(ريم)
عائلة ليلى: أحمد أبووليد 41 سنة ،ريم 14 سنة،وليد 11سنة،لميس 8سنوات.
طالعت ليلى في ساعتها"يالله اتأخرت عليه" لبست عبايتها وراحت لغرفة بنتها ريم، فتحت الباب لقته مقفول،وبحدة/ريم خلصيني، فكي الباب.
فتحت الباب وطالعت في أمها اللي باين من مكياجها وعبايتها إنها طالعه،وببرود/هلا ماما..ليه معصبه.
ليلى/مو معصبه،مستعجله اتأخرت عالبنات في الزواج ،المهم يمكن اتأخر سبت فلوس عالتسريحة للعشاء،شوفي أخوانك فين ولاتنسي تقفلي الباب.أوكي .
هزت رأسها بإستهزاء لأمها اللي خارجه في ذا الوقت المتأخر بليموزين بدون حسيب أورقيب.
دخلت غرفتها وقفلت الباب وفتحت المسنجر،ريم/معليش عدوله ماما كانت تبغاني.
عادل/وأمك ذي ماتفتكرك غير وأنتي معايا، أوقاتها مره غلط حبي.
ريم/كويس اللي أفتكرتني اليوم..بالعاده ماشوفها ياليومين بس يمكن لإن بابا بكره جاي،تبا تزبطني.
عادل/والله أمك فالتها خرجات ودخلات، وين تروح.
ريم/ ماما صاحبة واجب مع كل الناس ،إلا إحنا.
عادل/طيب حبي سيبينا منهاوخلينا في موضوعنا..هاا متى ترحميني وتوافقي أشوفك.
ريم/بيبي أنسى..طلعه معاك مو طالعه،لا تحاول.
عادل/ياحبي منتي واثقة فيا يعني..بالله أيش بسوي لك..بنتقابل في كافيه ولامول.
ريم/سوري بيبي،أنت عارف أنا من الجامعة للبيت ومالي طلعات غير مع بنات خالي، وخالاتي..
عادل/خلاص أسحبي عالجامعة واطلعي معايا،وهرجعك قبل دوامك مايخلص.
هزت رأسها بيأس منه،صار له 3 شهور من وقت اللي أتعرفت عليه عالنت وأرسل لها صوره، وله أسبوعين يحاول يقنعها تقابله، والمشكلة قالت إنها طالبة جامعية في ثالث سنة،لو يدري إنها في ثالث متوسط هيحقد..ضحكت وهي تتخيل منظره لو عرف،وكملت سوالف معاه.
(ياسمين)
اليوم الجو حلو ومافي رطوبة وخرجنا البحر بعد العصر بعد ماترجيت ماما إنا نطلع رغم إنا في وسط الأسبوع ،وبعد تفكير أقتنعت علشان نغير جو قبل إمتحانات أخر السنة اللي هتكون في شهر 7يعني بعد شهر.
وزعت كاسات القهوة والشاي للكل ،وألتفتت لأمها/ماما..جبتي الأونو معاكي.
جوري بإبتسامة/لا تخافي جبتها وجبت الكيرم والشطرنج والدومينو وكل وسائل الترفية..
قصي/ماما،بابا يقول وين الحلا.
ضربت جبينها بخفه/ييييي نسينا الرجال..
وزعت لهم التشيز كيك والبسبوسة في صحون وأعطتها لقصي ونادر اللي ودوها للفرشة الثانية اللي جالسين عليها خالد ورائد ومؤيد وأبو ندى..
فاطمة/تسلم يدك جوجو..كيكة الدخن تجنن.
مسحت جوري بطن فاطمة/بالعافيه على حبيب عمته..بطنك بدأت تبان وشكلك محلوه مع الحمل.
فاطمة وهي تأكل/أمممممم،صار مايهجد بس يحوس ياقلبي عليه..ومو مصدقة متى أولد.
أم ندى/دوبك في الخامس يا بنتي على أيه مستعجله.
أم خالد/الله يقومك بالسلامة ،ويقر عينكم بيه يارب.
