ريم احتقن وجهها : ماما لا تغلط عليها
وزواج مو موافقه وانتهينا
نايف : الظاهر جلدك يرعاك تبغين كم طراق يسنعك
وبجديه اكثر
زواج غصب عنك مو بكيفك ونشوف مين للي تمشي كلمته
ريم بعدم مبالاه : نشوف
اقترب نايف منها ومسكها من فكها بدون ما يشد : وقسم بالله للي رفع السموات رح تتزوجيه غصب
عنك
وشغل العناد هذا اتركيه فاهمه
اعطاها نظره حاده وتركها
وناظرها باستصغار واحتقار قبل ما يطلع
كانت تناظره وهو طالع بدون ما ترمش
وتحس انه مصمم وما رح يغير رأيه
بس ما رح تسكت له ولا رح تقبل احد يحدد
مصيرها ومستقبلها
هذي حياتها وهي حره في اتخاذ القرارات
فكت شعرها الطويل
ولفته بشويش
ورفعته وثبتته بالكماشه
نزلت خصله من غرتها على انفها نفخت
عليها
وكأنها تنفخ لعلها تطلع القهر للي بداخلها
رفعت يدها بهدوء وارجعت الخصله خلف
اذنها وهي تفكر كيف تلغي الزواج
**
**
**
**
**
نايف
قهرتني بعنادها ما تبغى تتزوج وهي من الاسبوع
للي طاف وهي تفتح معي موضوع عريس للي من
طرف امها وتجادلني بقوه عين
انا بصراحه عجزت اوصفها انا اعرف انه البنات يستحون
من طاري الزواج اذكر سلمى لما فاتحتها بموضوع خطبتها
ولع وجهها من الاحراج وكلما تشوفني تنزل راسها
من الحياء
بس مثل ريم ما شفت تتكلم بجراءه وقوه
انا متأكد تبغى تتزوج هذا الشخص وتسافر عند
امها بس حامض على بوزها
تحلم تشوف امها طول ما هي عندي
متى ما تزوجت بلقعتها اما الحين مستحيل
لا انكر تعجبني شخصيتها هاديه وقويه بنفس الوقت
ما تشبه شخصية امها الضعيفة والمغفلة
حتى ما تشبه امها بالشكل
ريم اجمل بكثير سبحان للي خلقها
ما كان اختيار ابوي لها عبث عارف انه اهل العريس
يبغونها جميله وهي اجمل وحده بعائلتنا
بس المشكلة بعنادها
اخاف تعاند وافقد اعصابي و استخدم معها اسلوب
الضرب
التفت على ساميا وعقدت حواجبي بنرفزه : وش فيه ؟؟ علامك تصرخين ؟؟
ساميا رفعت حاجب ولوت شفايفها : سلامات
لي ساعه اكلمك وانت مو معي !!
وش شاغل تفكيرك ؟؟!!
زفرت بضيق وطالعتها :،افكر بخطوبه ريم
ساميا سألتني : انت كلمتها بالعريس ؟؟
رديت بهدوء : كلمتها ورافضه
تكلمت ساميا بنفس الهدوء : طيب خلاص الغي الموضوع
دامها مو موافقه هذا زواج وهي لازم توافق
من خاطرها مو غصب عنها
طالعتها وتنرفزت من كلام ساميا
احس ريم رفضت عناد وانا عناد فيها رح
اغصبها وبحده : غصب عنها رح تتزوج مو على كيفها
ساميا ما عجبني كلامه بنظري الزواج مو بالغصب
ما رديت عليه لأني اعرف نايف اذا الامر يتعلق
بريم لا يرسل ولا يستقبل فقررت اسكت وما اتدخل
دامه حطها براسه ما رح يتركها بحالها
يمكن اذا تزوجت ترتاح وتحس بالاستقلاليه
ويكون عندها بيت مو تحس نفسها مشتته
هنا وهناك
وربنا يعوضها بزوج حنون يعوضها عن كره نايف لها
طالعها : علامك سكتي والا كلامي مو عاجبك ؟؟
وقفت ساميا بهدوء : بنتك انا وش دخلني ؟!!
ابتسم على جنب : ايوه كذا ابغاك لا تتدخلين
وتناول جواله وفتحه
كانت ساميا تناظره وهو يطالع الجوال
هزت راسها بأسف وتركته وطلعت من الصاله
**
**
**
**
**
**
ريم
اليوم على العشاء عندنا السيد بدر يا كرهي له
احسه انسان سخيف ما اطيقه
كرهته من طفولتي
لا والمشكلة بوجود بدر يصمم السيد بابا على تواجدي يمكن يبغى يبين للي حولنا
انه الاوضاع تمام ما في اي مشكلة
نزلت عن الدرج بخطوات بطيئة
ما رح اتكلم عن عريس الغفلة لأنه كل شيء
بوقته حلو
مع اني ما عرفته لما شرفني السيد بابا بغرفتي اليوم ما خبرني
مين يكون وأنا ما سألت
أكيد عندكم فضول تعرفونه مثلي صحيح
إني مو مهتمه للعريس لكن فضولي
يدفعني حتى اعرفه
رفعت نظري باستغراب ما ادري وش يبغى
مني وليه قاعد لي على الزله طالعته وهو يكلمني : لا تخافين البيض للي تحت رجليك ما رح يتكسر
كرد للفعل ناظرت تحت رجلي بعدها
طالعته وابتسمت : انكسرت بيضه لأني بآخر درجه
استعجلت شوي
رد بفوقيه : صحيح إنك سخيفه !!
هذا هو نايف ما ينفع معه شيء مستحيل
ييجي يوم وينسى حقده
لو كانت سلمى او لينا كان الحين طق الميانه
معهم مزح وضحك
بس انا غير عنهم حتى لو ابتسمت له ما يكلف نفسه
يبتسم بوجهي بالعكس يطالعني باحتقار وتصغير
كثير اسكت واطنش لما اتذكر انه ابوي
جلست جنب لينا بهدوء بعد ما ابتسمت بوجهها
ردت لي الابتسامه بهدوء
حطيت يدي تحت خدي وانا ارتكي على يد الكنبه
اسمع كلامهم
ساميا طالعت نايف : اي ساعه ؟؟
نايف وعينه على ساميا : ما حدد لي وقت
ساميا : خلاص رح اتصل بأخوي يرجعنا من الصالون
لينا : يمكن خالي مو فاضي ؟؟
ساميا طالعتها : قبل ما انام اتصل عليه و أتأكد منه
نايف : أي ساعه بدر جاي ؟؟
لينا : سلمى تقول بعد صلاه العشاء
نايف وهو يعدل جلسته : خلاص تجلس سلمى وبدر بالمجلس
ويتعشون مع بعض
لينا براحه : احسن علشان آخذ راحتي بالعشاء
نايف ابتسم لها : علشانك بس يا لينا والا بعض ناس
ما تستاهل
شفتم يقصدني بكلامه وش تفرق لينا عني ؟!!
نفسي افهم وش يبغى مني
لمتى اطنش؟؟!!
طالعني : ريم
رديت عليه بهدوء ولا كأنه صار شيء : نعم
طالعني وابتسم بسخريه : حبيت اسمع صوتك
يا عروس
ابتسمت غصب عني ما ادري وش السبب ورديت: من جمال صوتي تحب تسمعه
ضحك وعم صوت قهقهته بأرجاء الصاله
الكل يناظره باستغراب ما في سبب لضحكته
بعدها طالعني وآثار الضحك على ملامحه : تراك ماخذه بنفسك مقلب
طنشته وصرت ألعب بشعر فارس وهو جالس
على الارض قدامي يلعب بألعابه
شعره فارس اسود مثل سواد الليل وناعم حيل
ويوصل لتحت إذنه احب ألعب فيه وأغار من شعره
اتمنى احيانا شعري اسود مثله وافكر احيانا
اصبغه بس متردده
سمعت لينا نادت علي
بدون ما اطالعها رديت وانا ألعب بشعر فارس : همممم
قبل ما تسألني لينا
تدخل محامي الدفاع : ليه لينا مو قد المقام ترفعين راسك
وتكلمينها عدل
طالعته بدهشه وقبل ما أرد
بصوت عالي : اصصصصصص ولا كلمه
طالعته ببرود وما تكلمت
والحمد لله أذن العشاء طلع بعد ما اعطاني
نظره قوية
زفرت براحه بعد ما طلع اشعر احيانا بالندم
لما أطلع أجلس معهم
لو أجلس بغرفتي اريح لي
**
**
**
**
**
**
مشاري بابتسامة هاديه : الله يبارك فيك
ليلى : ما حددتم الملكه ؟؟؟
مشاري طالعها : للحين لا بس قريب
ام مشاري : الله يهنيك يا يمه واشوف عيالك
قدامي
وليد : اشوف ساحبين علي
وانا متى ملكتي ؟؟
ام مشاري : بالاول يملك مشاري وبعدها
يكون دورك
مشاري وقف : على خير ان شاء الله
بعدها طلع من الصاله
ليلى باستغراب : احسه مو مبسوط !!
ام مشاري بتحليل للموقف : يمكن خايف ما تعجبه
وما يقدر يرفض وقتها
ليلى : كل شيء نصيب
وليد طالعها وتكلم بلهجه استهزاء يقلد صوتها : كل شيء نصيب
وبسرعه ابعد راسه لما ضربته ليلى بالخداديه : سخيف
**
**
**
**
**
في صباح اليوم الثاني
ناظرتها وانا احاول اتحكم بأعصابي بعد ما رفضت
عنادها هذا يخليني أفقد اعصابي
تناظرني والعناد واضح على ملامحها
بجامتها الفوشيه عاكسه على خدودها
واعطتهم لون جذاب مع بياض بشرتها الناعمه
شكلها الهادي يخفي شخصيتها القوية
والمعانده
بس اذا كانت هي عنيده فأنا أعند منها تكلمت
من بين أسناني : قومي إلبسي بسرعة ما عندي وقت
كانت نظراتها مسلطه علي والقهر واضح : قلت لك
مو موافقه على الموضوع كيف تبغاني أروح أعمل فحص الزواج
مسكتها من معصمها وبحده : معك خمس دقائق تكونين جاهزه
وترحمي على نفسك اذا تأخرتي فاهمه
رميت يدها بقوه وطلعت من الغرفه وانا ناوي
اليوم ادفنها بمكانها اذا ما جهزت نفسها
اففففففف
تقهرني هالبنت
كم تمنيت إنه ربي ما رزقني فيها
بس كل شيء نصيب بالدنيا
**
**
**
**
**
تأففت بصوت عالي بعد ما طلع
وش هذي الحياه كل شيء بالغصب
انا حره ما أبغى اتزوج على كيفه وما له حق
يغصبني على الزواج
لا ويبغاني اليوم اروح اعمل الفحوصات
هذا الناقص
البارحه ماما اتصلت وزعلت مني لأنه ما صار نصيب
مع العريس للي من طرفها
يعني وش تبغاني أعمل رفض قطعيا
تدرون اقترحت علي اتواصل مع خالي محمد
وهو يزوجني بدون علم أهلي وبعدها اسافر مع العريس
يعني بالمختصر تبغاني اكرر غلطتها
ما ادري هل هي قاصده تنتقم من نايف عن طريقي
وترد له الحركه القديمه وتخليه يذوق القهر
لما يشوفني تزوجت بدون علمه
لا تقولون سيئه الظن بس أنا ما أثق بأي شخص
صحيح اخر الفتره كانت علاقتي مع ماما قوية
بس أنا طبعي كذا ما أثق بأحد
يمكن يكون ظني ما له وجود بس لازم
الانسان ما يكون مغفل ويفكر بعقله
على سيره العقل اقوم اتجهز قبل ما يدفني
لأني ما استبعدها عنه

