" الفصل سبعه وخمسين "
كل من لم يهده الله ضال
وكل من لم يعافه الله مبتلي
وكل من لم يعنه الله مخذول
فمن هدى الله كان مهتديا
ومن أضله الله كان ضالا
أبو بكر الصديق
انصدم فراس من الصوت المترنح ع السماعه وهو ينطق بدون عقل : آلووووو !!! اسمعي ياكلبه .. ( سكت لفترة يثبت نفسه وهو واضح سكران ) انتي يابنت الكلب والكلبه سوا بعـــد بنتي ترجعينهاا سامعه .. واذا ابي اخذك معها اقدر تراا .. لاتنسين انتي عبدتي يالرخيصه ..
فراس كان منصدم من طريقة كلامه .. وقف وهو يطلع من غرفة عمه بهدوء دون يتكلم ويوقف بالممر ويسند ظهره ع الجدار ويسمع بصمت : .........
احمد وهو يتلعثم بكلامه بطريقه مستفزه : ولا تدرين بنتي ما ابيها !! اشبعي بها .. انا ابيك انتي تعاالي انا بوريك كيف ماتطلعيني من السجن .. انا بالاستراحة احتريك مع ربعي لاتاخريين
فراس سكر السماعة مباشرة بهدوءه المعتاد وشاد بقبضته على جوالها لايكسره .. دق بجواله على السكرتير رد وليد : سم طال عمرك
فراس بهدوء مهيب : وليـد .. بعطيك رقم حدد لي موقعه على السريع , وأول ماتحدد الموقع سو بلاغ لشرطة جده خل يخمون هالكلاب اللي هناك
وليد : حاضر .. اوامر ثانية ؟
فراس : بس دون تشهير بالجرايد بهالجريمه .. ع السكيتي ودون اسماء ( كمل دون نفس ) بعضهم لهم عيال شايلين اسمهم !
وليد : حاضر
فراس : يله مع السلامة
سكر فراس السماعة وهو يحس كبده تغلي على هالإنسان من مجرد صوته .. ما تكلمت عن احمد نهائي الا مره
( فراس : وأنتي ؟ ليش تزوجتي من بدري ؟
غادة اختفت ضحكتها .. نطقت بكئابة : مكـتوب ..
فراس : هذا مو جواب ..
غادة : هممم ... كان ولد عمي , وعمي طالبنا فلوس .. " صارت تدلك يدينها ببعض بضيق " وبابا كان مريض .. وإبتسام راتبها مايوفي شي .. وهيثم تو يدرس ... فخطبني من أبوي كحل بديل ..
فراس وهو يتأملها .. واضح ضيقها من هالموضوع او من هالمرحلة بحياتها : حل بديل ؟ معناها مافيه مهر
غادة هزت راسها : كان دايم يقولي مهرك اني مارميت اهلك بالشارع .. عموما عمي كان يكرهنا بالأخير قرر أني حل بديل فاشل فرجع يطالب بالفلوس ... )
زوج سكير .. هاه ؟! ( تنهد بضيق ) زوج سكير .. ام ***** .. ابو غير معروف .. , ( مسح ع وجهه بتعب ) وش حياة هالبنت بالضبط ؟! صفقتها الدنيا لحد مارمتها عندي .. وانا ماقصرت بعد ..
: فرااااس !
التفت لعمه : هلا ؟
ابو نايف : يله الؤتمر راح يبدى تفضل
هز فراس راسه : ان شاء الله
دخل معـاه المؤتمر .. وعدم حضوره كان بيكون متساوي لان باله مو معه طول الوقت , تساؤله الوحيد ... كيف تشوفه إنسان قوي .. ! حياتها جحيم ومازالت تشوف حياتي ماتنطاق ؟ ... ايش حياتها بالضبط اساسا ؟! كل اللي عندي حكايه ناقصه ..
***
في مكـان ضبابي غير واضحه تفاصيله ..
وقار الشيب كاسي لحيته وهو واقف وبملامحه المتعبه جالس يعاتبها : ليش سويتي كذا ..؟ شايفتني تعبان ومريض ويادوبني اجيب لقمة عيالي .. تجين انتي مثل الهم فوق همي ... ماكنت ملزوم فيك لا والله ..
ارتجفت شفاتها وهي تنطق برعب : والله ماكنت عارفه حتى انا ... ( اشرت للجهه الثانية للشابه بنظراتها الغير مريحة ) هذا كله منها لعبت علي مثل مالعبت عليك ... لو عارفه ماتركتك تشيل همي والله اسفه !!
نطقت الشابه بنبرة شامته : شو حلوين ؟ ... طالعه بتجنني لابوكي
هزت راسها بقهر وهي تنطق بعصبية : لا تتكلمي عن ابوي !! مابي اعرفه اذا هو من اشكالك مااابي ..
نطقت بصوت ضبابي غير واضح : ابوكي هو ........
نطق الوسيم بعيونه الثاقبه .. وابتسامته المرسومه ع ثغره : قايل لك دمك نجس مايشرف احد ؟!
" ترررررررررررررررررررن "
فزت من نومها مرعوبه !!! وصدرها يرقى وينزل بشكل جنوني .... نطقت بتعب : وش هالكابوس ؟! اعوذ بالله من الشيطان رجيم ( نفثت يسارها ) اعوذ بالله من الشيطان الرجيم
شربت كاس المويه جمبها بنفس واحد وهي تحضن راسها تحاول تهدى ... من تفكيرها طول الليل بكلامه زاروها بكوابيسها ... ابعدت غطاها بتعب وهي تنزل رجلها حتى تلامس رخام البيت وتوقف قدام المراية تشوف وجهها الشاحب خللت شعرها بيدها وهي تتنهد بتعب .. كان هالحلم شفط طاقتها كلها ... دخلت الحمـام تاخذ شاور يريح جسمها شوي ..
***
لــؤي – الساعة 11 صباح :
كانت مسؤولية الطفله فعلا ثقيله عليه نوعا ما ... ماهو متعود على سهر البزران وغيارهم وكل هالحوسه تنهد بضيق وهو ينتبه لها جالسة قدام التلفزيون ع الارض وهو جالس على الكنبه وبيده كتاب يقراه لما حسها مندمجه مره مع التلفزيون ... وقف وهو يبتعد عنها بمسافه معقوله ويسحب جواله من جيب بنطاله ودق على رقمها ... جاه الرد مباشرة : الو !!
لؤي : السلام عليكم
سارا : وعليكم السلام والرحمة ,,, مايا فيها شي !!
لؤي وخلقه منطق : لا مافيها شي هذي هي قدامي تلعب ( فرك عيونه ) داق اقولك أني .. ( كمل بتردد ) خلال هالاسبوع راح اقابل ابوي بمايا ..
سارا بضيقه : اوك ... وقت يرميها بوجهك دق علي اخذها
لؤي : سارا افهميني !! انا راح اقول لأبوي انك ماتبينها ...
عقدت سارا حواجبها ونطقت بصدمه : نعـــــــــــم !
لؤي بتبرير : ابوي بالوضع الطبيعي مستحيل يوافق .. عشان كذا حنا محتاجين نضغطه , يعني وقت يحس ان البنت مالها غيري واني سجلتها باسمي خلاص .. ماراح يلقى حل الا انه يوافق !! فاذا حاول يتواصل معك اكدي ع كلامي انك ماتبينها وتعبتي من مسؤوليتها لحالك .. اوك ؟
هزت بعدم استيعاب : لا لا ... انت اكيد انجنيت ؟ انا اقول للناس اني تعبت من مسؤولية بنتي ؟؟؟؟؟؟
لؤي : مع كل الإحترام لمثاليتك وعارفين انك اسنع شي .. بس ايه
سارا : آسفة بس مقدر . . ( كملت برجاء ) لؤي تكفى خلاص بطل هالمسرحية اللي نهايتها واضحة ورجع بنتي لي ..
لؤي نطق بقهر : ابفهم انتي مسحتيني لهالدرجة من حياتك كيف !!!! خليك مني ... انا جالس اعطيك فرصة ان مايا تعيش حياه طبيعيه بين امها وبين ابوها !! ليش ماتتعلقين بهالفرصة ؟ ليش ماتحاولين مثل ما انا احاول ؟!!
سارا : هذي مشكلتك ع طول لؤي .. ماتعرف متى تبدا وماتعرف متى توقف ! بس انت لازم تفهم انه جا الوقت انك توقف وتستسلم وتبطل حساسيتك الزايدة وترجع بنتي لبيتها !
لؤي وكلامها قاهره : انا داق اطلبها منك كخدمة .. واللحين لو يدق عليك ابوي وتساعدينه مثل آخر مرة وتاخذون البنت من يدي وقتها الله يجيرك مني
سارا سكتت بقهر : ...................
لؤي لما ماحصل منها رد سكر السماعة وهو يرمي جواله ع الطاولة ... فزت مايا من اثر صوت ارتطام الجوال ع الزجاج , ابتسم لؤي بتعب لما انتبه لها تشوفه وهو يمشي ناحيتها ويجلس جمبها القرفصاء ويمد يده عشان يشيلها : تعالي نطلع شوي .. ( تنهد ) والله مسؤوليتك مستحيلة علي لحالي ! بس الله يسامح امك بس ..
***
اسمـــاء, ! وشعرها الكحلي كان تاركته مفتوح ع وجهها الطفولي .. وهي تنفخ لبانه بفمها ... المكياج فول ميك آب ... ليش ؟! ملل الاختبارات وما أدراك ما ملل الاختبارات ؟! بعد ماخلصت المكياج الكامل .. والكشخة .. والتضبط ماحصلت الا الكتاب يطالعها ينتظرها تدرس ... عطته ظهرها مباشرة وهي تمسك جوالها وللحين مافيه رد نطقت بقهر :
لايكون ناوي يسوي نظام الاجانب ! مافيه تواصل لحد مانتزوج ؟لالا وين هيثم ماعنده هالكماليات الزايدة .... طيييييب اجججل ليش مايرددد !!!! معقوله مزعلته بشي وانا مدري ؟! اففف هيثثثثم والله مو وقتك تشغلني ....
