كاتب الموضوع :
فيتامين سي
المنتدى :
القصص المهجورة والغير مكتملة
رد: خريف الحب / للكاتبة خياله،،والخيل عشقي
(خالد)
طلعت من عندها وأنا حاس بخنقه..أدري أني غلطت لما ماجيت عالوعد..وأدري إنها كانت خايفة وقت الولادة.. وأكيد لما فاقت وأفتكرت إن ياسمين ماتت أترعبت وقربت تتجنن كمان،بس أنا ماتعمدت ذا الشيئ.. ظروفي جات كذا..المفروض ماأزعل من كلامها قبل شوي..هيا تعبانه وماقصدها شيئ باللي قالته..بس أنا ليه أتضايقت منها..يمكن لأني عارف إنها قبلت بوضعنا وحياتنا بسبب حملها..ولإنه السبب في تغيرها اللي صار..اتنهدت بضيق وقررت أرجع البيت بعد ماكنت ناوي أقعد معاها..
(جوري)
أرتحت لما سمعت صوت الباب وعرفت إن خالد راح..فتحت عيوني بشوق للمخلوق الصغير اللي ضامته..نزلت الطرحة وشفتها ترضع بهدوء وراحة..يالله قد أيش جميلة وتأخذ العقل.. كنت متخيله إني وصلت لحبي لها وهيا داخلي لدرجة مو معقولة ..كنت أكلمها وأشكي لها وأغني لها كأنها قدامي.. بس لما شلتها وشميت ريحتها وضميتها لصدري أيقنت إن حبي لها تجاوز حدود العقل والمنطق..كيف يكون المخلوق الصغير ذا.. له القدرة للسيطرة على مشاعرنا بذي القوة والإحكام.. أسرتني بوجهها البريئ وريحتها المميزة وصوتها الباكي الضعيف..
بستها على عيونها وخدودها وخشمها بشوق وهمست لها/تستاهلي كل شيئ عملته علشانك..تستاهلي كل غلطة سامحته عليها، وكل كلمة حب قلتها له.. وكل لمسة أتنازلت له عنها..تستاهلي أعيش حياتي كلها علشانك أنتي وبس..بس أنتبهي في يوم تكسريني زي أبوكي..أنتبهي تكبري وتصيري زيه..قلبك قاسي ومايرحم..لاتخليني في يوم أندم على قراري..فاهمه..
مسحت دموعها بهدوء وضمت بنتها لصدرها وإبتسمت وهي تتذكر اليوم اللي عرفت فيه حملها.. والأيام تلت وصولها لجدة
------------
(قبل كم شهر)
خلصت تنظيف المطبخ بعد إصرار منها لعدم دخول أمها علشان تساعدها..شالت الصينية اللي عليها الشاي والقهوة العربية وحطتها في الصالة قدام أبوها وأمها مثل ماتناديهم ورجعت تجيب صحون الكيك والتمر اللي جهزته،ناداها أبو خالد بحنان/تعالي جنبي..
ليه تعبتي نفسك ،كنتي كلمتي خالد يشتري كيك من برا..
هزت رأسها بلا وصلت لهم الشاي والقهوة كلاً حسب طلبه..دخل عليهم مازن ومؤيد بحماس/ شفت ماقلت لك سوت كيك..
جلس جنب جوري ومد يده لمازن بإنتصار/بسرعة هات الخمسة.
اتأفف مازن بضيق وطلع من جيبه خمسة ريال وأعطاها مؤيد اللي باسها بفرح وحطها في جيبه..أخذ قطعة كيك وأكلها بضحك..
أم خالد/أيش فيك مبسوط كأنك غايب من المدرسة.
مازن بقهر/أخذ فلوس مني ،ليه مايكون مبسوط.
أبوخالد بإستغراب/وليه زعلان وأنت معطيه بيدك..
مازن/ وأحنا في الشارع..قال إنه بنجي وجوري مسويه كيك،قلته أيش عرفك قال أحساس ،واتراهنا إذا سوت بعطيه خمسة وإذا لا بيعطيني هوا..
ضحكوا على مازن اللي قاعد يبربر وهومعصب.. مسك خالد مؤيد من أذنه وبتهديد/طلع الخمسة بسرعة..
مؤيد بإندفاع/أحنا متراهنين..بزرنه هيا.. صارت حقي .
خالد بعصبية مفتعله/لا يا شيخ..زوجتي تتعب وتسوي الكيك..وأنت تأخذ الفلوس وكمان تأكل.. كيف تجي ذي..عالأقل أقسمها بالنص معاها..
مؤيد بلؤم/الله أكبر...هيا مستنيه الريالين والنص حقي..على أساس ماتعطيها أنت و أبويا..
أبو خالد/يا قليل الحياء،بتحاسبنا وتحاسبها ضربه خالد على رأسه/زوجتي وأعطيها.. أنت أيش حارق رزك..
مؤيدبمسكنه/الله يالدنيا..أنا من زمان أخوك وتضربني علشان زي البزره اللي دوبك متزوجها..هان عليك العيش والملح.. ضحكوا على كلامه اللي طالع من قلب..
