كاتب الموضوع :
اسطورة !
المنتدى :
القصص المكتمله
رد: لو سألتي الورد وهو ما بين إيدك أقطعك بيقول لك عمري فداك الكاتبة / ضحكة قهر
البارت الثاني
مدخل :/ ان قلت اوصف لي الشموخ
..... .. ليه اوصفه .. هذا انا
.
ولا انت من كثر العلو
....... مفروض يسمونك سما
.
.
سما سما
سالم سيار.
بعد صلاة العصر كل الاغراض بالسيارات بقي يركبون.
نزلت وعد اللي تمنت انها ما تروح التقت عيونها بعيون ابوها وعلى طول شتتها ماتبي تناظره م راحت تسلم عليه كانت تبي تعرف انها زعلانة عليه مشت من عنده لكن ابوها مسكها ناظرها و هي م رفعت عيونها : ما انت مسلمة علي.؟
باست راسه ببرود ناظر بخدها اللي للحين مزرق من ضربته تسحبت منه وطلعت تركب سيارة احمد.
..
جالسين البنات برا طاقينها سوالف وقهوة.
جود : ابوي جايبنا هنا يقاله تغيير جو يعني.
سها : هههههههه ذكرتوني يوم العشاء حسيت ابوي عارف اني اكذب مسويه اني سعيدة بالجية هنا.
دانه : ليش م انتبهتي لابتسامته كأنه يقول ترى ادري انك تكذبين بس بمشيها بمزاجي.
سها : اهم شي مشاها لي ما سوا لي سالفة.
نهى : وعد.
وعد اللي حاطة السماعات باذنها وتسولف مع زميلاتها:......
نهى : وعــــــــــــــــــــــتد.
رفعت راسها تناظرهم و شالت سماعة وحده فيه احد يناديني.
نهى اشرت لها بيدها : ايه أنا.
ناظرتها وعد : نعم.
نهى : كل الخوات يتهاوشون احنا مو اول ناس لا تشيلين بقلبك علي انا ما قلت لابوي بالعكس حاولت انه م يدري, انا مستحيل ارضى تنضرين بسببي.
وعد : ادري انه مو أنت واللي صار صار وانتهى.
نهى ابتسمت : يعني مو زعلانة علي.
وعد : اذا ما عاد قلت اني عاطلة باطلة برضى.
قامت نهى وحضنتها : ادري ان قلبك طيب واحاول اني م اقولها رغم اني تعودت عليها.
ناظرتها وعد بنص عين : لا يا شيخه.
نهى : اقول ويش رايكم نتسابق.
سها : يا رباه على الفكره بنجلط من الوناسة اللي بتجيني من وراها.
جود : الناس تقول نسافر نسوق سيارة مثلا من غير م احد يدري مو نتسابق.
دانه : مجنونات ابوي بس لو يحس شفتي مجرد احساس انك تفكرين كذا بيشنقك ويعلقك على باب البيت ويكتب عبرة لمن لا تعتبر.
وعد : واحنا هاذي حيلتنا احس هذا اللي يبيه بابا يذبحنا و يرتاح.
ندى : حرام عليكم ابوي بس شديد شوي.
جود : شوي قولي كثير خانقنا كل شي بامره واغلب الاشياء ممنوعة.
نهى : من خوفه علينا.
جود : ليش ما يعيشنا بسجن اجل.
سها : ويش رايكم نعلن التمرد.
دانه : انا مالي دخل فيكم.
وعد : ويش نسوي يعني .. تراني بايعتها و ما اتوقع بيسوي فيني زود عن ما سواه كود يتبرأ مني.
ندى : ليش أنتِ الحين مو متمردة.
وعد : اللي اسويه ماهو تمرد اطالب بحقوقي فقط لكن التمرد اني اطلع من البيت من غير شور احد مثلا اسوي اللي براسي مهما كان رأي أهلي هذا من التمرد.
دانه : جربي اطلعي من البيت من غير شور احد عشان يتعلق حبل مشنقتك ولا بعد ما يصلون عليك.
نهى : لا تقولون كذا والله ابوي يحبنا و يخاف علينا و كل شي نطلبه ما يردنا فيه.
جود : انا طلبته اروح لحفلة مسويتها زميلتي و رفض.
وعد : وانا طلبت اكمل دراستي رفض.
سها : وانا بعد كنت بدخل ادبي ورفض وحط لي مدرسات كله عشان ادخل علمي.
دانه : اعوذ بالله كل ذا حقد م تنسن.
وعد : بالله شلون ننسى انا عن نفسي انام و اصحى على طموحي اللي ابوي قاتلة ما فيه دراسة الا هنا والا تزوجي وسافري ويش ذا التفكير.
جود : لو اني منك يا وعد تزوجت من زمان.
وعد : ايه و اتزوج واحد تفكيره م يباعد تفكير ابوك و اتوهق لا ي بعدي انا ابي واحد يقدر المرأة يقدر اهتماماتها وطبيعتها و حياتها مو واحد يحسب للحين عايشين بالجاهلية.
نهى : وين بتلاقين ذا الواحد عساه عساف ولد عمي عبدالرحمن والا عمر ولد عمي سعد.
وعد ناظرتها : ويش معنى عساف ولا عمر.
نهى : كأنك م تدرين يعني ان ماكنت لعساف بتكونين لعمر.
وعد : وانا بضاعة يتفرجون عليها و ان عجبتهم خذوها.
نهى : حاشاك انت غالية بس انت عارفة ان جدي قايل لعساف و عمر عنك.
وعد : خلي جدي يقول اللي يبي اهم شي انا اللي ابيه وانا مستحيل ومن سابع المستحيلات افكر بعساف والا عمر. اما انا اخذ واحد من ذا الاثنين المعقدين بكره ادخل عليكم ببرقع وجلابية.
سها : هههههههههههه من جد تخيلي تزوجين عساف هههههههههههه.
وعد : سها ماني مسخره عندك.
دانه : بصراحة احس عمر اهون من عساف.
وعد : صبها و احقنها طينة وحده الاثنين.
جود : والله عساف اخس من عمر اذكر يوم عصب مره بجمعتنا بالعيد تذكرونها.
دانه : وييييه والا يوم هاوش اخته عبير انا خفت وانا كنت اكلمها ع الجوال للحين اذكر صوته.
وعد : و يبوني اتزوجه والا واحد على شاكلته يخسي هو وكل اللي مثله.
خالد : من هو اللي يخسي.
التفتوا عليه خواته.
سها : وعليكم السلام.
خالد : السلام عليكم.
: وعليكم السلام.
جود : بعد ايش تسلم.
خالد : لا تضيعون السالفة مين اللي يخسى.؟
وعد : انا احكيهم عن زميلتي متقدم لها واحد وما تبيه.
خالد رفع حاجبه : وليش ويش فيه ما تبيه.
وعد : ليش تسأل ناوي تخطبها مثلا.
خالد : لا طبعا بس كذا اسأل.
دانه : الا خالد الله يسعدك فرحنا خله يصير عندنا زواج.
خالد : واحمد وسعود ليش م تزوجينهم.