لبنى/لو بنت سموها لبنى
فاطمة برفض/كان ودي ياقلبي وتطلع حلوه زيك..بس ميدو يبغى جوري.
رفعت جوري رأسهاوبلكاعه/بلاهباله..أدري إنكم تموتوا عليا،بس جددوا بإسم حلو غير أسمي.
ندى/خلاص سموها ندى،أنا موافقة.
غصت فاطمة باللقمة وفي قلبها"أيوووه ، علشان مؤيد يطلقني في المستشفى"
أعطتها جوري مويا ودقت ظهرها بضحكة. لبنى بتصريف/لا ،زي ما قالت جوري نبا نجدد الاسماء في عيلتنا.
فاطمة/والله أهو عندكم أختلصوا معاه.
جوري بنظرة للبنى/بركة اللي لقيتي وقت و فضيتي لنا لولو خانوم..
رمتها لبنى بالمناديل/جوجو بلا تريقة، وربي المشغل آخذ كل وقتي حتى رورو حبيبي مستلمني عالطالعه والنازله..واليوم بالعافية جيت.
أم خالد/يا بنتي الرجال يبغى حرمته تداريه وتداري بيته،وأنتي من الساعة 5العصر في المشغل لين الساعة 11الليل..وين الوقت اللي بتقعدي فيه معاه ومع عيالك.
لبنى بطفش/أيش بكم عليا كلكم..شكلكم متفقين.
ضربتها جوري على كتفها بخفه/بلا عباطه..أحنا قلقانين عليكي،عموماً حاولي توفقي بين شغلك وبيتك وإذا ماقدرتي فبيتك أولى فيكي.
هزت لبنى رأسها بموافقة.. وأنتبهت جوري لياسمين اللي راحت بعيد عنهم وجالسه تتأمل البحر..راحت لها وجلست جنبها وهي ماحست عليها،حطت يدها على رأسها ومسحت عليه بحنان/حبيبتي في مين سرحانه؟
أنصدمت جوري لما سمعت صوت شهقاتها، لفت وجهها وشافتها تبكي،ضمتها بخوف وبصوت حاولت يكون هادي/ياسمينتي.. أيش اللي مضايقك وخلاكي تبكي ياقلبي، أنتي ليكي فترة مو على بعضك بس قلت أسيبك براحتك لحد ماتجي وتحكي لي من نفسك..مو أحنا صحبات ومانخبي على بعض.
هزت رأسها بموافقة وزادت في ضمتها لأمها، صار لها شهر من وقت اللي شافت فيه خلود بنت عمتها لطيفه مع
عبير وشلتها،كانت صدمتها كبيرة،ماتوقعت إنها تشوف ذاك المنظر اللي شافته يومها،ولا ..مع قريبتها اللي بمثابة أخت كبيرة لها،أحتارت وماعرفت تتصرف كل اللي عملته إنها صارت تتهرب من خلود وتتجنبها..
بعدتها جوري عنها بشويش/أنتي عارفه أنك تقدري تقولي لي أي شيئ بدون ماتخجلي مني،حتى لو غلطتي صح؟
مسحت دموعها وبرجفه/بس الموضوع مايخصني..كيف أتدخل وأقول لك.
جوري/أنا معاكي إن كل إنسان ليه خصوصية لازم نحترمها بس إذا الإنسان ذا يهمنا وأحنا شايفين إنه بيسوي شيئ غلط،أو بيضر نفسه بتصرف،أو بيغلط على غيره مو لازم ننصحه ونحاول نساعده علشان يتصرف صح! بعدين الرسول عليه الصلاة والسلام قال:الدين النصيحة..يعني واجب علينا ننصح سواء الأشخاص اللي نعرفهم أو الأشخاص اللي مانعرفهم كمان .
عضت ياسمين شفتها وبقلق/طيب،إذا كان في شخص يهمك وعمل شيئ غلط كيف ممكن أساعده..هوا طيب ومؤدب بس في ناس ضحكوا عليه وخلوه يعمل حاجات غلط.
