بسم الله


شكرا شكرا شكرا لكل من قرأ وعلق
مررررررره سعيده بتفاعلكم الله يسعدكم
احبكم


-2-






مع الصبح اللي يتنفس حتى النفسيه تنفس وتطرد كل ما يعكرها
صفاء وحلاوة نفس وروح ورضا باللي يكتبه الله
ياربي تزين صباحنا ومسانا باللي يرضيك عنا

سمعت جدي وتهليلاته الصباحية
:لا إله الا الله اصبحنا واصبح الملك لله

جيت عنده وحبيت راسه مثل كل صباح

:والله يا بنتي ان صباحي مبارك بشوفة
عويناتس
:صبحك الله بالخير ياجدي
كيف ممساك البارح عساها نومة هنية
ردعلي :اللهم لك الحمد

قلت:ها يبه وين تبي فطورك هنا والا بالمزرعة
:بالمزرعه ان الله اراد
بعد ساعه ألحقيني فيه
الحين بروح اشوف العامل وش سوى

:زين اجيبه لك بعد ساعه ان شاء الله
.
.
.

بعد ساعة

وتحت ظل الاثلة الكبيره الجادل تمد كاسة الحليب لجدها
:سم ياجدي

: الله يرضا عليس يا الجادل
يازينتس ويازين سنعتس

نزلت راسي واتلهى عن نظرة جدي

كل ما قال هالكلمة يتفحص عيوني
كنت اول ارد عليه واقول
:لاتضحك عليّ انا عارفه ان ماهنا زين فيني

وهو كان يرد علي :الا انتي منبع الزين

ارجع ارد عليه بحدة :لاتكذب لاتكذب
انا شينه ومنحوسه
ومحد يحبني الا انت
حتى جدتي ماتحبني

يزعل علي جدي من كلامي
:انا ولد ابوي
من هو اللي قايلس انتس
شينة ومنحوسة ؟؟ استغفري هذاالكلام مايجوز

ارد عليه بدموع حراقه :كلهم يقولون
غير انه محد يلعب معي
و يهربون مني ولا يتكلمون معي
يرد علي جدي وهو يشيلني على كتوفه
:علميني من هو اللي ما لعب معتس
وانا امحطه باالخيزرانه
.

.
.


:جادل الجاااادل
وانتبهت لجدي يناديني
:وين سرحتي
قلت: قريب ما ابعدت
سألني:هو انتي البارح سمعتي كلامي
قلت ببساطه :ايه سمعت وما اعجبني اللي سمعته
قال بنرفزه :خايبين الرجا
والله ان مافيهم الرجال

رديت بهدوء وحطيت عيوني بعيونه
: زعلي ماهو عليهم
لأني ما أرجي منهم شي
زعلي عليك انت ياجدي ارخصتني لهم تكفى ياجدي خلاص قفل على هذا
الموضوع عرس وماني بمعرسه
خلاص هذي قسمة الله لي
انا راضيه بحالي
وعاجبني وضعي والا انت تبي فرقاي
وتبسمت له بعيون دامعه
رد علي وهو يستعطفني بنظراته
:يا بنتي انا ابي اشوف ضناتس
انا واخوتس ماحنا بدايمين لتس
سكت ماقدرت اناقشه دايم يختم نقاشنا
في هالموضوع بهذا الرد


.
.
.

ابو فراس:شلون جادل ماشفتها البارح ابد
ام فراس:ماعليها طيبه زي العاده دخلت
سلمت وقعدت بمطبخها
شاريتن راسها من الكلام اللي يغثها
ابو فراس :ليه فيه احد قايلن لها شي ؟!
علميني

