كاتب الموضوع :
سحاب الود
المنتدى :
ارشيف خاص بالقصص غير المكتمله
رد: وكأن الأمس لم يكن.. رواية حصرية للكاتبة سحاب الود
الجزء الثامن
12 سنة
شوفي يا غلا، لا تقولي لي ماما وبابا وجدة وما ادري مين، انا ما يهمني احد في الحياة غيرك طيب! كل الناس اتخلوا عننا الا انت، انت اهم وحدة عندي، فلا تحاولي تقولي لي فكر في فلان وعلان، انتي تعبتي عشاننا وانتي تركتي كل شي عشاننا، خلاص جا دوري انا اشيل همك طيب!
حبيبي فارس... جايب لي عريس المفعوص! يبغاني اتزوج وارتاح على قولته ترى عمري بس 26 سنة لسة صغيرة وما شفت الدنيا زي ما يقولوا، حبيب قلبي ربي ما يحرمني منك.
يقول لي واحد معاه في الجامعة ، اخوه مهندس ومرتاحين اهل حسب ونسب وطيبين ومدحهم لليل، لكن انا مو في راسي زواج ابدا! ما راح اتزوج الين ارجع كل اللي انسرق مننا!!!
فلوس...
ممتلكات...
ام...
واب!!
12 سنة حقد ما تنطفي بسهولة بس عشان عريس الغفلة جاء على حصان ابيض! ما اعتقد يا فارس.. انا ما اشتغلت في هذا المستشفى هباء منثورا..
بالقوة قدرت ارجع ادرس لما سويت كل اللي طلبه مني عمو مروان " ولي أمري" غصب عني، بس الحمد لله قدرت ادرس وتخرجت ادارة اعمال وتوظفت في المستشفى قسم ادارة شؤوون مؤظفين، ليا الان سنة موظفة هنا والحمد لله شديت حيلي وبدأوا يعرفوا مين غلا!
ما راح ارمي كل شي عشان اتزوج وخلاص، ما انا بالقوة خليت جدة تستسلم وتبطل تجيب عرسان صحباتها العجايز، من بعد ما فشلتهم 3 مرات قدام اهل العريس، الحمد لله استوعبت وبطلت تحاول تزوجني.
كنت جالسة في البيت صباح يوم الاثنين مع فارس على الفطور، طبعا مالنا من الدنيا دي الا هذا البيت اللي (تكرموا) وعطونا هو (نسكن) فيه، بدل ما نسكن في الشارع ما شاء الله مرة قلبهم ابيض وطيبين على الاقل ما خلونا ننام في الشارع
فراس طبعا نظام يصحى اخر لحظة ويطلع على طول على الجامعة، كل واحد مننا مدبر نفسه مع صديق لان من فين لنا نجيب سيارات وسواقين، حتى مصروف شهري ما عندنا، الله يرحم ايام زمان ناكل ساندويش جبن واحد في اليوم قال ايش (كفاية عليكم) خايفين على رشاقتنا، بس الحمد لله كويس كلنا طلعنا رشيقين اجسام مرسومة رسم من ابداعات التجويع هذه!!
حسبي الله ونعم الوكيل...
- غلا
- حبيبي... قول
- والله اتكلم معاك جد، خلاص اتزوجي وارتاحي لا تشيلي همنا، ترى نحن رجال ندبر نفسنا بنفسنا، اقدر اشتغل بعد الجامعة في ماكدونالدز ولا ايش شي، واصرف على نفسي وفراس كمان قناة اليوتوب حقه تجيب له دخل كويس، انتي ما يحتاج تعتبي اكتر من كدا
- يا حبيب قلبي انتا، انت تعرف ردي لا تتعب نفسك
- غلا والله انه طيب وربي ! اعرف الولد واخوه شخصيا، طيب بس اتعرفي على اختهم وشوفي ايش يكون رايك
- يا فارس يا حبيبي، والله ما ابغى اتزوج، قد كدا انا هم على قلبك يا معفن!
- لا والله!!! اغلى ما عندي انتي!!
- طيب خلاص خليني براحتي ، لما ابغى اتزوج راح اقول لك جيب لي عريس ههههه كيف كدا كويس؟
- يا ربي!!! انا نفسي تتزوجي عشان ترتاحي ويكون عندك واحد يدلعك وينتبه لك!
