شدت على اسنانها بقهر وهي تدف رجل رؤى من بطنها للمره الثالثه في أقل من ربع ساعه, اتعدلت في جلستها ومسحت وجهها وهي تستعيذ بالله من الشيطان اللي قاعد يوسوس لها تكب جك مويا بارده على رؤى وتخرب عليها نومتها زي ماخربت نومتها,ابتسمت لما شافت فراش جوري ومافيه غير نادين اللي ظلت نايمه في حضنها طول الليل وبهمس\ مهما عرفتك بتظلي دوم تفاجئيني ياجوري.
طردت النعاس من عيونها وقفت بحماس عالأقل بيجلسوا لوحدهم وتقدر تسألها على سالفة الدكتور فهد براحتها وبدون تدخلات من البنات.
قامت غيرت ملابسها بجينز بيج وبلوزه عشبيه ناعمه وأخذت جوالها وطلعت تدور على جوري , ولما مالقيتها في المطبخ راحت الحومر في بالها أخوها سند اللي رفض يبات معاهم وفضل يرد بيتهم اللي في جده رغم أصرار جدها وأبوها عليه وذحين أكيد صحي وقاعد لحاله والأحسن يجي يقعد معاهم ويغير جو طالعت في جوالها واتشجعت واتصلت عليه وزي ما أتوقعت رد بسرعه\ياصباح الخير.
ابتسمت\ ياصباح الورد, عسى ماقعدتك من النوم؟
سند\ لا حبيبتي قاعد من بدري.. أنتي اللي وش مقعدك هالحزه.
اتمشت بهدوء\الجو حلو وقلت اتمشى شوي.
سند\ وش هالنشاط , موعوايدك تمشين بهالوقت.
ضحكت بخفه\ الواحد عوايده تتغير اذا لقي اللي يغيرها له وحب هالتغيير.
فلتت منه تنهيده\ زين اللي قدرتي تغيريها وبعد مستانسه.
وقفت مكانها بقلق\ سند فيك شيئ قلي ياخوي فضفض وارتاح.
سند\مافيني شيئ لاتخافي بس مال شوي ومانمت زين.
راحت جهة المسبح واتنهدت براحه\ انزين ليه ماتجي الحين وتفطر مع ابوي وجدي والشباب وتتسلى معهم.
سند\ وين أجي يابنت الحلال تلقين الناس نايمه الحين.
ابتسمت واتلفتت تدور جوري \ عن الاستهبال ياسند أنت تدري أن ذي قعدت أبوي صقر وأبوي بعد الفجروماعاد بعدها نوم.
زفر بضيق\ مادري أحس شكلي بايخ وأنا جاي من صباح الله خير أطق باب الأستراحه.
ردت باصرار\ لابايخ ولاشيئ , تدري ريحة القهوه اليمنيه واصله لعندي وتلقى أبوي وجدي الحين مكيفين عليها وطايحين سواليف مع عبدالرحمن, أنت بس تعال استانس علشاني ياسند تكفى ياخوي.
سند بتردد\ انننزين---
شهقت بقوه واتوسعت عيونها بصدمه عالمسبح وب صراخ\
جورررررررررررري
,
,
,
خرجت من غرفة أختها أحلام وهي موشايفه قدامها بعد ماسمعت منها اللي صار في شوفتها من شويه, كانت الدنيا مو واسعتها من الفرحه , أخيرا أحلام وافقت تشوف يزن دكتور التاريخ وزميلها في الجامعه, وبعد وقفه دامت ربع ساعه عالباب دخلت أخيرا مع علي وماكملت عشر دقايق الا وهي طالعه ووجهها بيتقطع من الاحراج, وبعد تحقيق جوري معاها لنص ساعه حست انها معجبه فيه ومرتاحه له, صدمت في شخص قدامها ورفعت رأسها بأعتذار\ اسفه ماأنتبهت.