ام فراس : تخبر اللمز والغمز
ما جد شي جديد
والله اني خجلت منها ماقدرت اساعدها طلعت وهي تحلف ما أمسك شي
بالله اقنع جدك يجيب لها شغاله تساعدها
ابو فراس : ياحليلتس جدي مرره رافض يقول اجيب لها الشغاله في بيت زوجها بس عندي وشعندها شغل انا وهي بس
ام فراس :كل ها الشغل عليها المزرعه والغنم والبيت وضيوف جدك ومايشوفه كثير
ابو فراس : هي راضيه بحالها صدقيني

اخذ الفنجال من يدها وقال: خلينا منهم
شلونس كيف اصبحتي ماعندس طاري ؟
ماتبين نروح للمستشفى ؟؟
ضحكت ام فراس :لا بدري توني بالثامن
صبحنا بخييير خليني اكمله على خير

ابو فراس :الله يقومس بالسلامة ويعوض صبرنا خير ويجي فراس ينور دنيتنا

وقام يتلمس جيوب ثوبه يتأكد من مفاتيحه ومحفظته
:يالله استودعتس الله انا طالع
تبين اجيب معي شي وانا راجع الظهر
ردت : بحفظ الله
وشكرا اذا بغيت شي دقيت عليك
انا بألبس عباتي وبطلع وراك

طلع وهو يقول: مع السلامه وصك الباب وراه

.
.
.



انتهى فطوري مع جدي وشغلي بالمزرعه
وبعد ماحلبت المعزه
ركبت (ددسني) الغماره القديمة
اللي مالها ابواب (((كثير من بنات القرى تسوق )))
رجعت للبيت
الي مايبعد كثير عن المزرعه

بيت جدي بعيد عن العمران
بأطراف قرية صغيرة
والبر والجبال البعيده
واشجار مزرعة جدي البسيطه
اهم مايميز المكان


اقرب جار لنا يبعد عنا تقريبا ثلاثة كيلو


من احب اللحظات عندي

هاللحظه اني لحالي محد يقدر يشوفني

رفعت برقعي لفوق واخذت نظرة سريعه
للمراية القديمة بقدم السيارة اللي اسوقها
وصاحبت نظرتي
ذكرى نظرة جدتي لي الله يرحمها

اذكر نبرة صوتها وهي تقولي :
الله يزين حظتس يا وليدي

هذي دعوة جدتي لي الله يرحمها
كل ما شافت وجهي

وانا صغيره ماكنت افهم هالدعوه

لين كبرت وصرت اعرف ليش هالدعوه بالذات تنقال لي ماتنقال لبنات عمي





من الذكريات المبهمة اللي استمرت معي
ولمن كبرت بعد استوعبتها

"تكبر وتزين ...

"تكبر وتواسى خشتها ....

" البنات بسبع وجيه
الا ذي بوجه واحد .....

"الحمد لله على خلقة ربي

"على من طالعه ؟؟
"مافي احد بالعايله شبهه وشين مثلها؟؟

" اصصصص جت البوم

"بومه



ليييش بومه ؟؟؟؟


ماهو ذنبي وفاة أمي وهي تولدني


ولاهو ذنبي وفاة ابوي وعمتي وبنفس اليوم

وهم راجعين بي من المستشفى

هم الله اراد يتوفون وانا لا

التفكير بذا الموضوع يقلب علي المواجع

تنهدت


استغفرالله استغفر الله استغفر الله

تنفست بعمق
وتعوذت بالله من الشيطان الرجيم


لاح لي البيت وسياره عائلية واقفه عنده
نزلت برقعي على وجهي وتأكدت من غطى عيوني ووصلت
سيارة من ذي ؟؟


وقفت بمكاني المعتاد ونزلت : انفتح شباك السيارة اللي ورى السواق
:السلام عليكم
رديت :وعليكم السلام ورحمة الله وبركاته

قالت :حنا جينا ندور مدرسة الهجره
اللي هنا وضيعنا

حطيت يدي على عيوني اتضلل بها من نور
شمس الضحى
واناظر في السياره
حريم مع ولد شباب صاد عني وانا اكلم
اللي معه
قلت : وينكم وين المدرسه انتم عكستم
الطريق المفروض ما تلفون
من المفرق الاول من المفرق الثاني
بتلقونها جنب قصر الامير
يمكن حول ١٠كيلو من هنا

