كاتب الموضوع :
غربة خريف
المنتدى :
ارشيف خاص بالقصص غير المكتمله
رد: روايتي الفلسطينية { انتفاضة } بقلمي
السلام عليكم ليلاسوو
للتنويه الكلمات بين قوسين لانه اللهجة ممكن تكون جديدة ع بعضكم بس بعدين ما رح اكتبهم اوك
الفصل الأول الخميس 7 أبريل 2011
دخلت جراي ( ركض ) ع غرفة أمها المقعدة : يماا .. طلع التصريح يماا
أمها فزّت قاعدة وايدها ع صدرها : يا ربي لك الحمد .. اميت ( متى ) ؟
بيسان ( 22 سنة ) : يوم السبت الجاي .. اووه ( تنهدت من بعد الركض وابتسمت ودموعها ع أطراف رموشها أرختهم بتغميضة )
أمها وهي تتأمل فرحة بنتها : ومع مين رايحة يا ميمتي ؟!
قربت وقعدت ع طرف السرير وتلعب بأصابعها بأطراف شرشف ( حرام ) أمها : مع عمي ومرت عمي وسلفي ( أخو زوجها )
أمها رفعت ايديها لعند وجهها وعيونها بالسما : ياا رب نفرح برجعته هو وكل الأسرى .. ياا رب انتقم من اليهود يا رب زلزل الأرض من تحتهِن يا عزيز يا حكيم ..
( اهتزّت أركان هذا البيت بالفرح وأخيراً بعد 4 سنين سمحوا لهم بالزيارة .. مالك زوج بيسان من المرابطين بالمسجد الأقصى .. أسروه بـ 23 فبراير 2007 لاشتباكه مع مستوطنين بباحة الحرم القدسي الشريف )
ـــــــــــــــــــــــــــــــــــــــــــــــ
سكرت ( أغلقت ) التلفزيون عشان يعرفوا يتغدوا بلاش أخبار وصور تسم البدن .. وقعدت جنب آية وكل شوي تنكزها وعلي بطلّع عليهن وحاس انو بدهن يبلشن فيه من جديد .. اطلّع ع أمه انها مومنتبهة ورجع يقطع الخبز بإيده ويوكل ..
آية : لالالالالالا .. لالالالالالالا .. سلمى تسأل .. كتمت ضحكتها تتكمل .. أين أنت يا علي ؟
( هي فقرة كانت ع سبيستون " سلمى تسأل " شوفوها ;-) )
طنشهم وهو يكمل أكله
فلسطين : سلمى تسأل .. متى ستخطبني يا علي ؟! .. ههههههه ( هي وآية )
استغفر الله ( همس لحتى يمسك حاله وما يستفزوه )
آية : ردّت سلمى تسأل .. وينك يا علي .. بعدين معك يا علي !!
فلسطين بعد صمت طويل لينتظروا ردة فعله وهو مطنشهم : سلمى المسخمطة تسأل ( رفع عيونه ع كلمة مسخمطة بدو يقطّعها ) وبعدين مع أمك يا علي ؟
أمه صرخت : وايش مالها أمه وليه ؟
هون علي ما مسكش حاله من الضحك على نهفات خواته .. فلسطين بلعت ريقها : فلسطيني مالها .. شيكل ( عملة فلسطين ) ههههههههههه ..
عاد ممكن كل الناس يتحملوا زناخة هالبنت الا أمها .. الا انها آخر شي ضحكت معهم .. وع صوت ضحكهم دخل أبوهم وانشرح صدره من سعادة عائلته وبابتسامة واسعة : ابسطونا معكم .. قعد ع الكرسي البعيد شوي .. السلام عليكم
الجميع : وعليكم السلام .. يعطيك العافية ..
فلسطين : مبسوطين بشوفتك
أبوها : آه سلكي .. لا جد مالكو ؟
آية : اسأل سلمـ .. قصدي اسأل علي
علي ووجهه صار أشكال ألوان اطلّع فيها من تحت لتحت ، الأبو عرف انها مناقراتهم ( مشاكلهم ) المعتادة دخل ليغسل ويجي يتغدى ..
