كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
الورقه الخامسه
(استغفر الله واتوب اليه)
-----------------------
يقولون البعد ينهي كل شي، وأنا أقول.. مادمت أذكركم في دعائي في سجودي..
ستبقى اساميكم وملامحكم في نبضات قلبي..
ولن يزيدني البعد إلا… شوقا إليكم…
---------------------
بعد يومين وصلوا الضيوف وراح معاذ وعبدالرحمن يستقبلوهم في المطار…
وفي بيت ابو معاذ الكل مستعد ومتحمس لمقابلتهم بحكم علاقة ابو معاذ وابو خالد اللي اتعرفوا على بعض في المملكه من اكثر من 20 سنه، استمرت فيها الزيارات بين العيلتين ..ان كان في مواسم الحج والعمره او شغل ابو معاذ اللي يسافر له من وقت الثاني لمدينة جده، او زيارات ابو خالد وام خالد لصنعاء للسياحه وزيارة عائلة ابو معاذ..
وداد وعلياء بنات ابو معاذ الكبار وصلوا من العصر علشان يساعدوا ويجهزوا لأستقبال عائلة ابو خالد…
وداد تمشط لبنتها سوسن/جوجو.. الله يسعدك.. قولي ل علياء تشوف الكيك…
جوري/خلاص طلعته من اول..
وداد/روحي شوفي لك شغله مفيده ،الناس على وصول..
جوري بطفش/مافي شي اسويه البيت نظيف ومبخر وناديه وعلياء يجهزوا الشاي والقهوه والحلا.. وذول اتأخروا..
وداد بضحك/ يا ربي.. اللي يسمعك يقول بتأخذيهم بالأحضان، وانتي بالغصب تسلمي على عم محمد.. خلاص ليه مستعجله عليهم.
جوري بصدق/ مدري لما اكلم عم محمد في التلفون عادي.. بس لما يجي واسلم عليه وكذا استحي..هو يحسبني لسا صغيره يحضني ويلعبني ويشتري لي…
ضحكت بفشله ووجهها صار احمر وهي تتذكر حركاته معاها…. بس والله احبه كذا طيب ومايخلي احد يزعلني ويدافع عني زي أبي..
وداد بهدوء/ شاطره حبيبتي ،خلاص انتي صرتي كبيره ومايجوز اصلا يحضنك ويلعب معاكي زي اول.. بس ابي هيقلك تعالي سلمي، البسي البالطو والحجاب وسلمي عليه بأدب واتوكلي.. مش تجلسي مثل المره اللي فاتت وصوتك ماشاء واصل لعندنا..
دخلت ام معاذ وصارت تسمعهم وهي ساكته
جوري بضحك/ والله مالي دخل ،انا دخلت سلمت وكنت بخرج بس هو جلسني جنبه، وجلسنا نتكلم ونرجع الذكريات وجلست احكيله عالمدرسه و الحاره وكذا، والله كان يوم جميييل ،لما قال لي خلاص بطنه بتوجعه من كثر الضحك ركزت.. ولا معاذ من اول يغمز لي اخرج،وانا مانتبهت.. وبعدين لما خرجت لحقني معاذ وقال انه كان ناوي يضربني،بس عم محمد حلفه مايلمسني.. هههههههههههه مسكين انقهر،شفتي يحبني ويدافع عني علشان كذا انا احبه..
ام معاذ اتضايقت من كلام جوري البريئ لانها عارفه انها تحب ابو خالد مثل ابوها، وابو خالد كمان يحبها مثل بنته ،بس مو معناه انها تتزوج ولده وتروح معاهم السعودية ..
وبضيق/ جوري روحي غيري بيجامتك والبسي سوا…
جوري باستغراب/ليش اغير انا بلبس البالطو واسلم عليه من الباب..
ام معاذ بعصبيه/ اهم شي عندك ابو خالد.. طيب وام خالد ماتسلمي عليها..
جوري بصوت واطي/يمممه.. ليش اسلم عليها ماعرفها.. يعني من زمان ماشفتها خلاص مش لازم اسلم.. عندك البنات كلهم بيسلموا عليها..
