بسم الله الرحمن الرحيم..

السلام عليكم و رحمة الله و بركاتة..

إنا لله و إنّا إليه راجعون..

اعزي نفسي و اعزي جميع المسلمين و العرب كافة في وفاة قائدنا والدنا و حبيبنا عبدالله بن عبدالعزيز.. الله يرحمة و يغفر له و يسكنة فسيح جناتة.. عظم الله اجر الوطن و عظم الله اجر شعبة و عظم الله اجر المسلمين..

انا اعتذر عن تنزيل بارت هالإسبوع.. النفسية مو متحملة تعديل على اللي كتبت حاولت بس!!.. وفاتة صدمتنا !! الله يرحمة يارب..

و الله يحفظ ملكنا سلمان بن عبدالعزيز و ولي العهد الأمير مقرن بن عبدالعزيز و ولي ولي العهد الأمير محمد بن نايف .. الله يوفقهم و يسدد خطاهم..

عظم الله اجركم..

ضحكة قهر..

اعجبتنى الروايه جدا متابعه معك ان شاء الله
قرأت الاجزاء كلها مجمعة وفى انتظار الجديد ان شاء الله
واخيرا عظم الله اجركم وعوضكم الخير ان شاء الله

بسم الله الرحمن الرحيم..

السلام عليكم و رحمة الله و بركاتة..

مساءكم خير و سعادة..

بداية انا كان ودي اخلي البارت اطول و اطول عشان اعوضكم بس ما قدرت..!! تعبي هالإسبوع اخذ وقتي مني.. يا دوب خلصت هالبارت بس ان شاء الله ما راح انسى التعويض لأني وعدتكم فيه.. اشكر كل اللي سأل عن صحتي مشكورين ما قصرتوا كلكم.. و الحمدلله انا احسن بـ كثير..

بالنسبة للبارت احسه مليااان احداث..!! ما ادري هذا احساسي.. و شسمة فيه شيء صدمة لكم بـ خصوص وليدان ^_^.. و بصراحة كنت بـ اكشف عن اسم المجهول و بأخر اللحظات شلت الجزئية حقتة.. قلت بـ اشوف ترسون لي على بر و تعرفونة و البارت الجاي ممكن يطلع المجهول بإسمة.. اللي بـ تعرفة تقرأ اللي بين السطور.. كتبت لكم تلميحين في بارتات قبل.. و هالبارت فيه تلميح.. اذا ما عرفتوه خلاص بـ تقرونة بالصريح..

بليز اللي ينتظرون البارت لا تحطون لي ردود مالها داعي من اول اليوم .. انا وعدتكم السبت يعني السبت بإذن الله .. لا تخلون الرواية تحمل ردود مخالفة و تتقفل..!!

اخيـراً.. يا هلا فيكم كلكم قراء قُدامى و جدد .. يسعدني تواجدكم ..
و شكـراً لكل شخص رد على روايتي و اعطاني شيء من وقتة يكتب لي تعليق على البارت.. و سوري اللي ما رديت عليكم.. صايره ماش انا هالأسابيع.. رغم اني و الله ناسخة ردودكم البارح كلها و حاطتها بوورد و حافظتها عندي بس ما امداني ارد عليكم..

لا تنسوني من دعواتكم..

اتركم مع البارت..

قراءة ممتعة..

البارت الثاني و الخمسون..

لا ترمي احساسكـ على اي مخلوق
حتى لو ضلوعكـ وراهم .. / تشبّكـ ..
لا صار قلبكـ في هوى الغير مسروق
ماهو ضروري من تحبة .. / يحبّكـ ..

لـ عبدالله بن غصن..