ردت علي اللي تكلمني
:شكرا لك ياخاله يعني نرجع من طريقنا ومع المفرق الثاني بنشوف قصرالامير صح كذا
قلت: الله الله
قالت :طيب في لوحه في علامة

قلت: اية المدرسة بيوت جاهزه ماهي مبنيه وعليها لوحة مكتوب عليها

قالت : الله يجزاك بالخير
وشكرا مرره شكرا

وشغل السياره سواقهم بيمشي
قلت وانا احط يدي على شباك السياره
:والله ماتمشون تقهووا اول

قالت :شكرا ياخاله والله مستعجلين
بنحط اوراقنا وبندور بيت بعد عشان السكن
قلت ابد والله ما تمشون
يختي فنجال واحد و تلينوا عقب السياره والدوجه والشمس
ناظرت باللي معها بالسياره
تكلم الحرمه اللي قدام
:ها ياجده شرايك ننزل الحرمه ملزمه
قالت الجدة : ايه خل ننزل والله صقعتني الشمس وتيبست عظامي

رد الولد اللي يسوق بهمس مسموع :ووووين ترا ماانا بنازل
فتحت الجده الباب ونزلت عصاها
وركظ الولد لها يساعدها بالنزول ويكلمها وهو كاتم غيضه :ياجده وين الله يخليك لنا
قالت : ياالدحمي تعبت بنريح شوي
ونمشي قبل صلاة الظهر ان شاء الله
وحنا خالصين
رفع عيونه لفوق بتأفف وهو يسند جدته
السبعينيه


دخلت البيت وانا ارحب واهلي
ياهلا ياالله حي ضيوف الرحمن
وردت الجده :يالله يحييتس ويبقيتس
وفتحت باب الغرفه الحديد
ومع ضوء الشمس القوي وضألة ضوء لمبة الغرفه كانت مظلمة هلا تفضلووا
قولي للولد اللي معكم يقلط للمجلس
من الباب الثاني مفتوح
بس يدفه ويدخل
رفعت البنت جوالها واتصلت :دحمي ادخل مع الباب الثاني قدامك المجلس

طلعت وانا شبه اركظ بجهز القهوة وطلعت جوالي البسيط من جيب ثوبي
واتصلت على جدي : السلام عليكم ياجدي اقول ترى جاك ضيوف لقيتهم عند الباب وقلطتهم
رد علي جدي :الله يحييهم انا هالحين جاي ولمي الغدا
وقفل

جهزت قهوتين للحريم ولجدي مع ضيفه في صينيتين و رحت غرفتي وغيرت ثوبي عقب الغنم والمزرعه
ولبست منديل نظيف وبرقع نظيف ورشيت بخة عطر واخذت القهوة
رايحه بها لعند ضيوفي بالمجلس
ام فياض تنهر لمياء
: بس يابنت عيب تصورين في بيت الناس
ردت لميا ءوهي مشغوله تصور :جده خليني اصور دايم نسمع عن
البيوت القديمه ولا شفناها الااليوم


غرفه صغيره بسقف خشبي
وشباك واحد ولمبة وحده
وزولية حمرا صوف ومساندحمرا
مزينه بدنتيل ابيض خفيف
وعلى الجدار معلقه لوحة كبيرة سوداء ومكتوب بالذهبي آية الكرسي

لمياء لقت كنز صور : كلها بنزلها بالانستقرام
بتشوفوون كيف اللايكات بتهل بالالاف

ام فياض :لمياء يابنت خلاص وقفي لا اكسر الكاميرا على راسك
قفلت الكاميرا وجلست :اقول يا جده اشوف طلعت لهجتك
اتس واتس
تبسمت ام فياض بحيافطري :هذا الهرج الزين لوألقى احد اسولف معه بلهجتي
ماخليتها مير ياكافي كلن خلى هرجته وهرجة اهله واجداده
تركية: ابوي يا جده هو الوحيد اللي يكلمك
فيها
ردت ام فياض : ابوتس يحب يسوي اللي
يونسني ويسعدني الله يرضا عليه
مافي مثل ابوكن عسى عيني ماتبكيه

