كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
في نفس الوقت،جده
دخل خالد ومازن ومؤيد ونادر من صلاة العيد وسلموا على أمهم وعلى ندى وفاطمة ووزعوا لهم العيدية وبدأوا يتقهووا ويسولفوا،بس كان فيه نوع من الكآبة مسيطر عالكل وإن كانوا بيتظاهروا بالعكس
مد مؤيد كيس لنادر وبإبتسامة / ندور حبيبي ما تبغى نخرج نطرطع في الحوش.
أخذ الكيس وهز رأسه بنفي وببراءه/ بخبيه لين تجي ماما جوري علشان نطرطعه سوا زي كل مره.
زفر خالد بضيق من سيرتها وقبل مايتكلم رن جوال أم خالد اللي ردت بسرعه وبلهفه/وعليكم السلام والرحمة..هلا حبيبتي وأنتي بصحه وسلامه يا قلبي.. ومن الفايزين.
جوري/وحشتيني يمه..كيف صحتك وكيف العيد معاكي.
همست من بين دموعها/الحمدلله بخير وموناقصني غيرك وغير أولادك، البيت بدونكم فاضي والعيد ماله طعم.
جوري/يمه واللي يسلمك لا تبكي حبيبتي.. أنا متصله أطمنك وأطمن عليكي وأسمع ضحكتك الحلوه..مو أخليكي تبكي ولا بقفل.
مسحت دموعها وأشرت لندى والصغار يلحقوها وراحوا لغرفتها علشان تأخذ راحتها في الكلام.
ألتفت مازن لخالد بجديه/أنتا مارح تقول أيش صار بينكم.
خالد ببرود/تراكم زودتوها زوجتي وطلقتها وخلصنا محد له شيئ عندي.
مؤيد/كانت زوجتك ،بس هيا لذحين أختنا لاتنسى ذا الشيئ.
خالد/بلا أختكم بلا كلام فاضي،اللي بينا انتهى وانتوا كمان اللي بينكم انتهى..خلاص مالكم علاقة فيها.
مازن بهدوء/والله اللي بينك وبينها يخصكم ومالنا فيه،بس اللي بينا وبينها يخصنا أحنا وأنتا كمان مالك فيه.
طالع فيهم بعدم فهم/وأيش اللي بينكم ؟
مؤيد بإبتسامة/يعني إذا أنتا طلقتها وعلاقتكم أنتهت،فأحنا مالنا صلاح وعلاقتنا بيها مستمره لليوم.
عقد حواجبه وبعصبية/أنتوا هبل ولا تستهبلوا،أنا خلاص طلقتها ومالكم دخل فيها،هيا بتسكن مع أهلها وأنا بجيب الأولاد يعيشوا معايا وبيروحوا لها في الإجازة وخلصنا..يعني انسوها بالمره.
مازن ببرود/ياريت ماتتدخل بينا وبينها، أحنا حابين علاقتنا تستمر معاها والحمد لله هيا كمان حابه وبنتواصل بالتلفون على طول ويمكن أمر عليها عند أهلها قبل ماأسافر.
وقف بغضب/وهيا تتكلم معاكم بأي حق ، وأنتوا كمان مالكم حق ودخل فيها ولاتتكلموا معاها فاهمين.
مؤيد ببرود/وأنتا مين علشان تحاسبها، أنتا مو زوجها وما عاد لك حكم ولا كلمه عليها.
مازن مسك خالد قبل مايوصل لمؤيد المبتسم بإستخفاف.
خالد بصراخ/مازن فكني خليني أربيه قليل الأدب ذا .
مازن بحده/مؤيد روح بيتك ذحين،مو وقت هبلك.
طالع مؤيد في خالد وببرود/أنا مو أهبل،بس أخوك اللي نسي إن جوري خلاص بح.. ماعادها زوجته،قلت أفكره علشان لايحرج نفسه قدام الناس.
وتركهم وطلع،جلسه مازن وحاول يهديه وبعد دقائق مد له كاسة مويا وبهدوء/روق ذحين عيالك بيكلموك ويعيدوا عليك وأنت كذا قالب وجهك؟
خالد بحده/شوف يامازن وربي إن ما---
قاطعه مازن بقوه/لاتحلف يا خالد لإني ماهسوي اللي تبغاه.. علاقتنا بجوري هتستمر ومالك فينا لامن قريب ولا من بعيد.. حياتكم مع بعض خلصت وكل واحد راح في حاله فرجاءً لاتدخل كل الأطراف في طلاقكم ذا..فهمت.