بيت غازي في الصالة امال و ريما و ندى..
امال : و الله ما ظنتي له يومين لاهي مع عماد بعد اللي صار لـ بنتة..!! (بعد ما نطقت كلمتها انتبهت انها زلقت بالحكي و قالتة عند ندى اللي ما عرفت..!!)..
ندى بإستغراب : ليش ويش صاير للبنت..؟!
امال ضاعت نظراتها : ما ادري..!!
ندى : شلون ما تدرين..؟!! اصلاً انا مستغربة من ولدت وعد ما شفت ابو شوق و اذا اتصلت عليه بـ استأذن منه عشان اروح بيت اهلي ما يرد علي..!! يعني اكيد صاير شيء..!! ويش فيها البنت..؟!
امال تنهدت : اختفت..!!
ندى بققت عيونها من الصدمة : ويش..؟!! متى صار هالحكي..؟!
امال : لهم يومين حايسين..!!
ندى مصدومة : طيب شلون اختفت مو معقول..!؟ انا كلمت وعد يومها و قالت حاطينها بالحضانة..!؟
امال : وهم اخذوها من الحضانة اسهل لهم من انهم يأخذونها من غرفة امها..
ريما : طيب ليش..!؟
امال : ابوك ما قال شيء اصلاً ما رجع..
ندى وقفت : ابي اروح لأهلي.. ما ودي اكلم اخواني و ادري انهم مو فاضين.. بروح مع السواق..
ريما تناظرها : كلمي بابا..
ندى تفكر ما راح يرضى تروح مع السواق و لا يرد عليها عشان يوديها و فوقها هي ما قابلتة بعد اللي قالتة لها ريما الا شوي و نامت عشان ما تواجهة يومها ..!! : لا.. ما بعد انهبلت.. يمكن معصب من اللي صار..(تناظر امال) هو يعصب اذا توتر الوضع زي كذا..؟!
امال : احياناً خصوصاً اذا لقى من يستفزة بـ يحط الحرة دايركت فيه..
ندى بلعت ريقها و جلست مسكت جوالها : اجل بـ اشوف مشعل ازين..
امال ابتسمت : ليش تخافين منه..؟!
ندى بـ ثقة : ما اخاف.. بس ما احب احد يعصب علي..
ريما تبي ندى تتصل على ابوها و هو يعصب عليها كذا بس تبي تشفي غليلها و ابوها معصب : بس لازم تقولين له بابا ما يحب اننا نطلع من غير لا نقولة.. مو يعني انكـ طلعتِ مع اخوكـ يعني عادي تطلعين من غير شورة عيب على البنات المتربيات..!!
امال : ريمـــا ما يخصكــ ..!!
ندى تناظر امال : لو اروح من غير لا اقولة يهاوش..!؟
امال : طيب ارسلي له رسالة يمكن ما ينتبة لها اذا طول ما رد اتصلي عليه..
ريما تضغط عليها : بالعكس تكلمينه الحين و تقولين له انكـ بتروحين و يعصب اهون من لما يعصب طالعة من غير شورة..
امال تناظر بنتها : ريما ويش هالحكي..؟!
ريما تربعت : ما قلت شيء غلط هذا الصدق بابا يدور أي شيء عشان يعصب عليه و يحط حرة الشغل فيه..
قاطعهم صوتة القوي : لا يا شيخة..
لفوا عليه كلهم.. ريما تمسح بـ يدها على رقبتها من غير لا تناظر فيه..
غازي جلس : ويش اللي جاب هالحكي..!؟
امال تصرف الموضوع عشان ما يعصب على ريما : ايش الأخبار..؟!
غازي يناظر ندى و سكت..!! اما ندى ناظرتة تنتظرة يتكلم عرفت انه يتوقع للحين ما درت : ليش ما قلت لي ..؟! اختي من يومين تعبانة و انا اخر من يدري..!!
غازي يناظرها : مين قالكـ ..؟!
امال : انا طحت عندها بالحكي..!!
ندى منقهرة منه : ليش ما تبيني ادري..؟!
غازي انسدح على ظهرة و هادئ و هدوءة يستفز ندى : لأن ما بـ يدكـ شيء تسوينة.. بس بـ تقلقين و بيتكم مو متحمل زيادة قلق..
ندى : بس انا ابي اروح لهم أبي اشوف وعد و اتطمن عليها..
غازي عدل الخدادية تحت راسة كتف يدينة على صدرة و غمض عيونة : ماهو الحين ابي اريح..
ندى تلعب بـ هدب الخدادية بـ حضنها : طيب بـ اكلم مشعل يجيني..
غازي يرد بإختصار : لا..
ندى بـ حدة خفيفة ما انتبهت لـ نفسها بس من قهرها : انا ابي اروح لهم الحين.. الحين..!!
غازي فتح عينة يناظرها بـ قوة : نــــدى..!!!
رجع خوفها يغلب كل مشاعرها القهر من كلام ريما و الخوف على وعد و القهر منه هو انه مخبي عليها موضوع الخطف و يطلع متزوجها عشان تجيب له ولد يشيل اسمه..!! وقفت : خلاص ماني رايحة..!!! طلعت من الصالة واضح عليها مقهورة .. جلس غازي و ناظر امال : الله يهديكـ يا امال.. ليش قلتِ لها ماني منبه عليكـ ما تعلمينها..؟!
امال : و الله طحت بالسالفة عندها و هي ملاحظة ان لكـ يومين لاهي و ما ترد على اتصالاتها.. ودها لهم البنية قلقانة على اختها و بنت اختها خلها تروح و تطمن عليهم.. لا تكسر بخاطرها..
امال تكمل لما شافت غازي ما علق : الله يعينها وعد قلبها شفقان على بنيتها.. ما ادري ويش مصلحتهم من خطفها وهي بزر ما تنفعهم بـ شيء..
غازي : ابوها ينفعهم.. كل ذا عشان يخلون عماد يضيع عقلة و يجيهم بـ رجلية.. ما ينتركـ لحالة عامر مخلي معاه رجال يتبعونة عشان ما يتهور..
امال : طيب صار لهم يومين ليش ما حاولوا يكلمون عماد..؟! و يعلمونة عن بنتة..؟!
غازي : يبونة يضيع عقلة يعيش بـ ضغط كم يوم ما اتوقع يتصلون على طول و يريحونة هالشيء مستحيل يسوونة يبون يستنزفون طاقتة و يهدون حيلة.. تفكيرهم خبــيث يشتتونا عشان يوصلون للي يبونه بكل سهولة.. يلهونا بـ شيء عشان يسوون شيء ثاني.. مين متوقع انهم يخطفون بنت عماد..؟!!..
ريما بـ برود : و الله عاد انتم الأمن مهملين عيلتكم و بعد يتخطفون منكم وين الشغل اللي مهملينا على حسابة..!! حتى شغلكم فارط منكم..
غازي لف راسة يناظرها.. امال صرخت فيها : ريمـــــا و بــعديـــــن..!!
ريما وقفت : انا بروح انام..
وقف غازي و لحقها قبل لا تطلع مسكها من عضدها و لفها عليه.. ردة فعلها العفوية شهقت بـ صدمة و خوف تجاهل الخوف بـ عيونها منه و شفايفها اللي ترجف تعلن عن بكاء قريب : تعرفيني زين يا ريما.. صبور لكن و الله ان طفح كيلي ما اتحمل.. و انا صبرت عليكـ لكن انتِ مو قدّرة ابوكـ .. و لا مقدّرة أي شيء اسوية لكم.. كلمة و حطيها بين عيونكـ ترى صبري نفذ وما اتحمل قلة ادب من بنتي.. ماني عايز اربيكـ من جديد.. (تركـ يدها حتى تطلع بسرعة و هي تجري قبل لا يتكرر نفس الحدث و نفس الألم)..
امال وقفت جنبة : غازي تكفى الا ريما.. الله يخليكـ اصبر عليها.. لا تحط حرتكـ فيها لا تلومها على شيء.. انت جرحتها و زاد عليها انها فاقدة توأمها راعيها تكفى.. يكفي لينا ابعدتها لا تبعد ريما..!!
يكفي لينا ابعدتها لا تبعد ريما..!! ترددت بإذنة هو ابعدها..؟!! لو هو مو ابوها ما انخطفت..!! تنهد : استغفر الله..
