كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
عالساعة 9:30 المساء كانوا واصلين على الشقة المفروشة اللي حجزها عبدالرحمن.. وبعد ماأطمن إن ساره وصلت راح مع قصي يلفوا في الشوارع لحد مايخلصوا البنات.
جوري استقبلت ساره بالأحضان والضحك من جهتها بينما كانت الدموع والبكاء من جهة ساره،وصلوا البنات اللي حجزتهم ساره
من المشغل وبدأوا يتجهزوا،األتفتت جوري لمزنه اللي هتعمل شعرها وورتها صورة تسريحه في جوالها،وبإحراج/معليش أطلب حاجه بسيطه إذا ماأضايقك.
مزنه/آمري ياقلبي.
إبتسمت/مايأمر عليكي ظالم،شوفي يا عسل إذا تقدري تعملي شعري بدون ماتحطي عليه علبة أسبريه كامله هتكون شاكره من أعماق قلبي.
مزنه بضحكه/حبيبتي لازم الفير والإسبريه وباقي الشغلات علشان تثبت التسريحة..
جوري برجاء/ربي يسعدك يا شيخه حاولي، في حياتي كلها حطيته مره في زواجي وماحبيته.. وباقي الشغلات ماأحتاجها..أنا مختاره ذي التسريحة بالذات لإني حاستها مو محتاجه فير..أنا ماأحب ألعب في شعري بالحاجات ذي ..حاولي رجاءً.
ساره بضيق/ جوري مره اتأخرنا متى بنخلص وأنتي قاعده تتشرطي كذا.
رندا/لاتخافي مدام المكياج مابيأخذ مني وقت،وبنبدأ في شعرك على طول.
بدأت مزنه في شعر جوري بإعجاب/ ماشاء الله علشان كذا شعرك روعه وصحي.. خلاص أبشري بحاول قد ما أقدر.
جوري بإمتنان/الله يبشرك بالجنة تسلمي يا قلبي.
ساره بقهر/الحين ليه ماتسوي مكياج زي الناس،موكفايه نظارتك ذي اللي مو راضيه تشيليها.
جوري بضحكه/أنتي هبلا يا بنت،وكيف أشوف العالم لما أشيلها..بعدين أحس المكياج مايركب عاالنظاره.
رندا/ليه ماتلبسي عدسات طبيه أحلى من النظاره.
ساره بعصبيه/معقده بعيد عنك..
جوري بلكاعه/يختي عيوني وبكيفي.. أنا معقده وماعندي مشكله..ليه حارقه رزك.
ساره بضيق/جوري عن السماجه الزايده وخليها تسوي لك مكياج.
وأستمروا في نقارهم لين راحوا للقصر.
~~~~~~~~~~
نزلت جوري وياسمين وانتظرت ساره اللي لحقتهم مع سواقها لحد ما نزلت من سيارتها ومشوا مع عبدالرحمن لحد بوابة الحريم،عبدالرحمن بهدوء/أتصل لعم مساعد يجينا بدل الإحراج.
جوري بهمس/لاتخرب حقي المفاجأة .. هوا قال إنه بيسيب أسمي مع الموظف أكيد مانسي..ولا تقول ذا كان قبل رجلي وباقي حكايتك..أبويا مارح ينسى..استنى وبتشوف طالعت في الحريم اللي بيعطوا بطايقهم
للموظف اللي عالباب وبعد مادخلوا اتقدمت مع قصي اللي سلم عالموظف وبأدب/عائلة الجابر لو سمحت.
رد السلام وطالع في في الكشف قدامه وبإحترام/ياهلا ..اتفضلوا .
لفت جوري لعبدالرحمن وأشرت له بإنتصار ودخلت مع البنات، شالت غطاها وقفازها وفسخت عبايتها بعد ماساعدتها ساره وأعطتها لياسمين اللي ودت عبيهم لمسؤولة العبايات.
