الجزء الثالث من شوق
المهم خلال هالسنة أول شهر كانت وايد حزينة وكله يالسة فالبيت حاولوا اخوانها وخواتها يطلعونها من جو الحزن الي هي فيه بس مارامو يطلعونها من مودها وعقب شهر خف حزنها وبدت تطلع ويا خواتها يسيرون يتمشون فالمولات أو الحدايق أو يسيرون السينما أو مطاعم المهم فيوم من الأيام تلاقت شوق وهي تتعشى ويا أختها فالمول ويا ربيعة أختها الي إسمها حنان وحنان كان اخوها وياها واسمه فيصل وبطبيعة الحال سلموا على بعض وتعارفوا وتعشوا ويا بعض ودفع فيصل الحساب وهم عالعشى فيصل أعجب بشوق وبطريقة كلامها واسلوبها واختها لاحظت هشي ويوم ردت البيت أختها يلست تمزح معاها وقالت لها صار عندج معجبين يا شوق من يوم مايلستي وفيصل ماشال عينه من عليج مالاحظتي هشي فردت شوق يالسة تتوهمين يا رهف ( أخت شوق) ناسية إني متزوجة عيب تقولين هالكلام فردت عليها رهف طلبي الطلاق هو تزوج ومب مفتكر فيج انتي بعد عيشي حياتج طلبي الطلاق وتزوجي غيره ليش ماتبيعين الي باعج فردت عليها شوق الي يسمعج يقول العرسان يتريوني عالباب فردت عليها رهف وايد مستهينة بنفسج ماشفتيه كيف فيصل مهتم فيج حتى أخته لاحظت وهو من توفت زوجته ما انعجب بأي بنت لنه كان وايد يحبها وهو مب راعي بنات ريال مستقيم من البيت للشغل ومن البيت للمسيد دايما أخته تتكلم عنه وعن اخلاصه وحبه لزوجته هي متوفية من سنتين وعمره ما انعجب ببنت عقب ماتوفت زوجته إلا إنتي فقالت شوق يابنت الحلال لاتيلسين تتخيلين أشياء مب حقيقية الي يسمعج يقول باجر بيي يخطبني فردت رهف عليها ما استبعد هشي وبذكرج بهشي فيوم من الأيام هالحزة فبيت فيصل واخته حنان كان يدور حوار بين الإخوان حنان كانت تسأل فيصل لاحظتك اليوم ماشلت عينك من على شوق ليكون انعجبت فيها إبتسم فيصل وقالها ليش ما انعجب فيها مالاحظتي طيبتها وأسلوبها الحلو فالكلام وفوق كل هذا هي جميلة صح دبدوبة شوية بس حبوبة وتدش القلب ابتسمت حنان وقالت أخيرا رجعت لعالم الأحياء كنت خايفة تم طول عمرك عايش على ذكرى مريم (زوجة فيصل المتوفية) بس تراني ماعرف عن شوق إلا معلومات بسيطة بس إذا مب جاد لاتتقرب منها الي فهمته من رهف انه ريلها تزوج عليها وهي طلبت الطلاق وعندها بنتين منه فقال لها تعرفين انا ماعندي خرابيط الشباب ماعرف اتلاعب على مشاعر الناس بس لازم أتعرف عليها لول أشوف طباعها وكل شي عنها وهي بعد لازم تعرفني جايز ما اعجبها
ممكن تطلبين من رهف رقم شوق عشان أتعرف عليها بس لاتقولين لها إني بتزوجها جايز يوم تتقرب مني ما اعجبها هشي بيني وبينج وفعلا كلمت رهف وقالت لها أن فيصل يبا يتعرف على شوق ويبا رقمها تتوقعون شو كان ردة فعل شوق

سارت رهف حق شوق وقالت لها شفتي قلتلج فيصل معجب فيج اكوه كلم حنان عشان اكلمج يبا يتعرف عليج وأنا اقولج هو إذا طلب يتعرف عليج معناته إن نيته شريفة لنج أول بنت يطلب يكلمها من توفت زوجته ردت شوق عليها وقالت لها إنتي ناسية إني متزوجة مايوز أكلم ريال ثاني وأنا بعدني على ذمته ردت عليها رهف الي يسمعج يقول إن ريلج مفتكر فيج رغم انج على ذمته عندي لج راي كلميه وعرفيه زين إذا شفتيه شاريج واقتنعتي فيه صارحيه انج متزوجة وبتطلبين الطلاق لنه ريلج رفض يطلقج إذا يبا يخطبج وإذا ماعيبج كل واحد فطريج ويا دار مادخلج شر ردت شوق بفكر وبرد عليج وعقب تردد بسيط وتفكير عميق وافقت عالفكرة وبدت تتكلم معاه وتتواصل وياه على وسائل التواصل الاجتماعي وبدأ يدش قلبها واستمرت علاقتهم 10 شهور وفمرة من المرات قرر فيصل يصارح شوق بمشاعره ويبين لها نواياه عقب ماحس أنها بدت تحبه وتوده فشو كان ردت فعل شوق فهشي بشوقكم وبخبركم شو صار باجر انشالله

السلام عليكم ورحمة الله وبركاته

هل ممكن تتجاوز ماضيها وتبدا صفحة جديدة مع فيصل ؟

بتوقع انه رجوع الخايب زوجها وتأثير الحنين لبناتها
يكون له راي تاني وتضطر ترجع له وتنسى فيصل.