استغربت وداد عصبية امها،ماعمرها عصبت على جوري وبسياسه/جوجو حبيبتي عيب، لازم تسلمي عليها،بعدين هم بيجلسوا عندنا مش في فندق يعني لازم هتقابلك وتشوفك ،روحي البسي وتعالي اسوي لك ظفيره هنديه،مو انتي تحبي اسوي شعرك كذا..
جوري تعض شفايفها وهي تفكر في امها المعصبه، راحت باست راسها ومسكت خدودها بشقاوه/خلاص بروح البس واجي اسلم عليها واخليها تتجنن وتموت فيا وتقول من ذي القمر اللي جات ،خلاص بزوجها لولدي ههههههههههه،يلا خليني اشوف الشمس (قصدها ابتسامتها) يلااا علشان اروح البس..
ضحكت وداد وام معاذ على حركاتها..
جوري بضحكه/ ايوه شوفي الدنيا كيف نورت.. والتفتت ل وداد/ياويلك تغيري رايك.
وداد تضحك/ والله اذا جيتي وقد لميت بكل سوسن ما امشط لك..
خرجت جوري جري قبل ماتخلص وداد كلامها..
وداد وهي تشوف امها تمسح دموعها/ يمه مالك، من ساعة ماجينا وانتي معصبه ،والله لو ما اعرفك كنت ظنيت انك متضايقه من جيت ابو خالد واهله..
ام معاذ/ الا متضايقه من جيتهم ..
وتابعت وهي تشوف صدمة وداد/ كيف ما اتضايق وهم جايين يخطبوا اختك..
وداد باستغراب/اختي من؟
ام معاذ بعصبيه من غبائها/يعني من مثلا.. علياء ولا شيماء.. اختك جوري.
وداد بصدمه/ جوررري.. بس جوري لسا صغيره، كيف يخطبوها.. ولمن..
ام معاذ/ والله قد خطبوا وتموا وهم جايين يمكن يعقدوا لها ولخالد هذي اليوميين.. سبحان الله جالسه تمزح وماهي عارفه انه صدق خطبها وخلص.
وداد بعدم تصديق/ متى خطبوها أبي كان مسافر ورجع من اسبوع.
ام معاذ/ خطبوها لما كان عندهم في جده، اخذوا الموافقه منه وجوا يتمموا.
انقطع كلامهم بدخول جوري المتهور كالعاده/ ما اتأخرت صح.. ههههههههه شوفي البكل مالميتيها..
جلست قدام وداد وهي معطيتها ظهرها، وبدأت تمشط شعرها وتظفره بضيق وهي ساكته..
دخلت ناديه وعلياء/الله الله ياجوري ،ايش الدلع والحركات ذي…
وقفت جوري بعد ماخلصت شعرها وهي تعرض فستانها بخجل/ صدق حلو..
ناديه بحب وهي تحصنها/ لا.. انتي اللي حلوه وحليتي الفستان.. صح يا بنات..
علياء تمثل الغيره/يممه ،ليش جوري شعرها اشقر وعيونها عسليه.. ماهي شبهنا ،لا يكون مو بنتنا وانتوا لقيتوها جنب المسجد ..
ام معاذ بابتسامه /بطلي هباله، واتكلمي سوا
جوري وهي تطلع لها لسانها / خليها تحسبني بصدقها زي زمان وانقهر.. بعدين ياكذاابه عيون أبي وعبادي مثلي حتى شعر عبادي مثلي.
علياء بلكاعه /اصلا هو مثلك لقيناه جنب المسجد.. ماتشوفيه شبهك شكلكم تؤام ههههههههههههه
جوري تهز راسها بيأس/تؤام بينا 4 سنين، يمكن اتولدنا بالتقسيط.
ناديه باستهبال/ وانتي ايش عرفك بالولاده كيف تكون… هااااا.
جوري ببرائه/ ما يحتاج لها ذكاء يا ام العريف تؤام يعني طفلين في نفس البطن ، يعني بيخرجوا طفل ويخلوا الثاني 4 سنين وبعدين يخرجوه.
وداد بحسره/ ومن اللي بيخرجه.
جوري بطفش/ الدكتوره من يعني،مو لازم عمليه علشان يخرجوا النونو من بطن امه..
والتفتت ل علياء المهم أبي قال اني شبه جدتي،وانتي موتي قهر وطلعت لسانها وخرجت..