وعد : احمد منه امل لكن سعود انا غاسلة يدي منه خالتي طلع بلسانها شعر وهي كل مره تقوله عن بنت فلان و بنت علان وهو يرفضهم كلهم.
سها : من جد انا لو اني منها اصلا م ادور له خير شر.
جود : تتوقعون فيه سبب.
خالد : ايش قصدك.؟
جود بلعت ريقها : ا يعني اقصد مثلا انه يبي وحده بصفات معينه.
خالد : بس هذا قصدك.
سها : على بلاطة يحب يعني.
خالد رفع حاجبة : ما تخافين مني يعني.
سها : وليش اخاف اهم شي انك مو أبوي.
وعد : والا لازم كلكم تكبتونا يعني م يكفي علينا واحد.
خالد : ابوي كابتكم .؟
ندى : لا تضيع وقتك معاهم الحين بيجلسن يحطن لك قائمة على ذا السؤال.
سها : على أساس ما تشوف يعني قوانين أبوي.
خالد : لا تظلمون انفسكم ابوي مو مقصر معاكم بشي.
وعد : ايه هذا تفكيركم تسكنونا ببيت و توكلونا وتشربونا وتلبسونا وتحسون انفسكم اعطيتم كل شيء.
خالد : ويش اللي تبينه وما اعطيناك اياه.
وعد : ولو قلت لك بيتغير شي يعني بتعطيني اللي ابيه.
خالد : إن كنت اقدر ما أقول لك لا.
وعد : وديني أكمل دراستي برا.
خالد ابتسم : ما فقدتي الأمل للحين.
وعد : لا م فقدت الأمل ولين بكره بعد.
خالد : بصراحة م اقدر على ذا الطلب أنت عارفة رأي أبوي بذا الموضوع اطلبي شي ثاني.
وعد : ما ابي غيره.
خالد : لو كان بقي لي كم سنه برا كنت اخذتك معي بس ما كان باقي لي الا سنة.
وعد : لو م تفيدني بشي.
سها : انا ابي اطلبك.
خالد : اطلبي يا عيوني.
وعد : عيوني هاه وانا اكل تبن.
خالد : افااا مين قال أنت خيتي نور عيوني.
وعد : سلاااق.
خالد : الحق على اللي يدلعك ما تستاهلين.
سها : اسمع انا ابيك تمشينا بالسيارة بس ما راح ننزل.
خالد يلوي فمه.
وعد : هذا واللي يقول اطلبوا وداق الصدر.
خالد : لسى طيب ما رفضت اعوذ بالله تاكلين الواحد بقشورة.
وعد : تعابير وجهك تقول انك رافض.
خالد : موافق خلاص تجهزوا بعد العشاء.. بس لازم نشوف أبوي قبل.
جود : خلاص ارفض من اولها ليش تقول أبوي معروف ما احنا رايحين دامك بتاخذ رأي أبوي.
خالد : لا ي شيخه لازم أبوي يوافق والا ما فيه روحة.
سها تصب لها فنجان قهوه : تقهوا خواتي تقهوا ما فيه روحة بنسهر نسولف في هالجوء العليل.
نهى : انا ما ادري ليش تكلمون عن أبوي كذا والله انكن ناكرات الجميل.
وعد : يعني بتفهميني إن بابا بيوافق.
نهى : ايه بيوافق و تشوفون والله أبوي طيب ويحبنا ويبي يسعدنا بس انتم اللي لا رفض لكم شي قلتوا أبوي فيه و فيه.
سها : خلاص كلها شوي وتطلع الشمس وتملئ البلاد.
خالد يكلم وعد ونهى : تراضيتن.
نهى : ايه الحمد لله.
خالد : بقي أبوي يا وعد.
وعد : وليش هو ما يراضيني.
خالد : وعد يكفي له كم يوم زعلان ولا تنزلين عن العشاء كاسرة كلمته ثم الحين تبينه يراضيك.
وعد تنهي النقاش بهذا الموضوع : يصير خير.
فارس : هيه انتم تعالوا يلا العشاء.
قاموا كلهم الا وعد و خالد . وعد تصب لها فنجان قهوه وتشربه , و خالد يناظرها يشوف متى بتقوم.
خالد : وعد قومي.
وعد : مالي نفس يا خالد مو غصب.
خالد : استغفر الله وعد لا تخلين أبوي يعصب حتى انه اول سأل عنك.
وعد : خالد الى متى نرضخ لهالقوانين حتى لو مابي عشاء لازم اجلس على السفرة.
خالد : هاذي رغبة أبوي ومن بره إننا نرضيه لذلك الله يرضى عليك قومي خليه يشوفك على السفرة لا تأكلين إذا ما أنتِ مشتهيه بس اجلسي عشانه.
وعد : على امرك سي سيد خالد شرف.
خالد ابتسم : ايه خليك مطيعة لو مره.
داخل على السفرة.
أبو سعود : اجل وين خالد.
سعود : ما شفته من ساعة.
سها : برا كان معنا.
ابو سعود : اها .. و وعد وينها .؟
سها : برا مع خالد.
: السلام عليكم.
: وعليكم السلام.
خالد : ما عليش تأخرنا شوي بس نحاول نحل قضية اجتماعية انا و وعد.
جلست وعد جنب سها.
: بسم الله.
ارتفع نغمة جوال وعد.
سها تهمس لها: موقتة جوالك.
وعد : لا وليش اوقته ما وراي شي أخاف يطوفني.
سعود : مين داق عليك هالوقت.
وعد لا يا شيخ تحقق معي : زميلتي.
سعود : قولي لها لا تدق بالليل خليها تدق بالنهار.
وعد ناظرته : وانا نايمة بالنهار شلون يعني.
سعود : طيب تراسلك واتس عيب تتصل بوقت متأخر.
وعد : سيد سعود تدري احنا بأي قرن عايشين.
سعود : لا ما أدري أستاذة وعد.
وعد : انزين احنا عايشين بالقرن الواحد والعشرين الناس تطورت وتحضرت مو للحين عايشين على التفكير اللي تفكر فيه أنت الساعة عشرة ونص الوقت متأخر وبعدين كل واحد له خصوصية لذلك لا تسألني من متصل علي.
سعود ناظرها بحده : وليش تعديت حدود خصوصيتك يا أستاذة.
وعد : تقريباً ولا تملي علي الأوامر وهذا رجاء يا سعود.
سعود : حاضر على هالخشم بس أنتِ كمان راعي الأدب.
وعد : قصدك أنا قليلة أدب.
سعود : ما قلت كذا قلت لك راعي الادب زميلتك ماله داعي تكلمينها تالي الليل.
أبو سعود : خلاص تعشوا من غير نقار.
وعد تهمس لسها : كان ناقصني سيد سعود يملي علي أوامره.
سعود : سعود اللي انتبه إن وعد تكلم سها عنه من حركة فمها : خير وعد كلمتيني.
وعد ناظرته باستغراب : لا .
ابو سعود : ياسر ابيك بكره من صباح الله خير تروح تجيب جدانك هنا ودهم يجون هنا
ياسر : تأمر يبه.
جود : أبوي.
