كاتب الموضوع :
لولوھ بنت عبدالله،
المنتدى :
القصص المكتمله من وحي قلم الاعضاء
رد: بات من يهواه من فرط الجوى، خفق الاحشاء موهون القوى
اقتباس :-
المشاركة الأصلية كتبت بواسطة طُعُوْن  |
بما اني تو اكتب التعليق ومدري متى اخلص منه
فـ اقول صباح/ مساء الخير..
البارت الـ 45
سلطان.. و مثل ما قال فارس فايح " ويكفيني دفا صوتك عن الأصوات، و احس انك هنا.. لو كنت يا بُعدك"
بدري الشيخ تو تتذكر شرط ناعمة وتفكر بأسبابه..خذاك غلا شميمي واخوها😂😂
ناعمة.. كلامها لـ موزه جميل.. بس ماش ماهو عاجبني الشرط ابد.. مو حلو يضغطون عليها ويخلونها تدخل البيت وهي لسى مو مستعدة نفسيًا.. يمكن الخطوة ذي والشرط ذا هو اللي يرجعها لحالتها قبل هذا اذا ما تدهورت حالتها اكثر.. اهم شيء نفسيتها اذا كانت متقبلة او لا..
ولا كمان طلعت متفقة مع شما وحاطين الشرط ذا خطة ..
موزة.. وافقت تحت ضغط عواطفها.. ما اخذت فرصة لتفكر وتقرر.. على طول من كلمتين من ناعمة وافقت..
شيخة.. الصدق من قريت وصفك للمشهد اشتقت اروح مكة ولا كمان فوقها اجواء رمضان يالبييييه..
بس عاد ولا جا ببالي ابد انو تقابل ناصر هناك..
ربّ صدفة خير من الف ميعاد.. وهذا هي الصدفة جمعت بين اخته وشيخة وخلّت اخته تتسلل من بين اسوار قلبه لحد ما دخلت غرفة قلبه ولقت شيخة متربعة فيها على كرسي مرصع بألماس<< كنت بقول ذهب بس عشاني ما احب الذهب غيرتها لألماس😁.. وكمان بفضل الصدفة نقول جايين قريب يخطبون شيخة لناصر..
وقت قال ناصر انو شيخة كبر بنته كذا لا ارادي قلت ياكبرها🙆 حسيته تزوج وهو ورع عمره 15😂
حنان.. دا انتي حتتنيلي بستين نيلة واللهِ..
اعيد و اكرر " التم المتعوس على خايب الرجا"
لما كان زوج لـ عوشة كانت تشوف فيه الزوج المحب المخلص.. بس لما شافته يضرب عوشة ليلة موتها شافت فيه الزوج المغدور في الظهر والمطعون في القلب.. اما مكالمتهم الوحيدة هي شافت فيه الرجل الحاقد و الناقم والمنتقم لكل ألمه.. فـ طبيعي تتخبط بين شخصياته الثلاث ولا تستقر لها على وحده..
لأن من بين الشخصيات الثلاث الشخصية الوسطى هي المسيطرة.. بحيث تقمع وتدفن الشخصية الأولى و تدفع الشخصية الثالثه وتزودها بشرارات لتندفع وتصير قوّتها قريبة من الوسطى.. ولازم بين كل فتره وفتره تطلّ الشخصية الأولى..بس عاد نشوف اي شخصية منهم رح تنتصر في النهاية وتاخذ موقعها الصحيح..
أحمد.. هذا البيت يمثله " أصيحُ و السيفُ مزروعٌ بخاصرتي
و الغدرُ حطَّم آمالي العريضاتِ .."
لـ حسن المرواني*
حارب.. مثل ماقال نزار " بين العواصم أنت الآن عاصمتي، وللجميلات تاريخ كما المدن"
بطي.. انا اشوف انه شايل بخاطره كثير على سلطان.. بس انو ينهي صداقتهم مستحيل.. كلماته الحين عشان جرحه توه طري.. اصبروا عليه لين يلتئم شوي وتشوفون رح يخفف من حدة كلماته.. يعني انا اشوف في امل كبير منه.. بالذات انو خاف يصير لسلطان شيء.. ووقت رد على سلطان كان ينتقم من خوفه عليه وهو " كارهه" حاليًا.. و المفروض انو يتفهم موقف سلطان اكثر بما انه حاليًا جالس يمر بنفس الموقف وبيخبي على اهله واذا عرفوا بيلومونه انه سكت.. يعني اكيد سلطان ماكان مستانس وهو يخبي عليهم .. ومثل ما شاف انو سلطان متآمر معهم اهله بيشوفونه متآمر مع سلطان واللي معه..