تركها و طلع لـ ندى..!! دخل جناحة استغرب الأنوار مسكرة معقولة نامت..!! شغل الإضاءة و ركز عيونة على اللحاف حتى ينتبة لـ تنفسها غير منتظم واضح تبكي..!! جلس على الطرف الثاني : معقولة تبكين..؟! من جدكـ..؟! و تبين بعد تروحين لأهلكـ لو انكـ قوية و قادرة تحكمين بـ نفسكـ كنت وديتكـ ابوكـ و اخوانكـ دوبهم يهدون وعد منهارة عليهم..
ندى جلست وهي تمسح دموعها : انت قهرتني..!! تخبي علي شيء زي كذا.. و تقولة لأمال انا مو بس زوجتكـ وعد اختي.. البنت اللي انخطفت انا خالتها و انا اخر من يعلم..!!
غازي مد يده يمسح دموعها : تراكـ شينة لا بكيتي..!! (رفع اهداب عيونها تناظرة هي تحكي يمين و هو يحكي يسار).. انا ما قهرتكـ خايف عليكـ .. ابي ااجل ضيقتكـ اكبر وقت ممكن .. كان عندي امل نلقاها خلال هاليومين.. ما ودي كلكم تتضايقون.. اكيد ما كنت راح اخبي عليكـ على طول لأن اختكـ نفاس و اكيد تبين تروحين لها..
كلامة ما يقولة الا شخص يبيها هي..!! مو يبي منها ولد وبس..!! عيونها على السرير و ما تناظرة .. سألت عشان تتأكد : خايف علي..؟!
غازي : اكيد خايف عليكـ ..
ندى : ليش تزوجتني..؟! (رفعت عيونها تناظرة) عشان اجيب لكـ ولد.. لأن امال ما تقدر مع المشاكل اللي تواجهها بـ حملها.. تبيني اجيب لكـ ولد و ترميني بعدين صح..؟!
غازي اتسعت عيونة يناظرها : مين قايلكـ هـ الحكي..؟!
ندى : مو مهم مين قالي.. المهم انكـ انت اصلاً ما تزوجت الا عشان يجي لكـ ولد يشيل اسمكـ و تنتهي مهمتي وقتها..!! اصلاً انا استغربت و الله استغربت و قلت لأبوي مرتة مو ناقصها شيء عشان يتزوج عليها..!!
رمت اللحاف من على رجلها و قامت : انا بروح بيت اهلي..!! ما ابي اقعد هنا..!!
اتجه للدولاب و طلعت لها ملابس و دخلت الحمام تغير.. اما هو ظل جالس مكانة ماهو وقت ندى تدلع عليه..!! و يراضيها : الله يهديكـ يا ندى عليكـ وقت غلط..!!
طلعت و سحبت عبايتها من العلاقة لبستها و لفت الطرحة و هي ما زالت تبكي.. قام و وقف قدامها و سحب النقاب من يدها قبل لا تلبسة انفكت طرحتها اللي ما لفتها عدل من زعلها : ابصم بالعشرة ان اللي مدخل الفكرة براسكـ ريما..!! لأن امال مستحيل تقول شيء زي كذا علي و عليكـ .. اما ريما من زعلها مني عادي تطلعني شيطان..!! و انتِ بـ تفتحين اذنكـ لها و تسمعين كلامها و بـ تزعلين علي..؟! ليش انا ضايقتكـ بـ شيء..؟! جبت لكـ طاري الحمل و العيال..؟! ما قد فتحت معاكـ الموضوع ابداً .. ندى صدقيني ما يهمني لو تجيبين لي بس بنات.. انا ماني جاهل و لاني رافس النعمة.. و البنات نعمة من ربي.. تتوقعين اني تزوجتكـ عشان تجيبين لي ولد..؟! صدق ان فكرة الزواج هي فكرة امي و ما انكر ان امي تبي لي ولد.. و هي قررت تخطب لي.. بس هذا ما يعني انه تفكيري انا بعد..!! و توصل بعد لأني اخليكـ تجيبين لي ولد و ارميكـ ..؟! هذا ظنكـ فيني..؟! يعني صدق ما صار لنا سنين مع بعض.. بس فيه اشياء لو احد يجي و يقولي ندى سوت ما اصدقة.. لأني اعرفكـ من هالإسبوعين و زود اللي عشتها معاكـ .. هالإسبوعين ما دللت لكـ اني ما اسوي هالفعول..؟!
بكت زيادة ما تحملت حتى نبرة صوتة تلومها..!! هي غبية عارفة ان علاقة ريما بـ ابوها متوترة ليش تصدقها..!!؟ عدا ان امال من زمان تعاني من مشاكل حملها ليش ما تزوج عليها من زمان اذا زواجة عشان الولد وبس..!!! ما رفعت عيونها و لا ردت عليه.. اما هو نطق بـ هدوء عكس زعلة منها : انتظركـ بالسيارة..!!
..
صرخ عليها : و بعدين معاكـ انتِ..؟!
لينا ما تبي تبكي عنده : خير ويش تبي زود بعد..!؟ ما بقيت شيء ما اخذتة فكـ عني ترى زودتها حيل..!! ترى حياتي ما تهمني يعني ممكن اقتلكـ و افتكـ منكـ اللي مصبرني هاليومين بعد اللي سويتة فيني هو هالبنت اللي من لحمي و دمي.. و الا لو ماهي فيه كنت قتلتكـ قبل لا تلمسني..
: اووووف ما تملين قرقرقرقر.. انتِ شلون صابر عليكـ ابوكـ ..؟!
طنشتة لينا ما تبي ترد عليه فوق اللي سواه يقلب جروحها بدم بارد و لا يهمه شيء..!!
اطلق تنهيدة وصلت لمسامعها و هي جالسة على الكنب بـ حضنها بنت عماد : اسمعيني زين..!!
قاطعتة بقوة : انت اللي اسمعني زين.. انا ابي حبوب منع حمل.. تفهم هالشيء و الا لا..؟!
جلس على السرير وهو يناظرها بـ ملل اسلوبها زفت ما تشوف ابعد من أرانبة انفها : طبعاً لا انا ابي ولد..
لينا على مشارف البكاء : تأكل تبن و الله لو حملت منكـ لأذبح نفسي..!!
: اذبحي نفسكـ بعد ما تجيبين لي ولد.. بعدها بـ كيفكـ انا رجال طبيت الثلاثين من حقي يكون عندي ولد..!!
لينا : انقلع تزوج و جيب ولد انا ايش دخلني..!؟
: انتِ زوجتي..!! فاهمة و الا لا..؟! صراخكـ و بربرتكـ ما راح تفيدكـ بـ شيء حقي و بـ أخذة منكـ و لا همتيني.. و ولد ان ربي كتب لي بـ تجيبين لي و رجلكـ فوق راسكـ ..!!
بكت..!! : انت ليش تسوي فيني كذا..؟! حرام عليكـ ما عندكـ خوات..؟! اهلكـ ما ربوكـ على الدين..؟! انا احس اصلكـ طيب تعرف ربكـ بس ليش تسوي فيني كذا..؟! ليش ما تخاف ربكـ فيني..؟!
وقف حتى يتجة لها وهي تناظر بنت عماد و تبكي جلس على الطاولة قدامها : ويش اسوي فيكـ اذا انتِ تعانديني..!! انتِ مو مستوعبة اني جالس احميكـ..؟! لو ما تزوجتكـ كنتِ ميتة من زمان..؟! كان اغتصبوكـ و كسروا ظهر ابوكـ فيكـ ..!! انتِ مو مستوعبة اني مجلسكـ هنا عشان احميكـ من الكل..؟! لو بـ يدي طلعتكـ من هنا.. بس مو بـ يدي يا لينا..!! و الله العظيم مو بـ يدي..!! انتِ هنا زيادة حمل علي ..!! لا تحسبين اني فرحان بإني حاطكـ هنا..؟! انا احاول ما اطلع من المقر كله عشان ما احد يتغافلني و يدخل عليكـ .. و ياليتكـ تفهمين كل شيء من عمركـ صار لك فوق الست شهور هنا احميكـ لكن انتِ بزر ما تفهمين شيء..!! ويش اسوي فيكـ ..؟!
رفعت عيونها له : وديني لـ بابا و الله ما راح اقوله عنكـ بـ قولة انكـ حميتني وما احد طالني.. ما راح اقوله عن اللي سويتة فيني..!!
تنرفز منها : ويش سويت..؟! حقي ترى حقي..!! استوعبي يا ادمية وريتكـ العقد و غصباً عنكـ تعطيني حقوقي..!!