ساره همست لها/قلتي لي ذي ملكة بيت مين.
وقفت جوري قدام المرايه وهي تعدل فستانها بإبتسامه/مساعد صقر..صاحب أبويا.
ساره بنفس الهمس/وش لقبهم ياغبيه..
جوري بلامبالاة/مدري ما قد سألته..ليه؟
ساره بجديه/موشايفه القصر..ذا من أفخم قصور الرياض..وإيجار الليله فيه يكلف ثروة.
ياسمين بإعجاب/ماشاء الله يجنن..أحلى من اللي في جده.
طالعت جوري في المكان بتمعن..كانوا في مدخل إستقبال مره واسع السقف عالي وكله رسوم بديعه والنجف الكريستال بيتلألأ ويعكس الضوء عالمرايا اللي مغطيه الجدران، الأرضية من الرخام المصقول واللامع وباقات الورد الجوري موزعه في كل ركن بشكل منسق وجميل..وفي الوسط نافوره ضخمه بتعكس عشرات الألوان عالمويا بشكل ساحر.
ردت بشرود/من جد شكله غالي،علشان كذا هالك نفسه في الشغل وكل ماأقله يسيب الدوام المسائي يقول ورانا ناس نصرف عليهم..حبيبي الله يعوض عليه ،ضغط على نفسه علشان يفرح ديما.
ياسمين بحماس/ماما ياللا ندخل طولنا.
اتنفست بعمق وبتوتر/بطني تمغصني مو مصدقه إني بشوفهم أخيراً.
دفتها ساره قدامها بشويش واتقدموا لمدخل القاعه،ساره بهمس/والحين شلون بتعريفهم ياعبقرية زمانك.
طالعت جوري في الحريم اللي واقفين يستقبلوا الضيوف ولمحت حرمه كبيره جالسه على كرسي جنبهم،إبتسمت وأشرت لهم وهي تهمس/شوفوا ذيك شكلها جده.
اتقدمت بثبات وقلبها يدق بسرعه ووقفت قدام الحرمه الكبيره تتأملها بلهفه،أنتبهت لها الحرمه وإبتسمت لها بود قبل ماتنطق جوري بشقاوه/السلام عليكم..شلونك ياجده.
إبتسمت الجده بترحيب/وعليكم السلام ورحمة الله ..زان لونك يابنيتي..ياالله حيهم اهلا وسهلا.
ضمتها جوري بقوه للحظات قبل ماتبوس رأسها ويدها بحب/الله يحييكي ويبقيكي .
ضغطت الجده على يدها بود/أنتي من بنته؟
جوري بزعل مصطنع/أفااا ياجدتي الحلوه.. ماعرفتيني..من يقول لك ياجده غيري.
سكتت الجده للحظه وبصدمه/جوري.
ضمتها جوري وهي تضحك/ياقلب جوري ونظرها..نسيتي صوتي ياجده.
ضمتها الجده بحراره قبل ماتبعد عنها جوري، الجده بفرح/هلا ببنيتي..أسفرت وانورت.
جوري/منوره بيكم ياجده.
التفتت الجده للحريم اللي جنبها وأشرت لهم/يأم بدر.. ياصافي.
خلصوا سلموا عالحريم وقربوا منها،قربت جوري لأكبر وحده فيهم وسلمت عليها بإحترام،وبإبتسامه/ألف مبروك يمه والله يجمع بينهم على خير..
طالعت فيها أم سند وبإعتذار/يبارك في عمرك..سامحيني ماعرفتك حبيبتي.
الجده بحماس/هذي الجوري..بنت صالح.
إبتسمت أم سند ورجعت سلمت عليها بفرح/هلا والله بجوري..شلونك يمه..متى جيتي.
جوري/الحمدلله بخير يمه..دوبنا وصلنا.
سلمت عليها صافي بحب/هلا حبيبتي الحمد لله على السلامه.
جوري/هلا بك يا قلبي..الله يسلمك.