جوري بتفكير/حسب الغلط..في أغلاط الواحد ممكن يتغاضى عنها لفترة على أمل إن صاحبها يتراجع عنها من نفسه،وفي أغلاط بيلزم لها حل سريع وماينفع التهاون فيها..
ياسمين/وكيف أعرف هيا من أي نوع.
جوري بإبتسامة/أنتي لما شفتيها حسيتي إنها من النوع الأول ولا الثاني.
ردت بإندفاع/التاني.
جوري/خلاص أمشي وراء أحساسك، ولاتنسي إن الإنسان بطبيعته بيرتكب ذنوب ومعاصي كثيرة،بس في معاصي الواحد دائماً لازم يتجنبها ويحاول يجاهد نفسه علشان لا يرتكبها لإن ذنب عن ذنب يفرق..
ياسمين/معاصي زي أيه.
جوري بهدوء/زي الكبائر،وهيا أجرم الأثام والذنوب في الدين، قال الرسول صلى الله عليه وسلم: (أكبر الكبائر الإشراك بالله وقتل النفس وعقوق الوالدين وقول الزور أو قال وشهادة الزور)، ومنها السبع الموبقات أي المُهلكات مثل ماجاء في الصححين البخاري ومسلم وغيرهم، قال الرسول صلى الله عليه وسلم : (اجتنبوا السبع الموبقات، قالوا: يا رسول الله وما هن؟ قال: الشرك بالله والسحر وقتل النفس التي حرم الله إلا بالحق وأكل الربا وأكل مال اليتيم والتولي يوم الزحف وقذف المحصنات المؤمنات الغافلات)
أخذت نفس وتابعت/والعلماء وأهل السنة أختلفوا في عددالكبائر، منهم اللي قال إنها سبعة،ومنهم قال سبعين، ولكنهم أجتمعوا على إنها كل ما اتفقت الشرائع على تحريمه ومن ضمنها:ترك الصلاة اللي طبعاً بيعتبر تاركها كافر..ومن الكبائر كمان الزنا،منع الزكاة ،اللواط،شرب الخمر..وأشياء كثيرة غيرها.
في حاجات المفروض ماينسكت عنها ولازم تنصحي اللي بيسويها لإن ذنبها وأثمها عظيم عند الله عز وجل.
ياسمين بخجل/طيب في شيئ حاصل عندنا في المدرسة،كان في البداية مقتصر على كم بنت،بس بعدها كبر وأتطور ،أنا عارفه إنه حرام لإنه درسنا حكمه في الفقه..بس البنات بيسووه في كل الأحوال.
جوري بإهتمام/هوا ذا اللي قصدته لما قلت بعض الأغلاط لازم لها تدخل وحل سريع، لإنك قلتي كان بسيط وبعدها كبر..أكيد كبر لإنهم مالقيوا أحد ينصحهم ويوجههم..أحكي اللي حاصل وأحتفظي بالأسماء إذا يريحك ذا الشيئ.
هزت رأسها برفض/لا هقولك كل شيئ وأنتي أتصرفي..
وبدأت تحكي لها اللي،شافته واللي سمعتها بعد كذا من البنات وهي تشوف الصدمة على وجه أمها مع كل كلمة تقولها.
(عبدالرحمن)
عائلة عبدالرحمن:زوجته غنى 29سنة،جود 3سنوات.
حط جوازه في الدولاب وهو ملاحظ نظرات غنى المهمومه،جلس جنبها ومسك يدها/أنتي ذحين ليه زعلانه، كلها 3شهور وراجع أن شاء الله..بعدين أنا بزوركم في ذي الفترة مابغيب نهائي.
غنى بغيرة/أيووه،وهناك تجلس تتفرج عالبنات براحتك وأنا هنا منتظره.
انفجر عبدالرحمن ضحك/هههههههههههه ، بس هو ذا اللي مزعلك ،البنات،على أساس صنعاء مافيها بنات.
غنى بقهر/لكن بنات جدة غير..حلوات ومتشيكات عالأخر وبيخرجوا كاشفات.