ابو سعود : هلا.
جود : أبوي احم .. احنا ودنا نطلع.
ابو سعود : روحوا اجلسوا بالحديقة لين تملون.
جود : لا مو كذا نبي خالد يطلعنا.
أبو سعود : يطلعكم وين بهالليل.
خالد : بمشيهم شوي بالسيارة يبه.
نهى : ايه بابا الله يخليك.
ابو سعود : موافق بس بشرط.
جود : ويش.
ابو سعود : 12 و انتم هنا.
ابتسمت وعد همست : نهى.
سها كانت جالسة بين وعد ونهى.
نهى : نعم.
وعد : هاذي تسمينها تمشيه ما يمدي نوصل حدود المدينة الا طبقت الساعة 12 .
نهى : اهم شي انه وافق.
سها : اهم شي طريقة الموافقة كيف 12 هنا . احنا مو ببيتنا بالمزرعة .
نهى : ترى أبوي يناظرنا لا يغسل شراعنا الحين.
أحمد : دانه.
دانه : نعم.
أحمد : أنتِ تعبانة.
دانه : لا .. عن اذنكم .. و قامت.
أحمد يكلم البنات : ويش فيها.
جود : ما أدري.
ندى : الحمد لله.
قامت وعد اللي حاست صحنها من دون تأكل منه شيء : الحمد لله. ولحقتها سها.
وعد كانت تغسل.
سها : ليش أكلتي عشان تغسلين.
وعد اللي دق جوالها من جديد : اوووف.
سها : مين.
وعد : رقم غريب طفشني من أسبوع بس يتصل.
سها : عطيه واحد من إخواني يغسل شراعة.
وعد : مو مستاهل.
..
سعود : ماشاء الله عساف ترقى.
: ماشاء الله.
ام احمد : يمديه يتزوج الحين أخبر أمه تدور له على عروس.
وعد همست : الله يبشرك بالجنه يا خالة.
سها : فرحانة.
وعد : من اعماق قلبي. خليني اتطمن يا ختي.
فارس : ليش تضحكين يا وعد.
وعد اللي حست ودها تصفقة كف على ذا الفشلة اللي بتاكلها : سها قالت لي نكته عندك مانع.
فارس : نكتة والا عشان عساف بيتزوج.
وعد : وانا ويش دخلني تزوج والا عنس.
فارس : اخوه مؤيد يقول انه بيتزوجك.
وعد بجرأة و سخرية : بس هذا هو اللي كان ناقصني عساف عشان تكمل سعادة حياتي.
سعود : ليش ويش ينقصة عساف رجال ينشد به الظهر.
وعد : ينشد به ظهر و الا رجل شي يخصه كيفه لكن انا أخذ عساف هذا شي من سابع المستحيلات.
ياسر : والله لوانه اكد على كلام جدي و طلبك لا تأخذينه ماهو عساف اللي ينرد.
وعد : هذا لو كان تفكيره غير و شخصيته غير مو معقد ورافع خشمة وما يشوف احد قدامه.
أحمد : لا تظلمين بختك والله عساف متواضع.
وعد : ماعلي متواضع ولا مو متواضع تفكيره خايس للحين يشوف المره مكانها بيتها وبس مالها حق تكمل دراسة او تتوظف بالوظيفة اللي تبيها باختصار نسخة ثانية عن سعود.
مشعل : اخبر البنات يستحون وانت بكل بجاحة بيننا تكلمين عادي.
وعد : والله إن ما تكلمت بتفهمون اني موافقة بس من قاصرها اعطيكم اياها عساف لو تنطبق السماء على الأرض م تزوجته.
ابو سعود : ما صار شي عشان تكلمون في الموضوع.
فارس : بس مؤيد قال هالكلام حتى جدي مساعد قاله.
أبو سعود : ما يصير تنقل كلام الكبار يا فارس.
فارس : وانا كبير يبه ماني صغير.
أبو سعود : أنت رجال بس هالمواضيع ما أحد يتكلم فيها.
فارس : على أمرك.
سها همست لوعد : يا قو قلبك.
وعد : أحسن خليهم عشان بكره م يغثوني.
ندى : ما تستحين على وجهك تقولين هالكلام قدام أبوي وأخواني .!
وعد : لا ما استحي.
ياسر : يوووه جوالي خلص شحن كنت برسل لحمد يمر على سعد بكره موصيني اقوله .. كانت جنبه وعد .. : وعد عطيني جوالك.
وعد مدت له الجوال فتح الشاشة واستغرب بعدد المكالمات لم يرد عليها 53 مكالمة ناظر بوعد باستغراب.
وعد : خير ويش فيك.
ياسر : ويش كل هالمكالمات.
وعد : ما ادري ما شيكت إن كان فيه مكالمات والا لا يمكن زميلاتي متصلات.
ياسر فتح على السجل انتبه انها من رقم واحد ومو مسجل وكلها بتاريخ اليوم .. طنش و اتصل على حمد.
أبو سعود : سها ويش اخبار الدراسة.؟
سها : زينه.
أبو سعود: أبي نسبة زينه يا سها.
سها : بحاول.
ابو سعود : مابي محاولة ابيك تجيبين نسبة زينه.
سها : لو اني داخلة أدبي كان جبت تسعة وتسعين فاصلة تسعة من عشره بس أنت اصريت ع العلمي وانا اكره الرياضيات والكيمياء.
أبو سعود : ايه انشبي لي زي أختك أنت اللي اجبرتني وغثيني بهالأسطوانة كل يوم.
وعد تعرف انها المقصودة :............
سها : مو قصدي بس أنا ابي ادخل علم نفس.
أبو سعود بسخرية : نعم ما سمعت.!
سها : ابي أصير أخصائية نفسية.
وليد : ما يحتاج أنت نفسية خلقة.
سها ناظرت فيه : ما طلبت رأيك.
مشعل : سبحان الله نسخة ثانية من وعد.
وعد ناظرت فيه بنص عين : ليش ويش فيها وعد بعد.
مشعل : ابدا ما فيها شي.
وعد : على بالي بعد . شوي وتقولون روحي انتحري.
خالد : استغفر الله ويش ذا الكلام.
ياسر اللي كان بيده جوال وعد ويدق نفس الرقم قطع كلامهم : وعد جوالك.
وعد أخذته منه .. أكمل ياسر بهمس : ما أنت رادة.؟
وعد : لا ما أبي ارد عليها.
ياسر : متاكدة انها زميلتك.
وعد : لا مو زميلتي أرتحت الحين.
ياسر : مين.؟
وعد : ما أعرف رقم يتصل علي من اسبوع وغاثني.
ياسر : هاتي أنا اتفاهم معاه . أخذ الجوال وقام.
سها اللي تناقش ابوها ع التخصص : ليش طيب.
أبو سعود : سها كلامي واضح هالتخصص شيليه من بالك.
سها : اعطيني سبب واحد يقنعني.
وعد : أنا اقولك .. عشان اختلاط بمجال العمل بس كذا.. رغم إن فيه عيادات نسائية و ممكن تفتحين عيادة خاصة وتمنعين دخول الجنس الآخر . وبالرغم من ذلك الناس اللي يرفضون يدخلون بناتهم لتخصص الطب لا تعبوا هالبنات ركضوا يدورون دكتورة مو دكتور شفتي شلون.
