللي تركها مع المربيه ... اول مادخل نادى المربية : ميسون !
ماسمع رد ... نادى مرة ثانية : ميسون
: ميسون مو هنا ...
التفت وهو ينتبه لها شايله مايا وواقفة بنظراتها القوية اتجاهه .. وتنطق بقهر : بنتي راح اخذها ..
***
ميهاف ركبت مع ام فراس بسواقهم حتى وصلـوا البيت ام فراس : خذي راحتك البيت مافيه احد
فكت ميهاف عبايتها وهي تصعد مباشرة لغرفة اسماء اللي كانت مرتبه وفارغه تقريبا .. حصلت هديتها هزت راسها بيأس : يا فهاوتك يا اسماء ....
خذتها بشنطتها وهي تطلع وتنـــزل لتحت وتنطق : خالتي انا اخذت الغرض وماشيه .. تامريني شي ؟
ام فراس : سلامتك حبيبتي سلمي ع امك
جلست شنطتها وهي تمسك عبايتها وقبل تلبسها انتبهت للي يدخل البيت .... ينادي : يممممه .. ( سكت بلجمه وهو ينتبه لها واقفة بنص الصالة بجمالها اللي ابهته .... بلع ريقه وهو ينتبه لها ... كم صار له ماشافها .. ولما يشوفها يشوفها كذا .... : ميــ ـهاف !
***
ابتسام رجعت من الزواج وهي مرتاحه نسبيا لحالة غادة اللي كانت تسر .... وفيه حاجة موترتها اكثر من غادة , كان نايف بغرفة النوم يفك كشخة العرس ويلبس حاجة مريحة نطق بوناسه : يفوتك اليوم اخوك تمنيت اصوره وهو كل شوي يطالع الساعه !!
ابتسام كانت بالحمام ماردت عليه .... اما هو منغمس بالسوالف : اخرتها لما قلنا العشاء ماصدق افرج عن نفســــه كانا حابسينه بسجن
انتبه لها تناديه برعــــــب : نــــــــــــــــــــايفففف !!!
نايف خاف توجه لها بالحمام مباشرة وهو يدخل حصلها واقفة عند المغسله وعلى نظراتها ملامح خوف مب طبيعيه وبيدها جهاز اختبار الحمل ... فتح عيونه وهو يسأل : شفيك رجيتيني ؟!!!
ابتسام وهي تحس بتنهار داخليا : لي كم يوم نومي ثقيل .. ودورتي تاخرت وسويت التست
نايف انتبه له بيدها ... كبس بعيونه وهو يبتسم من قلبه : حامل ؟!!