هذا الجزء عشان مملكة الغيوم!
حمستيني وكتبت الجزء الخامس اليوم!
ان شااء الله تعجبكم!
:danci ngmonkeyff8:
:dancingmonk eyff8:
الجزء الخامس
جويرية
ضميري مأنبني جدا !! ما ادري كيف اتصرف.. نفسي اجلس وافضفض كل شي لمدام غالية نفسي اجلس معاها واتكلم واتكلم الى ان يرتاح ضميري!!
لكن...
امي...
امي، تحتاج اني اسكت... امي تحتاج علاج.. واذا تكلمت وفضحت الموضوع كله راح ينقطع عنها علاجها، وانا ما اقدر اتحمل تكلفة علاجها.. اه ه ه والله قلبي بيتقطع من جواتي ومرة مسبب لي ارق الموضوع هذا!!
انا عارفة لو اكلم امي واقول لها الحقيقة، راح تلعني وتضربني وتسبني وكل شي وتجبرني اقول لمدام غالية كل الموضوع، لكن...
انا كمان عندي اولويات..
امي قبل الكل...
امي تاج راسي واغلى ما املك!
مالي في الدنيا الا امي! من بعد ما اتوفى ابوي الله يرحمه من 10 سنوات وهي بتكرف عشاني، اشتغلت واشتغلت في صحتها الى مرضها.. الروماتزم اتعبنها اصابعها اللي اصابها التشوه والالم الشديد اللي يجيها وهي بتكوي ثياب رجال البيت ، وتطبخ وجباتهم وتغسل حماماتهم، والله ما يهون عليا الان احرمها من العلاج!
كيف انكر جميلها، اشتعلت وعملتني، عندي شهادة ثانوية لان امي اشتغلت وارسلتني للمدرسة، كانت تقول ( العلم سلاحك يا بنتي) لكن انا رفضت اكمل بعد الثانوية، مع ان العم عمر – زوج المدام غالية- اتكفل بتكاليف دراستي كاملة تقديرا منه لأمي، بس مع تدهور حالتها الصحية راح اكون منتهى الانانية لو اروح ادرس واترك امي تغسل حمامات!!!
تركت كل شي عشانها، واسأل الله يعوضني الخير يا رب!!
خياراتي محدودة...
يا اسكت واعمل عمية... وتتعالج امي
يا اتكلم وافتح الموضوع بكبره... وينقطع عنها العلاج!
ما عندي الشجاعة اني اتكلم.. اللي قدرت عليه اني اكتب لمدام غالية رسالة
والله كتبتها وانا الرعب يمشي في عروقي.. والخوف ينبط مكان قلبي
لكن اعتبرتها اضعف الايمان...
اللي بيحصل قدامي ما يرضي لا صديق ولا عدو..
والله ان العم عمر والمدام غالية ما قصروا معايا انا والوالدة ابدا!!!
اقل شي اقدر اسويه اني المح لها باللي اعرفه.. شي يخليها تحذر
عدى على وجود المدام غالية في البيت 3 ايام، خلال هذه الفترة ما جات غلا للبيت الا مرة واحدة، بعد كدا زادت الرقابة عليها، وخوفا عليها وعلى امها حذرتها ما تطلع من البيت ولا تجي لعند امها الين يهدى الوضع، اخاف يحصل شي وتنحرم من امها للابد..
انا ما اتخيل احد يرحمني من نبع الحنان!
ما ابغى تنحرم من ام واب...
كفاية الشهرين اللي عدو عليهم زي الايتام.. مظلومين ومحرومين!!