وسابتهم مع ام معاذ اللي جلست تحكي لهم عن خطبة جوري وخالد..
يتبع
اريد أن استعيد طفولتي بكل تفاصيلها..
سئمت من حياة الكبار ،،ومن وجع الكبار..
---------------------
خرجت جوري عالحوش وراحت جهة الزرع اللي هو عشقها، وقفت عند شجرة الورد الجوري، كانت تحب ذي الشجره بشكل خاص، لأنها انزرعت وقت ولادتها وكبرت معها.. اتعودت ترعاها وتنظفها من الورق الذبلان والآفات وتهتم بسقايتها بشكل خاص وماحست بالوقت وهي تحوس وسط الشجر وتغني اغاني افلام الكرتون ومبسوطه.. لحد ماسمعت صوت اخوها
معاذ/اتفضلوا الله يحييكم.. البيت بيتكم.
ابو معاذ /الله يحييك ،ماقصرتوا يا ولدي وتعبانكم معانا
عبدالرحمن / مافي تعب ،احنا اهل الله يسلمك.
وقفت بربكه "ياويلي ،ليش خرجت، والله معاذ بيوريني شغلي" اتخبت وراء جذع شجرة التين الضخمه وساعدها وجود الشجر المنتشر قدامها انها ماتبان خاصة انه محد مركز..
دخل ابو خالد وزوجته في البدايه، ووراهم
معاذ وعبدالرحمن اللي شايلين الشنط ووراهم خالد شايل شنطة ملابسه..
معاذ وعيونه عالارض/ اتفضلي ياخاله باب الحريم هناك ،وانا بدخل اغراضكم…
راحت ام خالد ودخلوا الرجال..
خالد بطفش/ اسبقوني.. نسيت شي في السيارة، حط شنطته عالباب وطلع..
حست جوري انهم راحوا وطلعت تتسحب من وسط الشجر وجريت باسرع ماعندها ووووو طاااااااخ.
صدمت في جدار وطاحت عالارض بقوه..
قامت تنفض ملابسها وبألم/ وجعتني ياغبي ووسخت ملابسي.. شهقت وتابعت … عبدالرحمن شوف دم..
مدت يدها المجروحه توريه ورفعت راسها، لقت رجال قدامها،تنحت ويدها ممدوه في الهواء وعيونها ترمش بسرعه وكلها دموع ووجهها صاير احمر من الخوف..
أما خالد اللي دخل بعد ماجاب جوازه من السياره ،حس بشي صدم فيه وطاح نزل راسه وشاف بنت عالأرض وقفت وهي تسب فيه،كانت لابسه فستان ازرق فاتح نص كم يوصل لتحت ركبتها و بحزام بني عالخصر ولابسه صندل بني ، شده شعرها الاشقر وعيونها العسليه اللي كلها دموع، صار يتأملها وفي نفسه"ياقلبي عالشقراء دي.. تجنن،شكلها صغيره وخايفه" شافها ماده يدها وفيها جرح ونازل منه دم، مسك يدها
وبحنان/ معليش حبيبتي عورتك.. اشوف وريني.. مد يده الثانيه لوجهها مسح خدها بشويش/ لاتخافي جرح صغير وو
دفت يده وشهقت بقوة /يممممممه… وجرت عالبيت..
خالد فك عليها ضحك/ ياحليلها الحلوه، خافت مني.. بس مين دي...
وكمل طريقه ودخل ونسي اللي صار..
دخلت جوري وهي تبكي من الخوف "ياويلي من ذا.. من وين جاء الغبي ،الحمار جالس يتفرج عليا قليل الأدب"
علياء/ليش تبكي ،مالك..
جوري مدت يدها بارتباك/طحت وجرحت يدي.
علياء وهي تمسح دموعها/بس كذا.. صايره دلوعه، شوفيه جرح صغير احط لك لصق ويخف.
سحبت يدها/عندي لصق انا اسويه.
علياء/غسلي الجرح اول ..وبسرعه تعالي سلمي..
غسلت وجهها ويدها وحطت عالجرح لصق وراحت المطبخ تشرب ولقت وداد اختها جوري بشويش/بدخل اسلم بس تدخلي معي.. وبعدين انتي تخرجيني..