تحاول تلعب على وتر ثاني : طيب ..!! متى بـ تردني لأهلي..!! اذا انت صادق و تحميني منهم.. و طيب .. متى بـ تخلصني منهم..؟!
: قريب بإذن الله قريب..!! ادعي لي بس..!!
نطقت بـ صدق من اعماق قلبها : يـــارب..!!
ابتسم وهو يناظر بنت عماد : تشبه امها حيـل..!!
ما انتبه للي قاله انه صدمها ..!! : نعــم!! و انت ويش عرفكـ بأمها..؟!!
ناظرها مستغرب منها..!! غبية هالبنت و اكبر غبية قابلها على وجه الأرض : ليش..!! تغارين..؟!
بوزت : لا طبعاً اكيد شايفها يوم خطفتوها..!! يا ويلكم من ربي استبحتوا اعراض خلق الله..!! و الله لو تطيحون بـ يد عماد لا يوريكم نجوم الليل بـ عز الظهر..
حط رجل على رجل : و الكوبة بـ ولد عمكـ ..!!
لينا تمسح على جبهة البنت بـ حضنها و تناظرها : عشانه مو هنا تسبه بـراحتكـ لكن لو هنا ما اشوف الا غبرتكـ ..!!
: هههههههههه يعني بـ تغيضيني عشاني اثرت غيرتكـ بـإني اعرف وعد..!! خليه يجي و بـ تشوفين انتِ غبرتي و الا شيء ثاني..!!
لينا تصر على اسنانها و تناظرة بـ قوة : ما يكفي اللي اخذتة مني.. بعد تطري حرمة ثانية قدامي .. ياعل لسانكـ القص.. (رفعت يدها تهددها وهو مبتسم و لا هامه) شوف انت ما تهمني.. و لا تعني لي شيء..!! حتى بعد اللي سويتة فيني لأن انت اصلاً مو رجال لو رجال ما خطفتني من ابوي يا سويد الوجه..!!
مسك كفها اللي رافعتة بـ وجهة تهددة و ضغط عليها بقوة و سحبها يمه : مليون مره اقولكـ صوتكـ لا ترفعينة عندي.. و لسانكـ لا تطولينة علي.. ترى ما عندي صبر يا لينا و اتحملكـ ماني غازي يشوف خطاياكـ و يدمح لكـ لا اصحي.. انا غيـــر..!! و الله لا أربيكـ من جديد..!!
شدت يدها من يده و المتها زود : يا حمار تبي تكسر يدي..؟!
فتح عيونة فيها عمره ما شاف بنت زي هاذي..!! عليها طوالة لسان مو هامها شيء و لا خايفة : نعم..!! ويش قلتِ..؟!
شالت البنت و نزلتها على الكنب جنبها.. و تضغط على كفها اليمين بـ كفها اليسار تخفف الألم : قلت لكـ حمار هو انت ما تستوعب..؟! لازم اسبكـ كم كره عشان تستوعب..؟!! حمار حمار حمار حمــ ـ ـ ـ (قطع كلامها بإنه حط كفة على فمها و ضغط عليها لين رجعت وراء و راسها على ظهر الكنبة و يده على فمها بلعت ريقها وهي تشوف نظراتة يطلع منها الشر )..
صر على اسنانة بـ قوه ما قد احد كلمة بـ هالطريقة يبي لها تأديب من جديد : احسن لكـ .. ما ابي امد يدي عليكـ ..!! ما تعودت على هالإسلوب بس لو اضطريتيني ماني متردد..!! فاهمة و الا لا..!!
انرعبت..!! ما قدرت ترد حست بـ رجفة تسري بكل جسمها و عيونها بـ عيونة..!! ينولد احساس جديد!! من التناقض بين الأمان معه و الخوف بدونه..!! دمعت عيونها.. رفع يدة عن فمها : لا تحديني على شيء ما ابيه..
همست بـ ضعف : انا.. أكرهكـ ..!!
ابعد يده عنه و وقف : ما طلبتكـ تحبيني.. ابي احترام و بس.. لسانكـ لا تطولينة..!!
..
عماد دخل وهو معصب : خلااااص عاااد حلووو عني..!!
عامر وقف اول ما دخل : وين كنت..!؟
عماد بـ نفس العصبية من اختفت بنتة وهو يضرب اخماس بـ اسداس و لا يحاول انه يهدأ و يستوعب شيء : ماني بزر عشان تتبعوني و تنشدوني وين كنت..!!
عبدالله صرخ عليه : انت استخفيت..؟! ترفع صوتكـ على ابوي..!!
عماد : انتم لا تطلعوني من طوري..!! حلووو عني.. تراكم خانقيني..!!
ام ناصر : تعوذ من ابليس يا ابوي.. احنا خايفين عليكـ لا تسوي شيء بـ روحكـ ..!!
عامر : فيه عاقل يسوي سواتكـ ..؟! انت تبي تحدني اسوي شيء ما يرضيكـ يا عماد..!!
عماد : ما طلبت مساعدتكم في شيء.. انا ابي بنتي.. ابي بنتي و بس..!!
ناصر : و باللي تسوية بـ تلقى بنتكـ ..؟! انت عارف ان بنتكـ معاهم.. و اللي تسوية سواة مجانين..
عماد : مالكم دخل .. ما طلبتكم تلفون وراي..!!
ام عامر : يا وليدي استهدي بالله.. انت ضيعت عقلكـ ..؟! حرام عليكـ اللي تسوية بـ نفسكـ و بـ أبيكـ و اميتكـ ..
عماد ما زال على نفس وتيرة صوتة فقدان بنتة مطير الباقي من عقلة : يمــــــه.. ما ضيعت عقلي.. انا ابي بنتي.. شلون تبوني اجلس و هي عندهم..؟! انتم ما تعرفونهم..؟! ما تعرفونهم..!! و الله لا يذبحونها بـ دم بارد..!! يرمونها بالصحراء و لا يرف لهم جفن..!! عمرها يومين.. يومين.. مين بيرعاها..؟!!
ناصر : تروح تلف بالشوارع توريهم صورة بنتكـ تنشدهم ان كانوا شافوها..؟! تلف دور الأيتام تنشد ان كان جاتهم بنت هاليومين تشبة بنتكـ ..؟! هاذي سواة انسان صاحي..؟!
عبدالله : الناس كلها تحكي انكـ صرت مجنون و فقدت عقلكـ مع بنتكـ ..!!
عماد : طيب خلاص انا مجنون.. انتم ويش عليكم..؟! انا ما راح ارتاح اذا ما رجعتها.. ما راح اتطمن..!!
ناصر : و الإسلوب اللي تتبعة خطأ .. جيبوا العصابة تجيب بنتكـ منهم..!!
ام عامر : يا وليدي يكفي مريتكـ منهبلة على اهلها.. لا تسوي هالسواة و تخوفنا عليكـ ..!!
عماد بـ حدة : لا احد يجيب لي طاريها.. ما جاني من وراها الا الشقا..
عامر : اسمع الكلام اللي يجمد على الشارب.. لو ما انثبرت مكانكـ بدال ما تلف السكيك تالي الليل تدور عن بنتكـ كنكـ خبل ما تلوم الا نفسكـ يا عماد.. لا تخليني احبسكـ بالبيت و الله يا عماد لو اضطريتني لا اسويها مانيب متردد..
عماد : ما عاد الا هي يبه تحبسني.. انتم ما احد فيكم حاس بـ وجيعتي..!! ما احد فيكم حاس بـ قهري.. بنتي صغيرة..!! عندهم.. عندهم..!! و الله ما يرحمونها..
عامر : بـ نلقاها يا عماد.. بس فكر بـ عقلكـ لا تسوي سواة المهابيل.. ما راح تستفيد شيء..!! هم ما سوو هالسواة الا يبون يقهرونكـ .. يبون يكسرون ظهركـ مثل ما كسرو ظهر عمكـ ..!!
يكسرون ظهركـ مثل ما كسرو ظهر عمكـ ..!!!! ما انتبة انه افشى سر مخبى عن الكل.. كل الأنظار تعلقت بـ عامر.. عدا عماد اللي جلس وهو يناظر الأرض..!!
ام عامر تناظر ولدها بإستفهام : ويش بلاه اخوكـ ..؟! ويش سوو فيه..؟!
عامر استوعب اللي قالة..!! : ويش..؟!
ام عامر احتد صوتها مفزوعة : اخوكـ ويش بلاه..؟! هو من يومين ما شفتة..؟! ويش سوو فيه اللي ما يخافون ربهم..؟!
عامر : ما فيه الا العافية يمه.. غازي بخير ما عليه شر..