**
**
**
**
**
صقر وقف عند مكتب سليمان ومعاه كوب النسكافيه : اخباركم شباب ؟؟
سليمان ابتسم : هلا هلا
هلا بالحامل والمحمول
صقر ابتسم وهو يتكي على اطار الباب : انقلع
سليمان : والله ابغى شيء اصحصح شوي
صقر اشر على الباب : هذا الباب مفتوح مين منعك
روح اشتري لك وروق
سليمان عض على شفته : اخخخخخ يالنذاله
انا دوم احسب حسابك انت وهذا الجوكر
طالعه نواف بطرف عينه وهو عافس ملامحه
صقر مشى خطوتين داخل المكتب بعد ما ارتشف
من الكوب : علامه نواف للي يشوفه يقول دافن
زوجته الحين
وبمزح
يا ابن الحلال كلنا على ذا الطريق ادعي لها
بالرحمه
طالعه نواف بطرف عينه وهو حاط يده تحت خده
ومتكي على طرف طاوله المكتب وما رد
صقر بجديه جلس على الكنبه : وش فيه ؟؟
ورفع نظره على سليمان باستغراب : علامه كذا ؟؟
سليمان ابتسم : يقول ضايق خلقه شوي
صقر ابتسم ابتسامه عريضه : ومين للي ضيق خلقك
يا بعد كبدي ؟؟!!
سليمان : البارحه بالاستراحه خسر بالمباراه وبعدها
وهو على هذا الحال !!
مو متعود ينغلب وخاصه بندر هو للي خسره
ومسكها عليه مغلوب مغلوب
صقر ضربه على كتفه بمزح مال راسه عن يده للي
مرتكي عليها : هونها وتهون وانا على بالي
زوجتك ماتت وضحك بصوت عالي
ناظره نواف بدون نفس ورجع يده تحت خده
يرتكي عليها وما رد عليه
وقف صقر بابتسامة : جلستكم تجيب الاكتئاب
اروح على مكتبي احسن لي
وتركهم وطلع والصمت سيد المكان
**
**
**
**
**
**
**
**

طول الطريق كان الهدوء سيد الموقف بين الطرفين
ريم ساكته تفكر بحياتها ونايف يفكر معقول سكوتها
يعني موافقتها على الزواج
توقع انها تعاند وما تروح معه للمستشفى
بس صار العكس جالسه على السرير ومتجهزه
نفسه يدخل عقلها ويعرف وش تفكر فيه
زفر بضيق متشوق لليوم للي يزوجها ويرتاح
من همها
لأنه بنظره ريم اشين شيء أصابه بحياته
وينتظر الفرصه للي يتخلص منها
يا ترى رح يتخلص منها والا رح تبقى جالسه
على كبده
أسئله كثيره كانت تدور بعقله حول ريم
نفضها مره وحده بعد ما وصل المستشفى
بعد ما وقف السياره تكلم بفوقيه : انزلي

**
**
**
**
**
**
**
**
ريم
يتكلم معي بفوقيه حسسني إني شغاله
اشتغل عنده
طنشته خليه يعمل للي يبغى ونشوف آخرتها معه
يمشي قدامي وهو نافش ريشه يا لطيف
على وش شايف نفسه كل الناس خلق الله
ما حد احسن من احد
ناظرته وهو ماشي قدامي مشيه سريعه افكر اسحب عليه وارجع للسياره
حتى مو مكلف نفسه يمشي معي يمكن
اجيب له العار ؟!!!
وقف مع شاب ويتكلم معه بس كان الشاب
مبتسم
اتوقع انه من عيال اعمامي بس اي واحد ما ادري
بس شكله شفته من قبل بالمزرعه
أشر لي السيد بابا ألحقه
تبعته بهدوء والشاب يمشي معه
ويتكلمون صوت الشاب فيه غلظه شوي
بس عفست ملامحي بقرف لما سمعت
نايف يقول له سليمان
مالت هذا سليمان يا كرهي له
نفسي اكسره تكسير وانتقم من ايام الطفوله
بس هين الطيور على شكلها تقع
مثل زوجته يا كرهي لها اففففف
الظاهر اني اكره كل العائله باستثناء
ام بدر وعمي سلطان
الله يسعدهم ويوفقهم

**
**
**
**
**
**
**
**

نايف بجمود ناظر ريم : انتظري هنا ما رح أتأخر
طالعته ريم الله يستر المره الماضيه قال لي انتظر هنا وبعدها رجع لي مثل البركان
الله يستر المره هذي وش رح يطلع لي بسالفه
بس رح اشوف نهايه هالمهزله رديت بهدوء: ان شاء الله
طالعتها وأنا نفسي اعرف وش تفكر
باكر يذوب الثلج ويبان للي تحتيه
تركها نايف وتوجه يقضي بعض الامور
كانت واقفه بتملل تكره الانتظار
قررت تستغل الوقت بالاستغفار
لحين رجوع نايف
بعد وقت قصير قاطع استغفارها صوت رجال
رفعت نظرها له ببرود
د.علي : ريم ؟؟
طالعته ريم ولوت بوزها وبنفسها ياليل النشبه
وش يبغى مني : نعم
د.علي ابتسم : الله ينعم عليك
اشوفك عندنا بالمستشفى ؟؟
خير إن شاء الله
نزلت ريم نظرها للارض وبنفسها يخرب بيت
ام اللقافه رفعت نظرها وشافت نايف من بعيد
واقف مع شخص ومعطيها ظهره
حاولت تبتعد عنه قبل ما يشوفها نايف ويعمل لها مشكله
ردت بإنهاء للكلام : مع ابوي
لفظتها بصعوبه
واشرت على نايف للي يكلم الرجال باندماج
تركت د.علي وابتعدت عنه
تاركه د.علي مندهش انها بنت د.نايف
اخذت نفس بعد ما بعدت عنه
بس وقفها صوت ثاني
تأففت بداخلها مين مسلطهم اليوم عليها
كان الشخص واقف بجانبها
رفعت راسها وعقدت حواجبها باستغراب
عشتو هذا من عيال اعمامي
نواف كلمها بحده : وش علاقتك بالدكتور علي ؟؟؟
ريم اعطته نظره استحقار وتركته وتوجهت قريب من
نايف
هذا للي ناقص
حضرته يتدخل بحياتي
اكره ما علي احد يتدخل بحياتي
يمكن لأني تعودت في بيت جدي ما أحد يتدخل فيني
ولا أحد يسألني من وين رايحه ومن وين جايه
عايشه على كيفي
حتى ماما بالفتره الاخيره كانت تتدخل شوي بحياتي
كانت تحاول تبعدني عن بنات خالي لما يطلعون
للاسواق
وما كنت اعترض على تدخلاتها يمكن لأني كنت
ابغى تكون لي أم تهتم بأمري تنصحني
مثل ما كنت اسمع من صديقاتي
زفرت ريم لتذكر امها مشتاقه لها كثير
مر وقت طويل ما شافتها
رفعت نظرها لنايف للي اشر لها تلحقه
هزت راسها وتوجهت خلفه
بس لفت نظرها ابن عمها يطالعها بنظرات ناريه
طنشته وكملت طريقها وهي تمشي
بخطوات واثقه
بس ما انتبهت لوجود العريس ولا شافته
او مثل ما تقول ما يهمها
يا ترى لآخر المطاف ما رح يهمها امر العريس ؟؟!!




