كاتب الموضوع :
فيتامين سي
المنتدى :
القصص المكتمله
رد: عشق بلا قيود للكاتبة شخصية خيالية
رن جرس المنزل كثيراً..*
الجده كانت تسرح بخيالها اغلب الوقت.. تفكر بأبنها هي تعرف انها سبب وفاته، لكن ستمضي قدماً مادامت قد خسرته لن تخسر ما تريد وهو الوقوف بوجه حاكم.!!
ربما تنسى الانثى كل ألم الا الخيانه من حبيب علقها كثيراً بخيوطٍ من سراب.. ثم تركها وقد حكى الجميع بقصتهما..
..ازعجها جرس الباب..
وهي تنادي الخدم لكن لا مجيب رفعت عصاها وضربت بها الارض لتحدث صوتاً/فطييم وووجعع افتحي البااب
نزلت الخادمه من اعلى على عجل لتفتح الباب..
بصمتها الذي أصبح سمتها منذ وفاة والدها.. خرجت توق من المطبخ بيدها كوب قهوتها التركيه، ترتدي بنطلون بيج فاتح و قميص ابيض خفيف و تلتف بشال كحلي كبير، شعرها مرفوع بفوضويه وتتمرد منه خصل كثيره ،جلست بملل في الصاله عند جدتها/
شعرت الجده بضيق فمنذ وفاة ابنها البكر وهي صامته/انا بروح انسدح بغرفتي لا تنادوني للعشاء ترى مابي..
توق ببرود/طيب.
اقبلت فاطمه/مدام توق زوجك برا
لم تصدق، ظنت انها بحلم، تذكرت آخر مره رآته.. قال لها انه لن يعود لأجلها!!.. وقفت وهي تأمر فاطمه/ ألحقيني بالقهوه..
الشغاله/ان شاء الله
.
،
لحظات وهي تدخل المجلس بجمود و بملامح اضناها الحزن كثيراً/السلام عليكم.
رفع رأسه ليراها ووقف لها.. لم تكن بخير أبداً، في كل مره تكون أنحف وأسوء ..الهالات الحمراء باتت سمه فيها/وعليكم السلام..
توقفت أمامه وهي تحاول ان تقف بثبات رغم الضعف الذي تشعر به..لكم تمنت قربه منها في أزمتها/قلت أنك ماراح تجي تدورني!!
حاكم لا يريد عتباً الآن يكفيها مافيها..هي لا تبدو بخير/احسن الله عزاتس بالوالد.. الله يجعل مثواه الجنه، ويعينكم بالصبر والسلوان..والله انه فقيده
اجتمع بعينيها الدمع اللعين وانهمر بغزاره، حاولت مسحه لكن دون جدوى/جزاك الله خير.
حاولت الصدود والهرب وهي تلعن شعورها بالضعف امامه.. ولكن تفاجأت بيده سبقتها، امسك بها و جذبها نحوه واحتضنها بقوه/والله اني حاس بوجعتس..الابو غالي وماله بديل ..عزيز الدمع ما ينزل الا على غالي
هي بدورها بادلته الأحضان بقوّه وكأنها طفله تائهه وجدت للتو من يحتويها.. بكت بحرقه وهي تدفن وجهها بصدره/ابوي مات يا حاكم ماات، معاد يرجع
حاول تهدئتها .. جلس معها حتى شعر أنها هدأت، لم يلومها لو ذرفت دماً بدل الدمع… هو سبق وان ذاق فقد والده أيضاً ويعرف مدى الحزن الذي يخلفه ألم الفقد/يلا توق انا استاذن.. تامرين شي؟
نظرت إلى وجهه نظره اخيره وهي تتأمل ملامحه تعشق تفاصيله، ردت ببحه/سلامتك
حاول إظهارها من حزنها/خليك قويه داايم،اذكري الله ووسعي صدرك بالدعاء للوالد ولا تجزعين.. كلنا لها " اما ان ضايقك احد تعرفين رقمي".. تذكرت.. خذي شنطتك فيها اغراضك. نسيتيها معي بسيارتي هذيك الليله
سمع آخر جمله وهو يدخل/انا ولد فهددد..كنتي تطلعين معه!!
