كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
اللهم إني أصبحت أشهدك.. وأشهد حملة عرشك.. وملائكتك..وجميع خلقك أنك أنت الله..لا إله إلا أنت.. وحدك لا شريك لك..وأن محمداً عبدك ورسولك.
----------------
الورقة السابعة عشر
من أهم أسرار السعادة أن يتذكر الإنسان ما لديه من نعم قبل أن يتذكر ما لديه من مشاكل وهموم..
-------------------
أبتسمت وحطت كوب قهوتها عالطاولة وجلست قدام الأله الكاتبة ومررت أصابعها عليها بحنين وهي تتذكر لما طلبت من خالد يشتري لها وحده وكيف إستغرب لما عرف إنها تطبع بطريقة بريل،بعدها ظلوا فترة يدوروا لحد ما فاجأها بوحدة طرازها أحدث من اللي كانت معاها،يومها فرحت بشكل كبير خاصة إنها ماكانت تقدر تكلم أحلام براحتها بسبب أسعار المكالمات الدولية،فكانت تكتفي بالسلام والسؤال عن الحال بشكل عابر من وقت للثاني..لكن بعدها صارت تتراسل معاها بشكل أسبوعي ويوافوا بعض بأخر المستجدات في حياة كل وحدة فيهم.. أترددت كثير قبل ما تقرر إنها تكتب لأحلام عن زواج خالد ..خاصة إنه مر عليه إسبوعين ولسا أهلها مايدروا..بس صار لازم يعرفوا.. فردت أصابعها بتوتر وسمت بالله وبدأت تكتب..
(أحلامي الغالية)
السلام عليكم ورحمة الله وبركاته..
اتمنى توصلك رسالتي وأنتي في أحسن حال وبصحة جيدة. أحلامي أشتقت لك بشكل ما تتخيليه..أشتقت لملامحك الطيبة وصوتك الهادئ.. أشتقت لحضنك الدافئ.. أشتقت لجلساتنا سوا ومذاكرتنا ولمتنا مع البنات.. أشتقت لأيامنا الحلوة اللي كان فيها أكبر همي فيها إنه يمر صباحي بدون ماأشرب قهوتي مع أبويا..إني يمر عليا يوم بدون ما أطلع السطوح مع عبدالرحمن.. أو إني أروح المدرسة وما القاكي جنب البوابة تنتظريني،أو أتسلق شجرة التين بدون مايصيدني معاذ..أو إني أجيكم البيت وما يكون علي موجود وأطفش بدونه.. كبرنا وكبرت معانا همومنا وأتغيرت الأشياء اللي صرنا نخاف منها..صرت أخاف من إنشغال أبويا عليا وخوف أمي، أخاف من نبرة الشوق واللهفة اللي في صوتهم لما يكلموني،أخاف من معاذ وعلي وعبدالرحمن اللي على طول بيتصلوا علشان يعرفوا أحوالي.. أخاف أحد فيهم ينتبه لنبرة حزن أوضيق في صوتي،ينتبه لآه حنين أو شوق ،لكلمة تفلت مني بدون قصد وتحسسهم بعذابي في بعدي عنهم..
(أحلامي) أشتقت لكم لحد الوجع.. صرت أنتظر الأجازة بفارغ الصبر وأنا أدعي أن أموري تتسهل وأقدر أزوركم بدون تأخير.. لكن أول مرة أخاف من قرب الأجازة. خايفة من المواجهة واللي هيصير فيها..خايفة من زعل أبويا وأمي..من غضب علي وتهور معاذ، من غيرة عبدالرحمن، ومن قلبك الطيب..
أحترت كيف أوصلكم الخبر ،وبالأصح كيف أوصلكم الخبر وأنا بعيدة عنكم..كنت أتمنى أكون موجودة على الأقل أقدر أشرح لكم وأفهمكم دوافعي..أقدر أطمنكم وأريح بالكم عليا،أقدر أوريكم إني قوية وأتحمل أي شيئ في بعدكم.. أنتي أكيد مستغربة المقدمة الطويلة ذي..لكن لاتخافي ولايروح بالك بعيد،كل ما في الموضوع إن (خالد أتزوج) فقط لاغير..يعني كل شيئ في الحياة ماشي وفق نظامه الطبيعي..الشمس بتشرق من الشرق..أيام الأسبوع ثابتة..الطيور بتهاجر وترجع لموطنها الأصلي..مافي شيئ أتغير، حتى حياتي ماأتغيرت ولا أختلفت بزواج خالد، مر على زواجه أسبوعين وأنا مرتاحة ومبسوطة ومافي،أي شيئ يخليكم تقلقوا أوتخافوا عليا منه..عايشين مع بعض ومستقرين ولله الحمد..
