وصل ليلاً لمدينة الخرج..
عبر الشوارع النصف فارغه و الميادين الخاليه بعد منتصف الليل..
حتى وصل للحاره القديمه التي ترعرع بها ومنزل خاله الذي عاش به..
اوقف سيارته وهو يفقد صوت والده الذي كان يتحدث معه،ليجده نائماً ابتسم وهو ينظر إليه كما ينظر الطفل لوالده..ولكن نظراته له موجعه تملئها شوائب السنين و يعكرها الحرمان، و القهر فهو لايعرفه، تمنى لو كان يعرفه وعاش معه،
شعر برغبه مُلحّه في البكاء لينزل وهو يقاوم تلك الرغبه التي تُضعفه، اتجه للباب حيث والده الذي لا يعرفه،فتح الباب وهو يهمس له/ابوي ، ابو هوازن..وصلنا البيت انزل

فتح عينيه وهو يلتفت لصوته/نمت ماحسيت بنفسي ،متى وصلنا؟! ويننا فيه؟!

ابتسم له/وصلنا الخرج،وهذا بيت خالي خالد بننزل هاللحين و ننام و من بكرا تشوف الجماعه..

نزل براحه في هذا الحي الهادىء، تلفت في الشارع المضاء بأعمدة النور ..كل شيء مريح للنفس المكان هادىء جداً..!

دخل ساحة المنزل و عينيه تتلفت فيه، ابتسم و كأنه يعرف المكان..ذهب للنخلات التي بقيت صامده في وجه الظروف هنا..

وقف يراقب نظرات والده من بعيد، يريد منه ان يتذكر جيداً، شعر ان ابتساماته تشير لشيء ما/ابوي شكله اعجبك البيت؟!


بخفوت ابتسامه/احياناً من كثر ماترتاح للمكان تحسك قد شفته بس ماتدري متى لدرجة تسمع اصوات اهل المكان.. وانت اصلاً ماعمرك شفته..تخيلات


يالله كل ذلك شعر به وهو للتو دخل،يريد ان يعانقه و لكن لماذا و كيف؟! ضاع عمره كله بلا لحظة دافئه بين عائله حقيقيه طبيعيه تحبه بلا مقابل بلا انتظار رد دين او أي شيء.

استغرب نظرات عزام له/هذا بيت خالك؟!

اجابه بإبتسامه/ايه بيت خالي و بكرا اوديك لبيت اهلي بالطرف الثاني من الحي لكن،يبي له شوية شغل لأنه من اكثر من اربعين سنه مهجور..

بتساؤل/اربعين سنه!!

نطق بنبره هادئه/من اربعين سنه طلع ابوي عبدالله عبدالعزيز المناع طلع مقناص للصمان و لا عاد رجع وقتها امي كانت حامل بي وولدت و عشت كل هالسنين عند خالي خالد بهالبيت و ابوي للحين مارجع.


إلتزم صمته مستغرباً ما سمعه منه لأول مره.، لأول مره يذكر إسم والده .!!

ذهب ليفتح الباب الداخلي بمفاتيح معه نسخه منها/حياك يابوي تفضل
.
،
.
،
.
،
.
...
عادت بصحبة كادي التي لم تصدق بعد ما سمعته من الطبيبه!! هي حامل منذ اربعة اشهر ولم تشعر !!

تلاحظ صمت كادي منذ خرجا من العياده لتبتسم بسعاده/هاه وين البشاره ، ترى لي عندك دين ولازم توفينه يا كادي.

بسعاده و نبره تغلبها بحة بكاء الفرحه/و الله لو اعطيك عيني ما يوفيك يا هوازن،يختي انتي كيف؟! كنت ناويه اروح وحده تسويلي مساج علشان الدم اللي مايوقف ، و كنت بخسر حملي اللي انتظره من سنين لولا انك تكلمتي و ألحيتي انه حمل..اطلبي اللي تبين يا هوازن


بابتسامة سعاده ورضا عن النفس/كلك نظر.


خرجت من غرفتها تتعكز على عصاها وهي ترى ابتسامات كادي و لمعان عينيها وكل منهن بعبائتها و شالها على الكتف/وش العلم يا بنات؟! متى رحتوا و رجعتوا ووين

بابتسامه/كل الاسئله بسؤال واحد يا خاله! عموماً البشاره كادي حامل من اربع شهور و ولد بعد مبروك


تركت النظر لهوازن وهي تلتفت للكادي، قد كانت يائسه من حمل كادي و لكنها لم تصرح بذلك يوماً/ويل حاالي!! تووك تدرين!! و انتي طالبه نروح للمعالجه

كادت تبكي/الحمدلله يمه كله بفضل الله ثم هوازن ، هي اللي اقنعتني اروح افحص قبل اروح اتعالج عند المره

اقتربت منها وهي سعيده بهذا الخبر مهما كانت الظروف فمنذ سنوات كانت ابنتها تحلم ان تحمل يوماً وهاهي اليوم حامل/اللهم لك الحمد،يا بنتي تحقق اللي تبينه عسى ربي يتمم حملك على خير و نشوفه

نطقت بضيق/و حمد يمه !