شعرت وأن كارثه ستحصل وبادرت بالدفاع/بجاد تكفى لا تفهم غلط،انا…
اقترب منها ورفع يده بالعقال ليضربها ولكنه تفاجأ بيد حاكم تمنعه وتلوي ذراعه بقوه/قسم بالله لو منت اخوها وهي تعزّك، لأذبحك ذبحة الشاه.. احذذررني تمد يدك على زوجتي مره ثانيه
بجاد وهو يحاول يدفعه عنه/انت اصلاً وش جابك.. وش مجلسك معها ببيتنا
حاكم/اظن ماهو حرام لا جيت أعزي زوجتي واهلها..
شعرت بثقل في رأسها.. لم تعد تحتمل ضغطاً يكفيها حزنها..
دخل عبدالرحمن بهذه اللحظات وأخذ العقال من رأسه/ابو فهد انت هناا.. علي الحرام مـ
قطع عليهم سقوطها بينهم مغمى عليها.. لم تحتمل ان يتعارك زوجها مع اخوتها أمامها وكل منهم يشهر سيف العداوه للآخر..
امسك بها حاكم قبل ان تصل الأرض و ثبتها ثم جلسها على الكرسي /تووق.. ردي علي توووق
عبدالرحمن حاول ابعاده بغضب/ابعد عنهاا انت
حاكم لم يلقي له بالاً فهو يراها كل مره تذبل امام عينيه..لا يعرف كيف يتصرف..!
بجاد اخذ من الماء الموجود على الطاوله وبلل وجهها به/تووق ردي علينا يا بنت..
بدأت تفتح عيناها وتنادي بهمس/يبه .،
كلهم تأثروا كيف تنادي شخصاً تعلم انه ميت!!
حاكم بضيق/تووق وش تحسين به؟ وش يوجعتس
نظرت اليه بنظرات مرهقه يعتريها الضعف وهي تحاول التركيز.. وكأنها تقول "بُعدك هو اللي موجعني"..
عبدالرحمن اسندها وهي تقف/تعالي اوصلك غرفتك..
حاكم ساعدها بالوقوف.. وهو يودعها بعينيه..
بجاد لم يفهم ما يجري، هو فقط يسمع من عبدالرحمن وعبدالرحمن قد أوضح له أن توق لم تعد راغبه في الزواج منه، لذلك غضب من رؤيته هنا/ماتعلمني وش جابك انت
هو كان يتتبعها بعينيه حتى اختفت للداخل/مثلما قلت اعزي زوجتي ..
بجاد حاول الهدوء/اظن بعدما اختي طلبت الطلاق انتهى كل شي..
حاكم ابتسم بسخريه/هذا بالنسبه لك انت واخوانك.. لكن بالنسبه لي توق زوجتي و صار اللحين من حقي شرعاً اخذها غصب لأنكم منعتوني منها ،لكن لجل ابوكم الله يرحمه ولجل خاطرها ماني برايح محاكم، معتمد على عدل الله اللي يصرف الامور. واكيد بينصفني وبينصفها..
بجاد عقد حاجبيه بغضب/يعني بتاخذها غصب عنّا
حاكم بثقه/لا لا...انتم بنفسكم اللي بتجيبونها لي..ع العموم ماجيت اخذها اليوم.. كنت جاي اسوي واجبي أعزي وامشي.. سلام
تركه و خرج وهو غاضب..
، ركب سيارته بسرعه وانطلق بها..
،
عندها..
وصلت عند الدرابزين وتوقفت بدون ان تلتفت اليه/خلاص عبدالرحمن اقدر اكمل طريقي.. روح
عبدالرحمن وهو يعطيها الكيس الذي جلبه حاكم/تبين المستشفى؟
توق بضيق/لا.. ابي ارتاح
تركته وصعدت السلم متجهه لغرفتها.. جلست وهي تشعر وكأن ضربات قلبها تكاد تُسمع من سرعة خفقانه.. لابد وانها النهايه.. اليأس يخترق حصونها و صورة والدها التي لا تفارقها تمر كالطيف أمامها… أي ضغط آخر الآن لا تتحمله، لا تريد التفكير بشيء يكفيها رحيل الغالي.
