كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
أتعالت أصوات الرجال بإشمئزاز وكل واحد يطالع في الثاني بقرف بعد لحظات من جلوسهم عالسفره وبعد ماتخطوا الصدمه الأولى بدأوا تعليقات الإستهزاء والشماته وسط ضحكهم عالبنات وطبخهم، طالع فيهم الجد بإبتسامه/اللي ماعجبكم خلوه وكلوا شي ثاني خير الله واجد والحمدلله.
مشعل بإنتصار/النتيجه صارت واضحه وحنا اللي فزنا.
أبوسند/لاتستعجل بعدنا في أول لقمه.
وضاح بضحكه/والله يبه مساعد إذا هذي أولها ينعرف تاليها.
الجد بتفكير/الحين كلوا بالعافيه وبعدها بنقرر.
هزوا رأسهم بموافقه ورجعوا يأكلوا وهم مستمرين في الحش والتعليق
،
،
أما عند البنات فالوضع ماكان أحسن بالعكس كان أسوء بكثير.
الجده بإستنكار/وش ذا الأكل حسبي الله ونعم الوكيل فيكن من بنات كان فشلتونا ، من اللي سوت الجريش والمرقوق.
ردت ثريا بعدم إستيعاب/أنا يمه وديمه بس والله ماكان كذا!
ألتفتت لصافي برجاء/صافي أنتي ذقتيه معايا قبل لانطلع من المطبخ قوليلهم.
صافي بموافقه/أيه يمه ذقناه وكان زين.
الجده بغضب/وين الزين يامال العافيه والأكل كله ملح يذبح، تبون تموتنا!
ذاقت ثريا الأكل مره ثانيه ومسحت فمها وبقهر/يمه والله كان مضبوط ومافيه شي هذي موبأول مره أطبخ علشان أحط الملح ذا كله.
مهره بتفكير/الوحده يمكن يزيد عليها الملح شي بسيط بس موبهالكثر هالزياده موبطبيعيه.
أم سند بضيق/أجل منو اللي متلقف وحاط هالملح كله وخرب الأكل.
أتوجهت أنظار الكل لرؤى اللي طالعتهم بصدمه/شفيكم تناظروني أنا مالي شغل.
ديما بإتهام/أنتي الوحيده اللي قعدتي تحوسي في المطبخ وتتلقفي في كل شي.
وقفت بغيض/ أنا حطيت بهارات بس وثريا ذاقت الأكل وقتها ولو كان مالح كان قالت صح ولا لايا ثريا.
أخذت ثريا نفس وبهدوء/أنا دخلت لما نادتني روعه وبعدها ذقت الأكل وفعلاً كان مافيه شي
الجازي/أجل من اللي حط الملح ومتى إذا حنا غارفين الأكل بعدها على طول!
جوري بتفكير/ثريا ذاقته وكان مزبوط وبعدها كلنا طلعنا من المطبخ لأن الرجال دخلوا حطوا عشاهم وبعدها رجعنا المطبخ نقرب الأكل و----
قاطعتها رؤى بعدم تصديق / قصدك إن الرجال هم اللي خربوا أكلنا وورطوني.
شهقوا البنات بصدمه وطالعتها جوري بهدوء/أنا ماقلت كذا، أنا قصدي إن الملح إنحط في الفتره اللي طلعنا فيها من المطبخ واللي كانت تقريباً لعشر دقايق وذي الفتره اللي دخلوا فيها الرجال.
ثريا بضيق/يعني هم اللي حطوه لإن محد دخل بعدنا غيرهم.
جوري بتفكير/مو شرط، لإن مابين خروجنا ودخولهم كان في فرصه لأي حد إنه يدخل يكب الملح في القدور ويطلع بدون محد يحس.
ديما بغيض/هم الرجال مافي غيرهم واللي مايبونا نفوز عليهم.