يسلمو ايديك ومتشوقة للقادم

«اللهم أغفر لي هزلي وجدي، وخطئي وعمدي، وكل ذلك عندي»

الجزء الرابع من قصة شوق
المهم خلال هالعشر شهور شوق خبرت فيصل عن حياتها الزوجية كيف كانت وليش طلبت الطلاق وردت بيت أبوها بس ماخبرته إن ريلها رفض يطلقها فيصل كان يتحراها تطلقت عشان جي يوم قرر يصارحها بمشاعره ونواياه دار بينهم هالحوار
فيصل:شوق الحين مرت على علاقتنا 10 شهور وسمحيلي من البداية ماصارحتج بنيتي بس الحين يوم قربت منج تأكدت 100% من انج الإنسانة الي كنت أدور عليها عشان أكمل حياتي وياها انا من شفتج دشيتي قلبي بس خفت انا ماعجبج عشان جي قلت اعرفج بنفسي جايز ادش قلبج مثل مادشيتي قلبي وفالفترة الأخيرة حسيتج بديتي تحبيني عشان جي تجرأت وقررت اصارحج بحبي وأتمنى تقبليني زوج لج انا ماعرف طبيعة مشاعرج هل هو حب أو إعجاب أو ارتياح أي شي من ذيلا يكفيني إذا بتتزوجيني لنه عقب الزواج انا متأكد اني بقدر اخليج تحبيني ماطلب ردج الحين خذي راحتج فالتفكير بتريا قرارج على أحر من الجمر
شوق:آسفة فيصل انا غلطت فحقك يوم ماخبرتك الحقيقة بصراحة أنا بعدني متزوجة ريلي رفض يطلقني قالي اذا تبين الطلاق طلبيه فالمحكمة وانا ماسرت المحكمة لنه ماكنت مهتمة بالزواج مرة ثانيه بس يوم عرفتك زين وايد ارتحتلك بس كنت خايفة اصارحك واخسرك بس دامك خطبتني لازم كنت اصارحك انا بطلب الطلاق إذا بتترياني بس إذا تبا تنهي كل شي بينا عاذرتنك لني علقتك فيني وانا بعدني فذمة ريال ثاني ومابلومك لني انا الغلطانه عارفة أنها صدمة لك ومهما كان قرارك انا راضية به وبتقبله بدون زعل تتوقعون شو كان رد فيصل

فيصل انصدم بس لنه تعلق فيها وايد وحبها قال لها بفكر وبرد عليج وعقب تردد بسيط وتفكير عميق قرر يترياها لين تتطلق من ريلها وقال بخبرها الحين ودقلها وخبرها فقالت له الحين مرت سنة على هالوضع بتكلم ريلها وديا جايز يطلقها بدون محاكم عقب ما تأكد أنها مستحيل ترد له فقال لها فيصل أوكي لنه المحاكم تطول وخير البر عاجله اذا رفض يطلقها ماجدامها إلا المحكمة ويوم دقت على ريلها كانت تترياها مفاجأة فاجأها ريلها بخبر طلاقه من حرمته ويباها ترد له فقالت له تتحرى رجوعي لك بالساهل لا عندي شروط اذا وافقت عليها والتزمت بها بكمل وياك بس اذا وافقت وما التزمت تطلقني وكل واحد فطريجه الشروط كانت
مايهينها ولا يضربهم إطلاقا
مايخونها ولا يتزوج عليها
مايحرمها من الإنجاب
ييبلها بشكارة
يعطيها الجنسية
يخليها تكمل دراستها
وعنده 3 شهور عشان ينفذ اذا مانفذ يطلقها
تتوقعون شو كان رده عليها

كعادة ريلها راعي كلام يقول بسوي ومايسوي قالها موافق عشان ترجعله وعطته مهلة 3 شهور عشان ينفذها اذا مانفذ يطلقها أما فيصل المسكين انصدم يوم قالتله برجع حق ريلي عقب ماطلق حرمته قالتله برجعله عشان بناتي ولا هو مايستاهل وعنده فرصة 3 شهور عشان يثبت حسن نيته اذا مانفذ شروطي يطلقني وأتمنى نفترق واحنا أصدقاء ماباك تكرهني لنك عزيز وغالي على قلبي ورجعت شوق حق ريلها فهل حس بغلطته ونفذ شروطها أو رفض ينفذ وتطلقت منه الجواب فالجزء الأخير من القصة

