كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
يقول الحسن البصري : ما من شخص يرى نعمة الله عليه فيقول : الحمد الله الذي بنعمته تتم الصالحات ، إلا أغناه الله وزاده
--------------
الورقة الثلاثون
وجود الأخ في حياة الفتاة هو حضور لصديق أبدي , و رفيق أول للطفولة و صخرة تستند إليها عندما تكبر.. ربي لا تريني في إخوتي شيئآ يبكيني
(خالد)
8 صباحاً
خالد...خالد..يلا قوم...خالد..
فتح عين وحدة وطالع في ندى جالسه جنبه دف اللحاف واتعدل في جلسته/صباح الخير ندو.
طالعت فيه بإستغراب/صباح الخير حبيبي، متى جيت وليه نايم في غرفة مؤيد ومازن؟
ضمها لصدره بقوة/رجعت متأخر وماحبيت أقلقك وأنتي نايمه..عارفك خوافه قلت أنام هنا.
زادت في ضمتها ليه وبحب/وحشتني دودي..ليه رحت فجأة وماأتصلت،حتى مكالماتي مارديت عليها.
بعدها عنه بشويش وطالع في الساعة وبتصريفه/ مو أرسلت رسالة..يلااا جهزي، ملابسي وفطور علشان مستعجل وورايا مشوار مهم.
ندى/أي مشوار..مو رايح الدوام؟
زفر بضيق/ندى مو وقت تحقيقك ذا خلاص.
باسته في خده وبندم/أسفه حبيبي مو قصدي..عشر دقائق والأكل يجهز.
خرجت وتركته يطالع في أكياس الأكل المرمية عالأرض بإهمال وأتذكر كيف لقي نفسه فجأة قدام بيتهم ومعاه أثنين ساندينه عالباب قبل مايفتحوه بمفتاحه ويسيبوه ويروحوا..دخل وهو يترنح ودايخ وراح جهة مجلس الرجال ودخل غرفة أخوانه واتمدد عالسرير بهدوء وبعد ربع ساعة أخذ دش طويل وحلق وصلى اللي فاته وراح أشترى له عشاء ورجع البيت أتعشى،كان يتصرف بهدوء هو بنفسه أستغربه..طلع بكت الدخان وقعد يدخن وهو يراجع اللي صار معاه ويسب ويشتم في علي وجوري في نفسه"أنا غلطان اللي أتزوجتها من البداية.. كان المفروض أطلقها من زمان مدري ليه أستحملتها.. في البداية كانت بزره وهبلا ،وبعدها وحدة باردة وشايفه نفسها وهيا وحدة يمنية وجاهله ماخلصت حتى الثانوي، لبس زي العالم ماتعرف تلبس.. وفي السرير مافي أسوء منها وماتفهم شيئ.. وطايره بأهلها المجرمين الحووش، وكله كوم وإنها ماتحبني كوم..لااا ياشيخه أنا اللي ميت عليكي،من زينك ولاحلاكي..لولا إن أبويا موصيني عليكي كان من زمان رجعتك لمكانك بس أنتي كنتي حاسه إني مو طايقك من وقت اللي رجعنا فيه بعد زواجنا..خططتي وعرفتي تلعبيها صح ورطتيني بحمل بياسمين وبعدها على طول قصي وعملتي فيها بتضحي وعيالنا وماعيالنا..طيب ياجوري إن مادفعتك الثمن غالي ماأكون خالد..مو أنا اللي أتهدد وأتحبس الحبسه ذيك..وإذا أنتي ماتبغيني مرة فاأنا كارهك مليون مرة وكنت متحملك علشان أمي والعيال بس.. وندى حبيبتي معايا ومو محتاجك..صدقت لطيفه لما قالت ساحرة اليمن..بس الحمدلله ربي شفاني وشفتك على حقيقتك ياحقة صاحب الشال. بسيطة وين هتروحي.. مالك غيري ومصيرك بترجعي ليا غصباً عنك ورح تترجيني وقتها أرجعك لذمتي ،وساعتها هفكر أرجعك ولا لا..
قطعت ندى أفكاره بدخولها ومعاه الفطور /يلااا حبيبي الفطور جاهز..
