كاتب الموضوع :
simpleness
المنتدى :
القصص المكتمله من وحي قلم الاعضاء
رد: ذات مُقيّدة حوّل عُنُقِ امْرَأة / بقلمي
اقتباس :-
المشاركة الأصلية كتبت بواسطة طُعُوْن  |
مساء الخير سيمبلينس..
أول شيء لا شكرًا مابي اخذ مهمات مع محمد.. يعني
جاتني الكآبة عشانه تبين اكتئب عشاني كمان.. خليني كذا
مرتاحة😅
،
أما عن كلامك اني ناعمة وهادئة .. تقدرين تقولين نص ونص..
على حسب كلام اللي عندي.. يعني مع اشخاص تطلع النعومة والهدوء و مع اشخاص يطلع الخبال😂..
..
الحين ابدأ بجنان و أحمد..
لاحظت هذي الجملة " لم تنسَ ذلك اليوم الذي اعتزل قَلمَه مَسير غزله و عشقه المسفوح على بياض الكُتب،تَكفيراً لذنبٍ أجرمه دَفعَها للاحتماء أسفل مَظلّته المُحَرَّمة على أرضها المُراهقة.."
احمد ترك الكتابة بفترة عشان ذنب سواه في جنان.. ايش هالذنب اللي دفعها تحتمي فيه منه .. و هو ترك الكتابة عشان الشيء اللي سواه😟🤔
اللي فهمته من كلامهم انو جنان بعد طلاقها بسنتين استنجدت بأحمد عشان يتزوجها.. و هو حذرها انو مو هذا الحل بس هي مجنونة على اسمها.. هي تحب احمد لأنها تشوف فيه الأب و الأخ و الزوج.. تشوف فيه ابوها ومحمد و فيصل.. يعني صفات الذكور بحياتها اجتمعوا بأحمد.. و نست انو أحمد له كيان ومشاعر او نقول تجاهلت هالشيء بأنانية منها.. و الحين ايش المطلوب من أحمد يسوي يعني..!
كان يستفزها سكوت احمد عن فيصل واللي صار لها معاه.. مدري وش كانت تبيه يسوي .. هو رجال في النهاية.. و زوجته تعشق طليقها وهو عارف بالشيء ذا..
إكرامًا لكرامته شاف انو سكوته هو الحل.. عشان ما يواجهها بالكلام وتنكر وهذا الشيء بيوجعه أكثر وكأنها تشفق عليه من قلب ماكان له بيوم.. باختصار هو مو ناقص وجع عشان كذا كان يفضل السكوت.. بس خلاص وقت الصمت راح والحين لازم تتوجع قد ما وجعته و أكثر.. عشان تبطل أنانية.. اذا احتاجته ركضت لعنده واذا لقت البديل تركته.. وهو بكل مرة يستقبلها بصدر رحب..
..
حور و يوسف..
بسم الله وش اللي صار😨.. يعني رجع يوسف عالساعة
10 وهو عطشان.. بس ما فهمت عطشان للموية والا الدم.. لأنو صار الدم عنده إدمان..
يعني هو اللي مسك حور في المسبح.. بس ليش كتم أنفاسها.. وش هالرعب اللي عايشة فيه.. هي من كل عقلها رجعت له.. هذا شخص اذا ما تلذذ بالدم ما يرتاح..
وش صار لحتى يعذبها .و حتى لو صار شيء أكيد ماهو يستاهل اللي صار لها .. و بشو عذبها.. بالمشرط.. حرام والله حرام.. يعني ما كفاه مخلوقات ربي البريئة يجي الحين و يعذب زوجته..! إيش هالإنسان.. هذا مريض نفسي يحتاج علاج مكثف.. يحتاج ينحبس بمصحة لين يعرف انو الله حق.. يعذب ويجي يبي يداوي.. الواضح انو اذا تلبسته حالة الإجرام ماعاد يدرك حاله.. لأنو بكل مره يعذب احد يطيح وراها نوم واذا صحى يالله يالله وقتها يستوعب اللي صار.. المرة هذي سوى كذا.. طيب المرة الجاية وش بيسوي..! هذا شخص مريض نفسي والله ولازم يتعالج بسرعة.. مو مال ينترك كذا..