صاحت بحماس لما شافت زوجة صدام\ أهلين سميه, كيفك حبيبتي.
سميه \ الحمدلله على كل حال.
سلمت عليها ببرود استغربته جوري وللحظه ظنت انها بتتخيل من شدة حماسها وفرحتها بأحلام , وتابعت بمرح\ سبحان الله أمس قلت لصدام يجيبك علشان أشوفك واليوم القاكي في وجهي.. ربي يسعده ماقصر.
سميه بحقد\ ماتوقعتش من بين كل الناس تفعلي بي هكذا ياجوري.
طالعت فيها جوري باستغراب\ أيش سويت ياسميه؟
سميه بعصبيه\ خلاص مافيش داعي تمثلي.. اظهري على حقيقتش ياناكرة العيش والملح ياخاينة العشره, خلاص علشان أتطلقتي وبيتش خرب تشتي تخربي بيتي, أنا أيش فعلت بش علشان تجازيني هكذا.
طالعت فيها بذهول\ أخرب بيتك!! أنتي شاربه شيئ ياسميه, بطلي صياح وكلميني بالهداوه علشان افهم ايش بتقولي.
سميه بحقد\ عاد لك عين تكذبي في وجهي بعد ماطعنتيني في ظهري وشليتي صدام مني ومن عياله.. خلاص كملوا الرجال وماعاد في الا زوجي تتزوجيه يابنت ا--
مدت جوري يدها وكتمت فم سميه بقوه وقطعت كلامها بغضب\كلمه زياده ياسميه وهتتمني لو ماعرفتيني في حياتك, وأبويا ماتجيبي سيرته على لسانك انتي فاهمه.
دفتها وطالعت فيها بحده\ وصدام ذا أابن خالي واخويا الكبير وعيب اللي تلمحي له .
صاحت فيها سميه لما مشيت وتركتها وراها \ من وين أخوش ومن وين خطبش ومنتظر موافقتش.
لفت عليها وسحبتها من يدها ولأول غرفه شافتها وقفلت الباب وبعصبيه\خطبني!! مين اللي كذب عليك بذا الكلام وصدقتيه ياهبلا .
سميه بحده\انتي اللي جالسه تكذبي عليا, تشتيني اصدقش وما القاش الا داخله بيتي معه, تشتي تفهميني انك مش داريه انه يحبش من وانتي صغيره وانش مش داريه انه كان يشتي يخطبش بس انتي اتزوجتي بغيره.
طالعت فيها بعدم استيعاب وسميه مستمره في سيل الكلام اللي ماسمعت منه ولا حرف, كانت مصدومه وفي دنيا غير الدنيا "صدام كان يحبني ويبغى يتزوجني"
اتذكرت كلامه معاها أمس ومالقت فيه شيئ غريب الا .......
نظرات معاذ اللي ماعرفت تفسرها وقتها.
فتحت الباب وطلعت من الغرفه بدون ماتهتم لسميه وكلامها وأخذتها رجولها عالسطح بدون ما تحس, أنزوت في ركن وكلام سميه بينعاد عليها بايقاع بطيئ..
صدام يحبني!!
كيف وليه!!
من يوم ماعرفته وهوا بالنسبه ليا زي علي ومعاذ, لا ..هوا كان يخاصمني على خرجتي الشارع أكثر منهم وكم مره ضربني لأني كنت أروح البقاله من وراه بعد مامنعني .. صدام اللي اشتري لي حجاب وقال أنا كبرت ومايجوز كل من هب ودب يشوف شعري .. صدام اللي كان يعصب كل مايشوفني العب في الحاره مع العيال.. صدام !!
صدام اللي كنت أغير منه لأنه على طول مع علي وبيشوفه اكثر مني ,وماكنت أخلي فرصه تمر عليه بدون ماارفع ضغطه واجننه.. كيف يحبني وأنا كنت مكرهته في عيشته زمان.. كيف يحبني وأنا طفله.. كيف يحبني وأنا أخته !!