ام عامر : رجيلاتي ماهي شايلتني .. قلي ويش بلاه اخوكـ لا تخبي علي..!! لا تفجعني فيه..
عامر اقترب من امه و باس رأسها مد ذراعه على ظهرها المنحني و ماسك كفها اليمين بكفة اليمين : و الله ما عليه خلاف..
ام عامر : لا تكذب علي.. سمعتكـ بأذوني ويش قلت.. ما بعد خرفت يا ولد بطني.. تكذب على اميتكـ .. ويش مسوين بـ أخوكـ علمني.. و الله اني حاسة فيه موجوع.. قلي ويش بلاه..
عامر يجلسها و يجلس جنبها : استهدي بالله يمه.. ما به بلا.. لو به شيء ما كان داوم و لا تزوج..
ام عامر : دق عليه.. دق عليه الحين يجيني.. ما راح اكن لين يجيني..!!
عامر : طيب هدي لا يرتفع ضغطكـ .. ناصر دق على عمكـ قوله يجي..
عامر يناظر بـ عماد يمسح على وجهة و كأنه يمسح واقع يعيشة..!! مقهور عليه استخف يدور بالشوارع يدور على بنتة وهو يدري انها معاهم..!! متوقع انهم رامينها بأي مكان يلف دور الأيتام يسأل اذا جوهم اطفال جديدين.. يروح المساجد يسأل الناس يلف كل مكان و يدور..!!
عشر دقايق بالضبط حتى يدخل غازي و معاه ندى.. كلمه ناصر وهو رايح يوصل ندى لكنه غير طريقة لـ بيت اخوه خاف يكون بأمه شيء..!! فتح الباب شوي : يــــا ولد ..
دخلوا الحريم كلهم عدا البنات اللي اساسا محرم لـ غازي و ام عامر.. ناصر : حياكـ عمي..
دخل مفزوع وهو ينقل نظراتة بينهم : خير .. خير ويش فيكـم..!!
عامر وقف يبه يهدية : ما فينا شيء الله يهديكـ ..
ام عامر مدت يدها و تقدم لها غازي بسرعة .. ام عامر : ويش بلاكـ يا ابوي..؟!
غازي ماهو مستوعب..!! : انت ويش فيكـ يمه .. تونسين شيء..؟! راسكـ يعوركـ ..؟! ضغكـ مرتفع..؟! ويش بلاكـ ..؟!
عامر : استهدي بالله انت الثاني.. بس امي تبي تطمن عليكـ لكـ يومين ما جيتنا بس..!!
غازي انتبه لـ نظرات عامر ماهي طبيعية وكأنه ينبه لـ شيء بس مخة موقف ماهو مستوعب..!!
ام عامر تمسح على عضد غازي بـ يدها اليمين : ويش بلاكـ .. انا لي فترة حاسة ان بكـ بلا مخبية علي.. قلي ويش منه تشكي.. بـ ويش كسروا ظهركـ اللي ما يخافون ربهم..!!؟
غازي رمش وراء بـعض يستوعب .. تنهد وهو يناظر عامر.. معقولة عامر يكون قايل لها..؟! : تعرفين ولدكـ ما احد يكسر ظهرة.. و لا فيني بلا مير الشغل هاليومين مع خطف البنية معكرني..
ام عامر : لا تكذب علي.. و الله انكـ تونس بلا.. ويش اللي كسروا ظهركـ فيه..؟!
عامر : قولها إلى متى بـ تخبي.. مردهم يعرفون..!!
غازي : عـــامر..!!
عامر : كنكـ ما تعرف امي.. و الله ما تخليكـ تعتب خطوة و هي ما عرفت وجعكـ وش هو..!!
ندى الواقفة عند الباب استحت تتقدم او تطلع حتى..!! حاسة شكلها غلط خصوصاً انها كانت تبكي..!!
عامر ناظر انهار و عهود : بنات خذوا مرت عمكم و ادخلوا..
انهار وقفت و وقفت معاها عهود : ان شاء الله .. يالله ندى..
مشت معاهم ندى وهي ما ودها تدخل.. شكلها الحايس وهي مالها كثير متزوجة لازم تكون بطلة جديدة كل مره.. طنشت تفكيرها عندها اشياء اهم تفكر فيها بدل هالتفاهات..
ام عامر : علموني.. يالله قول ويش عندكـ ..؟!
عامر ناظر عيالة الواقفين : اجلسوا.. و لا احد فيكم يحكي بـ كلمة وحده قبل تقضي السالفة..
تبادلوا النظرات و جلسوا مقابل لأبوهم و عمهم و جدتهم يترقبون الحكي اللي بـ يكون مصيبة اكيد.. و الا ما حكى ابوهم هالمقدمة و لا قالوا انها كسرت ظهر عمهم..!!
عامر : باليوم اللي قالت لنا لينا انها انحاشت من المزرعة مع واحد..!!
اتسعت عيونهم عبدالله.. ناصر.. اما عماد فـ هو يعرف القصة .. لكن هالبداية ما يعرفها يعرف ان لينا مع العصابة و بس .. انشد انتباهة للموضوع.. ارتكزت العيون على عامر عدا غازي اللي يناظر الأرض ينزف وجع.. كل يوم.. هو وحده يعانية.. ما احد يخفف عنه او يشيل عنه هالهم.. لأنه هو ابوها لحاله.. و اللي المفروض تقاسمة هي امال وهو مخبي عنها الموضوع و متحملة لحاله..
ام عامر بـ حده : كنت حاسة ان هالمغضوبة وراء هالسالفة زوجناها و لا ارتحنا منها حسبي الله عليها كانها بـ تفضحنا..
غازي فزع : لا يمه تكفين.. لا تدعين عليها.. يمه ما تدرين ويش هي القصة.. يمه لينا هم خاطفينها.. لينا معاهم هم.. ما انحاشت هم اخذوها من المزرعة..
ام عامر : وش هو..!!؟؟!!
غازي : اخذوها يمه ما حميتها.. كل هالمدة هي عندهم سبع شهور وهي عندهم..!! ما قدرت اوصل لها..!!
ام عامر و الصدمة باينة على وجهها..!! سبع شهور مخطوفة..!!: بس انت قلت لي انكـ زوجتها للي راحت معاه..؟!
ناصر الدم يفور بـ عروقة و يحاول يكتم عصبيتة من اللي يسمعة انحاشت مع واحد..!! انخطفت..!! : ممكن تفهمونا اصل السالفة ويش هي..؟!
عامر : صحيح زوجها بس لـ واحد منهم..!!
ام عامر وقفت وهي تستند بـ قوة متهالكة : ويش يعني..؟! بنتينا مع من..؟!
غازي : مع نفس الرجال اللي خطفوا بنت عماد.. نفسهم يمه.. جوني و طلبوني ازوجهم اياها و زوجتها لهم..!!
عبدالله وقف صرخ بـ عمة : من جدكـ انت..؟! احنا ننقد على عماد يسوي سواة المجانين.. طلع يا عم ما تباعدة..
عامر وقف : اوص و قص.. لسانكـ ما يطول على عمكـ يا قليل الحيا..
ناصر : يبه.. عرضنا.. عرضنا.. تقولون زوجتوها لـ واحد فيهم..؟! شلون..؟! سبع شهور البنت عندهم..؟! سبع شهور..؟! ما فكرتوا ويش بـ يصير..؟! تزوجونها..؟!
غازي وقف : ماني ملزوم ابرر لأحد فيكم.. بنتي فجيعتي فيها اكبر من فجيعتكم كلكم.. و املي بعد الله انه يحميها هو.. انا واثق فيه.. بـ يجي يوم و يردها لي..!!
ام عامر التفت عليه : من هو..؟!
غازي : زوجها..!! (طبعاً غازي يقصد وليد..!! حسب الرسالة اللي وصلتة من وليد تطلبة يوافق على الزواج و حكي الشيخ)..
ناصر واقف جنب عبدالله : كذا بـ هالبساطة..؟!! و الثقة جات من الفراغ..؟!! تقول مزوجها لـ واحد فيهم..!؟ و تقولون انهم عصابة شر..!! و واثق فيه..؟! و واثق ان عرضنا ما ينداس بينهم كل يوم..؟!!
عامر بـ حدة : نــــــــاصر..!!
غازي بـ هدوء يحمل تهديد عظيم .. رفع سبابتة يهدد عيال اخوة : اللي فيكم يجيب طاري بنتي بالشينة و الله يحرم علي اسلم عليه لين يواريني التراب.. (لف راسة لـ وراء و صرخ) نــــــــــــدى..!!
..


