مساء الخير.. وبما انو لقيت نفسي فاضية الحين قلت ادخل
واكتب لي تعليق بسيط..


وسن.. كم باقي بتتحمل،؟ يمكن ام نواس تموت ووصيتها
يتزوجون.. يعني احس مافي شيء يقنع وسن انها تتزوجه..
الا لو كانت مجبوره وعشان خالتها.. لأني لاحظت انها ماترد
لها طلب الا لو كان بخصوص نواس.. يمكن تروح معهم
المزرعة بعد ما يتزوجون.. او هذا الأكيد.. لأنو نواس مستحيل
يخليها في الشقة وهو قد تزوجها وماعندها احد..

.
.

نواس.. صحيح مجروح.. بس ترا قد امدا جرحه يطيب..
احسه مزودها على وسن عالفاضي.. البنت جات عنده
واعتذرت وبينت له موقفها.. بينما لو كان نواس هو اللي
في مكانها ورح ينقذ ابوه من ديونه بهالطريقة متأكدة
انه مارح يتردد و يسوي نفس ما سوت وسن.. يعني
هذا ابوها في الأول و الأخير.. و الأهل فوق الحبيب
والخطيب لو ايش ما كانت مكانته..

.
.

مي.. دخلت بحرب اثنين عشاق.. وهي كبش الفداء..
طبعًا لنواس.. يمكن تجي بنية طيبة لما تشوف انو
نواس مو مرتاح وتحاول تفهم وسن طبيعة زواجهم بس
وسن رح تفهمها غلط وتجرحهها..

.
.
وليد.. حلو انه انتبه لنفسه قبل ينتبه له نواس.. عندي
فضول كبر راسك يا ميشو عشان اعرف وش سالفته هو
ومي..

.
.

ملاك.. واحزان السنين.. ما ادري ليش عندي احساس انه معاذ..
او طلال..

وعندي توقع بخصوص اللي كان واقف يراقب وسن وملاك
و اللي اتصل بنواس..

يمكن اللي كان واقف يراقبهم قطع طريق وسن وملاك
او يمكن نواس عنده خلاف مع واحد وخطفوا وسن..
وملاك هي اللي اتصلت بنواس عشان تقوله..

او يمكن يكون هو نفسه احزان السنين..


؛


نزار.. حلو اعتذر منها.. وجاب لها ملابس😂
و يمكن شغله الجديد يحسن من وضعهم كثير..

..

سما.. يا حياتي.. بريئة وحبت.. رح نشوف رح تعرف
تخبي مشاعرها والا رح تفضحها براءتها كالعادة..
..

مواجهتها مع رهام.. يمكن الجولة الأولى تكون من نصيب
رهام.. لأنو سما للحين ما تعرفها.. بس بعدها رح تطلع
سما اسلحتها الخفية واللي ما شفناها للحين..
و يمكن نزار وسما تتطور علاقتهم و يكون بسبب رهام
ودعاء.. لأنو الناس اللي قلوبهم سوداء دايم يغلطون..
يحطون ثغرات بأفعالهم وكلامهم.. بس اللي ماني
مستوعبته للحين رهام ووقاحتها.. يعني الزفته تاركة
نزار بأصعب أيام حياته وجايه الحين بكل قوة عين تبي
ترجع له وتحارب سما كمان.. اخييييه على ناس زي
كذا.. الله لا يبلانا بس.. ودي انو ام نزار تعطيها كلمتين
بالعظم تخليها تحقد على سما وتسوي حركة غبية متهوره
تخلي سما ونزار يتزوجون.. عاد ما استبعد انها تشوّه
سمعة سما وببالها انو نزار رح يتركها كذا.. خليهم
يتضاربون على نزار ولا يقربون ناحية سالفة اهل سما..

..
على طاري قتل اهلها.. يمكن تكون هي الدليل😟 يعني
العصابة يسوون جرايمهم بدون ترك اثر وراهم.. والحين
يدورون على سما عشانها يمكن شافت واحد من اهم اعضاء
العصابة وهم خايفين لا تبلغ عنه الشرطة.. يعني مو شرط
يكون عندها دليل ملموس وانهم يدورون عليها عشانه.. قصدي
يعني انها ماعرفت شيء عنهم بس انها شافت واحد مهم منهم..
وهم يبون يتخلصون منها قبل لا تفضحههم..

،

عفراء في المستشفى😟 وزرجها قتلوه..! هذول شغلهم
حامي حامي.. بس اتوقع تموت عفراء قبل تفيد الشرطة
بشيء.. او ممكن تفيدهم بشيء بسيط ويكون طرف خيط
لهم..



؛

جابر.. يعني بالله الحين بوسة اليد قد هي رومانسية..!
يعني اي واحد رح يبوس يد زوجته مالها شغلة ذي بالرومانسية..

ولو انو فيه تغير طفيف فيه بس يمكن انو يجاري أرجوان فقط..
عاد يتغير صدق لازم معجزة.. ذا صخرة من يوم هو صغير
بيتغير بكم شهر يعني..

،
أرجوان.. اتمنى تكون مدركة لكل المصايب اللي رح تجيها..
غلطتها الوحيدة إنها تاخذ مانع بدون علم جابر
واتوقع أمه رح تستغل الشيء هذا وتقوله لجابر هذا
اذا ما بهرت الكلام من عندها..
بس و يعني اذا عرف جابر وش رح يصير..! هو تزوجها
بضغط منه يعني يتحمل ما يجيه منها.. يعني
انا اشوف عند ارجوان حق انها تستخدم المانع بس
طبعًا مو من دون علم جابر.. بس قصدي هي ماهي
واثقه بحياتها مع جابر.. ماتبي يكون بينهم طفل
ويكونون مليانين مشاكل للآخر.. يعني ما اشوف
فيها اي شيء لما فكرت بمصلحة نفسها.. يعني مثل
ماهو مخبي عليها انها تصير خالة الأطفال يستحق
انها تخبي عليه منع الحمل.. مثل ما يوجعها توجعه..

..

زهور الهولامية.. ايش ممكن يكون الحادث اللي افقدها
عذريتها..! و اصلًا كم سنة بينها وبين رضا..! يعني لدرجة
إنها ماتدرك الوضع اللي هي فيه وتزوجت وهي تحسب انها
عذراء..!

..
رضا.. ارجع واقول عنه مخبل.. يدري بكل اللي بتسويه فيه
وعاده على فني يقول حلالها.. ما اردى منك الا نواس


؛


معتصم.. جاك الموت يا تارك الصلاة.. انا اتوقع لبتول ردة فعلين
يا انها بتدخل بحالة صمت من الصدمة وبعدها تستوعب وضعها
او انها من البداية رح تفكك الباب من مكانه وترميه على راس معتصم
يعني تعرفين احنا الحريم لما ننقهر تجينا طاقات متفجرة😂

بس اتوقع رح تخاصمهم كلهم ولا عاد تكلمهم لا ابوها ولا امها ولا معتصم
بس كمان يمكن معتصم يطلب مساعدة ارجوان..
الله لا يطيح احد بنفس موقف بتول.. البنت بتتقطع من مسألة انو
معتصم يشوفها بكل حالاتها ومحد يقوله شيء وبعدها
تنصدم انها من الأساس زوجته وحلال يشوفها ..

.
.

اتمنى ما نسيت احد 😎