**
**
**
**
**
**


ساميا
اليوم من لما رجع نايف من المستشفى وهو هادي وساكت
وريم توجهت لغرفتها وما طلعت منها
ووقت الغداء نزلت وتغدت وبعدها
رجعت على غرفتها بهدوء وما تكلمت بكلمه
وحتى نايف ما كلمها بشيء
استغربت لما قالت لي سلمى انها ما تبغى تروح
لحفله خطوبة ريان
اكيد ام بدر رح تزعل
حاولت فيها بس رفضت وتحججت إنها نعسانه
وتبغى تنام
اتصلت بأخوي وبعدها توجهت للحفله

بتأثر تكلمت ومسحت دمعه نزلت على خدها : توكلي على الله
وان شاء الله تقومين بالسلامه ............عليك
بالدعاء ...........خلاص دامها الدكتوره طمنتك على وضع الجنين ........رح ادعيلك بإذن الله
..........مع السلامه
قفلت الجوال وتنهدت بحزن
تحس بالحزن على الجوري احتمال كبير تسقط
كل ما تحمل بعدها بعده اشهر يسقط الجنين
ونفسيتها متحطمه جدا
رمت نفسها على السرير وهي تناظر سقف
الغرفه ودموعها على خدودها
بنظرها ما حد مرتاح بذي الدنيا
غمضت عيونها وهي تدعي من اعماق قلبها
انه يحفظ جنين الجوري
وبعدها غطت بنوم عميق
**
**
**
**
**
**
في اليوم التالي
جالسه على الكنبه بالصاله وبيدها الجوال
تطقطق عليه وهي عاقده حواجبها
جلست سلمى مقابل لها وبهدوء : ليه ما رحتي البارحه على خطوبه ريان ؟؟
خالتي ام بدر زعلت عليك
رفعت نظرها عن الجوال ببرود ردت : ما لي مزاج
نزل نايف عن الدرج وطالعها : المفروض تلبين الدعوه ناس عزمتك من الذوق انك تروحين
طالعته ريم باستنكار سمعتم يتكلم عن الذوق
اخخخ اشق الثوب واطلع منه
للي يسمعه يصدق : حسب علمي اصدرت قرار
ممنوع اطلع من البيت
والا تبغاني مثل حفله سلمى ألبس واتجهز
وبعدها تمنعني احضر
وطالعته ريم وهي رافعه حاجب تنتظر تبرير
جلس وابتسم باستهزاء : بس اختلف الوضع الحين
انت الحين مخطوبه ولازم تشاركين الناس
جلست ساميا جنب سلمى وخزت نايف
بعيونها
وهي للي أخذت موقف من ريم لانها ما حضرت
طلع هو مانعها
ليه يمنعها ؟؟
ما له حق يمنعها !!
بس ما تقدر تحكي لانه رح يقول لها لا تتدخلين بيني وبين بنتي
نايف بابتسامة : اليوم الكل لازم يكون في بيت ابوي بالمجلس
وطالع ريم انت معهم جهزي نفسك
وقفت ريم : مو فاضيه
قاطعها بعصبيه ما لها داعي : وقسم بالله كلمه زياده
ما يحصل خير اليوم اشوفك مغروزه بالمجلس
الحين طالع ويا ويلك اذا ما شفتك موجوده
طلع من البيت بعد ما ضرب الباب خلفه بقوه
غمضت ريم عيونها لثواني من قوة صوت الباب
ساميا هزت راسها وطالعت ريم بنبره رجاء : اخزي الشيطان
وتعالي معنا ما نبغى مشاكل
جلست ريم على الكنبه وببرود : ان شاء الله
**
**
**
**
**
**
**
كالعاده تطقطق على الجوال رفعت نظرها بتلقائيه
استغربت نظراته الحاده عليها لفت وجهها
وناظرت ساميا وسألت بهمس : وين خالتي ام بدر ؟
ساميا بنفس الهمس : الحين تيجي بإذن الله
قفلت الجوال ريم ورفعت نظرها لما شافت
ام بدر داخله
وقفت واقتربت منها وسلمت بابتسامة : اخبارك يا خالتي ؟؟
ام بدر تمثل الزعل همست : وينك ما جيتي البارحه ؟؟
ريم ردت بنفس الهمس : اذا حفلة سلمى ما رضي احضرها اكيد حفلة ريان ما رح يرضى
ام بدر بابتسامة : معذوره يا بنتي
مع اني تمنيتك موجوده بس يالله نصيب
تنحنح من خلف ام بدر : طريق
ام بدر ناظرت عبود : كل هذي المسافه مو عاجبك ؟؟
عبود بلقافه : اخبارك يا ريم ؟؟
وينك ما تنشافي ولا تسلمين على ابن عمك !!!
ريم بنفسها هذا عبود ما تغير طبع اللقافه
ما زال فيه ردت بهدوء : الحمد لله بخير
عبود طيح الميانه : اقول ريم
مسح على راسه مكان الضربه وعقد حواجبه باستغراب : ليه ضربتني ؟؟؟
سلطان يمثل الحزم : اقول اترك بنت عمك بحالها
انت كبير مو صغير تكلمها كذا
عبود لوى بوزه مو عاجبه
ودخل جلس عند الشباب سلمت ريم على سلطان بابتسامة
ناظرها بابتسامة محبة كم تمناها تكون من نصيب واحد من عياله
رجعت جلست ريم بمكانها بهدوء
الجده بدون نفس : اشوفك مطيحه الميانه مع ولد
عمك ؟؟
ريم بنغزه : عادي مثله مثل غيره
مطيح الميانه مع بنات عمه
الجده بقهر وهي عارفه قصدها : من تقصدين ؟؟؟
ريم بلامبالاه : كل واحد يعرف نفسه

**
**
**
خالد
هالبنت تقهرني لما دخلت سلمت عليها
طنشت وكأنها مو سامعه مع إني متأكد
انها سمعتني
ولما نبهتها ام سيف ردت بدون نفس
يا لطيف شو مغروره
وللي يقهر لما دخل عبود ردت عليه لما
سألها عن اخبارها
ليه عبود عادي ؟؟؟
وللي قهرني زياده اخر كلامها مثله مثل غيره
قاصديتني بالكلام
انا لما اكلم بنات عمي احسهم مثل اخواتي
لاني اكبر الاحفاد وعيالي ما شاء الله طولي
البكر عندي اعمارهم 9 سنوات
انا عمري 28 سنه تزوجت و عمري 18
علشان كذا احسهم اخواتي الصغار
بس هذي الريم احسها مو قليله
والظاهر انها متعمده ما ترد علي
لكن هين يصير خير
**
**
**
نواف يطالع عبود : وانت وش تبغى بالبنت
تكلمها كذا وكأنك على معرفه سابقه !!
عبود وهو ينفش ريشه : هذي صديقة ايام الطفولة
سليمان : قلتها ايام الطفولة والحين كل شيء انتهى
عبود بغباء : ومين قال لك كل شيء
انتهى ؟؟؟
نواف فتح عيونه : وش تقصد ؟؟؟
عبود : ما يخصكم
عمر : مالت عليك يالمعفن
نسيت انها رفضتك من قبل
طنشهم عبود وفتح جواله
نواف طالع عبود وهو فاتح جواله
وبعدها ناظر ريم ماسكه الجوال وتطقطق
فيه
وقع الشك بقلبه هز راسه ما يبغى
يظلم احد يمكن من باب الصدفه
بس للي يحيره كلام عبود معناه انه علاقتهم ما انتهت
بس لو ريم تفكر فيه كان ما رفضته
اسئلة كثيرة دارت في عقله بس ما لقى لها جواب
**
**
**
**
**
**
بعد ما رجعوا من بيت الجد اول ما دخلوا البيت
تكلم سلطان بحده : عبود
طالع عبود ابوه : نعم يبه،
سلطان بحزم : كلام زايد مع ريم ما ابغى اسمع
احمد ربك انه نايف وابوي واعمامك مو موجودين
وانت تعرف عمك نايف ما يطيق فابعد عن هذي الحركات
عبود باعتراض : وش فيها اذا سلمت على بنت
عمي ؟
سلطان : عبود انا اعرفك اكثر واحد
السالفه مو على السلام
انت ملسون وانا اعرف بك
فاترك هذي الحركات يكون افضل
عبود بدون نفس : ان شاء الله
**
**
**
**
**
**
**
مر اسبوع على التحليل واليوم ملكه ريم
رح تملك وباكر رح تكون الحفله
اما الزواج ابو عناد قال لي الزواج على مهل
أكد لي نايف انه كل الاوضاع تمام وريم ساكته
كنت متفق مع ابو عناد بدايه العطله ييجون للمزرعه ونملك
هناك بس وقتها اضطر يسافر وما قدر ييجي
للمزرعه وتأجل موضوع الخطوبه للحين
نايف طلب مني الملكه تكون في بيته
علشان كذا رح تكون الملكه هناك
طالعت فيصل : علامك ساكت ؟؟؟
فيصل هز كتوفه : ما في شيء اتكلم فيه يبه
طالعته باستغراب : ما ادري احس وراك كلام !!
فيصل بهدوء : ما في شيء
يمكن تتوهم
رديت وانا متأكد في شيء مخبيه
بس الحين مو فاضي للتحقيق : يمكن اتوهم
**
**
**
**
**
**
**
نواف بعد ما سلم عليهم العريس : شوف
هالبزر يبغون يزوجونه
سليمان باستهزاء : اكيد من فلوس ابوه يبغى يتزوج
والا هذا تلاقيه يأخذ مصروفه من ابوه
نواف ،: لا الحين يطلب مصروف له وللعروس
سليمان ابتسم : صادق
سمع كلامهم وشد على قبضه يده بقهر
واضطر يدخل المجلس
وهو مو مرتاح لهذا النسب كله عض على شفته
كله بسبب
اقترب من الحاضرين وسلم عليهم بهدوء
وبعدها جلسوا بانتظار الشيخ

**
**
**
**
**
**
جالسه بالغرفه بهدوء وتناظر للبعيد
اليوم ملكتها امها من بعد ما سمعت زعلت منها
وما ترد على مكالماتها
طالعت نايف للي دخل بهدوء : شرفي
ابتسمت على جنب حتى يوم ملكتها مستخسر يعاملها مثل باقي البنات
بس مو ريم للي تهزها هذي الامور
وقفت بهدوء وتوجهت نحوه بصمت
دخلت الغرفه للي جانب المجلس
وقف نايف وطالعها : كوني قريبه من الباب
ولما يسألك الشيخ علشان تردين عليه
وبعدها اجيب لك الدفتر توقعين
طالعته بصمت وقلبها مثل الطبول يدق
متوتره جدا
اخذت نفس عميق حتى تخفف من التوتر
رجعت اخذت نفس ثاني وثالث
بعدها اقتربت من الباب
**
**
**
**
**
**
ام خالد براحه : الحمد لله انها رح تخطب ورح
ارتاح منها
كنت حاطه يدي على قلبي خايفه يدبسوها بواحد من عيالي
ام سليمان،: وانا مثلك يا خيتي حاط يدي على قلبي
الجده : ربنا ريحنا منها ورح تتزوج برا العائلة
وما احد من احفادي يظلمونه ويتزوجها
رولا : مو قد فرحتي كنت خايفه تسرق
مني خالد
وهي لابسه هالنقاب عيونها تسحر
سديم وهي تعلك : وش تبغى بزوجك
عجوز وعنده درزن عيال
رولا،: عجوز بعينك
سندس : انا واثقه من زوجي ما رح يشوف
احد غيري وما يملي عينه غيري
روان تنقهر من غرورها بنفسها : لو شاف
ريم اكيد رح يطلقك ويتزوجها ما في
مقارنه بينكم
وخاصة بعد ولادتك صاير لك كرش
سندس صار وجهها بالالوان وبقهر : هذا الكرش من الولاده بعد فتره يروح
روان رفعت حواجبها : نشوف