صحيت وضبطت الفطور للأولاد فارس وفراس، وجهزت وجبة المدرسة.. وكنت ناوية اطلع لعند المدام غالية عشان اضبط لها فطورها.. لكن قبل ما اطلع.. نادتني امي ( جدة غلا ) الشخص الوحيد اللي اضطر اناديه امي مع انها مو من قلبي لكن مضطرة
- سمي امي .. كيف اقدر اخدمك
- فين رايحة؟
- لعند المدام غالية
- جهزتي فطور العيال
- ايوة كله جاهز ووجباتهم المدرسة جاهزة
- طيب.. لا تطولي عندها
- ان شاء الله ، اي شي ثاني امي؟
- اسمعي... باقي اسبوع... بعد الاسبوع نرتاح ، هو اسبوع وامك تضمن علاجها في مدينة سلطان، علاج اللي وعدك بيه مروان ولدي، تتنوم لمدة شهرين على حسابنا، بس انتي فمك هذا لا تفتحيه ولا تزل منك كلمة ولا والله لأطردك انت وامك في الشارع!!
- لا والله... فضلك فوق راسي يا امي.. الله يخليك ويجعله في ميزان حسناتك
- انتبهي والله ان عرفت انك قلتي لغالية شي كدا ولا كدا والله راح تندمي ندم حياتك
- ما يحتاج تحذريني ، فمي مقفل ولا راح انطق بشي، انا اروح لها اطبخ واطلع ولا اتكلم معاها.. صدقيني!!
- كويس.. يلا روحي بسرعة وتعالي، جايينا ضيوف ابغاك تضبطي القهوة والحلى والاشياء هذه
- ابشري...
طلعت من البيت وانا قلبي على يدي، خايفة انفضح ولا من الرعب اقول شي مفروض ما اقوله، يا ربي سامحني، انا ما كذبت، انا ما قلت بلساني... انا كتبت بيدي...
نزلت من العمارة ورحت للعمارة الثانية
طلعت لشقة المدام غالية
فتحت الباب ودخلت
لقيت المدام غالية جالسة في الصالة تنتظرني.. وجهها يقول انها ما نامت من امس
- جويرية!! تعالي تعالي
- ايوة يا مدام
- تأخرتي اليوم ، صار لك شي؟
- لا لا .. عادي.. تحتاجي شي؟
- لا بس مو عادتك اليوم اللي فاتو بتجي على الوقت بالضبط.. افتقدتك..
- اسفة يا مدام.. دحين اضبط لك فطور
- لا خلاص انا اكلت
- اكلتي؟
- ايوة تعالي بس تعالي هنا.. اقفلي الباب وتعالي
قفلت الباب من ورايا ورحت جلست معاها في الصالة
- جويرية... ابغى اسألك كم سؤال وانتي لا تتكلمي... بس هزي راسك يا ايوة يا لا طيب
- طيب
- في شي تبغي تقولي لي هو لكن ما تقدري
- (هزيت راسي ايوة)
- الموضوع يهمني انا وعيالي صح
- ( هزيت راسي ايوة)
- لو قلتي لي ايش هو راح يكون في عواقب صعبة صح
- (هزيت راسي ايوة... وبدت دموعي تنهمر)
- لا تبكي يا جويرية... خلاص ما يحتاج... لما يكون الوقت مناسب ان شاءا لله ربي راح يشوف طريقة ويعلمني بالموضوع كامل
يا الله يا رب... بطيبة قلب الانسانة هذه رد كيد الكائدين في نحورهم
والله ما تستاهل الظلم هذا..
ما عاملتني الا بالطيب ..
وما عمرها عاملتني كعاملة في المنزل او اقل من بناتها.. بتعاملني زيي زي غلا.. كانت تشتري لغلا وتشتري لي معاها.. والله في العيد تجيب لغلا طقم ذهب وما تنساني تجيب لي معاها اسورة ولا حلق ولا خاتم ذهب!!
وانا مجرد بنت خادمة المنزل!!
كريمة ولطيفة وبنت اصول.. متواضعة وراقية في تعاملها!
حتى لما انخطبت تكلفت بتكاليف الملكة وكل شي.. صحيح ما صار في نصيب.. ورفضت اتزوج لان امي تحتاجني اكثر من اي شي.. لكن مجرد انها عرضت عليا تتحمل تكاليف كل شي يقول عنها الكثير..