رفعة.. اتخذت اول خطوة.. واللي هي اتوقع دقت على رقم روضة.. بس بما ان روضة في مكة اكيد رح يطلع لها مغلق..
أليازية.. تخلّصت من آثام الماضي.. واقول عنها ماضي لأنها بتوبتها انولدت لها حياة جديدة..
حلو انو امون سامحتها.. مع اني احس لو انها ما لمست الصدق بكلام اليازية وبكاها ماكان سامحتها.. بس " عفا اللهُ عمّا سَلَف"
سلطان.. هب عليه يومين راقد.. ياخي سلّفني ساعتين والا اربع ذبحني الأرق😁😁.. والله هذا اللي قالوا لا رقد رقد🙆🙆
انا ما الوم بطي على كلامه الحين ابد.. ماعنده الا سلطان يقدر ينفث سم كلماته عليه.. مع انه لو يتعوذ من الشيطان ويصلي له ركعتين ويطلب من ربي يصبر قلبه كان احسن له..
شما.. " خبئني في يدك اليمنى، خبئني في يدك اليسرى لن أطلب منك الحرية، فيداك هما المنفى، وهما أروع أشكال الحرية" * نزار قباني..
سلطان.. " أيتها البحرية العينين، و الشمعية اليدين، و الرائعة الحضور، أيتها البيضاء كالفضة، والملساء كالبلور، أشهدُ أن لا امرأةً على محيط خصرها.. تجتمع العصور، و ألف ألف كوكب يدور" * نزار قباني..
ياهوووه البنت انفلت لسانها الحقووا عليها.. قلنا من هرموناات الحمل بس ما هقوتي الهرمونات تسوي كل ذا🙊
البارت الـ 46
حصة.. يعني انا مدري ليش يمنعون البنات من بيوت ازواجهم قبل يصير الزواج.. قصدي ايش الحكمة منها..!
عالعموم.. انا انقهرت من فلاح كيف عاد حصة..! هذا وهو مافيه حيل وتعبان و بغى يجغط خشمها..
ووجع ان شاء الله.. حقييير.. يعني ايش شافت منه عشان ما تتكلم عليه.. ولا فوق كذا يبيها تعتذر..
بالله خلوني افكه بصحراء ويهجمون عليه الذيابه ويرمونه ببير ماله قاع😠😠
وما اهتم الا انو عيونه زي عيون البومه.. صدق عقله عقل طفل.. الله يعين حصيص عليه..
ايش ذا يطلع مرجلته على بنت.. اعوذ بالله الله يخارجنا بس..
حارب ومذكرات سعيد.. يختي متى حلم حارب بأبوه..! حاولت اتذكر بس ماش.. ياليت اذا تتذكرين تعطيني رقم البارت..
منيرة.. "ابتسمت منيرة بمكر وهي تعيد قراءة الرقم من جديد .. وهمست لنفسها: اكيد ان شاء الله بنزوركم .. وبنشل بنتكم بعد .." ذكرتيني يوم رحنا نخطب صديقتي لولد عمي نفس الكلمة قالتها بنت عمي لنا واحنا طالعين ههههههههههههههههههههه..
نهيان.. سلطان.. ابراهيم.. صراحة مكانهم يخوف.. وابد ما يجي على بال ديرفس وجماعته انهم بيسكنون ببيت زي كذا ومكانه خطير.. الصدق توقعت يستأجرون لهم بفندق..
نهيان.. و زي ماقال فارس فايح "معاك بصحوتي والقاك برقادي
عشقتك بينهم في شرّك وخيرك
انا وحلو القصيد وعطرك الهادي
ثلاث اشياء.. مانصلح لأحد غيرك."
حارب.. وقت وصفتي شكله بالبدله الرسمية والنظارات وهو يهز راسه كأنه ابله جا ببالي صورة ممثل هندي يعني مو نفس مواصفات حارب ولا تقريبيه منه بس عشان النظارات وهزه لراسه😂😂 المهم كنت بحط الصوره بس ماعاد لقيتها😂😂
كمان عندي صورة تقريبيه لـ غلام خان وجماعته تبين تشوفينها 😂
بس اهم شيء انو ديرفس سكّت هذاك مساعد غلام خان.. النكبة صدق لو كان قد تعامل مع هذاك الهندي مدري وش اسمه😁
العنود.. "
يبه شلونك ؟؟ تبي تدري عن اخباري ؟؟
عن افكاري وتذكاري ؟؟
اشيلك داخلي جمره ..وبعيون الحزن عبره..تغرقني .. وتحرقني..