بمحاولة مواساة أم/كل شيء يتصلح يا بنتي كل شيء يتصلح..انتي اهتمي بصحتك هاللحين و لا تشعلين نفسك بأي شيء غير حملك..اخوك جنبك و بياخذ لك حقك..لا تنسين ليالي دموعك و بكاك..وسنوات الانتظار..فكري بنفسك وبس.

فرحت بردة فعل أمها،كانت تظن انها لن تفرح ولن تتفهم موقفها،عانقتها و بكت/الله لا يحرمني وجودك يمه

لم تشعر بدموعها وهي تبلل خديها لتمسحها وهي ترى الحب الطاهر امامها،و المواساة و الحديث اللطيف و السند..شعور لطيف تمنت لو وجدته حينما تركها طليقها و سلب منها كل حقوقها حتى بطفلها..
تركتهما وهي تنسحب من المكان الذي أيقظ شعورها بالوحده من مضجعه..لم يعد لوجودها أي داع هنا ، فلتذهب لغرفتها افضل..

اوقفها صوت ام مهند/هوازن وقفي

توقفت وهي تلتفت إليها/سمي يا خاله؟!

إزداد شكها في صحة احاديث فاتن وصحة شكوكها عن حمل كادي/صحيح اللي سمعته من فاتن! والا بس سواليف

ابتسمت وهي ترى الكارثه تقترب نحوها بغياب مهند،لم تستطيع التحايل و لا الكذب/صحيح ياخاله ..

قاطعتها كادي بتعاطف كامل/فعلاً فاتن ماتستحي ، يمه مهند ماهو صغير و تراه عارف كل شيء و هو اللي طلب ماتذكر هالموضوع لنا

ذهلت الأم و اخترق قلبها/مو هذا اللي يغبن، سنين اعرض عليه البنات كل وحده تقول الزود عندي وهو رافض و يطلع العذاريب علشان بالنهايه يتزوج مطلقه!!

بهدوءها المعروف عنها/اكره اخبي شيء لكن هذا اللي صار..و ماني ندمانه لأن مهند عارف كل شيء عني ومع ذلك متقبلني مثلما انا متقبلته


جلست متكأه على عصاها/زوجك للحين في السكره، لكن انتظري لين تجيه الفكره ،يا خيبت رجاي فيه بس

استغربت وخافت،ماذا لو عرفت سبب نسف زواجها السابق/عن اذنكم، رايحه لغرفتي!

تحدثت كادي بحب/بس مهند محبته ماهي سكره يمه..لا تقللين من قيمة هواه واختياره يمه

قررت المضي و عدم الإلتفات لحديثها..لا تحتاج المزيد من جروح الذات..

نطقت بصوت عال وهي ترد على ابنتها/نعنبو دارك وشلون شافها علشان يهواها و يختارها؟! كان ساحرته هذا شيء ثاني..و بكره بيظهر لنا ولدها ثم بنطلع كلنا كذابين قدام الجماعه..و الله ان العيب كله متلبس اخوك اللي انهبل،حتى انا ماعمري شفتها عند ال مناع!!

حاولت تسكيت والدتها على الاقل حتى تتأكد من ذهاب هوازن لغرفتها/يمه وش جاك على البنت وهي اللي كانت طيبه بنظرك و مافيه مثلها

سكتت لم تجد جواباً ...


ردت بأسف/علشانها مطلقه؟!! هذا يعني ان نظرتك لي نفس نظرتك لها؟! المطلقات ماهن كفو؟!!

لم ترد، تعرف انها جرحتها من دون قصد...،

نزلت دمعتها لتمسحها بسرعه وهي تبتسم/اللي يضحك ان الرجال ماعندهم نفس النظره الدونيه اللي تحكم بها النساء الغير مطلقات على بنات جنسهم المطلقات. .. و اتحدى تلقين رجال يعيب رجال علشانه مطلّق ويتهمه بالفشل ...هالنظره المعقده بس بيننا يالحريم وحنا اللي نغذيها بروس البنات لين الوحده تفضل تعيش ذليله وتموت من القهر عند زوجها و لا تطلب الطلاق ثم يقال عنها مطلقه طول عمرها!
عن اذنك يمه..

.
.
،
.
.
،
،
لملمت بعض اشيائها المهمه على عجاله و اخذت ماتحتاجه من ملابس و اغلقت حقيبتها بعدما اتصلت بالشموس لتأخذها من هنا..
لن تجلس هنا مالم يكن مهند معها..هو فقط من يفهمها و يعرف سرها..