وداد بضحكه/ طيب بس اجلسي شويه..
دخلت وهي ماسكه يد جوري اللي عينها عالارض ومستحيه ..
جوري بصوت واطي/السلام عليكم..
الكل رد السلام.. ورفعت راسها شافت مكان الحرمه وراحت سلمت عليها وباست راسها.
ام خالد باعجاب /تسلمي حبيبتي، ماشاء الله تبارك الرحمن يا ام معاذ قمر الله يخليها لك.
جوري في نفسها"مالهم اليوم،كل واحد شافني حبيبتي،حبيبتي"
ام خالد /كيفك جوري.
جوري بهمس /الحمد لله.
ام خالد/سنه كم تدرسي.
جوري / ثاني اعدادي.
ام خالد بمحبه/ شكلك نسيتيني.. منتي فاكرتني ابدا..
رفعت جوري راسها وهي تدقق في وجهها واستحت منها وهي تأشر لها بلا..
ام خالد / انا اعرفك من وانتي في اللفه،بس اخر مره شفتك يمكن قبل 5 سنين.
مارت عليها وطالعت في وداد بترجي..
وداد بتصريفه/جوري.. روحي شوفي سوسن لاتكون راحت الحوش..
جوري ماصدقت وعلى طول خرجت، راحت لغرفتها ولقت سوسن وشيماء اختها يلونوا ويرسموا، غيرت ملابسها وجلست تذاكر..
بعد صلاة المغرب
عند الرجال وبعد الترحيب والقهوه والشاي..
ابوخالد/يابو معاذ ويالوجوه الطيبه،انا جاي اليوم وطالب القرب منك في بنتي جوري، واتمنى انك ماتردني.
ابومعاذ/مثلك نسبه ماينرد، ويزيدنا شرف يابوخالد، وانا اعطيتك موافقتي من قبل ،
والتفت لخالد وحط يده على كتفه/وما بنلقى احسن من ولدنا لبنتنا..
ابتسم خالد بتوتر وباس راس ابو معاذ/تسلم ياعم صالح ماعليك زود.
ابوخالد/دام وافقت كنت حاب نتمم الملكه بسرعه وحاضرين لكل طلباتكم من ..
قاطعه ابو معاذ/ البنت بنتك يامحمد جاتك من الليله بدون طلبات وشروط.
ابوخالد بفخر/تسلم وماتقصر ..قول وفعل ياصالح.
ابو معاذ/ إذا انت صامل اجيب المملك الليله ونتوكل على الله.
التفت خالد على ابوه بأرتباك وصدمه واضحه مافاتت على ابو معاذ/وإذا حابين نأجل الملكه ماعندي مانع، انت فصل واحنا نلبس..
ابو خالد بحزم/إذا ماعليك أمر نتوكل على الله ونتمم الليله.
ابو معاذ ينهي النقاش/معاذ.. روح جيب المملك* ***.
اتبادل معاذ النظرات المصدومه مع اخوه عبدالرحمن واحمد ومحمد ازواج وداد وعلياء لأنهم كانوا فاهمين انها خطوبه مو
الملكه.
وقف عبدالرحمن ومعاذ/ ابشر يبه، لكن لوسمحت دقايق بس..
خرجوا من المجلس ولحقوهم احمد ومحمد معاذ بصوت واطي/يبه انت صدق بتملك لجوري الليله..
ابومعاذ / ليش ذي الامور فيها مزح ولا كيف.
عبدالرحمن بعصبيه/يبه جوري صغيره عالزواج، وانت قلت انها خطوبه بس.
معاذ/ ليه ماقلت لنا من اول.
ابو معاذ بحده/ والله انا ابوها والشور شوري، ولا استئذن منكم.. لامت وصار شورها بيدكم يصير خير ياعيالي..
احمد زوج وداد/ حاش لله ياعم صالح،والله ماقصدهم،الله يطول في عمرك.
محمد زوج علياء يأشر لمعاذ وعبدالرحمن
يبوسوا راسه/هم خايفين لأنها صغيره ياعم. معاذ باس راس ابوه باعتذار/ مسافة الطريق واحنا عندك إن شاء الله.