ألتفت لساره وياسمين وبهدوء/هذي ساره أختي وهذي ياسمين بنتي.
سلموا عليهم قبل ما تنتبه جوري لنظرات الحريم عليهم وبإحراج/يمه أشغلناكم.. خلاص أحنا بندخل وأنتوا شوفوا ضيوفكم.
أنتبهوا لعكازها وصاحت الجده/ياويل حالي وش بلاكي يالجوري.
جوري بإبتسامه/لاتخافي ياجده مافيني إلا بالعافيه..خلص بعدين أحكي لكم.
عرفتها أم سند على أم العريس واللي معاها قبل ماتأخذهم صافي لطاولتهم وتستئذن منهم وتروح.
جوري بتنهيده/ربي يسعدهم يجننوا ،صح يا ساره.
ساره بتأييد/شكلهم حيل طيبين ويحبوكي.
ياسمين/ماما مره حبيتهم بالذات جده الكبيره..شكلها فله.
جوري بنظره/فله في عينك،بقدك هيا.
ساره وهي تتأمل الحريم وبتفكير/جوري ياتبن..شكلهم ناس هاي كلاس..شوفي كيف أشكالهم مرره نظيفه.
إبتسمت بمرح/ساره مالك اليوم، أيش نظيفه ذي..أحنا في مغسله!!
ساره بجديه/ناظري لبسهم ومجوهراتهم، شكلها غاليه..تتوقعي ألماس؟
ما قدرت تمسك نفسها من الضحك وصارت تحرك يدها قدام وجهها تهويه/حسبي الله على شيطانك يا ساره..أنتي موطبيعيه سعد مشربك شيئ قبل ماتجيني.
ساره بضيق/بس ياسخيفه الناس تناظرنا.
جوري بضحكه/أيش عليا فيهم..أنتي اللي تسأليني لابسين ألماس!!!على أساس إني ماألبس غيره من يوم ماتولدت وصرت خبيره ألماس..وربي لوشفته مافرقه عن القزاز.
غمزت لها ساره بسرعه، أخذت منديل ومسحت دمعتين نزلت منها من كثر ماضحكت،وبضحكه خفيفه/خلاص لاتقروشيني.. مارح أضحك.
ليه لبى قلبك ..ضحكتك حيييل حلوه.
ألتفتت جوري وشافت ثلاث بنات يبتسموا لها،وقفت بهدوء وإبتسمت/ أنتي الحلوه يا عسل..
قربت منها أكبر وحده فيهم كانت ملامحها ناعمه ولابسه فستان أسود وأبيض طويل وماسك عالجسم وله فتحه للركبه وسلمت عليها بود/شلون حبيبتي..الحمد لله على السلامه.
وبعدها سلموا عليها البنتين وكانوا لابسين فساتين بلون ذهبي ماسك بالجسم بس موديلهم مختلف.
طالعت جوري في اللي لابسه أسود وبإبتسامه/بخير الحمد لله والله يسلمك.. أأممممم ثريا إذا ماخاب ظني.
إبتسمت لها وهزت رأسها بموافقه وبهدوء/أعرفك وتين،ريوف.. بنات عماني.
جوري/أهلين..أتشرفنا ياحلوات.. ساره صحبتي..ياسمين بنتي.
سلموا على بعض،ريوف/ممكن نقعد معكم.
جوري بإبتسامه/ولو القصر قصركم..أتفضلوا حبيبتي.
أشرت ثريا عالعكاز بقلق/سلامات حبيبتي.. عسى ماشر.
رفعت جوري طرف فستانها وورتها الجبس وبهدوء/الله يسلمك يا قلبي،ماشر.. حادث بسيط.
وتين بحماس/وش صار.
طالعت فيها جوري بإبتسامه/كان بودي أشبع حماسك،بس للأسف كلها طيحه من فوق السلم..يعني ما في إثاره في السالفة.
ريوف بإستغراب/وش طلعك عالسلم.