أبو سعود : بشريني وعد عسى ما قاطعت لك كلام.
وعد : هذا الصدق يا بابا ما قلت شي غلط.
أبو سعود : حشى ابدا أنت تعرفين تقولين شي غلط كل كلامك درر.. تغيرت طريقة كلامة للحدة : هالاسلوب ما ابي اشوفه مره ثانية.
وعد : إن شاء الله على أمرك.
أبو سعود : كلمة وحده يا وعد و يا سها وكل من للحين تدرس بالثانوي تخصص فيه احتكاك بالرجال ما ابي اسمع طاريه ابداً.
جود : بس يا بابا هذا ظلم.
خالد يكلم سعود : ويش فيهن خواتك ناويات على أعمارهن اليوم.
سعود : دايم وعد وتعودنا بس هالمره كلهن.
أبو سعود : نعم جود هانم ليش هالاعتراض.؟
جود : أنا ما احب التخصصات الادبيه ولا أحب الحفظ وابي ادخل طب أسنان.
أبو سعود : لا والله ناوية من الحين بعد.
جود : من زمان بابا ابي هالتخصص.
أبو سعود : طيب من الحين اقولك دوري لك على تخصص ثاني.
ياسر : السلام عليكم.
: وعليكم السلام.
جلس جنب وعد : إذا اتصل مره ثانية علميني.
وعد أخذت الجوال منه : اوك.
جود : اجل ما ابي اكمل دراستي.
أبو سعود : ما عندي مانع لا تكملينها ومن بكره ادور لك على عريس.
جود : ايــــــش اول شي زوج اللي اكبر مني.
أبو سعود : البنت إذا م تدرس تتزوج, وأنتِ بتتركين الدراسة خلاص ازوجك يكفيني وحده عاطلة بالبيت ما ابي يكون عندي ثنتين.
وعد : بابا مو ملاحظ انك تدقني بالكلام.
أبو سعود : صدق والله عمتي وعد ما لاحظت. سامحينا غلطنا على سعادتك.
مشعل انفجر ضحك : أنتِ دايم موهقة عمرك دايم مضرب المثل بالاشياء السلبية ويش مستفيدة بالله.
وعد : مشيعل على أساس أنت محقق نجاحات باهرة لك ست سنين تعيد بالثانوي كل سنه تلحقها بسنة.
مشعل : رجاء لا تغلطين علي وتستهنين بقدراتي إذا أنتِ ربي منعم عليك بالذكاء ما يعني كل الناس مثلك. فيه شي يسمى الفروق الفردية ألم تسمعي بها من قبل يا عزيزتي.
وعد : إذا بنتبع الفروق الفردية بحالتك بنحطك مع صعوبات التعلم.
أبو سعود : خلاص تراكم اليوم مزودينها وانا معطيكم وجه.
نهى : بابا بقي أنا ابي اطلبك طلب.
أبو سعود : ايه ملاحظ انك ما نطقتي خير ويش تبين.؟
نهى : زميلتي...... وسكتت.
أبو سعود : ويش فيها تبيني اتزوجها .؟
عياله انفجروا ضحك : هههههههههههههههههههههههههه
سعود : ليش تدور الثالثة يبه.
أبو سعود : ليش لا.
جود بصدمة : وييييييش.؟
أبو سعود : خير عمتي جود .!
وعد : تبي تتزوج.؟
أبو سعود : ليش لا.
سها : و احنا و ماما وخالتي.
أبو سعود : ويش فيكم ماني مقصر عليكم بشيء و بعدين بسكنها معنا.
وعد : عشان تصلي عليها الفجر أن شاء الله.
جود : ايه بنتعاون عليها و نذبحها. ويمكن نذبحها قبل ليلة العرس.
أبو سعود : ما أنتن بنات سفاحات .. البنات يقولن لابوهن أنت تامر احنا ندور لك على عروس وأنت تبن تذبحنها زين ما تذبحوني أنا بعد عشان ترتاحن. وغمز لهن.
سها : لا أنت أبونا ما تهون علينا بس بنت ابليس تهون علينا.
ياسر : الله يعينك يبه دام استلمنك الشريرات وعد سها جود عز الله رحت فيها.
جود : ويش المطلوب نضحك سيد ياسر.!
ياسر : لا المطلوب تركدن اللي يسمعكن يقولن زواج أبوي بكره . وبعدين انتن عارفات أبوي لا نوى يتزوج ما راح يسالكن فا ليش تسون هالسالفة.
نهى : هيه اهجدن انتن خلوني اكمل كلامي.
أبو سعود : ايه كملي ويش فيها زميلتك.؟
نهى : بتسوي حفلة ببيتها.
أبو سعود عرف المقصد : ايه وتبيني اتكفل بالحفلة.
نهى : اراهن انك تدري ويش ابي بس تتريق علي.
أبو سعود : تبين تروحين.
نهى ابتسامتها شقت وجهها : ايه يبه كنت ادري انك ما راح ترفض لي طلب.
أبو سعود : اهاا كنت تدرين اني ماراح ارفضه لك شلون عرفتي.
كلهم مبتسمين على نهى اللي مخها متنك وماهي مستوعبة إن ابوها يطقطق عليها : عشان يعني دايم اسمع كلامك وكذا.
أبو سعود : ماشاء الله على بنتي عرافة.
نهى : هييييه يعني موافق .. وقفت تصفق.
أبو سعود : لا طبعا ماني موافق.
نهى انصدمت وقفت تستوعب . شكلها المضحك وهي واقفة ومعلقة فاتحة فمها ويدينها معلقة على التصفيقة .خلى الكل يضحك على شكلها : ههههههههههههههههههه.
نهى استوعبت اخيرا : أبو سعود ما هقيتها منك تخليهم يضحكون علي.
سعود : والله مخك المتنك هذا ليش م تستخدمينه لو انتبهتي كان عرفتي من اول رد يطقطق عليك.
نهى تكلم أبوها : شفت شفت خليتهم يستلموني.
أبو سعود وقف : تصبحون على خير.
: وأنت من اهله.
نهى لفت على سها و وعد : شوفوا أنا قررت اعلن التمرد معاكم.
سها : هيه أنت خبله لو سمعك أبوي هذا ما يصير تمرد هذا اعلان بالرغبة بالموت.
..
الصباح جالسين برا على الفطور بعد ما جو جدانهم .
أبو عبدالرحمن : اجل وين بناتك وعيد وجود وسها ما جن يسلمن علي لهالحين.
البنات اللي كانن جايات مع بعض سمعنه.
وعد : سبحان الله بابا وارث هالاسلوب من جدي.
سها : عاد أبوي ما لقى غير هالصفة.
جود : خلوكم من ذا كله اصبروا واسمعوا سواليفهم كلها من ذاكرة التاريخ أنا حفظتها من كثر ما اسمعها.
سها : حرام عليكم والله جداني لا جو يسون جو بالبيت.