رمت جوالها وهي تنـزل لتحت حصلت امها جالسة بالصالة نقزت جمبها : ماااماااا
ام فراس : هلا يابنتي شعندك ؟ خلصتي دراسة ؟
اسماء بثقه كاذبه : ايييييه ايه خلصت ومليت .. قلت انزل اشوفك !
ام فراس : انا اللحين ببدا بالغداء وش تشوفين فيني
انفتح الباب وبدر يدخل وهو يرمي جسمه ع الكرسي : السلام عليكم ورحمة الله
: وعليكم الله ورحمة الله وبركاته
اسماء بحماس : بدوووووري شرايك نطلع ابي كم مشوار ؟
بدر بكسل : لا اسماء تكفين تو راجع ومنهد حيلي والله بتغداء ثم بنام ... لا صحيت طلعتك
اسماء : ياشينك تكفى عشان اختك اللي تعيش اخر ايامها في حضن اهلها .. نعنبوكم دلعوني ولا تبوني اروح لرجلي وانا ما اشتقت لكم
بدر وهو متعب بجد : وين تبين تروحين ؟
اسماء تحمست خصوصــا انها زمان عن بدر لها فترة مع فراس اللي لو تنط وتوقع ثم ترجع تنط وتوقع ماعطاها وجه ..: خخخللل نروح للدانوب !
بدر : طيب الدانوب احسن عصر .. عشان بالمره نوقف بكافي
ام فراس وقفت : ههههه الله يعينك يابدر نشبت بحلقك انا بروح ابدى بالغداء دامك جويع
بدر اشر لامه : اللحين انتي مو بتتزوجين ؟! الحقي امي تعلمي الطبخ شوي .. ولا تبين رجلك يرفع علينا شكوى مرسلين له بضاعه معطوبه
اسماء : المعطوب راسك ! ( حاست بفمها وهي تسأل امها دون نفس ) يمه وش بتطبخين ؟
ام فراس : جريش
اسماء بانفعال : لااااااااااا ! ليش جريش يمه تكفين بيطلع الجريش من خشمي ...اللي يحب الجريش مو هنا خل نسوي شي ثاني
ام فراس : واذا مو هنا ؟! هو متعود كل يوم اثنين اسوي له جريش .. ماراح احرمه منه عشانه طلع من البيت راح ارسل له قسمه
اسماء باحباط : بس انا ما احبه ..
ام فراس : تعالي معي خل اعلمك كيف ... لو يطلع زوجك يحب الجريش وش بتسوين ؟
اسماء باستسلام : بسويه له
ام فراس : هجل قدامي ع المطبخ يله
استسلمت اسماء وهي تدخل المطبخ وبدر مبتسم خصوصا انه انعتق منها ... عدل الوسادة وهو ينسدح , اما ام فراس بالمطبخ وصت اسماء تجهز الاغراض على ماتتصل على فراس تنبهه يمر ياخذ غداه .. جاه الرد : هلا يمه
ام فراس : هلا والله بالصوت ...بالشغل ؟
فراس : آيه
ام فراس : انا مسويه غداك اليوم جريش ... مرنا خذه
فراس بزعل بنبرته : مرنا خذه ؟ بدال تعال تغدى معاي ؟
ام فراس : والله بخاطري اقولها ... بس غادة بعد تحب الجريش رح تغدى معها ولا جبها معك وتغدوا عندي
فراس بحلطمة : دبوس دبوس هالغادة وين ما اروح لازم تكون معي .. ( نطق بقهر ) خلاص بمر آخذه يعطيك العافية
ام فراس ابتسمت على عصبيته : الله يعافيك
سكرت السماعة وهي تضحك : هههههههه يابعد عمري ياوليدي ارتفع ضغطه !
اسماء وهي تجلس سلة الرز ع الطاولة : شعنده بعد ..؟
ام فراس : زعلان عشان ماعزمته يتغدى معاي
اسماء : آيه لاتعزمينه لاتعزمينه فكه .. ( عقدت حواجبها ) إلا يمه هو صدق ليش فجأة نقل مع غادة ؟
ام فراس باحباط : مانقل ... بس راح هالفترة عشان جدك موجود لاراح رجع وترك غادة هناك
شهقت اسماء بصدمة : من جــــــده ؟!
ام فراس بقهر : بس انا مستحيل اتركهم ... يا يعيش معها يا يجيبها معه ! ماصارت هذي الناس بياكلون وجهنا الولد نايم هنا وزوجته هناك ببيت سياح نياح لحالها
اسماء : والله يا يمه ولدك هذا مدري شلون يفكر ... جربتوا تكشفون عليه يمكن صاير معه شي لاسمح الله ؟! ضربه بالمخ صدمة عاطفية ؟!
ام فراس قبصت فخذها : ابلعي لسانك ! بسم الله ع ولدي من فالك
اسماء : حكينا في حبيب القلب خط احمر !!
ام فراس بدت تركيب الطبخه ... بعد ماخلصت كلش نطقت : الظهر اذن وانا ماصليت ... اسماء شوفي انتبهي للرز كل فترة وفترة حركيه واذا ماعاد صار فيه مويه قصري ع النار , سامعه ؟
اسماء : آيه ايه ولا يهمك ان شاء الله
ام فراس بتحذير : اسمااااء مو تلتهين ... انا بصلي وبتسنن وبجي ! انتبهي للفرن
اسماء بثقة : يا ماما بزر انا ! خلاص ماعليك بنتبه له ماراح اخرب جهودي كل هالفترة
طلعت ام فراس تاركه مسؤولية الفرن عليها ... انتبهت لبدر نايم ع كنبة الصاله بشكل فاقد اثناء ماهو كان يتابع التلفزيون قربت منه بهدوء وهي تنطق : بدر ؟ يمه ..
بدر كان فاااقد من جد : .................
تنهدت ام فراس وهي تسحب ذراعه اللي مسنده راسه بخفه وتسند راسه ع المخدة ... وتسكر التلفزيون وتخفف اضائة الصالة وتتركه ينام براحته لحد مايجهز الغداء
***
عــند غادة /
بعد ماخذت شاور وحست نفسها هدت شوي ... طلعت من الغرفة وهي تحس بكئابه من منظر البيت الواسع قبل تنزل مرت من غرفة مكتبه اللي حصلت فيها كلش .. من رهبة نفسها شاحت بنظرها مباشرة وهي تبعد عنها وكأنها خايفه تقرب منها حتى , نزلت الدرج الفخم وهي تتوجه للمطبخ ... سوت لنفسها ساندويتشه كان نفسها بوجبه محترمه اكثر خصوصا انها ميته جوع لكن مالها خاطر .. غير انها تحس بيغمى عليها لو جلست تسوي طبخ بعد .. جلست تاكل وهي تطالع الساعة تأشر ل 1 ونص ... مافيه شي تسويه .. البيت بالمره فارغ ... بعد ماخلصت سدحت راسها ع الطاولة وهي تطالع الساعة بهدوء .. حتى الدقيقة تمر بطلعة الروح ...
***
دخلت ام فراس المطبخ وهي تقرب من القدر ... شهقت وهي تنتبه لطبختها احترقت رفعت عيونها لاسماء اللي كانت جالسة ع طاولة المطبخ وجوالها بيدها !! نفخت بكل قوتها : اسمـــــــــــــــــاء !!!!!
فز بدر اللي كان بالصالة من نومه وهو يدخل المطبخ : سلامات شصاير ؟!
ام فراس بقهر : وانا اللي معتمدة عليك لأول مرة بحياتي تنسينه كذا !
اسماء بربكة : ييممممه شاسوي والله نسيت ... راسلتني وحده وانشغلت معها و . ....
نفخت فيها ام فراس : يله احترق اللحين !! وش نااااكل ؟!!!! وفراس متصل فيني يقول بجي اللحين اخذه .... اذبحك انا؟
بدر اللي انخب لما صحى بهالطريقة تنهد وهو ينطق : معليش يمه خلاص روقي ع البنت انا بطلع اجيب لنا من مطعم .. كويس ؟
ام فراس : انا ما احب اكل المطاعم ... وبعدين هي ليش ما انتبهت له ! بتجلطيني انتي ؟
اسماء بقهر من نفسها : افففف والله مدري كيف نسيته راح عن بالي !
ام فراس : راح عن بالك وهو جمبك ! جمبك يامسلمة بس التفتي براسك وخلاااصص
بدر انتبه لفراس يدخل البيت همس بنفسه : كملت ...
فراس عقد حواجبه وهو ينتبه لصوت امه .. وبدر واقف عند باب المطبخ وانس وياسمين مدخلين روسهم بالغصب يبون يشوفون : سلامات شعندكم ؟
بدر : اسماء احرقت جريشك
عقد فراس حواجبه وهو يدخل المطبخ وينتبه لاسماء بزاوية المطبخ وام فراس منفجره فيها : والله والله يا اسوم لو تدخلين هالمطبخ مره ثانيه لاكسر يدك ورجليك
فراس : يمه ؟!
ام فراس التفتت له ولما شافته نطقت مباشرة بقهر : شفت قليلة الحيا هذي بتجلطني ... ارتاح يمه بزينه من جديد جعل اسماء ماتربح
فراس : لا وش من جديد بعد ؟! بوصي لكم غداء من المطعم تغدوا وبس .. انا بنام خلاص راسي منتهي ( طالع اسماء وهو ينطق بمقت ) وانتي يقالك بتتزوجين اللحين ؟! امحق ماسفطنا لولد الناس يالذربه ... ليش ما احرقتي المطبخ بعد كله مره وحده مايكفي الغداء بس !
اسماء وهي شوي وتبكي : والللله مدررري كيف ...
قاطعها فراس : صاه صاه ولا كلمه ...شين وقوات عين بعد !
بدر وهو يطلع جواله : وش خاطركم اطلب لكم ..؟!
فراس وهو يطلع : اللي تبي اهم شي الزفته هذي لاتطلب لها شي .. خلها دون غداء عشان تتعلم !
اسماء بقهر : مو لهالدرجة ترا بعععد انا جويعه
فراس رجع للمطبخ : لو جويعه ما احرقتي الغداء !
