ان شاء الله تستمتعون بالقراءه..
..البارت السابع والخمسون..
فتحت الشنطه وانا اسمع حنان تقول بٲحراج""انا قصدي افضفض لك بس""
قلت وانا التفت عليها بٲبتسامه""عارفه بس انا ابغى اساعدك""
اش تفيد فلوس ليث الكثيره
عنده كل الي يحتاجه وزود
وهذي حتى مو لاقيه بيت لعيالها حتى
ابدا ماحسيت بتٲنيب الضمير وانا اطلع الفلوس من الشنطه
وبعدها اسكرها واحطها ع كتفي ومشيت بتجاهها وانا اقول""دقيقه بصرف واجيب لك الباقي قبل يجون البنات""
وحطيتها ع مكتبها وهي تقوم وتقول""والله ماني عارفه اش اقولك و...""
قاطعت كلامها وقلت بٲبتسامه من فرحتها""ماابغاك تقولين شي""
حضنتني وهي تقول بصوت منخفظ""والله ماتدرين اش سويتي لي""
فرحت لفرحتها وقلت بضحكه علشان يتغير الجو""ترا هذي مو عطيه بعد كم شهر بطالب فيها""
ضحكت وهي تبعد عني وقالت""شكرا تاج""
بعدت عنها ومشيت بتجاه الباب وانا اقول""في صرافه قريبه ماراح اتٲخر""
ومريت من مكتب خالد الي كان موجود في مكتبه ماراح اتكلم عن شعوري عنه لانه واضح مايحتاج تٲكيد
طلعت من البوابه الرئيسيه انا مره صرفت من هنا قريب مايحتاج سياره
مشيت حتى وصلتها مااخذت وقت طويل هي قريبه بين الشركه والصرافه بنايه وحده
صرفتها بعد ماطلعت جوالي علشان اعرف الرقم السري
صرفت الي باقي من المبلغ الي تحتاجه لاني اعطيتها ربع بس من المبلغ
حطيتها بالشنطه الفلوس
والصرافه من المبلغ الموجود بهذا الحساب ماراح يلاحظ
رجعت الشركه ولما دخلت قسمنا شفت الجوهره وشوق مداومين
حنان ماتكلمت قدامهم علشان كذا ماراح اتكلم انا
دخلت الحمام بعد ماطالعت بحنان بمعنى تعالي يمكن ماتبغاهم يعرفون وهذي شي بكيفها
وانا راح اعطيها لاني حسيت فيها وبعدين مو من فلوسي علشان كذا مو مهتمه
دخلت وراي الحمام اعطيتها وطلعت بدون مااعطيها فرصه تتكلم
جلست ع مكتبي وتو بحط شنطتي بالارض سمعت جوالي يدق طلعته كان ليث يتصل
رديت بستغراب""ايوه""
تو كنا مع بعض اش يبغى
قال بٲمر حاد""تعالي مكتبي""
قلت""ايش""من طريقة كلامه
قال بصوت مضغوط""تاج تعالي""
قلت وانا اقوم""طيب""
وش عرفه يحس بالخطر هذا الرجال بنفس اللحظه ولا كيف
سكرت الجوال وخليته ع المكتب وطلعت وانا احس بالبنات انتبهو لي
وقفت بمكاني وانا احرك راسي بطريقة لا
اكيد عرف اني صرفت برساله من البنك اش هذا الغباء اكيد بيعرف كيف مايعرف
الحين اش اقول له ماعندي الا اقول له الصدق يمكن يتعاطف معاها وبعدين هي بترجعه الشهر الجاي
مشيت لمكتبه وانا ابلل شفايفي الغلطان هو ليش ماشال الصرافه الصباح
اول ماشافني السكرتير قال""تفضلي ينتظرك الاستاذ""
احس اني اشوفه هنا اكثر من البيت
مشيت بتجاه باب مكتبه وانا اشوفه جالس ع كرسيه ويكلم بجواله
اول مافتحت الباب سكر الجوال وقال بهدوء""وين الصرافه""
قلت وانا واقفه مكاني عند الباب""في الشنطه""
قال بطريقه وضحت انه غصب ماسك اعصابه""ووين شنطتك""
قلت بٲبتسامه غصب عني من طريقة الكلام تذكرت اللعبه الي نلعبها واحنا صغار حقت الفلوس عند العروس والعروس تبغى العيال والعيال تبغى الحليب""في المكتب""
شكل زادت ابتسامتي لعصبيته لانه وقف بقوه
وقال من بين اسنانه""روحي جيبيها""
قلت""اش اقول للبنات اذا شا....""