أدري إنك ماهتصدقيني بس كوني متأكدة إني ما زعلت لإنه أتزوج أو حتى غرت..وعلى فكرة أنا حضرت زواجه ورقصت كمان..أيش رأيك فيا،قلت لك إني قوية ومو أي شيئ يأثر فيا بسهولة..الظاهر كلام علي ومعاذ طلع صح.. ماعندي مشاعر وأحاسيس،ولا أنا رقيقة زي باقي البنات..شفتي كل شيئ له حكمه..المهم أنا قلت لك الخبر لإني ماهقدر أمتص غضبهم وإنفعالهم وقت مايعرفوا، لكن وجودك جنبهم هيساعدني هتكوني حائط دفاعي الخاص،هديهم وحاولي فيهم يكونوا عقلانيين علشان ماألقى علي ومعاذ على أول طيارة..يمكن طلبي صعب وثقيل عليكي، لإنك هتكوني زعلانه بنفسك..بس أنتي أكثر وحدة عارفة أحساسي وإنه زواجه ماعنى لي أي شيئ من اللي ممكن يفكروا فيه.. (أحلامي)كوني قوية علشاني ولاتستسلمي.
أنا تعتمد عليكي وعلى عبادي..الله يعيني عليه..ذا لوحدة بجلس ساعة أفهم فيه لإنه أساساً منتظر لخالد غلطة ..
أدري إن رسالتي ذي مملة وكئيبة ياريت ترميها بعد ماتخلصي منها علشان ماتكتئبي كل ماتقريها..أقرأي رسايلي الثانية لإني أدري إنك محتفظة بيها مثل ما أنا محتفظة برسايلك ورسايل عبادي وسوسن والبنات.. وكل ما حنيت لكم أقرأها وأرجع جوري القديمة من جديد..
صار لازم أكلمهم فكوني مستعدة وهرجع أتصل وأسمع صوتك وأطمن عليكي..وحتى القاكي..دمتي لأحبتك ولي بخير..(جوريتك)
(بعد فترة)
جوري ولبنى وحنان متجمعات في بيت ساره، وقاعدين عالأرض وحاطين القهوة والحلا والشيبسات والعصاير ..ويتناقشوا في موضوع مهم..
ساره بعصبية/الله يعينك على برودك.
جوري بضحكه/يختي أيش تبغيني اسوي..
حنان بإستغراب/أنت تبغي تقنعيني إنك مابتغيري ولاتتضايقي؟ جوري حبيبتي أنتي لقطة البوس في الأفلام تغيري القناة،كيف عالواقع.
جوري بصدق/أكيد بتضايق..أنا ما أحب ذي الحركات،بعدين ذي أشياء حميمية المفروض يكون لها وضع خاص..لكن غيرة..ولا جات على بالي..
لبنى بضيق/وربي إنك مستفزه..أنا أنصدمت منهم وتنحت مكاني،وهيا شافتهم وكملت طريقها ولاكإنه صار شيئ.
طالعت فيها جوري بإستنكار/لاياشيخه..أجل أحجز مقعد في الدرجة الأولى وأحضر الفيلم.
ساره بتعجب/وربي صادقة ،إنها أفلام ومن تمثيل السوسه ندى.
لبنى بحقد/لا وأفلام +21
شهقت حنان/ياويلي..والله أنهم مايستحوا.. أنتي كيف متحمله.
أتنهدت جوري وبتفكير/للأمانة يعني..أول مرة شفتهم أنصدمت وتنحت فيهم قبل ماأستوعب المنظر وأفك رجلي، وبعدها صار كذا موقف وكنت أنسحب بدون مايحسوا ..بس لما أتكررت الحركة واتأكدت إنها بتتعمد تخليني أشوفهم في ذي المواقف.. غيرت سياستي.
سارة بإهتمام/واللي هيا.
شربت قهوتها بإستمتاع وبهدوء/سياسة التطنيش..يعني هيا بتسوي كل ذا على بالها بنقهر وأنجن وأغير...خلاص أنا صرت إذا شفتهم في وضع محرج أكمل طريقي ولا كأنهم موجودين..وذا الشيئ رفع لها الضغط والسكر..