بدر غمز لها من ورا فراس بمعنى ماعليك بطلب لك .... اما ام فراس قالت : الله يصلحها ويهديها بس .. هاه تجلس لين تتغدا معنا ؟
فراس دون نفس : لا مابي شي بصعد انام
ام فراس فتحت عيونها : هنا ؟!
فراس بقهر : آيـــه هنا !! ولا لازم اقطع مشوار للجنوب كم ساعه عشان انام ؟! بتطلعوني من بيتي بلا اكل ولا نوم بعد!
ام فراس حست انها ضغطت عليه بزيادة هاليومين بجد : خلاص قيل هنا مو مشكلة .. بس خل نوصي السواق يجيب ..
قاطعها فراس : يمه شرايك توصين مربية اطفال بعد تجلس معها ؟ بزر هي ماتجلس لحالها !! ترا ماشافت العز الا ع وجيهـكم ولا ... ( سكت بقهر وهو يعض لسانه .. شتسوي يا فراس ! ناقد ع كلام احمد اليوم تقوم تصير زيه ... تنهد وهو ينطق بهدوء ) لا تشيلين همها يمه البيت هناك متوفر فيه كل شي ومبسوطة فيه ..
ام فراس بقهر : طيب انا ابي اكلمها .. من صارت المشكلة جوالها مدري شفيه !
فراس : جوالها فيه مشكلة مدري وشهي يبي يصلح ... ( صعد لفوق ) اليوم بخليك تكلمينها من جوالي عشان تتأكدين اني مانيب قاتل مأجور قاتلها ودافنها بالخلا
بدر هز راسه لما صعد فراس : امانه يمه مرته كيف متحملته للحين ؟! انا لو هذا عندي كان من زماااااان بتحصلوني بشهار فاقد عقلي
ام فراس بضيقه : الله يصلحه ويهديه .. والله هو طيب بس مدري ليش مع البنت كذا
بدر حاس بفمه وهو يلتفت لاسماء اللي شوي وتبكي من الهوشه اللي جتها : هاه سومتي .. بيتزا ولا برقر ؟
عـند فراس فوق /
مجرد ماصعد للشقـة استشعر ريحة معطر القهـوة بالمكان للحين اثرها ... زفر بضيق وهو يسحب غترته من راسه ويرميها على الكنبة وين ماكانت تنام .. تذكر استلقائاتها العجيبه هنا وياكثر ماكانت تطيح وترجع بكل بساطه لمكانها ماكأنها طاحت ... ابتسم وهو يتذكر منظرها لما صحى من النوم خايف من دقة الارض ولما طلع حصلها جالسه ع الارض نايمه وتدعك راسها ببساطه وهي توقف وترجع تستلقي ... – كبس عيونه وهو يخفي ابتسامته ويتنحنح - : هالبزر مسويه لي سحر أكيد من صبح وهي براسي !
نفض راسه وهو يدخل غرفة النوم ..فصخ ثوبه وهو يعلقه ع الشماعة ويدخل السرير وهو يطالع السقف ينتظر النوم
( بس ترا كل حزن يطوقك هو حزني .. وخساراتك في هالحياة لا تلتفت لها بس تذكر انك مكسبي ومكسب غيري )
صوتها تسلل لمرحلة لاوعية وهو يستقل النوم .. كبس بعيونه كم مرة لحد مانام وهو احسن حل يبعد فيه عن افكاره اللي مارحمته من صبح
تحـــت /
كان الغداء وصـــل ... وام فراس جالسه تقلب بصحنها بعدم رضاء .. رغم انهم طلبوا نودلز الا انه مازال تنهدت بضيق وهي تفك الصحن وتطالع الدرج : بعد عمري نام جويع اكيد
زفرت اسماء : انا اشك ان فراس هو القعده بهالبيت !
بدر نغزها بكوعه عشان تسكت .. لكن مافيه فايدة ام فراس طالعتها بحده : انتي اليوم لايجي لسانك بلساني ! ( التفتت لبدر ) وين جدك ماراح يتغدى معنا ؟!
بدر بربكة : لا .. ( كمل بهدوء ) بيتغدى عن عمي اليوم ..
ام فراس تنهدت : اشوى ... لو بيتغدى هنا مدري وش كان بودي وجهي والغداء انحرق ! نجلس نغديه ع اكل العصافير ذاه
انس وهو ياكل : شفيك يمه والله لذيذ !
ام فراس طالعت بدر : ماقلت لي شخبار الشغل مبسوط ..؟
بدر كشر : مب مرة .. لا الوظيفة تناسبني وزيادة ان منصبي اقل من عادي !
ام فراس : اخوك لازم يخاف الله في الموظفين ومايتسبب بواسطات .. واللي جابته شهادتك عطاك اياه احمدربك
بدر : آيه بس انا مصدوم من فراس .. تفكيره مادي بزيادة ! يعني امس اقترح له اقتراح كويس وراح يرفعه كسمعه رفضه مباشرة قال ايش قال مافيه ربح مادي والسمعه ماتهمه !
ام فراس : هو ابخص بالشغل اكيد ... انت اهم شي سايره ولاتسوون مشاكل
بدر وهو ياكل : اساسا بطلت اشد حيلي واقترح .. كيفه هو وشركته , انا بجلس هالفترة بس لين يهونها ربي وعقبها مع السلامه
اسماء : مو مستوعبة للحين ان بكرة عندي اختبار ... مسرع راح هالاسبوع
ام فراس : هذا فايدة اللعب والتسدح كل هالاسبوع اخلصي تغدي اصعدي ذاكري !
اسماء باكتئاب وهي تاكل : زين خل عاد ابلع هاللقمة
ام فراس لما سمعت صوت اذان العصر وقفت : انا بروح اصحي اخوكم
بدر : ماعليك بتحصلينه ناطحك اللحين يركد منبهه دايما فراس ارتاحي انتي من الدرج
ام فراس : اجل بروح غرفتي انسدح شوي راسي صدع
اول ماراحت ام فراس نطقت اسماء بحماس : بدر هاه ترا واعدني عصر الدانوب !
بدر : لا لا .. بكرة اختبارك ذكرتيني ! خلصي امتحاناتك بعدها انا موجود برسم خدمة لو تبين القمر وديتك ... اهم شي انتي شدي حيلك , زين؟
اسماء بتذمر : بسس انت وععععدتني !!!
بدر وهو يوقف : اهم من وعدي مصلحتك ... يله بالعافية
***
مجرد ماطلع فراس من المسجد بعد صلاة العصر دق جواله ... رد مباشرة : هلا لؤي ؟!
لؤي بنبرة كئيبة : هلا فيك ... انت وين ؟!
فراس : طالع من المسجد , بغيت شي ؟!
لؤي : ايه ابي اشوفك .. تجيني ولا اجيك ؟
فراس تنهد بضيق : لا انا بجيك .. ببيتك ؟
لؤي : آيه بيتي وهو انا اقدر اطلع ؟!
فراس : خلاص ماشي سكر انا بالطريق
بدر بالجهة الثانية لما طلع من المسجـد تنهد بضيق وهو يطالع جواله .. كان معزم ع حاجة من صبح وللحين متردد يسويها دق اخيرا ...... جاه الرد عن الرنه الاخير بصوت رجولي هادي : نعـم ؟
بدر بربكة : السلام عليكم
: وعليكم السلام ..
بدر : شلونك نايف ..؟
نايف بنبرة ملل : ماعلي .. شبغيت ؟
بدر بضيق : ابي اقابلك ممكن ؟
نايف : انا بالسوق اللحين مع عيالي مو يمك
بدر : خلاص مايخالف قول أي سوق ... نجلس بكافي ونتكلم كلمتين على مايخلصون عيالك !
نايف والفكرة اعجبته اكثر من شيل الأكياس : خلاص انا بالنخيل مول ..
بدر : لا وصلت دقيت عليك .. يله سلام
***
عـند فراس كان جالس بصالة لؤي اللي تميل للصغر .. ولؤي جالس معاه وعيونهم على بنته اللي جالسة تلعب بالعابها قدامهم ... تنهد فراس وهو يعدل جلسته : كأن الأبوه ماناسبتك ؟!
لؤي عقد حواجبه : مين قال !
فراس : وجهك قال
لؤي باحباط : كلمت امهـا اليوم على اساس افهم منها ايش لازم اسوي
فراس عقد حواجبه : ايه ..؟
لؤي بقهر : ورفضت .. تخيل انها جالسه تتكلم بهالبرود وبنتها عندي ! كنت ابيها تساعدني بالوضع بس الظاهر ابيها عون بتطلع فرعون
فراس ببرود : وانت ليش معطيها وجه لهالدرجة ؟! اشكالها مايجن الا بكسر الراس
لؤي : انا جالس امشي معها بمبدأ الطيبة بتجيب نتيجة لو بعد حين .. يعني مو هاين علي اقسى عليها فوق ما انا خاطف بنتها
فراس : شوف لؤي .. مشكلتك انت انك واثق على غلط , يعني بامانه ما أدري كيف فكرتوا اساسا من البداية تجيبون بنت ووضعكم مزعزع ... بس انا كنت ومازلت اعتقد ان هذي حركة وصخة منها عشان تضمن نفسها
لؤي بانفعال : استغفر ربك شنو كيف فكرتوا تجيبونها ! بيدنا هو ..؟ هذا امر ربك ... وبعدين لو صدق مثل ماتقول تبي تضمن نفسها كان تجاوبت معاي وحاولت تكون معي ومع بنتها .. مو تجحدني
فراس : اركـد بالله .. لا اعتراض على امر ربك بس هذا بيدك يعني كنترول شوي ماحيضرك
لؤي طالعه بنص عين : بفقع وجهك ترا !
فراس : وبعدين تعال .. مو هي خذت من ابوك فلوس قبل تخلعك ؟
لؤي عقد حواجبه : ايه
فراس : معناها ضمنت نفسها خلاص ماعادت محتاجه ترجع لك عشان تضمن اكثر ..
لؤي : هذا مو موضوعنا فراس .. خلاص البنت جت وانتهى وسارا خذت الفلوس وانتهى! انا حياتي ابيها تستقر مع بنتي وزوجتي ولا اقدر افارقهم اكثر من كذا احس ان كفائتي محدودة لاني ماقدرت اضبط الوضع من أول
فراس : هالأمنية تتكون من ثلاث اشخاص ! انت وزوجتك وبنتك .. فانت اضمن هالثلاثة وعقبها فكر ..