جوري الإبتسامة /كان عندي أسبوع نظافه..بس ماتم.
ثريا/ديما بتجن لو درت إنك هنا..ماهقينا بتحضري.. أبوي قال بعدك مارديتي من السفر.
جوري بحب/هوا مايدري..حبيت افاجأكم.
ثريا بصدق/مفاجأه حييل حلوه.
جوري بهدوء/ممكن أشوف ديما إذا في مجال..
مسكت ثريا يدها بحب/أكيد حبيبتي..بس الحين تتصور،أول ماتخلص بنصعد لها.
قاموا البنات يرقصوا مع ساره وياسمين، وجوري وثريا يتقهووا ويتكلموا براحه وبعد شويه جاتهم أربع بنات،3منهم لابسين ذهبي والرابعة أكبر منهم و لابسه كحلي سلموا عليهم وجلسوا معاهم وصارت تروح دفعه وتجي بدالهم دفعه،حست جوري إنها عطلتهم من كثر إهتمامهم، وهمست لثريا بإحراج/حبيبتي ثريا تقدروا تروحوا تشوفوا اللي وراكم..ماله داعي تشغلوا نفسكم بينا.
ثريا بعتاب/مليتي منا بهالسرعه.
جوري بإبتسامه/مو القصد يا قلبي،بس ملكة أختك وأكيد مشغولين وكل وحده عندها حاجه تعملها..أنا مارح أطفش لوحدي،قهوتي معايا وأموري عال العال.
رن جوال ثريا وإبتسمت/كنت منتظره المكالمة،الحين بنروح لديما.
وقفت جوري وكلمت ساره/بروح دقائق وبجي .
راحت مع ثريا ووقفت قدام الأصنصير بتردد قبل ماتبتسم بجمود وتدخله بسرعه وبعد لحظات وصلوا لغرفة ديما،ثريا بمرح/معاي ضيوف.
ديما بتوتر/مين.
دخلت جوري بهدوء وسمت بالله وهي تشوف ديما كانت ملكة جمال ببشرتها البرونزية وشعرها الأسود المرفوع والمايل على كتفها اليمين كانت عيونها سوداء وناعسه ومكياجها سموكي وذهبي،فستانها تنوره حمراء منفوشه وبذيل طويل وعليها كريستال وأشكال غريبه من الزينه الذهبية وتوب بنفس اللون بدون حمالات،قربت منها وسلمت عليها بخفه وبمرح/ألف مبروك يا حياتي، ماأقدر أسلم بذمه والخبط مكياجك.
ديما بإبتسامه/الله يبارك فيكي.
جوري بضحكه/من متى نزل عليها العقل ذا.
ثريا بروقان/بركات سي مشعل.
طالعت فيها بإستغراب/أنتي مين.
جوري بزعل/لا..كذا عيب،كل وحده تسألني نفس السؤال..لذي الدرجه صوتي متغير عن التلفون..ليه ترجيني علشان أجي وفي الأخير ماتعرفيني.
ديما بعدم تصديق/قولي قسم إنك جوري.
ضحكت مع ثريا وبمرح/مررره ما في ثقه!! قلبك ماقلك.
ضمتها ديما ببكى/حبيبتي جوجو.. ماظنيتك تجين..أبوي قال بتمين عند أهلك.
بعدتها جوري وبأمر/بس بس..من غير دموع،ذحين وجهك يقلب دب باندا ومانشوف غير غبرة العريس.
ألتفتت الكوافيرة وسلمت عليها وبهدوء/معليش حبيبتي هتعبك معايا مدري إنها بتبكي ولا ماكنت طلعت.
سوزان/ولو تعبك راحه ياالبي..هيدا شغلي.
طالعت في ديما بإبتسامه/هستناكي تحت لاتطولي.
|
11-12-15, 07:10 AM
جديد مواضيع قسم القصص المهجورة والغير مكتملة
العرض العادي