،
.
،
.
،
.
بيت ابو عناد*
خرج من غرفته بعدما لبس شماغه وكبكاته.. واسبغ العطر على نفسه..
نزل للاسفل ليجد والدته وأخته سبرا ،ابتسم وهو يلقي السلام/السلام عليكم..
الكل/وعليكم السلام
ام عناد ببتسامه/ما شاء الله ع ريحة العطر شكله جديد..
عناد ببتسامه/ايه جعلتس تسلمين
ام عناد وهي تلتفت لسبرا/ صبي لأخوتس قهوه وش تنتظرين
عناد/لا لا.. انا رايح لتميم الشباب بيتجمعون عنده الليله
سبرا/تبي اجهز لك شي
عناد وهو يبتسم/لا مشكوره سبرا.. يمه بغيت اسألتس
ام عناد/أسأل يا وليدي
عناد بحماس/شرايتس في صيته بنت عمي خالد
سبرا ردت عنها بغضب وعرفت مقصده/نعم نعم!! تحححححلللم تااخذ وحده من بنات عماني.. انا اللي برفض
عناد بغضب/احد سألتس أنتي؟ اظن قلت أمي
سبرا ألتفتت لأمها/يممماااه لا تورطين معه.. ولدتس هذا يفشل.بعد بنت الجيران وصديقتي وبنت صديق ابوي.بيحول الموجه على بنات عمانه!!!
عناد وهو يزم شفتيه بغضب/ان ماسكتتي صكيت هالدلّه في جبهتتس.. انثبري
ام عناد بعد سكوتها وهي تراهم يتراشقون بالكلام/المعذره يا ولدي ..ازريت وانا كل يوم اخطبلك وتفشلني.. صيته بنتن اجوديه وما تصلح الا للرجال الكفو
عناد انصدم من رد أمه الجارح/يعني قصدتس اني مانيب كفو يمه؟!!
ام عناد/بالزواج.. لا والله منت كفو.. هي بنت سنعه هابة ريح وتنحط ع الجرح يبرى،والله ما اتمنى لها إلا اللي اطيب منك.
سبرا/ي لبى قلبتس يمه.. فهميه جعلني ما ابكيتس
عناد وقف معترضاً/هالصيته ذي لي غصبن على اللي ما يرضى..وبشوف من بيسنع الثاني
سبرا شكت في نواياه، بعد الجمله الاخيره/الله يفكها منك ومن شرك..
ترك المكان وخرج.. وهو عازماً ان يطلبها ان تميم (تميم ولد عم وصديق و اكيد ماراح يرفض لي هالطلب ههههه وبنشووف يا صيته)..
،
.
،
.
،
.
،
.
في المطبخ اجتمعن.. والعمل على قدم وساق، العشاء من طبخ صيته التي عاتبتها أمها لطبخه!!
أما بقية الاشياء فمن عملها هي سلهام..
سلهام وهي تحرك السلطه الهنديه باهتمام/صيته متأكده طعمها حلو، ترى ماعرف اذوق طبخي
صيته/160مره تسألين والله العظيم حلوه.. كل اللي ذقته حلو.. يختي علامتس موسوسه
سلهام بداخلها (بلاي مابي اخوك يفتح فمه ويتشره)..
دخلت دلال بابتسامه وهي ترى انواع السلطات والإيدامات والحلى/ما شااء الله عليتس يا سلهام متى امداتس تسوين هذا كله
سلهام/انا بالمطبخ من عصر يالكسلانه بدال دور مدير الطهاه ساعدينا بالباقي ذبحك النوم يا دلال
صيته وهي تشمر عن اكمامها امام الفرن/هههه دلال مره في السنه تصير سنعه والباقي لك الله.