وتين بتأييد/أكيد هم أصلاً من غيرهم له مصلحه في تخريب أكلنا وتلقوهم الحين متشققين من الوناسه.
العنود/الإنذال كل هذا علشان يفوزون.
مها بشك/معقول يسووها!
صافي بهدوء/وش يسووا أنتي الثانيه بعد، الحين من جدكم راجح ووضاح يسووا شغل البزران ذا.
ديما بغيض/لاتدافعين عن رجلك بعدين يمكن واحد من اللي جابوا الأكل معاهم موبشرط وضاح وراجح.
مهره بثقه/مدام وضاح وراجح معاهم مارح يسمحوا لهم بهالشي.
جوري بإبتسامه/أنتوا أيشبكم مكبرينها كذا وكأن مافي شي ثاني ينأكل، الحمدلله في برياني ومشاوي وسلطات أيش تبغوا كمان.
الجده بهدوء/الله يديمها نعمه بس فشلتونا مع أم خالد وفاطمه.. السموحه منكم ياجماعه وحياكم عالموجود.
أم خالد بإبتسامه/الله يحييكي ياخاله ومسموحين وماعليكم قصور وكفيتوا وفيتوا وبعدين أحنا أهل وأخوات زي ماقالت منيره ومابينا ذي الحاجات.
جوري بضحكه/بعدين ياجده أمي تحب حقي البرياني وماتقدر تقاومه وممكن تأك----
قاطعتها شذى بخبث/لاتكوني أنتي اللي مخربه أكل ثريا علشان يمدحوا طبخك.
ردت بإبتسامه/أحد قلك بقدم على وظيفة طباخه عند جدي صقر وقاعده أزبط نفسي!
شذى بإتهام/إنزين محد فيكم سأل نفسه ليه أكل ثريا بس هو اللي ملحه زاد فجأه وأكلك أنتي لا مع إن البرياني كان جنب المرقوق، ولا أنا بس اللي إنتبهت بهالشي.
ثريا بغضب/شذى أتعشي وأنتي ساكته ترى مانيب ناقصتك الحين.
جوري بإبتسامه/بس أنا دخلت المطبخ ورؤى وروعه وديما معايا وحطينا الأكل وطلعنا لإن الرجال جوا بعدنا يعني ماكان عندي فرصه أخرب أي شي، حاولي مره ثانيه يمكن تفلحي.
سكتت الجده شذى قبل ماترد ورجعوا يكلموا أكلهم والبنات يتحسروا على حلمهم الضايع في الفوز.
،
،
،
بعد العشاء كانوا البنات في قمة إحباطهم خاصة بعد ماذاقوا أكل الرجال اللي كان ممتاز بدايةً من كبسة راجح ووضاح للمشاوي والسلطات وبعد ماكل وحده دق عليها أخوها أو زوجها وقعد يحش ويتمسخر عليها وهم بيتأكلوا من الغيض والقهر، ومع إن عبدالرحمن طنش جوري وماكلمها إلا إنه مؤيد قام بالواجب ومافوت على نفسه فرصة الحش ورفع ضغطها وبعدها دخلت المطبخ مع ثريا ومها وسووا كنافه وقدموها للرجال مع التشيز كيك اللي كانت عاملته وأتجمعوا البنات حول القهوه والحلا بمرحهم المعتاد ونفسيتهم أحسن من قبل.
أما عند الرجال فالوضع كالمعتاد أكل وحش في البنات، مشعل بتفكير/ البنات هذول عليهم حركات الله يجيرنا بس
طالعهم مؤيد بعدم فهم وبلع سيف اللقمه ورد بضحكه/لاتستغرب على بالك مسوين حلا ومدلعينا لله! لا ياحبيبي هذي ترقيعة.
هز ناصر رأسه بموافقه/ترقيعه واضحه بس زودت شكي الأول.
بندر بشماته/ يبون يغطون خيبتهم في العشاء وعلى بالهم بيحطوا الحلا بداله.