**
**
**
**
**
**
الشيخ بصوت مسموع : هل تقبلين ب عناد .....
زوجا لك على سنه الله ورسوله
ريم اخذت نفس تقوي نفسها الحين اللحظه الحاسمه
للي تقرر مستقبلها رجعت اخذت نفس اعمق وبصوت حاولت
قد ما تقدر يكون واثق : مو موافقه يا شيخ
صمت حل بالمكان للحظات
والخبر نزل كالصاعقه على الموجودين
طالع الشيخ الجد باستغراب وكأنه ينتظر يبرر الموقف
جايبينه وبالاخير البنت رافضه
طالع الجد الشيخ وملامحه باهته لونه شحب
اي موقف حطتهم فيه ريم
ابو عناد ووجهه احمر من الفشيله
طالع الجد بقهر وينتظر الاجابه
ناظره الجد بنظرات ما عنده تفسير للموقف
الاعمام وجههم اسود من الموقف وبهتت ملامحهم
نايف للي احمر وجهه من الفشيله وقف
قاطعه ابو عناد والقهر باين بوجهه: اجلس يا ابو سيف
طالع نايف ابو عناد ويحس بركان بداخله انفجر
ابو عناد يتكلم بعد ما جلس نايف : اذا حنا مو قد المقام يا بنت نايف رح ننسحب
قاطعته ريم بصوت واثق من خلف الباب: لك القدر
والحشيمه يا عمي انا رافضه الزواج كله
الحين
انا ادرس طب سنه ثانيه وما ابغى انشغل عن دراستي
سكووووووووووووووو ت
عم المكان بعد ما القت ريم الصاعقه
الجد ووجهه مخطوف مو قادر يتكلم بحرف
فشلتهم قدام الناس والحين تقول تدرس
طب !!!
هذي كذبه من كذباتها والا وش؟؟؟
هي المفروض طالعه على ثالث ثانوي
كيف تكذب وتقول انها تدرس طب
كان عقل الجد مشوش ما قدر يرد بكلمه
وحده
**
**
**
نايف
غمضت عيوني وانا احاول استوعب الموقف
لا لا مستحيل انا بحلم
يا ليت حد يقرصني واستيقظ منه
عضيت على شفتي بقهر
فشلتنا هالزفته قدام المعازيم
وش سالفه الطب ؟؟!!
احس نفسي بدوامه مو فاهم شيء
رفعت نظري للشيخ للي تكلم : اذا البنت مو موافقه
انا انسحب يا جماعه الخير
ابو عناد بلع قهره وطالع الجد : حنا مستعدين بدراستها تكملها وش قلتم ؟؟
الجد زفر بضيق : البنت بنتكم وانتم فصلوا وحنا نلبس
طالع ابو عناد بنظرات واضح كثير انها بنتنا : ابغى اسمع رأي البنت لانه الشيخ مستعجل
الجد بفشيله وقف واستأذن وتوجه للداخل
كانت جالسه بالغرفه جنب الباب وسمعت كلام
ابو عناد وتفكر فيه
رح يخلونها تكمل دراسه
بس هي كذا ربحانه لانها ضربت عصفورين بحجر مثل ما خططت
العريس يطير وتكمل دراسه بعلم نايف
لما ينتشر امر دراستها بين الناس
ما رح يقدر نايف يفصلها من الجامعه لانها الناس رح
تتطعن وتقول وش السبب للي خلاه يفصلها من الجامعه
وكذا حصلت للي في بالها فما له داعي عريس
الغفله
رفعت نظرها لما شافت الجد دخل ووجهه اسود
تكلم وباين انه مو طايق ريم ونظراته وعيد لها : سمعتي وش قال ابو عناد ؟؟
ريم بهدوء :سمعت وقول لهم مو موافقه
الجد وهو يحاول يتحكم بأعصابه : ريم لا تفشلينا قدام الناس
يكفي احراج
ريم بثقه : انا قلت لكم من قبل اني رافضه
الجد وهو ماسك اعصابه : والحل ؟؟؟
ردت بعدم مبالاه : ما في نصيب وتركته
بس وقفها لما مسكها الجد من يدها بقوة
وشد على اسنانه : وين ؟؟؟
ريم طالعته ببرود : على غرفتي
الجد تنهد الحين الضرب ما يفيد لانها رح تعاند
اكثر والحين هم في موقف ما يحسدون عليه
لازم يستخدم السياسية
بعدها يطلع حرته فيها ما رح يسامحها على
فعلتها هذي : اسمعي يا ريم ترى ابو عناد
يكون ابن خالتي
وخالتي قبل ما تموت وصت انه عناد يتزوج
قاطعته ريم بشراسه : وانا وش دخلني ؟؟
يتزوج ما حد ماسكه
الجد اخذ نفس يكتم غيضه لاخر لحظات : تبغين ارمي وصية خالتي بعرض الحائط ؟؟؟؟
خالتي ماتت ولازم ننفذ وصيتها وتتزوجين عناد
وهو متكفل بدراستك وش قلتي ؟؟
ريم رفعت حاجب : يعني انت تستشيرني والا تخبرني ؟؟
الجد طالعها الله يجيبك يا طول الروح : اعتبريني
استشيرك
ريم بعناد : مو موافقه
وفكت يده عنها وطلعت بسرعه
الجد مشى خطوتين يلحقها بس ما قدر يمسكها
كانت اسرع
عض على شفته بقهر وضرب جبهته بقوة
مسح على وجهه بتعب وفشيله وش يقول للجماعه
اخذ نفس ودخل المجلس
**
**
**
**
نايف
طالعت ابوي واقف عند باب المجلس
وملامحه باهته والهم والفشيله باينه على ملامحه
ثبتت نفسي ما اقوم وادفنها واطلع كل قهري
وكرهي لها طول السنوات
فشلتنا الحيوانه
مقهور واحس بالقهر وانا اشوف ابوي بهذا الموقف
المحرج خلاص اليوم دافنها دافنها
وشد على قبضة يده بقوه


**
**
**
*_
*
الجد
وقفت عند الباب وانا احس اصابني الخرسان
مو قادر انطق حرف واحد
ما لي عين اناظر ابو عناد بعد ما فشلناهم
طالعت العريس جالس وساكت
يمكن مبسوط ما يبغى هذا الزواج
كيف اقول لهم ما لكم عندنا نصيب
كيف ؟؟؟؟؟
حسبي الله عليك يا ريم مثل ما فشلتينا
قدام الجماعه
الكل يناظرني وينتظر الرد
فتحت فمي اتكلم ما ادري وش اقول الكلمات
طارت مو قادر اجمع حرف واحد
احس اني مخنوق والنفس مو قادر اتنفسه
بس لازم اتمالك نفسي
مو وقت انهار الحين
احس نفسي ضعف والدنيا بدت تسود بوجهي
جمعت قوتي المنهاره وبصعوبه لفظت : ال ال
بس حسيت بصوت من خلفي رد لي الحياه : موافقه يا شيخ
بس عندي شروط
كنت مو مصدق هذي ريم والا انا احلم
كيف ؟؟؟؟ وهي طلعت لغرفتها !!!!
اخذت نفس استوعب الموقف وطالعت الشيخ
اسمعه يقول : على بركه الله
موافقين على شروطها وطالع ابو عناد ؟؟؟
**
**
**
**
*_
*_
عضيت على شفتي بقهر وتتشرط بعد
وقسم بالله لتندم انا تحطني بهذا الموقف
فوق الفشيله للي حطتنا فيها تتشرط
ناظرت ابو عناد للي تكلم والقهر باين بوجهه : قولي
شروطك ونشوف واذا نقدر ما رح نقصر
سمعتها تتكلم بصوت واثق قوي انا نفسي اعرف
من وين تجيب هذي القوه عكس اخواتها
حتى امها مو مثلها قوية : شرطي الاول اكمل دراسة الطب
رد ابو عناد : موافقين على هذا الشرط
غيره ؟؟؟
عضيت على شفتي بقهر حسيت نفسي مغفل
لدرجه كبيره وش سالفه الطب ؟؟؟
تكمل دراسه ؟؟؟
بس كيف ؟؟؟/
اخخخخ انا اليوم دافنها بس خلي تنتهي الامور على خير
وقتها ما حد يفكها مني
رجعت تتكلم وانا النار للي بداخلي تزيد : شرطي الثاني
بعد الزواج ازور امي بفرنسا
طالعت ابو عناد عقد حواجبه باستغراب من
هذا الشرط وقبل ما يرد
رد عناد بهدوء وكأنه يبغى يخلص من هذا الموضوع : موافقين على هذا الشرط
طالع ابو عناد ابنه وبعدها طالع الجد : موافقين غيره
ردت : والشرط الثالث
مهر
انا خلاص قفلت معي الظاهر تبغى تحدد مهرها
زادتها تكلمت بسرعه وقاطعتها : مهرها مثل اختها
ابو عناد طالعني : خلاص اتفقنا
في باقي شروط ؟؟؟
تكلمت بحزم حتى اقطع عليها الطريق : باقي شرط لي انا
**
**
**
**
**
**
خالد
ناظرت جدي وجهه اسود وهو يسمع ريم تتشرط
ما توقعتها شخصيتها قويه كذا !!!
وفوق سواد وجهها تتشرط
ما خلصنا من شروطها طلع لنا عمي نايف
عنده كمان شروط
لو انا بمكان ابو عناد كان وقفت وقلت خلي
بنتكم عندكم
وخللوها احسن لكم !!
فشيله قدام الجماعه جايبين الشيخ علشان يملكون
تنط العروس وتقول مو موافقه!!
وش هذي المسخره ؟؟!!
بعد ما وافقت تتشرط !!!
ناظرت عمي نايف اسمع شرطه يمكن بعد ما
يقول شرطه
ينط جدي ويقول عندي شرط وبعدها ابوي
قسم بالله انها مسخره طالعت عمي نايف وانا
مو عاجبني الوضع ابد
تكلم عمي نايف بهدوء: شرطي ما ابغى حفله خطوبه
خلاص نملك الحين والبيت مفتوح حياكم الله
بأي وقت اذا تبغون تشوفونها
طالعت ابو عناد للي الظاهر عليه انفجر : مثل ما تبغون
خلاص كذا اتفقنا يا جماعه الخير
طالعت جدي للي عدل جلسته وتكلم : عندي شرط يا ابو عناد
لا بالله مسخوها وش سالفه الشروط هذي
ما ادري كيف ابو عناد متحملهم
وساكت لهم
لو انا مكانه اخليهم يتشرطون وبعد ما يكملون شروطهم اوقف واقول ما لكم نصيب عندنا
علشان يتشرطون مره ثانيه
ابتسمت على تفكيري
وحددت نظري على جدي اسمع شرطه
تكلم جدي وهو يناظر الموجودين وبالاخص ابو
عناد : شرطي ما تطلعون من هنا الا بعد ما تتعشون
طالعت ابو عناد للي ارتخت ملامحه اشوى المسكين
ارتاح شوي من شروطهم : ليتك سالم يا ابو سلمان
ما تقصر بس ما بقى وقت على موعد سفري
والجايات اكثر إن شاء الله
وجماعتي عندنا عقد قران واحد من جماعتنا بعد العشاء
رد جدي : اذا كذا مسموحين
ضحكت بداخلي على شكل الشيخ المتنرفز : يا اخوان تراكم اخرتوني خلونا نبدأ بإجراءات الزواج
تكلم جدي : على بركه الله