وعد : أنا ما احب جدي يجينا كل مره ينكبني بشي, الله اعلم ويش ناوي عليه اليوم.
جود : هههههههههه ايه أنت ناشبة له منقهر انك قاعدة كذا إلا غصب بيزوجك.
وعد : ما تشوفينه يحرج علي عند عيال عماني.
: السلام عليكم.
: وعليكم السلام.
سلموا على جدهم وجدتهم وباسوا رأس أبوهم.
أم عبدالرحمن : وينكن فيه الناس تصحى من صباح الله خير وأنتن نايمات.
سها : نمنا متأخر البارح عشان كذا ما صحينا بدري.
أبو عبدالرحمن : من رداكن . وأنت (يكلم ولده) مخلي بناتك يسهرن.
وعد تهمس لخواتها : ارتكبنا جريمة.
أبو سعود : ما عليه يبه اليوم ما فيه دوامات ينامن متى ما بغن.
سها تكلم خواتها: بس هو هذا القانون اللي كنت ادوره كنت مستغربة إن فيه شي بين قوانين البيت ناقص الحين بس تذكرته.
جود : ويش تقصدين.؟
سها : يتحكم أبوي بنومتنا وصحيتنا, أنا مستغربه على أبو سعود ما سواها للحين ليش.
وعد : اتوقع فاقد الأمل دام عنده بنات شروانا.
أحمد : ويش أخبار الديره يبه.؟
أبو عبدالرحمن : اخبارها تسرك, ليت الأول رحنا زواج ولد عايض ماشاء الله ولده اصغر من عيالك وزوجه.
سها ضربت احمد بكوعها وهمست له: تستاهل ما احد قالك جيب طاري الديرة.
أحمد : شكلي بنحاش.
أبو سعود : ماني غاصبهم يبه الواحد منهم لا بغى الزواج ماني مقصر معه شواربهم خطت ما ينجبرون.
جود تهمس : ايه ممارس هالهواية علينا.
أبو عبدالرحمن : اول هالكبير متى ناوي تزوج عمرك بيصك الثلاثين وأنت للحين ما تزوجت ويش مانعك من الزواج هاه.
سعود : يبه جات علي عيال عمي اكبر مني ما تزوجوا.
أبو عبدالرحمن : بيتزوجون قريب عساف و عمر و بياخذون من بناتك يا ابراهيم.
أبو سعود : عساف و عمر رجال ينشرون بالغالي.
أبو عبدالرحمن : عساف مكلمني يبي ندى . اما عمر يأخذ وعد.
ندى ناظرت وعد كانها مصدومة عساف يبيها شلون وهو اللي جدي كلمه ياخذ وعد شلون اتزوج واحد فكر بيوم ياخذ اختي. معقولة نساها مستحيل مستحيل.
أبو سعود : الراي رأيهن يبه.
أبو عبدالرحمن : هاه يا ندى أنتِ و وعد ويش قلتن.
وعد : أنا ماني موافقة.
أبو عبدالرحمن : افا وانا ولد سالم عمر ينرد يا بنت ابراهيم من متى ينرد ولد العم.
وعد تنرفزت ايه ولد العم ينرد وانا اختار بكيفي اللي ابيه .
قامت ندى من السفرة على غرفتها . وقامت وعد بس جدها وقفها : وعيد بعتبر هالكلمة ما سمعتها عمر رجال ما ينعاب.
وعد : يبه أنا قلت لك اني ماني موافقة و مستحيل اخذ عمر.
أبو عبدالرحمن : وراه يا بنت ابراهيم.
وعد : ماني رخيصة يا جدي عشان تعرضني على عيال عماني... ومشت.
أبو عبدالرحمن : افا و أنا ولد سالم بنتك ترد ولد عمها وأنت ساكت.
أبو سعود : يبه ما عليه الزواج ماهو غصب وانا بعطيها فرصة تفكر لا تشيل هم.
أبو عبدالرحمن : ما سمعتها تقول ما تبيه . ماشي عمر و ردته إن قاله الله إنها ما تطلع من رجال العيلة.
خالد يكلم ياسر : كان ضروري هالكلام يعني.
ياسر : حتى أختك خبله تصبر شوي بعدين تقول لابوي مو قدام جدي.
خالد : مهما كان , نعرف وعد ما تبي عيال عمي لاني جدي مكلهم وهي مأخذه السالفة هاذي بحساسية يقوم جدي يحلف ما تأخذ غيرهم.
ياسر : الله ييسرها يا خي لا حزة حزتها يصير خير.
..
..
بعد يومين
ندى : ما ابيه يمه ما ابيه.
أم ندى : ليش.
ندى : شلون تبيني ارضى اتزوج واحد فكر باختي من قبلي.
أم ندى اخذت نفس : من قال هالشي.
ندى : يمه لا تاخذيني على قد عقلي الكل يدري إن وعد لعساف.
أم ندى : لو عساف يبيها ليش طلب يدك.؟
أبو سعود : السلام عليكم.
أم ندى و ندى : وعليكم السلام.
أبو سعود : وانا داخل سمعت كلامك. بسألك يا ندى عساف جاء طلب يد وعد.؟
ندى : لا.
أبو سعود : طيب هو قال انه يبيها. لمح لهالشي امه تكلمت.
ندى : لا.
أبو سعود: معناته عساف ما يبي وعد وكل ما قاله أبوي ما يعلق على الموضوع ومستحي لا يقول ما يبيها.. لكنه يبيك أنتِ لا تخلين كلام أبوي سبب رفضك.
ندى : بس يبه الكل يدري حتى البزارين يدرون إن عساف بياخذ وعد.
أبو سعود : أنتِ عارفة إن وعد رافضته وهذا أنا قلت لك انه هو بعد ما كان يبي هالزواجة.
ندى : يعني أنت ترضى اخذ من عافته وعد.
أبو سعود : لا حول ولا قوة إلا بالله . ندى استوعبي هو ماجاء خطبها يعني مافيه شي بينهم. خلاص قضينا من هالسالفة. شيلي هالفكرة من راسك وفكري زين عساف رجال ينشد الظهر فيه وانا لو ماني واثق فيه ما كنت بخليه يأخذك.
ندى جلست تبكي : ما ادري بابا ما ادري.
سحبها أبو سعود لحضنه ومسح على شعرها : أنا ادري يبه أنتِ فكري بخطبة عساف لك و بس لا تفكرين باي كلام ثاني.
..
دق جوالها اكثر من مره وصحاها : يالله صباح خير مين داق هالوقت.! .. الووو
: اويلاه على هالبحه, اويلاه على هالدلع.
رفعت الجوال وناظرت رقم غريب: الله ياخذك.
: الله يأخذني لعندك ناظري من شباك غرفتك بتلاقيني واقف تحت.
استغربت قامت ناظرت الشباك وشافت شخص واقف برا سيارته ومتكي عليها ولابس ثوب وكاب.
: شوي شوي لا تكرفسين. شكل صوتي لعب بحسبتك.
: نعم ويش تبي.
: ابيك أنت يا وعد.