جلست على الكرسي وانا اشاور نفسي
باقي اسبوع... اسبوع يا جويرية...
7 ايام بس وتتعالج امي في افضل مكان في السعودية..
راح ترتاح وشهرين كاملة من العلاجات المكثفة اللي تحتاجها..
بعد هذه السبع ايام.. راح اتكلم..
لكن الان احتاج اسكت ..
لازم اضغط على نفسي..
لازم اسكت عشان امي!
رفعت عيوني ولقيت المدام غالية مبتسمه.. وتحاول انها تغير الموضوع
- كيف عيالي اليوم؟
- الحمد لله فارس وفراس طلعوا للمدرسة، عندهم رحلة اليوم لكن ما اتذكر على فين
- حلو.. خليهم ينبسطوا حبايبي .. وغلا؟
- غلا ما زالت تحت المراقبة، اليوم اللي جات فيه هنا فتح شكوك، و السايق وحارس العمارة صاروا يتسألوا يوميا عن مين طلع ومين دخل للعمارة.. الوضع ما يطمن
- خير...خير..
- والله لو اقدر ، والله اجيبها لك ، والله!!
- يا عمري يا جويرية... عارفة..
- اليوم في عزيمة في البيت، جايين ضيوف للبيت، يمكن تقدر تطلع وتجيك اليوم
- والله!! تتوقعي؟ نفسي والله نفسي..
- بحاول .. يمكن ينشغلوا في العزيمة وتقدر هي تطلع، هي جدتها غالبا تعمل العزايم هذه ويجوا زميلاتها وجاراتها يتقهووا عندها، وغالبا تطلع غلا وتقابل عُلا او صحباتها وكدا..
- دقيقة.. عُلا ... عُلا مين؟
- عُلا بنت عمها.. بنت العم مروان..
- اها.. مجرد تشابه اسماء... عرفت بنت في المستشفى اسمها عُلا عبد الجبار.. تذكرتها
- عُلا مروان عبد الجبار؟ بنت عمها.. الاسم الكامل
- ايش!! متأكدة انتي؟!!!
- عُلا عبد الجبار.. كتكوتة كدا صغيرة.. تدرس علم نفس؟
- ايوة.. هي جاتك المستشفى؟
- يا الله... يا الله... عُلا طلعت ... طلعت تعرفني!!!
- مدام غالية... عُلا جاتك المستشفى... متأكدة!! هي نفسها عٌلا؟؟
- اقول لك تدرس علم نفس؟ ما عندي لها صورة ولا اعرف اوصفها بس يعني اتوقع هي!
قمت بسرعة ورحت لغرفة غلا، على تسريحتها في صورة لها هي وعُلا سوى ورجعت لمدام غالية بسرعة
- هذه هي؟
- ايوة!!! هذه عُلا!!
- يا ويلي!!! يا ويلي!!! ابوها يقتلها لو دري .. ابوها يقتلها!!!
- ليه؟
- يا الله.. يا رب ما يكون عرف.. يا رب ما يكون عرف!!!
- اتوقع عرف
- ايش!!!!
- جاني واحد المستشفى ودخل يسب ويلعن ويهدد لو شفتها تاني يقتلنا ومن الكلام هذا، انا ما عرفته لكن اتوقع انه ابوها
- يا ويلي!!! يا ويلي!!! وانا اقول ليه عُلا اختفت!! ما اتوقع انها في دبي!!!
- ايش!؟
- قبل كم اسبوع جاء العم مروان واخذ عُلا وقالوا للجميع انها طالعة دبي عندها كورس تدريبي او شي كدا ، ورجع العم مروان بدونها، يا ويلي... يا ويلي!!!
- يا بنت اهجدي شوية.. فهمني!!! ايش ممكن يسوي فيها يعني!! بنته اكيد يخاف عليها
- اه يا مدام غالية... ما تعرفيه، ما تعرفيه، يا الله يا عُلا... ايش صار لها.. يا رب تكون بخير!!