سكتت لما شفته تقدم خطوه ولفيت للباب وطلعت بسرعه وسكرت الباب وراي
بس رجعت فتحته وقلت""اعطيك واحنا راجعين البي...""
رجعت سكرت الباب بسرعه وانا مبتسمه لما شفته تقدم خطوتين تهديديه
ومشيت وانا اللتفت عليه واقف ومتكتف وواضح عليه العصبيه
دخلت قسمنا بخطوات سريعه اخاف يعصب زياده لما اخذت شنطتي
سٲلتني الجوهره بستغراب""رايحه""
قلت وانا طالعه""لا جايه الحين""
وطلعت قبل مااعطيهم فرصه يتكلمون
قبل مااوصل طلعت الصرافه من الشنطه
ودخلت عند سكرتيره وانا عيوني ع ليث كان جالس ع طرف مكتبه ويطالع فيني لسى ينتظرني الرجال
حطيت الصرافه ع مكتب السكرتير ولما ورفعت يدي معنى سلام
تفأجاءة انه وصل للباب
فتح باب مكتبه وقال بنبرة صوت عاليه""تعالي تاج""
طالعت بالسكرتير الي يطالع بٲوراقه بس اكيد اذنه معانا
قلت وانا ابلع الضحكه""مشغوله""
مع ان الموقف مو مسلي الا انه ضحكني
هو تزوجني وهو يدري ان هدفي الوحيد استفيد من فلوسه ليش معصب الحين
انا مااستغفلته طلبت فلوس وهو اعطاني الصرافه وفي باله ماباخذ شي يعني
قال هذي المره بعدم اهتمام بالمظاهر بعصبيه""تاج تعالي هنا والا انا اجي لك""
حسيت ان قدام السكرتير وفلتت اعصابه كذا كيف لو ادخل
قلت بسرعه""وتخليني اتكلم""
قال من بين اسنانه وهو يفتح الباب اكثر""تاج""
ياربي مشيت لعنده احسن من انه يفضحنا اكثر
لما وصلت الباب اخذ شنطتي من كتفي وحط يده ع ظهري وقدمني
ودخل وراي وسكر الباب وراح بتجاه طاولة الاجتماعات
كذا ماراح يشوفنا السكرتير ارتحت تقدمت كذا خطوه
وبعدها تكتفت وانا اشوفه يطلع اغراضي الي بالشنطه مو يطلع الا قلبها ونفظها
لماخلص قال""وين وديتي الفلوس""
هذا بخيل ماادري كيف رضي بشروطي
قلت بهدوء""اعطيت وحده من زميلاتي هي محتاجه وبترجعها الشهر الجاي""
قال بمسخره واضحه""صدقتك""
حركت اكتافي بدون مااتكلم مو راضي يصدق كيفه واي فلوس باخذها منه من حقي
وراح استفيد منه لاخر يوم بزواجنا عدل وقفته وقال""جيبي الفلوس الحين وجوالك وينه""
والله لو اقول ان ليث كذا بخيل محد بيصدقني
وهو الصدق مو بخيل الا علي يبغى ع اتفاقنا بالتمام
وهو حتى البيت ما اشتراه
قلت بجواب لسؤاله الاخير""في الشنطه""
رجع يفتح الشنطه يبغى يمسح الرقم السري وش عرفه اني ماحفظته للحين
طلع صرافتي ورفعها لي وقال بشر بنسبه لي""خلاص بٲخذها من رصيدك""
عضيت شفايفي لوقت وبعدها قلت
وانا اطالع فيه بعصبيه""حطيت فلوس امي فيها""
قال وهو يرفع حجب""اعطي امك من الفلوس الي الحين سحبتيها""
تقدمت بخطوات سريعه وانا نيتي اخذ الصرافه منه
كل شي الا الفلوس الي لي شهور اجمع فيها ولا راح اسحبها ابدا حتى لو احتجتها بقوه
والحين هذا يبغى ياخذها وفلوسه من كثرها بتوقف قلبه
ويبغى يٲخذ تعبي لشهور
الموضوع معد صار يضحك ولا مسلي
لما وقفت عنده ومديت يدي اسحب الصرافه من يده بعدها بسرعه
وقال بهدوء""الحين فهمتي موقفي جيبي الفلوس""
قلت وعيوني ع الي بيده وقلت""قلت لك اعطيت وحده من زميلاتي""
قال""وليش اعطيتيها مو فلوسك هذي""
نزلت يدي وطالعت بعيونه وقلت""تدري من تزوجنا واحنا ماعندنا موضوع نتكلم في الا الفلوس""
قال وهو بعد يطالع فيني""وليش وافقتي ع هذا الزواج مو علشان هذا السبب""
قلت""الا هو السبب بس للحين مااستفدت شي لو ماتزوجتك كان ماجاتني هذي الانذارات كلها واستفدت اخر الشهر اكثر من الحين عارف""
قال وكٲنه اهتم""السبب تصرفاتك انتي ال.....""