لؤي تنهد بضيق : عارف وش اكثر حاجة اتمناها ؟
فراس : ياكثر ماتتمنى .. شنو ؟
لؤي : اني انسلخ من العيب .. ( كمل بانفعال ) انلسخ منه وافهم الناس ان العيب ترا مو مرجع شرعي يستاهل انه يهزم عواطفنا ! ولا هو قانون رباني عشان يوقف بيني وبين المرأة اللي احبها .. ولا حديث شريف عشان انتهي من حاجة عشانه .. احيان احس ان كلمة عيب هذي بذرة مجتمعنا .. وهالبذرة ماسقتنا غير الحرمان وننهزم باليوم مية مرة من مشاعرنا
فراس : لا تجلس تلوم كلمة وحدة وتترك كلش ! اذا انت تنتظر هالعالم ينصفك فلا تجلس تسب كلمة عيب وتامل ان كلش بيجيك ع المستريح كذا .. انت اللي تختار مكانك في هالحياة .. ترا مافيه مقاعد محجوزة لأحد بس كل واحد وسعيه
لؤي بقهر : ع اساس انا ماسعيت ؟! ع اني اكثر شخص طيب في هالعائلة واقولها كل فخر لان محد نفع اهلي كثري .. إلا انهم مايلاحظون أي حاجة اسويها .. يمكن لانهم هم نفسهم سيئين لدرجة مايلاحظون ويحسون ! للأسف مافي ثمي شتايم تقربهم مني .... ماهو الذيخ يحب لاطمه
فراس : ترا التشابترات الأخيرة من حياتك اهلك مالهم علاقه فيها .. هذا انت رحت لأمريكا ورجعت دون آي تدخل منهم .. قابلتها ؟! ايش صار ؟ مو مفروض لو هي تحبك شوي تنازلت .... اقل تنازل كان انك تشوف بنتك دون تسرقها ! وبالاخيرة مادمرك الا اللي تحبها
لؤي : ايش توقعت منها بالله ... والله حالة ! كانكم تكسرون القزاز وتقولون له يله تجمع !
فراس عقد حواجبه : اقول لؤي انا مالي بسوالف الحب هذي كلها وما أفهم بجروحكم وما أدري ايش ... بس انا قابلت بهالدنيا اشخاص ينعدون ع الاصابع يقولون انهم يحبون ! ورغم اني ما أفهمهم .. ما أفهم كيف هم ينجرحون وينذلون من اللي يحبونهم .. مع ذلك يبتسمون لهم بشغف كانه ماصار شي ..... سارا مو كذا ! من أول جرح سحبت رجلها وضمدت نفسها وقررت ماعاد تنجرح
لؤي : فراس طبيعة البنت غير الرجال .. يعني انا رجال معليش انجرح وارجع ابتسم ع قولتك طبيعتي تتحمل ! البنات حساسات .. لو هم مو كذا ماقال الرسول رفقا بالقوارير
فراس بثقة : انا قابلت بنت نفس صنفك ! رغم انها انجرحت ستين مرة وباسوأ طريقة تتخيلها ... للحين تبتسم وتحلف ان هاللي جرحها مكسبها
لؤي عقد حواجبه وهو يحاول يستوعب : من تتكلم عنه انت ؟
فراس عقد حواجبه : هاه ؟! ( بلع ريقه وهو يتحنحن ) وحده كانت معي بالجامعه لما كنت ادرس هناك ..
لؤي : انت تصادق حريم وقتها ...؟!
فراس : طر من وجهي ماصادقتها زميلة بس ... وسمعتها مرة تتكلم
لؤي بعدم تصديق : وش هالعبط ... من مره وحده صدقتها ! من تحكي عنه آنت ..؟ ( ابتسم بخبث ) المدام ؟
فراس رفع حواجبه : لا مو المدام !
لؤي : لا تحاول تنكر من قلت رغم انها انجرحت ستين مرة باسوأ طريقه وانا باصم بالعشره ان هالبنت متعامله مع خويي .. ومحد متعامل معك غيرها ... ولا فيه غيرها بعد ؟!
فراس : لا تهذي .. انا حريص ع نفسي ومستحيل اعرض نفسي ومشاعري للضرر عشان حب وتعلاق و ...
لؤي ابتسم : انا ماتكلمت عنك ... تكلمت عن اللي جرحتها بستين طريقه ع قولتك !
فراس : لؤي تعرفني ما أحب اتكلم بهالموضوع فسكره واللي يسلمك ... ولا آقولك انا اقوم احسن لي
مسك لؤي يده باصرار : لا اجلس خلاص سكتنا ... ألا ع طاريها انت لما عطيتها مايا تنتبه لها مين قلت لها ؟
فراس بضيق : عارفه انها بنتك !
لؤي فتح عيونه بصدمه : كيف عرفـــــــت !
فراس بإنزعاج : مدري عنها ابليسه ... عطيتها البنت احتريها تسأل تقول من ع طول نطت بوجهي هذي بنت لؤي ! لا والله يسلمك لما حاولت انكر سلكت لي وعلمها براسها
لؤي كبس بعيونه : متأكد انك ماقلت ؟؟
فراس بانفعال : خلصت السوالف بيني وبين الناس عشان اسولف عنك انت وبنتك !!!
لؤي : آجل كيــــــــف عرفت ؟!
فراس : ع كلامها انها تشبه لك مرة .. ولو اني مو شايف هالشبه
التفت لؤي لمايا .. اللي ماكانت تشبه له مره مجرد شي خفيف : من جد ماتشبه لي ... يمكن الدم والله صقره البنت جابتها
فراس بإنزعاج : اللي هو .. ( طالع مايا اللي كانت تتثاوب وغالبها النعس ) بنتك بتنام
لؤي انتبه لها : معـك حق من صبح صاحية اكيد بتنام . . ( وقف وهو يشيلها من الارض بحضنه ويربت عليها بنعومه عشان تنام )
فراس : لابتوبك وين ؟
لؤي وهو ياشر براسه ع غرفة النوم ع جمب : بغرفة نومي تحصله ع الكومدينه
فراس : عندي تحويلات مهمه بسويها آجل على ماتنوم بنتك
لؤي وهو ع بنته اللي متعلقه بيديها بتيشيرته وتتثاوب : خذ راحتـــك
***
النخيـــــل مول /
كان نايف يدف قدامه العربية المصممة بطريقه تناسب التوأم ... وابتسام جمبه وماسكه يدين رنيم تمشي جمبها , نطق نايف وهو يأشر لمحل : المذركير هنا خل ناخذ لعبه للشيوخ
ابتسام : ما أدري ما احب العابهم غاليه ومافيه زود جودة
نايف : وانتي شعرفك انها مو جودة ؟ ترا اول مرة تصيرين آم
ابتسام : شريته لرنيم قبل فتره وجتني غادة تقول انكسرت
نايف : انشديني ان اللي كاسرها غادة ! العاب بزارين ترا مو عجز
ابتسام : ههههههههههه انتبه لاتسمعك بس والله تخترق المسافات وتقتلك
نايف طالع رنيم : بتعلمين امك بعـد انتي ؟!
رنيم اللي كانت تطالعه دون تفهم ... لكن طريقة كلامه الهجوميه اثارت ردة فعل عنها انها تضرب المستوى اللي وصلت له وهو ساقه بخفه وهي مبوزة : ............
نايف فتح عيونه : شف شف النتفه ! يدها طويلة من اللحيــــن
ابتسام : محد قالك تتكلم بأمها تستاهل
ابتسم نايف وعيونه تطيح على محل قمصان نوم : نوقف هنا ياقلبي ؟
ابتسام انتبهت لابتسامته الجانبية عقدت حواجبها وهي تلفت للمحل ثم التفتت له : ناقصك شي ياعيوني عشان نوقف ؟
نايف بابتسامة خبث : ع حسابي انتي بس ادخلي
ابتسام : مو سالفة فلوس سالفة احتاج بجايم فضفاضه ماعندي .. وبعدين رنيم تكبر صارت تفهم مقدر اتمشى بهالقمصان بالبيت
نايف بحلطمة : يا هالرنيم اللي انحسبت علي بالدخله والطلعه والأكل وكلش !
ابتسام : انا بوقف عند هالمحل دقايق.. انتبه لرنيم
نايف اللي دق جواله لحظتها :تعالي تعالي وين خذي رنيم ... انا مواعد بدرهنا بروح اجلس معه لين تخلصين
ابتسام بضيق : يووه ياقلبي مقدر اتسوق وامسكها ... طيب دامكم جالسين بكافي خذها معك وبالمره تاكل احسها جويعه
نايف تنهد باستسلام : زين بس لو ازعجتني دقيت عليك تاخذينها ( طالع رنيم بهجوم ) سامعة ؟!
رنيم طالعته بحدة كردة فعل لنظراته لها ... نايف رفع حواجبه : شتطالعين امشي قدامي !
رنيم كانت تطالعه بنفس النظرة وهي تبي تلحق ابتسام ... قرب منها نايف وهو يرفعها بيد وحده واليد الثانيه يدز العربيه : يله مشينا !
بعد ماوصل للمقهى ودخل ... رفع بدر حواجبه وهو ينتبه له يجلس : حضانة ؟
نايف وهو يجلس رنيم جمبه ويترك العربيه : احد قالك انه مسموح لك تطقطق علي ؟
بدر تنهد وهو كان يحاول ينهي الزعل بكلام طبيعي بس الظاهر هالمرة ماحينفع ...: انا جاي اعتذر منك عشان آخر مرة .. ( كمل بهم ) ماكان قصدي احرجك بهالطريقه بس ....
نايف بحدة : وإيش مبررك لتصرفك هذا ؟!
بدر : ضغوط .. كنت منضغط من اشياء كثيره حولي ..
نايف : كلنا عندنا ضغوطات ! انا حاليا مضغوط .... أصرخ عليك ؟ احرجك قدام العالم كلهم ؟
بدر : خلصنا نايف عرفت اني غلطان واعتذرت لك شتبي بعد ؟
نايف : ولا عليك امر بس ابيك تعطيني اسم البنك اللي راح يصرف لي اعتذارك
بدر : سلامات نايف ما اعرفك زعول لهالدرجة ... قلت لك ماقصدت وآسف !
