متمللة
هو مافيش بارت النهاردة؟

لا كيف مافيه ... انزله اللحين معليش ع التأخير

" البارت الثاني عشر "
ام نايف بحماس : وصلوا وصلوا ... ميهاف تعالي معي نستقبلها تدخل
راحت ميهاف وهي متحمسة تقابلها .. كانت واقفة قدام الباب وجمبها بنت وبعباياتهن بس فاكات الطرحات ابتسمت ام نايف : مرحبا ومسهلا .. نورت الرياض كلها بهالطلة , وحمد الله على السلامة
ابتسام سلمت على أم نايف وهي منحرجة من سلامها الحار .. ام نايف باستسفار : هذي اختك ؟
ابتسام : ايوه هذي اختي الصغيرة غادة
ام نايف باعجاب : ما شاء الله تبارك الرحمن .. هلا والله ياعمري , عسى امورك تمام ؟
غادة : حمد الله يا خالة كلش تمام , انتو كيفكم ؟
ام نايف : بخير نشكر الله .. ( ألتفتت لميهاف ) هذي بنتي ميهاف
ميهاف ابتسمت وسلمت عليهن وهي ماتوقعت ابدا يكون هذا شكل زوجة نايف .. غير عن خيالها تماما : والله ونورتو البيت .. حياكم من هنا تفصخو عباياتكم
غادة همست لابتسام : شوفي الجسم بس .. ياويل قلبي ماتسلفني شوي
همست ابتسام : عيب اسكتي , وش ذالفضحة
غادة : يختي شي يقهر انا كأني ملحاق وهي هالجسم كله
هزت ابتسام راسها .. ودخلتهم ميهاف بغرفة ضيافة مخصصة لهم : خذوا راحتكم , مانبي نطلعك للحريم لحد مايكتملون
غادة فصخت عبايتها بسرعة ونطت: وانا شدخلني ابي اطلع !
ميهاف : ههههههههههههههه , ماراح تجلسي مع اختك ؟
غادة : لا منحبسه معها اسبوع طق خلقي .. ابي اروح اشوف العالم
ميهاف : ههههههههههههه تعالي اجل , عادي ابتسام تجلسي لحالك ؟
ابتسام ابتسمت : ايوه عادي معليش
راحت غادة معها وهي تطالع المكان بذهول .. كلش يفتن ياحظك يا ابتسام هذا كله نصيبك اللحين , انتبهت لبنت شقرا بالاسود والأحمر وطلة مذهلة : خير انتي رحتي مسفحة مالتفتي لي حتى ! وينها ابي اشوفها ؟
ميهاف : هههههههههه يامطفوقة اصبري .. هذي غادة اختها
اسماء سلمت عليها بفلتها الطبيعية : اذا اختك مثلك اجل نيوف فاز اليناصيب
غادة : هههههههههههه انتي اخته كمان ؟
ميهاف : لا هذي اسماء بنت عمي .. انا اخت نايف الوحيدة وثنين اخوان
غادة : اهااا .. طيب وين ادخل على الحريم ؟
ميهاف استغربت جرئتها توقعتها تستحي بس هذي فالتها .. اسماء : تعالي انا بدخلك عندهم
دخلت غادة بثقة وهي متكيفة مع الكل وتسلم .. هذي طبيعتها اساسا المخباة في ظل بيتهم وحياتهم البسيطة
***
وقت دخل هيثم عند الرجال وبعد ماسلم تأكد خـلاص ان نفس اللي عالجها موجودة اكيد .. لأن الوجيه المألوفة واجد شاف نايف ولؤي بالمستشفى كذا مرة .. ماتوقع لما شاف نايف بوقتها انه بيصيرون نسايب , طالع فراس بفضول هذا اللي قاهر سارا .. كان ساكت وينقل بصره بين الموجودين , كان نايف جمب بدر وأبوه ... وفراس ضمن مجموعة رجال اعمال يتكلم معهم باندماج انتبه لصوت جمبه : دكتور مو ؟
التفت هيثم وابتسم : جراح
رفع لؤي حواجبة : ما شاء الله .. ما كانت صعبة عليك ؟
هيثم : صعبة بس وش قيمتها اذا ماكانت صعبة
لؤي : هههههههههه ايوه بس مو الكل يفكر كذا
هيثم : اجل من حسن حظنا ان فيه ناس تفكر كذا
لؤي هز راسه : يقولو ان محيط المستشفى يهبط قدرة الانسان على التواصل الاجتماعي
هيثم : ايه صح لأنك تنشغل تماما عن المجتمع والمواضيع الدارجة فية واهتماماته .. فما عاد تقدر تواكبه حتى لو بغيت
لؤي : انت كذا ؟
هيثم : تقدر تقول , انت وش تشتغل يالطيب ؟
لؤي : دراستي نثر يعني كاتب , بس اشتغل بمجتمع الأعمال
هيثم : ما قدرت تتوظف بتخصصك ؟
لؤي : ماراح اقول ماقدرت بس الكتابة هواية اكثر منها وظيفة .. يعني وش الرزق اللي ممكن تكسبه بالكتابة
هيثم : كثير ... إنتاج كتب دار نشر صحفي مو هذي تخصصات الكاتب ؟
لؤي ابتسم : ماضبطت .. وهذا حنا عايشين ادارة اعمال
هيثم : بالتوفيق أجل .. واخوك نفسك ادارة اعمال ؟
لؤي انحرج : لا نايف دارس تقنية .. بس ماتوظف للحين بس مكانة محفوظ عند ابوي
هيثم: اهااا
لؤي : مستشفيات جدة كويسة بس ماتقارن بهنا .. يعني مافكرت تشتغل هنا بما ان اختك نقلت وبالمرة تكون قريب
هيثم : ايه بس انا عندي اخت ثانية بجدة
لؤي : والله براحتك بس بنظري مدينة الملك فهد الطبية بيقبلونك دون تفكير .. ومين حاصل له مدينة الملك فهد الطبية؟
هيثم حس العرض مغري سكت وهو يفكر .. مستقبله الوظيفي كله بالرياض بيكون بارز اكثر : ........
قاطع محادثات الجميع وصول المملك
***
اسماء ووداد وسجى وميهاف وغادة ورفيف جالسات بركن بمجلس الحريم /
سجى : شخبارك ميهاف ؟ عقب الحوسة اللي سمعنا بينك وبدر عسى مو متهاوشين
اسماء : حراااام عليييك ! بدر وميهاف ؟ تقولين سمنة على عسل .. والله بدر انقلب 24 درجة من ورا هالخطبة
سجى : ايه انقلب صار يصور مع حريم
اسماء : وش قصدك سجية ؟! عقبال ما اشوف رجلك يشفط شيشة مع حريم قولي آمين
سجى شهقت : بسم الله علي !! لاتفاولين ؟
اسماء : تستاهلين .. ولا اساسا وش دخلك تسألين مجلس بكبره وكله حريم وش كبرهن محد سأل تجين انتي يالفصعة؟
سجى : وانتي شدخلك تردين ما أذكرني كلمتك !!
اسماء : اخوي وصديقتي فاطلعي منها يالحشرية
غادة سكتت وسط النقاش الحاد وهي مو فاهمة كلامهن بينما الباقين متعودين من يوم يوم اسماء وسجى كذا .. ميهاف بلباقة : سجى حبيبتي مافيه شي .. والعقد كنا متفاهمين عليه وانا موافقة لأنه مثل ماقال استلم العربون من اول , ومافيه خلاف لاتخافين
اسماء طالعتها بنص عين : انبسطتي !!
سجى : ايه انبسطت .. خفت يكون صاير بين عيال خالي شي
غادة : ههههههههههه ما شاء الله ميهاف مخطوبة ؟
اسماء بحماس : ايه خاطبتها انا لأخوي مالقيت احلى من هالمزة تليق بمقامه
ميهاف باستها بخدها : يابعد عمري والله
دق جوال غادة وقفت : هذي ابتسام .. ميهاف الغرفة بآخر الممر ؟
ميهاف : ههههههههههه ضيعتي ؟
غادة : وهو بيتكم ما شاء الله وش كبره
ميهاف : ايه ياقلبي بآخر الممر .. اجي معاك ؟
غادة : لا مافيه داعي
اول ماراحت قالت رفيف بفضول : اختها مثلها
ميهاف : لا اختها احلى
اسماء فتحت عيونها : بجد ؟
ميهاف : ايوه والله احلى
سجى : تحمست اشوفها والله
ميهاف : ههههههههه حرام محبوسة بالغرفة بروح اقول لمامي عشان نطلعها
تو بتقوم دخلت أم نايف : المملك وصل ياجماعة .. والعروسة بتسلم على الموجودين
دخلت ابتسام وجمبها غادة .. طالعت اسماء ميهاف بنص عين : هذي احلى من غادة ؟ مالت على ذوقك بس
شهقت ميهاف : ما أعجبتك !
اسماء : اعجبتني وحلوة جدا .. بس غادة احلى والله مو بسيطات بنات جدة مزز
ميهاف : لا والله بنتنا احلى
اسماء : ايه قولي عشان بنتكم
ميهاف : وربي احلى انتي غشيمة شيعرفك ؟
سكتو لأن ابتسام وصلت عندهم وغادة ماخذه وضعية التعريف : ابتسام هذي اسماء بنت عمهم .. وهذي سجى واختها وداد بنات عمتهم وهذي رفيف
ابتسام وهي مبتسمة : هلا والله تشرفنا
سجى : ان شاء الله الف مبروك .. والله وماتوقعنا نايف يتزوج عقب ..
قاطعتها ميهاف : سجى !
استغربت ابتسام وغادة .. لكن ميهاف ابتسمت بسرعة : سلمتي على الحريم خلاص
ابتسام : ايوه
نادتها ام نايف : ابتسام تعالي سلمي على ام عبد الاله
مسكت ابتسام طرف ثوبها وراحت لعندها وغادة معها .. التفتت اسماء لسجى : لسانك انتي مايعرف يدخل حلقك !