سكت لاني سحبت الصرافه من يده بسرعه لاني كنت منتبه لها ومااهتميت لكلامه
هذي كل تعبي لشهور بدافع عنها بكل قوتي ومايهمني شي ثاني
المهم اخذها واطلع
اخذتها ولفيت بسرعه ناويه اطلع من مكتبه وان فيه خير يلحقني قسمنا
..نهاية البارت..
..عافاكم..
..عجايب..
الحمدلله.

..بأذن الله لي حسنه ولك حسنه..
(اللَّهُمَّ إِنِّي أَصْبَحْتُ مِنْكَ فِي نِعْمَةٍ وَعَافِيَةٍ وَسِتْرٍ ، فَأَتِمَّ عَلَيَّ نِعْمَتَكَ وَعَافِيَتَكَ وَسِتْرَكَ فِي الدُّنْيَا وَالآخِرَةِ)

ان شاء الله تستمتعون بالقراءه..
..البارت الثامن والخمسون..
بس ماقدرت اهرب من مكتبه وصرافتي بيدي
لانه بيده السليمه طبعا مسك عبايتي من عند كتفي وماخلاني اتقدم ولا خطوه
وقال بعصبيه بستنكار""جالسين نلعب احنا""
قلت وانا احاول بيدي اليمين ابعد يده من ع كتفي""صرافتك عند السكرتير""
الحين معصب كل هذي العصبيه علشان هذاك المبلغ بس
وش يقول بعد اتفاقنا بيعطيني مبلغ وقدره اكيد الحين بعد ذكائي لما قلت مو ضروري اوراق واثباتات راح يتسحب من الموضوع بكبره
مااثق فيه ابدا وبعد موقفه هذا زاد يقيني
قال وواضح انه ضاغط ع اسنانه""الي بيدك""
حاولت ابعد يده ولا اتحرك هو بيد وحده وموقفني مكاني
رميتها ع الطاوله من القهر وقلت""ابلعها""
لما ترك عبايتي طلعت من مكتبه بخطوات سريعه
وانا ماره اخذت صرافة ليث الي حطيتها ع مكتب السكرتير اول
والتفت اطالع بليث وانا اتنفس بحده ع باله لما رميتها اني استسلمت
قلت بصوت عالي لليث الي ماشفته لسى مابعد عن طاولة الاجتماعات""الحين بصرف شكرا""
قلت اخر كلمه ممططه ولفيت وطلعت
بروح مكتبي علشان الرقم السري بجوالي
والله لسحب نفس المبلغ الموجود برصيدي وخلي الصرافه عنده يضمها من يحتاجها
دخلت المكتب وانا مااشوف شي ماارتاح حتى اتطمن ع فلوسي
اخذت جوالي وطلعت من تزوجته مااتذكر مره داومت دوام صح كامل يعني
مشيت وانا احس براحه ان صرافته عندي الحين هو الخسران مو انا
ضغطت الرقم السري مثل مو عندي بجوالي بس طلع لي انه احتفظ فيها والصرافه ماطلعت
متى يمديه تصرف
لفيت وطالعت بالشارع والسيارات وانا متكتفه اكيد ماراح يٲخذ الفلوس
هو عنده مو محتاج بس يبغى يقهرني لا الصدق يبغى يعلمني ويذكرتي ان الاتفاق اتفاق
بعد ثواني اتصلت عليه وانا اخذ نفس خلاص بتفق معاه
بس مارد علي ورجعت اتصلت عليه وبعد مارد
رجعت لشركه وانا اطالع بالناس لسى في وقت احنا حتى شهر ماكملناه في وقت
دخلت قسمنا وجلست ع الكرسي وانا اسمع احلام تقول بضحكه""بنجيب لك وحده تساعدك ع الشغل الي مٲجلته من ثلاثه اسابيع""