اذا قدرتي تهربي مني وين تهربي من عقاب أرحم الراحمين.
ماتدري كم مرعليها وهي في وضعها ذاك ,رفعت رأسها وقابلت وجه سميه الحقود, لا.. ذي مو سميه!! ذي وحده ثانيه ماتعرفها.. ملامحها بتنطق بالحقد والكره اللي انعكس على صوتها بوضوح.
غمضت عيونها للحظات وأخذت نفس وطالعت في سميه ببرود\ شوفي يابنت الناس, أنا ماسويت شيئ غلط علشان أهرب منك, وحتى اذا غلطت فمو أنا اللي أهرب.. أنا جوري ياسميه وأنتي عارفه مين هيا جوري.
اتخصرت وطالعت فيها بحقد\ لاتفرحيش باخوتش واهلش اللي حولش, أنتي رحتي ولاجيتي مره مطلقه والله العالم ليش ط
قاطعتها جوري ببرود\ ثمني كلامك قبل ماتقوليه لأن بيطير فيه رقاب, وأخواني وأهلي اللي مو عاجبينك اسيادك وتاج رأسك وأنتي بكلك ماتسوي شعره من اصغر واحد في الجابر.. واذا سكت عن كلامك الوقح وسبتك وخرجت فذا من أدبي اللي مخليني اعذرك وأقدر اللي أنتي فيه, بس زي غيرك فهمتي أدبي ضعف وقمتي تتطاولي وتقلي أدبك..
صاحت بعصبيه \ ايوووه اضحكي عليا بهذي الكلمتين, لاتحسبي اني صدقتش , أنا داريه ان عينش منه, أصلا من المجنونه اللي تفلته من يدها..لكن انا بحذرش من الان والله لاجننش واكرهش الحياه لو وافقتي عليه.
طالعت فيها للحظات قبل تكلمها ببرود\ أنا عن جد ماكنت عارفه عن خطوبة صدام ليا وحتى بعد ماهعرف ماكنت هوافق, بس بعد كلامك ذا بديت أغير رأيي.
بحلقت عيونها بصدمه\ أيش قصدش؟
دارت حول سميه ونقرت بأصابعها على خدها بتفكير \ قصدي أن معاكي حق, مين المجنونه اللي يخطبها صدام وترفضه.. أخلاق ورجوله وشخصيه ومركز وسمعه..
وقفت فجأه وطالعت فيها بابتسامه حلوه\ ولا تنسي أنه ابن خالي ومن صغري وأنا معاه, وفوق ذا كله يحبني من زمان ومستني مني أشاره..
شحب وجه سميه فجأه وبلعت ريقها بصعوبه واضحه, وتابعت جوري بتنهيده\ وين هلاقي واحد بالمواصفات ذي, أنتي عارفه أنا كنت حابه اسمه ودايما أقله أحلى شيئ فيك هوا أن أسمك صدام حسين لأني من المعجبين فيه, وسبحان الله الظاهر هيكون بينا أكثر من مجرد أعجاب بالأسم.
سميه برجفه\ بس أنتي قلتي أنه مثل أخوش ,مش هذا كلامش من شويه, ليش غيرتي رأيش ذحين؟
ضحكت باستفزاز\ لأنك من الناس اللي تزن على خراب عشها , قلت لك أخويا ومابينا الأفكار المريضه اللي في رأسك ماعجبك الكلام وقلتي كذابه وقليتي أدبك !! وخلاص أنا ذحين حطيت الموضوع في رأسي وأنتي أتحملي نتيجة تصرفاتك.
فجأه انتفضت بقوه وغطس رأسها تحت المويه وحست بثقل فوقها للحظات قبل ما تصارع علشان تطلع عالسطح مره ثانيه, ضربت المويا بيديها بقوه ورفعت رأسها وكحت بقوه قبل ماتأخذ نفس عميق وبعده نفس وبعده نفس وهي تحاول تستوعب اللي صار.