بيت ابو سعود.. بالحديقة قدام الباب تحديداً..
فيصل ناداها بعد ما قالت له امه انها تبكي و ما سكتت : نهى ايش هذا ما توقعتكـ ضعيفة هالكثر..؟! البنت بـ ترجع ان شاء الله..؟! بتبكين بـ تزيدين على اختكـ ما راح توقفين معاها بهالشكل..
نهى تبكي : موجعني قلبي عليها.. بس اخواني يعطونها مهدئ واحد وراء الثاني لأنها كل ما صحت صرخت تبي بنتها..
فيصل : ويش تبينهم يسوون..؟! رغم انها من الأفضل تواجة الموقف.. صح صعب عليها تتقبل الموضوع بس الأمن جالسين يسوون اللي عليهم و يتعبون عشان يلقون البنت..
نهى واقفة بالحديقة قبالة : طيب وهي ايش ذنبها يا فيصل..؟!
فيصل : مالها ذنب ما احد له ذنب..!! يعني عمي له ذنب يوم هي انخطفت منه..!؟ او يوم انخطفت ميار منه كان له ذنب..؟! بس هذا المكتوب.. لازم توقفين جنبها و تقوينها لو شافتك تبكين انتِ و خواتكـ بتزيدونها ما راح تخلونها حتى تسكت.. يكفي عليها وجعها..
نهى : ما أقدر.. و الله ما أقدر..
فيصل : ان الله اذا احب عبداً ابتلاة.. لازم تصبرن عشان هي تتأثر فيكن و تصبر معكن صياحكن يأثر عليها.. امكن وينها..؟!
نهى : معاها تجي العصر و تروح على 12 .. اذا طلعت أبوي يستلم الدور و يجلس معاها..
فيصل مسك كفها يشد عليها : تعالي اجلسي..
جلس على درج مدخل البيت و هي جنبة .. فيصل : تبينا نروح البيت..؟!
نهى : لا.. ابي اقعد هنا..
فيصل : اخاف قعدتك تضرها ما تنفعها..
نهى مسحت دموعها : لا فيصل الله يسعدكـ خلاص ما عاد ابكي..
: يا عيني على طيور الحب..
لفوا عليه وهو مبتسم بس بدون نفس يبي يغير جو عن اللي يعيشونة بالبيت.. فيصل : قل لا إله الا الله لا تنضلنا..
مشعل جلس بوسط الدرج بينه وبينهم مسافة بسيطة : لا إله الا الله.. تصدقون عمري في حياتي ما تخيلت بـ نعيش شيء زي كذا.. دايم كنت متفائل حتى بـ خيالي.. ما قد توقعت بـ نعيش احداث مثل هاذي.. ميار يوم انخطفت ما كنت ادري يعني الموضوع فترة و تسكر خصوصاً مع طلاق ابوي و خالتي رغم انهم ما نسوها وما رجعت الا بعد 21 سنة.. اتخيل وعد بعد 21 سنة تشوف بنتها..
نهى وقفت .. رجعت تبكي من جديد : لا تقول كذا.. ان شاء الله لا..
فيصل يناظر مشعل وهو ماسك كف نهى يبيها تجلس و يكلم مشعل بـ هدوء : لا تقول هالحكي.. ان شاء الله بـ ترجع قريب..
مشعل : ان شاء الله.. متأمل خير فيه..
فيصل عقد حواجبة بإستغراب : في مين..!؟
مشعل : بـ سوبر مان..
نهى : تتريق حضرتكـ ليش حاسبنا لنا مزاج نسمع نكتكـ السخيفة..!؟
مشعل يقصد وليد بس ما يبي يعلم الإثنين .. وقف : حلي عني بلاش نفسيات تزيد الهم..
دخل مشعل البيت و نهى واقفة و تتحلطم وتسبة .. نهى : يا حمار انا نفسية ما غيركـ النفسية ابو مليون مزاج..
فيصل : و بعـــدين..؟! نهى اركدي..
نهى جلست : انا راكدة ما أحتاج تعلمني..
فيصل يجاريها : ايه صح راكدة.. انا خبل بس اقعدي..
نهى : فيصل لا تعاملني هالشكل.. و تستفزني..
فيصل يقهرها : اوووه انتِ الباردة مين يقدر يستفزك..
ودها تقوله انت ما احد غيركـ يقدر علي لكن ما تبيه يعرف عشان ما يستغل هالشيء فضلت تسكت..
داخل في الصالة.. ابو سعود جالس عند راس وعد النايمة تحت تأثير المهدئ..
بيتهم انقلـــب من جديد رجع له هدوء غير مرغوب فيه ايام خطف وعد نفسها تنعاد الحين وعد ماهي محتملة.. مصيبة وعد و مصيبة سها الإثنين جاتة مع بعضها.. ناظر عيالة اللي ما كن اثنين منهم عرسان طول الوقت عنده : اطلعوا لـ حريمكم ويش يقعدكم هنا..؟!
ياسر اساساً يبي الفكة من مقابلها ما يبي يشوفها : راسي مصدع ما فيني اقوم..
ابو سعود : قوم ريح بـ جناحكـ ..
سعود وقف : انا بـ اريح قبل الفجر.. اذا استجد شيء كلموني..
ابو سعود يناظر ياسر : فز حتى انت..
ياسر يبوس راسة : على امركـ ..
ابو سعود يناظر الباقين واضح عليهم التعب..خالد منوم عيالة بـ حضنة.. مشعل منسدح على رجل احمد و بناتة هاديات كــلهن.. : قوموا كلكم ناموا..
احمد : انا بـ انام هنا يمكن تصحى..
ابو سعود بـ حدة خفيفة : ايش فيكم لازم اعيد و ازيد بالحكي.؟!.. لو صحت و انهارت بـ اصحيك و يمكن يكون حاتم رجع من دوامة وما نعتازكـ قوم ريّح.. يالله قوموا كلكم..
ما احد فيهم تحرك.. قاعدين ما يبون يناقشونة و يعصب.. ما يبون يتركونها و يتركونة..
ابو سعود : يالله.. و انتن بعد قومن..
جود قامت و جلست جنبة : انا بـ اقعد عندك..
ابو سعود : ويش فيكم انتم..!؟ صار لنا كم يوم ما احد فينا ارتاح.. خالد يالله خذ عيالك و نومهم فوق..
خالد ينهي النقاش : مرتاحين هنا..
دانه وقفت باست راس ابوها و امها و خالاتها ام سعود و ام حاتم الموجودات اما منيره بـ جناحها : تصبحون على خير..
: و انتِ من اهله..
بـ جناح سعود..
شوق : يا حياتي مره محزنتني.. كل ما شفتها تبكي ودي اطلع من البيت و لا اسمعها..
سعود يفرك راسة : راسي بـ ينفجر.. حسبي الله ونعم الوكيل..
شوق جلست عند راسة : تبيني اهمز لكـ..؟!