بس فهمتها ومعاها حق
ركزت ع شغلي اذا رجعنا البيت ان شاء الله تفاهمنا ونتفق ع كل شي
بعد صلاة الظهر سمعت شوق تشهق بقوه كلنا انتبهنا لها قالت بنبره باكيه""لا""
جات لها حنان وهي تقول""اش فيك""
قالت وهي تٲشر ع الجهاز بدفاع عن نفسها""انمسح كل شي والله غلطه بسيطه الحين اش اسوي""
قالت حنان وهي تطالع بجهاز شوق""ماادري والله""
قلت وانا اقوم""ماعليك اعرف الحين ارجع لك كل شي""
قالت الجوهره""تعرفين ليش قد صارت معاك""
قلت وامشي بتجاه مكتب شوق""لا بس من كثر الجلسه عليه اعرف كل شي فيه""
جلست مكان شوق وبعد وقت رجعت كل شي
حسيت بفخر لما قالت شوق""شكرا والله كنت بروح فيها وخري كيف خليني اشوف""
قمت وهي جلست مكانها قالت بعد ثواني""ماخطر في بالي الا عمي هو شغلته كذا يروح للمكاتب يقول شغله مربحه لو انتي مو زوجة ليث ابراهيم كان دليت عمي عليك يستفيد اذا اقسام نسائيه ولا مدارس""
الفكره اعجبتني منجد لو مو متزوجه ليث كان فكرت وانا اذا طلعت من هنا بروح لمشرعي الخاص مابكون فاضيه
رجعت مكتبي وكملت شغلي نهاية الدوام وقفت وانا اتثاوب مانمت امس لاني مع ليث بالمستشفى وحظرته اليوم يخاصم
لما نويت اخذ شنطتي من ع الارض تذكرت انها بمكتب ليث
مااهتميت لان الجوال معاي والصرافه انبلعت
اتصلت ع السايق وطلعت السياره وانا اقول له""اتصل ع البيت انا مااعرف الرقم وقول لهم يجهزون الغدا""
بٲكل واصلي العصر وانام لين اكتفي
ومنجد هذا الي صار نمت قبل مايرجع ليث حتى
بس قبلها اتصلت ع امي بس سلمت عليها وقفلت ماطولت
وارسلت لعبدالرحمن(الحين بنام اذا صحيت ابغى القى لك رساله توصف لي اش صار لك بالضبط)
ولما صحصحت كانت الساعه ثنين وعليها في الليل وليث مو موجود بسريره
اخذت دش لاني لما رجعت ماقدرت اخذ دش نمت وانا اوعد نفسي اول مااصحى
وبعدها طبعا نزلت المطبخ تحت والحمدلله لقيت الخدامه الثانيه موجوده بالمطبخ
قلت بٲبتسامه عريضه""اش اسمك انتي""
قالت بعد ثواني لان شكلها اخترعت""فاطمه""
حرك راسي بطريقة طيب وقلت""جيعانه في شي يتسخن""
قالت""انا سوي لك""
جلست ع طرف الطاوله وقلت""خلاص سويلي اي شي مالي نفس بشي معين""
وهي تشتغل سٲلتها ليش صاحيه الحين وسوناتا وينها
ولما جاوبت اجابات مختصره ع السؤال الاول نامت بدري والسؤال الثاني نايمه معد سٲلتها شي
حلاتها سوناتا تسولف
فتحت الادراج بس فضول اعرف اش فيها
ولما خلصت اخذت صحني وفتحت الثلاجه واخذت عصير منها
ماابغى اخذ من الي حطيتها بثلاجتنا حتى تنتهي هذي
لو سوناتا كان سٲلتها مين يشتري الاغراض واي يوم بالاسبوع ولا بالشهر