،
"أعَبدٌ أنت لذِكرى أحالتكَ يَتيماً لا يَملُك سوى رَغيف انتحار و سؤالُ طِفلٍ اقترب الشَيب من السَكن بين خصلات عُمره و الجواب لا زال عَصِيّاً ؟" ..
معقولة يوسف للحين مو عارف لو كان ابوه انتحر او انقتل..! يعني كان موجود بنفس المكان وكان عمره يستوعب اللي يصير.. او قصدك بالسؤال والجواب العصي هو ليش انتحر او انقتل..؟
..
ملاك.. طاحت ضحية قضية من قضايا آستور.. بس هل
القضية تخص أبوها أو أخوها.. لأنو بصراحة الظاهر يوسف بيتعدا تعذيب الحيوانات لتعذيب البشر..
أما آستور حقير جدًا جدًا.. يفتعل حريق ممكن يموت فيه ضحايا عشان بس يحل قضية من قضاياه.. طيب واللي يسويه ماهو إجرام يعني.. هو مجرم نفسه نفسهم بس متلبس دور المحقق الجنائي..
أما محمد و استسلامه لآستور حكاية ثانية.. بس كان أكيد انو رح يرجع ينقذها حتى لو ما قاله آستور.. لأنها جات بمخطط من آستور وهو صار يعرف المخطط فـ اقل شيء رح يحركه ضميره عشان ينقذها..
..
فاتن.. معقولة تكون هي اللي ولدت بلندن وولدوها جاراتها..؟ وممكن مولودها مات..
"حديثهن أعادها لتلك الليلة المُسَجَّلة أحداثها في ذاكرة القَمر،ذلك الصُراخ و الفَزع المُنتشر في العروق،رائحة الدماء و عَبرات البُكاء،بكلماتهن أرجعوها للوراء عند شجرة البُرتقال الذي أصبح مُحَرَّماً عليها،تكره لونه،رائحته و طعمه..اسمه فقط يرسم في مُخيلتها البشاعة التي بدأت تُرافق نَومها مُنذُ ارتفاع راياتها المُلطَّخة بالخيانة."
هي الواضح انها أم فقدت ضناها.. بس وش اسباب فقدها و كرهها لشجرة البرتقال و كل اللي له صلة فيها..؟
و " الخيانة" هي تعبير مجازي والا خيانة بمفهومها العامي..؟
..
حور.. في البارتات الأولى انا استغربت من علاقتها بيوسف.. مره يبي قربها ومره لا.. مع اني بكل موقف اقتنع اكثر انو عنده انفصام بالشخصية..
في جملة للحين عالقة ببالي وهي " ذات ليلة و دم"
يعني وش سوى يوسف عشان تصير علاقتهم كذا..
وش الدم اللي كانت تقصده حور.. ما أظن انه عذبها قبل المرة ذي.. يعني كان عذابه نفسي.. عشان كذا جاني
فضول اعرف وش الدم اللي كانت تقصده.. المشكلة انو ماعاد أمداني أكمل قراءة في البارتات اللي قبل عشان تركب معي الصورة أو اكتشف شيء جديد..
،
علاقة حور بأبوها ليش جافة.. و إيش كانت تقصد أمها
لما قالت لها " انسي يا بنتي انسي مثلي عشان تعيشين"
وش اللي سواه أبوها وماهي قادرة تنساه للحين..؟
احس كل شوي يطلع لنا شيء جديد بحياة حور.. نلقاها من أبوها والا يوسف..!
..
ملاك.. والله رحمتها.. فوق رعبها قرب رجال منها و ماهو محرم لها .. ما تنلام لما اغمى عليها..
محمد "مُتَيقن هو أنَّ هذا الحَريق افتعلهُ آستــور لسبب آخر غير المُهمَّة التي تَحَجَّجَ بها..لا شكَّ بأنَّ سرَّاً لُقِي حتفه تخطيطاً ممن هم فوق آستــور لدرء خيوط فضيحةٍ ما." ..