سجى : شنو على بالي تعرف !!
ميهاف : لا ياسجى ماتعرف .. فانتبهي المرة الجاية لكلامك
اسماء بهياط : ايه انتبهي !
ابتسام اول ماجلست براس المجلس .. حست كل قطرة دم فيها نشفت اول مرة تكون في تجمع كذا , تجمع كبير ولا اشكال البنات كيف اوفر وهي تحسب نفسها اوفر , طلعت كشخة بعضهم اكشخ منها وهي العروسة .. كل وحدة شكلها ينطق بالغنى والبطرة اللي هي فيها , ولا السوالف اللي جالسة تسمع .. سافرت لوين وشرت ايش وعزمت لوين .. اشياء تحسسها انها اول مره تعيش
همست لها غادة : كيف اعصابك ؟
ابتسام استنشقت : والله ما أدري يا غادة متوترة مره
دق جوال غادة طالعت المتصل كشرت " احمد " ... ابتسام : مين
غادة : احمد بطلع اكلمه وراجعه
ابتسام : اوك لاتطولي
طلعت غادة لعند الممر الجانبي : هلا
احمد : هلا والله .. اشوف من رحتي الرياض معاد تسألين ولا تتصلين
غادة : والله ياقلبي انت تدري .. يعني مشغولة مع ابتسام من وين افضى
احمد : ايه صدقتك
غادة : والله بجد واليوم ملكتها .. فمشغولة كمان
احمد : صاه خلاص بسكرها اللحين .. بس حنا جايين بكرة
غادة توترت اعصابها تو ارتاحت هالفترة : اوكيه حياتي توصلون بالسلامة
احمد : يله انا بسكر .. واعجلي ارجعي لاتسهرين عندهم
غادة ( ياخي طير بس ) : اوك .. باي
سكرت السماعة ورجعت وهي تحس باكتئاب من هالخبر .. وقفت ام نايف : يله حبيبتي المملك في المجلس تفضلي
ابتسام مسكها بطنها .. لكن قامت وهي تدعي ربها يسهل لها لحقتها غادة وهي متحمسة كأنه زواجها هي دخلت ابتسام المجلس الفاخر بتصميم مغربي تقليدي بحت كأنها جلسة عثمانية او من عصور عباسية كان المكان ينطق بجمال حصلت الكتاب قدامها مسكت القلم بيد مرتجفة ووقعت وهي تشوف توقيعه .. وام نايف قبلها جالسة تشوف توقيعة وهي ماهيب مصدقة انه مر اليوم دون مشاكل وحضر ووقع تنهدت براحة سلمت على ابتسام : ان شاء الله الف مبروك
ضمت غادة ابتسام : مبرووووووك ياخايسة والله واعرستي
ابتسام ضحكت بتوتر : هههههههه يبارك فيكم
انطق الباب .. ام نايف : مين ؟
جا صوت رجولي : حنا
ام نايف : هذا أبو نايف .. غادة ارجعي لداخل
انحبطت غادة تبي تجلس تشوف لكن رجعت .. وابتسام تبي تلحقها متوترة شخص أول مرة تقابله دخل أبو نايف وابتسام كان منزلة راسها ومجرد تسمع اكثر من خطوات وريحة رجالية غزت المكان بشكل واضح .. مشى ابو نايف لعندها ومد يده صافحته ابتسام وباست خشمه وراسه .. ابو نايف : ما شاء الله تبارك الرحمن .. الله يحفظك من الحسد , الف مبروك يالغالية .... انا عمك ابو نايف وبحسبة ابوك ان شاء الله
ابتسام وهي حتى ماطالعته ومشبكة يدينها ببعض : يبارك فيك عمي .. وجزاك الله خير
ابو نايف : تقدم سلم على عروستك
طق قلبها طبول .. نايف موجود !!! خافت ترفع راسها تستكشفه ولو مجرد لفضول ..حست بيده الباردة بعروقها الناتئة تصافح يدها : مرحبا
بلعت ريقها بصعوبة : ...
ام نايف غمزت لأبو نايف : نطلع ؟
ابتسام ( لا لا لا .. شنو يطلعون ؟ ) : ..........
نايف برضو سكت ماعلق ... ابو نايف : يله حنا طالعين خمس دقايق وتعال
طلع أبو نايف وابتسام غمضت عيونها وهي تحس اعصابها مشدودة .. وكلش فيها يرتجف من توتر اللحظة حتى مو قادرة تطالع فيه , نايف كان واقف وانتبه لارتجافها الواضح .. منزلة راسها وكلش فيها يهتز اول مره يحس ان امه معها حق في حاجة .. البنت جميلة تنحنح وهو يمسح على ذقنه بيده وجلس على الكنبة ورجل على رجل : ارتاحي اجلسي ليش واقفة
ابتسام بلعت ريقها وجلست وهي تاركة مسافة .. نايف استغرب حسها تبالغ بخوفها ارتجافها واضح بشكل مب طبيعي .. نهى كان مستحية بس مو كذا : بردانة شي ؟
ابتسام هزت راسها .. نايف : اجل ليش ترتجفين ؟!
رفعت ابتسام راسها .. ارتبك نايف لما شافها تطالعه عيونها سوداء واسعة كحيلة اما ابتسام انصدمت ماتوقعته كذا .. اسمراني طويل وذقنة وشنبه بداية ظهور شعر خفيف جدا خشم مسلول وعيون زيتية فاتحة حادة اجتمعت فيه الغنى والوسامة : مافيه شي .. بس ..
نايف : اححم , كيف شايفه جو الرياض ؟
ابتسام هزت راسها : كويس
نايف ( وش هالمملة لو عارف النظرة بتكون كذا بطلت الله يرحم ايامك يا نهى ) وقف : فيك ترجعين انا طالع
حست ابتسام بالفرج اخيرا لكن قبل يطلع التفت قال بهمس بينه وبين نفسه لكن ابتسام سمعته : وتقولي مو بيضا
فتحت ابتسام عيونها .. وهي تشوفه يطلع عقدت حواجبها وش يعني شقصده ؟! بلعت ريقها وهي تتذكر رهابة الموقف بالنسبة لها حملت فستانها ودخلت للبنات استقبلتها غادة بالممر : شصااااااار ؟؟؟ شفتيه
ابتسام مسكت صدرها : بسم الله ! خرعتيني
غادة تعلقت بذراعها : يله قولي بجد .. شفتيه ؟
هزت ابتسام راسها : ايه
غادة : وكيف ؟
ابتسام : شنو كيف ؟
غادة : هاه !
ابتسام : اففف لاتزعجيني بدخل
غادة : طيب وش صار ؟ صار بينكم شي وانتو لحالكم ؟
ابتسام ببراءة : لا بس جلسنا
غادة رفعت حاجبها : متأكدة ؟! اتحداك
ابتسام : والله .. سالني عن اخباري و ... بس
غادة حاست بفمها : مالت تذكرت اللي من أول ماشافني نط فوقي
ابتسام فتحت عيونها : عيب استحي وش هالحكي !
غادة : فكيني زين .. يله ندخل بس
ابتسام : ادخلي انا اصبري شوي وبجي
غادة : ههههههههههههههههههههه ايه روحي الحمام وعدلي وجهك حمراء ياساتر .. اجل لو عندك احمد وش بتسوين
ابتسام : كان اموت ... !!
دخلت غادة وهي راحت تضبط وجهها وهي تتذكر شكله .. هذا هو شريك حياتها خلاص ؟ والله وقام عزك يا ابتسام
رجعت لداخل وهي مذهولة من شكل البوفيه على طاولة الطعام الطويلة .. والكل جالس قابلتها ام فراس : هلا رجعتي ؟ ههههههههه هاه كيف ؟
ابتسام استحت وخدودها وردت : تمام
ام نايف : هلااا ابتسام .. تعالي اجلسي جمبي تعشي
ابتسام حبت ام نايف من قلبها طيبة معها بجد .. دارت بعيونها تدور غادة حصلتها مع البنات ومنسجمة مو يمها ابتسمت لما شافتها انسجمت مع المجتمع توقعت انهم بيدخلون عالم ثاني ولا راح يعرفون يتجانسون ..
غادة جالسة وبيدها ليمونة وتاكلها لحالها .. فتحت ميهاف عيونها : ليمونة هيك لحالها ؟
غادة : يختي الوحام ماتعرفينه ولا عذرتيني
سكتو كلهم للحظة .. محد استوعب رمشت اسماء بعينها اكثر من مرة : وحام ؟
غادة بطبيعية وهي تاكل بالليمونة : ايه وحام
وداد بتردد : حامل ؟
اسماء : قصدي متزوجة ؟
غادة وهي تشوف نظرات الذهول فيهن : بدخل الشهر الرابع وتقولي حامل
ميهاف : اوماي قاد ما أصدق .. على بالي ماتزوجتي اصلن
شدت غادة على فستانها لحد بان بطنها : ههههههههههه لا متزوجة لي نص سنة يمكن
سجى : ما شاء الله .. ماتوقعنا ابد
غادة ابتسمت : مدحة ولا ذمة ؟
سجى : لا مدحة .. يعني والله صغيرة على انك تكوني ام
اسماء : اول مرة تقول سجى شي صح بحياتها
غادة : لا عادي الأمومة مو صغيرة على أحد .. ان شاء الله المرة الجاية اجي الرياض يكون بحضني
ميهاف : كيييييييييوت .. ما شاء الله عقبالي يارب
اسماء مسكت جوالها : اصبري اعطي بدر خبر
ميهاف سحبت جوالها : ووجع بعد يالمجنونة !
