46))عِشق بِلا قُيود..
،
.
،
احاول اخفي احساسي ولكن بالعشق مفضوح
تشوف الفرح في عيني واحبك بالعقل والروح
احبك حب ما أقدر اعاند فيه احساسي
لقيت الحب شيء اكبر من أني اخذ انفاسي
حياتي عمرها بيدك وحبك سيدي وسيدك
وعمري ما ابتدأ قبلك وعيدي فالهوى عيدك
حبيبي; عمري لك والروح وقلبي فالعشق هاايم
فداك الروح ،وروح الروح يا رب تبقى لي دايم
معاك الدنيا شي ثاني، معاك الدنيا ذي احلى
ومهما كانت الدنيا، معاك احلى اكيد احلى
تخيّل دنيا من غيرك أو لحظات من غيرك
انا ما اشوف فالدنيا و في قلبي أحد غيرك
،
.
،
.
وصلهم عناد بدلاً عن حاكم الذي وقف بجانب عمه لاستقبال ومباشرة الضيوف..
نزل من سيارته وهو يتجه داخل المستشفى حتى وصل اليهم، في غرفة الضماد/وش العلم يا شباب؟!
سلمان/بسيطه يا رجال خدش في وجه العريس
التفت عناد لفاهد/ماتشوف انت اعمى؟!
فاهد الذي كسرت يده/الصدمه كلها في انا الحمدلله العريس سووله أشعه وبخير
التفت عناد الى تميم/شلونك تميم؟
لم يهتم سوا بلبسه الذي صبغ بالدم/يا ولد تأخرت على الزواج والملابس راحت فيها.فيه عريس تجي الساعهظ،ظ،ماهو في القاعه لا استقبلت ضيوف ولا شي
ضحك عناد/يابن الحلال اهم شي سلامتك..وين الدكتور ابي اشوفه
تميم بغضب/استلمونا كلنا اشعه وفحوصات ماله داعي تكلم دكتور مشينا وانت يا فاهد اقعد خلهم يجبرون يدك برسل عليك صقر يجيبك
فاهد بابتسامه/ماهي مشكله مبروك يا عريس
خرجوا عائدين للمنزل،يجب ان يلبس من جديد وبسرعه..
.
،
.
.
،
.
سمعت صوتاً هامساً عند باب غرفتها قد ضاقت انفاسها من طول الانتظار،هنالك شيء ما يحدث نظراتهم ليست عاديه، هم يخفون امراً عنها نظرت للساعه مجدداً كانت تشير للثانيه عشرا، التفتت لريم التي دخلت للتو و سكبت لها كوب ماء لتسألها بإلحاح/وش صاير يا بنت فهموني
مدت لها كوب الماء حتى شربت منه قليلاً/بقولك وش صار بس لا تخافين ماصار شي يخوف..بصراحه تميم وهو جاي عالقاعه صار له حادث بس والله بسيط والله
سقط الكوب من يدها وهي تعجز عن الوقوف/تميم!!
دخلت شيهانه وهي تراها كالجماد/بسم الله عليك سلهام شفيك
ريم بخوف/قلت لها ان تميم صارله حادث
عبست شيهانه بوجه ريم وهي تتجه لسلهام وتمسح دموعها/الله يهديك يا ريم خوفتيها عالفااضي تميم بخير وينتظرها وبعد شوي الزفه..
التفتت اليها سلهام بلهفه وهي تكفكف دمعها/احلفي.. تكفون لا تكذبون علي، انا هاللحين بعرف والا بعدين احسن لكم قولوا لا تخلوني انصدم
شيهانه وهي تعيد تزيين ما عبثت به الدموع،ومكياجها لم يكن ذلك الثقيل،هو اسلوب سلهام في وضع الميك اب،فرضته حتى على التي زينتها/منتي مصدقتني يلا قومي وشوفي بنفستس.. هاللحين الزفه وبتشوفين تميم يدخل مافيه الا العاافيه
وقفت بمساعدة شيهانه وريم اللاتي رتبن شكلها لتخرج، تسائلت بلهفه/اطلع هاللحين؟!
ابتسمت شيهانه وهي ترى دموعها تفضحها وتعري مشاعرها/ايه انتي هاللحين،خلي العالم تبارك لك وانبسطي وبعد شوي تميم..بسم الله مشينا
..دخلت بزفتها تريد ان تبتسم،وبالكاد تظهر ابتسامتها،مازال قلبها يرجف خوفاً عليه ،ماذا لو حدث له مكروه يااه لا تريد تخيل ذلك..
شعرت بدوار فتمسكت اكثر بيد شيهانه التي شعرت بيدها..