رديت بهدوء : موافقه يا شيخ
دخل نايف ومعه الدفتر اوقع عليه
اقترب مني وبهمس : والله لتندمين بس اصبري
متى ما طلعوا الجماعه من هنا اذا ما دفنتك هنا
بس صبرك علي
ابتسمت على جنب ببرود وانا قلبي يطبل طبول من الخوف لانه مو ناوي على خير الشرار يطلع من عيونه
مسكت الدفتر والقلم وناظرت اسم العريس
عجبني اسمه عناد
ناظرت توقيعه بس نقزت على قرصة بكتفي
طالعت نايف وانا افرك مكان القرصه وعافسه
ملامحي : ليه قرصتني ؟؟
طالعني بوعيد : هذا ولا شيء بس اصبري
والحين وقعي وش تتاملين ؟؟؟
ابتسمت : اتأمل توقيعه
اعطاني نظره قويه تخوف : والله لتندمي يا قليله
الحياء
وقعي الحين اشوف
مسكت القلم ووقعت على حياه جديده
بالنسبه لي نكره ما ادري وش تحمل لي
انقهرت من حركته لما سحب مني الدفتر تكلمت
بعفويه : شوي شوي لا تتمزق ورقة العقد
رمقني وهو يقرص عيونه : رح تندمين
وبعدها طلع
اخذت نفس عميق
وافقت على العريس بعد ما اعلنت رفضي
حتى اثبت لهم انه كل شيء بمزاجي
مع اني كنت مصممه على الرفض
بس فكرت فيها
لو رفضت وش يخلصني من نايف ؟؟
واحتمال كبير يرفض يخليني ادرس وما تنفع
كل افكاري
اما كذا اتزوج واتخلص من نايف واكمل دراسه
وازور امي
لاني طول ما انا عنده ما رح يخليني ازورها
واخاف يزوجوني واحد من عيال عمي
ورح يكون نفس العقل ويمنعني عن امي
من حظي اتزوج غريبه حتى استقر بحياتي
وارتاح من اهل ابوي
بس الحين بقى اخر حيله وانقذ نفسي من البركان
للي ينتظرني بالخارج
الله يستر
**
**
**
**
**
**
طلع الشيخ بعد ما ملك لهم
ابو عناد ناظر الجد : اذا ما عليك كلافه ابغى اشوف
زوجة ولدي قبل ما اسافر
الجد : حياكم الله تفضل
ابو عناد : باكر ان شاء الله يزورونكم الاهل ومعهم
عناد بس انا الحين ابغى اسلم عليها قبل ما اسافر
نايف بهدوء : تفضل يا عم من هنا
فتح الباب نايف ودخل واستغرب تواجدها بالغرفه
توقع انها تهرب وتقفل باب غرفتها بالمفتاح
بس جالسه وكأنها تنتظر شيء نقزت اول ما شافت نايف
ووقفت تناظر الرجال للي دخل بعد نايف
نايف باحترام : تفضل
ريم طالعته بذهول مو مصدقه معقول هذا العريس ؟؟؟
هذا كبير بالسن !!!
لو تزوجت عبود احسن لي من هذا الشايب
الجد وقف جنب ابو عناد وتكلم : ريم تعالي سلمي على عمك ابو عناد يبغى يسلم عليك قبل ما يسافر
ارتخت ملامح ريم براحه
وبعدها ابتسمت للخطه للي في بالها
تقدمت من ابو عناد وسلمت عليه وهي تحس بالاحراج
ابو عناد يناظرها بتأمل : اخبارك يا ريم ؟؟
ريم وخدودها حمروا : الحمد لله بخير
اخذت نفس وهي مصممه على مخططها
طالعت ابو عناد : طلبتك يا عمي قول تم
ابو عناد باستغراب وكان احساسه انها تبغى الطلاق بس اضطر يتمم لها : تم
ريم : انا بجيرتك يا عم
عقد حواجبه باستغراب وبعدها ارتخت وكأنه فهم الموضوع
اقترب نايف من ريم والعصبيه واضحه عليه : تراك زودتيها
مد ابو عناد يده حاجز بين ريم ونايف : ريم بجيرتي
وحمايتي
لا تمد يدك عليها واذا على رفضها للزواج
انا مو زعلان وهذا حقها وكل بنت بهذا العمر تتردد
واذا لي عندكم خاطر لا تزعلونها تراها زوجة ولدي
وما لكم عليها كلمه
وطالع الجد : قبل ما اطلع تراها بجيرتي يا ابو سلمان
الجد بلع قهره : توكل على الله ما رح حد يزعلها
ابو عناد : يلا انا الحين استأذن
طلع الجد وابو سليمان مع ابو عناد
وحل الصمت بالغرفه
جلس نايف على الكرسي وهو يحاول يكتم
غيضه وعصبيته
***
***
***
**
**
نايف
مو قادر اتحكم بأعصابي والزفته لعبتها صح
اليوم بموت اذا ما طلعت حرتي فيها
ناظرت ابوي للي دخل واخواني ساكتين
تكلم ابوي بقهر : ليه يا ريم تعملين كذا
وتفشلينا قدام الجماعه ليه ؟؟؟
ردت ببرود : انا قلت لكم اني رافضه بس انتم اصريتم
على الملكه وحبيتوا تسمعوا الرفض
صرخت عليها شين وقوي عين : ريم اتكلمي عدل احسن
ما ادفنك بمكانك
سألها ابوي بحزم : وش سالفه الطب هذي ؟؟
هذا السؤال للي ابغى اعرف له جواب
وش سالفه الطب
طالعتها وانا ابغى اسمع الجواب ردت ببرود : انا ادرس
طب سنه ثانيه
قاطعتها كذابه انت الحين المفروض ثالث ثانوي
طالعت سلطان للي تكلم : اتوقع كلامها صحيح
لانه ريم لما كانت صغيره المدرسه قدموها
قاطعته : والحين جاي تقول ؟/؟
انا على بالي بعدها بالمدرسه
انا تستغفليني وتروحين على الجامعه بدون علمي قهرتني ترد علي : انا ما استغفلتك انا دخلت الطب
وانا في بيت جدي سالم
وانت ما عمرك سألتني عن دراستي حتى اجاوبك
كلمها فيصل بحده : مع مين كنت تروحين للجامعه ؟؟
ردت على فيصل بهدوء : ماما استأجرت لي سواق قاطعتها بصراخ : تروحين مع السواق لوحدك
يا قليله الحياء ؟!!
ناظرتني : زوجته معه ما كنت اطلع لوحدي
وبعدين ما يطلع لكم تحققون معي وكأنه هامكم
امري
لو يهمكم امري كان ما تركتوني في بيت جدي
8 سنوات ما حد كلف نفسه مجرد
اتصال يتصل
لو هامكم امري كان عرفتم اني كملت الثانويه
كان جيتوا لعندي وقلتم ما تتدخلين طب
تركتوني اعيش على كيفي وما وجهتوني
فما لكم حق الحين تلوموني على اهمالكم
اعطتنا نظره كره وحقد وطلعت من المكان
**
**
**
**