طالع فيه خالد بجمود بدون مايتكلم لحد ماجات أمه وأعطته الجوال يكلم الأولاد.
الرياض
(سند)
صحي من النوم وقفل المنبه بهدوء ومد يده
وهزها بشويش/حبيبتي يلا أصحي أذن الفجر..سمر..سمر.
رفعت المخده وبانت ملامح وجهها النعسان وبإنزعاج/سند ماعليا صلاة،اتركني بنام شوي.
مسكها من كتفها وجلسها عالسرير بإبتسامة/أدري ماعليكي صلاة ،بس حبيبتي اليوم عيد وما في وقت للنوم.
لفت وجهها عنه بزعل/مصر تذكرني.
اختف إبتسامة وبهدوء/ماخلصنا من ذي السالفة،قلت لك بنسافر وين مابغيتي بس بعد العيد مو الحين.
عقدت أيديها على صدرها وبنرفزه/ قلت لك بعد العيد بيكونوا صديقاتي رجعوا وش فايدة السفر.
سند بهدوء/وإذا رجعوا وش علينا فيهم!!
حنا بنروح مع بدر وبتول نغير جو ونتمشى.
سمر بملل/ياحبيبي تونا من أسبوعين كنا مسافرين ويا بعض،بس ذي السفره غير بكون مع صديقاتي نشوف أخبار بعض ونستانس.
سند بجديه/أنا أخذتكم لندن في رمضان علشان تنبسطي ويطيح اللي برأسك لأني سبق وقلت لك سفر في العيد ما في،ماني مستعد أترك أهلي في العيد علشان
أي سبب ..أنتي تدرين إن الكل بيكون هنا،شلون نتركهم ونسافر..بعدين أنا مامنعت،أنا قلت بعد العيد بسفرك براحتك وش تبين بعد.
قربت منه ولفت أيديها على رقبته وإبتسمت بدلال/بيبي تكفى،طلبتك لاتردني..وعد مارح أطلب منك شيئ لمدة أسبوعين..تكفى قول تم،خلنا نقعد معاهم اليوم وبكره نسافر.
اتأملها للحظات قبل مايتبسم بمكر/تدرين إني هونت عن السفره كلها،لكن إبتسامتك الحلوه ذي خلتني أرد أقرر نسافر...
سكت لما لمح إبتسامتها اللي اتوسعت بإنتصار قبل مايتابع/بعد العيد.
أختفت إبتسامتها وحلت محلها تكشيره حاده بسبب فشل حركة الدلال اللي ماجابت نتيجة وبعصبية/يعني ما في فايده مهما تكلمت،ولا لي أي خاطر عندك؟
سند بحزم/أعتقد إني وضحت لك أهميتك وغلاتك عندي وبأكثر من طريقة.. وقلت لك قبل كذا ياسمر أنا ما أحب أحد يساومني بهالطريقة وخصوصاً أنتي.
عضت شفايفها بندم وبإرتباك/بيبي وش مساومه الله يهديك،الموضوع حيل بسيط ومومحتاج تكبره هالكثر..خلاص براحتك بعد العيد أوكي..المهم لاتزعل ياقلبي.
راح يجهز لصلاة الفجر وطلع بدون ما يكلمها، وبعد مارجع لقاها جاهزه وومنتظره وبعد ماأعتذرت منه وصالحته وصفي جوهم راحوا يشوفوا بدر وبتول اللي كانت المربية ملبستهم ومجهزتهم وطلعوا على بيت أبوه.
القهوة يالحبيب..تفضل.
أنتبه من شروده ورجع للحاضر على صوت مشعل ولد عمه اللي مد له فنجان القهوة وبهدوء/زاد فضلك،أعذرني مانتبهت.
مشعل بإبتسامه/معذور يأبو بدر،خذ راحتك.
وضاح بهمس/وش بلاك الرجال من ساعة وهو يكلمك وأنت بدنيا غير الدنيا.
سند بهدوء/معاكم وين بكون يعني.