سارة بقهر/الواطية ..الحيوانة ..تستاهل ،يارب ي------
قاطعتها جوري/لاتدعي عليها..مالنا ومالها..
لبنى بملل/بالله سيبوكم منها ذي كمان.. خلوها براحتها لين تتطلق من تحت رأس الحربايه ندى .
جوري بشرح/لعلمكم ترى ندى طيبه وحبابه، بس أمها الله يهديها هيا اللي تبلفها وتحشي دماغها بكلامها الفاضي.
سارة بتريقه/أي مرررره طيبة،بدليل أفلام البوس والأحضان اللي بتعملها مع زوجك قدامك..يا أمي طيري بس..أنتي اللي هبلا.
ضحكت جوري بخفه/أنا هبلا ،طيب مقبوله منك يا دبتي..
وتابعت بجدية/والله أكلمكم جد..ندى من جواها طيبه،بس مشكلتها إنها وحيدة أمها وأبوها،ماعندها أخوان وأمها من النوع المتسلط ،بتتحكم في خرجاتها ومين تصاحب ومين تكلم،يعني بالعربي ضيقت عليها الخناق..وخالد كان الشيئ الوحيد اللي أختارته بنفسها، حبته وأتعلقت فيه بس كان فيه مشكله واللي هيا أنا..أمها كانت معارضه زواجهم بحجة إني بحول حياتها لجحيم، والبنت اتأثرت بالأفلام وشغل الضراير..
قالت في بالها توريني العين الحمراء وتفرض سيطرتها من بدري خاصة إنها عارفه إن البيت كله في صفي..فهمتوا..
طالعوا فيها بتفكير وكل وحده تقلب الموضوع في دماغها بتفكير غير الأول.
حنان بعصبية/وخالد كيف يسمح لنفسه يسوي كذا..
جوري بهدوء/خالد ماله صلاح..ندى كانت تتعمد تكون هيا اللي في الواجهه،يعني لما كنت أدخل مكان بيكون معطيني ظهره ومو شايفني أساسا..ورغم كذا أنا ما ابرأه بالعكس المفروض هوا الرجال وهوا اللي يكون له الكلمة الأخيرة ،والمفروض حتى لو ندى هيا اللي كانت تجيه وتسوي له حركاتها التافهه،المفروض كان يوقفها عند حدها ويفهمها إن ذي الحركات لها مكان معين..بس ما عليكم،اللي ينساه أنا دايما أفكره بيه..
سارة/قلتي له؟قولي قسم.
ضحكت بقوة/وأنتي الصادقة..قلت لهمااااا..
التفتوا لها بحماس/أيش قلتي...
طالعت فيهم بنص عين وبدأت تحكي..
خلصت جري في الحوش قبل صلاة المغرب ودخلت المطبخ تشرب مويا..ولقت ندى عالطاوله وخالد عالكرسي وضامين بعض وو وفي عالم ثاني.. نزلت عيونها بسرعة بملل من المنظر المتكرر وصبت لها كأسة مويا من البراده وطلعت بعد مالمحت إبتسامة ندى الخبيثة..
بعدها خالد بسرعة ووقف بإرتباك/مين اللي دخل؟
باسته في خده بلامبالاة/جوري أخذت مويا وطلعت..
مسح الروح من شفايفه بضيق/ياالله منك ياندى..يعني حبكت لك.
ندي بعصبية/والله بيتي وبأخذ راحتي..لسا هستئذن منها علشان أبوسك.. بس أنا اللي أستاهل لإني وافقت نعيش مع بعض..
وطلعت من عنده معصبه،وقابلت جوري في الصالة مع عمتها،وبحده/ترى من باب الذوق لما تشوفيني مع خلودي في وضع حميم تطلعي وتسيبينا،مو تكملي عادي..أناليا خصوصية و ما أحب أحد يتدخل فيها..
طالعت فيها جوري بإستغراب/ذوق!! وخصوصية!!
سكتت شوية وضحكت بخفه/هههههههههههه
ترى الذوق والخصوصية مايجتمعوا معاكي أنتي بالذات..
ندى بعصبية/جوري أحترمي نفسك..أنا ساكته عنك من يوم ماجيت ومطنشه حركاتك وأنتي كل شوية تتطفلي علينا..
أم خالد بإستغراب/أيش فيكم يابنات...
