كاتب الموضوع :
رشآ الخياليه
المنتدى :
القصص المكتمله من وحي قلم الاعضاء
رد: ما وراء الغيوم... بقلمي/ رشآ الخياليه
مساء الخير 💕🌏
*
أخيرا رجعت للتعليق على الرواية بعد الانقطاع وعدت قراءة البارتات من جديد والحمدلله خلصنا ما شاء الله تبارك الله رشا مبدعه بشكل مذهل متابعتك بكل رواياتك وشفت التطور لك مذهله والله بالتوفيق لك* يارب ومن إبداع لإبداع💖
نبدأ في الشخصيات
- قاسي ونيفادا:
أكثر ناس أحبهم .. فاجأتني نيفو في رجاحه عقلها هي واخوها يعني على تهورهم وتصرفاتهم الغير مسؤوله قبل إلا شخصيتهم الحقيقية جدا جميلة .. عرفت كيف تتعامل مع زوجها وأخذت قلبه .. رجوع قاسي من الجبهه وموت أصدقائه وكمل عليه تعب أمه يعني شي يهد الحيل .. والله ينصر الإسلام والمسلمين في كل مكان والله ينصر جنودنا البواسل في اليمن اللهم احفظهم وسدد رميهم وبشرنا بنصرهم عاجل غير أجل يارب العالمين إنك على كل شيء قدير .. لو تصحى أم قاسي ولدها جنبها راح يخفف عليها شوي لكن إذا راح عنها راح تدهور صحتها ما أتخيل انه راح تتقبل وضعها الجديد راح تنهار والله أعلم وش العواقب .. صراحة جلست أفكر مين الشخصيه اللي راح تودعنا اتوقع أم قاسي لأن مدري كيف صحتها من بعد الطيحه ولا أدري كيف يتحمل قاسي موتها هو في طيحتها بكى وتألم كيف لو كان موت .. وأتمنى أنه مو قاسي اللي راح يودع انا مستبعدته صراحة هو ولدك وغالي عليك رشا فما اتوقع موته .. اتوقع م راح يرجع قاسي للجبهه الظروف اللي عنده مكفيته وخصوصا إذا أمه تدهورت صحتها .. والله يتقبل الشهداء عنده يارب العالمين كل فتره نسمع استشهاد الله يتقبلهم عنده ويصبر أهلهم والله يحسن خاتمتنا.
- مدى:
لا أدري لوين راح يوصل حالك راح تتزوجين رجل غير منيف والا ترجعين له من رأي انا والأفضل بحالها تتزوج رجل غيره أبو عيالها جدا جدا صعب الرجوع صعب يمكن نصيبها مع ابو شيخة وعيالها راح تشوفهم من فتره لفتره أفضل م ترجع لطليقها وشوفوا المشاكل مع أهله وخصوصا انهم عارفين سبب الطلاق.
- ريم:
اقول إجلسي ولا تنطنطين من مكان لمكان عشان يشوفك من وين الوجه والأفعال وانتي شفتي قاسي كيف يحب زوجته ف احترمي نفسك أفضل وعسى أبوك يتعافى ويشفيه وتفارقون عن بيت قاسي وصدق وين عياله يشرفون على وضع ابوهم.
- نايف شهد:
يا شيخ انت الثاني صدمتني في شخصيتك وين كنت وين صرت صدق الصدمة اللي توجعك تقويك .. وبعدين علامك على بنت الناس يكفي هي اللي شافته ويكفي مرضها .. انا متأكدة لو راحت له شهد راح يتغير نظرته لها وهي بعد .. نايف بدأ يميل لها وتشغل تفكيرة وهذه بداية طيبه بس يعرف مقصدها وأنه تبيه وان الكلام قصدها فيه أبوها وهشام راح يتغير 180 درجة وراح يتمم زواجه فيها.