*
*
بعد ما طلعت ريم
صقر ناظر ابوه واخوانه: صادقه ريم
وينك عنها كملت الثانويه ودخلت الجامعه وانت
ما تدري عنها
وهي في بيتك تدرس بالجامعه وانت ما معك خبر
اهملتها كثير والحين جاي تحاسبها
الجد بحزم : اسكت يا صقر ترى راسي صدع
مو ناقص محاضراتك
نايف بعصبية : نفسي اطلع اكسر راسها تكسير
وابرد حرتي فيها
الجد جلس بقهر : ااجلس يا نايف ترى انا مقهور اكثر منك
بس حنا اعطينا ابو بندر كلمه وما نقدر
نتراجع فيها
يصير خير
فيصل طالعهم مو عاجبه الموقف كله لو انها عنده كان دفنها بمكانها
على الفشيله للي حطتهم فيه
استأذن وطلع
**
**
**
**
**
**
ابو بندر
حركت السياره وانا للحين تحت الصدمه
للحين احس بالفشيله قدام جماعتي
والله لولا انها وصيه امي اخطب لعناد من حفيدات
ابو سلمان والا لو يموتون ما اخذت من بناتهم
بعد هالفشيله
بس اضطريت اوافق على الشروط بس تنفيذ
للوصيه
ضرب على الدريكسون بقوه انا تجلس تتشرط
علينا بزر بعد ما فشلتنا قدام جماعتي
بس للي محيرني ليه ابو سلمان اختار بنت
نايف الكبيره ؟؟!
ما انكر كنت بالمجلس مو طايقها لو بيدي كان قمت ودفنتها بمكانها
على قوتها وتتشرط ما شفت بنت مثلها
بس تفاجأت بعد ما شفتها
ما ادري نزلت محبه هالبنت بقلبي
وحسيت قلبي تقطع عليها لما طلبت جيرتي
بعد ما شفت نظرات جدها واعمامها وابوها
مو ناويين على خير
لاخر لحظه كنت ابغى اخذها معي بس تراجعت
ما يصير وما رح يقبلون اهلها
بس للي يزيد حيرتي كيف عيال عمها فرطوا
فيها
مزيونه حيييييل
معقول فيها شيء وخبوه عنا ؟؟!!
هز راسه بالرفض
بس شيء ما يدخل العقل
امي وصت عناد يتزوج من حفيدات ابو سلمان
وما حددت وحده معينه
ليه اختاروا بنت نايف الكبيره ؟!!
قلبي قارصني اخاف فيها بلاء ويبغون
يرمون بلاها علينا
والا للي مثل ريم عيال عمها يتذابحون علشان يخطبونها
تنهد
يالله باكر يذوب الثلج ويبان للي تحته

**
**
**
**
**
**
بالحديقه
سليمان بقهر: تخيل فوق سواد وجهها
ولا احد تكلم معها اخخخخ يالقهر نفسي
اصفقها كم كف اطلع حرتي فيها
بدر رفع حاجب : وانت وش دخلك تضربها كم
كف !!
اخوها والا زوجها والا خالها والا عمها ؟؟
سليمان بحده : ابن عمها واكسر راسها
عاجبك سواد وجهها ؟؟
عمر : بصراحه موقفها مفشل جدا ترفض
والجماعه جالسين
والشيخ موجود قسم بالله يفشل
عبود : بالعكس موقفها يشرف
ويدل على قوه شخصيتها يعني مثل ما سمعت
قالت لعمي نايف انها رافضه ومع ذلك اجبرها
وطنش رأيها يتحمل النتائج
نايف رفع حاجب بشماته : اشوف تدافع عنها
مو كأنها رفضتك
عبود والوضع ريلاكس عنده : حتى لو رفضتني تبقى
صديقة الطفوله
قاطعه نواف : اسكت لا يسمعك عنادووووو
وضحك باستهزاء
يمكن الحين يغار عليها
عبود يتكلم بصراحه : يا اخي انت وش حارق بصلتك ؟؟
الغيره والقهر واضحه بعيونك
نواف فتح عيونه باستنكار : انا
وميل شفته بغرور : على وش اغار ؟؟
بزران اثنين ملكوا
بدر : خلاص اسكت انت واياه هذا عمي صقر متوجه
لعندنا لا يسمعكم
سكتوا الشباب ونواف يعطي لعبود نظرات ناريه