اشوفك نجمة تجبر..مراعيها .. يراعيها..
واشوفك للرجوله اسم..اذا شد الزمن تقسى..واحلم من معاني الحلم..احسك مقبل بكرى..وعيا لايجي بكرى !!
يبه تذكر زمان مر؟؟
يبه تذكر مجالسنا ؟
مقلطنا ومجلسنا ؟
وحارتنا ومسجدنا ؟
يبه تذكر هدايا العيد ؟
صلاة العيد؟ وبشت العيد؟
يبه تذكر سوالفنا ؟
لاجل هذا ..
وكل هذا ..
اقول اليوم يايبــه ..
ملــــــــــــــل هالكون من دونك
يبه وينك ؟؟ .... ولهت لنظره من عينك ....
يبه وينك ؟؟ اشوفه طوّل غيابك !! ... و من ودّاك .... ما جابك !! سؤالي عنك يالوالد .. صار كما الموال
و اشوفه طال ... والله طال ..
حزين .. بلحنه و حروفه ... يخاف .. يموت من خوفه ... و قلب ٍ كان اقوى قلب ... ضعف .. من قسوة ظروفه ..
يبه ..
ارجوك علمني ...
تشوف اللي انا اشوفه ؟؟
انا اشوفك نهار و ليل ...
في وسط المجلس تصلي .. و تدعي الرب ييسر لي ..
يبه ..
ما عاد بي من حيل .. وين الحيل ؟؟
و انا اشوفك نهار و ليل .. مع اني ادري ما ترجع !! غريبه .. بعدها تدمع .. عيوني من هموم البين !! .... و ادريبه مكانك وين !! ... مع َ هذا .. ارد و اسأل !! يبه .... وينك ؟؟
يبه.. كل جرح في الدنيا .. مصيره بالدوا يلتم ... و لكن البلا من جرح ..
نزف فرقاك ... بليّا دم !! ... و هذا الفرق في جرحي ... عجز يلقا الدوا دكتور .. انا جرحي غريب الطور !!!
ينزف ... بس بليّا دم .. و زاد الهم فوق الهم ... و دام انك يبه غايب ... جروح الغيبه ما
تـلتم ..
يبه .. ذكراك تفرحني ....
في نفس الوقت تجرحني !! ... لا من جبت في طاريك ... دموعي غصب تفضحني ....
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هـالناس .. كل ٍ كان في بيتك ضيف ..
الا يا حيف .... الا يا حيف ..
زمن قاسي .. زمن قاسي ...
اخذ مني بلا رحمه ... اخذ مني اعز ناسي !!
و خلاّ لي سهر هالليل .. في عيني ضيف .. الا يا حيف !! "
لـ الشاعر " مسفر الدوسري"
سيف.. ايش كان يتوقع من العنود.. تخليه يطبطب عليها وهو مابقى مكان فيها ما جرحه بكلامه وافعاله..! عجيب والله..! وايش
عذره..؟ انها قوية وعنيدة وقوتها تستفزه..! عذر اقبح من ذنب..
حنان.. ماعاد قدرت تتحمل الهم لحالها وقالت لناعمة كل شيء.. بس عندي احساس انو ليلتهم الأولى بتكون نكدية بالمرتبة الأولى..
اتمنى تكون اقتباساتي عجبتك.. لأنو الصراحة جوي شاعري حاليًا و لقيت نفسي اختار واحطها للأبطال..
و ان شاء الله يكون تعليقي عجبك واسعدك مثل ما اسعدتينا بالبارتين..❤❤
|
يسعدلي صباحج ومساج يا طعون يا بنت أبو طعون ...
شو هالجمال والحلاوة كلها .. لا لا ماروم انا .. قلبي الصغير لا يتحمل ..
محلاج ومحلى تعليقاتج الكافية والوافية والرائعة ....
سلطان .... اخ .... من وين يبتي هالشاعر الرقيق ...!!! من وين ها شو اسمه الكامل من أي بقعة شو من قبايل خبريني طحت في هواه خلاص بسير اخطبه ....
ههههه خذاه ونهبه وسلب قلبه وعقله وكله ....
ناعمة .... معاج حق من ناحية ان الشرط ممكن يخلي حالتها تردى اكثر .. بس اممممم .. منو يعرف .. يمكن بيصير شي يفوق التوقعات والظنون بخصوص حالتها ....