ـــــــــــــــــــــــــــــــــــــــــــــــ
الأحد 10 أبريل 2011 .. مدرسة عكا الثانوية للبنات
آخر الدوام
فلسطين : وك خلينا نروح من طريق البيارات ( المزارع ) مش طايق أشوف الكلاب
سلام : ليش يعني أنا اللي طايقتهم ( متحملتهم ) .. بس طريق البيارات لأ دايما فاضي .. نشوفهم ع الحواجز ومعنا مجموعة بنات أحسن ما يطلعلنا واحد من الشجر ويبتلي فينا .. >>> الكلاب = الصهاينة
فلسطين حركت ثمها ع اليمين واليسار بتذمر : مشيناا
( كانوا لابسين الزي المدرسي الكحلي اللي بيوصل للركب .. وقمصان أبيض ورابطين شعورهن كعكة .. دايما بيطلعن نفس الشكل لأنهن صحبات ع العظم .. اما هنن زعرنجيات وتصرفاتهن صبيانية ع الآخر )
وهم بالطريق وقبل الحواجز ( طريق المدرسة شارع خارجي طويل جنبه مزارع وبيارات وبنصه في حواجز تفتيش عليها اسرائيليين ) لمحن شب واقف ع جنب الطريق ومتساند برجل وحدة ع الحيط وساند ظهره وراسه مايل ع جنب .. صايع باختصار .. ما عجبهن هسا بدل ما يوقف بطريقهن يروح يتمرجل ع اليهود أحسنله .. بطّئن شوي حتى ما يصيروا بالطريق لحالهن وقربوا منهن بنتين من شعبة ثانية .. ووحدة بتحكي للثانية : آه .. هذا أخوي جواد
فلسطين برفعة حاجب : ميلة .. مكيفة ( مبسوطة ) كثيير وهي بتحكي ( تقلد صوتها ) هذا أخوي جواد .. مفتخرة بهمالته ..
سلام : ههههههه .. تحطيش بذمتك يمكن جاي يوخذها
فلسطين وبتقلد حركة راسه : آه جاي يوخذها ولشو حركة هالراس هاي .. لا واضح جداً انه هامل وهايت
سلام : من أد.. ما كملت من صوت الطخ والرصاص وصوت صراخ البنات غطى ع كل شي .. ركضن وشناتيهن ( حقائبهن ) ع روسهن بحركة اعتيادية اعتادوها مع هالظروف اللي بتواجهن بكثير أيام .. وهنن بركضن أشّرلهن الشب اللي كان واقف على جهة البيارات وهيك ظل واقف لحتى خبّر كل البنات انو يروحن لطريق البيارات .. وبصرااخ : اسرعوا يا خواتي فش وقت للخوف والفزع تعالن من هينا بصيرش اشي عليكن .. يلااا بسرعة
ركضت عليه أخته وع مسامعهن : طب أنتو ليش بلشتوا هجومكِن هسا ما انتو عارفين انو وقت ترويحة البنات
جواد وهو يدفعها من ظهرها لتروح : مهو أنسب وقت لأنهم مو ماخذين احتياطهم فيه .. يلاا روحي حنييين
بس وصلوا لحارتهن بسلام وشافوا كل البنات تقريباً حولهن .. شدوا حنين من ايدها وهمست سلام : مين هم اللي بلشوا هجوم ؟
حنين بخوف : شو بعرفني !!
فلسطين : يختي تتهربيش سمعناكم عاد
حنين : الله يخليكن لا تخبرن حدا
فلسطين وسلام : وعد .. ووعد الحر دين واحنا بنات بلد وحدة
حنين وهي بتتلفت حولها : هذا أخوي مع المقاومة نفذوا هجوم اليوم ع جنود الحواجز .. يعني قرصة أذن للاحتلال
فلسطين : اهااا .. هيكت لعاد ( هيكت : هيك يعني )
مشوا وكملو طريقهن لبيوتهن وعند بيت سلام اللي بيوصلوله أول طلّت عليها : شفتي ست فلسطين انك شكيتي بالشب وهيو طلع مقاوم
فلسطين : ائ انا شو بيعرفني .. الله يسامحني
سلام : طب ديري بالك ع حالك وجراي ع البيت قبل ما يسكرو الطرق ..