سعود سحب المخدة و حطها على رجلها : همزي لي بـ قوة مو زي دايم ما احس في اصابيعكـ ..
شوق : اخاف اوجعكـ ..
سعود : ما عليكـ يالله..
شوق تضغط بأصابيعها على راسة .. سعود : اقوى شوق..
شوق : طيب.. كيف عماد..؟!
سعود : هايت من مكان لـ مكان يدور عليها.. جاء مكتب ابوكـ اليوم هلكان.. و ابوكـ ما رحمة هاوشة لين قال بس..
شوق : ليش يقسى عليه حرام..؟!
سعود : يعني سواتة زينة..!؟ هذا مو اسلوب هو خايف لا يحطونها بـ دار ايتام مر عليهم مرتين امس و اليوم يبي يتأكد يمكن جابوا لهم احد بعد ما طلع من عندهم..
شوق : ما احد يقدر يلومة هاذي بنتة.. ما لحقوا يفرحون فيها حتى يفقدونها.. حرام البنت صغيرة.. يعني ابسط شيء ما يعطونها حليب و يخلونها تصيح و الله تروح فيها..
سعود فتح عيونة : شوق هالكلام ما ينقال عند وعد ماهي ناقصة الهواجيس ذابحتها..
شوق فزعت : مستحيل اقول شيء كذا عندها.. مانيب غبية..
سعود : زين حاسبي على كلامك عندها..
شوق : ان شاء الله لا تخاف من هالناحية.. بس عمي..!! ما تحسة تعبان..؟!
سعود : واجد.. حتى الشركة ماسكينها عماني وهو ما وده يطلع من البيت..
شوق : و انت..؟! ما ترتاح يعني تطلع من الفجر وتروح و ترجع للدوام لين تالي الليل ما تريح نفسكـ شوي.. سَعُود تكفى الله يخليكـ لا تهلكـ نفسكـ اخاف يصير لكـ شيء و الله ما اتحمل..
ابتسم وهو يناظر عيونها مرات يحمد ربه انه ما تزوج من زمان عشان شوق بـ تكون صغيرة يعني ما هي من نصيبة يقلد طريقتها بـ نطق اسمه : سَعُود يقولكـ ما فيه داعي تقلقين عليه..
جناح ياسر.. النقيض تماماً..
ياسر اخذ الكاسة من يدها بلع حبتين البنادول و شرب المويا على طول : الحمدلله..
جالسة على طرف السرير ثانية رجولها تحتها ودها تكلمة تقولة أي شيء يخفف عنه لكنها متأكدة اللي بـ تقولة مهما كان اهميتة بـ يزعجة لأنها هي اللي قالتة صوتها ينرفزة مثل ما يقول..
ياسر : صحيني قبل لا يأذن بـ عشر دقايق.. و طفي النور و ياليت ما تطلعين أي صوت خلي البيبان مفتوحة عشان ما تزعجيني اذا دخلتي او طلعتي..
بلعت ريقها وهي تنطق بـ همس.. رفعت يدها وهي ضامة كل اصابعها و فاتحة السبابة بس : ممكن..!!
نطقت اربع حروف كنها اربع مطارق في راسة تنضرب مع كل حرف يسمعة منها.. شد الصداع عليه : خير.. ياليت تكتبين اللي تبينه بـ ورقة يا صبــــا..
صبا سحبت النوتة و كتبت فيها رغم انه يسلب حقها بس راح تصبر عشان هالفترة ماهي حمل مشاكل زيادة "انا عندي اختبار بكره و ابي اداوم اذا ممكن"..
مدت النوتة عليه و اخذها قرأ الكلام.. مد النوتة عليها : متى اختباركـ ..؟!
من غير لا تأخذ النوتة : تسعة..
ياسر غمض عيونة بـقوة .. جلس : انا كم مره لازم اعيد حكيي عشان تستوعبين..!؟ صبــــا انا محذركـ استوعبي يا ادمية.. صوتكـ يستفزني.. يضااايقني.. (ضرب راسة بأصابيعة وهو يناظرها) زاد صداعي بسبتكـ ..
صبا خافت منه و من صوتة و فقدت سيطرتها بدل ما ترد عليه مثل ما هو يبي ردت بالطريقة اللي يكرهها : و الله.. نسيت..
ياسر بـ حدة قوية تخليها ترجف : نسيتي...؟!! توني متكلم.. و تردين علي نسيت..!؟ غبيــــة..؟! ما تستوعبين..!؟ راسكـ ما فيه مخ..؟!
صبا هزت راسها و هي فاتحة كفوفها قدامها .. ماسكة نفسها لا تبكي ما عمره احد صارخ عليها.. دايم في بينتهم مدللة.. ما احد يهاوشها حتى لو غلطت يعاتبونها ممكن لأن طبعها الرقيق العتب عندها شيء قوي حيــل و يأثر فيها.. اما صراخ..!!
..
ايمن وقف مصدوم : انت ويش تقول..؟!
الصقر : اللي سمعتة.. ويش فيكـ ..؟!
ايمن : ما تحس انكـ مزودها علي..؟!
الصقر : لا.. قلت لكـ انا ما اعدكـ الا ولدي.. ايمن.. انا مرتاح لكـ .. انا مقبل على عملية جديدة.. ممكن روحي تروح فيها و ابي أأمن على بنتي قبل لا ادخلها..
ايمن : ماشاء الله و تأمن على بنتكـ بأني اتزوجها..؟!
الصقر رفع حاجبة اليسار وهو حاط رجل على رجل : ليش ان شاء الله..؟! ويش اللي ماهو عاجبكـ في بنتي..؟!
ايمن مصدوم : و تسألني بعد ويش اللي ماهو عاجبني..!؟ بنتكـ بزر.. بزر
الصقر : بس ملكة بـ تكون على ذمتكـ و اذا كبرت سوو الزواج..
ايمن : لا انت اكيد تستهبل انا مستحيل اتزوج وحده قاصر .. ما وصل عمرها 10 سنين..
الصقر : لا يا روح ابوك عمرها 12 سنة مو 10 .. شكلها يعطي انها اصغر من عمرها..
ايمن جلس وهو متنرفز يبي يحل موضوع بنت اختة عشان يجيب الصقر مصيبة ثانية على راسة ويطلبة يتزوج بنتة : بس انا ما افكر اني اتزوج اصلاً..
الصقر : طيب حلوو.. لأن هي عمرها 12 من هنا لين تفكر تتزوج تكون هي كبرت و بـ عمر زواج..
ايمن رفع عيونة لـ الصقر : و اذا قلت لا..!!
الصقر : ترد ابوكـ ..؟! ايمن انا ما عندي الا هالبنت.. شايف كم عمري..!! ما صفا لي الا هالبنت.. كان عندي بنتين اكبر منها بس ..!! اقتلوهم.. لو هن عايشات كنت خليت اختهن عندهن و خبيتهن بـ عيوني..!!
ايمن عقد حواجبة : اقتلوهم..!!
الصقر : ايه.. اقتلوهم..
ايمن : مين..؟!