نايف : شوف بدر انا راح اعطيك الزبدة ! انا ماني زعول لهالدرجة على قولتك ... والبزارة اللي سويتها آخر مرة بالمطعم ماشالت معي لانها ان دلت ع شي تدل ع نقص عقلك .... بس انت تعرفني انا ما أحب انشغل بمشاكل غيري , كويس فيني من فترة لفترة انشغل بمشاكلي ... ( كمل بحدة ) انا حاليا ضايعه علي اكبر فرصة في حياتي المهنية وعندي عقوبة 6 شهور وخصم راتبي ! مع ذلك مابي التفت لمشكلتي وجالس بالسوق مع عيالي واغير جو .... فأنت يابدر ياللي لك سنه دراما وزعل وحالتك حاله اذا هذا وضعك خلك بعيد , انا بصراحة كصديق تجيني تفضفض لي ماعدت متاح .. لا والمصيبة انك تفضفض لي من آختي ؟! يعني مدري ايش تحس به !!
بدر : المقصد ماعاد اشغلك بمشاكلي ؟
نايف بثقة : نهائي .. ولا حتى تهمس لي بمشكلة , حتى وقت تتعطل سيارتك عطل بسيط لاتجي تشكي لي !
بدر رفع حواجبه : .....................
نايف : لا تطالعني كذا .. مشاكل بالبيت مشاكل بالشغل تكفي ! مو ناقصني ينحسب علي خوي وقت اطلع اغير جو معه يجيني بمشاكل بعد
بدر : خلاص ولا يهمك ينقطع لساني مليون مرة ولا اشكي لك همي .. كويس ؟
نايف : كويس
رفع بدر فنجال قهوته يحتسيه وهو منقهر من طريقة نايف معه :’......................
طالعه نايف بصمت ثم التفت ناحية عربية عياله وهو ينطق : شايفين هالدرامي هذا لاكبرتوا وشفتوا واحد نفس طخته هجوا منه ترا وجع راس ع الفاضي
بدر بإنزعاج : زودتها ترا خلاص فهمنا !
نايف ابتسم من قلب : جرب كيف تنضغط يالخسيس .. ع بالك بتحرني وبخليها لك ؟!
بدر بقهر : صدق انك نـــذل .. كل هالدراما عشان تحسسني فهمت خلاص !
نايف : لا لا وين ؟ صادق بكل حرف قلته .... لو تفلس يابدر اخلاقيا وماديا لاتشكي لي ... تبغاني ؟ دق علي نسافر نكشت نطلع اللي هو .... انسى اني ولد عمك واخو زوجتك انسى انسى كل هذا !
بدر : ولا يهمك اساسا انا نفسي ماعدت ابي اتكلم ولا حتى انفس ....
نايف : الظاهر الشغل عند فراس جاب نتيجة اجل ؟
بدر بقهر : امحق نتيجة حالي حال اصغر موظف ع قولته ... ( عقد حواجبه ) طيب دامك اللحين اوكيه ! شالسالفه حضانه انت ؟
نايف : ابتسام تتسوق وهي بالسنه حسنه تتسوق ... فخل اسوي خير وامسك البزران ! خصوصا ان لي شهر مبزوط النوم خربان ولا اشوفهم حتى
بدر وهو يطالع رنيم : وهذي مـن ؟ ( كمل بمرح ) امداكم تجيبونها وتكبرونها دون علمنا !
نايف : هذي الشيخة رنيم بنت اخت ابتسام
بدر : اهاااااااااا هذي هي رنيم ... ( ابتسم وهو يطالعها ويمد يده ) تشرفنا يارنيم اسمك سابقك ... اخيرا تقابلنا
رنيم مدت يدها بطفوله دون تعلق ... مجرد قامت من كرسيها اللي جمب نايف وانتقلت لجمب بدر ..
بدر : ههههههههههههههههههههه كان البنت جحدتك !
نايف : اجل رجعها معاك البيت انتبه لها دامها ماتبيني
بدر : لا خل ناخذها اللحين نشتري لها شوكلاته وانتهينا ( مسك يدها وهو يوقف معها يشتري لها حاجة تاكلها )
نايف : بطريقك اطلب لي معك كيكة عسل
بدر بتميلح : طلبتني ؟
نايف طالعه بنص عين : كيكة عسل مو كيكة حبة سوداء بارك الله فيك !
بدر : آجل قوم اطلب لنفسك ! انا حمار اذا طلبت لك شي
***
لؤي سدح بنته على سريره وهو يدخل الغرفة عند فراس ويهمس له : قم اطلع برا بطفي النور عليها
فراس وعيونه معلقه ع شاشة اللابتوب .. : دقيقة .. ( ضغط ضغطتين بعدها سكر الشاشه ووقف يطلع )
لؤي : وش تشرب ؟
فراس : كرك
لؤي : الشمس ضاربتنا ضرب وانت تبي كرك ؟!
فراس : شدخلك كبدي اللي بتتحمله ولا كبدك ؟!
لؤي : بسوي لك قهوه سوداء واحمد ربك .. اساسا ما اعرف الكرك هذا يتسوى شلون ؟
فراس : لا وتهايط لي وش تشرب ! كان اختصرتها من آول
لؤي تجاهله وهو يدخل المطبخ بينما دق جوال فراس رد مباشرة : هلا وليد
وليد : هلا فيك .. حبيت اطمنك ان البلاغ وصل وخذوا الأذن وقبضوا على الموجودين 8 شباب و3 شابات
فراس : كويس يعطيك العافية .. ومثل ماقلت لك مافيه تشهير بالاسماء
وليد : على امرك
فراس : يله سلام
سكر السماعة وهو ينتبه للؤي يجلس القهوه : يعني مالك الا اللي براسك ! جب لي عصير زين مالي خاطر القهوه نهائي
لؤي وهو يحتسي قهوته : قوم اخدم عمرك المطبخ هناك .. ( عقد حواجبه ) إلا اقول فراس اذكر آنت مره قلت لي ان هيثم نسيبك اكتشفت بينه وبين سارا تواصل
فراس بطبيعية : آيييه كلمته طلع تواصل طبيعي .. يعني كانو زملاء دراسة لما طلع يدرس برا , وصار بينهم كم موقف عقب كصداقه وخلاص ... عموما في حالات ثانية هالصداقة ماتمشي عندي بس وش آقول ؟ اسوم ماتستاهل سنع زايد هي بنفسها الله يعينه عليها
لؤي : افاااا كذا كلامك عن اختك ؟
فراس بضيق صادق : والله لؤي البنت مو وجه زواج ... وانا خايف من لحظة ترجع لي فيها البيت حردانه منه ولا هو طاردها ولا راح الومه ! وقتها بكل اختصار برجع اسوم هالرفلاء هذي لزمن الجاهلية وبسلمها أبو لهب
لؤي فتح عيونه : لحــــــــــول !! لا مالك حق .. يعني اسوم صح مدلله وهبله بس طيبة البنت
فراس بقهر : اليوم حاولت امي تسلمها الغداء ..؟ وهذاك القدر اسود يسلم عليك ... وتحمد بالسلامة بعد بغينا نحترق كلنا
لؤي : مع الوقت تتعلم ... وبعدين هيثم لازم يفهم انه ماخذ وحده مدلعه ولاتنسى ان خواته يعرفونها لو صدق ماتمشي كان قالوا له
فراس : والله كيفهــــم ! بس هي تجرب تجيني مطـرودة
لؤي وهو يتنهد : الله يوفقهم بس ويسعدهم .. ( ابتسم ) يمكن تكون اسماء هاللي مو معجبتك أول وحده بتكحل عين امك بحفيد
فراس طالعه بنص عين : وإذا ؟! يضل مو ولدنا ... تكحل عيون آلمرزوق فيه
لؤي : آيه وعمي فهاد الله يرحمه طاح فيك وفي بدر ...
فراس : آقول لؤي .. ترا مايشوفون حفيد احسن من حفيد مكتوب باسم امه , صح ؟
لؤي : ماعادت باسم امها .. باسمي وابوي الله يحفظه صار له اللحين 4 احفاد
فراس : تكايش انت ووجهك ؟!
لؤي بضحكة بصوته : هههههههههه لا ما اكايش اعوذ بالله ... بس اهيضك شوي يارجال
فراس قفلت معه بجد : تلايط بس ( وقف ) قهوتك مشروبه انا ماشي
لؤي : لايكون زعـلت ؟
فراس : شايف عقلي خفيف ازعل ..؟ لا مازعلت بس بطلع اشوف العالم انكتمت معك !
لؤي : الله معـــك ولو ان مالك داعي كان خل نشوف مباراة اليوم سوا
فراس التفت له : إلا انت شمجلسك ؟ قم نصلي بالمسجد سوا
لؤي : وين اروح المسجد مقدر ! تخيل صحت البنت وكلتها رعبه ماعندها احد !