غادة : هههههههههههههههه عطيه خل يعجل يمكن تجيبن بنت حلوة نخطبها
ميهاف استحت : هههههههههه شفيكم والله بس اقول عقبالنا كلنا يعني طارو
غادة : ماعليك منهم عادي انتي طبيعية .. هن اللي بزران عشان كذا مايفهمن
اسماء بحمق : إلا انا فاهمة !!
ميهاف : وخري يا نانة
اسماء : هين هين والله لأعلم بدر واعلمك من النانة
بعد ماطلع نايف من المجلس .. تسند على سيارته قبل يدخل على الرجاجيل , حاس بفمه وهو يفكر البنت جميلة , جمالها يحبس الأنفاس بشرتها بيضاء نقية مع عيون كحيلة واسعة برموش كثيفة وشعر اسود كثيف طالع يفتن من بياض بشرتها وشفايف مقسومة مضيفه لها جاذبية ... لازم يعترف انه توقعها شينة بس فاجئته , بس وبعدين يعني يرجع لعالم الحياة الزوجية اللي عن تجربة اثبت انه مايناسبة ابدا .. طبيعته مو للزواج والبنت واضح من جمالها العذري انها ماتناسبه .. هادية وناعمة وخجولة وهذا مايثير اهتمامه نهائي !
داخل المجلس /
ابو عبد المجيد : الله يتمم لهم يا أبو نايف وعقبال لؤي وكل العزابية
فراس اللي كان جمب لؤي قال بهمس ساخر : ههه ياحليله مايدري ان لؤي عايش قصة حب مشغلته
لؤي بنفس الهمس : ممكن اعرف وش جاب الطاري اللحين ؟
فراس : ما أدري يمكن لاني من كلمتك بالفندق ماعاد شفت وجهك حتى الدوام ماجيت
لؤي : مشغول
فراس طالعه بنص عين : مايهم الوظيفة عطيتها غيرك ومشى الحال .. بس انت وش هالاعتكاف اللي يمغث
لؤي : تبي تعرف اجل قولي انت وش قايل لها لما تقابلتوا
فراس : لا تجلس تدخلني في خياسك العاطفي هي اللي جت تكلمني مو انا ! وفوق كذا ماقلت لها شي
وقام من عنده لمكان ثاني .. تنهد لؤي وهو يفتح جواله ويطالع برسايلة اللي ماعاد ردت عليها ولا مكالماته .. دخل نايف المجلس وانهلت عليه التبريكات من كل مكان .. رد برسمية عليها كلها ورجع لمكانه .. التفت له بدر : هاه بشر !
نايف عقد حواجبة : شتبي انت ؟
بدر : ههههههههههه شفيك اسولف .. حلوة البنت ؟
نايف ببرود : ايه حلوة
بدر : طيب شفيك مب مبسوط ؟
نايف : الجمال نصف المسرة مب كلها
بدر : اللي قايل هالمقولة كذاب .. الجمال المسرة كلها
دق جوال نايف .. تافف : هذي نهى اليوم كله تدق مدري شسالفتها ؟
بدر : شتبي ؟
نايف : تقول يزيد يبي يحضر
بدر : ايه ؟!
نايف : انا ماعندي مشكلة حياه .. بس امي رافضة وهالبثرة مانفكت جالسة تنتظرني اجي اخذه اللحين
بدر : اللحين هي بتضل طول عمرها ماعرفت ان عندك ولد يعني ؟ مصيرها تدري هي وياه بنفس كرت العائلة
نايف : والله مسؤولية امي مب مسؤوليتي .. ولا انا ماخبيت شي
أبو فهاد ( الجد ) : هاه يانايف وين ناوي تحط عزيمة عرسك ؟
نايف بتفكير : الاستراحات طبعا
ابو نايف : برا الرياض هي !!
هيثم بفضول : فين هالاستراحات ؟
نايف : برا الرياض بمسافة بسيطة .. تغيير جو وش ناوين يعني قصر ؟ نفس الروتين ملل
ابو فهاد : ونعم الشور والله .. نطلع نوسع صدرنا
***
اثناء ماغادة جالسة منسجمة تحس بخيال وهي جالسة هنا دق جوالها : هلا هيثم .. خلصت يعني ؟ ... اوكيه تمام
سكرت غادة جوالها : ابتسام يقول يله
ابتسام : يله ياجماعة حنا نستأذن وتسلمون على الضيافة بجد بسطتونا
ام نايف : قليل بحقك ونعوضك بأحسن بعد ان شاء الله .. بس مو كأنا بدري ؟
ابتسام : لا خالتي ماقصرنا .. كثر الله خيركم
طلعن وأم نايف معاهن لحد ماوصلن للباب وهي تودع ابتسام من قلب .. اول ماركبوا غادة : ووووووووووووو ! العز العز صح
هيثم طالعها بنص عين : ظني انك انبسطتي اكثر من العروسة نفسها
ابتسام : هههههههههه معك حق
هيثم مسك يد ابتسام : الف مبروك ابتسام
ابتسام حست الوضع غريب : عقبالك
هيثم : على يديك ان شاء الله
ابتسام : من اليوم ابشر !
هيثم : ههههههههههههههههههه امزح ماصدقت
غادة نطت بين المرتبتين : يالله ياهيثم وش كل هذا ؟ ماتصدق وش صار داخل ... يععني اعععععه مقدر اعبر صدق
هيثم : بعد ثلاث ايام مسوين العزيمة باستراحة
غادة طارت : استرااااااااااحة !! صدق ؟؟ صدقق ؟
هيثم : هذا كلام العريس
ابتسام ضرب قلبها وهي تسمع : ايه بس مو غريب استراحة يعني ؟
هيثم : ايه غريب ابوه انتقد بس الشايب اعجبه فعزموا
غادة : مب غريب ولا شي ! خل نشوف العالم كيف ... هيثم هيثم قبل تطلع مر على مكانكم يالرجاجيل من بعيد
هيثم فتح عيونه : شنو !
غادة : تكفى تكفى ابي اشوف المعرس وش شكله
هيثم : شكله آدمي وش شكله يعني !
ابتسام : لا هيثم ماعليك منها وصلنا الشقه بس
غادة : لااااااااا تكفووون .. طيب معك صورة ؟
هيثم : شدخلني اشيل صورة
غادة : ايه عادي انا معي صور كل البنات اللي شفتهم اليوم
كبسو عيونهم فيها ... غادة : هههههههههههه امزح امزح يممه
***
بيت أبو نايف بعد رحيل الضيوف .. ميهاف جالسة مع أمها وكالعادة : رججلي تكسسرت
دخل لؤي البيت وشماغة على كتفه وشكله منتهي ... ام نايف : هلا يمة
لؤي دون يلتفت : هلا
وصعد مباشرة لفوق .. ام نايف : غريبة وش فيه !
ميهاف : ما أدري .. ما جا من الكويت وهو مب على بعضه
دخل نايف البيت اول مادخل دق جواله غمض عيونه بصبر ثم رد : نعععم !! .... يابنت الحلال يقالك حاصلي وما أبي ... مافاتته الجنه كلها جلسة رجاجيل ........ نهى لاترفعين ضغطي ترا ضارب دون شي ..... احسن لاتحضرين ... مع السلامة
ام نايف : شعندها ؟
نايف : كله منك يمه يعني ضروري تمنعين يزيد يجي
ام نايف : هاو بعقلك ! وش موقف البنت لا شافت لك ولد
نايف : مصيرها تدري
ميهاف برواقة : خلي يزيد اللحين ... ها نايف شرايك ؟
نايف : بشنو ؟
ميهاف : وش شنو ! البنت زوجتك
نايف : تقولين مو بيضاء !
ام نايف : ايه بيضاء .. بس ما شاء الله
ميهاف : بصراحة نيوف يعني اليوم الكل حسدك عليها ... لا ويرسمون على اختها بعد
ام نايف : ايه والله اختها .. انا ابيها للؤي
ميهاف : ههههههههههههه اختها متزوجة
نايف : اصغر منها ؟
ميهاف : ايه
ام نايف ماصدقت : تلعبين علي انتي !! متزوجة ؟؟
ميهاف : ايه وحامل بعد
ام نايف : لا قوية .. مابان
ميهاف : هههههههههههههه الا انا لما قالت لي وركزت واضح صدق
ام نايف حاست بفمها : راحت علينا اجل
ميهاف : وين ناوي شهر العسل نيوف ؟
نايف : المالديف
ام نايف : ورا ماتناقشها ؟ يمكن بخاطرها مكان ثاني
نايف كشر : حاصلها بنت الفقر المالديف ! وتجلس تتشرط بعد ... السفره لي مو لها هي مرافقة بس
ميهاف : حرام عليك نايف .. بعمرك لاتقول هالكلام قدامها تذلها بفقرها .. ليش هي مختارة تكون كذا ؟
ام نايف : اتركيه اتركيه .. هو كذا اصلن بيجي يوم يعرف فيه ان الله حق
نايف : المهم ! نهى اقلقتني .. يزيد بيحضر العرس
ام نايف : لد لدك انت ونهى !
ميهاف : حرام يمه الولد بياخذ بخاطره .. خلي يحضر واصلن العرس بتكون هي بالغرفة والكوشة وانا بنتبه له
ام نايف : واذا ناداك يبه قدام اهلها
ميهاف : ماما قلت لك بيكون معاي .. ماراح اتركه
ام نايف : ع مسؤوليتك اجل .. وياويلك تعرف
دق جوالها طالعت المتصل بابتسامة .. وصعدت لفوق وردت : هاي بيبي
بدر بصوته شاعري : مشغولة عني اليوم هاه
ميهاف : ايوه تو جلست والله .. من صحيت وانا أكرف , كيفك وكيف الملكة ؟
بدر : ماشية تمنيت بس أدخل واشوفك
ميهاف : ههههههههه باللهي
بدر : طيب صورة بشوف شكلك اليوم .. اسوم لعبت بحسبتي وهي توصف
ميهاف حمرت ( هين يا اسماء ) : شكلي لازم اتغطى من اسماء بعد .. فيه خيانة
بدر : هههههههههههه والله ما سألتها حتى .. هي من حالها , بس بالاستراحة لازم اشوفك ترا
ميهاف : لا حياتي .. بس بتصير مشكلة لو تدري ماما و ...