مشعل بحده/يعقبون حنا فزنا وإنتهينا والحلا أساساً موبداخل في التحدي.
عبدالرحمن بإبتسامه/ماشاء الله عليكم قررتوا وفوزتوا نفسكم وجدي عاده مانطق.
طالعه وضاح بضحكه/ أنت وسند أبدعتوا في المشاوي والسلطات وكبستي أنا وراجح ماتحتاج شهاده لكن هم أكلهم كله ملح وراحت عليهم وفوزنا الحمدلله مضمون.
شمؤيد بلعانه/بس لاتنسى إن مشاويهم كمان كانت ممتازه والبرياني ماشاء الله أتمسح مسح أتشطب ياحبيبي.
مشعل بشك/ترى أنا للحين موبمصدق إنهم سووا البرياني حاس إنها الشغاله.
سلمان بتفكير/لا وكملوها بالتشيز كيك والكنافه بصراحه هالسالفه ماأنبلعت معاي.
سند بإبتسامه/الحق عليهم اللي تاعبين نفسهم وأتذكروكم في الحلا.
ناصر بهمس/أنت ماتأكل حلا علشان كذا موبفاهم ذا مستحيل بناتنا يسووه، أكيد ياالشغاله ياأم صقر ولا أم سعود مسويته لهم.
دخل الجد وأولاده وقطعوا كلامهم وألتفتوا كلهم ناحيته بحماس وهم منتظرين الحكم اللي حلموا فيه طول الليل، أبوسند بأمر/بدر وسعود وصقر وبتال أجمعوا لي كل االجوالات وهاتوها هنا.
طالعوا في بعض بإستغراب وكل واحد سلم جواله العيال اللي جمعوها وحطوها عند الجد اللي جمسك جواله وأتصل على ثريا وهو يطالعهم بهدوء/السلام عليكم..... فكي هالجوال علشان الكل يسمعني..... السلام عليكم جميع...... عساكم بخير بعد هالعشوه......
ضحكوا الشباب بإستمتاع وهم يتخيلوا منظر البنات والجد يتابع/طبعاً موبمحتاج أقلكم إن نص عشاكم ماضبط وهالشي موبصالحكم.......لكن..
ترك جملتها معلقه وطالع في الشباب اللي سكتوا فجأه وأتعلقت عيونهم بيه قبل مايتابع/الشباب كان شويهم وسلطاتهم ممتازه و --
قاطعته صرخة حماس طلعت من مشعل بدون مايحس قبل مايسحبها مؤيد ويجلسه، تابع الجد بإبتسامه/ لكن كبستهم ماهيب ذاك الزود وحقكم البرياني والمشويات كانت ممتازه وغطت النقص في عشاكم........ يعني أتعادلتوا وبنسوي مسابقه والفريق اللي بيفوز فيها يعتبر الفايز في التحدي شقلتوا موافقين؟...... أجمعوا كل االجوالات عند أم مساعد وممنوع أحد يستخدم غير هالجوال وقت اللي يرد علي......بقلكم لغز والفريق اللي يعرف جوابه بالأول هو الفايز........ أنا موافق وباقي اسأل الشباب وش رأيهم.
طالع فيهم بإبتسامه/وضاح وسند وراجح وش رأيكم في اللي سمعتوه؟
هزوا رأسهم بموافقه وألتفت للبقيه/وأنتوا؟
طالعوا في بعض بضيق لكن موافقة سند وراجح ووضاح ماتركت لهم مجال علشان يرفضوا ووافقوا مجبورين. إبتسم الجد برضى/بما إنكم وافقتوا فالبنات لهم شرط.
شاهين بتكشيره/بعد فيها شروط!
سند بهدوء/إنزين وش شرطهم!
الجد بإبتسامه/شرطهم إن فازوا تنفذوا لهم طلبهم بدون نقاش ومهما كان وبيقولوه وقتها.
وضاح بإستمتاع/هذا لي فازوا.