- خوفتيني يا جويرية... ايش ممكن يسوي.. يعني ممكن من جد ... يقتلها!
- يا ويلي ... يا ويلي !!!
وقفت وصرت امشي في دواير... ايش اقول .. ايش اسوي!!!
اكيد اتبهدلت.. اكيد بهدلها.. يا الله... مسكينة عُلا...
انا مفروض ما اتدخل.. لكن... لكن ما تستاهل !!!
كل اللي سوته هو انها زارت مدام غالية... ما ادري هي في دبي ولا في القبر!!!
استأذنت من مدام غالية ورجعت للبيت
وانا مرعوووووبة اذا عُلا اختفت بدون مقدمات، انا لو عرفوا اني حذرت مدام غالية برسالة يمكن يدفنوني مع امي!!
دخلت البيت وانا عقلي مو معايا..
رحت للمطبخ وبشكل تلقائي حطيت القهوة وبديت اجهز الحلويات
سمعت صوت الجدة تناديني
رحت لها جري
- جويرية يا صنجة ياللي ما تسمعي فينك!!!!!
- هنا... هنا..
- طولتي عند غالية... ليه؟!!! ما قلت لك لا تطولي جايينا ضيوف ما تفهمي انتي؟!!!
- اسفة.. بس عشان احتجت اغسل لها الحمام وكان السرير يبغاله
- بس اووووووص... بسرعة روحي ضبطي القهوة والحلى، وفي تمور وكيك جبته من برى حطيه في صحون التقديم، وكلمي غلا تتجهز
- غلا؟
- ايوة خليها تلبس الفستان الجديد اللي اشترته لها مرت عمها الاحمر، بعد ما ترجع من الكوفير، اسمعي اقول لك.. حطي الحلى والبسي عبايتك عشان تروحي معاها الكوفيرة
- كوفيرة.. ليه؟
- وانتي ايش دخلك يا بنت!!! انتي تسمعي انا ايش اقول لك وبس
- اسفة... ابشري الان اضبطته والبس
- كدا نص ساعة تكوني جاهزة
- ابشري
رجعت للمطبخ وانا مربوكة كدا، ايش دخل غلا تلبس وتروح كوفيرة، يا ربي ، انا وعدت المدام غالية اني احاول اخلي غلا تجيها... دحين مستحيل تقدر تروح لها، يا ربي .. يا ريتني ما وعدتها!
لبست عبايتي وجلست في المطبخ انتظر القهوة تضبط..
شوية ودخلت غلا.. واشرت لي عشان اطلع معاها، ضبطت القهوة في الدلال والفناجين وتاكد ان كل شي جاهز، استأذنا من الجدة وطلعنا
في السيارة كانت غلا متضايقة مرة، وكأن في غيمة سوداء على راسها
- جويرية.. شفتي امي اليوم
- ايوة دوبي كنت عندها من تقريبا ساعة
- تعرف هي ولا ما تعرف؟
- تعرف ايش؟ انا والله ما قلت لها شي، والله ما فتحت فمي والله!!!
- بالله تسكتي يا جويرية... مالي بإتفاقك مع جدتي.. انا قصدي هي تعرف عن اليوم؟
- والله يا غلا ما ادري ايش اقول لك، انا ما ادري ايش بيصير اليوم!
- اليوم جايين ناس يخطبوني..
- الله!!! مبروووووك!! الله يتمم لك على خير
- بالله انك تسكتي!!!
- ليه!! ما تبغي؟
- جويرية!! واحد عمره 30 عجوووووز وع!!! واضح داخلين على طمع ، جدة قلك تعرف امه ولانها تعرفها معناته الولد طيب ،وخلاص لازم اوافق!! ليه!!! ليه اتزوج ترى انا ما خلصت مدرسة!!! انا ما ابغى!!! ما ابغى!!! ولو ابغى اتزوج ليه اتزوج واحد اكبر مني بمليون سنة!!! حرام والله حرام
حبيبتي غلا نزلت دموعها واحمر وجهها، ما قدرت اتكلم.. حسيت ان في هذه اللحظة ما ينفع الا الصمت التام
وصلنا للكوفيرة ونحن في هدوء تام
نزلنا وكأننا داخلين للجحيم واليوم محكوم على غلا بالموت!