الجزء الأخير من شوق

ومرت 3 شهور بدون ماينفذ شروطها طبعا ماكان واضح وصريح كعادته يدور حجج واعذار عشان ماينفذ وفنهاية ال3 شهور قالتله شوق انا تحريتك تغيرت لكن اثبتلي إنك مثل ماكنت راعي كلام لول كنت مستعدة استحملك عشان بناتي بس عقب ماتزوجت علي ماشي يشفعلك عندي الإتفاق إنتهى انا راجعة بيت أبوي طرشلي ورقتي وفعلا رجعت بيت أبوها وطلقها ويوم تطلقت شو أول شي سوته
اول شي سوته دقت على فيصل وخبرته أنها تطلقت وارتاحت وقالتله إنها خلال ال3 شهور كانت تتمنى انه مايلتزم بالشروط لنها حست إنها مابتقدر ترجع مثل لول خاصة أن فقلبها دش شخص ثاني الي هو فيصل ويوم ما التزم فرحت وارتاحت عشان ريحت ضميرها من ناحيته وبترد بيت أبوها وهي مرتاحة الضمير واذا قبل فيصل يرجعلها بتكتمل فرحتها أما إذا مارجع فبتعذره لنها ماتمسكت فيه يوم خطبها ورجعت لريلها بدل ماتتزوج فيصل المهم فيصل فهل 3 شهور وايد كان مكتئب عشان فراقه لشوق كان وايد يحبها لدرجة قرر يسامحها عقب ماتطلقت وكلمته عقب الطلاق وعقب ماخلصت عدتها تزوجها فيصل وعاشوا أيام حلوة بس فالبداية قرروا ماييبون عيال عشان يستمتعون بحياتهم قبل ماييبون عيال واستمروا سنة ويا بعض ماكان يعكر سعادتهم غير أم فيصل كانت دوم تتحرش بشوق وتعايرها يوم تركت فيصل وردت حق طليقها وعطاها بومبة يوم ردتله فاضطرت ترد حق فيصل عقب ماشاتها طليقها وكانت شوق تستحمل اهاناتها عشان خاطر فيصل إلي ماحبت تزعجه بتحرشات أمه لين استوى موقف أنهى كل شي بينهم الي صار أن أم فيصل طولت لسانها على شوق جدام فيصل فردت شوق عليها بوقاحة خلت فيصل يضربها جدام أمه فلبست شوق عبايتها وسارت بيت أبوها وحاول فيصل يراضيها ووافقت بشرط مايسكنها فبيت أمه يعني يطلعون فشقة أو بيت بروحهم فالبداية وافق فيصل بس بعدين بدت أمه تشيشه على شوق لين طلقها زعلت شوق وحست إنها غلطت للمرة الثانية في اختيارها لشريك حياتها وعشمت نفسها إنها المرة الياية بتختار بعقلها مب بقلبها وعقب طلاقها ب3 شهور تقدم لها ولد عم فيصل كان أرمل وعنده ولد وبنت وعصب فيصل يوم قاله فهد ولد عمه انه بيخطب شوق وقاله فيصل أن قليل أدب كنت حاط عينك عليها وهي حرمتي وتزاعلوا الإخوان بسبة هشي حزتها شوق رفضت فهد عشان ماتزيد الطين بلة وعقب 6 أو 7 شهور هدت النفوس وتصالحوا الإخوان وفيصل وفهد وبهدوء كلم فهد فيصل فموضوع شوق حزتها فيصل نسى شوق وما أعترض على زواج فهد منها وتزوجت فهد وعقب زواجهم اكتشفت انه شراة ريلها الأول فتطلقت منه عقب سنتين زواج مايابت منه عيال وماتادبت من طلاقها 3 مرات عقب ماخلصت عدتها تزوجت ربيع اخوها كان مطلق مرتين ويوم تزوجته أكتشفت إنه مريض بالشك يفتش تليفوناتها مايخليها تطلع بمكياج يدق عليها كل شوية يسالها وين انتي ومع منو لين ملت من كثرة شكه وطلبت الطلاق بس رفض يطلقها فسارت المحكمة تطلب الطلاق ولين الحين المحكمة ماطلقتها العبرة من القصة أن كل الرياييل انانيين مايفكرون إلا فنفسهم لاتعورين قلبج عشانهم لنج مهما تسوين لهم مايبان فعيونهم وامشي عالمثل الي يقول خليك على مينونك لييك الاين منه

حلوة النهاية وفيها عبرة فعلا رغم بؤسها...

بس هذا حال الدنيا مو دار هناء وراحة ..

يسلمو ايديك يا قمر

*تم التثبيت*


لك خالص ودي


«اللهم أغفر لي هزلي وجدي، وخطئي وعمدي، وكل ذلك عندي»