اتأمل شكلها بالشورت القصير والبدي"أنتي حبي الوحيد واللي سويت كل شيئ علشانك،ومن اليوم مافي غيرك" مسك يدها وبهمس/يستنى الفطور..وحشتيني حبيبتي؟
وقبل ماترد عليه سحبها لحضنه وشالها للسرير..
(أبو سند)
الجد صقر(أبو مساعد)،الجدة وديمه (أم مساعد)
10 صباحاً
دخل بيت الشعر وصبح على أبوه وبدر، وبإستغراب/حيا الله بدر..مو بعوايدك تقعد هنا.
بدر بهدوء/مليت لحالي وقلت أسلي جدي صقر..تبيني أروح؟
ووقف علشان يخرج،الجد/أقعد يابدر.. جدك مايقصد.
مسكه أبوسند وجلسه جنبه وبهدوء/ بدر حبيبي ليه تقول كذا..من قال إني ماأبيك بالعكس أستانست يوم تركت غرفتك وجيت تقعد معنا.
بدر بحزن/موبلازم تقول..أنا أحس بابا وبتول مايبوني،أنت أكيد مثلهم..
ضمه أبوسند بحنان/يخسون كلهم اللي مايبونك..أنت الشيخ بدر من يعوفك يالمهبول..
أشر له الجد يجيه ومسك يده وبحزم/لا أسمعك مرة ثانية تقول ذا الحكي الفاضي.. أبوك وأختك وكلنا نحبك ونبيك يابدر..بس أنت تدري إنهم تعبانيين شوي..لزوم نتحملهم لين يرجعوا مثل قبل..
بدر وهو ماسك دموعه/جدي والله أنا أحبهم وأدري إنهم زعلانيين على ماما،أنا بعد زعلان عليها..لكن خلاص لمتى بيظلوا كذا..أنا ما شوفهم ولا أقعد معهم..مليت لحالي ومحد يدري عني.
الجد/أنت اللي غلطان.. ليه تحبس نفسك وتقعد،بس في غرفتك..ليه ماتروح مع عيال عمانك المزرعة وتتسلى معهم..
بدر بعصبية/وش أروح أسوي هناك.. أنت ماشفتهم كل واحد يلعب مع أبوه..حتى مساعد اللي ماعنده أبو عمي راجح على طول معه ومايتركه..كلهم يسوون فرق مع أهلهم في الكورة والسباحة والدبابات حتى الخيل،وأنا لحالي بينهم ليه؟
أتنهد أبو سند بحسرة وهو يدري بكلام بدر إنه صح،الجد بهدوء/بالأول لاتقول مساعد ماعنده أبو صحيح إن عمك صقر الله يرحمه لكن عمك راجح تزوج أمه وهو بعد صغير وهو اللي رباه وربى أخته مريم يعني هو أبوهم الحين..وأنت منت صغير يابدر خلص كبرت وصرت رجال،إذا أبوك أنشغل عنك شوي بسبب الشغل لاتزعل وتكدر خاطرك.. أنت رح له وذكره وقله نبي نسوي مثلهم.. وإذا موبفاضي رح للعيال وألعب معهم ياوليدي.
نزل رأسه وبخيبة/بس أنا أبوي على طول مشغول يا مسافر ومايقعد معاي ويعلمني مثلهم،أنا ماأعرف ألعب زين وأخاف من الخيل بعد..والعيال يدرون علشان كذا صاروا مايختاروني معهم لإني بخسرهم.
الجد/لاحول ولاقوة إلا بالله..طيب ياوليدي خل عنك الحين وربك بيحلها.. رح ناد لي جدتك وديمه.
خرج بدر بصمت وألتفت الجد لولده بعصبية/حسبي الله على العدو كان ولدك ذا صاحي.. هبل بالمسكين.
زفر أبوسند وبضيق/والله يبه عيزت وأنا أكلمه ومافيه فود لاهو ولابنته..كلهم روسهم يابسة.