موزة ... صحيح ... وافقت وهي تعيش الخوف والرعب والتخبط ...
شيخة ... ونحن اشتقنااااا ... ربي يرزقنا ويرزقكم عمرة قريبة او حج ...
هههههههههههه وصفج لـ موقف منيرة مع اخوها ناصر عجيييييب ....
هيه يختي .. حسسنا ان الشيب مالي راسه ويمشي على عكازة ... توك شباب يا نويصر ليش هالبؤس كله ...!!!
حنان ... على فكرة حللتي حالتها بطريقة عجيبة ... برافو .... حنان انعجبت في احمد الزوج المخلص والمحب ... وانصدمت منه وخافت يوم شافته في دور القاسي المغدور اللي يضرب حرمته .. وعقبها بغضته وكرهته يوم شتمها واهانها واهان اختها ....
والباقي مثل ما قلتي تماماً .. احييج على طريقة تحليلج ...
احمد ... يالله .. هاي من قصيدته انا وليلى ... اعشق آخر بيت من القصيدة يوم يقول
من لي بحذف اسمك الشفاف من لغتي
إذا ستمسي بلا ليلى حكاياتي
قصة هالقصيدة مؤثرة وتصيحححح .... خسارة ما عنده قصايد ثانية منشورة ... مبدع هالانسان فوق الخيال ...
حارب .... يا ولد ...... على العوق يا طعون .... تسلملي ايدج ويسلملي حسج المررررهف ...
بطي ... صحيح كلامج ...
رفعة .... خطوة ما اكتملت للأسف ...
اليازية ... الله يهديها دوم ويثبتها على درب الخير والصلاح ...
سلطان ... ههههههههههههههههههه مسكين خلوه يرقد ويرتاح ما ذاق النوم من زمان ...
شما .... فيداك هما المنفى ..... يالله يالله .... طعون انتي ناوية نية شينة على قلبي صح .....!!! خفي علي قلبي ما يتحمل كل هالجمال
سلطان .... اخ بس .... لنا الله بس ... عزابية انا يا بنت ارحمي حالي ..
حصة ... هههههههههههههههه العادات والتقاليد وقت الزواج تكون اغلبها صارمة وما ينلعب معاها .... انتو عندكم جيه بعد ولا ...!!!
فلاح .... ههههههههههههههههه ما يقدر يتحكم بعمره جدامها .. يحب يسكتها ويسكت لسانها الطويييل ....
حارب ... هموسة ما قصرت راوتج الموقف المطلوب .. شكرا هموووستنا ...
منيرة ... هههههههههههههههه حلوة حلوة .... احب البنات الماكرات اللذيذات ....
نهيان/سلطان/إبراهيم .... لازم يكونون حذرين باختيار كل شي حتى مكان الاختباء والتجسس ..
نهيان .... هالشاعر أبا اسم امه ... عندي معاها جلسة محترمة .. جلسة بريئة لا تفهموني غلط ههههههههه
برافو اختيارج ولا اروووووع ... ما شاء الله عليييج ...
حارب .... هههههه صدق ...!! عاد خيالج يوم يشطح يشطح وبقوووووة لووووول ....
العنود ... يالله ....
اشيلك داخلي جمره ..وبعيون الحزن عبره..تغرقني .. وتحرقني
اشوفك نجمة تجبر..مراعيها .. يراعيها..
واشوفك للرجوله اسم..اذا شد الزمن تقسى..واحلم من معاني الحلم..احسك مقبل بكرى..وعيا لايجي بكرى
........
و خلاّ لي سهر هالليل .. في عيني ضيف .. الا يا حيف
يالله يالله ..... روعة يا بنت ... اثرت فيني وبقوة ....
سيف .... هيه والله .... لو بس يصحى من غفلته ويطلع من قشرة القسوة اللي عايش فيها ..... الله يهداه بس ..
حنان ... احم ..... جهزوا ادوية الضغط من الحين .. ههههههههههه بسم الله عليكم حبايبي ...
اقتباساتج خياااااااال خياااااااااااال خياااااااااااال .... ذائقتج الأدبية ابهرتني والله .... ما شاء الله علييييج .....
واسعدتيني اكيد ... كيف ما تسعديني وانتي طعون الحلوة ....!!!!
الله لا يحرمني منج يالغلااا ولا يحرمني من دخلتج علي .... احبج يا عسل بات من يهواه ....
صافي محبتي/ودي ....
|
07-05-15, 03:49 PM
جديد مواضيع قسم القصص المكتمله من وحي قلم الاعضاء
العرض العادي