كانت مرت عمها (ندى) اللي تكفلت بكل شي، حجزت عند الكوفيرة و الحساب مدفوع بس اللي علينا انها تدخل تجلس على الكرسي ويركبوا لها وراس جديد
الحق ينقال.. غلا من اجمل البنات اللي شفتهم في حياتي جمالها ناعم وجذابة ما شاء الله طالعة على امها والله..
لكن الكوفيرة افترت فيها، حطت لها مكياج ثقيل والتسريحة كبرتها عشر سنوات
كل ما سألت غلا شي ، قالت لها بكيفك سوي اي شي...
في الحقيقة لما خلصت الكوفيرة، لقيت وحدة جديدة قدامي، غلا بعد 10 سنوات
مكياجها مرة ثقيل كأنها من مسلسل كويتي
وشعرها عاملين لها تسريحة السبعينات كعكة ما ادري ليه..
تجرأت وسألت... ( هي غلا طلبت التسريحة هذه ولا كيف.؟)
الصدمة جاتني لما قالت الكوفيرة انو اللي حجزت الموعد طلبت هذه الاشياء بالتفصيل... المكياج والتسريحة وكل شي !!
طيب ليه يا مدام ندى؟ حرام عليك.. مرة كبرتيها!!
بس انا مالي كلمة وما لي دخل، وواضح ان غلا استسلمت ومالها خلق تتكلم، صار المسيرة غير مخيرة في حياتها، اذا قالوا لها يمين حتروح يمين.. اذا قالوا لها يسار حتروح يسار!!
حبيبتي تحتاج امها!!!
تحتاج احد ينقذها.. صغيرة على البهدلة هذه!!!
ما تقدر تتكلم ولا تقول شي، الكل مقفل عليها ومجبرها، ما عندها سند ولا عندها احد يوقف معاها ضدهم!!
رجعنا للبيت ودخلنا لقينا الضيوف وصلوا
دخلت غلا لغرفتها بسرعة وغيرت ملابسها للفستان الاحمر اللي برضو اختارته مرت عمها ندى..
وانا رحت للمطبخ وصبيت العصيرات وقدمتها للضيوف
وحدة ست كبيرة، لابسة جلابية فخمة ورافعة شعرها في كعكة مشابهة لكعكة غلا!
معاها بنت، اتوقع بنتها، لابسة فستان اسود ضيق طويل، وشعرها طويل الى فخذها ما شاء الله لامته على جنب.. وكانت مدام ندى وطبعا جدة غلا موجودين معاهم
رجعت للمطبخ وجلست افكر..
موقفها مرة صعب.. ما تقدر ترفض ومجبورة توافق، لو رفضت راح تتبدهل وتتبهدل امها واخوانها معاها، وان وافق راح تنتهي حياتها اللي تعرفها!
يا قلبي يا غلا الله ينجيك من المصيبة هذه
بعد تقريبا ساعة ونص، جات مدام ندى وقالت لي اروح لغرفة غلا عشان تطلع
ووصتي اقول لها لما تسلم على ام العريس تبوس راسها
معليش يا مدام ندى، غلا هذه متربية احسن تربية ما يحتاج تعلميها كيف تتصرف.. لكن خلاص مضطرة اوصل الكلام
رحت لغرفة غلا دقيت الباب
دخلت لقيت غلا ... مسحت المكياج، وفكت شعرها..
خففت المكياج، وتركت شعرها مفتوح
والله كدا احلى مليون مرة !!!
- الله يا غلا ايش الحلاوة دي ما شاءا لله ما شاءا لله قريتي المعوذات!