الجد بغضب/اليابس يتكسر،هذي ماهي بحاله..مهوبأول واحد تموت مرته..درينا إنه يحبها وماقلنا شيئ..مايبي يتزوج ويجيب لهالمساكين مره تضفهم وتدير بالها عليهم وهم ماقلنا شيئ،لكن ينتبه لهم يبوك يشوفهم ويقعد معهم يشوف مابخاطرهم مايصير أتيتموا من الأم ومن الأب مرتن وحدة.
رن جواله وأتردد يرد وأنتبه له الجد وبتساؤل/من داق عليك..ليه ماترد؟
أبوسند/ذي الجوري يبه،الحين بتسمع صوتي وتسوي لي سالفه..وش فيك وليه صوتك كذا؟ مابي أكدرها اللي فيها كافيها،الحين تقفل.
الجد بهدوء/هالبنت ذيبه وحبيتها يامساعد ولو إني ماشفتها..وش صار عليها تطلقت ولا بعد.
أبوسند بضيق/تدري إنها قالت ماتبيني أتدخل ،وأنا أنشغلت مع بتول ،الله يهديك ياسند هالولد وبنته طيروا عقلي ..
أتصل عليها وفك الإسبيكر وبعد رنتين/وعليكم السلام والرحمة..حيا الله الجوري.
جوري بضحكة/الله يحييك ويبقيك.. شلونك يبه..وكيف صحتك.
أبوسند بتنهيدة/زان لونك يابنيتي.. الحمدلله مانشكي باس..أنتي شلونك بشريني عنك وعن أحوالك.
جوري/سلامتك يابعدهم ليه صوتك كذا،تعبان فيك شيئ..
أشر لأبوه بمعنى "ماقلت لك" /مافيني شيئ لاتخافي،بس مشاكل في الشغل.
جوري/يبه الله يهديك كم مرة أقول لك خلاص أتقاعد..بتهلك نفسك في الشغل وبعدها بتتعب ومارح تستفيد شيئ..
أبوسند بإبتسامة/إن شاء الله أنتي لاتحاتين بس، ماقلتي لي وش صار عالمدرسة.
جوري بضحكة/وين البشارة طيب..أسمعك أخبار حلوة كذا بلوشي..
أبوسند/أمري وش تبين وبيجيك وأنا أبوسند.
جوري بخجل/تسلم يبه..والله كنت أمزح معك..المهم أستعد للخبر الأول اللي بينسيك همومك ..أنا وأعوذ بالله من كلمة أنا..نجحت وجبت 97%
أبوسند بضحكة/ألف ألف مبرووووك يابنيتي.. والله ذي النسبة اللي تبيض الوجه.
جوري/الله يبارك في عمرك..ترى أنت أول واحد يدري بعد أمي..حتى عبادي مايدري.
أبوسند/لاااا دام كذا لازم لك هدية مرتبه أجاكر فيها عبدالرحمن.. وش الخبر الثاني إن شاء الله يكون زين مثل الأول.
جوري بهدوء/خلاص صرت حره..طلقني.
أبوسند/صادقه أنتي، متى وشلون بعد ماكان رافض؟
جوري بفخر/الحمدلله ربنا سهل،ماقلت لك علي قدها وبيفكني منه بإذن الله..واهوا ماصار له كم يوم عندي وسواها..
أبوسند/والله موب هين هالعلي.. المهم الحمدلله اللي أفتكيتي منه على خير.. والحين وش بتسوين في حياتك.
أتنهدت وبهدوء/ الله كريم يبه،المهم إنه طلقني وبسافر لأهلي في رمضان وهناك لكل حادثاً حديث..محد يدري غير أخواني، وأمي لسا ماكلمتها،عاد الله يعيني هاللي يجي.
أبوسند/ندمتي ياجوري.
ردت بإندفاع/أبداً..ولارح أندم أبداً بإذن الله، كل الحكاية إنه صعب تشرح وضعك لغيرك بالتفصيل علشان يفهم دوافعك في موضوع معين،وأمي أكيد هتقلق وبالها بينشغل..قلب الأم مهما كان..عموماً بنتك ذيبه وماينخاف عليها وحياتي هعرف أمشيها..هدرس وأشتغل ومارح أحتاج لحد غير رب العالمين.. وبكره تشوف وتقول الذيبه قالت.