بدر : ومن قالك حتدري ؟ بشوفك بس كذا اكحل وخلاص
ميهاف بربكة : هممممم ما أدري والله... اليوم قهرتني سجى ماتدري قد ايش
بدر : ايه قالت لي اسوم , ماعليك منها
ميهاف بقهر : يخي مافيه داعي تكلمني اسولف لك ! اسوم قالت لك كلش
بدر : هههههههههههههه شاسوي بها راديو من ركبنا السيارة ماسكتت
ميهاف : سخيفة والله ! مافيه شي اقوله لك تصبح على خير
بدر : ههههههههههه اف اف شفيك زعلتي ..؟ قولي السالفة مرة ثانية والله طعمها منك غير
ميهاف : ايه شرايك باللي سوته ؟ مبسوط حطيتني بهالموقف
بدر : تتأثرين من كلام بزر .. اسفهيها ماعليك منها
ميهاف : شخبار اهلها ؟ شفتهم ؟
بدر : اهل شنو ؟ اخوها بس الموجود اليوم
ميهاف حزنت عليها : معقولة ؟ والله حرام ..
بدر : وأخوها حتى هادي مرة .. ردود مختصرة يعني ماتدرين وش طبيعته
ميهاف : اكيد ما تأقلم اول مره يشوف هالعالم كلهم
دخل فهد غرفة ميهاف ببجامته : ابي انام معاك
ميهاف : استنى شوي حياتي ... ( التفتت لفهد ) هلا فهودي .. تعال ياقلبي نام
بدر : شنو شنو شنو يناااام ؟! شوتيه لا أجي اشوته انا
ميهاف : ههههههههههه يمه شفيك .. بزر بعد
بدر : مايهمني .. قلعيه
ميهاف تقهره : تعال فهودي حبيبي تعال بحضني نام
بدر : تعذبيني انتي كذا
ميهاف باست فهود بخده : لبى روحه احبه
بدر : والله ودارت الدنيا وصرت انقهر من البزر فهد
ميهاف وهي تلعب بشعرها : حبي .. انا بنام اللحين مره نعسانة
بدر : اسهر لحالي يعني
ميهاف بدلع : ايوه اسهر فكر فيني ماراح تمل
بدر : وش لي بالسهر مع النجوم وانتي فيه
ميهاف تثاوبت : بنام والله من فجر صاحية
بدر : اوك عيوني نوم العافية ... أحبك
ميهاف للحين هالكلمة تأثر فيها منه .. : وانت من اهله
سكرت السماعة وتنهدت وهي تضم فهود .. وتغط بأحلام وردية فارسها هو ..
***
ام فراس : معقولة ماتحضر العرس يعني
فراس : والله آخر همي عرس نايف اقعد ااجل شغلي عشانه
ام فراس : ولو ولد عمك عيب ماتحضر
فراس : حضرت .. اليوم يعتبر عرسه الباقي شكليات وانا مضطر اسافر
اسماء كانت بجوالها مو يمهم فجأة صرخت بصوت عالي : اككككرهااااا !!
فراس رمى الوسادة اللي بحضنه عليها : وجع بعد ! وش هالصراخ رجيتينا
ام فراس : وش فيك بعد ؟
اسماء : هالتافهه سجية جالسة تراسلني قال ايش قال وش فيك اليوم علي ترا ما كليت حلال اهلك ... ( مسكت جوالها تكتب بعصبية ) كلي تبن كلي تبن ... الله ياخذها عيت تفهم اني ما أطيقها
أم فراس : اسماء !! عيب هذي بنت عمتك
اسماء : فراس ! اسالني ليش انا اكرهها
فراس : اسف ماني مستعد اسمع سخافات مراهقات
اسماء : بالضببببط !! عشانها مراهقة سخيفة
فراس : طالعه منها بسم الله عليك
ام فراس : والله سجى حليوة بس انتي قشرا محد يقدر عليك .. لو فراس يطيعني كان خطبتها له
اسماء شهقت : سجى لفراس ؟!
ام فراس : شفيها يعني ؟ عمتك عطتني كم تلميح قبل كذا .. وانا والله أحب البنية
فراس بسخرية : تزوجيني وحدة لو انا متزوج خلفتها
اسماء : هههههههههههههههههههههههههههههه يالشايب !
ام فراس : زين انك عارف انك ماعدت صغير
اسماء : لا فراس خل منك سجية ذالمهبولة ذي ياويلك تاخذها ... وععع مزعجة وكلش تكرهه فيها
فراس وهو بالجوال مو يمهم : ان شاء الله
اسماء : شاطر !
ام فراس : هو يقرر يتزوج وان شاء الله مب سجى .. شفتي مير غادة والله حرام تضيع من بين يدينا
اسماء بقهر : متزوجة
ام فراس : بذمتك !
اسماء : ايه فجأة وحنا نسولف معها اكتشفنا انها متزوجة وحامل بعد
ام فراس : حرام صغيرة والله مابان
اسماء بحماس : فراس تفوتك مشخ
فراس دون اهتمام : الله يخليها لراعيها
اسماء : غنمة هي !
فراس ضرب راسها بخفة بكرتون المناديل اللي جمبه : اسكتي يخي خلاص ماتتعبين
اسماء : لااا طفشت !! تو باقي سالفة هوشتي مع الشغالة
فراس قزها .. اسماء : خلاص خلاص ! بس بقولك شي واحد بس
فراس بصبر : قولي
اسماء : هما .. نايف بيروح مع زوجته المالديف
فراس : طيب ؟
اسماء : يعني وانا اشتهيت اسافر .. من زمان ماسافرت و ... تكفى تكفى نبي نسافر برا
فراس : بدر فاضي قولو له يسفركم
اسماء بحمق : بدر بعد ماعطاني وجه ! مير وينه ؟ بالغرفة يغازل بقرته .. ( صرخت باعلى صوتها ) بددددددددررر !!
ام فراس : مب سامعك .. والله انا مستحية قدام امها اخاف تنتبه على هالمكالمات اللي ماتخلص واجي بنص ثيابي
فراس : اسوم اجلي لي هالسفرة اللحين .. بسفرك وعد بس اتركيها على التساهيل وبضبطها لك
اسماء بحماس وقفت : صدق صدق صدق !
فراس ابتسم: وانا عمري كذبت عليك ؟
صعد لفوق .. اسماء جلست : سخيف فراس ابتسامته حلوة ونادر نشوفها
ام فراس : الله يحفظه يارب
***
صحت غادة من النوم على صوت جوالها : الو
احمد : صح النوم !
غادة طالعت الساعة : ايه شنو لسى بدري الساعة 9
احمد : حنا وصلنا .. ساعه كذا ونكون عند الشقة انزلي
غادة : هاه ! ليش ؟
احمد : شنو ليش هذي ؟
غادة : حمادة اخر ايام لي مع اختي .. ابي اجلس عندها انت اجلس مع اهلك
احمد بحدة : لا ! واخلصي اجهزي ياويلك تأخرين مانزلتي
غادة شدت قبضتها وهي تسمع اصوات خواته عنده : ماشي ..
احمد : يله .. طوط طوط
فتحت ابتسام عيونها : شنو غدو شمصحيك ؟
غادة : احمد وصل وجاي ياخذني
ابتسام : لاا .. ماتقدري تجلسي ؟
غادة : لا ابتسام احراج اقوله لا ولا هو عادي .. يله ماعليه بكرة بشوفك بالاستراحة
ابتسام تنهدت : اوك
غادة : البسي اللي قلت لك
ابتسام ابتسمت : اوك
قامت غادة ترتب شكلها .. وتجهز شنطتها وترتب اغراضها وهي تحس باحباط , مامداه على طول دق : انزلي
لبست عبايتها ونزلت .. كان شوق قدام وهند ورا .. ركبت ورا : السلام عليكم
: وعليكم السلام !
غادة لازم تحسن اسلوبها مو من صالحها يعصب عليها هالفترة ويمنعها من الزواج او شي : كيفكم ؟
: حمد الله بخير ... على البركة عرسكم
غادة : يبارك فيكم .. والله لو حاضرين كان بس يله بكرة مسوية عزيمة بشاليه لهم
هند وهي واضح منقهرة : وين هالشاليهات
غادة : ما أدري بس برا الرياض .. حياتي كلم هيثم وبيقولك فين
احمد مارد حتى ... من دخلت ماسمعت صوته : احمد
احمد : نعم
غادة توترت .. شعنده ذاه معصب : فين حجزتو ؟
احمد : بجهنم الحمراء
غادة : شفيك ؟ صاير شي ؟
احمد : سلامتك ياموجبة
سكتت غادة احسن لها لايزودها قدام خواته وهي ماراح تتحمل وقتها اول ماوصلوا انفصلو بالشقق هي واحمد لحالهم بشقة واهله بشقة حمدت ربها .. اخر شي تتمناه تجلس مع اهله بنفس الشقة اول مادخلت طالعها بنص عين : ليش مارحتي مع خواتي تسلمين على أهلي ؟
غادة : ولا يهمك بروح اللحين
احمد دون نفس : خلاص وش عقبه ! لازم الواحد يقولك كل شي بهيمة انتي
غادة فصخت عبايتها وكان شكلها فاتن على بساطة لبسها بنطال طويل وبلوزة وسيعة وشعرها الستريت لخصرها فاتحته .. وقفت قدامه وحضنت يده بيديها : شفيك حياتي معصب ؟ كذا تستقبلني وولدك بهالمزاج وحنا المشتاقين لك
احمد : واضح مرة مشتاقين لي
ترفعت غادة وطبعت بوسة على خدة : عندك شك
سحب احمد يده وابعد عندها : اسلوب السلق هذا ماينفعك اللحين .. اصلن انتي وحدة ماتحترمين لانفسك ولا انا ولا أهلي , اجل كذا ولا حتى اخوك كلم ابوي يعزمه
غادة : مو صحيح .. هيثم عطا عماني كلهم خبر على انهم حلفو مايجون
احمد : تكذبيني بعد !