جا ببالي فكرة انو اساسًا يمكن ما يكون مصرف و اللي صار كله تخطيط من آستور.. عشان يخلي محمد يقابل ملاك.. بس ارجع واقول لا اكيد في سبب أقوى من كذا..
بس ليش اختاروا المصرف.. أكيد عندهم سبب وجيه..
يا من يمسكني ذا الآستور واخنقه بيدي واخلي محمد يرتاح منه..
محمد دخل الحمام عشان ما يشوفونه الإطفاء و يستنكرون وضعه مو.؟
..
جنان و فيصل.. صراحة انتي سألتي هل اللي صار بينهم يستاهل الطلاق..؟ قعدت افكر فيها واقلبها بعقلي واستنتجت شيء.. انو اللي بينهم فعلًا ما كان يستاهل الطلاق.. مع العلم اني للحين ما اعرف وش اللي صار.. بس قلبت افعالهم و ردات فعلهم و حبهم و فوقها غباءهم واستنتجت الشيء ذا.. يمكن الغلطة اللي غلطتها جنان ماكانت تستاهل يكبرها فيصل وتوصل بينهم للطلاق.. بس متأكدة انو وقتها فيصل فكر بكبرياءه و تجاهل الباقي.. كمان وش سر انو جنان ماكانت تبي الحمل وفيصل حرمها من ضناها بلفيت انها ماتبي الحمل..
بعدين وش دخله باستقالتها.. في النهاية اتوقع انها كبيرة بالقد اللي يخليها تاخذ قراراتها وما تحتاج منه مشورة.. هي تبي تخلص لأحمد ولازم بإخلاصها هذا اقل شيء انها ما تقابل فيصل ولا تشوفه حتى من بعيد..
و اصلًا أحمد يستاهل قلبها ماهو بس اخلاصها.. بس وش نسوي مع أحمد اللي يحب له ثنتين..
..
وعد.. خاطري اعرف وش اسمها الحقيقي🙂
الظلم واللاإنسانية، الدمع، الوحدة، الدم، كلها كلمات اجتمعت بحياتها.. ايش سرها..! و ايش علاقة آستور فيها.. و مين يكون رائد هذا واللي توضح لنا انه رجل قانون..
،
الرجل مع رائد للحظة شكيت انه محمد.. يعني فيه آثار تعذيب و فاقد لذاته و بروده نفس محمد .. بس لو كان محمد كان عرف وعد يوم جات عنده الكراج.. و مين هذا اللي تكلموا عنه غير وعد واللي قال رائد عن صديقه انو مجنون يوم وافقه .. طيب الشخص المجهول اللي مع رائد معقولة يكون هو نفسه الطفل اللي عنده 5 أخوات؟؟
..
حنين..
الواضح انو اعداءها كثير.. بس ما الومهم غرورها يبط الكبد.. ممكن تكون بنت خالها او خالتها او تكون زوجة احد من اخوالها..
..
جنان و أنفال..
صراحة كرهت أنفال حيييييييل.. صحيح ما انكر انو شعورها صعب و جدًا عليها لأنها تحب زوجها وجنان ضرتها.. بس وش دخلها باللي بينها وبين فيصل.. ما يحق لها اللي قالته لأنه شيء ما يخصها.. يعني هي عشان تنتقم لنفسها ما تدري انها يمكن تخرب على اختها اللي فرحانه فيها خطبتها..
الظاهر انو فيصل عشان يسكت ياسمين قالها انو اعترف لجنان.. و أنفال جاية وهي واثقة انها مالية يدها من الموضوع و عرفت جد كيف تنتقم من جنان..
عسى بس ينرد كيدها عليها هي واختها.. يعني تنتقم لنفسها عشان جنان اخذت زوجها وما تشوف انو اختها سوت نفس الشيء بجنان وفيصل.. يعني حلال عليكم وحرام علينا..
يا مال المرض بس يمسكهم ثلاثتهم فيصل وياسمين و أنفال..