دلال/اوهوووو علينااا اقعدوا سبوا فيني
سلهام وهي منشغله بإخراج الصحون/لا تتهربين محتاجينك دلال تعالي معي نفرش السفره.
دخلت أم تميم وهي تراقب الوضع وسمعت سلهام تطلبها/دلال تعاالي ابيتس..
دلال/شوي يمه أ..
ام تميم قاطعتها بصرامه/قلتلك تعاالي ابيتسس.
خرجت دلال معها.. ولم تعود..
ضلت هي من ترتب السفره اما صيته تجهز العشاء وصحونه..
.
،
.
،
في مجلس الشباب..
الكل أبدا اعجابه وبدهشه وهم يسمعون حديث سليمان صاحب تميم باهتمام..
تميم بعدم رضا/ياخوي الوااحد يااالله بوحده ترفع ضغطه وانت رايح تاخذ الثانيه يالدلخ
سليمان بضحك/يابن الحلال لو تاخذ ثنتين بينشغلون ببعض ويتنافسون كيف كل وحده تكسب رضاك وانت فالنهايه الرابح هههه
تميم وكأنه اقتنع/وجهة نظر ..بس انا رجالٍ ماتحمل ازعاجهم
حاكم لا يعجبه منطقهم.. الزوجه بنظره ليست فقط لتلبية الرغبات ولكن شريكة حياه/بس يا سليمان من جهه ثانيه انت مضطر تعدل بينهن.. والقلب ماظنته بياخذ ثنتين يا سليمان لابد وانك تميل مع وحده.
سليمان وهو ينظر لحاكم بابتسامة خبث وضحك/انت بس متملك و من هاللحين خايف هههه المثل يقول ضرب النساء بالنساء وضرب العبد بالعصى
تميم بدأت تعجبه الفكره/ضرب النساء بالنساء.. علمك غاانم يا سليمان
حاكم بابتسامه/ايه عاد شكلها اعجبتك تراك توك متزوج
سليمان بتحدي لتميم/اتحدااه ياخذ الثانيه.. يا رجال ماعندك احد يااااله تزوج
حاكم بضحك/يا سليماان اركد لا تخلي مرته تدعي عليك
تميم وهو يضحك/لا تخااف ماني متزوج اللحين مابه دراهم
عناد محاولاً كسب تميم/افاا علييك نعين ونعااون انت بس قل تم
تميم/ماتقصر..
دخل صقر بهذه اللحظات/تمييم يبونك..
تميم وهو يقف/عن اذنكم يا جماعه...صقر صب القهوه للرجال..
عناد همس لحاكم/بغيتك بموضوع خاص
حاكم بنفس همسه/بعدين ماهو بمجلس الرجال..
انحرج عناد ثم سكت..
.
،
.
،
.
،
.
دخل المطبخ ورآها لوحدها تقف وكأنها ستخرج صحناً او ما شابه من على الرف، ونطق بصوته الجهوري/خلصتوووا؟.
خافت من صوته وهي كانت في غفله صرخت وسقط منها الصحن ..
هنا لم يستطيع صبراً وهي تصرخ من المؤكد ان الرجال سمعوا صوتها، مد يده بكف يعدل وجهها/ولسنه ان شاء الله يا قليلة الحيا..
هنا كادت تنهار، لأول مره تشعر بالإهانه بهذا الشكل.. هي في المطبخ منذ صلاة العصر من اجله.. وأمه تتلكأ لتبعد بناتها عن مساعدتها وهاهو يكمل الناقص بدلاً من ان يشكرها لتعبها.سبق ونبهته ان لا يدخل قبل ان يستأذن ولكنه لا يفهم.. . لم ترد عليه، شعرت بغصّه نزلت للارض لتلملم شظايا الصحن المكسور بيدين مرتجفتين.. وجرحت نفسها بقوه..ولكنها واصلت لملمت الشظايا..!