شرب قهوته ببطئ وعيونه تدور في المكان بصمت، بعد صلاة العيد الكل مجتمع كالعادة في بيت أبوه، بما إن الجد والجده مستقرين هنا أولادهم الأربعة وأحفادهم حولهم في مجلس الرجال اللي يطل على جهة الحريم، ريحة العوده المختلطة بريحة الهيل والقهوة منتشرة والسوالف والضحك ماليه المكان والكل باين عليه الراحة والانبساط وهم يخططوا كيف يقضوا العيد،لمح بدر المنزوي في ركن لحاله ومشغول بجواله وجات في باله بتول.. أكيد إنها الحين معتصمه في غرفتها كالعاده ورافضه تنزل تقعد مع أخواته وبنات العيله رغم إنه مر عيد عليها بعد صلاة العيد وأقترح عليها تنزل تغير جو بعد مارفضت طلب أمه للنزول بإصرار ولقي أقتراحه لها نفس الرفض.
أتنهد بضيق لإنه مهما حاول يقرب منهم إلا إن في شيئ دائماً يمنعه،موت سمر بنى حاجز بينهم وخلاه عاجز عن إنه يفهمهم ويحتويهم وذا الشيئ زاده هم على همه.
جوري
جده،بعد أسبوع
عدلت نقابها وهي تضحك/قاعده على قلوبكم ومارح أتزحزح.
مازن بإبتسامة/فداكي قلوبنا،بصراحه اتفاجأت لما شفت الأولاد في البيت وماصدقت لما قالت ياسمين إنك رجعتي معاهم.. بالعافيه استنيت لين تطلع الشمس وأجيكم.
اتنهدت وبهدوء/حياك في أي وقت ..ومكان ما يكون ياسمين وقصي بتلقاني وربك كريم.
طالع مؤيد في مازن اللي انشغل مع عبدالرحمن في موضوع وهمس لها بتردد/خالد مابيضايقك بمكالماته؟
طالعت فيه بإستغراب وبنفس همسه/ويضايقني ليه،أصلاً ما كلمته من وقت ماجاب صك الطلاق، وعبدالرحمن اللي كلمه لماجينا واتفاهم معاه على موضوع الأولاد ونقل كفالتي وأوراقي الرسمية،هوا قال شيئ؟
مؤيد بإرتياح/لاماقال شيئ بس تعرفي خالد وحركاته اللي تطلع فجأة.
عبدالرحمن بمزح/خير أيش عندكم في الزاوية وماتبغوا نسمعه!
مؤيد بضحكة/اللقافه قرافه ياعبادي..أسرار بين الأخوان مالك شغل.
مازن بتحريش/قال أخوان..تراك ماشفتهم زمان لما كنا نلقاكم ماسكين في بعض ويتضاربوا تقول ديوك وأبويا اللي يفكهم.
جوري بضحكة/الله يرحمه ،ومن ستر مسلما ستره الله، خلي الطبق مستور ليه الفضايح طيب.
مؤيد/ياهبلا قهران لإنه كان مسوي فيها مؤدب وما يلعب معاكي زيي وماعنده ذكريات زي ذي.
طالع فيه مازن بإستخفاف وردت جوري بحب/ربي يسعده والله كان ولازال قمة في الأدب والذوق،ماتشوف قصي طالع له.. الحمد لله ماطلع عليك ولا كنت رحت فيها..
وبمزح/يلا عن أذنكم عندي شغل..ولاتنسوا تشيلوا سفرة الفطور مو أقرب الغداء وهيا لسا هنا.
طالع فيها مؤيد وبقهر/ترى بطلت شيل السفر من يوم ماأتزوجت وأنتي لسا فاكره.
ضحكت وخرجت وهي تدف كرسيها اللي فضلت تستقبلهم فيه علشان تتحرك براحتها بدل حوسة العكاز كل ما وقفت وجلست.. دخلت غرفتها وفسخت عبايتها ونقابها ورمت نفسها عالسرير وهي تتنهد بقوه وتسترجع تفاصيل اللي صار قبل أسبوع في بيتهم.
عبدالرحمن بهدوء/أنا قررت إني بستقر في جده لفترة وبعد العيد بأخذ جوري معايا ،برتب أموري هناك لحد ماغنى ترتب وضعها ذي السنة وتأخذ إجازة من مدرستها وأجهز أوراقها وأدخلها كمان .