فلسطين : سلاام
ـــــــــــــــــــــــــــــــــــــــــــــــــــــــــ
بشدّ البارودة اللي علقت بالشجر ورجع لورا وبصوت مسموع : أبو العبد غطّي ظهري أنا بدي اتقدم من اليسار ، هناك ما في حدا منا
أبو العبد وهو نايم ع بطنه : وين يا زلمة بتروح فيها .. هوّن تيروح معك اكمن واحد
: يخوك مفيش وقت اسا ( هلأ ) .. أنا رايح غطّي ظهري وبس ( انطلق لجهة اليسار وهو محني ظهره شوي وبتلفت حوله بلاش تجيه طلقة طايشة أو مقصودة .. واستقر بمكان ، عاين الرؤية .. كلشي تمام ، حكا بنفسه : طيب يا ولادين الكلبة اشوف مين بدو يفكِّن مني اسا .. )
وبلش رصاص .. واليهود صاروا يتراجعوا شوي شوي مش عارفين من وين بجيهم الطلق ( الرصاص ) ولما ملقوش حيلة دخلوا ع الدبابات وأطلقوا بالمدافع وبلشت القنابل تقع ع مناطقنا .. ركض أبو العبد بنص وقفة ويصرخ : الله أكبر .. الله أكبر .. حي على الجهاد .. حي على الجهاد ..
اتحمسوا الشباب تابعوا اطلاق النار وتوزعوا بأكثر من جهة لتشتيت انتباه اليهود .. والمدافع اليهودية ع عكس نية اليهود زادت حماسة الشباب واندفاعهم
غبّر الجو والرؤية ما عادت واضحة وصوت الرصاص من بعيد يخالطه زغاريد النسوان بالحارات القريبة .. والحجّات ع سجادات الصلاة بيدعن .. والولاد الصغار ع بواب البيوت جنب أمهاتهن شوي بتركوا ايديهن وبتقدموا ليشوفوا جهة الجبال والمزارع وبس يسمعوا صوت قنبلة جديدة بيصرخوا راجعين لأمهاتهن ..
الراديو والتلفزيون ببثوا أنباء عن اشتباكات في عكا .. وأخبار عن ردود أفعال السلطة الفلسطينية والكنيست الاسرائيلي تتخللها الأغاني الثورية اللي بيصدح صوتها من كل مكان من الناس من سياراتهِن ومن النسوان ..
وقريب من المدن .. الخليل ورام الله .. شباب بيسكروا الطرق بالعجال المشتعلة .. وسلاحهم حجارهم والمقليعة .. ملثمين وبإيديهم المولوتوف .. والدبابات بتتقدم خطوة وبترجع خطوتين لما يرموا عليها المولوتوف وبتحترق مقدمتها ..
هبّــت النار والـبارود غنـا ،، اطلب شــباب يا وطـن واتمـنى
هبّت النار من عكا للطيرة ،، كمشة صغار ربيو ع الحصيرة
وهي صارو كبار وما نسيوش الديرة ،، ومين اللي ينسى فلسطين الجنّة
#فرقة_العاشقين ***
استمرت الاشتباكات للمغرب .. وبعد صلاة المغرب كانت الشوارع فاضية لما راح الكل ع الصلاة .. الساحة الكبيرة بوسط البلد اشتغلت أضواءها
هديت أصوات البارود ومعها ازداد خوف الناس .. " يا ساتر شو صار " .. " مين اللي انتصر " .. " الله يحمي الشباب " .. أفكار مختلفة مركزها واحد ماذا بعد الهدوء !! عاصفة النصر والاحتفال أم عاصفة اعتقالات .. واستشهادات !!
وفي خضم هدوء المصلين وسكون اللاجئين لربهم المحتمين بملاذه تفجرت قنابل من نوع آخر .. طرقات الباب هذا وذاك تتزايد مع كل شهقة .. النساء وحدهن في البيوت كل واحدة تعُدُّ صغارها ، الصبايا أهم شيء خبوهن ، فلسطين لفت الحطّة اللي ع أكتفاها ع شعرها بدها تفتح الباب ، شدتها آية : وك لا تفتحي .. كرمال النبي بلاش يكونو الكلاب برا
فكّت ايدها من أختها والغضب راسم ملامحه ع وجهها : أنتي اللي كرمال النبي اتركيني ، احنا الفلسطينيات بنخافش ..