*
*
*
*
*
*
*
الجده
مقهوره من لما سمعت انها رفضت ريم العريس وفشلتهم
على وش شايفه نفسها تحمد ربها لقت واحد
يطالع وجهها هالخايسه
بس اشوفها لامسح فيها الارض ما ادري
كيف نايف ثبت نفسه وما دفنها بمكانها
طالعت الجد بقهر : وسكتم لها ؟؟
الجد مسح على راسه وزفر بضيق : اسكتي يا مزنه تراني للحين بركان بداخلي مولع
وبقهر طالع الجده : انا تفشلني انا تخليني قد حبه
البزر ما اقدر اطالع الرجال
صغرتني
وعض على شفته من القهر
الجده : انا اتصلت بنايف وخبرته يمكن اهل امها
طلبوا منها تعمل كذا انا ما استبعد عنهم شيء علشان ينتقمون منا
طالعها الجد وهز راسه : وانا ما استبعد عنهم شيء
الجده : باكر رح ييجون ؟؟؟
طالعها الجد بطرف عينه ؛ رح ييجي عناد وامه واخواته
قاطعته الجده : اخاف تفشلنا قدامهم
قاطعها الجد بعصبية : خلها تعملها وقسم بالله ما حد يفكها مني هالزفته
***
**
*
*
*
*
*
ريم
لا تسألوني عن شيء ما ادري احس كنت بحلم
كل شيء مر بلمح البصر
ما ادري من وين جت لي القوه ارفض واقعد
اتشرط
بس احس بالسعاده والانتصار وإني مبسوطه على الاخير
يمكن لاني ارتحت من هاجس الطب
خلاص ما عاد في شيء اخفيه واخاف يكتشفونه
رح اكمل دراسه غصب عنهم وقدام عيونهم
ارتحت كثير لابو عناد وحسيته انسان حبوب
ما ادري شيء عن عريس الغفلة
الا اسمه الحلو
ما ادري هل هو اكبر واحد بإخوانه ؟؟ كم عمره ؟؟
وش يشتغل ؟؟
أسئله كثير تحوس بعقلي مو لاقي لها جواب
سبحان الله كنت ناوي ومصممه ابقى عزباء طول
حياتي
لكن النصيب
طالعت جهة الباب ويا ليتني ما طالعت
انا وش للي مسهرني وقاعده افكر بعريس الغفله
لو نمت ابرك لي كيف اواجه هذا البركان للي داخل علي ؟؟؟
غبيه لو قفلت الباب بالمفتاح
بلعت ريقي وناظرته ولا كأني عامله شيء
اقترب نحوي وانا اردد بداخلي اللهم سكنهم مساكنهم
وقف فوق راسي
وانا جالسه على السرير رفعت نظري له
وناظرته بملامح بارده ظاهريا
وقلبي يرقع طبول
يمه يمه نظراته تخوف الله يستر
اعطاني نظره قوية وبعدها طالع جنبي
استغربت وش يطالع
ما امداني اناظر الا كان ساحب الجوال
طالعته وبتلقائيه : لاااااا
فتحه بعنف وطلع الشريحه
وابتسم بخبث وهو ماسك الشريحه بأصابعه
الابهام والسبابه : عسى خبرتي الماما انك ملكتي ؟؟
طالعته بقهر وحاولت امسك اعصابي : اعطيني
الشريحه
طالعني بفوقيه : واثقه من نفسك
وبلمح البصر كسر الشريحه
شهقت بقهر وعيوني مفتوحه عالاخير وانا اطالعه
كل الارقام عليها
وما اكتفى مسك الجوال وكان يشتغل عليه
وقفت بقهر وحاولت اسحبه منه
مسك يدي بقوه وبحده ابعدني عنه : قربي وشوفي وش
رح يحصل لك
بعد دقائق مد الجوال لي وهو يبتسم : خذي
سحبت الجوال وفتحته وقلبته وانقهرت
عمل ضبط مصنع كل الارقام راحت ما بقى
شيء كيف اتواصل مع امي ؟؟
والجوري ؟؟؟
وبنات خالي ؟؟؟
عضيت شفتي بقهر وما طالعته لاني غبيه
لو حاط رقم سري كان ما قدر يعمل كذا
تكلم بتهديد : وقسم بالله لو اسمع انك متواصله مع احد من اهل امك الا ادفنك بمكانك
وخاصه الماما تبعتك
سمعت خطواته وهو طالع
وانا اناظر الارض وشاد على قبضه يدي بقهر
مو من حقه يمنعني من اهلي
لكن هين اذا ما طلعت الشوك بحلوقكم ما اكون
ريم
**
**
**
**
**
**
**
**
اول ما دخلوا صوتهم طالع
بندر بعصبية : كيف قبلتم بعد سواد وجههم ؟؟؟
انا جلست احترام لك يبه بس علشانك
والا لازم قمنا وخليناهم يتشرطون على كيفهم
ابو بندر بهدوء : خلاص يا بندر انا لولا الوصيه
كان ما تممت الموضوع خلاص الموضوع تم
وما في داعي لهذا الكلام
مهند بعصبية: الا له داعي
صغرونا قدام الخلق لا والمشكله تتشرط
ام بندر بذهول مو فاهمه الموضوع : وش فيه
علامكم صوتكم طالع كذا ؟؟؟
ياسر بقهر وهو يتكتف : ابد بس صنوايت رفضت عناد
ام بندر شهقت : رفضته ؟؟؟!!
وبقهر والله ابني الف وحده تتمناه ومن باكر
اخطب له
ابو بندر جلس على الكنبه واخذ نفس بهدوء : ما له
داعي تخطبي له وهو اليوم ملك
ام بندر باستغراب : ملك ؟!
وطالعت ياسر : كيف تقول انها رفضت ؟؟؟
صالح ابتسم بروقان وبلقافه : هو سألها الشيخ موافقه
قالت له لا مو موافقه
بعدها قال لها ابوي اذا حنا مو قد المقام
ننسحب
قالت له انتم لكم القدر والحشيمه
بس هي تتدرس طب وما تبغى تتزوج
ام بندر باستنكار : تتدرس طب ؟؟
كيف قالوا انها بالثانوي ؟؟
صالح ابتسم : خليني اكمل لك
قال لها ابوي انه حنا مستعدين تكمل دراسه
وبعدها دخل جدها وبعد وقت طلع
وسمعنا صنوايت تقول موافقه بس عندها شروط
ام بندر بقهر : وبعد تتشرط
ابو بندر طالع صالح بنهر : بعدين معك انت اذاعه
حشى وش ذا اللسان للي عليك ؟؟؟
وطالع ام بندر : يا بنت الحلال الظاهر انه البنت
حد لعب بعقلها وقال لها يمكن ما نخليها
تكمل دراسه علشان كذا رفضت
بالبدايه بعدها وافقت بشرط تكمل دراستها
لا تردين على عيالك
تنهد ابو بندر ما يبغى يعمل مشاكل من اولها بين
حرمته وبين ريم لانه يعرف ام بندر كثير
تتناقر مع حريم عيالها
ام بندر طالعت ابو بندر : متى حددتم الزواج ؟؟
ابو بندر تنرفز من كثر الاسئله : ما حددنا
بس يمكن قبل نهايه العطلة الصيفية
ام بندر باعتراض: لا اجلها للسنه الجايه يكون عناد
قطع شوط بالدراسه
بعده صغير يتحمل مسؤولية دراسه وزواج
قاطعها عناد للي كان واقف يناظرهم وبعصبيه : ما تشوفون انكم تماديتم كثير بالكلام وتقررون عني
وبعدين شايفيتني بزر ؟؟؟
وطالع ابوه بجديه : الزواج بالعطله الصيفيه هذي
قبل الدوام
ورح استأجر شقه لوحدي
قاطعته ام بندر : وصارت من الحين تبغى تبعدك
عنا ؟؟
ابو بندر : يا بنت الحلال هو ما شافها ولا جلس معها
حتى تقولين هذا الكلام
عناد ببرود : ما علينا رح استأجر شقه لوحدي
واشتغل وما ابغى مساعده من احد
ابو بندر مو عاجبه كلام عناد : وانت تقدر على مصاريف الزواج
حتى تفتح بيت وتصرف عليه !!
عناد : متى ما جيت وقلت لك اعطيني فلوس وقتها
قول هذا الكلام
هذا اخر ما عندي وناظر اخوانه ما لكم دخل
بحياتي اتوقع انها رفضتني انا مو انتم
فما له داعي تعملون هذي الموشحات
وطالعهم بغرور وتوجه للباب
ابو عناد مو عاجبه كل حياه عناد : وين يا عناد ؟؟؟
عناد التفت لابوه : مواعد الشباب
وبعدها طلع
ام بندر : عاجبك ؟؟
ابو بندر بملل : ما كأنك تعرفين ولدك
وباستهزاء
قال يبغى يفتح بيت لوحده
ياسر ميل فمه بسخريه : مالت عليه وانا متضايق عليه وهو يرادد بقوه عين ويدافع عنها
صالح باستهزاء : عملتم فلم اكشن وبالاخير
فشلكم عناد وضحك بشماته
بندر بعصبية : اخرس ولا كلمه
هذا الناقص البزران يتكلمون
صالح بخوف من اخوه الكبير : ترى عمري صار
18 سنه
مهند بقرف : خلاص اسكت ما ابغى اسمع صوتك
ياسر بعصبيه طالع الدرج : نعم خير واقفات تناظرن
زافين عريس ؟؟؟
كانوا البنات والاحفاد والحريم واقفات ويناظرن
اسيل بدلع : لا عروس
ياسر بعصبية : اسيل
اسيل من الخوف ما تشوفين الا غبارها
بندر يكمل عن ياسر بحزم : يالله كل وحده على جناحه
تحلطموا الحريم وطلعوا وهم يتهامسن
ابو بندر وقف وهو يناظر ساعته وبعدها طالع ام بندر : لا تنسين باكر تروحين انت والبنات
وعناد وتروحين على ريم
ام بندر باستسلام : ان شاء الله
**
**
**
**
**
**
في اليوم الثاني
دخل عناد البيت وهو يدندن ومروق
شاف اخواته وحريم اخوانه جالسات بالصاله طالعهن بفوقيه : سلام
اسيل بابتسامه عريضة : هلا وغلا اشوف العريس
مبسوط قاعد تدندن ؟؟
طالعها ورفع حاجب : ما يخصك
زوجة ياسر : سمعنا انها سندريلا رفضتك
جلس على كنبه منفرده وطالعها بنغزه : والله تكون
رافضيتني
ولا اكون انا رافضها
زوجه ياسر احمر وجهها بقهر
رهف حطت رجل على رجل وبدفاع
: بس الحين ياسر
يموت على الارض للي تمشي عليها زوجته
عناد بغرور : وهي رح تصير تموت على الارض للي
امشي عليها
دانا : يا شين الغرور
على وش شايف نفسك
طالعها بفوقيه وما رد عليها
زوجه بندر : ترى غرورك هذا ما يجوز
تطالعنا وكأننا حشرات
زوجه مهند وبحضنها بنتها : خليه خلينا نشوف
وش رح يتزوج
ان شاء الله تطلع غجريه قرويه جوكر
طالعها عناد : راضي فيها بس اهم شيء ما تطلع
جوكر مثل بنتك
زوجه مهند : جوكر بعينك وش زينها بنتي
وباستها على خدها
رنا : اصلا كلنا خلقة ربنا ما يصير كلامكم هذا
عناد وقف بدون نفس : تكلمت حكيمه المجانين
دخلت ام بندر وطالعت عناد : وين ؟؟
عناد : طالع على غرفتي
ام بندر : لا تنسى اليوم بعد العصر علشان نروح
لخطيبتك
لا تنسى تجيب الشبك..
قاطعها عناد : خلاص العصر انتظرك
ام بندر : وش تنتظرني ؟؟
لا تنسى اخواتك رح يروحون وحريم اخوانك
عناد باعتراض : نعم ؟؟
ليه انا رايح على حرب علشان اخذ معي جيش ؟؟؟
هذا للي ناقص
خلهم يجلسون بالبيت ابرك لهم مو ناقصنا فضايح
ام بندر : الحين وجودنا يفشل يا عناد ؟؟؟
طنشها عناد وطالع امه : بعد العصر انتظرك وحدك
وطلع من الصاله متوجه لغرفته
**
**
**
**
**
زوجه بندر بزعل : الحين حنا نفشل يا خالتي ؟؟؟
ام بندر جلست : مو على كيفه
رح تروحون
اسيل بقهر : مالت عليه
يعني المفروض انا اروح معك انا اكبر وحده بأخواتي
ام بندر وهي تشرب قهوه : قلت لكم رح تروحون
خلاص انتهينا
رنا لوت بوزها : ما كأنك تعرفين ولدك عنيد
واذا عصب ما حد يقرب منه
زوجة مهند : مو على كيفه رح نروح غصب عنه
زوجة ياسر : وش رح تلبسين ؟؟
زوجة مهند بحيره : ما ادري للحين
فرح تدخل : ماما متى نزور خطيبه عناد ؟؟
اسيل : العصر كوني جاهزه
فرح : ما كلمتك انا سألت امي
اسيل لوت بوزها : الحق علي
هاجر وقفت : ترى ما بقى وقت اروح اجهز نفسي
دانا : خايفه ما تلحقين
هاجر : انت ما يخصك فاهمه
دانا : لا والله تعالي اضربيني
هاجر : واكسر راسك بعد
دانا تقربت منها : نعم وش قلتي ؟؟؟
دخل ياسر وطالعهم وهو رافع حاجب : نعم خير
ان شاء الله ؟؟
صوتكم طالع !!
دانا ابتسمت : ها ولا شيء
بس نتناقش
ياسر جلس جنب امه : متى نويتم تروحون
على بيت ابو سيف؟؟
ام بندر : طلبتك يا ياسر
انا ابغى اخذ البنات وحريم اخوانك معي
ومو صلحه ادخل لوحدي
ياسر ارجع ظهره للخلف : خذيهم وين المشكله ؟؟
رنا بقهر : عنادوووووو رافض يقول بس امي تروح
زوجه ياسر بقهر : قال حنا نفشل ما يبغى يأخذنا ياسر طالعها : والله ما حد يفشل غيره
وهو للي خاطبها
لسانها مترين
وجكر فيه رح تروحون
رنا تقفز وهي ودانا : هي عاش عاش عاش
ياسر عاش
ياسر ابتسم : خلاص فضحتونا انت وهي
دخل صالح وطالعهم : وش فيه ؟؟
حد نجح بالانتخابات ؟؟
هاجر : لا بس ياسر رح يأخذنا نروح نشوف خطيبه
عناد
نفسي اشوفها
صالح : حسستوني رايحين تشوفون صنوايت
وش رح تكون مثلها مثل للي قبلها
زوجه بندر بحده : وش قصدك ؟؟
صالح بصراحه : ما اقصد شيء بس اقول
اكيد رح تكون لئيمه
قاطعه ياسر بحده : صالح
زوجة مهند ؛ قصدك انه حنا لئيمات
صالح سكت خوف من ياسر : انا ما قلت شيء
انت فسرتي الكلام على مزاجك
وبسرعه توجه لغرفته

عناد نزل ومعه امه طالع خلفه باستنكار
لما شاف سيارتين خلفه
عقد حواجبه : ما شاء الله
وطالع امه : انا وش قلت ؟؟؟
ام بندر تحاول تلينه : يا عناد وش فيك ؟؟؟
كيف تبغاني ادخل وحدي
عناد ببرود : خلاص مثل ما تبغين خلهم ينزلون
وركب سيارته وحرك بسرعه وغادر المكان
ام بندر بفجعه وهي تناظر عناد غادر المكان
زوجه بندر اقتربت : علامه راح ؟؟
ام بندر بنرفزه : هالولد رح يجلطني بعناده
اتصلت فيه ام بندر وكان جواله مغلق
عضت على شفتها بقهر
ورجعت مع بناتها وحريم عيالها