جلست منتظره وهي ترى شماغه المعلّق و عقاله ..و تقرأ رسائله في هاتفها بعدما ارسلت له تخبره انها ستذهب للشموس،..إنهارت باكيه وهي تتذكر نظرات الإتهام من ام مهند.. حديثها كان جارحاً و ان حاولت التغاضي عنه.

رن هاتفها لتبتسم وهي ترى إسم الشموس بالتأكيد وصلت/هلا الشموس..هاللحين نازله

اغلقت الهاتف وهي تسمع طرقات باب هادئه. لبست عبائتها واخذت حقيبتها و فتحت الباب لترى وجهها الحزين/كادي! انا رايحه لابوي فتره،

بحزن/لا تطلعين وانتي زعلانه طلبتك

ابتسمت غصباً/تطمني ما اموت من الزعل، عندي مناعه

ابتسمت رغم حزنها/قلبي معك..تذكري اني بوقف معك مهما صار

حاولت ان تنهي هذا كله و ان تخرج بسرعه قبل ان تختنق بصراخها/مابي اخلي الشموس تنتظر...سلام

عانقتها كادي وهي تودعها/لا تطولين،تذكري مهند تراه يحبك و ماله اي ذنب بحديث أمي

حركت رأسها بإبتسامه وودعتها بعينيها ثم خرجت...،
.
،
،
،
،
،
،
جلست عندها بإلحاح/ليااال تكفين خلينا نطلع الليله نتمشى شوي و نتعشى برا والله مليت من قعدة البيت


مازالت تلتهي بهاتفها وهي تراه متصلاً يكتب شيئاً ثم يمسحه قبل ان يرسله..ابتسمت وهي تكتب له، محاولةً إستفزازه ليعترف بم فعله مع اخيها[بطلع اتسوق و اتعشى مع اختي، اتمنى ما اصادفك]

رد في الحال[أي مول؟!]

كتبت وهي تتبسم و كأنه يراها[اخاف تجي تشوفني صدفه! مراهق في الأربعين!]

لاحظت انها تتحدث و ليال تلتهي بهاتفها و تتبسم له/يا بنت عطيني وجه.. خلينا نطلع مع هند و شهد يبون يمرونا بليز تعالي معي!

تلقت رساله منه؛[دام رفضتي هذاك،لو اشوفك صدفه هاللحين بس بسلم عليك]

ابتسمت وهي تكتب له[ياليت ما وظفت اختك، سلام بروح دي كلاسيه النخيل الساعه ثمان بكون هناك،اتمنى ما اشوفك صدفه]

بصوت مرتفع /لياااال بتروحين معنا الفيصليه والا لا؟!!!

ابتسمت وهي تلتفت لها بهدوء رغم صراخها/لا انا معزومه مع رفيقتي..خلي السايق لان الشموس اخذت سنجاي

تأففت وهي تقف/اصلاً بيودينا تركي..مااالت عليك بس سااااعه اتكلم و اخر شيء ماني رايحه معزوومه بااااي


وقفت بعد خروج نيفادا لتتجه لمرآتها و تنظر لوجهها المبتسم، انتبهت ليديها الفارغه من اي شيء!
فتحت درج مجوهراتها لتنتقي خاتم أو إثنين.. و إسواره ناعمه..

بدأت بزينتها بشكل لم تفعله منذ فتره، ثم لبست فستاناً بسيطاً و طويلاً بلا اكمام..
فردت شعرها على ظهرها و كتفيها و ابتسمت للنتيجه ثم خرجت من غرفتها..تدندن بينها و بين نفسها لتمر بغرفة وسام المفتوحه وجدت اميره تلون في كراسة رسم بصحبة وسام فجلست معهما/ما شاء الله وش ترسمون؟!

ابتسمت لدخولها/مانرسم جالسين نلون..ناظري وسام بيسبقني

تحمست وهي تأخذ كراسة تلوين/تراهنون اني اخلص قبلكم كلكم

وسام بابتسامه حرك رأسه و اشار لدفتره/انا بخلص ماما

بدأت بمشاركتهم/راح اسبقك وسام

فرحا معها و اندمجا وهي تتبسم وتتذكر رسالتها لوليد..و تتجاهلها..،
.
،
.
،
.
،
.


،
.

لم ترتاح لنبرتها التي لم تعتادها، لاحظتها فقط تحرك ملعقتها في فنجان قهوتها بدون ان ترتشفها/هوازن صارحيني،وش فيك؟!.ماتعودت على انكسارك،كان يعجبني شموخك رغم ضعف وضعك..لا تخيبين أملي

تحدثت وهي لا ترفع نظرها لها/ام مهند عرفت اني مطلقه، كنت رافضه فكرة اني اتزوج بهالطريقه بدون صراحه ماحب هالاسلوب لكن الله يهدي مهند

فهمتها الآن/طبعاً فهمت انك ضحكتي على ولدها و تزوجتيه

بتأثر واضح/اكيد يالشموس الطبطبه تخلي الواحد يشك مهما كان الوضوح و الصراحه راحه..