- انتا دلعني وانتبه لي طيب!
- ابشري من عيوني!! ايش تبغي انتي بس قولي لي!!
- ابغى واحد دونات شوكولاته!
- ههههه بس!! ابشري اجيب لك بعد الدوام اليوم 2 مو واحد
- الله اكبر!! ايش الحب هذا كله، انتبه ترى اتعود وبعدين اصير دلوعة وتتعب
- ههههههه يا ريت تصيري دلوعة وتطلبي مني!! والله يوم المُنى اللي اشوفك جالسة ما تسوي شي وتأشري بيدك ويجيك اللي تبغيه!
- حبيبي، الله لا يحرمني منك انتا وفراس الدب اللي مو راضي يصحى!
عمره طويل الدب حقنا، هو يعني مو دب بس لما اقارنه بفارس يطلع دب هههههه حبيب فراس اول ما يشوفه اي انسان في العالم راح يعرف شخصيته، الدبدوب اللي دمه خفيف ما ياخذ شي بجديه كل شي ضحك وكركر وتريقة، لما اجلس معاه ما اقدر اتعب، جنوبي تعورني من الضحك، جعل ايامه كلها ضحك في ضحك حبيبي
- صباح الخير يا دبدوبي!
- صباح النور يا اختوتي
- حلوة دي هههههه
- يلا انا استاذن
- طيب خذ هذا الساندويش معاك يا خي اي شي ، اخاف تنحف وبعدين اتعب نفسيا انا اجلس اسمن فيك من جديد!!
- ههههه الا كدا، اخاف اللوك حقي يصير مرة لأة وع، وبناطيلي هذه ايش نسوي فيها اضطر اتخلص منها والبس ملابس فارس اووه نووو
- ههههههههه بس خذ هذا والعصير وروح يا دب
- اشوفكم في الليل، اسمعي غلا، ترى العريس اللي جايبه فارس لقطة والله، رجال والرجال قليل ! ما امزح يعجبني الرجال من الناس اللي يعتمد عليهم وفزعة وترى حلو سكسوكة و كدش
- كدش!!
- ههههه امزح، يمشط شعره على جنب زي رمضان السكري
- الله انا خقيت، لازم اشوف القميل دا
- ايوة اشبك، مرة شي يخقق!! هههههه بس من جد فكري في الموضوع جديا مو بس تقولي لا ما ابغى، انا صغيرة، انا مدري ايش ، طفشتينا نبغى نفرح ونبغى واحد نونو يقول خالو دبدوبي وزي كدا
- ههههههههههه خلاص نتزوج كلنا سوى عشان يصيروا البزورة قد بعض، مو كدا احسن
- يا سلام!!!! افكارك رائعة يا اختوتي، بس ترى ما اتزوج اي وحدة انا، انا ابغى ملكة جمال ، وتعرف تطبخ وموظفة راتبها فوق 20 الف، يصير هي تشتغل وانا اجلس العب بلاي ستيشن!
- الله الله الله... وهذه اجيبها من فين انا!! ادور لك وحدة مستعدة تتزوج عشان تربي زوجها بدل ما تربي عيالها يا لطيف ناوي تفشلنا قدام الناس!!!
- افا!!! ما تعرفي وحدة بهذه المواصفات؟ خلاص طيب بطلت اتزوج يلا بروح الجامعة باااااااااي
طلع هو من هنا، ووراه فارس ، وعدته افكر في الموضوع جديا، لكن الحقيقة راح اطنش الموضوع يومين كدا واقول له الاستخارة مو كويسة ههههه عذري الدائم، ادري ما راح يصدقني بس هو دا اللي عندي!
كلها خمس دقايق ودق جوالي
- يلا غلا انزلي
- عيون غلا انتي، يلا نازلة
- جيبي معاك قارورة موية بالله عطشانة
- بس يا عُلا يا بنت المليونير مروان ما عندكم موية في بيتكم!!! تخليني انا انزل لك موية
- اقول تجيبي لي موية ولا لا!
- الا اجيب لك بس لا تروحي وتسيبيني يا معفنة!