ضحكت جوري وطلعت من جيب تنورتها عشرة ريال وأعطتها مازن اللي رفض يأخذها بأدب،قربت منه وحطتها في جيب قميصه ،وبهدوء/والله تأخذها..وثاني مرة لاتصدق لمؤيد،كان عندي في المطبخ وأنا أسويها.
قلها بأدبه اللي تعودت عليه من يوم ماجات/شكراً..خلاص في المغرب بجيب لك معايا بطاطس وعصير توت ،مو تقولي شبعانه..
هزت رأسها بإبتسامة..واتأملت الكل بصمت ..في قلبها شكر للأثنين اللي خففوا عنها من يوم ماوصلت لجدة..مازن ومؤيد..مازن راقي في تعامله وأدبه معاها..ومؤيد على طول يضحكها بحركاته ومقالبه في لبنى ومازن..ولبنى اللي فكرتها بشيماء أختها ،نفس الدلع والدموع اللي تنزل وقت اللزوم. كانوا ماليين عليها وقتها بطريقة حلوه.. عمها وعمتها اللي غرقوها بطيبتهم وحنانهم علشان ماتحس بنقص وغربة.. خالد ومعاملته اللي تغيرت معاها من بعد إنهيارها المفاجئ ..ما حاول يلمسها طول الأسبوع اللي قضوه في بيت أهلها قبل سفرهم ..وحتى بعد وصولهم لجدة ظل معاها يوم بكامله يحاول فيها إنها تتكلم أو تبكي أو تعبر بأي شيئ عن اللي تحسه بسبب فراق أهلها..ومالقي منها غير كم كلمة قالتها بكل برود ماتدري من وين نزل عليها/مافيني شيئ،محد بيموت من فراق أحد يحبه... الحمدلله عايشه..
وبعدها هي صارت وحده ثانية ..أستغربت من نفسها ليش مابكيت ..كانت حاسه مثل لوكان بداخلها حفرة وكل مالها تكبر وتبلع معاها جزء من نفسها ..حست بفراغ وعجز ،حتى دموعها رفضوا ينصاعوا لأوامرها وينزلوا..كأنهم مستكثرين عليها تبكي وترتاح ..صارت تسوي شغل البيت وتجلس شوية مع عمتها وعمها وباقي الوقت في غرفتها مع رواياتها..أختفى الضحك..المرح..حتى حوارات خالد المستفزة والمعتمدة ماصارت ترد عليها ،ورغم إنها كل يوم تنتطره وهي بزينتها ولبس النوم.. إلا إنه كان يكتفي ببوسة على خدها أويضمها لصدره قبل ماينام..هي تحاول ماتحرمه من حقوقه.. وهو عارف إنها مو متقبلته وبيحاول يكسب قلبها بحركته ذي..
لطيفة وليلى ذول نوع ثاني من البشر ،نوع أول مرة تقابله ..هي سمعت عن الغرور والتكبر ،بس ماقد صادفت أشخاص في حياتها بذي الصفات..ورغم برودها المفاجئ إلا إنها قابلتهم بإبتسامة بشوشة وصادقة.. بس أنصدمت من نظراتهم المتعالية وسلامهم البارد اللي كان بدون نفس..لكن الأيام اللي بعدها ومقابلتهم معاها،خلتها تعرف طباعهم.. وعلى قد ما هم جميلات من الخارج،كانوا قبيحات من داخلهم..شايفين نفسهم بقوة ، مغرورات بجمالهم ،مايحبوا غير ناس بنفس تفكيرهم السطحي ،والأهم من كذا ..شايفين خالد كثير عليا..وإنه ظلم نفسه بزواجه مني..
حسيت بأحد يهزني،التفت لقيت مؤيد/أنتي ماتسمعي..
رديت بهدوء/أسفه ما أنتبهت..أيش فيه.
أشر على خالد وبنبرة عدم تصديق/خلود يقول إنك حريفه في الكوره..من جده ولا يمزح..
طالعت في خالد المبتسم بإستغراب"أيش عرفه أني ألعب كرة..ماقد لعبت قدامه"
ردت على مؤيد/يعني..أعرف ألعب شوية..
لبنى بأشمئزاز/كورة..يعععععع..في بنت تلعب كورة؟
إبتسمت وهي تتذكر لما كانت تروح تلعب في الحارة مع أخوانها وشيماء تعصب منها.. مازن بإهتمام/طيب تعالي ألعبي معانا ،فيه كورة..أنا وأنتي فريق،وخالد ومؤيد فريق.
أستحت من عمها وعمتها وخالد ومنهم..لها شهرين تتعامل معاهم بالمسطرة،وفجأة تقوم تلعب كرة معاهم.. هزت رأسها بلا..
أم خالد بمكر/من جدكم أنتوا...ماتعرف..
أبو خالد بتشجيع/ذي جوري.. قومي كسري رأسهم وأنا الحكم..
إبتسمت على حماس عمها وماحبت تكسر بخاطره،التفتت لمازن/بلعب شوية ،لا ترجع تتريق عليا..
وقفت واتفاجأت بخالد اللي سحبها لغرفتهم وفتح دولابها،طلع لها بنطلون رياضة أسود وفانيلة الأرجنتين وبحماس/البسي ذول وتعالي عالحوش ..