تذكرت ماحدث معها لترد وهي تؤيدها/فعلاً الوضوح و الصراحه راحه

ردت بحزن/ وهاللحين مهند مسافر و مستحيل اشغله بموضوع ممكن يضايقه وهو بعيد

ابتسمت لها/ولا يهمك،المهم ان كل شيء واضح بينك وبين زوجك..تذكري كيف كنا و كيف صرنا، شوفينا جالسات نسرب قهوه بكوفي و عين الله علينا...صدقيني كله وقت ويعدي ..


بادلتها الإبتسامه وهي ترى منها شخصيه اخرى لطيفه تختبىء خلف شخصيتها البرجوازيه الراقيه/فعلاً لازم تعاشر الشخص علشان تعرف تحكم عليه..اول مره اعرف بساطة شخصيتك الطيبه دايماً تظهرين بشخصية البنت الراقيه اللي اهم شيء عندها مظهرها ومكانتها الاجتماعيه ما تهتز

ارتشفت قهوتها وهي تجيبها/لكل مقام مقال، تعلمت اكون رسميه جداً و عمليه بحكم وضعي.. و انتي صرتي اختي، ماراح اكون رسميه معك من اليوم ورايح ماراح تشوفين غير ام راكان ربة البيت،

احبت حديثها/والشموس؟!

تذكرت خضوعها لعزام و مافعله بها/الشموس معادت شموس.. جاء من عسفها

ضحكت/والله راح توتري و حاسه ان طاقتي السلبيه تلاشت هنا..زين انك خليتينا نطلع نتقهوى برا

تنهدت/قلت لك كلها اوقات و بتعدي. مافيه شعور يظل للأبد.. المهم خلينا نرجع البيت ليال قالت بتعشينا بنفسها و بصراحه متحمسه اشوف وش بتطبخ لنا

هوازن/اي والله عاد اليوم ماتغديت مشينا.

لمحت عربة طفل خارج احد المحلات و الخادمه منشغله بطفل آخر ذهبت تلحق به عرفت الخادمه جيداً، لم تنتبه لوجود مشاري حولها ولكن الطفل الذي يبكي في العربه دعاها لتشد الخطوات إليه.. لم تلتفت لنداء الشموس، صار قلبها ينبض بشكل صاخب و كأنه طبلة في يد راقص يحيي العرضة النجديه!

اقتربت منه و انحنت إليه تسابقت دموعها مهلله لامست يديه و انحنت لتقبيله/يمه يمه

توقفت عندها وهي تفهم ما يحدث،هذه أناهيد أم بلا ادنى شك تعرف مشاعرها جيداً/هوازن حبيبتي فكي الولد خنقتيه

خرج احدهم وخلفه سيده ليتقدم إليه و يحاول نزع الطفل منها،ظن انها خاطفه/هي لو سمحتي الولد لنا

افلتت منه وهي ترد بغضب/كذااب يا مشاري لو لك ماخليته بيد الشغاله ورايح مع هذي

عرفها وكيف لا يعرفها/هوازن؟!!

هنا تحدثت الشموس/تارك الطفل بالعربه حقته كذا و داخل المحل !! هذا تصرف أب مسؤل؟!

رفع حاجبه فهو لا يعرف مع من هي و لا من اي مكان أتت/مالك دخل انتي وياها يلا توكلوا على الله و هاتوا الولد يلاااا

خرج موظفوا المحل و حضر بعض الماره لترد الشموس/ماراح نعطيك الولد و حنا نشوفك مهمل له

نظر لهوازن المتمسكه بطفلها بنظره قاسيه/ان خذيتيه هاللحين ما قدرتي تطلعين به حي من المول

استنكرت الشموس تهديده/هذا تهديد علني اشهدوا عليه يا جماعه بيذبح ولده..هاللحين بتصل بالامن وبيتصرفون معك

قاطعها/قضية المحكمه وتكافوء النسب بصالحي..طبعاً انتي الخسرانه يا هوازن فلا تحرمين نفسك من الولد طول عمرك..انا ماعندي شيء اخسره لكن الولد ما راح تاخذينه مابي بكرا الناس يهينونه و يقولون يا ولد قليلة الأصل..بعدها هو اللي بيتركك بنفسه

ابتلعت ريق الوجع بصمت رهيب، وهي تنظر لطفلها بحزن الأمهات..وضعته في عربته بهدوء قاتل مسحت وجهه بنعومه و قبلته..لتتركه باكياً خلفها لم تلتفت كانت كل خليه بجسمها تبكي،

لحقت بها الشموس وهي تبكي هي الأخرى لم تحب ان تترك ذلك الطفل يبكي خلفها، ستجن من تصرف هوازن ..