تميم للحظه ندم انه ضربها فهي لم ترد عليه.. يتضح عليها الارهاق، لاحظ الدم يخرج من يدها رحمها ولكنه مثل اللامبالاه والقسوه/اسمعيني خلصوا بسرعه
دخلت صيته وخلفها منال/وش صاير؟
تميم بحاجبين مقطبين/وينكن فيه انتن؟
صيته/عند أمي مناديتنا
تميم وقلبه يؤلمه عليها/طيب من ناداني من المجلس؟
تحنحنت لتزيح الغصه من حلقها/انا طلبتك.. السفره جاهزه ..تقدر تقلط خوياك وبالعافيه..
دلال اتجهت لها وهي تلاحظ،يدها الملطخه بالدم/سلهام وش ذا بسم الله عليتس
صيته اقتربت منها ورأت حجم الجرح العميق/احححح اظن فيه قزازه داخل
سلهام اخذت منديلاً ووضعته بشكل عشوائي، فهي لاتحب نظرات الشفقه/مو مشكله عادي ..انا رايحه انظف يدي و ارتاح شوي.
دلال رحمتها/روحي ارتاحي يكفي تعبتي.. انا بخلص الباقي.. وعقمي يدك..
ذهبت وتركتهم..
صيته لم يخفى عليها لون عينيها ولمعتها ونبرته المرتجفه.. لابد وان تميم فعل ما يضايقها/تميم وش صار
تميم بضيق ونرفزه، فقد افقدته لذة ضربها بسكوتها عنه/انتي انثبري ولا تدخلين...هاللحين تجهزون لي ابريق شاهي وابريق نعناع ابي القاه بالمجلس بعد العشاء.
خرج ولم ينتظر ردهن عليه..
.
،
.
،
.
دخلت غرفتها واتجهت فوراً لدورة المياه،غسلت يدها ولكن الدم مازال ينزف وتشعر بوخز.. يبدو فعلاً ان هناك قطعة زجاج مازالت عالقه بكفها..
نزلت دمعاتها غزيره وهي تحاول ان تكتم بكائها قدر المستطاع..اخذت روب الاستحمام والمنشفه.. و دخلت الحمام واغلقته بالمفتاح و جلست على طرف البانيو ففي غرفتها لا تستطيع اخذ راحتها بالبكاء بدون تطفل فهي بدون مفتاح ولا فيها خصوصيه..يتملكها شعور بالضعف.. تعبت من إظهار قوتها.. لا بأس لو بكت قليلاً..والا ستنفجر..!
بدأت بنزع ملابسها ثم فتح الماء.. رفعت رأسها ثم اغمضت عينيها والماء يبلل وجهها تذكرت صفعته قبل قليل ثم فتحت عينيها وهي ترى الماء ينزل كحبات المطر من "الدش"..ابتسمت بخبث والفكره تأتيها..
انتهت من حمامها.. لبست الروب ولفت شعرها بالمنشفه..
ثم اتجهت للدش لتحاول فكه من مكانه أدارته حتى النهايه وتركته مكانه بدون تثبيت.. بحيث لو فتح الماء سقط بسرعه على رأس من هو تحته..
جربت وفتحت الماء فسقط مباشره واتسعت ابتسامتها (هذا حق الليله يا تميم)
،
.
،
في ربوع نجد "العذيه"
اتجهت لوالدها لتتسامر معه وبيدها ابريق الشاي.. لم تستطيع النوم وهي تعلم انه ليس على ما يرام.. طلبت منه الاتصال بالشباب لكنه رفض،
وصلت ووضعت الشاي واتجهت له وجدته نائم، ابتسمت وهي تتمتم( الله لا يحرمني منك يهالرجال)..
مدت يدها لتلمس جبينه وجدته كالجمره من شدّة الحراره، قررت إقاظه ومناداته/يبه!!.. يبه رد علي يا غناتي
لم يرد…
خافت واخذت جواله الذي هو بالقرب منه واتصلت بحاكم فهو المقرب وهو الافضل بهذه الحاله..لعله في عمله على طريق الشرقيه حتى يصل بسرعه..