غادة بلعت ريقها : ماقلت كذا .. بس .. ( تنهدت ) اللحين حنا شدخلنا بين هيثم وعماني ؟ انا مذنبة شي ؟
احمد : انتي نفسك ماكلفتي روحك تصرين علي ولا على اهلي نجي ! رحتي تركضين بشنطتك مع أهلك
غادة يأست منه .. راحت للكومدينة وجلست قدامها ترتب شعرها .. احمد : انا جالس اكلمك !!
غادة ببرود وهي تمشط شعرها : ياقلبي انت معصب معصب .. وايش ما أقول او اسوي بهاللحظة ماراح تفرق معاك بتضل تتهمني وتحطها علي , فانا ليش اتعب نفسي ؟
فجاة حست به وراها مباشرة وهي تشوف صورته بالمراية .. ومسكها من عنقها بقوة وهو يطالعها بحدة من المراية : حسك عينك تتبعين معي هالسياسة مرة ثانية ! وقت اتكلم معه ماتعطيني ظهرك وتروحين تسوين شعرك !! سااااامعة ؟
غادة : احممد جالس تعورني
احمد لفها له وباسها باسلوبه الهمجي المعتاد .. دفرته غادة من صدره بخفه : مالي خلق اللحين احمد
احمد رفع حواجبه : شنو ؟!
غادة والعبرة خانقتها : ماني بهيمة .. والله والله ماني بهيمة تهاوشني ثم على طول تجيني كأني عبدة
احمد قرب بخطوات ثقيلة وهي تبعد على ورا سحبها من خصرها وحاوطها دون يبالي لها او لمشاعرها , غادة حست مشاعرها ميته بهاللحظة .. ماتدري وش هالانسان بالضبط حتى قربه يجبرها عليه
***
ميهاف طلعت من غرفتها بتنزل لتحت .. بطريقها ضلت تطالع غرفة لؤي طقت الباب بخفة مافيه اجابة فتحته ببطء كان موجود قدام نافذة غرفته : اححم اححم
التفت لها .. ابتسم : هلا ميهاف تفضلي
ميهاف تقدمت لحد ماصارت جمبه : شجالس تسوي ؟
هز كتوفه : ولا شي
ميهاف تنهدت : لؤي صاير معاك شي ؟ ترا حتى امي ملاحظة .. من رجعت من الكويت وانت مولؤي
لؤي : مافيه شي ميهاف .. هذا انا بس انتو نسيتوا
ميهاف : صاير شي مع الحلوة ام عيون صح ؟
لؤي التفت لها : والله وصايرة تقفطين
ميهاف : ههههههههههههه وبصير انصح كمان
لؤي : مافيه داعي ميهاف .. ماعاد فيه حلوة ام عيون بحياتي
ميهاف وهي تحس براحة داخلها انها ما استمرت : وليش ؟
لؤي : الظاهر ان الحب ممنوع بحياتي
ميهاف : لا تقول كذا لؤي .. لاتخلي تجربة فاشلة وحدة تموت قلبك
لؤي تنهد : ما مات قلبي ولا ماكان جلس يعذبني كل ليلة .. صورتها محفورة براسي تطاردني وين ما اروح حتى لو ما أبي
ميهاف زعلت على حالته .. لؤي عاشق من جد وطبيعته الحساسه مأثرة فيه : عشان الموضوع لسى جديد .. مع الوقت بتنسى هذي هي فطرتنا
لؤي : ما أتوقع انها فطرتي .. انا ماراح انساها صدقيني واذا هي ماتبيني انا ما أبي غيرها
ميهاف : انت صارحتها ؟
لؤي : لا .. بس كان واضح , عبرت لها بمليون طريقة تكون غبية لو مافهمتها
ميهاف ضغطت على نفسها : جرب تعبر بالطريقة المباشرة ترا حنا البنات غريبات مانفهم الاشارات او نتجاهلها لازم احد يحجر لنا
لؤي سكت وهو مقتنع ان حتى الطريقة المباشرة ماتنفع .. هي استأصلته من حياتها خلاص ..
ميهاف : يله روق .. بكرة راح يكون وناسة وشاليهات مو حلوة تكون متكدر
لؤي ابتسم : ماني متكدر ميهاف , قلت لك هذا انا بس انتي عشان عرفتي صرتي تحللين
ميهاف : اتمنى يكون كلامك صح .. تعال انزل شوف امي ونايف تحت يخططون للعرس جابو العيد
لؤي : ههههههه دام السالفة فيها نايف اكيد بيجيب العيد
ميهاف : آخر طلعاته مايبي يحضر العرس بينتظر في الفندق ولاخلصت هي تجيه
لؤي : ههههههه الله يعينها عليه من اللحين
***
يوم الشاليهات .. كانو عائلة آلشمري واصلين هناك من بدري من الفجر لأن نايف كان متحمس يروح ولقاها فرصة زواجه يعطونه وجه ويصرفون دون حدود ... كان نظام الشاليهات مباني .. مبنى الحريم ومبنى الرجال ومبنى الخدم وكلها لها نفس الحديقة , وكل مبنى ملحق بغرف نومه ..
كانت ميهاف واسماء وسجى ووداد بعباياتهن وطالعات يبن يتمشن بالحديقة بطريقهن انتبهن لنايف جوا شنطة السيارة جالس القرفصاء يطلع اغراض له
ميهاف : نايف ؟
نايف التفت كان لابس بنطال برتقالي وبلوزة علاق بيضا وفوقها جاكيت
قطني مقلم اسود وابيض وشعره البني مصبوغ مو طبيعة ومموج بطبيعته ونظاراته الشمسية كان شكله يدوخ ابتسم : هلا بالحلوات
اسماء : مبروك نايف .. بصراحة بصراحة يعني حظك في الثانية احلى من الأولى
نايف : هههههههه بيارك فيك وعقبالكن كلكن .. اختي ووداد اسنعكن انتي وسجى اخلصن عاد
اسماء : والله انا لو أبي من السنة اللي فاتت .. بس انا اسوم مو حي الله
نايف : انا اشهد بصراحة ... ميهاف ساعديني انزل هذي
ميهاف : يوه نايف ثقيلة اكيد !
نايف : ادري انها ثقيلة عشان كذا ساعديني
ميهاف مشت لعنده تساعده تشيل الشنطة لحد نزلوها : يله فارقوا عاد شموقفكن هنا ؟
اسماء : نسلم ونقوم بالواجب !
نايف : اقلبي وجهك عاد ياراعية الواجب
اسماء : هاهاها صفحة كم اقلبه ؟
نايف : هههههههههه ياسمجك
راحو البنات يتمشون بالمكان .. استنشقت سجى الهواء : ابي اعيش هنااا !!
ميهاف :من جد المكان يفتح النفس
وداد : اقول ميهاف صرنا نص العصر وهم ماجو .. بيتأخرون بعد ؟
ميهاف: والله ما أدري اخاف ضيعوا
اسماء : الله العروسة ضايعة .. ولازم البطل العريس يدورها ثم يلقاها ويحميها
ميهاف : بس بس يالاحلام انتي .. تعالوا نرجع اصلن مو حلو نتمشى لحد مايجون خل نشوف الحديقة مرة وحدة مو نتعب ولا جو مانعرف نقوم
رجعوا البنات لداخل الشاليه .. ميهاف : ماما فينهم تأخروا ؟
ام نايف : تو دقيت عليها تقول تو دخلنا الشاليه دقيقة وتكون هنا
بعد فترة دخلت ابتسام وهي لحالها .. سلمو عليها الكل .. اسماء على طول : وين غادة ؟
ابتسام : هههههههههههه شوي وبتجي
ميهاف : ليش مو معاك ؟
ابتسام : لا انا جاية مع اخوي .. هي زوجها وصل الرياض بتجي معاه
ام نايف : اها .. اجل حياك خذي راحتك
فصخت عبايتها وراحت لعند المراية تضبط شكلها :
شعرها الأسود بارمته من الجوانب بشكل مرتب .. والفستان زايدها رونق مع طولها , ومكياج ناعم بدرجات الخوخي راحت تجلس مع البنات : بصراحة الشالية شكله يجنن بس شفت منه وحنا بالطريق روعة ما شاء الله
ميهاف : جالسين ننتظركم عشان نتمشى كلنا فيه .. بس دقي على غادة لا تتأخر اكثر وتغيب الشمس وماعاد نلحق
ابتسام : اوك
دقت عليها جاها صوتها : ايوه
ابتسام : كم بقى على ماتوصلون ؟
غادة بقهر : زوجة عمي وبناتها بالطريق ..
ابتسام : ايه وانتي ؟
غادة : حضرته نايم
ابتسام : صحيه او كان جيتي مع عمي طيب !
غادة : ابتسام لاتوجعيني تكفين اللي فيني كافيني .. يعني ماحاولت !
ابتسام ماقدرت تتكلم لانهم يطالعونها : عجلي اهم شي ..
سكرت ابتسام : خل نقوم نتمشى .. غادة بتتأخر
اسماء : ليشش قهر ابيها تشوف !
ابتسام : فرصة ثانية .. صارت معها ظروف معليش
***
عند غادة سكرت السماعة .. وكانت لابسة وجاهزة حتى انها عادت على مكياجها مليون مرة .. بس حضرته نايم ولما صحى صحى وقال كلمة وحدة " تطلعين من الشقة قبل اصحى اكسر رجليك "
وجالسة رجل على رجل منقهرة مفروض هالايام بالذات تنبسط وهو منكد عليها .. راحت لعنده: احمد ... احمد
هزته من كتفه : احمد احمممممد !!