سكتوا كلهم وألتفتوا لجوري علشان يشوفوا ردة فعلها،بس ماكان باين على وجهها أي تعبير يدل على تفكيرها في ذي اللحظه، قطع خالهم عبدالله حالة الصمت والنظرات اللي كانوا يتبادلوها بينهم وبجدية/البنت يوم تتطلق من زوجها تجلس في بيت أبوها ،وجوري بيتها هنا كيف تسير تسكن معك وفي جده!! أيش يقولوا علينا الناس.
علي بهدوء/لكن هي مش لوحدها هناك، عبدالرحمن معاها وقلك بعد سنة أم جود بتسافر وتسكن عندهم يعني هنا وهناك واحد.
معاذ بنفس الهدوء/وبعدين هي ماسوت شيئ غلط علشان نشيل هم الناس وكلامهم ياخال.
أم معاذ بعصبية/أنا أشتي بنتي تجلس عندي، ما تسير تفعل هناك خلاص يكفيها غربه،أنا سلمت أمري لله وقلت طلاقها خيره والحمد لله رجعت لنا مثل ماكان أبوكم يتمنى،كيف أخليها تسافر مره ثانيه.
جلست جوري تتابعهم بصمت وهي رافضة تشاركهم نقاشهم وأخوانها يحاولوا يقنعوا أمها وخالها بفكرة عبدالرحمن،وبعد نص ساعة ما قدرت تتحمل وطلعت من المجلس بدون ماتلتفت لعبدالرحمن اللي ناداها.
طلبت من ناديه تنادي لها غنى لإنها مارح تقدر تطلع برجلها المجبسه لشقة عبدالرحمن في الدور الثالث وبعد دقائق كانت في غرفتها مع غنى وبتساؤل/أنتي موافقه عالكلام اللي قاله عبدالرحمن.
أتنهدت غنى وبتردد/مادام قلتي عبدالرحمن يعني زعلانه..طيب نتكلم بصراحه ولا هتزعلي مني.
إبتسمت جوري وبهدوء/أقتليني وعينك في عيني ولاتطعنيني في ظهري ياغنى.
غنى بجديه/ماأكذب عليكي في البداية زعلت وعصبت وقلت كلام ماله داعي وزعلت عبادي مني،لكن لما هديت وفكرت لقيت إن معاه حق..ماهو من العدل إنك تنحرمي من عيالك بذي الطريقة،ومادام يقدر يكون معك ويساعدك ليش لا.
طالعت فيها جوري بجدية/أنتوا بتفكروا بعواطفكم في ذي اللحظه وناسيين إن قراركم ذا بيترتب عليه نتايج أنتوا مو متخيلينها.. أنتي مستوعبه اللي هيصير لو أنا وافقت على كلامه.
غنى بهدوء/أنا مش صغيرة وعارفه أيش يعني قرارنا ذا ياجوري..وفكرت بعقلي قبل ماأوافق.
ضحكت جوري بخفه/لا واضح العقل ماشاء الله..أنتي تحسبي جده ذي في الحاره اللي جنبك..تحسبي إنه وقت ماتشتاقي لزوجك أو جود تتعب ويصير لها شيئ بترفعي سماعة التلفون وفي دقائق بيكون عندك.. أكيد ضحك عليكي وقال لك إن السنة ذي بتعدي بسرعه وبدون ماتحسي وفي غمضة عين بتلقي نفسك معاه وإنك هتغيري جو ورح تنبسطي وتعتبري سفرك ذا مغامرة ولازم تتمتعي بيها.
غنى بإبتسامة/يعني تقريباً من ضمن كلام كثير.
جوري بجديه/أجل أسمحي لي أكون الإنسانة العاقلة بينكم وألفت أنتباهك للشيئ الواقعي والأكيد اللي غفلتوا عنه.. يمكن أتناسيتوا واقع إنك بتنحرمي من أهلك وأقاربك وكل الناس اللي عرفتيها طول عمرك.. وإنك مهما تعبتي ولا أتضايقتي ولا أشتقتي لهم مارح تقدري توصلي لهم إحساسك ذا..رح تلقي نفسك بتعملي حساب لأتفه كلمة أوتنهيده ممكن يفهموها أهلك غلط ويقلقوا عليكي بسببها..هتتحسري على كل مناسبة كان المفروض تحضريها معاهم وعلى كل حدث صار معهم وأنتي مضطره إنك تسمعي عنه بإختصار لإن تكلفة المكالمات الدولية مارح تخليكي تأخذي راحتك في الكلام.. من دون ماننسى واقع إنه إذا تعب واحد من أهلك أو حصل له شيئ فأنتي هتكوني آخر من يعلم والأكيد هتكوني آخر من يوصل وكمان بعد فوات الآوان.. يكفي كذا ولا أقول على باقي الأشياء اللي فضلتوا تتجاهلوها.