بعد لحظات اتضحت الرؤيه قدامها وشافت ثريا, كانت تبكي بصراخ من بين دموعها وهي ماسكتها من كتوفها بقوه \ مجنونه, حيوانه,غبيه.
مسحت المويا عن وجهها ولمست ثريا بخوف\ ثريا أيشبك, حبيبتي أيش فيه ليه تبكي؟
دفت ثريا يدها بقوه وبصراخ\ ظنيتك.. غرقتي.. ظنيتك.. موتي.
وانخرطت في بكاء هستيري وجوري تطالعها بعدم فهم لدقايق ,
فجأه شهقت بصدمه لما استوعبت اللي صار, ثريا تفكرانها ماتعرف تسبح , لا كل البنات مفكرين انها ماتعرف تسبح, وثريا لما شافتها في المسبح افتكرتها غرقت و
جوري جوري,أيش فيه يابنت؟
التفتت بسرعه لما سمعت صراخ عبدالرحمن المتوتر جنب الباب الفاصل بين قسم الرجال وقسم الحريم , وفجأه رجعت لها الكحه من جديد وبنفس مقطوع\ حبيبي مافي شيئ.. كله تمام.. روح بعدين افهمك.
سكت للحظات وبعدها صاح بغضب\ كيف مافي شيئ وصياحكم واصل للرجال,من اللي صاح وليه؟
أخذت نفس وبصوت مبحوح\ عبادي قلت لك مافي شيئ مجرد سوء تفاهم, خلاص بعدين أكلمك روح البنات هنا.
سمعت وقع خطواته الغاضبه لما راح وألتفتت لثريا اللي سبحت لحافة المسبح ومكمله بكاء, سبحت لين عندها ورفعت وجهها وبأسف\ ياعمري ياثريا وربي أسفه ماقصدي أخوفك أنا كنت أسبح.
طالعت فيها بصدمه\ كنتي تسبحي!!
سمعوا صوت عكاز الجده والتفتوا لقيوها جايه مع أمها منيره وأم وضاح وصافي وغنى اللي يجروا,غطت جوري وجهها بكفوفها وبهمس\ ياحبيبي كملت.
رفعت رأسها وأشرت لهم بيدها بمرح\ هلا والله بالصبايا أيش رأيكم تأخذوا دش بارد معانا.
الجده بقلق\ وش ذا الصياح, شفيكم يابناتي.
طالعت فيهم ثريا ورجعت تبكي بقهر, أم سند بخوف\ يمه ثريا شصاير, ليه تصيحين ؟
لأني غرقت
طالعوا في جوري اللي نطقت بذي الكلمه ورجعت عادتها باحراج\ تحسبني ماأعرف أسبح وأفتكرتني غرفت .
صافي \ الله يهديكي ياثريا طيحتي قلوبنا.
صاحت ثريا بقهرمن بين دموعها\ أنا اللي قلبي طاح ووقف موبنتوا.
عضت جوري شفايفها بندم\ ثريا صدقيني ماقصدي أخوفك , حبيبتي معليش سامحيني.
أم سند باستغراب\ بس أنتي ماتعرفين تسبحين ولا أنا غلطانه.
غنى بضحكه\ لا ياخاله مش غلطانه, بس هي لا لبست العوامات ودخلت الماء تنقلب زي السمكه وتسبح أحسن منها.
الجده بعصبيه\ أنتي ماتجوزين يالجوري, عجزت افهمك وأنتي مافيكي طب. جوري بهدوء\ حقك عليا ياجده أنا غلطانه سامحيني.
وألتفتت لغنى \و انتي ياغنى مو وقت ظرافتك.