يختي الموضوع فيه ضنا وهذي جاية تبي تنتقم.. من ايش مخلوقة.. والله لو مكانها قلبي ما يطاوعني اسويها دامني عارفة انو اللي قدامي جد مالها خبر.. يعني لو دخلت الشك براس جنان و تروح جنان تنبش ورا الموضوع كان اصرف من اللي سوته.. لأنها بكل ما للكلمة من معنى مالها دخل..
اوف قهرتني والله.. بس عسى ينرد لها كيدها..
وخليها تشبع بأحمد..
..
نور .. و ليش تكرهها أم عبدالله.. باختصار.. يمكن انو نور اختيار عبدالله و أمه كانت تبي غيرها وهو رفض.. وهي من الجهة الثانية حقدت على نور و يمكن انو غيرة على عبدالله مثل بعض الأمهات.. تزوج ولدها بعدها تقوم تغار عليه.. يعني ما اشوف انو فيه سبب مقنع لكره أم عبدالله لنور..
..
تخصص Identity Logic راق لي حيل.. عاد شدي حيلك وادرسيه من جميع النواحي عشان يدرسونه للطلاب مع السنوات الجاية😅
..
ننتظرك بكل شوق.. الله ييسر لك اختباراتك ويكتب لك التوفيق بكل دروب حياتك..
،
ادري هذرت واجد بس اذا ما طلعت كل اللي ببالي ما ارتاح🙊🤗
..
|
مســاء الجَمال يا جَميلة
ههههه حبيبتي والله سلامتش من الكآبة،ان شاء الله على نهاية الرواية تنجلي هالكآبة عن حَمود..،
ايـــه نفسي بالضبط،اللي مو قريب مني يظن اني هادئة و ناعمة،بس القريبين يعرفون الوجه الثاني، جنـــون ماله حل =)))
،
اي بالضبط ترك الكتابة الغزلية و المُصطلحات الدافئة اللي تغلف عُقول النساء المحتاجات،و ببساطة لأنه ندم و شعر ان طريقة الكتابة هذي هي اللي ورطت جنان وياه..ماضي هالاثنين و علاقتهم سابِقاً بتتوضح قريباً،بس خل ننتهي من لقاء جنان و بنتها وبنتفرغ للماضي..،
تقريباً صح هذا اللي كان يدور في بال جنان،كان أحمد بالنسبة لها الملاذ،ظنَّت انها بتعوض نقصها فيه،و نست انه مُمكن الرجال يحبها !
،
لا والله المسكين كان عطشان فعلاً مو عطشان لدم ولا غيره =|
مثل ما توضح لكم إنَّه ما انكر تعذيبه للحيوانات وقتلهم،و مثل الشي مع العامل اللي راح واعتذر منه،يعني يذكر اللي سواه،بس هالمرة ماهو ذاكر الرجَّال،يعني معقولة يوسفنا وصل لمرحلة انه يسوي إجرامه بلا وَعي ! هل وصل لمرحلة الانفصام ؟
برافــو طُعون انتبهتين لنقطة مُهمَّـــة جداً،الاقتباس اللي تطرقتين له و السؤال اللي سألتيه فيهم السر ليلة ارتفاع روح والد يوسف و ملاك..،شغلي خيالش
،
اكيــد في سبب لاختيار آستور ملاك عشان يتورط وياها محمد،مُمكن تكون قضية والدها و هذا وارد بشكل كبير،و آستور على كل اللي يسويه و أساليبه المُلتوية و المُنافية للقضاء ما شفنا أحد من الشرطة اعترض له !
،
معقولة ليش لا !
يعني عادي تكون فاتن هي اللي ولدت في لندن،شجرة البرتقال ذي قصَّة مأساوية خلتها تكره كل شي يخص البرتقال..و الخيانة لا ما هو تعبير مجازي،خيانة حقيرة،و ابتعدوا اهني عن الخيانة بين الزوجين،في خيانة ثانية مُوجعة في قصتها..و قد لا تكون هي فاتن المُوجَّهة لها الخيانة مُباشرة !