ضرب رأسها بخفه وبتريقة/ إلا أنا مالتلكيش بنات صنعاء قدهم مثلهم وأخس..قبل يومين خربت سيارتي وركبت الباص،يا ركبت معانا وحده أووووف أيش أقلك بس، هي للأمانة محجبة لكن متمكيجة ولابسة النظارة الشمسية وأيديها كلها مناكير وخواتم وعطرها صرعنا من قوته..السواق كان هيصدم بنا في ذمتها..تقولي بنات جدة!
قد بنات المسلمين كلهم كذا،إلا من رحم الله علشان لانظلم الناس بس.
شهقت غنى وبحقد/الله لاربح إبليسك،عادك جلست تتفرج عليها لما قدك بتوصفها كذا.
عبدالرحمن بجدية/لا والله ماشفتها،أصلا أول ماشميت عطرها فتحت طاقة الباص وخرجت رأسي،مش مجنون أتحمل ذنبها، لكن الركاب الله يهديهم بعد ما نزلت جلسوا يتكلموا عليها..
غنى بغيرة/أكيد حبيبي،ولا بتضحك عليا.
ضمها عبدالرحمن وبحب/بالله عليكي أحد معاه 3أقمار ويروح يدور خارج.
دفته بحدة/نعععم ،أيش قلت!3أقمار من فين..أو أتزوجت عليا.
هز رأسه بيأس من مخها اللي يروح للحريم على طول،مسك يدها وصار يعدد/أول قمر وأحلاهم وحده غيورة وهبلا عيونها رمادية أسمها غنى، وثاني قمر طالعة غيورة لأمها وأسمها جود، وثالث قمر وهي القمر الأصلية لإنها الأولى وأسمها جوري..أرتحتي.
طالعت فيه بإبتسامة وبدلع/هذول سهل بسامحك فيهم..لإن الثانية قطعة من حبيبي، والثالثة نص حبيبي الثاني واللي أصرت عليه يتزوجني..يعني الفضل لها بعد الله في إني أتزوجتك.
طالع فيها بحقد/أمانه..أحلفي بس،ومن اللي جابها لبيتكم وقلها تروح تشوفك وتتعرف عليكي.
غنى بلكاعه/والله اللي جابها قلها روحي شوفي وإذا عجبوكي أهلها وعجبتك البنت أتوكلنا،وإذا ماعجبتك خلاص أصرفي نظر.. مش هذا كلامك ولا نسيت ياحبي.
حك رأسه بإحراج/أنا غلطان اللي قلت لك، بعدين أيش أقلها يعني،أنا جيت أخطب علشان عبدالإله أخوكي،ولا أنتي من وين أعرفك..بس قلت مادام الرجال كذا أكيد أخته حلوه..والحمد لله طلعتي نسخته الأنثوية،ربنا شاف لك و ماطلعتي شبه أخوكي بكر ولا كنت بطلت.
ضربته على كتفه بزعل/كذاب،أصلا عبدالإله وأنا مانتشابه غير في العيون.
حوط كتفها بذراعه وبجدية/ أنا لماقابلت أخوكي في أول يوم لنا في السكن،قلت شكله رجال،وبعدها طلعنا في نفس الجامعة وأتعرفت عليه ودرسنا 6سنين سوا في الغربة،يعني أتعلقنا في بعض وصرنا أعز الأصحاب ،ولما رجعنا حبيت أقوي علاقتنا بالنسب،وأتفقت مع جوريتي لما تجي في الأجازة تجي وتتعرف على أهلك وتم النصيب والحمد لله.
طالعت فيه بحب وفي نفسها"الحمد لله إنك نصيبي"ورجعوا يكملوا سوالفهم وهبلهم.
أنتهى البارت
أنتظركم..دمتم بخير.
أستغفر الله الذي لا إله إلا هو الحي القيوم ،وأتوب إليه
08-12-15, 11:31 PM
رد: خريف الحب / للكاتبة خياله،،والخيل عشقي
جديد مواضيع قسم القصص المهجورة والغير مكتملة
العرض العادي