مع دخلت الجادل بالقهوة
وقلت : الله يحييكم
ونزلت الصينيه وبديت اقهوي الجده مديت لها الفنجال: سمي يا خالة
قالت ام فياض :وهي تناول مني :سم الله عدوتس
انا ام فياض وهذلي بنات ولدي
هذي تركيه جاها التعيين عندكم هنا وهذا لميا اختها الوسطى
وهذي فرح الصغيره والوليد اللي معنا ولد بنتي جايبنا
قلت وامد لها التمر ماشاء الله يخليهم لتس


دق علي جدي : هاتي القهوة


قمت ولقيته جايب معه الذبيحه الله الله بغدا الضيوف

ورجعت لضيوفي
قلت: ترى واجبكم حضر والله انها ابرك
الساعات
قالت ام فياض بتتعذر عن قبول العزيمة : يابنتي الا انتي ام من ؟؟
تبسمت وقلت :انا الجادل سمي
قالت ام فياض: ماقصرتي يابنتي جعل خيركم كثيير
بس بنمشي بنلحق على مدرسة تركيه

قلت : دقايق
ورفعت جوالي ادق :
المديره مرت اخوي اقولها عنكم تنتظركم

قراءه ممتعه لكم وردود حلوة لي

السلاااااااااااام عليكم
حي الله ام رنوووو هلاا مليااار غلا حي الله الحامل والمحمووول والمحموول اليه..
وعرفنا سبب تسميه الجادل بوجه البومه..
ياقلبي عليها حسبي الله عليهم بدال لايحتوونها ويهتمون فيها يوم ان اهلها ماتوا بيوم واحد زادوا عذابها عذاب.. حسبي الله عليهم ..
الله يجعل بقدوم ام فياااااض الفرج من هالديره واهلها اللي ماعندهم احسااااس ..
ام فيااااض ماعندي شك ابد ابد انها اللي بتجيب العريس للجادل.. بس هالعريس من؟؟؟ هو ولدها والا ولد بنتها اللي جابهم؟؟ الدحمي اسمه .. مايركب مع الجادل..بس فياض يمشي..ههههههههه
الاكيد ا ن ام فيااااض بتستانس على الجادل وبتصير هي معها صديقات.. واتوقع انهم بيصيرون جيران يعني ام فياض بتستاجر عند جد الجادل.. الا اقوول ام رنو وش رايتس نزوج الشايب والعجوز.ههههه
يااحيااتي الجادل يوم اعترفت لجدها انها سمعت كلام عيال عمها الحمير.. وشكله مو اول مره يكلمهم وهي تدري ..
ابو فراس وام فراااس ..الله يقوم ام فراس بالسلامه شكله يا انه واووول حمل لام فراااس ا وان خلفتها كلها بنات ويرجون انه الحمل يكون هالمره ولد.. مع اني ارجح الاول وهو انه اول حمل لها.. ويمكن يكون بعد وقت طوويل من زواجهم.
اللي قهرني يوم تقول ام فراس جب لها شغاله وهو يقول هي متعوده وراضيه.. ايييييييييه وش عليك لاااا غسلت ولاكنست ولا مسحت ولاجربت تعب الشغل الله يكون بالعون وجاي تفلسف هي راضيه وصدقيني ؟؟ عز الله ماصدقت ولا حتى قربت يم الصدق.. احد يكره الراحه والدلال ؟؟محد ابد يكرهه وانت جاي تتفلسف..
يووه ذكرت بابا يوم نقول له نبي شغاله ويقول ماتحتاجونها الريم تخرجت وش وراهاااا...؟؟ آآآآآآآآآآآخ يااناااااااااااري .. يعني يوم كرفت بالجامععه وغثاها جاني غثى البيت اللي مايخلص ابد.. والله ان الشغل حاالف مايخلص ابد ابد ابد.. الله يعين بس.. حسبك الله ياا ابو فراس قلبت المواجع..
المهم الجادل نرجع لتس اقولتس ترى ام فياض هي اللي تبي تساعدتس وبتكون معتس ام . وبتشووفين الحنااان والحب للمخبر مو للمظهر..
رحمتها يووم تقول لها ام فياض انتي ام من؟؟ يعني هي كبيره اجل بالسن ؟؟يمكن مثل ماقلت اول مره انها باواخر العشرين او اول الثلاثين..
حبيتها وهي تسووووق .. بييييبببب بيييييييييب.. ياازين الديره والسواقه اللي بالديره..
اتوقع ان سيارتها بتكون مدار مواقف لها مع بنات ام فياض.. اتوقع انه بيصير لهم مغامرات بصندوق السيااره..هههههههه
اهم شي بس حفيدات ام فياض مانشووفهن خايبات والا ام فراس تغار منهن؟؟؟
ولمياء هذي الله يهديها وش تبي بيت الناس تصووره..؟؟ والله مااحبيت هالسنااااب ولا تفاعلت معه.. حاطته على الخيبه يمكن لو عندي وقت حبيته بس للحين ماتعودت عليه..
اهم شي بس مو تصووور الجادل وتنزلها بالسناب عشان صديقاتها يشوفونها ويتريقون عليها بحجه انها ماتدري وش يصير بالعالم..؟؟
بس ان شااء الله ان بنات ام فياض متربيات وماراح توصل معهن للدرجه ذي..
مع اني شاكه ان هالتصوير سواء بالسناب والا بغيره بيكون له قصه بقصتنا..