قربت منها غنى ومسكت يدها بحنان/لو كان عندي أي تردد في الأول فأنا ذحين متأكده من قراري ومصره عليه..لإني ذحين فهمت قصد عبادي لما قال إنك نصه الثاني.
جوري ببرود/بلا فلسفه زايده ،وياريت تحتفظي بكلامك ذا لشخص محتاجه لإني مو محتاجه مساعده منك أو من زوجك،أنا أقدر أتكيف مع وضعي الجديد وأتعايش معاه بدون ماتخربوا حياتكم علشاني.
غنى بجديه/أنا داريه إنك قويه ويمكن أقوى من أخوانك الرجال وداريه إنه حصلت معك حاجات أحنا مانعرفها ولانتخيلها ، لكن ذا ما يعني إنك تكوني أنانية وما تفكري غير في نفسك وبس.
طالعت في جوري اللي مركزه عيونها عليها بقوه وتابعت بحده/مارح تخوفيني بنظرة البسه هذي، أنتي فعلاً أنانية وما بتفكري غير في نفسك..أنتي كل همك إنك توهمينا إنك قويه وبخير وإنه ما في شيئ يأثر فيكي ويوفقك لدرجة إنك ما أنتبهتي لخوف الكل عليكي، كلهم منتظرين اللحظه اللي يطيح فيها قناع البرود اللي لابسته على طول.. منتظرين اللحظه اللي تنهاري فيها علشان يقدروا يمدوا يدهم ويساعدوكي بدون ماترفضي وتعترضي.
جوري بجمود/الظاهر عبدالرحمن عداكي بكلامه الفاضي، أنا عارفه نفسي ومن محتاجه لتحليل نفسي شخصيتي.. وعموماً أنا وضحت لك اللي كان غايب عنك براء لذمتي ومارح أسمح لك وللغبي زوجك إنكم تخربوا حياتكم وحياة جود بسببي ، وحياتي أنا اللي مسؤله عنها وهقررها مو أنتوا.
أنهت كلامها وخرجت من غرفتها بسرعه علشان ما تعطي غنى فرصه للرد،وبدون ما تحس لقت نفسها في الحوش وعيونها مركزه على المكان اللي جمعها بخالد أول مره لما هاجمها ، فكرت في شكل حياتها كيف كانت هتكون لو إنها واجهت أهلها باللي صار وقتها.. أكيد ما كانت حياتها هتكون كذا ويمكن ما كانت أتزوجت خالد أساساً.. ولا خلفت ياسمين وقصي ، أنقبض قلبها بألم لذي الفكره.. كيف كانت حياتها هتكون بدون ياسمين وقصي.. وجودهم هوا السبب الرئيسي اللي خلاها تقبل حياتها مع خالد. .وجودهم هوا سبب حلمها في إنها تعيش علشانهم حياة طبيعية في أسرة متماسكة ومحبه.. وجودهم كان مصدر سعادتها وفرحتها الوحيدة اللي أعطت لحياتها طعم ولون ودفا في وسط البرود اللي عاشته مع أبوهم.. وجودهم أعطاها دافع وسبب خلاها تتغير وتصير أقوى علشانهم..غمضت عيونها بتعب وصدمة من كلام غنى، هيا عارفه إنها صارت إنسانة بارده ومتحفظه وتقدر تتحكم في أعصابها ومشاعرها لدرجة إنها بتعطي عنها إنطباع غلط للي ما يعرفها وبيفتكروا إنها يامغروره جداً ، أو إنها بارده ومابتحس بأي إحساس سواء كان خوف أو زعل.. وذا الشيئ كان يناسبها ويوفر عليها خيبات أمل هي في غنى عنها.
فتحت عيونها ببطئ لما حست بحركه جنبها
عقدت حواجبها لما شافت علي وعبدالرحمن ومعاذ جالسين جنبها ، طالعت فيهم ببرود / الثلاثي المرح.. خير إيش عندكم.