ألتفتت لها جوري بإبتسامة/مافي شيئ حبيبتي ،بس في كلمتين بقولها لندى.. روحي صلي المغرب وأنا بجيكي عالغرفة..
طالعت فيهم بقلق من نظرات ندى اللي تحرق الأخضر واليابس وراحت لغرفتها.
ألتفتت لندى بجدية/شوفي يابنت الناس أنا مارح أناقشك في الأحترام لإني محترمة نفسي من قبل لا أعرفك.. وبعدين داخله عليا حاميه وخصوصية وذوق وأتطفل..أولاً من باب الذوق اللي تتكلمي عنه إنك ماتعملي الحركات ذي هنا..تانياً أي خصوصية ذي اللي بتتكلمي عنها وأنتي بتقدمي لنا عرض مفتوح على كراسي درجة أولى،ثالثاً وهو الأهم أنا ماأقتحمت عليكي خلوتك علشان تقولي أتطفلت عليكي وأنت ساكته ومتحمله.. إذا كنتي ناسيه فذا بيتي،وحطي في بالك إني همشي في كل ركن فيه بدون ما أعمل لك حساب أنتي وزوجك..وإذا تبغي خصوصية فمكانها في غرفة النوم،وإذا شفتيني نطيت لغرفتك ذيك الساعة قولي أتطفلت عليكي..مو فاضحة نفسك قدام الله وخلقه وتجي تحطي اللوم عليا..سكتت تأخذ نفس وتابعت بهدوء/أسمعيني ياندى وأفهمي اللي هقوله..حركاتك ذي كلها ماهمتني ولاهتهمني في يوم..فريحي نفسك يابنت الناس وخلينا نعيش مع بعض مرتاحين وبدون وجع رأس وحركات ماسخه مالها داعي ..
طالعت فيها ندى بإرتباك من كلامها اللي ماتوقعته وراحت بسرعة.
دخلت جوري غرفتها ولقت خالد،طنشته وراحت طلعت ملابس علشان تتروش ،مسك يدها وبرجاء/جوري والله ماكنت أدري إنك هنا..أنا وعدتك مارح أضايقك.
فكت يدها بهدوء/وإذا ماكنت موجوده..أمك وأخوانك وأولادك مو موجودين كمان...
أرتبك و ما عرف أيش يقول،تابعت بجدية/أنا ماأقدر ألوم ندى لإنها زوجة وعقلها صغير وأكيد بتفكر بطريقة غير..لكن اللوم كله عليك ،أنت الرجال وأنت اللي المفروض توقفها وتعلمها الصح من الغلط مو تمشي وراها مغمض عيونك بدون إعتبار لأي أحد..
هز رأسه بموافقة وبإحراج/والله ماكان قصدي شيئ..
جوري ببرود/قصدك ولا لا..مايهمني ،بس عيب عليكم اللي تسووه.. عن جد عيب.
أخذت ملابسها وراحت تأخذ دش .
رفعت رأسها للبنات وبتمثيل/وتوته توته خلصت الحدوته..حلوه ولا فتفوته..
ساره بشماته/جزاهم وأقل..
حنان بقهر/يابجاحتها الندى ذي..الله يعينك عليها..
جوري بملل/قلنا لكم خلاص عقلت وبطلت، فضوها سيرة طفشتوني..
كملوا سهرتهم يتفرجوا فيلم رعب..وبعدها رجعوا عالبيت..
سمعت صوت صراخ وبكاء،رمت كتاب ياسمين من يدها ووقفت بسرعة/ياسمين خليكي هنا ولا تطلعي.
خرجت للصالة وكلها خوف على أمها،بس كان الصوت جاي من المطبخ،دخلت بسرعة وشهقت من الصدمة..كانت ندى طايحة عالأرض وتبكي بألم ويدها على بطنها،قربت منها وحاولت يكون صوتها هادي/بسم الله عليكي ،لاتخافي بسيطة.
ندى ببكاء/جوري الحقيني...آآآآهه بطني، كلمي خالد يجي.
حاولت جوري توقفها بس ندى ماساعدتها بالمره من كثر بكاها وألمها،أرتبكت جوري لما أنتبهت لبقعة دم في بنطلون ندى البيج..
أخذت نفس عميق،ومسكت ندى من كتوفها وبهدوء/أنا بروح أجيب عبايتي ونروح المستشفى،بطلي بكاء حبيبتي علشان ماتتألمي زيادة..مارح اتأخر.