ضحك الجد بقوة وإستمتاع من كلامها، جوري بهمس/من ذا اللي يضحك .. لا يكون فاك الإسبيكر يبه.
الجد بهدوء/لاتخافين يالذيبه..هذا أنا ماعرفتيني.
جوري/هلا والله ومرحبا بالصقر.. كيف ماعرفك ياتاج رأسي وهل يخفى القمر ..شلونك ياجد.
الجد/هلا بك زود يالذيبه.. زان لونك يابنيتي.. الحمدلله بخير ونعمه.
جوري/دوم يارب..الله يطول لنا في عمرك ويبارك فيك.. كيف صحتك ياجد عساك بخير.
قفل أبوسند الإسبيكر لما دخلت أمه وسند ماسكها لين جلسها جنب الجد وسلم عليهم.
الجد/صحتي طيبه وزينه الحمدلله..ألف مبرووك..هم وأنزاح يابنيتي..إن شاء الله الله بيعوضك باللي أحسن منه..
شهقت بخوف/لاااا واللي يسلمك ياجدي.. لا تقول كذا..
الجد/يابنيتي المره مالها غير بيتها ورجلها وأنتي،بعدك صغيرة ولازمك رجال يصونك ويعزك وإن شاء الله بيجي اللي يخاف الله فيكي.
جوري/والله ياجد نصيبي وجربته وأخذت منه كفايتي والحمدلله عندي ولدين الله يعوضني فيهم،بعدين أخواني وأنت وأبوي مساعد الله يطول لي في عمركم ومايحرمني منك موجودين أيش أبغى في الرجال خله عند أمه الله يستر عليه.
الجد بضحكة/ومنهو؟
جوري/اللي يكون..المهم لايجيني ولايقرب مني..يالصقر ترى أهرج من جد لاتدعي لي بذي الدعوة مرة ثانية ..والله كود أفتكيت.
المهم ماودك تجي جدة وتنورها مع أبوي مساعد..
الجد/إن شاء الله قريب..يلا يابنيتي طولنا وأشغلناكي معنا.
جوري/لاتقول كذا ياجد..والله فرحت بصوتك..أنتا أنتبه على نفسك وعلى أبوي صوته موعاجبني، وأشوفك على خير ياتاج رأسي..السلام عليكم.
قفل منها وألتفت لسند وللجدة اللي اللقافة بتموتها وتبغى تعرف من يكلم والصقر لف السالفه ودخلهم في سوالف ثانية.
(جوري)
1 ظهراً
غمضت عيونها بألم وهي شاده على مسند الكرسي بقوة،طفت الفرن ومسحت يدها وطلعت من الثلاجة حبة بروفين وشربتها بالغصب وهي بتستفرغ من القرف بس مضطره،حاسه بألم فضيع في رجلها وماعادت قادرة تتحمل ولازم تروح المستشفى تشوف دكتور ناصف ويشوف حالتها كيف صارت،رن جوالها مرتين وهيا مطنشته وماهي حوله،.والمرة الثالثة شافت المتصل وعقدت حواجبها بإستغراب"خالد، أيش يبغى ذا" فكت الخط وبتردد/السلام عليكم..
خالد بنفخه/وعليكم..ساعة تردي تفكري نفسك مهمه علشان تلطعي الناس ذا كله.
غمضت عيونها لثواني وبهدوء/أي خدمة ياأبوقصي..
ضحك بتريقة/وأنتي هتخدميني في أيه..مالت بس.
جوري ببرود/إذا ماعندك شيئ مهم تقوله ،فأنا مو فاضيه للعب الأطفال ذا وعندي أشياء أهم من إني أسمع تفاهتك ذي.
خالد بعصبية/أحترمي نفس----.
جوري بحزم/أنت اللي تحترم نفسك ولاتنسى إنك طلقتني وماعاد بيني وبينك غير ياسمين وقصي فلاتتجاوز حدودك وانتبه لكلامك ياأبو قصي..وقول اللي عندك ولابقفل.
خالد بعصبية ساخرة/أيوووه خليكي فاكره إني أنا اللي طلقتك وبمزاجي.. لايكون أخوكي مفهمك إني طلقتك لإني خفت منه!