ركبت السياره وهي مازالت صامته،و دموعها لا تتوقف!!

بكت وهي تستنطقها/هوازن ابكي تكفين لا تبلعينها و تسكتين ترى بتموتين مخنوقه

شهقت ثم اغمي عليها مكانها..

خافت وهي تراها تصمت بعد شهقتها، لتقترب منها/هوارن !هوازن ردي علي!

لاحظت برودها المفاجىء لتصرخ بالسائق/سنجاي روح المستشفى بسرعه بسرررعه

اخرجت هاتفها من حقيبتها بسرعه لتتصل به باكيه/الله يخليك رد هالمره بس
.
،
.
،




.
،
.
،
،
.
،



صارت الساعه التاسعه و لم تأتي بعد!!
للمرة الخمسون ينظر لساعة معصمه بتملل تيقن انها لن تأتي ..
إلتقط صورةً طاولته و ارسلها بعدما كتب تعليقاً..
لمح احداهن تنظر إليه ثم تلتقط صوره لم يعرفها ظن انها تصور المكان فقط و لم تقصده قرر ترك المكان وذهب غاضباً ....
،
،
.



،


،

في المطبخ انتهت من إعداد الصوص الخاص بالطبق لتذهب تشرف على السلطه التي طلبتها من الخادمه لتنتبه لاصوات الرسائل على هاتفها !!
إلتفتت اليه واخذته وهي تجلس و تفتحه "اماني!"
"شفت دكتورك بالكوفي لحاله..مسكين شكله كان ينتظر احد و كنسله، بغيت اروح له بس استحيت اشوى"

ضحكت وهي ترى ان توقعها أصاب، لتتفاجىء برساله منه صورة طاولة المقهى و تحتها [بطلع كل شيء سويتيه بي من عيونك صدقيني]

ضحكت ولكنها لن ترد عليه بوقتها..هو تلاعب بها دون ان يخبرها بما حدث بينه وبين اخيها في ألمانيا جاء دورها لتتلاعب به أيضاً..
.
،
.
،
.
،
.
،
.

خرج من المجلس بعدما تلقى رساله نصيه منها أعاد قراءتها مجدداً [رد على اتصالاتي و الله الموضوع ما يخصني و لا يخص خواتي]
عقد حاجبه من اسلوبها في الرساله و لكنه إتصل اتصلت كثيراً و لم يرد عليها/الوه

على الطرف الآخر باهتمام/عزام ليه مارديت علي

بنفاد صبر/اخلصي وش تبين؟! راكان فيه شيء؟!

تنهدت بحزن/لا بسم الله عليه..لكن هوازن طاحت علي تعبانه و حنا طالعين من المول

استغرب خروجهما معاً/ليه لا يكون سكر او تعثرت او

قاطعته/لا يا عزام ماتعثرت ، لكن للحين ماحددوا ..شاافت ولدها صدفه بالمول و كانت بتاخذه ولكن طليقها أهانها و مسح بها الارض الله ياخذه قهرها..عزام انا انقهرت شلون هي بليز عزام تعال سو أي شيء بس هوازن لا يضيع حقها بحجة مالها سند


وكأن النيران تلتهم اضلاع صدره و تخرج ابخرتها من حنجرته المحتقنه/انا جايكم حالاً


سمع صوت الباب الخارجي واحدهم ينادي بإسمه ليتجه ناحيته وهو يرد/الله حيه ابو عبدالكريم

دخل وهو يتبسم له/السلام عليكم والله نورت الديره ياعزام..

عزام بسعاده ظاهريه/وعليكم السلام يابو عبدالكريم،جيت بوقتك ياللحية الغانمه

استغرب/خير يا ولدي وش صاير،عبدالكريم قال انك جيت تدورني و انا بالدلم

قرر عزام ان يمهد له الموضوع قبل ان يدخله على والده/اي والله صادق لكن بالاول قل لا إله إلا الله

ابو عبدالكريم بغرابه/حق لا إله إلا الله..

بدأ بسرد كل التفاصيل حتى يفهم ما سيفعله به ليتركه معه ويعود للرياض..
.
،
.
،

.
،
،


خرجت من المطعم بصحبة البنات و تركي و رواد الذي اخذته نيفادا معها..

هند بممازحه/ااه يالقهر كل وحده معها اخوها وانا لا

نيفادا بضحك/ارضي بنصيبك

تركي بممازحه/افاا يا هند وانا ماني اخوك؟!