علي بحزم / أتكلمي بإدب ، لاتحسبي نفسك كبرتي على التأديب فأنني غلطانه ، لإني ممكن أرجع أفكرك بأيام زمان بكل سهوله.
فلتت منها ضحكه صغيره للحظات قبل ما تتحكم في نفسها وترجع لهدوءها وتنتبه لوجوههم المبتسمه ، وبصدق / آسفه ماكان قصدي أقل أدبي ومالي عذر.. حقكم عليا.
وقفت وباست رأس كل واحد فيهم ورجعت مكانها وبهدوء/ اتفضلوا ، كل واحد يقول اللي في خاطره.
علي/ أسمعي منا وأستوعبي وبعدها قرري.
هزت رأسها بموافقة وبدأ كل واحد يشرح لها وجهة نظره وبعد ساعتين متعبه وطويله وافقوا على قرارها مجبرين بسبب إصرارها وعنادها اللي ماقدروا عليه وأعلنوا قرارها صح وواقعي نوعاً ما ، وإن كانوا شاكين إنها هتقدر تنفذه بنفس السهوله اللي اتكلمت فيها وهي تقنعهم.
فزت من مكانها لما حست بيد على كتفها ، وبرجفه بسيطه / عبدالرحمن ..كم مره قلت لك لاتمسكني كذا وأنا سرحانه.
طالع فيها بهدوء / صار لي عشر دقائق وأنا أناديكي وماتردي حسبت حصلك حاجه.. بعدين لمست كتفك من قدام مو من وراء ظهرك .
جوري بهدوء نسبي/ لاتسوي ذي الحركة لافي وجهي ولا من ورايا وخلاص.
عبدالرحمن ببرود / زمان كنا دايماً نسويها في بعض وأحنا نلعب وكنتي تموتي من الضحك أيش اللي غيرك وخلاكي تترعبي منها بذي الدرجه.
ضحكت بخفه / ههههههههه أترعب مره وحد ه، كل الحكايه إني اللي كان يعجبني زمان ما عاد يناسبني لما كبرت.. وذا يسموه نضوج.
عبدالرحمن بتفكير/ نضوووج.. غريبه كيف نضجتي في شيئ واحد بس وباقي الأشياء عادك متعلقة فيها زي الطفله.
غيرت الموضوع ببساطه / ليه سبت مازن ومؤيد وجيت.
فهم حركتها وهز كتفه بلامبالاة / شكلهم مستحيين وعادهم ماتقبلوا واقع إنك قمتي تتغطي عنهم.. حتى لما أصريت عالغداء رفضوا.
زفرت بعمق / أقدر أأكد لك إن ذا الشيئ الوحيد اللي متحسره عليه في طلاقي من أخوهم ، مو متخيله إني أنحرمت منهم فجأة بس ما بيدنا شيئ ، الحمد لله على كل حال.
عبدالرحمن بجديه / لو ماكنت متأكد من قوة علاقتكم وإنكم معتبرتهم عيالك أكثر من أخوانك صدقيني ماكنت وافقت تدخلي عليهم وتكلميهم حتى وأنتي بغطاكي.. المهم أنا رايح الميناء أستلم السيارة وحجزت التذاكر وعملت حساب أولادك معانا.
جوري بإبتسامة/ذول قبلي أبوي مساعد موصيني أجيبهم معايا.
عبدالرحمن/طيب شوفي إذا محتاجه شيئ الملكه كلميني أجيبه وأنا جاي.
خبطت جبينها بخفه/نسيت هدية العروسة.
فكت محفظتها وأعطته ورقة وتابعت/روح ذا المحل وأعطيهم ذي وبيدوك الهدية من زمان جهزت.
أخذ الورقة وودعها وراح وبدأت هيا تفرغ شنطها وأغراض سفرها اللي ركنتهم أمس لما وصلوا، وبدأت تستعد بلهفه لزيارة أم خالد والبنات اللي أكدوا جيتهم العصر.
أنتهى البارت
سبحانك اللهم وبحمدك أشهد أن لا اله إلا أنت استغفرك وأتوب أليك
|
09-12-15, 03:13 AM
جديد مواضيع قسم القصص المهجورة والغير مكتملة
العرض العادي