[ فلسطين ،، البنت الصغرى في عائلتها آخر العنقود زي ما بقولو .. ثالث متوسط " تاسع " .. حنطية وعيونها بني طالعة لأبوها .. شعرها أسود لأول ظهرها مو كثير طويل وملامحها قوية بس حلوة .. زعرنجية شوي .. مرحة كثير .. مستوها الدراسي متوسط .. بتتمنى لو تصير فدائية ]
آية والدمع تفجّر من عينيها : وك فلسطين مو عالخوف هدولي بخافوش من الله .. واللي ما بخاف من الله خافـ.. ( سكتت وغمضت عيونها وبلعت غصتها لما تزايد الطرق أكثر )
اجت أمهن ولفت شالتها ع راسها وتلثمت فيه ، من ورا الباب : شو بدكِن ؟
الجندي الاسرائيلي بلهجته العربية الطلقة ، الركيكة في تشويه عروبتها : اطلعوا ع الساحة يا مراا كلكم ورح نفتش البيوت
حمّرن عيونها : وليش بدكِن تفتشِن البيوت ؟
الجندي بحدة : اطلعوا من البيوت ، هذي أوامر بلاش نهدها ع رؤوسكم
فقدت أعصابها وهي بتسكر الباب : كلاب .. الله ياخذكِن الله يريحنا منكِن ..
فلسطين وآية واقفات ع الباب الداخلي بستنوا خبر .. أمهن : البسن ع حالكن تنطلع ع الساحة فيه تفتيش ..
آية فاتت وفلسطين ،اللي كانت جاهزة وهي أصلا ما بتغطي بس بوجود الجنود بتغطي لانهِن كلاب وبتكره نظراتهِن ، قالت لأمها بكل قوة : وليه يفتشوا ؟ وأبوي وينه كمان ، امتى بنسكت ،، أنا مو طالعة ( وأشرت بسبابتها ع الأرض ) من هانا مو طالعة ..
أمها والغضب ممزوجوبخوف يقهر كل حنية تربعت في صدرها .. دفعت فلسطين : مو ع كيفك .. هسا بتجي آية وبدنا مطلع مو ع كيفك ( شوي وطلعت آية ودموعها بعرض وجهها ) امشِن يلاا .. لا تقتلن أمكن هسا ( وردت شالها ع عيونها تمسحهن ) امشِن يماا الله يكسر اليهود ويلعن سيرتهن
آية أشرت بعينيها لفلسطين بمعنى انو أمهن مو حمل وجع أكثر وطلعوا
بالساحة ،، كان الكل .. كل أهل البلد موقوفين هناك .. والكل بيطلّع ع بعضه وبستنى تفسير لهاي الحالة .. الزلام من الجامع مباشرة طلعوهم ع الساحة .. فلسطين بتمشط بعينيها المكان بتدور ع كل حدن بتعرفه .. سلام .. علي ( خيي وينك ) .. وبين الناس شافت هداك الشب اللي يمكن اسمه جواد ما بتتذكر ( ائ مو ع أساس مع المقاومة شو رجّعه ؟ يا ربي شو رح يصير !! ) وبعيونها بتدور حتى وقع نظرها ع سلام من بعيد .. أشرت الها وظلن يمشن بين الناس وعيونهن ع الجنود حتى ما يشوفوهن .. وكل ما يطلّع واحد من اليهود بيقفوا وبعدين بتحركوا هيك لحتى صاروا جنب بعض ، سلام بهمس : فلسطين لشو جابونا هينا ؟
فلسطين بنفس الهمس وهي بتتلفت : بعرفش الله يجيب العواقب سليمة
ع بعد أمتار أم علي بتدور حواليها " وين اختفت البنت " قرّبت من آية المنهارة : آية ولك أختك وينها ، وين فلسطين المجنونة ؟
من بين دموعها : ما تخافيش ( أشرت بأصبعها لعند أختها ) هناك مع سلام .. (و بالموت مسحت بكم بلوزتها دموعها )
وقّف اللي باين انه قايدهم ( لليهود ) وقال بعربية : بدكم تعرفو ليش جمعناكم !! لأنكم بتساعدو المتطرفين ( و زاد من حدة صوته ) المتطرفين ما رح يفيدوكم ( بسأل وبجاوب نفسه لما ما لقى جواب ) ما بتعرفوهم !! طيب لنرى ( نظر لوراءه ونادى ع رجاله وبإشارة سبابته للأرض قدامه ) جيبوه .. جيبو المتطرف ..