وقفته بيدها قبل مايطلع/لحظه..البس كذا قدام أخوانك،عادي؟
ضحك وسحبها للمرايه/تنكتي أنتي ووجهك تراكي صغيرة..وبعدين ذول أصغر من لبنى، أنتي عمرك 15،ولبنى 13..يعني مازن اللي مستحيه منه عمره 11،وأبو لسان طويل عمره 10..يعني عادي وشيلي حجابك ذا كمان.
خرج وسابها بعد ما أقتنعت وبعد دقائق خرجت الحوش بمنظرها الجديد عليهم بلبس الرياضة والكوتش وشعرها اللي رافعته ذيل حصان، وسط ذهول وإستنكار لبنى،وإستغراب مازن ،وحماس مؤيد/ههههههههههههه،حركااات والله ،على بالك لو لبستي كذا بتعرفي تلعبي.. والله شعرك حلو،بس أنتبهي لايعورك ..هههههههههههههه.
إبتسمت بثقة/مالك ولشعري..لو فزت عليك بتشتري لي كيكة بدل اللي خلصتها،ولو أنت فزت بسوي لك كيكة لوحدك..تمام.
صفر لها مازن بإعجاب/شكلك حريفة ..أنتي في فريقي ..لاتنسي..
خالد بأعتراض/زوجتي تلعب معايا... أسرحلك..تعالي هنا.
راحت لمازن وحطت يدها على كتفه/أسفه أختارني قبلك..بعدين كيف ألعب معاك وهم مع بعض ،كذا اللعب يصير مافيه تكافؤ.. العدل أثنين كبار مع أثنين صغار..
مؤيد بعصبية/هيييي..أنتي،أيش صغار ذي،صدقتي نفسك تراكي قد لبانه..
لبنى بدلع/بابااااااا..قله يبطل يقول لي لبانه..
أبو خالدبملل/خلصونا والعبوا..مؤيد أنطم ولا أنقلع جوه..
شده خالد من أذنه/صوتك ما يترفع على زوجتي..وياويلك لو أنبرشتلها ولا كسرتها،تحسبها واحد من عيال الحارة.
مؤيد/هاااا..بدينا..زوجتي ومازوجتي ..أنت قلت حريفة ،خلاص تلعب ،أما تقعد تتبكبكلي من ذحين مو لاعب.
أم خالد بغضب/ولد..تبغى تكسر أختك ولساتها عروسة.. هموتك لو سويت لها شيئ.
عصب منهم وجلس على جنب/يلعن أمها من كيكة..بطلت مو لاعب.
ضحكت جوري وراحت سحبته من يده وبجدية/أول شيئ لاتلعن حرام..وثاني شيئ إذا قدرت تكسرني مدري الثانية اللي قالها أخوك وماعرفتها المهم سويها..
مؤيد بتريقة/أنبرشلك..يعني أتزحلق وأخذ الكورة منك.
رددت وراه/أنبرشلك..اهااا..قول اتزحلق وخلصني..مو مشكله يلاا.
انقسموا وكل فريق حدد المرمى حد المرمى تبعه وبدأت المباراة .. الكل كان يلعب هجوم ويتراجعوا للحراسة.. لبنى وأم خالد يشجعوا جوري ومازن وأبو خالد يشجع الكل... أنسجمت جوري مع اللعبة وحطت فيها كل ضيقها.. سجل خالد هدف في الشوط الأول وحاول مؤيد ينبرشلها كذا مرة رغم تهديد خالد ،بس جوري قدرت تتفاداه بكل سهولة و ما عرف يأخذ منها الكورة.. وفي الشوط الثاني أتحمست جوري وسجلت هدفين بعدها خالد سجل هدفين،وأنتهت المباراة بفوزهم..
الكل دخل وسط صراخ مؤيد الفرحان بفوزهم ،ومحاولاته إنه يخلي جوري ومازن ينقهروا ..بس جوري كانت مبسوطه باللعبة وما أهتمت بالخسارة ومازن كان متحمس على لعبها وطلب منها يلعبوا سوا بعد كذا علشان يتمرن معاها..
خالد وأمه وأبوه كانوا مبسوطين لأنهم قدروا يخرجوا جوري من حالة الصمت والبرود اللي هيا فيها وكسرت الحاجز اللي بنته حولها..وخلال أسبوع أتحسنت علاقتها في لبنى ومازن ومؤيد وصار أغلب وقتهم اللي يقضوه في البيت يكون معاها يلعبوا سوا وصارت تروح أوقات مع لبنى لبنات جيرانهم وحبت منهم ثلاث بنات بشكل خاص(ساره،حنان ،فاطمة ) ساره وحنان سعوديات ،وفاطمة كانت يمنية وأصغر منها بكذا سنة ،بس مع الوقت اتعلقت فيها.. كانوا لطيفات ودمهم خفيف،وطيبات ودخلوا قلبها بسرعة ..
|
07-12-15, 12:55 AM
جديد مواضيع قسم القصص المهجورة والغير مكتملة
العرض العادي