- اسكتي يا جويرية مرة قرفت من شكلي، ترى شلت المكياج وغيرت شعري مو عشان اعجب ام العريس، ضبطت نفسي عشان اعجب نفسي!!! حسيت نفسي قد جدتي
- هههههه قمر يا بنت الغالية
- ايش تبغي ، جا الوقت صح، يبغوني اطلع
- اي وتقول لك مرت عمك لا تنسي تبوسي راس ام العريس
- بالله!!! بس عشانها قالت كدا ماني بايسة راس احد غير جدتي!! وخليها تتكلم!!
- لا يا غلا دحين تحسب انا اللي نسيت اقول لك
- مالك صلاح انتي ، هي تبغى تتفلسف تجي تكلمني!! طفشت انا خلاص!!
طلعت غلا من الغرفة وتوجهت للمجلس، جلست انا في المطبخ احاول اني استرق السمع والقط اي شي مفيد..
سمعت صوت ام العريس ( ما شاء الله تبارك الله... ما شاءا لله ... الله يحفظك.. ما شاءا لله)
طبعا.. احد يشوف غلا ويقول عنها شي تاني!!
جلست غلا مع ام العريس تقريبا ربع ساعة بس، الا قالت الام ( ما شاء الله عليك يا غلا انا متأكدة ان ولدي راح يتجنن عليك، يلا يا ام عمر بالله نخلي العريس يدخل)
هنا قامت المدام ندى ودخلت للصالة جوى، وطلبت مني الجدة اجيب لها الطرحة والعباية
دخل العريس وانا طاح قلبي!!
يا ويلي !! يا ويلي!!!
ايش دا!!!
هذا عمره 30 ولا 60!! حرام عليكم يا مجرمين!!!
كان طويل، ولابس ثوب ابيض وشماغ لكن باين ان شعره ابيض!! وحتى ذقنه فيه شعر ابيض!!! والبصمة السعودية ( الكرشة ) !! يا مجرمين ياللي ما تخافوا الله!!!
كأنو جدها !!!
ريحة العود واصلة للمطبخ، جلس مقابلها جنب والدته
لابس نظارة وفي يده مسواك، الله اكبر يا حركات!!
وباين على غلا الخوف وعيونها في الارض
فجأة اتكلم العريس
- سلام عليكم
- وعليكم... السلام
- كيف حالك
- (هزت راسها)
- وانا كمان طيب..
- (سكوووووت)
- تدرسي.. ولا خلصتي؟
- ( سكووووووووووت)
- تتكلمي؟
- (تضحك من تحت لتحت)
- كويس معناته تسمعي على الاقل
هو في الحقيقة شكله دمه خفيف، لكن برضو لا لا لا لا لا !!!!!!
فجأة اسمع صوت حاجة تتكسر طلعت من المطبخ شي لا ارادي
لقيت غلا واقفة والعريس واقف والصحون مكسرة في النص بينهم
ورجلها تنزف، اتوقع ان الصحن طالح عليها
جريت ومعايا مناديل، احاول امسح رجلها ابغى اعرف الدم من فين، رفعت عيني لقيت وجهها احمر وعيونها غارقة في الدموع كنت ابغى امسكها واخذها لغرفتها لكن ... ما اقدر..
شوية سمعت صوت الجدة
( جويرية... خذيها لغرفتها..)
بسرعة مسكت يدها واخذتها لغرفتها..
جلستها على طرف السرير ورحت للحمام جبت منشفة مبللة
وجلست امسح رجلها عشان اطمن عليها، كانت جروح سطحية الحمد لله وما في اي زجاج في الجروح..
( جويرية... ابغى امي!!)
كسرت قلبي ...
حتى انا ابغى امي يا غلا...
ايش اسوي!!!
نهاية الجزء الخامس
10-02-16, 12:29 PM
رد: وكأن الأمس لم يكن.. رواية حصرية للكاتبة سحاب الود
جديد مواضيع قسم ارشيف خاص بالقصص غير المكتمله
العرض العادي