احمد : نعم !
غادة : ممكن تقوم عشان نروح ؟
احمد : ممكن تسكتين ؟
غادة : احمد تكفى حتى اهلك راحوا .. وحنا لسى
احمد : كم الساعة ؟
غادة بقهر : 5
احمد : عقب المغرب بنروح
غادة : لااا .. متأخر مرة ..
احمد : اوهوووووووه بتنطمين ولا بنروح عقب العشاء
غادة : شسالفتك أنت ؟من جيت الرياض شغال فيني نكد .. يعني ماراح تبسطني ولا تخلي الناس تبسطني
احمد كان نايم مو معها .. جلست بحمق وهي تحس بقهر .. كانت متحمسة حتى اكثر من ابتسام ..
***
ابتسام انقهرت لما شافت زوجة عمها وبناتها داخلين وام مرزوق وبنتها صفيه ( 23 سنة ) .. واختها جالسة مع ولدهم لكن سلمت وهي تحس معاملتهم متغيرة بشوشين ويسلمون ومن الكلمات الصادمة .. ام احمد : الله الله با بتسام عاد بحسبة بنتي
اسماء عقب ماسلمت طالعتهم : وين غادة ؟!
ابتسام : احمد نايم وسحب عليها
اسماء بعفويتها المعتادة : كلموا ولدكم يجيب البنت ولا وصينا لها سواق
ام احمد ( مالت امداهم يحبونها ) : ههههه الله يصلحها غادة يعني احمد تعبان بس بيجون اكيد
ام نايف : حياكم الله .. تفضلي يا أم احمد تفضلي يا أم مرزوق
انقهرن كلهن وهو يشوفن ام نايف وكلامها عن ابتسام واعجابها وكيف ابتسام شكلها متغير ومابط خلقهم بجد الا اسماء وسجى كل شوي يسألن عن غادة !
***
نايف سلم على باقي العائلة وهو مستغرب تهجمهم في السلام كأن مالهم خلق .. لكن ماعلق وتجاهل ,
هيثم : وين أحمد ؟
ابو احمد : الظاهر عنده كم شغلة بيخلصها وبيجي
هيثم رفع حواجبه بعدم تصديق : اهاا
ابو نايف ما أعجبه ابو احمد وابو مرزوق نهائي ولا عيالهم .. ومستحقرهم طول الجلسة وشايل هم وجودهم بزواج ولده بنظره هالاشكال تفشله لكن سكت دون يعلق وانشغل يسولف مع ربعه المعتادين , ماصدق هالولد يتزوج اصلن
نايف حاس بفمه : والله ما كأنكم عيال عم
مرزوق بعربجة : وش قصدك يالسنافي ؟
نايف برواقة : سلامتك مفلح ماقصدي شي
مرزوق : مرزوق مرزوق !
نايف : مرزوق مفلح I don't care
مرزوق : وشك تقول ؟
ابتسم هيثم بسخرية من الحال : يقول سلامتك
ابو نايف : سمعت يافراس انك بتسافر وماراح تحضر العرس
فراس : والله ياعمي هالصفقة اسبوع وما اوكل احد يقوم بها غيري .. والحمد لله حضرنا الكتاب وهذا اهم شي
ابو نايف : حاول طيب
فراس : مافيني .. طيارتي الليلة على العشاء كذا بمشي
ابو نايف : الله معاك أجل
الكل انغمس بالمجلس .. ماعدا عائلة ابو مرزوق وابو احمد لانهم حالفين على حالهم ماينغمسون مع احد وجايين نكد بس .. وقف نايف : بدر تجي معي
بدر : وين ؟
نايف : شنو وين ملل خل نطلع !
طلعو .. بدر كشر : وش هالعالم ..؟ شفيهم متهجمين ومحد معجبهم
نايف : هذا حظ خويك اللي زي وجهه
بدر : وانا جالس اقول اخوها معقد .. طلعو عمانها العن والعن
نايف : منهم لحالهم مالك فيهم .. تعال بس نوسع صدرنا تراي جاي اتوسع لاتضيع علي بهالحكي
اثناء ماهم يمشون انتبهو لمجموعة كبيرة من البنات يمشون .. بدر تنهد : لبى السنفورة اللي بينهم
نايف طالعه بنص عين : عيني عينك كذا !
بدر : هههههههههههههه شفيك قصدي اسوم
نايف : ايه رقعها هاه !
بدر صوت من بعيد : اسسسسسوم
اول ما أنتبهو البنات للصوت .. غطت ابتسام وجهها وهي بتغوص داخل ملابسها لما شافته واقف جمب اللي يصوت .. طالع شكله غير مع شعره البني المتموج الاجعد والالوان الناصعة نزلت راسها بسرعة .. اما بنات عمها كلهن شخصن يفكرن أي واحد من هالوسيمين هو نصيب ابتسام , شوق انجلطت وهي تشوف بدر معروف بكل مكان .. بس هي مو بدر اكيد اللي جمبه اجل ومايقل وسامة عن بدر ابدا ..
اسماء : هااااااااااااااه !
بدر : سلامتك
اسماء بهمس : ياثقل دمه .. يعني شوفوني بس ! امشو امشو بس
ميهاف ابتسمت وهي تشوفه : حرام عليك .. يختي كان بيقولك حاجة بس الهاه حقتك خلته يتراجع
صفية : هذا زوجك ابتسام ؟
ميهاف : لا لا .. اللي جمبه اللي بالبنطال البرتقالي
انقهرن طول عمرهن يضحكن على ابتسام وجاها نصيب .. احسن من نصيبهن 100 مرة .. اما ابتسام كالعادة ماتتجرأ تشوفه حتى على طول تصرف عيونها لجهة ثانية ..
كملو البنات طريقهن .. وكلهن انذهلن بتصميم الحديقة المدروس كلش فيها يفتح النفس ظلن يتمشن بالمكان لحد المغرب رجعن لداخل ..
ام نايف : هاه يا ابتسام اعجبك المكان ؟
ابتسام : حيل .. ما شاء الله يفتح النفس ويجدد الروح
دق جوال ميهاف ردت على طول : اهلين .. اللحين ؟!! ... لا مقدر طيب وش رايك تجين عندنا اذا مستعجلة ... ايه تمام اوكيه
تاففت اول ماسكرت ..ام نايف : شفيك ؟
ميهاف : المصممة اللي تصمم ثوبي حق العرس .. دقت تقول بتسافر ولسى ما خذت مقاساتي
اسماء : ارسليها لها
ميهاف : لا مقاساتها دقيقة تقول لازم اخذها انا
ام نايف : وش بتسوين ؟
ميهاف : قلت لها تجي هنا .. وماعندها مشكلة برسلها خريطة الموقع وتجي
ام فراس : اجل مافيه مشكلة خلاص
ميهاف : مو وقتها اللحين بتجلس ساعة تاخذ المقاس !
اسماء : احمدي ربك اللي رضت تجي اصلن
***
بعد المغرب .. تطوع احمد وصحى اول مارجع كانت جاهزة بعبايتها : يله !
احمد جلس بكسل : ضروري نروح؟
غادة : ششنو ؟! احمد انا متجهزة من اول .. طبعا ضروري اروح
احمد حاس بفمه : والله مالي مزاج
غادة بقهر : ليش ماقلت من اول طيب اركب مع عمي ولا هيثم !
احمد : الحرمة تبع زوجها .. شدخلك تركبين معهم
غادة : مالي دخل ابي اروح !
احمد : مو ضروري .. تو كلمتني امي وتقول الجو مايسوا ارتاحي
غادة : امك امك امك !! اصلن مو مدمرنا ولا حايسنا الا امك .. من تقول كلمة تتأثر بها مالك راي شخصي !
احمد : هذي امي غادة تاجي راسي وراسك !! احترمي نفسك لا جيتي تتكلمين عنها
غادة : طيب انا ايش ذنبي اذا امك ما أنبسطت هناك انحرم .. انا بنبسط
احمد : عدلي اسلوبك لا صرتي تتكلمين عن امي .. ماترضينها ع حالك ترا
غادة : والله لا صارو أهلي زي اهلك ارضى ونص .. وهذا انت كلامك يسم البدن عن ابتسام وهيثم وساكته وماكله تبن
احمد : اللي بيته من قزاز لا يرمي الناس بالحصا .. وانتي عندك ام الله يستر عليها
غادة انبهتت .. أول مرة احد يتكلم قدامها عن امها عند ابتسام وهيثم مايتكلمون عن الموضوع واذا فتحته يسكرونه : الله يرحمها مالك حق تتكلم في الميتين !
احمد ضحك من قلب : ههههههههههههههههههههههههههههههههههه مين ميت ؟ هههههههههه صدق انك هبلة
غادة فتحت عيونها مو فاهمة : ................
احمد وهو يستمتع بملامح الصدمة ف وجهها : ياحلوة امك حية .. وسامحي اخوانك امك كانت فاجرة للحد اللي ماتشرفوا بها وموتوها في حياتها
غادة ما استوعبت : ............
احمد : ايه اخوك واختك عارفين انها حية لو تبين تتأكدين اساليهم .. تدرين كل العائلة يدرون انها حية إلا انتي يامغفلة ! لو هي ميتة لقيتي اقل شي حاجة من ذكراها بس هي انحاشت ماتبيكم
غادة بلعت ريقها للحين عقلها ما أستوعب : انت كذاب ..