فراس زفر : احرس احرس البيت لاتطلع ... يله مع السلامة
طلع فراس وهو يدخل المسجد تبع المنطقة ويصلي تحية المسجد ركعتين ولأنه دخل المسجد بدري ... طلع مصحفه وجلس يقرا بصمت لحد مايجي وقت الصلاة
***
بدر : هههههههههههههههههههههههههههههههههههههه ومشعل السبب يعني ؟
نايف بحماس : لا انا ماقلت انه السبب بس هو راس المشكلة يعني ... بس معليه حافظها له لين يكبر واحاسبه عليها
بدر اللي رنيم دخلت معه جو وجالسه بحضنه وهي تشرب الملك شيك اللي طلبه لها ... انحنى يبوس خدها : ياحلوها هالبنت تذبح
نايف : تصدق عاد أنها ماعمرها رضت اني اجلسها معاي كذا .. الظاهر حبتك
بدر : تجنن الله يحفظها .. إلا هي للحين عايشه عندك عشان فراس ؟
نايف : آيه ... لا والسالفة حرب مدري من المنتصر فيها ! شوي تجي امها تقول جيبوها شوي تدق تقول هونت عقب نص ساعه تدق تقول لا اكيد باخذها ثم عقب تجي تقول مقدر ... ما أدري شسالفتهم
بدر : الله يصلحه ويهديه والله حرام عليه البنت بعيدة عن أمها
نايف وهو يشرب عصيره : ياشيخ يصطفلون ... متى مابغوها هذي هي موجودة
بدر : آيه وابوها ؟
نايف كشر : الله يلعنه النجس ... لاتجيب طاريه حتى هذا حرام ينقال عنه أبو
: نايف !؟
التفت نايف وهو ينتبه لرجل بمنتصف العمر مربرب لحد ما بابتسامة متحمسه : إلا والله طلعت انت .... السلام عليكم كيف حالك ؟
انتقلت ملامح نايف للترحيب الحار وهو يسلم عليه : هلا والله مرحبا ومسهلا ..... شلونك طلال !؟ ما شاء الله وش هالصدفة الحلوة ؟
طلال : عاد انا جاي السوق مالي خلق ... طلع جيتي تسوى اجل دام شفتك
نايف اشر للكرسي الوحيد الفاضي : حياك تعال تفضل ( اشر لبدر ) آعرفك هذا بدر ولد عمي
سلم طلال عليه وهو ينطق : ومين مايعرف بدر .؟ ابتسامته هي اللي شدتني فالبداية اعرف هالابتسامه متصدره نص المجلات
ابتسم بدر بلباقة وهو يسلم عليك : تشرفنا فيك ياطيب
طالع طلال رنيم اللي شالها بدر بذراعه لما وقف عشان يسلم : وهالحلوة بنتك ..؟
بدر انلخم : ههههه لاا لا مو بنتي .. هذي من معارفنا بس
باس طلال خد رنيم الناعم : ياحلوها الله يحفظها ( التفت لنايف وهو يجلس ) شعلومك ؟
نايف : آبد كلش تمام ...
طلال اشر للمواليد بالعربية : وهذول معارف بعد .؟ الظاهر ماسكين حضانة السوق هنا
نايف : ههههههههههه لا هذول عيالي مشعل وعبدالرحمن
طلال تهلهل وجهه بالفرحة : ما ششاء الله وأخيـــــرا عيلت ... لا وتوأم مرة وحدة
نايف : اوهوووه خبرك عتيق انت معيل من زمان ... ولدي اللحين عمره 6 سنوات ( اشر للتوأم ) هذول الدفعه الثانية والدفعات الجايه بالطريق لاتخاف
طلال بدهشة : امانة نايف ... يعني نقول لك ابو عبدالرحمن ؟
نايف : لا ابو يزيد
طلال : ما شاء الله عليك ... عاد انت اخر واحد من دفعتنا توقعته يجي عنده عيال صدق الوقت شلون يمشي , عاد وين ولدك نشوفه مره وحده .؟
نايف : مو موجود يقابلك مرة ثانية ان شاء الله
طالع طلال بدر اللي يتابعهم بصمت : شخبـــار شغلك بدر ..؟ آخر ماشفت كان مشاكلك مع الصحافة
بدر : خلاص ماعاد لنا بالفن ... اللحين صرت موظف مكتبي نجرب حظنا يضبط بعد ولا
طلال : وتجربتك بالفن شلون كانت ؟
بدر بايجابية : تعلمت منه كثير .. بس خلاص صار ماضي واعتبره رواية كلها احداث احتفظ بها بسجلي وافتخر بها , بس انتهت ايامها
طلال : والله حرام اللي مثلك تنتهي مسيرته الفنية كذا .. ( طالع النادل وهو ينطق له ) قهوة سادة لو سمحت ( التفت لبدر ) شوف انت غلطت انك دخلت الفن بشخصيتك كبدر ... انت بدايتك كانت شنو ؟
بدر عقد حواجبه : عارض
طلال : آيه ؟ كان استمريت كعارض والحمدلله ... يعني مفروض ما انغمست معهم بتمثيل ومقابلات وبرامج وتركتهم يدخلون شخصيتك ويأثرون فيها , كان استقليت بهالوظيفة كمجال عمل وبس
بدر : هذا اللي صار . . حمدالله ع كل حال
طلال : راح تحصل لك فرصة ثانية لاتخاف ... ان شاء الله الفرصة الثانية تكون احسن
بدر : ان شاء الله
واستمر الحديـــث بينهم بحماسة
***
فــراس /
بعد ماطلع من صلاة المغرب .. ركب مع السايق وهو ينطق : الفيلا
طالع الطريق وهو يحس نفسه جويـع اليوم كله ماكلى شي ... كويس هذي فرصة تسوي لي آكل ونتفاهم , ( كشر بضيق ) نتفاهم ع شنو !! وانا خليت فيها تفاهم بعــــد ..... يارجال طقاق اساسا السالفة فاسدة من بدايتها ....
فكر يستأجر له شقه يعيش فيها هالفترة لحد مايرجع جده ... بس حس ماله داعي , آساسا غلط يتركها دون جوال او حاجة تتواصل معه وفوقها مايجي يتطمن عليها .. خصوصا والبيت فارغ تماما : ..............
تذكر كلامه مع لؤي اليوم , ليش ضربت فيها مثال ؟ ضرب فيها مثال بالحب بكل فخر ... كأنه يعتز بقد ايش هي تحبه , فوق انه اليوم صدع راسه من التفكير ... انسابت في احاديثة بطريقه عفوية ...
: وصلنا ..
تنهد بضيق صاير الوقت يمر بسرعه يغرق في تفكيره ومايصحى الا ع الوقت مر بشكل مخيف ... , نزل وهو ينطق له : بكرة مرني بدري للدوام انتبه تتآخر !
: حاضر
طلع مفتاحة وهو يدخل الفيلا ويشوف من الشكل الخارجي ان المطبخ بس اللي يشتغل نوره , دخل البيت وهو ينتبه لكلش مطفى فعلا .. حتى المطبخ كانت اضائة خفيفة بالمرة وهي جالسة ع الطاولة اللي بنص المطبخ ومسندة جبهتها ع الطاولة . عقد حواجبه ( نايمة ؟ ) كان جمبها صحن وكاس عصير الوجبة الوحيدة اللي كلتها لما صحت وللحين بمكانها
نطق بهدوء : نايمـة ؟
غادة وهي مازالت ساندة راسها دون يبين وجهها نطقت بصوت هادي : لا
فراس : خفي رجلك لو سمحتي وسوي لي آي شي .. ميت جوع
غادة تنهدت وهي ترفع راسها ... فراس انتبه لوجهها اصفر وشحوب زايد , وقف قبل يطلع وهو عاقد حواجبه : شفيه وجهك ؟
غادة بألم : مافيه الا العافية
فراس وهو بدا ينخب صدق عقد حواجبه وهو ينطق بقسوه ممزوجه باهتمام : وجهــــك مافيه ولا قطرة دم !! اكلتي اليوم؟
غادة وهي تحاول توقف : ايه اكلت .. ( مجرد ماوقفت حست الارض تهتز مسكت الطاوله بسرعه لاتطيح وهي تحضن راسها )
فتح فراس عيونه وبحركة سريع صار جمبها وهو يسندها له : واااضح اكلتي ! ( مسك يدها بقوه بيده عشان تتسند وهو ينطق ) تقدرين توقفين ..؟
غادة اللي كانت الارض تدور فيها .. امس كله ماكلت واليوم بس هالسندويتشه , نطقت بحلق ناشف : مــاء .. ابي ماء
فراس اللي كان مو عارف شلون يجيب الموية وهو مسندها : ياليييل البلشة .. ( شد ع يدها وهو يمشي ناحية الكرسي لحد ما اتسرخت عليه ... جاب كاس موية ع السريع وهو يحطه بيدها ) اشرببي
غادة كانت يدها ترتجف وتحس نفسيتها تنهار ... استلمت الكاس بيدها المرتجفه وهي تشربه مره وحده لآخر قطره ثم جلسته وهي تحس انها احسن نطقت بهدوء : شكرا
فراس تنهد براحة لما شافها توقف طبيعي .. أنقلبت ملامح الراحة للمحته عصبية وهو ينطق بعصبية : وانتي ليش وصلتي نفسك لكذا .؟!!! ليش ما اكلتي ! ولا بزر لزوم أمي حولك عشان تاكلين
غادة طالعته وعيونها ميته .. نطقت بقهر : جالسة احقق امنيتك وفوقها تعصب علي .؟
فراس عقد حواجبه مو فاهم قصدها : .................
غادة وعيونها حمراء من الغصه : مو أمنيتك اموت ... خلاص اتركني اموت براحتي
فراس : لا تستخفين !
غادة بقهر : ماني استخف .. وراح اموت وراح تشوف ... اساسا وجودي ماله معنى
فراس انقهر من نفسه البنت واضح نفسيتها نفسية مراهقة وبطريقته معها وصلها لحدودها : موتي بيومك لا تستعجلين .. بالاخير كلنا بنموت وبنرتاح من هم هالدنيا
غادة ظلت تطالعه : اذا هالجدران راح تكون رفيقة آخر ايامي .. فالله يعجل بموتي .. الله يعجل به
فراس وهو مو عارف شلون يتصرف : تعوذي من إبليس ... ( تنهد بضيق ) روحي البسي تجهزي نزور اهلي
غادة : ما أبي اروح ..
فراس تنرفز : مو بكيفك ! امي تبي تشوفك روحي شوفيها وتعشي معها وبنمشي
غادة باحباط : ثم بنرجع هنـا ؟
فراس طالعها بقوه وهو يشدد ع كلامه : آيه ثم بنرجع هنا !
غادة نزلت راسها وهي تنطق بقهر : دقايق اجهـز ...
فراس لما طلعت تنهـد تنهيدة طالعه من قلبه ... انخنق بشكل مو طبيعي , البنت اضطربت نفسيتها وكله بسبتي ... ( طلع للصالة وهو يلعن نفسه ... كان ضروري يجرحها كذا ؟ ورايح تنقد ع احمد اساسا نفس الكلام اللي قاله انا قلته بوجهها .. مابينك وبينه فرق ) !! مرت قدامه لحظات كثيره ساعدته فيها .. لما انخنق بنص الليل من آلم جرحه ماتركته .. حتى بطرق ملتويه حاولت .. لما كان ينهم كان يحصلها قدامه .. وكأنها مضبوطه آليا انها وقت همه تكون جمبه .. ورغم رفضه لها بكل الطرق مازالت تحاول .... بس الظاهر انه هالمرة خلاها ماتحاول لو تموت ...