وعد تجمد الدم بعروقها شلون عرف اسمها وبيتهم وقدام غرفتها بعد قفلت الجوال ورمته على السرير : مين هذا مو نفس الرقم اللي قبل الله ياخذه.
رجع يدق جوالها من جديد وباستمرار طنشتة ودخلت توضأ.
..
على سفرة الفطور.
سها فاتحة كتابها و تراجع : اوووف من هالمادة الزفت احس كل ما ذاكرت تطير.
جود : طيـــــارة طيـــــــارة.
أم ندى : لا توترين أنت ذاكرتي توكلي على ربك و بتجاوبين.
سها : امي ما تعرفين انها فيزياء مادة الكلبة نجلاء.
نهى : خلاص بس عرفنا بتجيبين العيد.
سها : شكلي بجيب كل المناسبات مو بس العيد. وعد شلون كنت تجيبين الدرجة الكاملة عندها. علميني.
وعد : اذاكر مذاكرة اعرف كل صفحة ويش فيها حتى لو سالتيني الصفحة سته وستين ويش فيها اقولك لاني ما احب انول معلمة تكرهني مرادها بانها تخسفني بالدرجات. وعلى فكرة ورقتك راجعيها مليون مره وبس تاخذ الاوراق تأكدي من اجابتك دايركت واعرفي كم غلط عندك ولا قالت الدرجات خليها توريك ورقتك تراها زفت تحط لك خطأ على اجابة صح.
سها : أنا بعرف أنت ويش مسوية لها عشان تكرهك وتكرهنا كلنا.
وعد : يا حياتي دائماً الانسان الناجح يكرهونه الناس.
جود : اففففف تذكرتها العام هبلت فيني الزفت. وانا غبية ساكتة لها ياختي ودي اشوف وحده بالمدرسة تحبها.
سها : إلا فيه تعرفين تماضر البنت الطويلة اللي بثانية ادبي.؟
جود : تماضر تماضر طووويلة يا كثر الطوال.
سها : طيب تعرفين البنت السااااامجة اللي كل ما مشت تقول كتتتيعة يقال مدلعة.
جود : ااايه عرفتها كتييعة بس ماهي طويلة.
سها : ادري ماهي طويلة بس البنت اللي تمشي معها هي تماضر شعرها اشقر و دايم رسمة حواجبها عريضة.
جود : لا يكون هاذيك أم حبة خال بوسط خشمها.
سها : ايه هي هاذي تماضر اللي تحب نجلاء و ابشرك ابله نجلاء تحبها.
جود : وعععععععع قلووو خلق الله.
وعد : من وصف البنت احب اقول التم المتعوس على خايب الرجا.
ياسر : يالله انك لا تبلانا كان فيه ناس تحش من صباح الله خير بدل ما تستفتح بذكر الله.
مشعل : يالله انك لا تبلانا كاني بوصف بنت تقول كتيعة والا سامجة.
وليد : يالله انك لا تبلانا بحريم مثل خواتي.
نهى : والله تتمنون ربي يرزقكم بحريم شروانا بالخير لكن انسوا ما راح تلقون.
سعود : اخيرا هانم وعد بتصيرين تداومين حالك حالنا.
وعد: ما ادري ليش حاقدين علي إلا تبوني اداوم بمعهد حتى لو هو مخيس.
أبو سعود : نبي هالنفسية تعدل وترجع مثل اول.
وعد بمغزى : والله يا بابا أنت ادرى هالنفسية ويش يعدلها.
أبو سعود : بتتعدل إن شاء الله أنت بس داومي ولا ابي غياب فاهمه.
وعد : لا عاد أبو سعود ما اتفقنا على كذا أنت قلت سجلي بمعهد ما قلت لا تغيبين, رجاء أبو سعود خلني على راحتي لو مره بحياتي.
أبو سعود : كلامي واضح الغياب بعذر, ما عندك لا تفكرين تجين تقولين لي بغيب فاهمه . . وانا بوصلك كل يوم دامك على طريقي.
وعد كملت معاي عز الله صار الكبت حتى بالسيارة : ليش مابي اتعبك أنا فكرت اروح مع زميلتي تروح مع سواقهم.
أبو سعود رمقها بنظرة : احلفي يا عمه متى قررتي هالقرار.
وعد : ما قررت كنت بقولك يعني عشان ما تتعب نفسك وكذا.
أبو سعود : كل يوم أنا بوصلك الصباح و إن ما كنت فاضي يوصلك واحد من اخوانك.
وعد : إن زين بالطلعة أنا اخلص الساعة 11 .
أبو سعود : يتناوبون اخوانك اللي يقدر يجيبك.
ياسر : جوال مين اللي يهز من اليوم.
وعد لفت لشنطتها اللي معلقتها ع الكرسي وهي جالسة جنب ياسر فتحت الشنطة وطلعت الجوال وحطت مشغول تبي تشيل الهزاز لكنه رجع دق وحطت مشغول ورجع دق فتحت الجوال وطلعت البطارية ورمته بالشنطة.
خالد : ويش ذا العنف ردي وقولي انك مشغولة وخلصنا.
وعد : مالي خلق اتعب احبالي الصوتية.
نهى : اسم الله على احبالك يا أم احبال.
سها : اقول قومي ترى بتأخرين على دوامك.
وعد : قالت لك قومي يعني قومي.
نهى : هيه أنتِ وإياها تراني أكبر منكن مستوعبات هالشيء.
سها : لا يا شيخه توني أدري.
وعد : أنا اتوقع ماما وبابا غلطانين كانوا يبونك أخر وحده بس أنتِ ملقوفة نطيتي بيني أنا وندى.
سها ناظرت وعد وهمست لها :لا يفهمون كلامك غلط.
وعد كأنها استوعبت: لا ي شيخة كلامي غلط.
سها : شكله.
وعد : احم بابا متى بتمشي.
أبو سعود يناظرهم وهو حاط يده على خده : لما تخلصون مهامس أنت والهانم سها.
وعد وقفت : خلصنا.
أبو سعود : ما قلت لكم قبل لا تهامسون بوجودي, طبعكن ذا ما تتركنه.
..
العشا..
جالسين على القهوه.
أم ندى : سها ويش بلاك اليوم من دخلتي وانا معصبة.؟
ندى : سها ويش سويتي بالاختبار اليوم.
سها : لا تذكروني انبطت كبدي انبطت.
نهى : ليش.؟
وعد : مساء الخير.
: مساء النور. باست رأس أمها وخالتها وجلست.
سها : تخيلوا طلعتني برا الفصل اختبرتني برا لحالي و تاركة كل بنات الفصل و عيونها علي.
جود : نفسية هالابلة نفسية.
سها : نفسية و بس إلا حقها القتل تعزيرا على تعاملها بس .. ولا تخيلوا جايبة اسئلة زي السسسم و البنات يصيحون وتقولي ليش ما بكيتي زيهم قلت وليش ابكي أنا جاوبت الحمد لله تتوقعون ويش سوت.
نهى : قالت لك مستحيل أنا جايبة اسئلة صعبة ولا وحده راح تجيب الدرجة الكاملة.
جود : أنا اقول عادت لك الاختبار.
