السلام عليكم ورحمة الله وبركاته
يسعدلي صباحكم جميعاً
صباحج فرحة وسعادة ماتفارق محياج لولوة الجميلة

بارت دسم ماشاء الله عجبني وايد . . مفرداته لفتتني وايد . . شكرا للأبددد

نيي للأبطال:

حارب طحت ومحد سمى عليك سبحان الله كيف الصدف تلعب دور في مواقف الحياة
تخلي الواحد يحس أن صدق لازم يتيمع أو يرتبط بالشخص اللي يتصادف معاه
مب شرط زواج أو صدف بين ريال وحرمة لا قصدي بشكل عام . .
مرات الصدف تهدي خفقات قلوب وتريح بال مهموم
*تفلسفت حبتين بس أنا انسانه تعشق الصدف ووايد لها تأثير في حياتي*
حارب ماشاء الله عليه رريال نشمي ماتطوفه ولا تفصيلة صغيرة . . قدر أنه يحل الموضوع
بسرعة بديهته وبقلبه اللي يره هالمرة . . يمكن لو واحد ثاني جان ماستوعب أنه عنده قهوة في السيارة
وممكن أنها تحل مشكلة، فاهمه عليه؟ وأعتقد هالشي بحكم شغلهم

فطيم انعجبت برجولته مالومها . . من جي أقولج نبى من حارب سنبل ههههههههه
ناعمة لو أنها مكانها بخاف بالقو من الصدفة القوية هاي بس بحبها
أتوقع أن تأثير هاليوم بيكون كبير في داخلها . . الحب وسواياه يالولوة او يمكن الأعجاب بالشخص وسواياه !!

ياحرااااام ليش ياسلطان شما مب ضاريه على هالقساوة عورت قلبي
دوم الشمات طيبات زيادة عن اللزوم ويتلومن بسرعة *ع كيفي :)*
بس جد عورت قلبي ماتوقعته يكون معصب لهاي الدرجة بعد مااختفى يوم كامل توقعته هدا يعني
بس أكيد جرحه هو اللي غالب عليه ومايخليه يسيطر على تصرفاته . .
حليلها راحت ترقد في المطبخ وهو راح يتفقدها . . بس برافو عليها سوت الريوق ولا جنه شي صاير
مب أقولج كل الشمات طيبات اسأليني أنا ههههههههه
علاقتهم أحسها بدت تروح عنها الغشاوة أحس قريب كل واحد بيصارح الثاني
الحب موجود وهذا المهم

ميرة فديت العقل ياناااااس . . رايها عن الحب والزاج عجبني مايبين أنها صغيرة

حصة مع أبوها . . حبيت حبيت حبيت سبحان الله البنت كبيرة قدرها كبير وغريب عن الاب
لو شو ماكان قاسي عليها . . زين أنه انقشع الزعل وتصافت القلوب

بو سيف حس أن في شي صار بين أحمد وعوشة . . عجبني أحمد أنه مارمس سبحان الله مب كل شي ينقال
في أشياء لو طلعت تجرح القايل أكثر!!

ماتتصورين شكثر موقف سيف أن هو اللي يبى يدخل المليج صوب خواته أثر فيني
يالله جد جد تأثرت وحبيت الشي وايد أن يعني مايبى حد يخلفه عن دوره الرئيسي

حليله عبيد الكبير طلب من نهيان أن اييب عبيد عشان يسلم على الرياييل
مؤثر الشي 

بطي اتوقع بيسوي شي ماحصلش دام عرف أن حرمته تتحرا أن عرس عليها
هههههههههه الله يعينها من الغضب المكتوم

تسلمين يا أحلى لولوة في الدينا . . الله يعافيج قد ماتسعدينا
بنفتقدج وايد وبنفتقد الرواية :(
على فكرة أنا أول مرة أعلق ع روايات وجي . . لفتتني روايتج وايد قلت مايصير ماعطي رايي وأشكرها
وجان نتجرأ ونعلق من البداية وجي يعني :) وحبيت التجربة وايد

تقبلي مروري حبي