مسحت أم سند على شعر ثريا بحنان\ خلص يمه لاتصيحين شوفيها زينه والحمدلله, ويلا طلعي أنت وياها بتمرضون, انا موبعارفه وش نزلكم المسبح بهالبرد.. الشمس مابعد اشرقت.
طالعت فيهم جوري بهدوء\ طيب أنتوا روحوا وأحنا بنلحقكم .
خف بكاء ثريا وأتحول لشهقات خفيفه ومسحت دموعها وبعد دخلوا كلهم التفتت لجوري بحده\ الحين فهميني وش هالجنان اللي سويتيه.
طالعت فيها جوري ببراءه\أنا !! بسم الله عليا من الجنان.
ضربت ثريا سطح المويا بعصبيه\ جوري ترى بذبحك ومحد رادني عنك اليوم, وش تسوين بالمسبح؟
انقلبت جوري على ظهرها وصارت تسبح باستمتاع\ كنت طفشانه وجيعانه وانتوا نايمين قلت أنزل أصيد سمك للفطور.
ثريا بغيض\جورررري.
طالعت فيها بمرح\ ياعيون وقلب جوري.
شدت ثريا على اسنانها بغيض\ أنتي وش طينتك بس ابعرف, أحر ماعندي أبرد ماعندك, وقفتي قلبي ولاعلى بالك ..وش هالبرود؟
قربت منها \ سلامة قلبك ياعمري, الحق عليا ابغى اضحكك بدل الدموع اللي بكيتيها.
ثريا بزعل\ الدموع ذي انتي السبب فيها انا ظنيتك غرقتي يالخبلا.
أشرت على العوامات اللي في ذراعها بابتسامه\ وذول ايش وظيفتهم.
انتبهت ثريا للعوامات وبعتاب\ تظنين أني وقت اللي شفتك بذاك المنظر بنتبه للعوامات, أنا كنت أدور عليكي وفجأه شفتك في المسبح طافيه وانخلع قلبي ناديت عليكي ولما مارديتي ظنيتك غرقتي ورميت حالي في المسبح.
سكتت للحظات وبهدوء\ كنتي بتنقذيني ياثريا؟
طالعت فيها ثريا بصدمه\ شلون تسألي هالسؤال, لايكون ظنيتي أني بتركك وأروح يالمجنونه؟
ماردت عليها ورشت شوية مويا على وجهها وطلعت من المسبح بصمت, لحقتها ثريا بقلق\ جوري شفيكي, حبيبتي لاتخوفيني ليه ساكته.
شالت العوامات وحطت على كتفها منشفه وشالت الطاقيه من رأسها وبهدوء\ مافيا شي بس أنا من جد كنت سرحانه وماسمعتك, اسفه ماكان قصدي أخوفك ياثريا, أنا شفتكم نايمين قلت فرصه أسبح براحتي قبل الزحمه.. وبما أنكم صحيتوا فالأحسن أني أدخل أجهز الفطور.
راحت لثريا وغطتها بروب الحمام حقها وجلستها وشالت جوالها المرمي على الأرض وكل قطعه في جهه بهدوء\ فوق الرعب اللي عشتيه بسببي يمكن جوالك كمان انكسر.
شهقت ثريا لما أتذكرت سند اللي كان معاها عالخط, طالعت فيها جوري وأنتبهت لرجفتها الواضحه وظنتها بسبب البرد.. طالعت حولها وأخذت نفس عميق.. كانت الشمس شرقت ونورها الخفيف غمر المكان بس ماغير من برودة الجو, سحبت ثريا ووقفتها بشويش\ أجلي أي عتاب لبعدين وأدخلي وغيري ملابسك لاتمرضي من تحت رأسي .
هزت رأسها بمواقفه واتمسكت في يدها بقوه ودخلوا سوا.
,
,
,
11-05-16, 01:53 PM
رد: خريف الحب / للكاتبة خياله،،والخيل عشقي
جديد مواضيع قسم القصص المهجورة والغير مكتملة
العرض العادي