لاااا أنا كنت في البداية متفاجئ من همجيته، بس أنا رحت المحكمة وطلقتك لإني ماعدت طايقك ولا أبغاكي وصك الطلاق رميته ليكي من تحت باب العشه اللي أنتي فيها أصلاً ذا مقامك بعد ما---
قفلت في وجه بدون إهتمام وبهمس"أنا كيف كنت عايشه معاك ذا كله ولساتني بعقلي لذحين..من جد كنت عديمة إحساس ونظر" خرجت للحوش وشافت مغلف كبير عالأرض جنب الباب فكته بلهفه وقرأته بإبتسامة واسعة"الحمدلله رب العالمين اللي فكني منك على خير" وبعد دقائق دار المفتاح في الباب ودخل علي وسلم عليها بإستغراب/مالك جالسه في الشمس ذي؟
مدت له المغلف وبهدوء/خالد حطه من تحت الباب، ويقولك تراه طلق بمزاجه مو خوف منك.
اتأكد من الصك وطالع فيها بإبتسامة/أكيد بمزاجه، هو في طلاق بالقوة.
جوري بهدوء/أنت أيش سويت فيه وليه كان معصب ومو عارف أيش يقول.
أختفت إبتسامته وببرود/غلط عليكي في كلامه؟
أتنهدت/علي لاترد على سؤالي بسؤال ثاني.
مسك كرسيها وصار يدور فيها في الحوش وبهدوء/خوفته بس لحد ماوصلته لحالة يطلقك فيها من نفسه..
جوري بإستغراب/كيف يعني.. ممكن توضح؟
وقفها وجلس قدامها وطالع فيها بإبتسامة وبمرح/مثل لما كنتي تسوي لما تطلبي مننا شيئ زمان..تذكري لما طلبتي مني مرة أعلمك ترمي بالمسدس ورفضت وبعدها زعلتي ورجعت أنا اللي أقنعك لما وافقتي تتعلمي..ولما رفض معاذ في البداية تتعلمي السواقة وفعلتي نفس الحركة ورجع هو اللي يترجاش علشان تسوقي..
ضحكت من قلبها على ذكرى اللي صار وقتها وتابع علي بهدوء/أنا سويت مثلك بس مع فرق بسيط..أنا ماأنكر إني عذبته نفسياً وخوفته علشان يطلقك ووقت ماكلمك بالجوال كان مسدسي في رأسه..
زفرت بقوة وبصدمة/مسدس !!يعني طلاقي باطل ياعلي؟
مسك يدها بقوة/لا ياروح علي مش باطل..أنا صح هددته وطلقك بالقوة وقتها، لكن أنا كنت عارف إن اللي سويته فيه هيخليه يكرهك ويكره اليوم اللي عرفك فيه وبعدها بيطلقك برضاه وبدون تردد..
عقدت أيديها على صدرها وببرود/ ومافكرت لو خطتك فشلت يافرويد أنا أيش هيكون مصيري.
علي بثقة/ مش واحد مثل خالد اللي يخيب ظني في تحليلي ومعرفتي بالناس..اللي مثل خالد كبريائه وغروره مهم عنده ومسيطر عليه لدرجة ماتتخيليها..وكنت متأكد إنه بعد مايفوق من صدمته باللي حصل هيبدأ يقنع نفسه بإنه أساساً كان ناوي يطلقك لكن كان متردد ومثل ماتقولي كان محتاج دفعه للأمام..وكلامي معه عن كرهك ليه هيطعن غروره في الصميم ويخليه يفكر يثبت لنفسه قبل مايثبت لك إنه هو اللي مايحبك ولا بحاجتك في حياته وإنه إن كان رافض يطلقك فذا لأسباب تخصه لوحده، وهيقنع نفسه إنه وصل لمرحلة ماعاد يقدر يتحمل وجودك في حياته وهيروح للمحكمة برجله ويطلقك برضاه وهذا اللي حصل.
جوري ببرود/بس أنا شايفه إنك خاطرت بحركتك ذي وكان ممكن الموضوع ينقلب علينا،وتتورط في شيئ أحنا في غنى عنه ياعلي.