ع نقالة متهالكة .. جسم .. جثة .. أو أياً كان ما يطلق عليها .. وسأكون كاذبة لو قلت جسم .. هو أشلاء .. بقايا جسم .. لا تكاد تستوضح منه شيئاً أكثر من الدم .. يغطيه مفرش أبيض استحال أحمراً قانياً .. يغطي وجه صاحب الجثة أكثر من أي شيء .. منظر تفرق له القلوب ، تهل معه الدموع المكتومة ، فلقد جرت العادة أن لا يتعرف أهل الشهيد على ابنهم حتى لا تتوصل سلطات الاحتلال إلى أن المقاومين من أبناء هذه البلدة ، لتبدأ مع هذه النتيجة سلسلة من الاعتقالات يجري أفضلها بتهمة 15 سنة .. كتم الناس شهقاتهم الضاربة جذورها في قلوبهم كلما اقترب جسد الملطّخ بالمقاومة .. ماتت الحسرات في جنباتهم حتى قبل أن يعلموا من هو الشهيد ، فكيف لو كان ابن أحد منهم !! وكيف لو كان عليه انكار فلذّة كبده ليحمي مصير شباب الحي !! كيف سيحتمل قلب الأم أن لا تعترف بابن رحمها ليأخذه جنود الاحتلال ويعطوه للسلطة الفلسطينية لتتكفل بدفنه دون هوية دون شاهد للقبر ، دون أدنى احترام لحرمة هذا المتوفى .. فالسلطة هي نسخة عربية عن الاحتلال وإن كان الاحتلال لا يحتاج أكثر من إصدار عنه ..
وضعوه عند قدمَيْ قائدهم ، نظر لجميع الناس نظرة تفحص ، جلس القرفصاء وهو لا يزال يجول ببصره على هذه الجوع ومدّ يده على المفرش ليزيحه عن وجه القتيل بنظرهم .. الشهيد بنظر الأرض والسماء .. ليبدأ أولى خطط كشف هوية القتيل .. الشهيد ..
الناس .. اللي غمض عيونه .. واللي لف وجهه لحتى ما يشوف ويصرخ لاإرادياَ .. فلسطين بتفكر بعلي ( أخوي يا قلبي .. مو هو صح ! أخوي اسا بشغله مستحيل هو .. أصلا شو بده يوصله للمقاومين ! ) ،، آية ماسكة حالها بالموت كيف ما تبكي كيف لو كان علي أو خطيبها رامي الملقب أبو العبد .. كيف بدها ما تبكي كيف رح تخليهم يأخذوه حتى من غير ما تودعه .. " أن تكون فلسطينياً .. هذا يعني أن تودّع قلبك من مولده .. "
صمت ،، صمت ،، صمت ،،
صامتٌ لو تكلّما لفظّ النّارَ والدّما
قُل لمن عاب صمتهُ خُلق الحزمُ أبكما
#ابراهيم_طوقان أشار الضابط ع وجه الشهيد : مين يعرفه ؟ يلاا أنتا وهوا ( التفت لمرا باين شوي وتنهار وهي منزلة راسها ) أنتي هون اطلّعي ابنك ؟ أخوكِ ؟ ( والمرا مصرّة ما ترفع راسها ) قرّب منها والرجال ثارو عليه ، بعّد عنها وحكالها : شوفيه ! ابنك .. يلاا ( وليستفزهم أكثر بحذاءه العسكري ضرب خاصرة الشهيد بكل ما يملك من حقارة .. رفعت المرا عيونها بخوف واطلّعت عليه ) سكتت ثانية .. ثلاث .. أكثر وبعدين لفظت : مش ابني .. ولا أخوي .. ما بعرفو ( ورجعت نزلت راسها وهي على وشك البكاء ) ..
صرخة جاءت من احداهن .. الجميع يلتفت نحو المصدر .. أهي أمه أم أخته أم زوجته .. نظر الجندي .. والضابط .. و.. أم علي التي ميّزت صوت الصرخة ووضع يدها على صدرها لتشهق دون أن تعاود زفيراً .. الضابط قرّب منها : بتعرفيه ( وبكل حقارة ) روحي سلمي عليه ..