تقدم احمد لجهتها ببرود .. وهي ابعدت لورا بتلقائية : ابعد عني .. انت كذاب كذاب مستحيل .. شقاعد يصير ؟
احمد صفعها بقوة لحد ماطبع على خدها : يمكن هذا يصحيك ويخليك تصدقين
غادة جلست على الأرض بعجز .. جلس احمد القرفصاء جمبها ومسك وجهها بين اصابعه : امك ال***** حية وتكذبيني مرة ثانية بكسر لك هالفك , والتفاصيل افضل تاخذينها من أخوانك ..... بس حطي ببالك شي واحد امك حية
غادة كانت تطالعه بصدمة وقلبها يرقع .. قالت وكلش فيها يرتجف : كـ .. كـ ذا . ب . . انا اممي .. ميتة
احمد : هههههههههههه حلو خليك عايشة بالوهم ... اثناء ما انتي تعيشينه قومي البسي عبايتك نروح
غادة وهي ضامه كتوفها : مابي .. مابي اروح
احمد : مو بكيفك بتروحين وانتي ماتدلين الدرب
غادة هزت راسها : مابي .. مو انت ماتبي .. خلاص ... بجلس ...
احمد : كان مزاجي معكر .. بس روقتيني اللحين فيله بنروح .. انا نازل ربع ساعة واحصلك بالسيارة
***
هيثم كان جالس ويهز رجله .. مسك جواله ودق على احمد .. جاه الرد : هلا
هيثم : وينك انت ؟! مطول بعد بجي اخذ غادة
احمد : لا هذا حنا بالدرب معليش تأخرنا غادة تبي السوق وكم مشوار
هيثم : يله اجل !
أبو نايف : وين هالشباب راحوا يسوون الشوي ولا عاد رجعوا
ابو فهاد : ماعليك امر يا أبو مشعل تروح تشوفهم
هيثم : ان شاء الله
أول ماطلع كان بدر جالس القرفصاء ونايف واقف جمبه وكلهم محتارين .. نايف : والله انت المخرف ! يحطون فحم مب حطب
بدر : شنو فحم دخون هو ! حطب حطب ياتنك
نايف : وش هالشواية الغبية مامعها ورقة تعاليم تقول فحم ولا حطب !
هيثم طالع الآلة اللي مجتمعين عندها .. آلة شوي : لا حطب ولا فحم
نايف طالعه : هههههههههههههههههه هلا هيثم
ابتسم هيثم وحرك بيده المؤشر على جمب واشتغلت الآلة وصارت تحرر : خلاص كذا زانت
بدر فتح عيونه : بهالبساطة ؟ مافيه فحم
هيثم : هههههههههه تشوي بر انت ؟
بدر : هههههههههههه ما أشوي خير شر .. بس هذا متسنع حالف يشوي هو
نايف : لا تفشلني قدام النسيب .. والله اعرف بس آلتهم هذي مخرفة
انتبه نايف لسيارة احمد ... نايف : مين ؟
هيثم : احمد
بدر : ايييه ..
وقفت سيارته ونزلت غادة ودخلت داخل وهو تقدم لعندهم مروق وسلم على هيثم وبدر ونايف ... هيثم : هذا احمد ولد عمي مصعب ونسيبي
نايف رفع حواجبه : هلا بالعديل اجل
بدر : حياك تفضل
دخل احمد وهيثم ... التفت بدر لنايف : اخيرا واحد شكله صاحي فيهم
نايف : حكمت انه صاحي من سلام ؟
بدر : اقل شي اسنانه مب صفر
نايف : هههههههههههههههههه بهذي معك حق
***
دخلت غادة الشاليه .. بس رجلها وقفت مجرد ماراح احمد وجلست عند درج مقدمة الباب شهقت شهقة مكتومة .. سدت فمها بيدها ( لاتصدقينه .. كذاب ... كذاب )
بالداخل اثناء مالحريم جالسات على قهوة .. دق جوال شوق : هلا احمد
التفتت لها ابتسام : اساليه متى بيجون ؟
قامت شوق بعيد : انت هنا ؟ وين غادة اجل ؟!
احمد : مادخلت ؟
شوق : لا اصبر بشوفها ..
احمد تنهد : شوق انا خرت السالفة وقلت لها عن امها
شوق شهقت : شنو ؟!
احمد بعدم اهتمام : اقلقتني وفقدت اعصابي وقلت لها .. عموما شوفي وينها وطمنيني عن حالها
شوق : طيب طيب
راحت شوق تدور بالمكان .
عند الحريم /
قامت ام احمد تكلم مكالمة .. واول ماخلصت صارت تفتح البيبان بالمكان وتستكشف الفيلا بحسد , اثناء استكشافها دخلت غرفة فيها ميهاف واقفة والمصممة تاخذ مقاساتها ابتسمت باحراج : معليش شكلي ضيعت
ميهاف ابتسمت : لا عادي معليش خذي راحتك
ام احمد بفضول : وش قاعدة تسوين ؟
ميهاف : مقاسات فستاني لزواج نايف
ام احمد : اييه ما شاء الله
فتحت ام احمد عيونها بوسعها لما وقفت المصممة وشافت وجهها : لورا !!
لورا ماكانت صدمتها تقل عنها : بخيته ؟ شو عم تعملي هون ؟
ام احمد سكتت ماقدرت تتكلم قدام ميهاف : انا بسوي نفسي ماشفتك .. وبطلع
اول ماطلعت مسكت لورا راسها .. ميهاف استغربت : شصاير ؟ تعرفون بعض ؟
لورا ابتسمت باحراج : مافيه معرفة مهمة .. يله انا خلصت وبدي افل فستانك بيكون جاهز بالموعد
ميهاف : ماعندي شك لورا يعطيك العافية
اول ماطلعت ام احمد وهي منصدمة .. المهبولة لو تدري انها جالسة تصمم فستان لزواج بنتها !! قابلتها شوق : يمه ! شفتي غادة ؟
ام احمد : لا بس تخيلي من شفت !
شوق : من ؟
ام احمد : لورا .. زوجة ابو هيثم
شوق فتحت عيونها بصدمة : من جدك ؟!!
ام احمد : ايه بس انتبهي يزل قدامك قدام ابتسام وغادة .. سوي حالك ماعرفتي بشي
شوق : ان شاء الله .. بس وش تسوي هنا ؟
ام احمد : حضرتها مصممة
شوق : عندي فضول اشوفها !
ام احمد : مالت عليها مالك فيها
شوق دق جوالها " احمد " : افففففففففف انا رايحة ابثرني احمدوه
كانت غادة جالسة بمكانها قدام الباب بعبايتها دون الطرحة ومسندة راسها على ركبتها وشعرها مفروش .. انتبهت لصوت جمبها رفعت عيونها حصلت شابة بكاب وشعر اشقر ونظارات شمسية .. ابتسمت لها وركبت سيارتها , ابتسمت غادة دون نفس وهي تشوفها تروح ..
طلعت شوق : اخيرا لقيتك !
التفتت غادة دون تتكلم : ..............
شوق ابتسمت بخبث : شفيك كل هذا زعل عشان ام حية ! عادي اعتبريها ميتة اصلن ماتفرقين عندها انتي
غادة : حتى انتي ........
شوق قاطعتها : وكل الناس تدري .. كل العائلة السر مخبى عليك انتي وبس
غادة : ...........
شوق : تبين سالفة احسن بعد ؟ بغرفة ميهاف بتحصلينها .. جايه تصمم فستانها .. كيفك لاتصدقين بس لو شفتيها عرفتي على طول
فتحت غادة عيونها .. الحرمة اللي تو مرت من جمبها التفتت غادة للسيارة اللي تمشي مبعده وقفت بسرعة وركضت ليمها دون هدف ..
شوق : غااااااااااااادة !! وين راااااااااايحة ؟ ........... ياويلي ياويلي رحت فيها وش بتسوي هالمجنونة.. اعلم احد ! لو مو ضروري شدخلني
غادة كانت ضايعة .. ركضت دون هدف حتى لو طلعت شوق كذابة ماتبي تفوت ولا فرصة 1 % طلع صوتها بصعوبة من حلقها : مــاما !
لكن السيارة كانت تمشي ببطء بسبب تضاريس المكان , اول ماقربت من السيارة اسرعت السيارة بسرعة فجأة وكانها تهرب منها .. رجلها ماعاد تطيعها تركض حتى لو هي عارفة انها ماراح تلحق .. كان صوتها واضح صرخت بجنون تبي السيارة توقف .. لكن صاحبة السيارة كانت متعمدة التجاهل : مااااااااااااااااااااامااااااااا !! يممماااه .... صرخت لحد ما اختفى صوتها
***
وقف فراس واستأذن لموعد رحلته .. اول ماركب سيارته وقف عنده بدر : توصل بالسلامة
فراس : يسلمك .. وانتبه لأهلي
بدر : اهلك اهلي ترا
فراس : اجل في امان الله
ساق بسيارته لطريق مخرج المزرعة .. بطأ السرعة فجاة وعقد حواجبه وهو يشوف قدامه وحدة بعبايتها وشعرها طويل لخصرها تركض بجنون وتصارخ على السيارة قدامها ... حاول يحلل من السيارة اللي قدامه لكن ماعرف , انتبه للبنت فجأة توقف وتفصخ جزمتها وتكمل ركض استغرب , من هذي ؟ وش هالسيارة ؟ الشاليه ملكية خاصة وش هالفوضى ! وقف سيارته تماما لما تعثرت .. احتار وش مفروض يسوي ؟! نزل وقلبه قبضه وهو يشوفها جالسة وراسها ساندته على الارض وتبكي بانعصار وهي تردد " يممممه " .... تقدم ببطء وهو اول مرة يمر بموقف كذا همس بخفة : اختي
التفتت بسرعة لما حست بأحد .. فراس توترت اعصابه لما التفتت له فاتحة عيونها الغرقانة دموع بدهشة وفمها الصغير يرتجف : ............