وطلعت فوق وجلست بالصاله بعد ما دخلت الغرفه اخذ جوالي لما فتحته شفت الساعه كانت اربعه ونص تقريبا وفي رساله
فتحتها من عبدالرحمن مكتوب فيها(توك تسٲلين)
ايوه صح مو اول دوام له قبله داوم يحمد ربه سٲلت عنه هو مايسٲل عني
انشغلت بجوالي حتى جاء وقت الدوام
دخلت الغرفه لما شفت سرير ليث تذكرت معقول هذا الرجال
جاء متٱخر اكيد وطلع قبل الساعه ثنين وين يروح هذا الوقت
ولا يمكن مارجع اساسا
بس كيف بعرف انه جاء ولا لا وسريره واغراضه مرتبه لو انه استخدمها
راح اسٲل سوناتا بعد مااتجهز
نزلت تحت اول ماشفتها وقفتها وانا اقول""جاء ليث البيت""
قالت""ايوه يجي قبلك امس وسافر""
قلت""يعني شفتي معاه شنطه ولا هو قال بيسافر""
قالت بنفس طريقة نطقي""قال""
ابتسمت وقلت""قال لك طيب متى بيرجع""
حركت راسها بطريقة لا
قلت""هو لما يسافر بالعاده يغيب كم""
قالت""مايعرف""
وسافر وصرافتي معاه خليه يرجع وبنتفاهم
اعرف انه مايحب كثرة الكلام والازعاج وهذا بيكون اسلوبي حتى يعطيني صرافته والرقم السري بجلس ع راسه
داومت ورجعت متٲخر اليوم
مريت مطعم بعد مااخذت رقم البيت من السايق واتصلت فيهم وقلت اني بتغدا برا وبجيب لهم معاي لا يطبخون
وقلت لسايق يحاسب هو و ع حساب ليث ويحسب لنفسه
بدون كلام نزل شكل يعطيهم للاحتياط وانا الي هي زوجته مو معاي
غصب مسكت نفسي كنت بقول كل الي في المطعم ع حسابي
رضيت نفسي بالسبات الي اطلقتها ع ليث
انا قلت اجرب ماكنت متٲكده وطلع معطيهم وانا لا وحتى صرافتي عنده
رجعت البيت ولسى ليث مارجع ماادري متى بيرجع هذا الرجال
حسيت نفسي فاضيه ومامعاي النوم اتصلت ع امي وقلت لها""وش رايك نطلع نتمشى شوي""
قالت""لا ابوك تو راجع""
قلت""طيب اذا نام""
قالت بقلق واضح""لا مابطلع احسه تعبان هذي الايام""
قلت وانا ارجع ظهري""من الشغل""
وسمعت خوفها وطمنتها كذا مره
وبنهايه قلت لها""طيب وديه المستشفى علشان ترتاحين""
قالت بتنهيده""مو راضي ياليت والله طيب اتصلي عليه واقنعيه""
حسيت ان مالي دخل بالسالفه مو كٲنه ابوي ماادري ليش تعودت ان صلتي الوحيده بٲبوي هي امي مو علشانه ابوي
قلت""خلاص بكره اكلمه اذا لسى حسيتيه تعبان يمكن بس ارهاق خليه ينام بس اليوم من بدري""
بعد ماسكرت من عندها طالعت بالتلفزيون شوي
وبعدها دقيت ع ليث كذا فضاوه بس انتظرت لنهاية الاتصال ومارد
ورجعت دقيت عليه بعد كم دقيقه ومارد بعد
للحظه قلقت عليه يمكن رجع تعب ودخل المستشفى ومحد عنده
بس بعدها بثانيه ابتسمت يازيني ياناس بتحدى امي بقلقها ع الفاضي و ع مين ع ليث تركت الجوال..