**
**
**
نايف جلس بالصاله بعد ما قفل الجوال
وطالع ساميا : ترى الجماعه اعتذروا صار عندهم ظرف
ساميا : عذرهم معهم
وحياهم الله بأي وقت
نايف وقفت اروح اتشمت بريم شوي
واطلع حرتي فيها بالكلام توجهت لغرفتها
ودخلت
كانت جالسه على اللاب ومندمجه عليه
قاطعتها بصوتي العالي : الجماعه على وصول وانت
بعدك ما لبستي ؟؟
طالعتني بملامح هاديه : نسيت
طالعتها باستخفاف : يعني تمثلين دور الثقيله العاقله
ترى مو لايق عليك الدور
ناظرتني بملامح جامده وما ردت
كملت كلامي : مو قلت لك الصبح بعد العصر تكونين جاهزه ؟؟؟
تكلمت بهدوء : خمس دقائق واكون جاهزه
رديت وانا اتكتف : احلفي يا شيخة
عموما تكنسلت وما رح ييجون
سألتني بعفويه : ليه ؟؟؟
ناظرت بأرجاء الغرفه وبعدها طالعتها : تواصلتي مع امك ؟؟؟
ردت : لا
اقتربت منها وسحبت اللاب
وناظرت الصفحه للي فاتحه عليها
واحس البركان للي بداخلي رجع من جديد
رميت اللاب من يدي
وضربتها كف بكل قوتي : يا حيوانه
ريم سالم هاه ؟؟؟
ليه ؟؟؟
ردت بقوه عين : كيفي اكتب للي ابغى
طالعتها يا سلام مستقوية
سحبتها من يدها ولفيتها ورى ظهرها
صرخت من الالم : اترك يدي
تكلمت وانا شاد على اسناني : خلي سالم ينفعك
متبريه منا ؟؟!!!
شديت اقوى
بس
حامض على بوزك رح يبقى اسمك مسجل جنب اسمي غصب عنك
كانت مغمضه عيونها وعافسه ملامحها بألم
شديت على يدها بعصبيه : فاهمه
الحين تغيرينه ويا ويلك اذا ما غيرتيه
دفيتها بقوه عني وطالعتها بتهديد
طالعتني بعناد : ما رح اغيره
ناظرتها بتحذير : ترى مو من صالحك تعانديني
ترى للحين قلبي مليان عليك
فاختصريني وكوني مطيعة
اعطيتها نظره احتقار وطلعت
**
**
**
__
__

**
ريم
جلست على الارض وانا امسح على يدي
واتحسس مكان الوجع
حسيت لاخر لحظه خلاص رح تنكسر
زفرت بضيق من الحياه
جالس لي على الزله ويحاسب بي
متى ارتاح ؟؟؟
وقسم بالله ما رح اغير الاسم
ورح يبقى ريم سالم
لا وعريس الغفله ما حضر
يقول انام واحلم فيه
بقلعته ستين داهيه وراه
افففففف
خليني اشوف اللاب اتوقع انه انكسر :(
**
**
__
**
**
*_
**
وليد : من جدك تتكلم ؟؟/
مشاري تنهد : لا من خالي
ايه من جدي اتكلم لولا اني خاطب بنت عمها
والا كان تعرضت لها وخطبتها
وليد : وتفكر جدي يوافق يزوجك
اصحى يا حلو
ترى ابوي كان ناوي يخطبها لك بس
جدي عصب وقال مستحيل يخطب لاحفاده
حفيده ابو سعد
فلا تحط الموضوع براسك
وخلاص انت خطبت ما بقى وقت على ملكتك
مشاري بحيره : يا اخي ما ادري
هالبنت دخلت مخي
وعجبتني قوة شخصيتها وكيف فرضت رأيها على
عمي ابو سلمان
للي كل يحط له حساب
وليد : بالعكس موقفها ما عجبني ابد
وين عايشين حنا
توقف بوجه الرجال وتفرض رأيها
وقف مشاري : تبغاها سلبيه ما لها رأي
بالعكس احب البنت تكون شخصيتها قويه
وباستسلام للامر الواقع
الله يوفقها وييسر لها الخير

**
**
**
*_
**
ام بندر دخلت معصبه : وش هذا الموقف
السخيف للي حاطيتنا فيه ؟؟؟
عناد : والله مو رايح على حرب علشان اخذ معي كتيبه
صالح مؤيد له : معاه حق ليه كلكم رايحين ؟؟؟
بندر يحل الموضوع : خلاص تروح امي واسيل وزوجتي وبس
رهف باعتراض : لا والله
ما لي دخل رجلي على رجلها
زوجه مهند تطالع ام بندر : اذا راحت وحده الكل بروح
ما احد احسن من احد
وطالعت زوجه بندر وهي تقصدها
ياسر : يا ابن الحلال خلهم يروحون
خايف يأكلونها ؟؟؟
عناد مصمم على رأيه : والله كيفي امي لوحدها تيجي وبس
اما الكتيبه يجلسون هنا
مهند : خلاص روح لوحدك زورها
وامي والكتيبه يروحون في يوم ثاني
بندر : وانا اقول كذا روح لوحدك علشان تجلس معها براحتك
ام بندر : خلاص روح اليوم زورها
وحنا باكر نزورها
اسيل برجاء : تكفى يا عناد بس هذي المره خلينا نروح معك
اخواته بصوت واحد : تكفى يا عناد
عناد بملل : خلاص اسمح لكم بس هذي المره
تروحون معي بس بدون عيال
ام بندر ابتسمت : مثل ما ودك بدون عيال **
**
*_
_
**
*__
ساميا : هلا هلا نور البيت
ام بندر بابتسامه واحراج : منور بأهله
الجده : اخبارك يا ام بندر ؟؟
واخبار بناتك وحريم عيالك ؟؟
ام بندر : بخير
ام خالد : ما شاء الله ذول بناتك ؟؟
ام بندر بابتسامه : هذي اسيل ورهف وهاجر ودانا ورنا بناتي
وهذي زوجة بندر ابني الكبير
وهذي زوجة مهند
وهذي زوجة ياسر
وعناد خاطب بنتكم وصالح بعده بالثانوية
الجده : الله يحفظهم
ام سليمان : عناد جاء معكم ؟؟
ام بندر بفرح : ايه جاء معنا بالمجلس
الا وينها العروس ؟؟
ساميا بابتسامة : دقائق وتنزل
وبدت سوالف الحريم للي ما تخلص
**
**
**
*_

سلمى : من جدك يا ريم تتكلمين ؟؟
ريم بعناد : ايه جد اتكلم وش فيه لبسي
سلمى : مو مناسب
يعني انت مخطوبه ولازم تلبسين فستان
ريم بكسل : ما لي نفس ألبس
متعاجزه
لينا : خلاص انا البسك
ريم ضحكت : بايخه انقلعي
سلمى بقهر : مجنونه حد يلبس عبايه ويدخل عند الحريم ؟!!
ريم وقفت وهي لابسه العبايه : وش زينها العبايه تجنن
لينا فتحت عيونها باستنكار : ريم كيف تنزلين بالعبايه ؟؟؟
ريم توجهت للباب وببرود : مو عاجبهم يطلقون
وتركتهم وطلعت
سلمى بقهر : غبيه الحين اكيد رح يقولون فيها
تشوه علشان كذا ما لبست فستان
**
**
**
**
**
**
بعد ما سلمت على الموجودين والانظار
مسلطه عليها
جلست جانب ساميا بثقه
ام بندر وهي مبلمه بريم : اخبارك يا ريم ؟؟؟
ريم وهي تلعب بطرف خصله من شعرها : بخير
اخباركم ؟؟ واخبار عمي ابو عناد ؟؟
ام بندر بابتسامة : كلنا بخير
زوجه بندر بلقافه : تراه عمي يقولون له ابو بندر مو ابو
عناد
ساميا : وش يعرفها ريم تراها ما تعرفكم
زوجة مهند : وحنا ما نعرفها اول مره نشوفها
رهف بلقافه : انت اي صف ؟؟
ريم بنفسها كأنها ما تعرف اني بالجامعة يا شين اللقافه : سنه ثانيه بالجامعه
اسيل بدلع : وانا بالجامعه بس ما عمري شفتك
ريم بهدوء : ولا انا شفتك من قبل
ام بندر : ترى عناد معنا ويبغى يشوف ريم
الجده : خلاص خله ييجي هنا
وطالعت ام خالد وام سليمان علشان يطلعون
وقفت ساميا : خلاص الحين اخبر ابو سيف
علشان ييجي عناد هنا
طلعت ام خالد وام سليمان مادات البوز
ريم تحس بالاحراج كيف يشوفها وهي لابسه
كذا
وقفت ووجهها احمر وقلبها يدق بقوه
ام بندر : وين يا ريم ؟؟
ريم ناظرتها وقبل ما تتكلم
الجده بحده : اجلسي الحين الرجال بالطريق
ريم جكر بجدتها : الحين ارجع عن اذنكم
وطلعت واخذت نفس براحه
وتوجهت للمطبخ جلست على الكرسي
وتناولت كأس المويه وجلست تشرب
بعدها طالعت عباتها على الطاوله
ناظرت فستانها لونه فضي لنصف الساق
واكمامه لنصف الساعد مخرم
رفعت نظرها للعبايه ومسكتها
بس قاطعها دخول ساميا : يالله يا ريم
الحين خطيبك يدخل
وسحبت ساميا من يدها العبايه ولبستها
ريم باستنكار : هذي عبايتي
ساميا تمثل البراءه : عباتي فوق
لو شافني نايف لابس كذا رح يعصب
ريم وقفت : طيب الحين اطلع اجيب لك عبايه
لاني ابغى عبايتي
ساميا ابتسمت وهي متأكده ما تطلع ريم الا نايف بوجهها : اوكي اطلعي
*
*
*
*
*
طلعت ريم وصادفت نايف بطريقها
كلمها بحزم : انت وين رايحه ؟؟؟
ريم بقهر مو وقته وقبل ما تتكلم
اشر لها نايف تعالي الرجال ينتظرك
ريم تبغى تعترض مسك يدها وسحبها خلفه
نايف بحزم : ادخلي الحين ييجي عناد
ريم هزت راسها ودخلت المجلس بهدوء
بعد ما ردت السلام
وجلست وهي توزع نظرها بين الموجودات
اول ما انفتح الباب
ناظرت ريم جهة الباب ثواني ونزلت راسها
وبنفسها حشى احسه طول الباب ما شفت وجهه
سمعت ام بندر ترحب بابنها : هلا وغلا
سلم زوجتك يمه

انتهى البارت .....