- مها:
هذه النهاية الله لا يبلانا والحمدلله الذي عافانا والله الهادي يهدي من يشاء ويمكن مها قالت لخالها وصاتها يقول انه هي تلاحق عزام ويوصل الكلام*لشموس بس اتوقع* موضوع الوصايا أكبر من كذا
- فيصل:
إن شاء الله توافق عليك سلطانه وتعيشون حياة سعيدة وتعوضون هالأطفال
- ليال:
يالله الحين وش السواه تهديد صريح وفيها فضايح يا انه طراد أو أنه فيصل اتوقع اسمه كذا اللي في لندن اللي يختلس الأموال أو أنه فياض اتوقع اسمه كذا اللي يقرب لشريفه على م أضن هو ولدها أو ولد أختها المهم اللي جاء لعزام وطردته واللي كان عزام يشتغل بنفس الشركة اللي كان يشتغل فيها عالفياض أو أنها أم نيفادا واحد من الثلاثه أو طرفين لأن استبعدت انه أعداء في السوق لأن أبو نايف م كان عنده إعداء .. بس صدق هالتهديد يهد جبال يعني وسائل التواصل وعزام وصداقته في وليد وفوقها سمعتهم يعني صدق موقف كبير وشوفوا لو الصور تروح لعزام يعني صديقة مع بنت عمه في أي صفه خصوصا أن الصور جدا في وضع مو حلو يعني مفركه يعني شي يفجع بإذن الله م توصل عزام لأن الاحظ تهديدات اللي في الخارج واللي تجي ليال والشموس وعزام يعني معقولة كلهم مصدرهم واحد أحس مثل م قلت قبل فيه طرفين من التهديدات عاد نشوف النهاية* .. انا اتوقع ان ليال تنجبر تأخذ وليد خصوصا أنها صورها يعني يتلاحقون الأمر يملكون لهم بسرع وقت ويقلون متملكين من زمان أحس الشموس راح توريها الشغل فعلا بعد الصور .. وبعدين يا عمري عليك يا وليد جد حالك صعب مدري من وين تلقاها.
- وليد رشا:
*
أتمنى ليش أمه زعلانه عليه لأنه وافق يساعد رشا واللي واضح انه أخته من الرضاعة لكن ليش أمه زعلانه فيه شي مو واضح .. واضح ان فيه وليدين وليد ليال وليد رشا ولكن وش اللي صار مع رشا وزوجها والمشاكل متحمسه اعرف السالفة ولكن الحين ابي اعرف وش راح يصير على وليد بعد الصور الموضوع مو معدي على خير وشكل والله أعلم عزام راح يعرف وخصوصا انه جالس مع الشموس من وصول الرسالة راح بحث عن الموضوع وعسى الصور م توصل لهم يمكن ليال تتصرف وتكلم وليد عن السالفة والله احترت.
- عزام والشموس:
صدق انه صبور صبور من عمره 9 سنين تعلم أصعب دروس الحياة وهو فقد الأم وقبله الأب وانا والله مع البنات اللي يقولون أبو هوازن هو أبو عزام لكن كيف يعرف هذا مدري لكن عن طريق التحاليل الطبية والفحص DNA .. عزام راح نشوفك كيف تجيب رأس الشموس وانت قدها وتجيك وهي راضيه بعد بس مسألة وقت .. أما التهديدات اللي تجي نفسي اعرف مصدرها وفوقها يهددون عزام من جهه والشموس وليال من جهه ليش كل الطرفين وش الهدف .. الشموس زين عرفتي تتصرفين وتعتذرين من هوازن والله جد بهذلتيها في كلامك ونظراتك.
- هوزان مهند:
مدري كيف حالك اذا عرفتي أن عزام اخوك المهم داخله في مخي السالفة بس انتظر متى تنكشف الحقائق هههههههه والله يعوضك على صبرك ويرجع لك طفلك جدا متحمسه لحياتها الجديدة مع مهند حبها من نظرة والله يسعدهم مع بعض
انا انتظر مصدر التهديدات وانتظر وش راح يصير وخصوصا ليال اتوقع الموقف راح يجبرها على أشياء م تبيها مثلا زواجها من وليد عشان يغطون على الفضيحة شوي .. وبس والله انتظر البارت القادم بفارغ الصبر ويعطيك العافية رشا على الجمال اللي نشوفه كل مره واندهش من جماله كل بارت له طعمه وميزته الخاص وخفي علينا في القفله والله طمعانين بعد نبي شوي البارت يطول اذا قدرتي والله مقدرة ضروفك وحياتك وانشاغلك فيها وشكرا الف 💖
|
18-04-17, 07:43 PM
جديد مواضيع قسم القصص المكتمله من وحي قلم الاعضاء
العرض العادي