سها : طلعت ورقتي من بين الاوراق وقرت شوي منها و قطعتها قدام عيوني.
مشعل : وان شاء الله سكتي لها.
سها : افا عليك يا اخوي أنا سها ابراهيم مساعد الـ ـ ـ ـ ـ اسكت عن نجلوه قلت لها ليش قالت واضح انك غاشة قلت ماشي وانا ماراح اسكت عن حقي راح انزل للمديرة الحين و اقول انك شقيتي ورقتي وكل بنات الفصل يشهدون.
أم ندى : ايه و بعدين.؟
سها : نزلت المديرة و قابلتها و قلت لها كل شيء و نادت الابلة و هاتيك رد ومردود أنا واياها عاد الهانم تقول أنا جايبة سؤال صعب كيف جاوبت عليه إلا انها غاشة وانا قلت لها أنت طلعتيني برا الفصل برا عن زميلاتي ولا اخذت معاي لا كتاب ولا غيره وبعدين السؤال اللي تقولين انه صعب جايبته من برا الكتاب قالت لا قلت اجل مالك حق لاني مجاوبة على كل شيء.
سعود : و المديرة ويش قالت.؟
سها : ويش بتقول يعني عارفة إن المعلمة غلطانة خلتها تصحح الورقة قدامها وتعطيني درجتي.
مشعل : عاد على ذا الهوشة كلها كم اخذتي.؟
سها : العشرة كاملة.
وليد : اجل تسوى الهوشة.
خالد : اللي أنا من جد بعرفة هي تحقد عليكن عشانها قبل حاقدة على وعد ماهو معقول.
وعد : واذا قلت لك إن صارت لي نفس هالهوشة بزيادات.
خالد : كيف يعني.
وعد : وصلتها للتوجيه سها كلمت المديرة اما أنا كلمت التوجيه بكبرهم وجوو من البكره دايركت وحققوا في الموضوع و ما خلوها هي اللي تصحح الورقة لا موجهة المادة نفسها هي اللي صححت ورقتي و فوق كل هذا انقلوها نقل تأديبي اسبوعين و أنا طلبت منهم يكتبونها تعهد انها ما تنقصني ولا درجة بدون وجه حق وكتبوها.
احمد : وهذا متى صار.؟
وعد : بثالث ثانوي.
أم ندى : وليش احنا ما عندنا علم.؟
وعد : ما حسيت الموضوع يسوى دام أنا اقدر احل مشكلتي ليش اقولها.
جود : والله من عذرها إذا حقدت على سلالتنا كلها من وراك.
وعد : ليش تبيني اسكت عن حقي أنا تعبت و عارفة قبل ما اسلم لورقة اني اخذه العلامة الكاملة تقوم تشق الورقة و تضيع كل تعبي ليش الدنيا فوضى مالها مرؤوس.
ياسر : وكيف المعهد معاك اليوم.
وعد : مخيــــــــــــــــس لدرجة اني ما قدرت انام إلا العصر.
سعود : ليش سنيورة وعد ويش اللي مقلق نومك.
وعد : التعب اكتشفت إن اللي يداوم بشي ما يرغبة يتعب كثير.
أبو سعود : الله من العيارة ويش سويتي عشان تتعبين.
وعد : ابدا اجبرتني على هالمعهد من حطيت رجلي على أول عتبة حسيت بخنقة.
أبو سعود : أنا خليت لك حرية الاختيار وأنتِ ضيعتي الفرصة لا تقولين اجبرتني أنتِ اجبرتي نفسك. وبعدين المعهد الكل يمدح فيه الحين أنتِ تقولين مخيس.!
أحمد : يبه أنا عندي مؤتمر برا السعودية لمدة اسبوع.
أبو سعود : مؤتمر ايش.
أحمد : مؤتمر لامراض القلب ومناقشة اخر التطورات مشارك فيه المشفى.
سها : وين احمد.؟
أحمد : بكندا.
وعد : الله خذني معك حمودي.
أحمد : أجل حمودي هاه . وابوي.؟
أبو سعود : لا خلها تقول اللي تبيه أنا كرسي هنا.
وعد: بابا لا تصير حساس . بس خلوني اطلع من البيت بشم هواء نقي.
أبو سعود وقف وراح لها, وعد رجعت وراء : بابا والله امزح خلاص ماني رايحة ... مسكها من يدها ابوها: تعالي معي.
وعد ماسكة يده : بابا خلاص الله يخليك.
أبو سعود شالها وطلع فيها بالحديقة : بابا نزلني خلاص والله ما أعيدها.
أبو سعود : لا أبيك تشمين هواء يلا تنفسي.
وعد : طيب نزلني الحين بينكسر ظهرك.
أبو سعود : هههههههههه من مين .؟ منك أنتِ يالنتفة ينكسر ظهري اشيلك يوم كامل ولا أحس اني شايل شي.
وعد : ليش كرتون فاضي والا علبة مناديل تراني ادمية مثلكم.
أبو سعود : كم وزنك.
وعد : رجاءاً لا تحرجني.
أبو سعود رفعها اكثر عشان ما تطيح: ليش زوجك تستحين مني.؟
وعد : شفت بابا شكلك تعورت يلا نزلني الله يخليك.
أبو سعود : لا ما تعورت بس ما ابيك تطيحين مثل ما تشوفين واقفين قريب من الدرج يعني لو بتطيحين على طول بتوصلين لتحت.
تمسكت فيه بقوه : بابا اللي يخليك طيب ابعد عن الدرج.
أبو سعود يقرب أكثر ويوقف على الحافة: طيب قولي لي كم وزنك.؟
وعد : 43 خلاص بابا نزلني.
أبو سعود وهو راجع فيها داخل البيت: متأكدة انه 43.
وعد : ايه قست من فتره. بس خلاص بابا نزلني.
أبو سعود جلسها جنبه : وين قستيه.
وعد : بالصيدلية.
مشعل : ما انتم معشينا أنا جوعان.
أبو سعود : ما أحد قالك لا تغدا معنا.
مشعل : كنت تعبان يبه و أدور الفراش.
أبو سعود : ويش رايكم نسوي أنظمة جديدة بالبيت.
البنات فتحن عيونهن على أكبر مقاس .!!
سها : قوانين ايش.؟
أبو سعود : نسوي رفرش للقوانين ونجددها.
وعد : أنا اعترض بتشيل قوانين أنا أول المؤيدين لكن تحط أشياء جديدة لا و الف لا.
أبو سعود : تصدقين عمتي وعد بس هذا اللي موقفني رأيك.
أبو سعود : أولاً. من اليوم ورايح وجبات الأكل جميعها الكل حاضر عليها ماعدا اللي بالدوام او اللي تعبان مو يتيعب يعني جاي من المدرسة جاية من المعهد تنتظرين وجبة الغداء
وعد : لاحظوا قال جامعة ومعهد اهم شي المعهد ليش عشاني والا حقين المدراس ماجاب طاريهم.
أبو سعود: ثانيا . المصروف راح ينعطى لكم شهري يخلص بنص الشهر ماني مسؤول عنك مو متى ما طقت ببالكم جيتوا طلبتوا. ثالثا. هواش و نقار في الجلسة ما ابي. وبس سلامتكم.