انا وعُلا نشتغل سوى في المستشفى، الحقيقة هي جابت لي الوظيفة الله يسعدها، بعد ما استولى ابوها الله لا يسامحه على ممتلكاتنا كلها رجعها من دبي وكأن شي لم يكن، وبعد التحذير والوعيد والكلام الفاضي تخرجنا كلنا من الجامعة وتوظفنا في المستشفى، هي في قسم الطب النفسي تشتغل مساعدة طبيب نفسي ، وانا في الادارة.
عُلا اتزوجت من قبل سنتين والحمد لله مرة مبسوطة في حياتها، ربي رزقها واحد ابن حلال عوضها ظلم ابوها ومرت ابوها الله لا يسامحهم، ايوة الله لا يسامحهم، بهدلوها بعد ما ماتت امها خالة حليمة الله يرحمها ، كانت لسة صغيرة واتزوج عمو مروان على اساس خالة ندى راح تربيها وتساعدها والكلام حق الافلام، طبعا مالها ومال البنت، كل ما صارت مصيبة قالت: هذه عُلا سوت وهذه عُلا غلطت! والمسكينة تتبهدل وتتلطش!!
بعد قصة حب دامت 3 سنوات اتقدم لها زوجها واتزوجت والحمد لله دحين عايشة معاه في حب وسعادة والله يديم عليها الحب والطمئنينة حبيبة قلبي تستاهل كل خير، هي الوحيدة اللي كانت تزور ماما وتطمن عليها اول ما اتنومت، وهي اللي كانت تجيب لي اخبارها الين اكتشفت خالة ندى وقالت لابوها اللي بهدلها!!
يعني ايش سوت؟ بس كانت تزورها ما كانت تعبي راسها افكار ضدهم ولا جابت سيرتهم اصلا كانت تزور ماما على انها طالبة !!
كان زمان...
دحين ما ندري ماما فين.. ولا اذا كانت عايشة ولا....
حتى جويرية اختفت من حياتنا قبل 9 سنوات، قالت انها راح تتزوج وخلاص ما تقدر تشتغل عندنا، ومن يومها ما سمعنا عنها شي..
ما ادري ... بس كل الناس اللي يعرفوا ماما ويفتكروها... خرجوا من حياتي!!
وفارس وفراس عندهم نقطة سودة كل ما اجيب سيرة ماما، هم كانوا صغار لما اختفت ماما من حياتنا، حسبي الله عليهم!! خلوها توقع على ورق وما قرأت شي من اللي مكتوب
( اتنازل عن جميع ممتلكاتي لزوجي ، ولأخ زوجي صاحب التوكيل العام الحرية في التصرف بهذه الممتلكات، واتنازل عن اطفالي غلا وفارس وفراس ليتم تربيتهم وراعيتهم في منزل جدتهم)
حسبي الله ونعم الوكيل، هذا تلخيص الكلام طبعا، هم خلوا المحامي يفبركها ويمطها على مدى 4 صفحات من الكلام الفاضي، ومن ضمن الكلام ( جميع الممتلكات تبقى تحت تصرف ولي الامر الى ان يصل الورثة الى سن الرشد)
ووصلنا سن الرشد وعدينا سن الرشد ولا شفنا ريال!!!
والله نحن ما كان يهمنا ريال!! بس مع البلاوي اللي شفناها والبهدلة اللي تبهدلناها، صار الريال هو الصديق، الريال هو اللي راح يكسرهم ويقوينا!!
كنت في الثانوية والجامعة اشتغل في كتابة البحوث للطلاب واعمل باور بوينت وتلاخيص مقابل مبلغ رمزي يعيشني انا واخواني، نجيب تكاليف الاكل والشرب، وادوات الدراسة، والحمد لله الان مع الوظيفة اقدر اعطي فارس وفراس مصروف شهري عشان يدبروا نفسهم اعرف تكاليف الجامعة اكثر من المدرسة، تشتري الكتب وطبعا تطبع محاضرات الدكتور، تكاليف عجيبة، هدفي هو اني اشتري سيارة عشان نرتاح، نتشارك فيها كلنا.