خرجت بسرعة ونادت عمتها علشان تنتبه لندى،لبست عبايتها وجابت عباية ندى وفي دقائق لبستها بمساعدة أمها..
أم خالد بعصبية/يا بنتي حاولي توقفي علشان تروحي، كذا ماينفع ..مافي أحد يساعدنا حتى الأولاد برا.
بكت وغمضت عيونها بألم/عمه والله مو قادرة.. تعبانه..جيبوا لي خالد..كلموا ماما..
علقت جوري شنطتها بشكل مايل على كتفها وجلست قدام ندى وأعطتها ظهرها.
وبأمر/ أطلعي على ظهري..
أم خالد/جوري من جدك ،بلاهبل..ماتقدري..
جوري بهدوء/ندى خلصيني أركبي على ظهري ،كأننا نلعب يلااا ياقلبي.
ندي برفض/لااا ما أقدر ،بستنى خالد لين يجي..ولا---
قاطعتهاجوري بحدة/لين يجي بيكون اللي في بطنك مات..خلصيني يلااا.
طالعت ندى في أم خالد بصدمة/أنا حامل؟
لفت عليها جوري وسحبت ذراعها وحطتها على كتفها ورجعت أعطتها ظهرها/يلاا ياندى ما عليكي أنا قوية وأقدر أشيلك لاتخافي..
أتعلقت في رقبتها بمساعدة أم خالد وسمت جوري بالرحمن ووقفت بصعوبة في البداية،وبعدها أتوازنت ومشيت بشويش وهي مثبته ندى على ظهرها بيديها،وصلت لباب الحوش وفتحته أم خالد ونادت جوري على واحد من العيال يوقف لها تاكسي ويجيبه جنب الباب ،وأول ماوصل خرجت وأشرت للسواق اللي نزل وفتح لها باب السيارة ،دارت بظهرها وحطت ندى بشويش عالكرسي وعدلتها وركبت جنبها من الجهة الثانية..
وبعد ساعة في العيادة، خرجت الدكتورة لجوري اللي وقفت على طول بخوف/هااا بشري..
الدكتورة/الحمد لله الجنين بخير وأختك كمان ..لا تقلقي..
جلست عالكرسي براحة/يستاهل الحمد.. يعني هيا كويسة أكيد..
الدكتورة/الحمد لله الطيحة ماكانت قوية ولا كان الحمل نزل خاصة إنها في الشهر الأول ،أنا أديتها مثبتات للحمل ويبغالها راحة وتنام على ظهرها لمدة أسبوعين ، وماتشيل شيئ ثقيل ..
جوري بثقة/بسيطة..أنا بنفسي بنتبه لها..
تابعت الدكتورة/وأهم شيئ ممنوع أي أتصال حميم في ذي الفتره..طبعاً فاهمة قصدي؟
أستحت جوري وبإرتباك/شوفي..هوا زوجها بيجي وأنتي فهميه عالحاجات ذي..أنا دوري لحد هنا وخلص.
ضحكت الدكتورة وسابتها وراحت..
حركت يدها قدام وجهها كإنها تهويه"ماعاد إلا هي ،أروح أقله كذا..يمه"
دقت الباب ودخلت لندى ،شالت نقابها وأتوجهت لها بإبتسامة/الحمدلله على سلامتك،ماتشوفي شر يارب..
ندى بتعب/الله يسلمك..
ضمتها جوري وباست رأسها/ألف مبروك يا عروسة..ولا هههههههههههههههه خلاص راحت عليكي..شدي حيلك وبطلي دلع..
إبتسمت ندى/والله مو دلع حسيت روحي طلعت..وين خالد.
سحبت كرسي،وجلست جنبها وطلعت كأسة عصير فريش من كيس معاها، حطت لها المصاص،وقربته من فمها/أشربي ذا..خالد كلمته من أول مادخلتي ،دقائق ويكون هنا إن شاء الله..
بعدت ندى الكأسة،وبقرف/أيش ذا..مو حلو..
جوري بضحكة/أدري إنه مو حلو،حتى أنا ماأحبه الله يعز النعمه..ذا برتقال بالجزر بس كويس ليكي..
رجعت لها الكأسة بالغصب وبأمر/لازم تخلصيها كلها وتعوضي الدم اللي راح،ولا ترى بجيب لك عصير طماطم..ههههههههه.
ندى بضيق/طماطم أيه أنتي كمان..جزر وبرتقال أرحم..