وعد حطت يدها على جبهته : أبو سعود شكلك مصخن اليوم. أحمد تعال شوف احس كأنه مصخن.
أبو سعود نزل يدها وعضها و وعد صرخت : آآآآآآآ متوحش.
أبو سعود مبتسم : فيه اعتراض من أي أحد. او أي إطراء.
سها : أنا عندي ويش رايك بابا تحسب علينا بعد عدد الكلمات اللي باليوم ننطقها.
جود : ايه وكم مره نتنفس بعد مع عدد ضربات القلب.
وعد : ايه والا تحولنا لآليين وترتاح مره وحده.
أبو سعود : ما تحسن اني معطيكن وجه ثلاثتكن.
سها : والله بابا مو معقول اللي تقوله يكفينا نلتم على وجبة وحده أنا اجي هلكانة ما فيني انتظر الغداء غير كذا احنا ما نجي بوقت واحد مع بعض كيف تبينا نلتم واحنا تعبانين.
أبو سعود : الغداء ح يكون الساعة 2.30 .
وعد : طيب أنا أجي الساعة 11 مو معقول بنتظر لين الكل يجي عشان اجلس على السفرة.
أبو سعود : حلي واجباتك.. عموما أنا راح اطبق هالشي فترة شفت هالوضع مو مناسب كنسلته.
وعد غمزت لسها وجود ناويات يدمرن هالقانون من أوله دام فيه أمل ينلغي.
جاء فارس مدرعم : خذي جوالك ازعجني له ساعة يدق ما اعرف اذاكر.
وعد : وأنت ويش دخلك غرفتي.
فارس : ما دخلتها كنت بالصالة فوق.
وعد أعطت مشغول للمتصل تبي تصمت الجوال لكنه رجع يدق من جديد واعطته مشغول وصمتته بسرعة جاتها رسالة (ردي علي لا تخليني اتهور). ودق من جديد حطته جنبها و طنشتة.
ياسر : متى السفرة احمد.
احمد : السبت الجاي إن راد ربي.
سها تكلم خواتها : جود اليوم العقرب اللي طلعت كانت بفصلك.
جود : لا تذكروني.
نهى : ليش.
جود : مشت على جزمتي.
سها: يووووه ويش سويتي.
جود: جلست اصارخ واصيح تخيلوا طلعت من الفصل كأني مجنونة امسكتني ابلة الدين بقوة تهديني جلست فترة لين استوعبت.
نهى : طيب وين راحت.
جود : ذبحتها الخالة.
..
مشعل : قسما لو يدري أبوي بيتصرف معك.
وليد : مالك دخل.
مشعل: كيف مالي دخل ما أنت اخوي وأخاف على مصلحتك.
وليد : ماني بزر تعلمني مصلحتي وين هي فيه.
مشعل : يعني مصلحتك انك تدخن.
وليد : مشعل مالك دخل ولا تكلمني بذا الموضوع.
مشعل : لا بكلمك ولو ما اعتبرت راح اعلم أبوي والا سعود.
وليد : قسما يا مشعل لو تعلمهم ما يصير لك طيب.
..
وعد انتبهت للجوال اللي ما طفت اضائتة من الاتصالات اللي وراء بعض قامت من الجلسة وردت بحدة : خير.
: اخيرا ما بغيتي تردين.
وعد : ويش تبي.
: قلت لك الصباح أبيك يا عيوني.
وعد : قول أمين.
: أمين.
وعد: عسى عيونك للعمى.
: ما يهمني دام قلبي ما يشوف غيرك و لا يحس إلا فيك.
وعد : أنت لو عندك احساس ما تتصل على وحده ما تعرفها يا اللي ما تستحي. قسما لو دقيت مره ثانية لا اعلم أبوي و أخواني عليك.
: علميهم من بيلومني إذا حبيتك هاذي ماهي جريمة.
وعد : حبك المرض إن شاء الله ولا فارقك.
: راضي والله راضي لانك بتكونين دكتورتي.
وعد : لو اني دكتورتك بموتك من أول لحظة.
: دامني بين يديك ومنك بعد راضي.
قفلت الجوال بوجهه واضح راعي طويلة ولا يستحي على وجهه. ما وصلت الجلسة إلا رجع يتصل مره ثانية: سها.
التفت لها سها : نعم.
وعد : تعالي ابيك شوي.
قامت سها مستغربة مو عادتهم ينادون بعض بوسط الجلسة ويطلعون. طلعوا للحديقة : خير ويش فيك.؟
وعد : ابلشني.
سها : مين.؟
وعد جلست ع الدرج : واحد كلب اليوم بس فوق 70 اتصال و 25 رسالة.
سها : طنشيه.
وعد : واقف برا.
سها مصدومة : ويش.
وعد: اقولك واقف برا.
سها : ويش يسوي برا أنت تعرفينه.؟
وعد : لا ويش يعرفني فيه من الفجر مرابط وحتى لما وصلني بابا المعهد شفته لما نزلت من السيارة ولما طلعت شفته.
سها: ويش عرفه ببيتنا.؟
وعد: ناداني باسمي.
سها بخوف : يا ويلي يا وعد قسما لو يدرون أبوي و أخواني بنروح فيها.
وعد : ويش اسوي أنا تفكيري مشتت ماني قادرة أستوعب شي.
سها : هذا اللي مضايقك طول الجلسة.؟
وعد : هذا وشي ثاني بس خلينا الحين بالتبن اللي برا.
سها: كلمي ياسر يكلمه او خالد.
وعد : اخاف يقولهم شي غلط و يصدقونه.
سها : دامك ما سويتي شي ما راح يقولون شي وبعدين انك علمتيهم تكونين سويتي اللي عليك.
وعد : افففففف شكلي بغير رقمي وافتك.
سها: بس قولي لي ويش يسوي عند باب بيتنا.؟
وعد : مادري صحاني الفجر باتصالاته و قالي انه واقف برا. سها لا تجيبين طاري ابدا.
سها : طيب ويش يسوي يا وعد برا حتى لو كان بيلعب ايش اللي عرفه ببيتنا.
وعد : تخيلي يرسل لي لو ما رديت بيتهور والله اني خايفة.
فارس نط عليهم : خايفة من ايش.
انصدمن لا يكون سمع الكلام. قامت وعد و مسكت من يده : قسما بالله يا فارس لو نقلت كلمه وحده من اللي سمعتها راح ادفنك بالحياة فاهم.
..
مقتطفات من البارت الثالث
ما احد يطول شعره من رأسك دام راسي يشم الهواء.
شفايفها المزرقة ترتجف وشهقاتها تعلى وسط ذهول من الجميع أول مره يشوفونها بهالحالة وكأن روحها بتطلع من بين ضلوعها حست إن الدنيا تسود بعيونها واضلاعها تضغط عليها.
لا أحلل نقل الرواية دون ذكر اسمي.
ضحكة قهر.
|
01-10-14, 12:54 AM
المشاركة رقم: 1
جديد مواضيع قسم القصص المكتمله
العرض العادي