وقفت غادة بعجز وهي مو مستوعبة وين وصلت او كيف وصلت هنا ركضت دون هدف حتى ضيعت مكانها اول ماوقفت رجعت تتعثر انتبه فراس لرجلها المجروحة بقزازة اثناء ركضها التفت فراس للجهة الثانية ويدة ورا رقبته : ......
غادة صارت تطلق شهقات مكتومة وقالت بصوت مرتجف : كـمل .. طريقك
فراس دون يطالعها وهو متوتر من وضعها قدامه : تقدرين تمشين ؟
غادة رجعت عيونها تنهمر : ........
فراس عرف انها مو من أهله .. لو هي وحدة من بنات عمه عرفها على طول : انتي مين ؟
غادة : ............
فراس ماعرف كيف يتصرف دق على أمه : هلا فراس
فراس ابعد عنها شوي : يمه تعالي مع السواق بطريق مخرج الشاليه
ام فراس : ليه ؟
فراس واعصابه مضغوطة : مو وقته يمه ! تعالي وبس
ام فراس : طيب طيب
فراس : بسرعة !!
رجع فراس لعندها كانت واقفة وتمشي بالجهة الغلط للرجعة وتعرج بمشيتها .. مشى فراس لعندها : هذي الجهة غلط
التفتت غادة بصمت .. ثم قالت بشرود : وين الجهة الصح ؟
فراس : اركبي السيارة .. برجعك للشاليه
غادة قالت بصوت مبحوح : هـي.....لبنـ ...مافية .. انا ..
فراس عقد حواجبة .. شقاعدة تقول ! انتبه لسيارة السايق تجي نزلت ام فراس شهقت وهي تشوفها : غادة ! ( التفتت لفراس ) شصاير ؟
فراس : علمي علمك ... خذيها معك يمه ولاتثقلين بالاسئلة البنت حالتها سيئة
ام فراس بهمس : وش كانت تسوي هنا ؟
فراس بين اسنانه : وقته يم ! خذي البنت
قربت ام فراس من عندها : غادة وينك لنا ساعة ننتظرك ؟
غادة : ابي .. جوال .. جوالي طافي ..
ام فراس : ارجعي معي الشالية وبعطيك الجوال
غادة بخنقة : ماراح ارجع .. مابي ارجع ..
ام فراس احترمت حالتها وهي مستغربة التفتت لفراس : فراس يمه هات جوالك .. انا جوالي بالشاليه
عطاها فراس جواله وهو يطالعها متفاجئ من هالحالة .. دقت غادة على رقم : احمد ..
احمد : من ؟
غادة بهمس : غـادة ..
احمد : نعم شتبين ؟ وينك اختي لها ساعة تدورك
غادة : عند مخرج الشالية ... تعال رجعني ..
احمد ارتبك وش موديها هناك : جاي جاي
سكرت السماعة وهي تمسح دموعها ومنزلة راسها ... بينما ام فراس وفراس كانو في حيرة وش اللي صاير يخليها بهالحال ؟
وصلت سيارة احمد بسرعة اللي حس انها مشكلة صدق لما شاف الحرمة وفراس وغادة حالتها مبهذلة , كان متوقع يرمي عليها هالصاعقة ومايشوفها كذا .. مشت غادة ببطء وقبل تروح التفتت لأم فراس : لا تقولي .. لابتسام شي .. رجاء
ام فراس ماعرفت شتقول : ولا يهمك بس انتي بخير ؟
ماعلقت غادة وسحبت رجلها لحد ماركبت .. ام فراس : بسم الله الرحمن الرحيم .. شصاير لها ؟
فراس وهو شاخص بعيونه بالسيارة وهي تروح : من يدري شصاير معها ؟
ام فراس تنهدت : الله لا يبلانا ويعين .. ها في رايك ما اقول لاختها ؟
فراس : في رايي مانحسس اختها ولا حتى هي انا شفناها بهالحالة ..
ام فراس : قولتك ..
فراس : انا ماشي يمه , في امان الله
ام فراس تنهدت : الله معـك
ركب سيارته وهو يتسائل وش اللي صاير عشان تكون بهالحالة .. تنهد البيوت مليانة اسرار من انا عشان اتكلم ؟
اول ماوصل المطار وقبل يركب طيارته دق جواله .. رقم غريب عقد حواجبه ورد : نعم
: السلام عليكم .. فراس ؟
فراس : أيه فراس معاك , من معي ؟
: انا احمد .. زوج غادة اللي قبل شوي ..
فراس : اهلا , امر بغيت شي ؟
احمد : لا بس حبيت اعتذر عن الموقف .. معليش هي البنت كذا مجنونة شوي والحالة هذي تراودها كل فترة بشكل طبيعي
فراس رفع حواجبه بعدم تصديق: ماكانت دموع وحدة مجنونة ... عموما منت مضطر تفسر لي شي
احمد سكت لفترة ثم سكر السماعة ..
***
ميهاف : لا لا بدر صعبة
بدر : مو صعبة ولا شي .. انا بسيارتي تعالي شوي سالفة سالفتين وارجعي
ميهاف : هممم والله بيحسون علي
بدر تنهد : قولي لهم بروح اكلم مكالمة وبطول .. لاتصعبينها ميهاف
ميهاف : واذا عرفوا !
بدر : واذا عرفوا مو آخر الدنيا .. يله عيني تكفين وربي واحشتني حيل
ميهاف بتردد : اوك لعيونك بس ماحطول
بدر : فديت عيونك والله .. سيارتي ورا المبنى اجل تعرفينها
ميهاف : اوك ..
سكر بدر السماعة والتفت لنايف اللي جالس يسولف مع هيثم : انا رايح شوي وراجع
نايف : لوين ؟
بدر : مالك دخل
نايف : هههههههههههه افا
طلع بدر لبرا بينما قال ابو فهاد : يعطيك العافية يانايف على هالشوي .. والله طلعت مو سهل
نايف : ههههههههههه مو انا , هيثم اللي مسويه انا ماعرفت حتى اشغل الآلة
ابو نايف : والله مبروكة يدك ياهيثم .. مو بس جراحة يعني
هيثم : فيه العافية
لؤي : بجد شغل رايق
مرزوق : هع هع اجل شكلكم ماذقتوا شويي
نايف : لوك متحرك من مكانك ما عفنا
مرزوق : هههه المرة الجاية ان شاء الله
نايف ( الله لايقوله ) : ..........
هيثم وقف : اكرمكم الله .. حنا نستأذن بنمشي اللحين
ابو نايف : وين بدري ؟
هيثم : لا والله يابو نايف عندي موعد ضروري بكرة بدري , وابي الحق انام كم ساعة قبل
ابو نايف : اجل في حفظ الرحمن
طلع هيثم .. نايف بعد فترة طلع يغسل انتبه لهيثم لسى واقف : مارحت للحين ؟
هيثم : والله ادق على ابتسام ماترد .. معليش تشوف الأهل داخل عشان تطلع
نايف : ولا يهمك
دخل نايف اول مادخل قابلته بالممر كانت متسندة على الجدار وواقفة وجوالها بيدها وشاردة ..كان شكلها يجذب بألوان فستانها الناعمة مع بشرتها الصافية وشعرها الأسود حاست ببوزها مكشره وهي تحط السماعة باذنها واضح تحاول تتصل بأحد ... تنحنح نايف عشان تنتبه له : اححم
رفعت ابتسام راسها ومن ربكتها طاح جوالها رفعته من الأرض كان منكسر ...
نايف : انكسر ؟
ابتسام بلعت ريقها : آآ شكله .. عادي بصلحه بعدين
نايف : شكل عندك مكالمة ضرورية .. تستعملين جوالي ؟
ابتسام بارتباك وهي تحرك شعرها لورا اذنها : لا مافيه داعي
نايف : كيف الجو اليوم ؟ اعجبك :؟
ابتسام ابتسمت بنعومة : مرة .. شكرا
نايف انتبه على نفسه لما حس انجذابه زاد لابتسامتها شاح بنظره لجهة ثانية يصرفها عنها : هيثم برا ينتظرك .. ويدق ماتردين
ابتسام : اوك
دخلت لداخل ونايف يراقبها وهي تبتعد : اذا جوالها بيدها شدعوة ماترد على اخوها !
دخلت ابتسام لداخل وهي تلبس عبايتها .. اسماء باحباط : بتروحي ؟
ابتسام : ايوه خلاص الوقت تأخر
اسماء : ماشفتي ميهاف ؟ فجأه اختفت !!
ابتسام : ما ادري اخر ماشفتها كان طالعه لبرا
حطت اسماء عبايتها وطلعت لبرا تدورها : ميهااااف ... ميهاااف
انتبهت لنور سيارة اجهر عيونها غطت عيونها بذراعها : اففففففففف وججعع من هاللي راكن سيارته هنا
ضيقت عيونها وهي تنتبه للي داخل السيارة .. مستحيل تنسى شكله كل يوم تتمقل بصورته .. كبست اكثر من مرة تتأكد .. وهي تشوف ابتسام تركب سيارته فتحت عيونها بوسعها ...

طبعا التعليق الرسمى أحمد وعيلته دول حلاليف أو خنازير
ان شاء الله غادة تخلص منهم
حالها يقطع القلب ، المسكينة قاعدة تسايسه وتتجنب غضبه وتسمع الكلام لكنه حقير
مارتحش الا لما قهرها
لؤى المتعذب مفروض يسمع كلام اخته ويصارح سارا
على الأقل يرسى على بر ويرسينا معاه ههههه
خلاص بدر وميهاف حاليا سمن على عسل
نايف مش مكيفاه ابتسام علشان خجلها وهدؤها ؟ بيصدق مقولة مايعجبوش العجب
واخيرا اسماء قابلت هيثم وعرفت انه اخو ابتسام وهيفكر يشتغل فى الرياض
كده الخيوط بتتجمع وهيبقى فيه مجال للأحداث
تسلم ايديك