هند/انت سواقنا ماغير اشتمك..الاخ اضربه و يضربني نتهاوش ،انت يا تركي ماتصلح مااش

ضحكت شهد/والله انتي اللي ماتصلحين اخت سلامات و ش هالعنف اللي براسك

شعرت ان تركي يسرع/تركي بليز لا تسرع معي حملة اطفال ضاغطين علي لا تزود بهالسرعه

ابتسم وهو ينظر للمرآه العاكسه و يهدء سرعته/بشرط يا نيفو اذا جبتي بنت تزوجينها لي

مازحته/كم تركي عندنا؟! البنت لك بس وش تحب نسميها طال عمرك

بدون تفكير/على اسمك نيفو

هند/وش ذا من زين اسمها هاللحين؟ صدق ماعندك ذوق

التفتت اليها/نعم نعم!! اسمعوا من ينتقد اسمي هنددد!!! من عام الف وحطبه

ضحكت شهد/وش بيفكك من نيفو يا هند

هند/انا ماعلي منها ماني ساكته لها مثلك يا شهود

تركي/لا عاد يا هند اذا تبين الصراحه مامعك لا توقفين ضد نيفو معليش..تراني بفريقها انا ورواد صح يا رواد؟!

ابتسم له وهو يجيبه/صححح

نست نفسها وهي تضحك بعفويه/طول عمرك يل تركي ماخيبت أملي ..ياخي احبك

توقفت سيارته داخل ساحة المنزل وهما يضحكان لينزل و يفتح لها الباب/تفصلي طال عمرك

ضحكت وهي تنزل/والله ادري ان الباب خربان مو ذرابه منك يا تركي

بابتسامه/عاد مشيها طال عمرك لا تفضحينا عند الناس

تلفتت و كأنها تحاول رؤية احد/من هالناس ؟! مافيه احد

شعرت بوجع معتاد اسفل بطنها لم تجد شيء سوى يده تتمسك بها بصمت تكتم الألم،

استغرب ولكنه اميك بيدها بردة فعل عاديه/شفيك نيفو تعبانه؟

نزل رواد وهو يحمل كيس بيده،/عاادي كذا هي

ضحكت من ردة فعل رواد وهي تسحب يدها من يد تركي/معليه اسفه

كرر سؤاله بقلق/صدق نيفو فيك شيء

هند من داخل السياره/ياخي تعاال بس،محسسني انها زوجتك ترى ندري حامل بتوم اكيد بتتعب ..يلا تأخرنا تركي.

ودعها بعينيه وهو يركب السياره/يلا بروح اودي هالمزعجه سلام

أشارت بيدها وهي تتركهم وتقرر الدخول بصحبة رواد الذي شهق/قاسي!!

رفعت عينيها لما ينظر إليه رواد لتبتسم وهي تنزع نقابها بابتسامه صادقه/ماصدق!!

وقف منظراً عند المجلس وعينيه تلاحق سيارة تركي حتى خرج، ليعود يعينيه عليها، تبدو فاتنه جداً ببطنها المتضخم و شعرها الذي فردته بيدها بعدما نزعت غطاء رأسها..
راقب ثقل خطواتها جيداً تأخر كثيراً هذه المره..رفع يده ليصافحها ولكنها تركتها لتعانقه بصوت هامس/طولت هالمره و الله العظيم طولت..

بادله العناق وهو يرى ذهاب رواد للداخل ليخبرهم بقدومه/عشاني طولت ترى الليله بتضيفيني هنا.. عندك خبر؟!

رفعت ناظريها إليه بابتسامه دامعه/ليتك تقعد هنا دايم و اضيفك هنا دايم

ابتسم/ودي بس استحي من اهلك وعزام..يلا مشينا

باستفهام/وين؟!ماقدر اطلع مكان شايف كيف بطني ترى اول مره اطلع مشوار من اسبوعين، يعني محتاجه ارتاح يومين قبل اسوي اي شيء

نظر إليها يتفحص ملامحها المرهقه جيداً، ازدادت نحافه مع الحمل و ازداد شعوره بالذنب، اضطر يوافقها/شوفي اذا في احد قدامي..

بابتسامه/ماعليك بروح افتح الباب الخارجي للبيسمنت و بننزل تحت و ناخذ راحتنا ومحد بيعرف غير ام رواد لان المفتاح معها اما عزام مسافر ماعليك..ادخل المجلس يا قلبي تقهوى علبال ما افتح البيسمنت


لاحظ حماسها/و كأنك مخططه لهالشيء

قبلته على خده بنظرات شوق ساحره/الود ودي اخليك عندي و اقفل عنك هالعالم..لحظات بس يا قلبي


جلس بعدما ذهبت لتختفي إبتسامته وهو يفكر بتركي مجدداً ،نظراته و لمسه المتعمد لها و ضحكه معها أشياء تجعله يضع عقله في كفه..!
.
،
.
.