جوري/هههههههههههههههه..أيووه..جني نعرفه ولا أنسي مانعرفه..
تنحت ندى بغباوة/يعني أيه.
أتنهدت جوري/يالييييييل أبو لمبه..مثل يمني ياقلبي.. .ومفاده اللي نعرفه أحسن من اللي منعرفوش..فهمتي.
هزت رأسهابأيوه/قولي كذا من الصبح.
هزت جوري رأسها بيئس/ يمنية فاشلة، شكلك والله أعلم ماقد طبيتي الحدود حتى.
اتثأبت ندى بتعب/من جد ما أعرفها ولا رحتها ولا عندي فضول أروحها..أنا حابه الحياة هنا وذي بلدي من يوم ما ولدت.
جوري بتفهم/ما أختلفنا،بس الواحد لازم يتمسك بهويته. .يعرف عنها..ينتمي لها..يكون عنده جذور..فاهمه قصدي؟
ندى بلامبالاة/أنا ولدت واتربيت وعشت هنا، وذا يكفي..لكن أنتي غريبة..على كثر مافي ناس يتريقوا عليكي ويستهزئوا في جنسيتك، إلا إنك ماشية تغنيها في كل مكان حتى في الزواج لما سألتك الحرمة أنتي شامية،قلتيلها لااااا يمنية وبالفم المليان..
طالعت فيها بإستغراب/وليه ماأقولها بالفم المليان..أنا يمنية وأفتخر بذا الشيئ،ليه لازم أستحي وأفرح لمجرد إنها قالت لي شامية..المفروض كل إنسان بيفتخر بجنسيتة أيش ماكانت..ماعلينا بعدين بعطيكي دروس في الوطنية والإنتماء.
أتذكرت ندى وشهقت بقوة/ ماما اتأخرت ،لايكون صار لها شيئ في السكة..
جوري بهدوء/أيش المأساوية اللي أنتي فيها..أنا ما كلمتها أساساً.
ندى بعتاب/ليه ماكلمتيها..
جوري/ماله داعي تخوفيهم عليكي..نوصل البيت بالسلامة وترتاحي،وبعدها بشريها بحملك بدون الأضافات اللي مالها داعي.
انفتح الباب فجأة ودخل خالد/السلام عليكم.
ردوا السلام ،وأتوجه لندى بخوف/سلامتك حبيبتي،ليه حاطين لك مغذي..أنتي مو اتزحلقتي بس.
شافته جوري لما جلس عالسرير جنبها وبدأت ندى تبكي وضمها لصدره بخوف وأهتمام ،طالعت فيهم بنظرة غريبة وإبتسمت وطلعت بهدوء وأخذتها رجولها للمكان الوحيد في المستشفى اللي ممكن تجلس فيه لساعات بدون ماتتضايق أوتقرف من ريحة المعقمات فيه..وقفت قدام القزاز وصارت تطالع في الأطفال بحب والإبتسامة ماليه وجهها،راقبت وجوههم اللي تحمل تعابير مختلفة المبتسمة والباكية والنايمة ..واتفرجت عالناس اللي بيجوا يطلبوا أطفالهم علشان يشوفوهم..قعدت فترة بدون ماتحس بالوقت لحد ماحست بحركة على كتفها، ألتفتت لقت خالد/كنت متأكد إنك هنا.
مشيت معاه بهدوء/ألف مبروك..ويتربى في عزك ..
رد عليها بإبتسامة/يبارك فيكي.. مشكوره عاللي سويتيه،ندى قالت------
قاطعته بسرعة/قالت الدكتورة متى تخرج؟
خالد / كنت عندها،بروح أدفع الحساب وأوقع الخروج وأجيكم..
رجعوا عالبيت وبعدها بيومين أتصلت ندى على أمها وجات تزورها وتطمن عليها..
دقت الباب ودخلت بإبتسامة/حيا الله من جانا،نورتي البيت ياخاله.
مدت لها كاسة القهوة والحلا/أتفضلي.
أم ندى بهدوء غريب/تسلمي حبيبتي.
طالعت فيها جوري بإستغراب وأشرت لندى بمعنى أيش فيه،هزت ندى رأسها بإبتسامة إنه عادي لا تقلقي.. طالعت فيهم وخرجت..
|
07-12-15, 08:04 PM
جديد مواضيع قسم القصص المهجورة والغير مكتملة
العرض العادي