،
لاااا تستاهلين تحية طعونتي
فرحتيــــني بتدقيقش،"ذات ليلة و دم" فعلاً سوى شي يُوسف و ارجعي للأجزاء الأولية اذا ما خاب ظني الجزء الأول ذكرت جُزئية عن ذي الليلة..،
أسعدتيني والله*قُبلات
،
فعلاً حــور علاقتها مع ابوها جافَّة،يعني في الموقف اللي راح كانت تتجنبه..
و بعد باقي أشيـــاء للحين ما طلعت تخصها =((
،
ايـــه المسكينة ملاك،الى الآن ما ذكرت موقف الحريق على لسان حالها،الجزء الجاي ان شاء الله بنشوف..،لا هو مصرف حقيقي و فعلاً في سبب ثاني..ههههه كلكم متفقين على ذبح آستور..،
ايــه صَح ياحلوة عشان جذي دخل الحمام تكرمين..،
،
فعلاً مُمكن فيصل وقتها فكر بكبريائه مثل ما وضح للجميع الأخ مغرور بشكل و الواضح انه ما كان يدري ان الكبرياء و الغرور ما يتلاقون مع العشق..،
بخصوص رفض جنان للحمل،ان شاء الله بتنذكر جُزئية من الماضي في الجزء الجاي..،
عــاد بنشوف اللحين بتستقيل فعلياً بعد ما تعرف عن بنتها لو شنو بيصير..،
،
و عــد اسمها الحقيقي للحين ما جا الوقت اللي نعرفه،يمكن تعرفونه مع الأحداث قبل حتى لا أفصح عنه،ما شاء الله عليكم تكسرون على شارلوك هولمز ^_^
كل شي بخصوصها بيتوضح شوي شوي،ترى سبب وجودها للحين ما ظهر..،
،
صراحة ارفع القُبعة لهالتحليلات المنطقية،صحيح ما هو محمد و من اللي ذكرته عرفتين انه ماهو محمد،توقعت مُمكن لوهلة من آثار ظهره تظنونه انه هو بس تعمَّدت اذكر وعد و اذكر المجنون على لسان رائد عشان تميزون انه شخص ثاني..و مُمكن يكون الطفل ليش لا..،
،
حنيــن بنشــوف الجزء الجاي ان شاء الله من اللي كلمها..،
،
صحيــح أبداً ماله داعي اللي سوته،يعني هي أم و تعرف أي كثر الضنا عزيز ،بس هي استخدمت علمها بالشعور المُوجع سلاح عشان تذبح فيه جنان،على الرغم انه هالشي مو اكيد يبعد جنان عن زوجها ! اعتبره غبـــاء و موت ضمير اللي سوته،بس ساعات ناس كرامتهم و عاطفتهم تطغى على عقلانيتهم و هذا سيء جــداً =(
،
لا ماهو هالسبب اللي مخلي أم عبد الله تكره نور،في سبب ثاني
،
الحمد لله انه عجبش،ههههه ان شاء الله ليش لا نألف المنهج و قارءات ذات مُقيَّدة يشرفوني بدراسته ^_^
،
حبيبتي انتِ يدق قلبي لهالدعوات النقيَّة،مُوفقين جميعاً و مُيَسَّرة كل أمورنا ما دامها مُوَجَّهة للخير..،
تسلم لي هالهذرة وصاحبتها الله لا يحرمني من تواجدش العسل..،
سلمتِ غاليتي
،
|
اقتباس :-
المشاركة الأصلية كتبت بواسطة همس الريح |
احس سالفة نور سحر طعونتي
|
|
اقتباس :-
المشاركة الأصلية كتبت بواسطة طُعُوْن |
اي هموس بس سيمبلينس سألت انو وش سبب كره أم
عبدالله لنور..
|
لا تفكرون في سالفة السحر،لأن اللي في نور ما هو سحر أبــداً
سلمتا
،
|
19-12-15, 06:10 PM
جديد مواضيع قسم القصص المكتمله من وحي قلم الاعضاء
العرض العادي