رجعت من الدوام وانا مقهوره لو ادري انه بيجلس ثلاث ايام كان سافرت معاه
انا ماعمري سافرت علشان كذا ودي انا بعد اشوف الدنيا
اساسا لو ادري انه مسافر حتى مايرد ع رقمي
بعد اسافر معاه
لما قلقت عليه سٲلت السكرتير عنه وقال انه تو اتصل يطلب ارسل له اوراق ع ايميله
وهو فهم من سؤالي ان اليوم مو من يومين
المهم انه بخير والباقي اش دخلني فيه
لما دخلت البيت شفت سوناتا طالعه من المطبخ قالت""الاكل جاهز""
قلت بحماس""تمام بٲخذ اسرع دش ونازله""
وطلعت بخطوات سريعه خلال هذي الفتره كنت جالسه مع سوناتا وقربت منها
و كل مااتصل بٲمي تشتكي لابوي وتقولي تعالي شوفيه وكلميه يروح المستشفى
وعبدالرحمن ماكلمته ولا ارسلت له وهو بعد شكله مشغول بٲثبات نفسه قدام البنت وابوها
نزلت اكل تحت مع سوناتا ع الغدا دق تلفون البيت
قامت سوناتا وردت عليه بعد ماردت قالت وهي تمد السماعه بتجاهي""يبغى انت""
انا مين الي يكلمني ع التلفون
امي وعبدالرحمن مايعرفون رقم التلفون اكيد ليث
مايرد علي لما ادق عليه والحين يتصل ع البيت ويطلبني اش قصده
غصب تحركت ومشيت ع اقل من مهلي خلي ينتظر واذا مااعجبني كلامه سكرت
اخذت السماعه وقلت ببرود""الو""
سمعت الطرف الثاني يقول بعصبيه""وينك عن جوالك لي ساعه ادق عليه""
قلت بٲستغراب كبير مره وانا معقده حواجبي""عبدالرحمن""
اش عرفه برقم البيت وليش هذا الاصرار يدق كذا مره حتى اخذ رقم البيت
وجوالي فوق علشان كذا ماسمعته
قال""ايوه وينك انتي""
ويني انا
وانا اكلمه من تلفون البيت الي هو دق عليه
مشغول فكره بٲيش
قلت واستغرابي يزيد وبصوت منخفظ وانا انتظر اعرف اش صاير عنده""في البيت ليش""
قال بنبره سريعه""تعالي مستشفى الي قريبه من بيتنا""
سكتت ثواني استوعب كلامه
مستشفى
قلت بعدها بهمس خايف""ليش""
قال""ابوك منوم تعب وجبناه وامك مو راضيه تهدا تعالي بسرعه تعبت معاها""
..نهاية البارت..
..عافاكم..
..عجايب..
الحمدلله.


..بأذن الله لي حسنه ولك حسنه..
(سعة بيوتنا بزيادة مساحة الأرض ولكن سعة قبورنا بزيادة مساحة العمل الصالح لذا""وَتزَوَّدُوا فَإِنَّ خَيرَ الزَّادِ التَّقوَى"" .
الضحى)

ان شاء الله تستمتعون بالقراءه..
..البارت التاسع والخمسون..
ابوي في المستشفى
بس اول شي جاء في بالي صراحه ردة فعل امي لما تعب عندها
قلت وانا اطالع بسوناتا الي جالسه وتطالع فيني""اش فيه""
قال""مافي شي يخوف هبط ضغطه بس امك اش اقول الله يهديها بس مو راضيه تصدق تعالي انتي وفهميها""
اخذت نفس
بس انهبط يعني بيرجع مع امي البيت اليوم وتطمن عليه ان شاء الله
قلت""خلاص جايه بس في اي مستشفى(قبل مايرد تذكرت انه قال الي قريبه من بيتنا كملت)ايوه تذكرت متى وديتيه المستشفى طيب""
قال""تعالي انتي بس واسٲلي امك ماادري ليش خايفه كذا""
قلت""جايه يلله""
وقفلت مانفسي ابدا اروح واشوف امي بهذي الحاله
وانا مااعرف كيف اهديها هذي امي مااقدر اشوفها كذا
بس لازم اروح وبعدين منجده عبدالرحمن ماادري ليه خايفه الموضوع سهل
قلت لسوناتا وانا طالع الدرج""كلمي السواق يجهز السياره بروح المستشفى ابوي تعبان شوي""
انا متطمنه ع ابوي بس قلقانه ع امي
هو مجرد احساس انه تعبان وهي مشغوله منه كيف الحين
لبست عبايتي واخذت جوالي الي لقيت فيه خمس مكالمات من عبدالرحمن
وحطيته بجيبي وانا نازله
لما فتحت باب الشارع سمعت اذان العصر