كل صباح تعدي عليا عُلا ونروح سوى الدوام مع سواقها
اوصلها لبوابتها واكمل انا لبوابتي ، انزل واطلع للدور الثاني عند مكتبي
مكتبي مكتب مشترك بيني وبين 4 موظفين ، واحد فلبيني ( محمد ابو انجل) ايوة فلبيني مسلم وبنته مسيمها انجل اللي هو ملاك، مرة كيوت البنت هذه دغبوجة مكلبظة تتاكل ما شاء الله عليها ، ما ادري كيف بس كل اطفال الفلبينيين كدا يجو دبدوبين كيوت هههه، شعرها لنص ظهرها ناعم طويل، وهي طولها عادي بس لانه دبدوبة تبين قصيرة، مرة احبها، دايما لما تجي تكون شايلة معاها عروسة، تجلس في مكتب ابوها اخر اليوم وتغني وتطربنا – صوتها مرة مو حلو هههه لكن والله تسلينا جدا-
المكتب اللي جنب مكتبي بالضبط، للجميلة هالة... هالة اكبر مني بتقريبا 6 سنوات وعندها خبرة 5 سنوات او اكثر، هي اللي علمتني كل شي، متزوجة وعندها بنت وولد، يجننوا مرة مؤدبين ومرة فصيحين ما شاءا لله احب اجلس اتناقش معاهم مرة جلسوا يحكوني ان الورق عبارة عن زبالة مضغوطة ويتم اعادة تصنيعها في المصانع والله مثقفين وانا اقول ان امهم السبب تحب تقرا واي شي يسألوا عنه تفتح لهم الانترنت و تطلع لهم فيديوهات يتعلموا منها، شي الانسانة هذه احبها مرة، وعيالها سند وسيدرة بينهم سنتين بس كأنهم توأم!
اخر مكتب كان لموظف استقال من تقريبا شهر، راح لوظيفة احسن وراتب احسن ما شاء الله ، واليوم راح يجي موظف جديد، يقولوا عنده 4 سنوات خبرة وكان يشتغل في وظيفة حكومية وتركهم، اول مرة اشوف واحد يترك وظيفة حكومية عشان ياخذ وظيفة في القطاع الخاص؟ بس يمكن الراتب احسن؟
- صباح الخير
- صباح النور والسرور
- كيف حالك يا هلهوووولة
- بخير الحمد لله، كيف حالك انتي
- الحمد لله، ايش هذا اللي في طرحتك؟
- فين؟
- هنا عند خدك في شي ابيض
- يا ربي يا سيدرة!!! كانت تاكل بسكوت في السيارة وقلك باستني قبل ما تنزل للمدرسة وبقايا البسكوت في طرحتي لازم يعني لازم
- ايوة هذه هي الامومة، خلاص لازم دايما تكوني مبهدلة! هههههه
- من جد والله ههههه
- ما جاء الموظف الجديد؟
- شفت واحد عند مكتب المدير ، يمكن راح يروح يكمل اوراقه ويعرفوه على المكان واخر شي يجي عندنا
- يمكن
شلت عبايتي وحطيتها في الدرج، جلست على مكتبي اللي عبارة عن عمل فني، عندي يمكن كل الجدار عبارة عن رسومات فراس والجدار الثاني صورنا مع بعض،
واخر صورة اتصورناها مع ماما قبل ما تختفي من حياتنا...
طبعا على قولة هالة( المكتب عبارة عن كولاج فني يتكلم عن حياة غلا المناضلة ) لكن انا احس انها عبارة عن احلى لحظات حياتي!
جلست وشغلت الكمبيوتر، وبديت اخلص اعمالي، شوية ودخل علينا المدير
( صباح الخير، احب اعرفكم على الموظف الجديد ، الاستاذ صقر ، راح يكون مكتبه هنا معاكم وان شاءا لله نستفيد من خبرته ونكون فريق ممتاز يخدم المستشفى)
لأول مرة في حياتي احس قلبي يطيح في بطني، بس بطريقة غريبة
مو اني خفت، ولا اني توترت، بس شي كدا بين الاثنين
لما جات عيني في عينه، ارتبكت!! اول مرة ارتبك!! انا غالبا اعتبر اي شخص امامي زيه زي فارس وفراس، اخواني كلهم، بس ما ادري... على طول لفيت وجهي لهالة وقلت اغبى شي في الوجود ( عندك منديل؟)
يا ربي!!! ايش التصريفة الغبية هذه!! ايش اللي عندك منديل!!غباء.. غباء!!