علي بهدوء/ هتمر عليكي مواقف كثيرة في حياتك هتضطري تخاطري فيها بشيئ أو بنفسك علشان تحمي أشياء أهم عندك.. وأعتقد بجلستك مع خالد كل ذي السنين كنتي أكبر مثال على كلامي.
هزت رأسها بنفي/حياتي اللي راحت ماكانت مخاطرة كانت واجب عليا..أنا أم ياعلي ولازم أحمي أولادي وأسعدهم وأحاول أوفر لهم حياة طبيعية بغض النظر عن اللي ممكن أتنازل عنه مقابل تحقيق ذا الشيئ.
علي/وأيش اللي أتغير بعد ذي السنين وخلاك تتنازلي عن واجبك اللي بتتكلمي عنه.
إبتسمت بسخرية/أكتشفت إني كنت غبية وغلطت..كنت مفكره إني بإستمراري معاه بوفر لهم بيت وحب وأستقرار بس عند نقطة معينة اتأكدت إن حياتنا عمرها ماكانت طبيعية ولا فيها أي إستقرار،عارف ليه؟لإن أنا اللي كنت دايماً أتنازل وأفكر في عيلتنا وهوا ماحاول لمرة إنه يعمل شيئ علشان يساعدني عالإستمرار سوا وإنه مو الإنسان اللي أقدر أستأمنه على نفسي وأولادي.
علي بهدوء/المهم إنك لحقتي نفسك وخرجتيه من حياتك وأحنا كلنا موجودين علشانك..فاهمه ياأميرتنا.
طالعت فيه بإمتنان وإعجاب كبير.. علي بالنسبة ليها غير عن معاذ وعبدالرحمن ،كلهم بيتمتعوا بنفس الشخصية القوية والجذابة بس علي كان مثالها الأعلى في شخصيتة القوية، كان بيتمتع بالذكاء والثبات والبرود والجبروت أحياناً..هوا إنسان واضح وصريح ومايحب اللف والدوران.. علي بالنسبة ليها شخص تعهد له بحياتها وهيا مغمضه عيونها، شخصيته فريدة بارد ومستفز وعنيد بطبعه ودخوله الجيش في مرحلة مبكره من عمره عزز صفاته ذي وزاد من صلابته مع الوقت، ومع ذلك فيه جانب حنون ودافئ بشكل غريب ومايبان غير في مناسبات معينه بس دائماً بتكون في وقتها ومكانها المطلوب، علي بتريقة/داري إني حالي ووسيم لكن أستحي لما أحد يتأملني كذا.
جوري ببرود/لاتصدق عمرك ياشيبه تحسبني بشاير بذوب ..بس رأسي ساح من الشمس .. قال حلو ووسيم..في أحلامك.
علي بشهقة/شيبه!! عادني في بداية الأربعين ..ذا عز الرجوله ياجاهله.. وبشورتي داريه.
هزت رأسها موافقة وبهدوء/ماكنت أدري إنهم بيدوكم دروس في علم النفس في الجيش وإن ليك خبرة في الناس.
شرح لها وهم راجعين للصالة/ لنا كم سنه ببنظم دورات كل فترة ومن ضمنها دراسة لسلوكيات الفرد، هذي الحاجات بتنفع في فهم شخصية العدو..لكن إنا دخلت دورات مكثفة من قبل، ولا تحسبيني أترقيت ووصلت لرتبة عقيد كذا من الباب للطاقة.
كملوا نقاشهم في أمور مختلفة لحد مايوصل عبدالرحمن ويتغدوا كلهم.
(لطيفه)
6 المغرب
كانت تتكلم مع ليلى عن تفاصيل زواج وحده من معارفها ولبنى وندى وأم خالد يتابعوا مسلسل وهم يشربوا القهوة لما دخل خالد وسلم عليهم،لطيفه بإبتسامة/مررره اتأخرت..كنت شويه وبمشي بس قلت أشوف أيش الشيئ المهم اللي خليتنا نجي علشانه.
خالد بإبتسامة/لا ياشيخه هيا أول مره أعزمكم عالغداء ؟
ليلى ببرود/أول مره تصر وتقول ضروري.
لبنى بطفش/الله يستر منك..قول وخلصنا.