راح معاذ واحمد يجيبوا المملك، والبقيه راحوا للحريم يعطوهم خبر باللي صار ..
--------------------
اما عند خالد اللي رافض فكرة الملكه نهائيا.
خالد بعصبيه/ابويا،احنا مااتفقنا على كذا… انت قلت اشوف البنت وحدنا خطوبه… لكن تدبسني انت وهوا… لا ..
ابو خالد باستنكار/ ندبسك ياقليل الحياء، انت تبغى تفشلني مع ارحامك.
خالد بتريقه/ خلاص صاروا ارحامي، واي فشيله الله يخليك،الرجال كأنه ماصدق قال اجيب المملك و…
قطع كلامه بصدمه لما حس بكف على وجهه وسمع صوت ابوه الغاضب/ياعديم التربيه، ابو معاذ ماينقال عليه كذا… احد قلك بنته بايره ولا فيها عيب علشان يرميها عليك ،، الناس تشتري نسب ابو معاذ بالذهب ياتعبان وبنته جاها بدل الخطيب عشره.. اصل وفصل ومنصب،وهواللي كان يردهم قدامي
والرجال من طيب اصله ومحبته لنا وافق عليك، وحب يتجمل معانا ،ولا طلب ولاشرط وفكر انه يشتري رجال،، لكن خسارة المرجله فيك دام ذا تفكيرك..
حاول خالد يستوعب كلام ابوه مع انه حاقد وباس راسه ويده/ حقك عليا يابويا، والله ماقصدي افشلك ، لاعشت ولاكنت ان عملتها
بس انا مابغى اتسرع،اتفقنا على خطوبه اشوف البنت واعرفها وملاحقين عالزواج.. وتابع بضيق/ انت عارف وضعي وانا مو مستعد اعيد اللي صار.. كل الموضوع اني اتفاجأت بس…
حط ابو خالد يده على كتف خالد وشد عليه / علشان وضعك انا استعجلت الملكه، ابغاك تشوف البنت وتجلس معاها علشان تنسى وترتاح، وانا ما اخترت لك اي وحده، انا اخترت لك اللي ظفرها يسواها ويسوى كل قبيلتها، انت شوفها ورح تدعيلي.
خالد باستسلام وضيق من السيره/ اللي تشوفه اعمله.
بعد صلاة العشاء امتلى المجلس بالرجال اللي كلمهم ابو معاذ يحضروا الملكه وكانوا من الجيران والاقارب ،وجاء المملك وتمت الملكه على خير وارتفعت اصوات الرجال بالتهاني والتبريكات وسط ذهول خالد اللي اتفاجأ بوجود الرشاشات والبنادق اللي كل واحد معلقه على كتفه.. وثواني امتلت السماء بصوت العيارات الناريه اللي اطلقها معاذ واللي معاه(كتعبير عن الفرح واعلان عن مناسبات الزواج في اليمن)
وعند الحريم كان الوضع مشابه للرجال بسبب توافد الجارات اللي حضروا الملكه واول ماوصلهم صوت طلق الرصاص بدأت موجه من الزغاريط والتهاني والدموووع من ام معاذ وام خالد وبعض الجارات الكبار في السن ووسط دعاء لاينتهي بالسعاده والفرح للعرسان..
اتعشوا الضيوف وانفض المجلس على خير..
ابومعاذ/ عبدالرحمن شوف لي امك وين..
جات ام معاذ وهي تبكي/ الف مبروك يابو معاذ.. الله يوفقهم.
ابو معاذ يحضنها بحنان/ ايووه ذا الكلام ادعيلهم بالتوفيق والصلاح، وين عروستنا علشان اكلمها وافهمها.
ام معاذ بحسره/جوري نايمه،انت عارف وراها قومه من الفجر وعندها مدرسه. .
وتابعت بخوف/انا مدري ايش هتسوي لما تروح المدرسه ويباركوا لها البنات عالملكه.. والله لاتمرض،انت داري انها ماتتحمل.
ابو معاذ بقلة حيله/خلاص بكره تغيب، واول ماتجيني الفجر بكلمها لاتشيلي هم.. المهم جهزتوا غرف الضيوف الناس يناموا ويرتاحوا ومن اصبح افلح..