صحى من تفكيره على صوت كعبها ع الدرج التفت لها وهو ينتبه لها واقفة وعبايتها بيدها ..شعرهـا الطويل بشكل ملفت جدلته على جنب .. دون مكياج كان شكلها بسيط وهادي , تنهد فراس براحة لما شافها لبست ونبرة صوتها احسن لما نطقت : يله ؟
( صدق اني اناني بس عشان بتطلع صارت احسن وانا حارمها شي بهالبساطة .. )
فراس وقف وهو ينطق بهدوء : مشينا
لبست عبايتها وهي تطلع معهم ويركبون السيارة .. اول ماركب حط جواله ع السبيكر وهو يدق على امه جاه صوتها : هلا والله
فراس : هلا فيك . . بالبيت اكيد , صح ؟
ام فراس : آيه بالبيت كلنا وين بنروح يعني
فراس وهو يلتفت لغادة : انا جايك بالطريق آجل نتعشى سوا
ام فراس بقهر : لحالك ؟
فراس لغادة : تكلمي
غادة كانت مبسوطة لما سمعت صوت خالتها اللي خايفة عليها نطقت بصوت مبحوح متأثر : خاالتي كيفك ؟
ام فراس تهلهل صوتها : غاااااادة ..؟! يامرحبا ومسهلا ... حي الله الصوت , هلا ببنيتي والله شلت همك .. وينك ماتجين تزوريني ! يكفي تركتوني بعد ما اشوفكم
غادة دون شعور منها بكت .. فراس عقد حواجبه وهو ينتبه لها تبكي وتتكلم : وانا اكثر والله وحشتيني موت
ام فراس اضطربت لما سمعت صوتها : تبكين حبيبتي .؟ وشوله تبكين !
فراس تنحنح وهو يبعد السبيكر وياخذ السماعه لاذنه : خلاص ارتحتي هذي هي بالطريق بتجيك
ام فراس بقلق : وليش تبكي طيب .؟!
فراس وهو يطالع غادة اللي خذت منديل تمسح دموعها ... : شيعرفني عنكم يالحريم .. احد ينبسط ويبكي ّ!
ام فراس : يابعد عمري هي ... يله اجل انتظركم على احر من الجمر
فراس : ع خير
سكرها وهو يلتفت لغادة ويحاول قد مايقدر يكون لين : خوفتيها عليك وشوله هالدموع فجأة !
غادة وهي تمسح دموعها ومازالت تبكي : ما أدري لما سمعت صوتها حسيت اني لي سنه مو شايفتها ( مسحت خشمها ) ماكان قصدي ابكي فجأة كذا مو عارفه ولا ...
قاطعها فراس بهدوء : خلاص خلاص .. امسحي دموعك اللحين وهدي بنسهر معها اليوم مابيها تشيل همك ,
غادة هزت راسها بموافقة : ان شاء الله
فراس رجع عيونه للطريق وهو يسمع شهقاتها وهي تحاول تهدى .. حس انه المذنوب , تخيل يافراس هي تجيك وتقولك كلام يجرحك في أبوك ولا اهلك ... كنت دفنتها وهي حية ! وانا ماخليت شي ماقلته عن اهلها امس .. اكيد بتنهار البنت .. اففف وانا كنت قاصد يعععني ؟!!! طلعت معي مدري شلون .... !
***
ابتسسام ونايف بالسيارة بعد ماطلعوا من السوق .... اول ماركب نايف استلمته مكالمه : الو .... هلا والله بالمدير , شلونك ؟ .......... انا حمدالله بخير جعلك بخير ....... آييه بالنسبة لغداء امس معليش مدري كيف راحت عن بالي ..؟ ... ( ابتسام استطرف انتباهها المكالمه ) . . . . ايوه فاهم قد ايش كنت مقابله مهمة ......آيه عارف العقوبه اطلعوني عليها اليوم بس انا كنت حاب اسالك عن فرصة ثانية بالموضوع نفسه ..؟ ...............( نطق باحباط ) كنت حاس .... خلاص معليش اجل خيره ان شاء الله ...ايه فاهم .... ايه عارف , خلاص تمام .... ان شاء الله .... ولا يهمك .... اوكيه ...
لما سكرها تافف وهو ينطق : عمى بعد ماترك شي ماقاله !!
ابتسام بتأنيب ضمير : نايف ؟ تتكلم عن غداء امس
تنهد نايف وهو ينطق : آيه .. الغداء كان فرصة مخصصها لي المدير مع رئيس بمستوى عالي عشان ارفع افاقي , ولما فشلته وماحضرت المقابله طنقر علي
ابتسام : يوووه وآلله اسفه نايف ماتوقعتها مهمة هالقد
نايف اغتصب ابتسامه يطمنها فيها : لا تحملين نفسك الغلط .. اللي صار صار
ابتسام : آيه بس انا كنت احسبه موعد عادي ... آسفة حبيبي والله مو بقصدي
نايف : ابتسام خلاص قلت لك مو زعلان ...
ابتسام باحباط : مستحيل ماتزعل ... جد شلون اعوضك ؟
نايف زفر هالمرة : ابتسااام !!! خلاص قلت لك مازعلت .... ولعاد تكررين بالسالفة وتضيقين خلقي فيها
ابتسام باحباط : ان شاء الله ... ( سكتت لفترة ثم نطقت تغير جوه ) شرايك نزور اهلك نشوفهم ؟
نايف : لا ... اكيد مشغولين وميهاف باختباراتها بعد
ابتسام : شخبار دراستها ؟
نايف : بخير .. دراستها مضبوطة وتستعد تاخذ منصبك القديم بشركة ابوي
ابتسام بدهشة : بجــــد ؟!
نايف : آيه ابوي واعدها فيه لما تتخرج ع طول
حست ابتسام بحنين لشغلها ... تنهدت لضيق ميهاف راح تتوظف وتفتح لنفسها افاق وهي ماراح تقدر حست بغيره تمنت ترجع تشتغل
***
وصـلت غادة لام فراس وبعد السلام الحار لها ولاسماء كانوا جالسين ع القهوه ... وفراس جالس معهم /
ام فراس : اسماء اطلعي فوق ذاكري بكرة وراك اختبار
اسماء : لا يمممه تكفين غادة صايره تجي زياره بس ... خل اشبع منها
فراس : آيه اشبعي منها ولما يجي اختبار بكرة ابكي على الورقة
اسماء بثقة : تطمن ماحبكي .... حتى لو رسبت ماحبكي
فراس : حتى لو وصل خبر لخطيبك انك كسلانه وراسبـــه ؟
اسماء شهقت : لا لاتقول !!
فراس : لا لاتقول ؟ ليش احد قالك انه لما يعرف انك راسبه بيبكي من الفرحة ؟
اسماء تاففت : خلاص دقايق واروح اذاكر اففف .. ( التفتت لغادة ) غدو شفيك ساكته ؟
غادة ابتسمت ابتسامه صفراء : ايش تبيني اقول ؟
اسماء : ووجهك ليش اصفر كذا ! شكل فراس مجوعك هنا
فراس : آيه لان مهمة الطبخ على الرجال صح ؟
ام فراس بقلق : وغادة شلونك هناك ؟ مبسوطة ؟
غادة بهدوء وهي منقهره من فراس اللي كان واضح جالس معهم عشان ما تجلس لحالها مع اهله على قولته : آيه حمدالله ع كل حال
اسماء رن جوالها طالعت المتصل وهي تافف : .............
ام فراس : ليش تاففين ؟
اسماء بقهر : هذي وحده من شعبتي اكيد بتسألني عن الامتحان ... وعلى الرغم ان البنت مسكينه بس صدق تاخذ وقتي ع اسئلة مالها طعم
ام فراس : وش هالبنت .؟
اسماء صمتت جوالها وهي تنطق باحباط : هي امها تعبانه شوي واحس حياتها صعبه حتى نص محاظراتها مفوتتها .. ولما اشوفها احسها مهمومه وتعبانه
ام فراس : الله يعينها يارب
اسماء : تصدقين فيه بنات قالوا لي ان ماعندها غير امها ... يقولو ابوها ماتعرف منهـوا حتى ؟! متخيله كيف عيشتها وهي ما تعرف من ابوها حتى
فراس شد ع قبضته وهو يتمنى يسكت اسماء !! وعيونه انتقلت لغادة مباشرة اللي كانت صدمته ... انتبهوا لها فجأة انفجرت ضحك : هههههههههههههههههههه
ام فراس عقدت حواجبها : غدو ؟!
اسماء : غادة صاحية ؟! تضحكين وانا اقولك سالفة تحزن ... والله مايضحك ترا ان البنت عايشة دون اسم ابو
غادة زاد ضحكها : ههههههههههههههههههههه آسفة والله بس ...
فراس نطق بين اسنانه : غادة ....
غادة مسحت دموعها اللي طلعت بين ضحكها وهي تحاول تمسك ضحكها اللي كان من شدة همها : ههههههه اعذروني .. لا مو قصدي اضحك عليها الله يصبرها ويصبر حالها بس ( رجعت تضحك دون شعور ) هههههههههههه
فراس انعصر وهو ينتبه لدموعها ماتوقف وسط ضحكها ... بالاخير انتبه لانفعالها يهدى وهي تمسح دموعها بمنديلها وتوقف : ثواني بس اغسل وجهي
اول ماراحت التفتت له ام فراس : فراس ! انا المصدومة الوحيدة هنا
اسماء بريبة : معقولة تكون شمتانه بالبنت ؟
فراس ( قصدك شمتانه بنفسها ! ) نطق بضيق : وانا شعرفني ...