وصلت المنصه لتتلقى التهاني من الضيوف والصديقات اللاتي كانت اخرهن
نوال التي همست لها/ما شااء الله تهبليين اناظر فيك من بعيد وأسمي عليك..مبرووك يا سلهام
سلهام بابتسامه صادقه/الله يبارك فيك حبيبتي نواال عقبال بنتك ، عاد تصدقين اول مره اشوفك و ما اتضايق
تخصرت نوال/افااا ماكنت ادري اني اجيب لك الضيقه؟!!
سلهام/يختي وجهك يذكرني بالدوام
ضحكت صيته/ماتخلين سوالفك حتى وانتي بالكوشه ..اعقلي ترانا زوجناك
سلهام بابتسامه/ما اضمن لك العقل
نوال/هي كذا حتى فالدوام ماعندها اي تفاهم
صيته مازحه/الله يخلف على اخوي بس
نوال/اهاا عااد يا صيته، الليله ليلتها مانبي نضايقها
وصلت توق وهي تراهم يتحدثن منذ دقائق/شرايكم يالربع اجيب لكم القهوه وتتكون هنا وتكبون الزفه.
سلهام بهدوء ورجاء على غير العاده/تكفين يا توق خليهم ينقلعون ناشبين بحلقي
توق لتغيضها/اهاااه مستعجله اختنا فالله… اجل شرايكم يا بنات نتكي كلنا جنبها ونمنع دخول تميم، نخليها سمره بدال زفه
سلهام باحباط/لا عااااد بنات..هالمرحله وصلت لها بصعوبه،ماهو بالساهل توقفون بوجهي..عمتي شيهانه افزعي لي
حضرت ام تميم وهي تبتسم بسعاده يتضح ان احداً لم يخبرها بما حدث لتميم/اها عاد ابعدوا عن مرت ولدي..هاللحين زفته..
اقتربت منها سلهام لتقبل رأسها/ووينك يا شيخه من زمااان
ضحكت ام تميم/من هاللحين دهني سير.. بس هالليله هدنه بس من الصباح تلقيني انا وعمك عندكم بالبيت
سلهام/بقفل البيبان و بضيع المفاتيح
ام تميم بغمزه/بتصرف.. ماعليتس.. ابو تميم معي
شيهانه وهي قادمه و تبتسم/تميم بيدخل هاللحين اللي بتغطى واللي بتقعد..
..
خفتت الاضاءه وسلطت عليها فقط وعلى الممر، شعرت بنبضات قلبها الذي يكاد يخرج من صدرها..اي شوق تكنه له ؟!!
شاهدته يدخل نظرت اليه من بعيد وهي تتفحصه بنظراتها، هنالك جرح على احد حاجبيه و يده اليسار ملفوفه بضماد طبي..!
ازداد خفقان قلبها وهي تراه عائداً لها من حادث ليلة زفافهما التي لطالما حلمت بها، لا تصدق انها كادت تفقده قبل قليل ،شتمت نفسها على كل ذاك التأجيل والوقت الذي كانت تضيعه في ابعاده عنها.. اختصرت له المسافه وهي تراه يقترب من الكوشه اتجهت اليه ..
استغرب الجميع تصرفها وهو الذي لم يظن ولو للحظه انها ستجري امام الخلق وتعانقه هكذا،همست باذنه/سلامتك من كل شر يا قلبي.
عرف سبب مبادرتها،من اخبرها؟، لا يخفي سعادته برؤية اللهفه على محياها وكلمة "يا قلبي" تُرى كم احتاجت من الوقت لتقولها، طبع قبلته بين عينيها/الله يسلمك حبيبتي انا بخير لا تخافين
وقفت أمامه تتأمل وجهه وتلمس جرح حاجبه بيدها ودموعها تذرف/يوجعك شي؟!
استغرب لمعة عينيها ورجفة صوتها، لم يعهدها بهذه الحساسيه والدموع،مسح دموعها وهو يبتسم و يذكرها بما قالته بممازحه/لا تحاولين تأثرين علي ماراح اشيلك قدامهم
ابتسمت وسط دموعها، مازال يتذكر ذلك الشرط الذي مازحته به..!
ضلت امال تسمي على ابنتها من نظرات النساء..الكل يتمنى لو سمع ما دار بينهما، صعدا الى المنصه وجلسوا على كوشتهم
اتجهت ام تميم له وهي تستغرب جرحه/تميم وش ذا يا ولدي؟ وليه مغير البشت.. كان لابس اسود يا ولدي ليه ماخذ بشت ابوك؟
تميم/ابد يمه وانا طالع طحت على راسي بس جات سليمه الحمدلله.. راح فيها البشت واخذت بشت ابوي
ارتاحت/الحمدلله ومبرووك عليكم الله يوفقكم يا عيالي
تميم/الله يبارك فيك يمه..