.
،
،
.
،
،

انتظرت خارج غرفة الملاحظه طوال الليل حتى صدح مؤذن الفجر ..خرجت من الانتظار بعد اداء صلاتها وهي قلقه على تأخر عزام..

سعرت بيد تمسكها و تلفها لترى عينيه شبه الحمراء/وين هوازن؟!

استغربت تصرفه/الحمدلله انت بخير، والله قلقت عليك

كرر سؤاله بمحاولة هدوء/وين هوازن وش قالوا فيها

تنهدت/الله يصبرها تركت ولدها مقهوره ،اهانها قدام خلق الله ، لولا اني شفتها منهاره و مشت والا كان وقفته عند حده و جبت له الشرطه و خليته يعرف قيمته النذل


مسح على وجهه بتوتر/ماقالت لك اسمه؟!

حاولت تتذكر/كانت تناديه مشاري بس ما قدرت اتكلم معها انهارت بشكل يوجع

خرجت الممرضه لتناديها/تعالي مدام دكتور يبيك

سبقها إليها،يجب ان يعرف منها كل شيء و رغماً عنها هذه المره ..

استغربت دخوله بدون تردد لتلحق به..


تحدث الطبيب كثيراً عن انهيارها العصبي و عن ارتفاع ضغط دمها و ربما ستفقد وعيها طويلاً..!
اقترب من سريرها وهو يزيح شماغه عن رأسه و يضعه علي سريرها وهو يناديها بهمس خشية ان يخيفها/هوازن. هوااازن، قومي قولي لي اسمه الله ياخذني ان ما خليته يجي تحت رجليك و يطلب السماح

استغربت نبرته وامساكه بيد هوازن/عزام!!

تجاهلها وهو يقبل يدها و يمسكها بيديه المرتجفه من شدة ما يكبت داخله/طلبتك يا هوازن قومي طلبتك ابي اسمه الثلاثي بس تكفين، والله وانا اخوك ما يبقى منهم واحد مرتاح والله ان يدفعون ثمنها كلهم بس قومي لي تكفين

استغربت ولكنها تقدمت إليه و هي تربت على كتفيه/عزام وش فيك انت بعد


وقف والتفت إليها باكياً، كم يكره ان يضعف امامها و لكن حرقة اخته عالقه في حلقه و تلك الدموع لعينه/اطلعي مع السايق انا بقعد معها

استغربت طلبه/نعم!

نطق بحده فليس هذا وقت احاديث/قلت اطلعي برااا مابي منك شيء.

لم تزيد كلمةٌ اخرى و لم تذرف دمعة واحده ...اخذت حقيبها وخرجت و تركته عندها...
كان طرده بحد ذاته رسالة اخرى من رسائله الموجعه التي تُقصيها من حياته...


،

يتبع...

عزام عم يغلط نفس غلط الشموس والوجع عم يزيد بينهم والخوف انه يوصل لمرحله لايعود هناك مجال للمسامحه لاننكر انها اسات بعدم ثقتها به ولكنه غلط من البدايه لما اخفى قصته مع مها فاذن هو البادئ بالغلط واعتقد ان الشموس استحملت فوق طاقتها وهي بدات تستسلم لقراره ويمكن طرده لها سيجعلها تاخذ الخطوه بالابتعاد \\\\\هوازن اعتقد ان عزام سيجعل الكل يندم على اسائتهم لها من زوجها الاول وحرمانها من ابنها لعدم معرفه نسبها ولتصرف حماتها معها وخاصه لم يكشف نسبها وتعرف بانها من بنات المناع ووقتها الكل سيندم ومتاكده ان ابنها سيعود لها وخاصه ان نسبها سيصبح معلوم ومشرف \\\\\\ليال تلعب لعبه القط والفار مع وليد وخاصه لما عرفت انها له بكلمه من اخيها واكيد هي من قلبها موافقه وفرحانه ولكنها تريد معاقبته رغم هي من فهم الامر غلط بس واضح ان قصتهم ستكون لهانهايه مرضيه \\\\\قاسي عاد ونيفادا سعيده بس هو قلق من وجود تركي هل سيعاتبها لخروجها معه ام لهفتها عليه وحبها له سيجعله يغض البصر \\\عبد الله هو الاب المفقود هل عودته لحياه عزام سيجعله ينسى يتمه وحرمانه من الحنان بارت روعه وبانتظار القادم