طالع فيهم للحظات وببرود/أنا طلقت جوري.
شهقت أم خالد ولبنى وندى بخوف وأكتفت ليلى بإبتسامة شماته،لطيفه بفرح/من جد
ولا تستهبل..قول الصدق.
أم خالد بصرخة/أيش سويت يامجنون..
لبنى بصدمة/بس أنتا كنت رافض تطلقها.
خالد بلامبالاة/كنت علشان العيال..بس خلاص طفشت منها مابينا تفاهم،بعدين أنا أحب ندو وهيا أهم وحده عندي علشان كذا رحت المحكمة من يومين وطلقتها.
ندى بغصه/ليه ياخالد..كنت أستنيتها يمكن تغير رأيها.
لطيفه بغرور/لاياشيخه..يستناها تغير رأيها.. تحمد ربها إنه أتزوجها أساساً وأتحملها السنيين دي كلها.
خالد بضحكة/والله أنتي اللي كنتي فاهمه وتنصحيني بس أنا غبي..يلا الحمدلله أفتكيت.
أم خالد بغضب/أيش أقول بس ،أدعي عليك ولا ليك..تطلق جوري ياخالد..ذي وصية أبوك ذي اللي صانتك وصانت بيتك وأهلك..
خالد بعصبية/هووهووووو علينا ياأمي،تراها مو من بقية أهلك،أنا ولدك هيا بنت الناس من الشارع ما-------
سكت فجأة ومسك خده بصدمة/تضربيني علشانها يأمي،علشان جوري!
أم خالد ببكاء/لإني ماعرفت أربيك..طلعت ناكر جميل ومكفر العشير..جوري صارت بنت الناس وبنت شوارع ياخالد..جوري!! لكن ماأقول غير زي ماقالت طول حياتها معاك "صبراً جميل والله المستعان على ماتصفون"
بس هيجي يوم وتندم عاللي سويته ورح أفكرك بغلطتك ذي..
تركت لهم الصالة وطلعت ولبنى وندى وراها، لطيفه بلؤم/حسبي الله عليها ساحرة اليمن،مانرتاح منها لا في وجودها ولا في عدمه..
ليلى/والله وراحت عليك يادودي،أمي كله إلا حبيبتها جوري أ------
قاطعها خالد بصراخ/باااااس،أنتوا ماصدقتوا خلاص جوري راحت أرتاحوا وفكوني من لسانكم .
وترك لهم البيت وخرج، ليلى بإستغراب/أخوكي دا باينه أتجنن!
لطيفه/كلها يومين ويروق وبعدها بشوف له عروسه تنسيه جوري واللي جابها.
ليلى بضحكة/برضه أنتي ماتوبي،موكفايه مجايبك اللي فاتت وفي الأخير قلبت عليكي وطنشتك بعد ماأخذت حبيب القلب في جيبها.
لطيفه بحقد/ندى كانت الموجوده وقتها وجوري عرفت تلف عليها وتسحبها لصفها، بس المره ذي بزوجه وحده ملكة جمال وتستاهله .
ليلى بتريقه/والله من يوم ماشفت ندى وأنا غاسله يدي منك.
لطيفه بخبث/ندى كانت جكاره في جوري، بس دحين بنقي برواقه.
ضحكت من قلبها وعقلها يسترجع تفاصيل اليوم اللي اتقابل فيه خالد وندى لأول مرة
كانت قاعده في بيتها مع ندى يتكلموا في موديلات وقصات الشعر وبعد فترة أستئذنت منها وراحت تتكلم في الجوال وبعدها فكت الباب اللي دق،لطيفه بإبتسامة/هلا والله خلودي..اتفضل حبيبي.
سلم عليها ودخل المجلس وقعدوا يتكلموا لفترة،وبتريقة/ذحين صجيتيني من أمس تعال وتعال وفي الأخير مافي كاسة شاي فنجان قهوة..
لطيفه بنظرة/أخص عليك دحين أحلى شاي وقهوة كم خلودي عندي.
خالد/طيب بسرعة قبل المباراة ماتبدأ،اليوم الأهلي والإتحاد بيلعبوا عالكأس.