بعد التبريكات من الخالات والعمات.. جلس يبتسم لمن تجلس بجانبه/ما شاء الله طالعه قمر
ضغطت على يده/و اللي عنده قمر اكيد عمره ما يلتفت للنجوم وإلا؟
بابتسامته/والله ما وصلت للقمر بالساهل علشان افرط فيه وألتفت للنجوم..اكيد ابي احافظ عليه..
سلهام بغرورها/ايه تعدل معي،العمر فرصه وحده مالها ثاني
تحدث تميم وهو يمازحها/اخيراً يا سلهام باخذك لبيتنا يعني اقدر هاللحين لو اولّع فيتس واضربتس وانتف شعرتس لين اشبع.. محد بيدري يا قلبي !
يأسرها كما هو، تصرفاته و حديثه غير المنمق/خوش رومانسيه منتظرتني عندك، اقول بس انتبه لا أولّع فيك أنا بدون محد يدري..
ضحك و التفت إليها متسائلاً/تعالي.. وش المفاجأه اللي قلتي لي عنها بالتليفون؟
فكرت هل تخبره هنا ام تنتظر للمنزل، هذا افضل توقيت للمفاجأه/اممم
استنطقها/قووولي
اقتربت منه وهي تهمس/قرّب اذنك
اقترب منها لتهمس بأذنه بصوتها الرقيق/بيجينا نونو بعد سبع شهور ان شاء الله
اتسعت عينيه مع اتساع ابتسامته ليلتفت إليها بصمت المتفاجئ، كاد ان يتكلم/صدق ا..؟
عضت طرف شفتها السفليه بخجل وهي ترى نظراته لها لتشير اليه بنعم ثم طلبته ان يكف عن السؤال والتحديق فيها/اشش
لا يدري ماذا يقول فقط علقت ابتسامته،يريد حقاً معانقتها ضل يتأمل ملامحها ونسي من حوله حتى وقفت شيهانه عندهما/ياعرررب منتم بغرفتكم عييييب
ضحك تميم ليرد عليها/انا ودي اخذ مرتي ونتوكل والله احتفلوا لحالكم
دلال باندفاعها/وين تروحون خلوكم عندنا؟
نظر اليها تميم/دليّل...اسبووعين ماتطبين بيتي بعد هالجمله الغبيه اللي قلتيها
انتبهت شيهانه ليده التي مازالت ممسكه بيد سلهام لتتحدث بتهكم/ترى محد بخاطف عروسك تقدر تريح يدها من يدك
التفت تميم لسلهام/خلاص مسكتها بيدي معاد لها مني فكه.
رمقته بنظرات عشق فاق المسافات والايام ومساحات الانتظار والوجع، لم يتغير اسلوبه مازال ذلك الطاغيه ولكنه الآن طاغية عشق، تريد ان تكون زوجة ذلك الطاغيه باتت راضيه باحكامه بعدما ارضاها بكل ما تريده،
لربما هو لا يعرف كيف يصف لها كلمات الغزل لكن نظراته تحكي
قصص العشق والشوق النقي، تعاملاته كلها تقول"أحبك"
..قبضة يده الحديديه وحضنه الذي يكاد يفتك بها حينما يعانقها يتحدثان عن الامان معه..لا يتكلف في مظهره ولكنه بالغ الوسامه بنظرها بل هو مزيجُ تعشق لذّته..!
ابتدأت زفة خروجهما ..شعرت بالدوار و غثيان الذي قبل قليل يعاودها.. لتضغط على يده حتى شعر هو بها وهمس لها/فيه مشكله؟!
تحدثت بخوف/بستفررغ ، دااايخه احس بطيح على وجهي هاللحين..ابي استفرغ هاللحين
رفع رأسه يكادون يصلون لنهاية الممر والباب بات قريباً، نزع بشته الاسود ووضعه على ذراعه ليحملها ويكمل مسيرته/تماسكي قربنا نوصل لا تخربين الدعوه فالقاعه
سمعوا صراخ البنات و تصفيقهم بعد حمله لها..لا احد يعرف سبب حمله لها.. الوضع بدا ظاهره رومانسياً ..وفي الحقيقه سلهام ستستفرغ لو انه لم يحملها ويذهب بسرعه..
أتجهت دلال للمصوره/اخذتي الصوره؟!
المصوره بابتسامه/اكييد
شيهانه باستغراب/طلع ماهو هين ابو سروال وفنيله
دلال/شااايفه كيف؟!
صيته بابتسامه/لبى تميم يا عرب، انا رايحه اودعهم مع خالتي امال تعالوا يا بنات شفتها تصيح قبل شوي وقطعت قلبي
دلال/عقبااال تودعوني بدموع الشوق بعد زفتي
التفتت اليها شيهانه بابتسامه بعدما وكزتها/استحي يا بنت
دلال باستهبالها/معلييييش تحملوني واصله ظ¢ظ سنه، عنست وقافله معي وصدري ضايق، العمر يركض يا عمه والوناسه تفوتني يوماً بعد يوم
شيهانه/وناسه هاااه؟!..عنستي!! الله يخلف عليك يا مزنه من هالبنت
،
.