السلام عليكم
حي الله ام عند اسفرت وانورت واستهلت وامطرررت.. وويييين يااشيخه هالغيبه ؟؟؟
لاعاد تتاخرين علينا ياا رشووو ترى ماراح تدرين الا حنا هاجمين عليتس هنا بالبحث والسؤال حتى يتم طردنا من المنتدى. بسم الله علينا .هخهخهخه
بجد بجد ام رشوو اشتقنا يااقلبي... واقلقتنا عليك يازين>>فيس بغى يجي شاعر بس وقف الالهام.
نجي لابطالنا وربعنا اللي اشغلونا عليهم وعلى قلة عقولهم وماذا اصابهم؟؟
الصراحه مبسووطه لعزام انه لقى ابوه وصار لهم اخت بتكون عمة لراكان .. بس بنفس الوقت احس عزام شخصيه ثاانيه مو هو اللي يتصرف ابد ابد هذا مو عزامي اللي اعرفه وحبيته.. صااير قاااسي مممررره في تعامله مع الشموس.. يعني الصراحه كنت واثقه انه بيزعل من الشموس وبيربيها عشان ماتشك فيه مره ثانيه ..بس ماتوقعت يصيبه هالبرود كله تجاهها لدرجة انها تلصق فيه وهو يعافها... هذا مهوب عزامي ام غند لو سمحتي ردي عزامي الاول الحبوب الحنون هذا صح حنون مع ابوه واخته..بس صاير مره متغير على زوجته الحماره يتغير عليها متفهمين تغيره هذا بس متغير حتى على اصدقائه وخصووصا وليد.. ليش زعل لما قاله نايف انه زوج ليال لوليد..؟؟ صح هو التصرف بكل شي بس نايف اخوها وعادي انه يخطبها منه.... مدري صراحه عزام هالفتره مهيب فترته ولاهوب جوه.؟
ليال ياحمااااااااااااااره كنتي عارفه وساكته؟؟؟ عز الله صدق من قال الساكت سمة ناكت..
وتبغين تعذبين وليد وتقهرينه ورايحه تلعبين فيه لعبة انا هناك بس انا هنا.. وهو يااقلبي طاااير بدون تفكير للمكان اللي قلتي عليه كنه مراهق يعاكس.
منهبلين العرب كلهم اللي هنا. ماعاد فيهم صاحي للحين الا ام رواد.. حتى قاسي جاي وجاب شكه بتركي معه.. الله يعين عليه هو بعد ماخلصنا من مشكلته انه بالحد جانا وجاب خبال ولد عمته معه والحين كل واحد اخبل من الثاني...
بس الحلو بقاسي انه تجاوب مع نيفو .. ومابين شكه بتركي وخلى الامور تعدي بينهم بسلام..
اما الشموووس احب اقوولها .. ذووقي من نفس الكاس اللي ذوقتيه عزام.. ومع هذا حنا مو مبسوطين باللي وصلتوله.. نصيحتي دوري لتس مرض والا شي يخليه يخاف ويرجع لتس ماعاد لنا الا هالحيله..
اما هوازن فتبشر باخو ماراح يخلي حقها يضيع وبيجيب حقها وحق ابوه من مشاري واهله كلهم..
بس قهررني بموقفه يوم يدخل على هوازن وقدام الشموس يحب يدها ويبكي ويهدد بانه يجيب حقها.. الصدق لو تزعل عليه الشموس وتحووووسه ماحد لايمها وبنقول معها حق.. لكن تووقعي على الرغم من الموقف وان ماله تفسير الا ان فيه خيانه اتووقع ان الشموس تتريث وما تشك بعزام وتكون استفادت من درس مها... يعني اتوقع انها بتفكر ان عزام رجال يخاف الله وهوازن حرمه متزوجه مستحيل انه بيكون بينهم علاقه وهي عارفه اخلاق الاثنين فهنا الشموس وبهالموقف هذا يمكن هو اللي يرجع عزام لها.. يعني لما تتصرف بحكمه وهدوووء . وماتفتعل مشكله من الموقف.. الاكيد انها بالاول مثل مانعرفها مخها ضارب فبتجلس تقول فيهم وفيهم بس بالاخير ومن خلال معرفتها لعزام واخلاااق عزام بتقول مستحيييل بينهم شي والموقف هذا له تفسير مقنع ولازم اعرف وشو..>>فيس يتمنى انها تسوي كذا ممع ان هالشموس ما تنتأمن..
ام مهند وش قصدها يوم تطلب من هوازن تاكل حبوووب؟؟؟ مافهمت هالنقطه صراحه؟؟ تبيها يعني ماتحمل والا تبيها لو كانت حامل تسقط.. والا ايش؟؟
وفاتن دبله الكبد هذي السووووسه جعلها للسوس.. الله يقلعها عنا ونفتك منها..
كادي مبروك الحمل وباذن الله يرد الله لتس حبيب قلبتس وتربون هاللي بيجيكم..
ام غند تسلم الايااادي ولاعاد تعودين الغياب عنا ترانا ما نصبر عنكم..
بانتظار البارت الجاي بكل شوق ان الله احيانا فلا تتركين انتظارنا يطووول
دمتي بود

تسليمن بارت رائع