لطيفه بخبث/ يوووه شوف أسلاك التلفزيون مفصوله من وقت ماشبك محمد السوني وسابها.
راح للتلفزيون وبملل/خلاص أنا بزبطه أنتي بس جيبي الشاي والقهوة ولاتنسي الفصفص والمكسرات.
هزت رأسها بموافقة وراحت لندى/ندى حبيبتي أيش رأيك نروح المجلس نشرب الشاي هناك..
ندى/براحتك ياقلبي.
لطيفه بخبث/خلاص خدي صينية الشاي وأسبقيني وإنا بجيب الباقي وجايه وراكي.
أخذت الشاي وراحت المجلس ودخلت على طول بدون ماتنتبه لخالد اللي قاعد عند التلفزيون،ولما أنتبه للحركة في الغرفة ألتفت بحماس/كذا القعده تصير حماااا----
قطع كلامه لما أنتبه للبنت اللي طيحت صينية الشاي و ألتفتت له بصدمة،وماكانت صدمته أقل منها وهو شايف قدامه بنت لابسه تنورة سوداء قصيرة لنص الفخذ وبلوزة حمراء توب وكعب أحمر عالي..كانت بيضاء وشعرها أسود وواصل لبداية رقبتها،اتأملها للحظات قبل ماتنتبه ندى وتطلع بسرعة وقابلت لطيفه في طريقها، لطيفه ببراءة/أيش بك تجري كإنك شايفه عفريت.
كان وجهها أحمر وتنفسها سريع وبإرتباك/في واحد دخل وأنا في المجلس.
لطيفه بتمثيل/واحد مين! زوجي مو في البيت مسافر.
ندى بإصرار/أقلك في رجال لابس جينز جوه شفته زي ماأنا شايفتك دحين.
شهقت لطيفه بقوة/يوووه لايكون أخويا خالد، كان قايل إنه يمكن يجيني يتفرج مباراة الكأس.
ندى بعصبية/وأخوكي دا كيف دخل كدا بدون ماننتبه.
لطيفه بإعتذار/شكل الشغاله دخلته وماقالت الغبية.. معليش ندى سامحيني حبيبتي.. مو بقصدي أسفه.
ندى بإحراج/عادي حبيبتي عارفه إنه موقصدك..يلااا أنا ماشيه ونتقابل بعدين.
لطيفه/ندى أقعدي بلا هباله دحين بكلمه يروح.
ندى/لاياقلبي لازم أروح وأنتوا خدوا راحتكم.
وسلمت عليها وراحت ورجعت لطيفه المجلس لخالد وبخبث/لاتقول إن ندى دخلت هنا؟
خالد بلقافه/اللي دخلت دوبها أسمها ندى.
لطيفه/ياالله عالفشله دي..البنت وجهها قلب طماطم وجاتني ترجف ورفضت تقعد، لايكون قلت لها شيئ ياخالد.
خالد بإندفاع/وربي ماكلمتها هيا اللي داخله كإنها في بيتهم..هبلا ذي.
لطيفه بشرح/حرام عليك هيا ماتدري إنك هنا كانت تعدل مكياجها لما أنت جيت وأنا رحت أجيب الشاي ونسيت ماأقول لها إنك في المجلس، وهيا تشجع الإتحاد وكانت تبغى تتفرج المباراة زيك.
خالد/أهااا..أنا أستغربت من دخلتها كذا.. يلااا حصل خير.
وبعدها صارت تتكلم عن ندى كل ماقابلته وكل ماتكلمها تفك الإسبيكر علشان تسمعه صوتها، وعند ندى نفس الشيئ لحد ماتعلقوا ببعض وسهلت لهم المكالمات وصارت يتقابلا في السوق كل ماراحت مع لطيفه لحد ماقال لها خالد إنه يحبها ويبغى يتزوجها.
رجعت للواقع على صوت ليلى/يختي اللي ماخد عقلك..من دحين تفكري في العروسة الجديدة.
لطيفه بضحكة/وأنتي الصادقة أفتكرت الخطة القديمة وبدور وحدة جديدة..
|
09-12-15, 02:56 AM
جديد مواضيع قسم القصص المهجورة والغير مكتملة
العرض العادي