قلت لمحمد يروح يصلي وانا بعد بصلي وبعدها نروح
بيني وبينكم كان هذا سبب علشان اتٲخر
الا المستشفى قريبه وتو اذنو يمدينا نصل اذا وصلت وهو يلحق الجماعه اذا يبغى
بس ابغى اتٲخر علشان مااصل المستشفى الا امي تكون تطمنت ع ابوي وهديت وارتاحت
ماابغى اشوفها كذا ابدا
ورجعت طلعت فسخت عبايتي ووضيت وصليت ونزلت بعد مالبست عبايتي
وانا افتح باب الشارع راح انتظر السايق برا
الجو بدا يتحسن واقدر اتحمل خمس دقايق
سمعت جوالي يدق كان عبدالرحمن ان شاء الله انهم خلاص راجعين البيت
رديت اول مافتحت قال عبدالرحمن بعصبيه""وينك انتي تٲخرتي ولا ماتبغين تجين عند امك تريحيني وانا من رجعت وانا واقف هنا شوي ويبدا دوامي ماابغى اتٲخر يلله تعالي ولا انا بروح واخليها وحدها""
ماادري كيف قدرت انتظر يخلص كلامه
قلت بحقد""قول كذا انك تبغى تروح في الوقت ياموظف ياملتزم ياقدوه ع فكره لو تقول له انك مع اختك في المستشفى بتكبر بعيونه اكثر بس احنا مانحتاجك توكل انا الحين جايه لها""
وقفلت ال(سبه)الجازي لا اقصد الفلوس اهم عنده من اهله ال(سبه)
اتصلت ع جوال امي ابغى اقولها اني جايه و ع الاقل وانا بعيده عندها
يمكن اقدر اهديها شوي
وردت علي جدتي قالت ان الجوال في البيت وتسٲل عن اخبار ابوي
قلت لها اني رايحه لها بالطريق
قفلت وانا اشوف السياره جايه عدلت طرحتي وطلعت السياره وانا اقوله اسم المستشفى
لما وصلنا نزلت وانا اخذ نفس ان شاء الله ان امي تطمنت ع ابوي
منجد شايله هم اشوفها كذا
انا اعرف كيف هي تحب ابوي وعندها عن كل الدنيا وكيف بعد تبالغ
دخلت المستشفى وانا مو عارفه وينهم
فٲضطريت ارسل لعبدالرحمن وينكم
بعد شوي جاتني رساله برقم الغرفه بس
سٲلت عنها ولما وصلت للممر الي فيه الغرفه
شفت امي جالسه ع الكرسي وحدها
راح عبدالرحمن منجده وتركها وحدها ال(سبه) مو قادره اوقف الحين عن سبه
طالعت بٲمي بتركيز اشوف كيف حالتها
كانت مرجعه ظهرها ومتكتفه
بس بعد ثواني وقفت ظهرها ووشفت ليث جاء من ممر ثاني واعطها كوب بيده السليمه وجلس جنبها
ليث
اش جابه مو مسافر وكيف عرف
من غير شعور قارنته بعبدالرحمن وطبعا معروف من الي فاز بالمقارنه
تقدمت بخطوات بطيئه وانا اطالع بٲمي بتركيز
الحمدلله شكلها هاديه
بس اول ماللتفتت علي امي وقفت وجات بتجاههي وهي تقول بصوت باكي""انا السبب من اول حاسه انه تعبان ولا وديته المستشفى حتى طاح بين يدي والله اني السبب""
حضنتها وقلت وانا اشوف من فوق كتفها ليث الي وقف اول ماوقفت امي وهو يطالع فينا""لا تخافين عليه مافيه شي كبيره تعب ويروح""
ماعرفت اش اقولها غير كذا
المفروض ماتحس بتٲنيب الضمير لانها كلمته كذا مره هو الي رافض
بس اش اقول بطيبة قلبها وحبها له
قالت بصوت يرتجف""ان شاء الله""
وتمت وقت ترددها بدعاء وهي تبعد عني وترجع تجلس ع نفس كرسيها والكوب لسى بيدها
مشيت معاها وانا اخذ نفس
وجلست ع كرسي ليث الي بعد عن الكرسي ووقف مقابل لنا ومتسند ع الجدار
مسكت يد امي وحطيتها ع رجلي ان شاء الله
قال عبدالرحمن هبوط ليش خايفه
رفعت عيوني لليث ولقيته يطالع فيني
قلت بٲمتنان له حقيقي لوجوده هنا""الحمدلله ع السلامه""
..نهاية البارت..
..عافاكم..
..عجايب..
الحمدلله.


..بأذن الله لي حسنه ولك حسنه..
(نبحث في جيوبنا عن أقل فئات النقود كي نتصدق بها ، ثم نسأل الله أن يرزقنا الفردوس الأعلى ، ما أقل عطايانا وما أعظم مطلوبنا ! #الطنطاوي*)