رد بعد رنتين او ثلاث، بصوت فيه اهتمام/هلا جدي
شيهانه وهي تحاول التحكم في ردود فعلها/حااكم انا عمتك شيهانه..
حاكم خاف/وش العلم يا عمه.. جدي فيه شي
شيهانه/من صبح ماهو ببخير.. ولكن اللحين ما يذهن من الحراره اللي فيه.. حاولت اصحيه وما يرد..
حاكم بقهر فالمسافه بعيده/انا جااي اللحين
شيهانه/حبيبي لا تسرع.. انا باخذه لين اوصل الهجره اللي قريبه.. وان شاء الله اسعفه لين توصل انت.. تكفى انتبه لنفسك
حاكم/ابشري.. روحي المركز القريب حق الفيحانيه على الفجر بكون ان شاء الله وصلت سلام
شيهانه/سلام..
.
،
.
.
،،،
خرج الجميع من تميم بعد انتهاء السهره وأولهم حاكم الذي لم يخبرهم مالسبب.. وكان آخرهم "عناد" الذي تعمد ان يكون الأخير..
عند الباب.. التفت عناد لتميم..
تردد كثيراً ولكنه حاول التشجع ثم نطق/اقول تميم انا ودي ..اقصد
تميم شك في وضعه.. ظن انه في مأزق/سم يا عناد فيك شي محتاج شي،تراني بالشوفه
عناد/انا من زمان افكر بهالموضوع.. ادري ان الوقت ماهو بمناسب.. لكن بس بقولك
تميم استغرب/شبلاك قمت تخربط.. تكلم سييده يا ولد وش قوومك انت
عناد بدون مقدمات/ابي اخطب اختك
تميم انفجر ضحك/غربلك الله ذالحزه جاي تنكت.هههه
عناد بجديّه/تميم أنا صاادز.. انا ابي اخطب اختك صيته وودي اجيك مع ابوي بكره بس ابي الضوء الاخضر
تميم تغيرت ملامح وجهه للجديّه مع رفع حاجبه الأيسر وهو ينظر له بحده/مالك عندنا نصيب..
عناد/وش قصدك؟
تميم قرر الرد بأدب لأنه يستحيل ان يزوج اخته من اشباه عناد/انت ولد عم وعزيز وغالي بس اعذرني سالفة الزواج لا..
عناد بعصبيه/وليش ان شاء الله..انا ولد عمها و أولى من
قاطعه تميم بعصبيه، مادامرانه غير محترم/ولد العم وبنت العم ذي ماتمشي عندي. اهم شي عندي الرجال الكفو .. صيته ماهيب حي الله بنت لزواج 6شهور ..ماهيب للمتعه ولعب البزران..
عناد حاول مد يده على تميم بعد هذا السب. ولكنه تمالك نفسه ثم ذهب مسرعاً..
دخل تميم وهو يبتسم( معااد الا هي يا عناد مالقيت تفكر تلعب الا بصيته عزوة تميم ههه)
.
،
شعرت به يدخل .فتصنعت النوم.. مع أنها تتألم من يدها..لا تريد محادثته…
اقترب من السرير لا يعرف لماذا ولكن داخله صوت يقول اطمئن عليها.. ولكن تركها واتجه للخزانه واخرج منشفته واتجه للحمام..
جلست هي تنتظر.. وهي تكتم ضحكتها..
ماهي الا لحظات وتسمع صرخته.. آه أي شعور جميييل تشعر به الآن اي احساس بالنصر (طقه بطقه يا تميم.. واشررب يا عم ههههه)
خرح بعد لحظات والدم يسيل من رأسه.. ولاحظها جالسه و تضحك.. زم شفتيه بغضب.. عرف أنها من خططت ودبرت له المقلب، صرخ فيها/سلهاااااام
.
،
.
يتبع… *
"'. قراءه ممتعه.. "'
واعذروني على القصور
*تقبل الله طاعتكم*
|
05-06-15, 12:33 PM
جديد مواضيع قسم القصص المكتمله
العرض العادي