فلسطين وهي بتحاول تفك حالها من سلام اللي شادّة عليها : بعرفهوش .. بس هاظ ما يعني انك تضربه بالجزمة يا جزمة .. ( بصقت عليه وأدارت وجهها من جديد تنتظر ردة الفعل القاسية جداً )
الضابط ولحسن الحظ لم يفهم معنى جزمة ما فهمه أن الفتاة غاضبة من ركله للجثة .. غمغم طويلاً من تصرفها الأخير ثم القى نظرة أخيرة على فلسطين اللي لافّة وجهها وموشّحة بالكوفية وايتسم ايتسامة حقيرة خلتها تغمض عيونها من القهر والغيض .. وبنفسها ( كلب .. حقير وكلب .. والله بس لو اني زلمة آآآآآآخ بس )
أعطى الضابط أمر لجنوده بالانسحاب بعد ما فتشوا البيوت وما لقوا فيها سلاح .. تركوا الجثة كمان وهم متأكدين انها من هاي البلد ومن هاللحظة حطّو راسهم براس أهل البلد .. الأمر الأخير والسرّي بين جنود الاحتلال .. البلد تحت المراقبة .. مراقبة مكثفة .. !!
رجع الخي يا عين لا تدمعيلو
فوق كتاف رفقاتو ومحبينو
رجع الخي يا يما زغرديلو
ها الشهيد دمّاتو دين علينا
#سميح_شقير حملوه ع الأكتاف ودارو فيه شوارع البلد بعد ما لفّوه بعلم فلسطين وربطوه بالكوفية .. رجال وشيوخ .. صبايا .. شباب .. أطفال والنساء .. الجميع يبكي .. يزغرد يردد " الله أكبر .. لا إله إلا الله والشهيد حبيب الله .. لا إله إلا الله والشهيد حبيب الله " ومعها تعلى زغاريد النسوان ..
أهو ذات السحر الذي جعل سندريلا المسكينة من خادة في بيت خالتها إلى أميرة في قصر حاكم البلاد ! ومن كوزيت البائسة ليدي في أحد منازل باريس الفاخرة متزوجة بشاب جامعي ينحدر من نبلاء فرنسا ! أهو ذاته الذي يجعل جسداً مكلوماً يطلق الزغاريد بدموع تحمل صفة السعادة عند رؤية زوج ، أخ ، أب على أكتاف رفاقه ليوارى به تراب محبوبته فلسطين ! ويصنع من أخرى رحما لولادة أكباد تدفعها بفخر وقمة التضحية لحرب هي إحدى المكسبين .. النصر أو الشهادة !! أم انه سحر الجغرافيا الإلهي الذي تحدث عنه محمود درويش .. سحر فلسطيني !!
...: فلسطيييين ،، فلسطييييين .. وين سارحة ؟!
هذا فقط ما أحمله من وطني المسلوب اسمي ؛
عدت للواقع .. الخميس 14 أبريل 2011 مجدداً : آه نعم شو كنتي بتقولي !
آية قعدت وطوت رجلها تحت الثانية تنهدت : بدي استشارة .. استعدلت بقعدتي أنا الثانية لانه الموضوع شكله مهم : شوو بسمعك !!.. آية : رح يجي خطيبي اليوم شو بدي البس ؟
رمقتها ببلاهة : هاا .. فكرتك نويتي تحرير القدس .. رجعت اتأمل التلفزيون : بعدين انتي عارفة .. اختك ما الهاش خبرة بأمور الصبايا والموضة
دفعتني من كتفي بقهر وطلعت ع غرفتها .. ما ببالغ لما بقول انها تستعد من 6 الصبح لزيارة رامي في الساعة 7 المسا مجنونة
،،،،،،،،،،
بلبس الجزمة ( أكرمكم الله ) ومثبّت التلفون بين كتفه وأذنه : آه ،، بالله جاي عنا ؟
الطرف الآخر : ليكون مو عاجبك
بضحك : ههههههه لا يزم مو هيك ،، أهلا وسهلا خبّرت الحسناء هههع
: هههه أكيد مخبرها ولو ،،
لهووووون انا متت بصراحة من الكتابة لاني بنقلها من الدفتر لسا ،، اعذروني لو كان صغير
آرائكم ،، أسئلتكم .. تفضلوو 😊
|
07-08-15, 08:49 PM
جديد مواضيع قسم ارشيف خاص بالقصص غير المكتمله
العرض العادي