دخل المدير وجلس يعرف صقر علينا واحد واحد
وصل عندي وقال
( هذه غلا لها سنة معانا، ما شاءا لله من افضل الموظفات اللي عدو علينا، تتعلم بسرعة وعندها سرعة بديهة وجدا بروفشنال في شغلها، راح تستفيد منها كثير)
المدير يتكلم وانا عيني عليه وما لفيت ابدا للمدعو صقر.. وابتسم ابتسامه ما ادري من فين جبتها، واهز راسي كأني وحدة هبلة!! يا ربي مرة اتفشلت!!!
طلعوا من المكتب من هنا، وغرقت في الكرسي ، يا ربي!!
- اشبك!!
- هاه.. ما ادري
- بس يا بنت!! اشبك
- اوووص،، بعدين بعدين!!
- ههههههه اه يا قلبي ... عجبك ابو عيون رمادية هاه!
- ايش ، بس اسكتي لا تقولي كدا، انتي تعرفيني ما عندي حركات كدا
- ههههههه طيب ليه وجهك احمر واصفر وبرتقالي!!!
- يا ربي يا هالة ، خلاص اسكتي
- تبغي ابدل مكتبي معاه، اخليه جنبك هنا يا قميل
- ترى والله اطلع وما اجلس معاك يا هالة، خلاص
- طيب... طيب.. امزح ترى هههههههه
- طيب لا تمزحي، ها ها ها مرة يضحك
لفيت وعطيتها ظهري وانا قلبي يدق بسرعة مو طبيعية، طلعت جوالي ومن جد وجهي كان احمر، يفشل!!! اكيد هو كمان شاف وجهي كيف احمر!!
خرجت بسرعة ورحت للحمام اغسل وجهي وحاولت اهدأ وافكر في أي شي ثاني... بعد خمس دقايق طلعت من الحمام وانا احسب نفسي خلاص هديت
لقيت صقر في وجهي واتقلب وجهي مرة ثانية، لفيت وكنت ناوية ادخل الحمام ثاني الا اسمعه يناديني
- اخت غلا
- هاه... ايوة... هلا
- معليش اعذريني بس ضيعت المكتب ههههه ما ادري اي واحد، كلهم يتشابهوا، عندي نص ساعة قبل ما احتاج اطلع للاورينتيشن
- ايوة هذا مكتبنا هنا
عديت من جنبه بسرعة ومشيت او بالاصح جريت للمكتب، فتحت باب المكتب وقلت له اتفضل، جاء هو ومسك الباب وقال ( لا اتفضلي انتي الاول)
يا قلبي ايش دا... بس اهجدي يا غلا ايش عندك صرتي مرة متأثرة اووووف، اكره نفسي !!
هذاك اليوم كان اطول يوم في العالم، جلست في مكتبي مرتبكة جدا مو عارفة كيف اشتغل كل شي اسويه اعطيه لهالة عشان تراجعه ويطلع مليان اخطاء واعيده يمكن اول مرة في حياتي العملية اعيد معاملة 4 مرات!!
جات الساعة 12
وكعادتي كل يوم طلعت من المكتب
رحت لجناح د غرفة 56
دخلت للغرفة المظلمة، طبعا محد يفتح الستاير ولا يهتم فيه الا اذا جيت انا
فتحت الستاير وتركت الباب مفتوح عشان اغير الجو في الغرفة
لفيت لقيته زي ما هو...
زي ما كان امس..
زي ما كان من قبل 8 سنوات..
زي ما هو من يوم ما عرفت انه هنا..
نايم والانبوب يساعده على التنفس طالع من حلقه..
اياديه زي ما هي ممدودة على جنبه...
جلست جنبه وبست راسه
( حبيبي... اليوم شفت واحد عيونه نفس عيونك... بابا... كيف حالك اليوم؟)
نهاية الجزء الثامن
|
23-02-16, 01:45 PM
.
جديد مواضيع قسم ارشيف خاص بالقصص غير المكتمله
العرض العادي