غادة كانت عند المغاسل وهي تغسل وجهها ... ومن جنون انفعالها رجعت تطلق ضحكة خفيفة : ههههههه
: شر البلية مايضحك
رفعت عيونها وهي تنتبه له وراها .. التفتت له وهي تنطق بقهر : امانه مايضحك .؟ ( نطقت بجدية ساخرة ) تصدق فراس شكل هالبنت اختي .. يمكن ابونا واحد وحنا مو عارفين
فراس نطق بهمس : لا حول ولا قوة الا بالله ( رفع عيونه لها بحدة ) غادة بتجلسين دون جنان ولا مشينا نرجع
غادة ارتجفت شفاتها .. : فراس ...
فراس تنهد بضيق : هلا غادة ؟
غادة نطقت بانهيار وصوتها يحمل مية عبرة وعبرة : انـا على شفى حفرة ... ( كملت بغصة ) انا تعبانه فراس .. ( رفعت يدها وهي تمسك حلقها ) آحس حصآ عالقة هنا .. والله تعبت .. ( كملت برجفة وهي تشهق مو عارفه تبكي ) مو عارفه ابكي ولا عارفه ارتاح ... ( كملت بتبرير موجع ) انا ما أخترت انولد بنت زنا .. والله ما اخترت .. ولا اخترت امي تكون ...
فراس قاطعها وهو ينطعن بداخله وهو يشوف منظرها ... تنهد وهو ينطق بهدوء : هشش ... لا تتكلمين غادة , عارف مايحتاج تقولين لي
غادة وهي للحين غاصه بوجعها .. نطقت بلوم : هجل ليش تكلمت معي كأني انا اللي اخترت هالوضع ... ليش انت بالذات تقولي هالكلام .. انا اتحمل السم بذاته من غيرك .. وحتى الهمسة منك ما اتحملها والله ما اطيقها ..
فراس بلع ريقه وهو مرتبك من حالتها ... ويحس اعصابه مشدوده وقلبه يضرب طبول من منظرها .. اول مره ينلام ومو عارف يبرر .. كانت عيونها الفاتنه حمراء .. حمراء ومو عارفه تطلع دموعها .. وفمها يرتجف وهي تحاول تتنفس وسط كلامها ... مد يده بربكة حتى وصلت لكتفها وهو يثبتها ويربت عليها بخفه : تنفسي آول شي .. تنفسي
غادة بنفس النبرة : كله منك .. ليت كل هالبشر جلدوني وبهذلوني ولا سمعت منك هالكلام ..
فراس بيده اللي على كتفها .. قربها منه بهدوء حتى لامس خدها كتفه هذي نتيجة حيرته وارتباكة لمنظرها بهالشكل وهو يحس قبضات قلبه هـدت شوي .. كان يطالع نفسه بالمراية قدامه وهي مسنده راسها ع كتفه ونظراته طايره كانه مو مستوعب : ......................
بعد فترة مو طويلة تنحنح وهو يمسك كتفها ويبعدها عنه شوي وينطق بهدوء تماما ومو مستوعب نفسه : غسلي وجهك وتعوذي من الشيطان وتعالي نتعشى .
قال كلمته بجمود تماما وتركها مباشرة وهو يحس الهواء ضايق فيه ... جلس بالصالة وامه سالته بقلق : شخبارها ؟
فراس وبوجهه ملامح ضيق تماما : ماعليها
ام فراس بقلق : وانت وجهك وش فيك ..؟؟
فراس وهو يحس بضيقه فعلا .. : ما أدري يم خفقان مو طبيعي .. الظاهر جرحي رجع ينغزني
ام فراس طارت جمبه وهي تنطق بخوف : تقوم تشوف الدكتور ؟
فراس : لا يمه وش دكتوره الله يهداك ماعلي شر .. عجلوا العشاء اهم شي
دخلت غادة وهي تحس بربكة ومو فاهمه شصار من شوي .... رفعت عيونها له انتبهت له شايح بنظراته عنها تماما
ام فراس : بنتي شخبارك ..؟
غادة تنحنحت : ماعلي
ام فراس ابتسمت : آجل تعالي معي نكب العشاء سوا بما ان اسوم اخيرا صعدت تدرس
غادة ابتسمت بمجاملة : ان شاء الله
راحت تماما وكانها ماتبي تجلس معه .. مو فاهمه كيف كانت بهالقرب منه , للحين ريحته بانفها بشكل عجيب , حست حرارة جسمها ارتفعت ..
جهزت مع ام فراس العشاء وتعشوا ومابينهم حتى نظرات .. بعدها رجعـوا وغادة صعدت مباشرة وهي مو مستوعبة للحين ان فراس بنفسه كان بهالقرب منها .. والشخص اللي مو مستوعب آكثر كان فراس ... ماكان مستوعب بشكل طير النوم من عيونه طول الليل ..... وبالأخير فتح جواله وهو يدق على رقم دكتوره : آلو دكتور
الدكتور : هلا والله استاذ فراس كيف حالك ؟
فراس : حمدالله ...
الدكتور : كيف جرحك ان شاء الله احسن ؟
فراس بضيق : داق عليك عشان كذا .. بكرة حمرك تفحصه لي آحس معي خفقان وينخزني مكان الجرح ..
الدكتور بقلق : خلاص تمام بكرة بااي وقت حياك وراح افحصك اساسا انا نصحتك بفحص دوري
فراس : ان شاء الله بكرة موعدنا يعني
الدكتور : ع خير
سكر فراس وهو يتنهد ورفع يده لصدره وهو يدلكه بضيقه : معقوله كل هذا عسر هضم ولا الجرح ولا شالسالفة ؟!
***
الصبـــاح التالي ... بالجامعة آول يوم اختبارات .:-
ركضــــــت اسماء من آخر الممر لميهاف : صباااااااااح الخير !
ميهاف ضمتها : هلااا والله بالزين ... صباح النور , كيف استعداداتك لآول يوم امتحانات ؟!
اسماء : ان شاء الله خير .... آهم شي انتي مكانك قدامي صح ؟!
ميهاف بطبيعية : آيه آيه فهمت .. راح اغششك بس مرة وحده اسوم !!
اسماء : اساسا هالمقرر الوحيد اللي بيني وبينك الباقي بدور غيرك
ميهاف : تعالي نجلس طيب نفطر دام جايين بدري على ما تبدا القاعات
اسماء : ايه بجد والله جوعانه مرة
ميهاف : سرينا
***
غـــادة /
صحت من الـنوم وهي تحس نفسها آحسن شوي بعد عشاء ام فراس ... غسلت وجهها وترتبت وقررت تنزل تفطر , آول مانزلت انصدمت لما شافته مستلقي على الكنبة ونايم ... وواضح انه غفى لان كتابه بيده طايح ع صدره .. ويده ورا راسه ... طالعت الساعة كانت 9 صباح ... غريبة عليه بهالوقت يكون بالبيت ...
بلعت ريقها وهي تنتبه لشكلة الجذاب نظارته النيرد طايحه من عيونه بنص وجهه .. وتنفسه المنتظم مع لمحته الحادة تقتل خصوصا مع بجامته السوداء ...
حست بضيق وهي تصعد مباشرة تجيب غطاء ناعم ... نزلت مسرعه تغطيه لأن الصالة كانت باردة بجد .... لما انحنت تبي تشيل النظارة من وجهه .. بلعت ريقها وهي تستوعب قد ايش رموشه طويلة .. كانت طويلة فعلا وبشكل ملفت . حتى اطول من رموشها ...... حست قلبها يضرب طبول ومسموع للكل ..... هزت راسها بانكار عشان تركد وهي تمد يدها المرتجفه تسحب النظاره .... مجرد مالمست النظارة فز من نومه وهو يمسك يدها اللي تبي تشيل نظاراته بشكل دفاعي ... غادة خبطت برعب لما مسكها بهالشكل وهو .. كانت ردة فعله مخيفة ومفاجئة استقعد نوعا ما فجأة وهو يمسك يدها ..... والمربك آكثر لما طاحت حتى صار وجهها ووجهه ماتفصل بينهم مسافه ...حست من لمحته انها كانت تحاول تغتاله ... كان فاتح عيونه بوسعها ويطالعها ... وحالة الخفقان رجعت تمسكه لما استوعب وجهها قريب منه لهالدرجة .... كانت شفايفها بحجم التوت ترتجف وهي نفسها مصدومه ............. العين بالعين ... ويده شاده ع معصمها .. والأجواء تكهربت بينهم .......

اوووو واخيرا خفق القلب يافراس كثير منقهره على غاده وردة فعلها على حكاية اسماء عن البنت الي ما تعرف ابوها . منتظرينك على ناررر يوم الخميس وشكرا ليكي متملله وعلى التزامك معنا .

ههههههه قلبه دق وهيجيب دكتور يكشف عليه
تتوقع فراس الدكتور هيقولك إيه؟ مبروك بقيت بني آدم ؟ ع العموم احسن ما يستمر على طريقته
نفسي بجد اعرف هيحصله ايه وهيتصرف ازاي لما يعرف ان خفقان قلبه بسببها؟
غادة ، حالتها كانت تقطع القلب و الرجال اللي حواليها اللي يعرفوا وضعها بيحتقروها وبيستحلوا يهينوها بأي طريقة ،وصف حالتها ومشاعرها و خنقتها كان مؤثر جدا
لؤي وهو على مشارف مواجهة حامية مع الوالد وربنا يستر ، المهم انه ما يتعرضش فيها لخيانة جديدة من سارا
متهيأ لي ابتسام بقت خنيقة شوية ؟ نفسي اسحب التصويت بتاعي منها لصالح نايف
شكرا ع الفصل ودايما مبدعة

بارت هادئ وجميل…
مشكوره ياحلووه على البارت…
واخيراً خفق القلب يافراس… ياترى وش نسمي حالتك هاذي ..
يمكن تتصلح الامور العالقه بينهم… وربنا يهدي فراس ويحن قلبه بزياده على غاده… ونستنى توقع يافراس وبعدها ماراح تلوم لؤي وحبه…
لؤي حاول تقول لأبوك عشان ترتاح من هـ السالفه…
وبعدها تشوف حياتك وكيف بتعيشها سواء مع ساره او غيرها…
اسماء ماخذه حياتها لعب بلعب لا إختبار هامها ولا شي… الله يعينها ويعين هيثم عليها…
كاتبتنا الجميله بـ إنتظارك وانتظار ابداعك ..