والله يا ام رنوو فيني نوم الحين وماقدرت اطلع ما احط لي رد.. قد يكون لي عوده اذا الله احيانا باضافه عاد مدري ..
تسلم الاياااادي يااقلبي كميه من الرااحه نحس فيها من بين السطووووووور..
دمتي بود..

ياويلي. يازين الحياه والبساطه. هلت دميعاتي ام رنو. انتي وين سريتي علي تالي هالليل اخذتي قلبي للنجد العذيه
هذي ماهو وجه البوم هذي شريط ذكريات للماضي الجميل. لا ومديرة المدرسه مرة اخوها

يازين الديره وطاريها وكل شي.

جت الجده ومعرس الحادل معها تخميني صح انها سبب في وفاة امها



قلوب تنبض ام رنو ولكل عابر من هنا

يالله شبيهة امي 😖 ربي يسعدك قطعتي علي المتعه تو بدأت ادخل جو بالجزء 😪.. هههههه من جد ربي يعطيك الصحه والعافيه ..

الجزئيه وضحت لي انه الجادل ماهي شينه بالشكل وانما بالظروف وارتباط مولودها بحدوث حوادث وفيات انا قد قرأت تعليق لعضوه هنا بالمتصفح ربي يسعدها قالت كذا لكن ناسيه اسمها 🤔..
ومن كثر ماحكو لها وجه البومه وووو هي داخليا اقتنعت بالكلام اللي قيل عنها وصدقته .. ياليتها تفتش لهم ههههههه ابقاها تسمع تعليقهم على جمال وجهه ..

زارا ههههههه ماقرأت لك مصادرت هنا ههههههه .. شكلك بتصادري الدحمي او عريس الجادل ههههه .. انني اشتم 👃🏻 رائحة فرح وزواج قريب ههههههههه ..

شبيهة ربي يحفظك وييسر امورك ويبارك لك في وقتك ويوفقك يارب .. تعليق صغنن لكن قرأته وماحبيت اقفل وانام قبل ما اسطر ردي خخخ ..