مشعل بإستنكار/لا أنا موبموافق وش اللي ننفذ بدون نقاش.
سيف بقلق/وش يضمنا وش بيطلبون.. أنا بعد موبموافق.
بندر بتأييد/أنا بعد موبمرتاح لشرطهم.
راجح بإستفزاز/أفااا شوية بنات يخوفوكم يالمخفات..
مؤيد بسخريه/ترى الشرط يمشي عالفريقين ياعباقره يعني إحتمال أحنا اللي نحط رجل على رجل ونتشرط عليهم ولا أنتوا مو واثقين في نفسكم.
طالعوه بغيض وهو يرقص لهم حواجبه بإستفزاز، الجد بإبتسامه/يعني أتصل بالبنات وأقلهم الشباب خايفين من التحدي.
صرخوا بصوت واحد/لاااااا.
سند بإبتسامه/أجل قلهم موافقين ويبشروا بسعدهم.
تابع الجد كلامه في الجوال/والشباب موافقين على شرطكم....... إنزين ومثل شرطي قبل الأمهات مالهن دخل ولا يساعدن بشي.. أسمعوا وش بقول واللي يسبق بالجواب له الشرط..
ياويش بنتاً يوم نادت بالأطلال عنها وقف جمعاً وعنها درى جيل!
نادت نداء واللي سمع بس رجال..منها عجوب والقول مافيه تبديل!
بنتاً تبين بشمس وتبين بظلال..وتأصل مكان ماتجيه الرجاجيل!!
سكتت الجد واتأمل وجوه الشباب اللي طالعوا في بعض بحيره ورجع عاد اللغز على مسامعهم مره ثانيه..
ياويش بنتاً يوم نادت بالأطلال عنها وقف جمعاً وعنها درى جيل!
نادت نداء واللي سمع بس رجال..منها عجوب والقول مافيه تبديل!
بنتاً تبين بشمس وتبين بظلال..وتأصل مكان ماتجيه الرجاجيل!!
عند الحريم الوضع كان غير عن الشباب، كانوا متحمسين للغز اللي ممكن يرد لهم كرامتهم اللي أهدرت عالعشاء وكانوا يتمنوا يحلوه خاصة بعد كل الحش والتهزيئ الي سمعوه من الشباب وبمجرد ماقال الجد اللغز كونوا دائره في الأرض وأجتمعوا فيها وبدأوا يحللوا ويفسروا ويتبادلوا التحليلات بجديه ماعدا جوري اللي وقفت وبدأت تمشي وتدور كعادتها كل ماكانت تفكر وقطعت الصاله بالطول والعرض وهي تردد اللغز بصوت مسموع/
ياويش بنتاً يوم نادت بالأطلال عنها وقف جمعاً وعنها درى جيل!
نادت نداء واللي سمع بس رجال..منها عجوب والقول مافيه تبديل!
بنتاً تبين بشمس وتبين بظلال..وتأصل مكان ماتجيه الرجاجيل!!
غمضت عيونها وأخذت نفس عميق وهي تفكر في معنى الأبيات ومرت فتره وهي ترددها لنفسها مره وأثنين وثلاثه و
عرفته عرفته عرفته...
ألتفتوا للبنات لجوري اللي صرخت بذي الكلمه وصارت تقفز وتصرخ بحماس في الصاله وجريوا عليها وسحبوها للجده اللي الجوال قدامها عالطاوله، جلست جنب رجول الجده ومسكت الجوال وبضحكه/جدي عرفت الحل عرفته.
الجد/حيا الله الأميره هدي شوي وسمعيني جوابك.
جوري بإبتسامه عريضه/السلام عليكم والله يحييك ويبقيك ياأحلى جد في الدنيا والسموحه منك عالدخله الشمال بس أتحمست شويه.. والجواب نملة سليمان عليه السلام.