ام معاذ/ خليهم يتفضلوا لفوق كل شي جاهز..
-------------------
في الدور الثاني اللي مخصص للضيوف دخلت ام خالد على زوجها وولدها/ السلام عليكم..
ردوا السلام ووقف خالد يسلم على امه اللي حضنته وهي تبكي من الفرحه/الف مبروك حبيبي،الله يتمم لكم على خير..
خالد بمجامله/ يبارك فيكي ياغاليه ولايحرمنا منك..
ابو خالد/بشري.. كيف شفتي العروسه؟
ام خالد والابتسامه شاقه الوجه/ لا اله الا الله، تبارك الرحمن ..تقول للقمر قوم وانا اقعد مطرحك.
خالد باستهزاء/اوووف،لذي الدرجه.
رمته بالمخده/تتريق.. وربي ماكذب ادب وتربيه ماعليها كلام.. وشقار وعيون عسليه وبياض،تجنن الله يحفظها.
خالد باستغراب/ امااااا، امي من جد ولاتمزحي.. من وين بتجيب الشقار والعيون العس.. سكت فجأه وفي نفسه" الاذيك البزر كانت شقراء وعيونها عسليه.. شكلها اختها الصغيره.. احلللى، لو شبها ياحظي"
ابوخالد يحرك يده قدام وجهه/ يابو الشباب وين وصلت..
خال بفهاوه/ هاااا… لا، بس اقول لمين طالعه..
ام خالد/ امها تقول انها شبه جدتها لأبوها وحتى تشبه لأخوها عبدالرحمن..
خالد يتذكر ملامح عبدالرحمن الوسيم وبشك/ امي حبيبتي انتي،كلام اكيد.. اخاف تمشيني وانصدم بوحده شبه المفك.
ابو خالد باستغراب/ مفك! ايش مفك؟
خالد/ بالعربي معفنه، شاكوش.. وبعدين انت عارف اليمن مو زي جده.. اخاف البنت مالها في اللبس والحركات ،وماعندها اسلوب..
ام خالد بعصبيه/ بلا كلام فاضي، ترى اليمن جنب السعودية.. والناس عندهم خير ومو مقصرين عالبنت، ولاتنسى انهم على طول بيروحوا جده ،حتى كلامهم زينا مو يمني مررره..
ابو خالد ببرود/ لاتنسى اصلك ،تراك يمني اذا نسيت، وخلك رجال وسيب كلام الحريم الماسخ،ادري انه مو كلامك وذا كلام لطيفه ووليلى،بس حسابهم معايا لما نرجع، وانت ان سمعت انك مزعل جوري بكلمه لا انت ولدي ولا اعرفك..
خالد بضيق/ ابويا الله يخليك ترى ماقلت شي ..مو كفايه اتدبست.. قصدي ملكت بدون ماشوفها،كمان ما اسأل..
وبنذاله/ بعدين ايش عندك ! مصر عالبنت وتدافع عنها ..لا تكون ماخذني كوبري يا.. ماكمل لان ابوه ضربه على راسه بحقد/ ياكلب،انا تقلي كوبري ياحيوان يابهيم، سكت لما قام خالد كتفه بقوه وهو يضحك/والله امزح، بعدين ايش فيها يدك اليوم تحكك عليا ..
ام خالد تتشمت/هههههههههههه تستاهل ،
المهم بكره تشوفها وتحكم، ان شاء الله انت تعجبها.
خالد بغرور/ ههه.. هيا تطول خالد محمد* * نص بنات جده راميات عندي ..
ابو خالد يرفسه برجله/انقلع نام ياللي ماتستحي ،فرحان بوجهك ذا..
خرج من عندهم وهو يضحك.. وراح نام وهو يتخيل شكل جوري كيف هيكون وراح في النوووم بدون مايحس..
انتهى البارت
ايش هتكون ردة فعل جوري لما تعرف بزواجها…
وخالد ايش سره وايش صار له قبل…… و كيف هيتصرف لما يشوف عروسته
لاتحرموني ردودكم
لاحول ولاقوة الا بالله العلي العظيم
|
05-12-15, 05:15 PM
جديد مواضيع قسم القصص المهجورة والغير مكتملة
العرض العادي