،
انتهت من استفراغها ووقفت حتى شعرت بتحسن،
خرجت لترى وجهه ومسكتها التي بيده وتبتسم لا شعورياً، لا تعرف تفسيراً لذلك، لماذا تراه اكثر جمالاً ووسامه عن ذي قبل، تجذبها رائحته المميزه، شاهدته يقترب منها ويمسك بيديها/علامتس انتي؟
سلهام/لا تخاف هذي بس اعراض الحمل ثقيله شوي..
لاحظ خلو الغرفه منهم ليحاول ان يقترب منها قبل وصولهم،..ولكنه سمع اصواتهم قادمه/افف مالنا غير بيتنا
ضحكت وهي تراه يتذمر ويدخلون البنات ليودعوهم بعد الضحكات والابتسامات..
اتجهت امال لتميم وهي تبتسم بعد دموعها/شوف يا ولدي ان أذتك سلهام والا طلعت عينك هالشقيه هذي بيوم من الايام لا تسكت وتطبطب عليها تعاال وقووولي وانا اتصرف معها
مدت شفتيها باعتراض/يماااه وصيه علي اناااا
ضحكوا البنات.. وتكلمت شيهانه/علامتس قلبتي الآيه المفروض توصينه على بنتتس
تحدثت ام تميم/والله ماتكون لحالها سلهام أنا معها، لا يهمتس، اي شكوا تعااليني بس
سلهام بابتسامه/لبى حليفتي يا ناس.. راح اردها لك بالافراح يا خاله.
ضحك تميم/ايوووه كملت عليك يا تميم.. جماااعه بنسرري
.
،
.
،
.
،
.
،
.
عند المدخل وقفت تودع والدتها وجدتها وهي تشعر بمغص خفيف..
لاحظتها الجده/توق علامتس
تصنعت الابتسامه/مافي شي لبى قلبك
الجده/اجل تمسي على خير
خرجوا بعد الزفه مباشره.. ركبوا مع عبدالرحمن كما اوصلهم.. ضلوا يتحدثن حتى سألهن بفضول/هاااه عسى لقيتوا لي عروس عندهم
ام ناصر ببرائه/مانتبهت مير عندهم بنيات حليوات
الجده وهي تتذكرها/اخت العريس وش قومها يام ناصر ، والله انها زززينٍ املس
شده الوصف ليستفسر اكثر/زينه زينه والا مغير سوالف حريم يا جده.
الجده بوصف دقيق/تبي الصدق والله انها عنقاااء تهول القلب ..عنوود صييد يا عبدالرحمن..
انتبهت ام ناصر/قصدك صيته اخت تميم اللي تو تطلقت
اعجبه اسمها لكن استضاق أفقه بعد ذكر طلاقها/كانت متزوجه؟
ام ناصر/ايه على حسب كلام توق ولد عمها ميت عليها مير انه عقيم.. انا اعرف لي حريم قعدوا عند ازواجهم وهم عقيمين..بس لو ان صيته حبته ما كبته.
ارتاح قلبه نوعاً ما، لابأس ان كانت مطلقه، هو ايضاً مُطلق، و القلب قد تعلق بها، ولا دواء له سوا زواجه بها/يعني تصلح زوجه لي
ألتفتت اليه الجده/سعد عينه اللي بياخذها، اشوفها ذربه وسلامها واستقبالها ما شاء الله، ودامها بنت عم سلهام وجدها حاكم ماعليها
ام ناصر بابتسامه/معجبتك سلهام بالحيل يا جده
الجده/الحي يحييك والميت يزيدك غبن، البنت اللي ماتبات على ضيمها و تصمد وتعز نفسها لين تاخذ حقها هي اللي كفو،اما اللي تركع للمهانه ماطيقها.
ابتسم عبدالرحمن/سلهام هذي زوجة تميم؟
ام ناصر/ايه.. الله يوفقها بصراحه كلهن ذربات
قلبه مع صيته التي وصفتها جدته كما شاهد صورتها( عنقاء وعنود صيد) /المراد يعني تصلح لي اخطبها؟
ضحكت ام ناصر بعدما عرفت نواياه/امررح الليله ومن اصبح افلح
الجده بضحكه/اشوفك الليله تنشد واجد ماهي من عوايدك!!
ضحك عبدالرحمن.. وهو يكمل طريقه.. بات قلبه ينبض بشده حد انه شعر بالخفقان، ان لم يلتقي بصاحبة الصوره سيجن بالتأكيد..!
.
،
.
،
06-02-16, 05:01 PM
رد: عشق بلا قيود للكاتبة شخصية خيالية
جديد مواضيع قسم القصص المكتمله
العرض العادي