الجد بضحكه/وعليكم السلام ورحمة الله وبركاته وصادقه يالنتفه شلون عرفتيها هذي.
أتعالت صرخات للبنات وضحكهم وصاروا كلهم يقفزوا في الصاله بفرح وحماس وهم يحشوا الشباب ويشمتوا فيهم، وتابع الجد /إنزين مدام سبقتوا بالجواب الشرط من حقكم، وش طلبكم!
ردت بشقاوه/نتشاور وأرد لك خبر.
الجد/خذوا راحتكم.
قفلت وهجموا عليها البنات بالأحضان والبوسات وبعد ماهديت موجة الضحك والكلام اللي نصه مومفهوم بسبب السرعه والحماس، رؤى بضحكة شماته/بطلب من مشعل يوديني السوق لمدة شهر.
ديما بغيض/وأنا بخليه يوافق على سفري كل مكان لين وقت الزواج.
العنود/ وأنا بخلي محمد يعلمني السواقه.
وبدأت كل وحده تقول اللي في خاطرها لين قاطعتهم جوري بملل/مالت عليكم قروشتوا أهلي وبنفوز ونفوز علشان في الأخير تطلبوا الطلبات الضعيفه ذي!
ديما بغيض/وش وبينا نسوي، خل ينفذون طلباتنا غصباً عنهم ونبرد حرتنا شوي.
طالعتهم بغموض/واللي يأخذلكم حقكم من الرجال ويشفي غلكم من اللي عملوه اليوم فيكم ويرد لهم الصاع صاعين!
سكتوا كلهم وهزوا روسهم بموافقه وطالعوها بترقب وحماس وهي تأشر لهم يقربوا منها علشان جدتها ماتسمع اللي هتقوله لإنها أكيد بتعارض وإحتمال تكسر العصى على رأسها، همست لهم بفكرتها وإبتسمت برضى وهي تسمع صراخهم الحماسي وراحت أخذت الجوال من جدتها اللي سألتها بشك/وش عندكم مع ذا الصراخ الله يسمعنا خير!
ردت بإبتسامه/وأحنا يجي من ورانا غيره ياجده، بس بنقول لجدي طلبنا وحق الناس للناس.
أم سند/وش بتطلبون!
جوري بمكر/لا معليش مقدر أقول لكن وقت ماينفذوا بتعرفوا وياخبر النهارده بفلوس بكره يبئ ببلاش.
سحبتها الجده وجلستها جنبها/وش ناويه عليه يالعوبا هالكشره اللي شاقه وجهك ماتطمن.
طالعتها جوري وببرائه/الله يسامحك ياجده لذي الدرجه مافي ثقه، بعدين إبتسامتي الحلوه ذي تسميها كشره.
ألتفتت لأم سند وبتنهيده/شفتي جده كيف ظالمتني يمه ومخليتني شريره و--
قاطعتها الجده بسخريه/خل عنك الكهن، مابقى غير تنزل دموعك أربع أربع يابنت صالح.. أنطقي وش بتقولين لجدك لاتمسين الليله مكسوره.
شهقت جوري بصدمه/أنا كهينه ياجده!أنا أصلاً ماأعرف الكهن.. بعدين أنتي ليه واقفتلي عالوحده ومحسستني إنك طبينتي هاااا !!
صرخت بألم ونطت من الكنبه وهي تفرك ذراعها اللي أكل ضربه محترمه من عصى الجده وهي تكلمها بغيض/طبينتك ياللي ماتستحين شايفتني ندى!
جوري ببرطمه/ بسم الله عليها ندى وهي تجي حاجه جنبك، أقلك خذي الجوال ماعد أبغاه.
ألتفتت لثريا بغيض/هاتي جوالي بدل الذل ذا.
رمت لها ثريا الجوال وبسخريه/تستاهلين يالعوبا.
جوري بإبتسامه/مابلاش أنتي ياحراميه.
وراحت الصاله الثانيه وهي تنادي البنات علشان يلحقوها
.
،
،
قفل الجد مع جوري وطالع في وجوه الشباب المصدومه من اللي سمعوه، وبإبتسامه/مثل ماسمعتوا البنات حلوا اللغز قبلكم يعني فازوا عليكم والحين بيفكروا في طلبهم وبيردوا يكلمونا.
طالعوا في بعض بعدم تصديق وكل واحد فيهم بيتسأل، مشعل بإستنكار/شلون حلوه بهالسرعه أكيد غشوا.
بندر بتأييد/أكيد أحد ساعدهم.
مؤيد بضحكه/اللي مايطول العنب، الله يعينكم عالشروط عندي إحساس إن عيونكم بتطلع اليوم.
ناصر بضيق/أنا الشروط موبهامتني أنا شايل هم الشماته الحين.
محمد بتفكير/ياترى وش بيطلبون البنات.
مال وضاح على سند بهمس/بعد هذاك الحش مالومهم لو طلعوهم من المزرعه عرايا.
سند بإبتسامه/موبهالدرجه.
راجح بضحكه /واللي شافوه منهم قليل، مهره قالت البنات بغوا يبكون من كثر القهر والحين فرصتهم والله يجيرنا من كيد النسا.
ساد صمت مفاجئ لما رن الجوال ورد الجد عليه وأتوسعت إبتسامتك وأتحولت لضحكه عاليه قبل مايقفل ويطالعهم، أتعلقت به عيون الكل وهم منتظرين اللي هيقوله بحذر وترقب، الجد بإبتسامه/البنات يبون يبدلوا الأماكن.
وضاح بإستفسار/شلون يعني مافهمت!
الجد بشرح/بتتبادلون الأماكن معاهم، يعني الليله البنات بيباتون في هالقسم قسم الرجال ولمدة يوم كامل رح يستخدموه بكل اللي فيه وأنتوا رح تنتقلون لقسمهم قسم الحريم وتبقون فيه ليوم كامل.
أتعالت صرخات الشباب المستنكره المصدومه/شوو!!
سيف بعصبيه/يعقبون قال يجون قسمنا ونأخذ قسمهم.
مشعل بحده/ اللي مايستحون وش هالطلب!
ناصر بضيق/يبه أنت أكيد مارح توافق على حكيهم الفاضي!
الجد بهدوء/أقصر الحكي أنت وياه، أنا ماأعطيتهم كلمتي لأجل أرد فيها.
رد سند/ماعاش من يرد كلمتك يبه.
وألتفت لهم ببرود/هو كان حكي رجال يوم وافقنا على شرطهم ولاحكي بزران!
شاهين بهدوء/ ماقلنا شي ياخوي لكن هم طلبهم مو بمعقول.
سلمان بتأييد/أنت مستوعب إنهم يبونا نطلع من قسمنا ونأخذ قسمهم.
سيف بضيق/ بنات ما عندهم سالفه وماينعطون وجه، عيب عليهم.
سند ببرود/عيب عليهم! لكن مو بعيب عليكم تردوا في كلامكم وأنتوا كل واحد فيكم شواربه تارسه وجهه!
أحمرت وجوههم من الإحراج ورد بندر بإرتباك/حنا ماردينا في كلامنا بس هم بعد طلبهم صعب و---
قاطعه سند ببرود/الرجال تنربط من لسانها فخلكم قد الحكي اللي قلتوه ولا تطولوها وهي قصيره.
هزوا رأسهم بموافقه وتابع بأمر/ أجل قدامكم ساعه تلمون أغراضكم وتخلون هالقسم قبل مايجون البنات وأنا أول واحد بلم أغراضي وأطلع من هنا.
أستئذن من جده والكبار وطلع وترك الشباب يطالعوا بعض بخجل وقهر.
|
19-08-16, 08:36 AM
جديد مواضيع قسم القصص المهجورة والغير مكتملة
العرض العادي