الصقر : ما عرفتهم للحين.. لكني شاكـ بـ كم واحد.. لكن و الله لأخليه يشوف بناتة يموتون قدام عينة بـ أشنع طريقة و اخليه يعيش وما ينسى منظرهم..
بلع ريقة..!! خاف .. ايه خاف على خواتة..!! بنت اختة اللي مع بنت غازي و زوجها الحين..!! و اختة اللي بـ يجيبونها هنا عشان يستغلونها..!! يبونها تزرع ادوات تنصت بـ ملابس سعود العسكرية و بـ كذا يقدرون يعرفون ويش يصير بالقضية بـ سهولة..!! بإستغلال وعد.. لازم يرجع بنت اختة بـ أسرع وقت عشان يحميها و يحمي اختة و عيلتة و الأمن.. : ابي اخذ اجازة..!!
الصقر : لا.. انا اقولكـ تزوج و انت تقول تبي اجازة..؟!
ايمن : فكني من موضوع الزواج الحين.. من جدكـ انا وجهي وجه زواج..؟!
الصقر : ماهو بـ كيفكـ .. غصباً عنكـ ..
ايمن وقف وعيونة بـ عيون الصقر : خيــر..!! ما تلاحظ فوق التدريبات اللي هالكني فيها على قل سنع لا تشركني بأي عملية جايبني عشان تجلسني قدامكـ .. و الحين تبي تزوجني بنتكـ ..!! تبي تشرط علي.!! لا يا الصقر انا ايمن المنذر.. تراكـ ما تعرفني عدل.. و الله لأطلع من الباب و لا ارجع لكـ من جديد..
الصقر وقف و اقترب منه : لا تجرب تهددني.. طلعة من غير شوري ما لكـ .. لا تجلس تهدد تدري ان حياتكـ بـ يدي.. اما زواج من بنتي.. عشاني عادكـ رجال بغيتكـ لـ بنتي عشان أتمنكـ عليها بعد عيني..
ايمن صد عنه وهو يتأفف : اووووفففف .. اجل لي موضوع الزواج الحين.. انا ابي اطلع و اشوف الناس..
الصقر : لا ما راح أأجلة .. بـ تروح بكره لـ بنكـ الدم و تسوي التحاليل.. و منها تشوف الناس على قولتكـ ..!!
غمض عيونة وهو يحاول يهدي نفسة وما ينفجر فيه.. رضا الله على غازي لما كان يأمره و ينفجر بـ وجهة و لا يهمه و يقول كل اللي بـ خاطرة.. اما الصقر محاسب على الحرف و النفس..
الصقر : انا رايح اتأكد من كل شغلة لعملية التهريب الجديدة.. (رجع للطاولة اللي كانت قدامة لما كان جالس و سحب جوالة و مفاتيحة) كمل تدريبكـ فاهم..!!
ايمن كتف يدينة : ان شاء الله..
طلع الصقر و طلع وراه ايمن.. ايمن وقف على باب الجناح و الصقر طلع برا المقر.. ناظر بالباب اللي انفتح الجناح المقابل لـ جناح الصقر اللي فيه بنت اختة.. التقت عيونهم بـ بعض..!! لوم..!! عتاب..!! حقد..!! كره..!!
تقدم ايمن خطوة و سكر باب جناح الصقر و اتجه له همس له : رغم اني كارهكـ .. لكن ابي اشوف البنت..!!
: عاد انا اللي طايقكـ ..؟!! وماني جايبها لكـ .. هي بـخير مع بنت غازي..!!
ايمن يصر على اسنانة : جيبها ابيها..
بـ ثقة : لا.. قلت لكـ بـ خير..
ايمن : أي خير و هي مقابلتكـ .. حط بـ بالكـ اني ما راح اسكت عنكـ .. و بـ تشوف..
ادار ايمن ظهرة حتى يمسكة من قميصة من على كتفة و شدة على وراء : لا تهددني.. انا ما اتهدد.. اذا انت مجرد فرخ هنا.. تحت جناح الصقر.. انا اكبر منكـ بـ كثير..
ايمن شد قميصة من قدام و تركة ......... لف ايمن : بـ تشوف مين يضحكـ بالأخير.. و الله ما راح احط لأي شيء أي اعتبار.. و بـ تشوف..!!
..
يضرب على المكتب و يسألة من غير لا يرفع عيونة له : كيفها الحين..؟!
سعود : منهارة..
عساف بـ قهر نابع من قلبة : لو يطيحون بـ يدي و الله لأفرمهم واحد واحد..!! قهروها الله يقهرهم..!!
سعود : ومن سمعكـ ..!! ماني متحمل اشوفها..!! لا زواجتها عدلة و لا تهنت يوم ولدت..!! كل ما شفتها قلبي يعورني عليها يا عساف..!!
عساف : عماد يبي له تأديب .. على كيفة يسوي حركتة الزفت معاها.. ما ادري شلون سكت له و انت عنده..!!
سعود : ويش تبيني اسوي..؟! اتهاوش معاه بـ نص المستشفى و ننفضح بين الناس..؟! زينة يعني..؟!
عساف : لا اجل سواة فيها زينة عاد..؟!
سعود : حتى هو مقهور و كلنا مقهورين.. الأمل بالله كبير.. و بعد الله الأمل بـ وليد..
عساف ضرب كفة بالمكتب : مقهور ما يحط حرتة فيها..!! ويش يحسب ما وراها والي يدافع عنها..!!؟ بناتنا ما ينهانن..
سعود : عساف روّق شوي.. و .. و ..
عساف : و ايش..؟!!
سعود : تراها للحين على ذمتة..!! و هي اختي يا عساف..!! و انت.. تسأل عنها واجد..!!
بلع ريقة أسأل عنها..؟! و هي على ذمتة..!! علميني ليه انا اسأل عليكـ!! .. وأنا عارف رجعتي صعبة معاكـ .. : ايش قصدكـ ..؟! شايفني قليل مروه..؟!
سعود وقف : لا .. تراني ادري باللي كان.. بينكـ و بينها.. و ياليتكـ حجرت عليها يا عساف.. ياليتكـ خذيتها انت.. ما كان هذا حالها..(تنهد) استغفر الله العظيم..
عساف سكت ..!! ما عنده رد عليه..!! حجرت عليها..؟!! ياليت يا سعود..!! ياليت..!! ما كنت تعذبت انا و لا هي تعذبت..!!
سعود : انا بـ روح لفريق غازي بـ أشوف اخر التطورات..!!
طلع سعود و لف عساف للشباك وراه .. يناظر السيارات تحت رايحة جاية كل مين عايش حياتة.. و هو حياتة واقفة عليها.. ما يبي شيء زود عن انها تكون مرتاحة و متطمنة و تعيش حياة كريمة.. يبيها مرتاحة لو مو معاه.. اهم شيء ما تقلق ما تبكي ما تزعل ما تنهار..!! على قوتها اللي يعرفها فيها و عنادها انكسرت..!! قد ايش يتمنى يجبر كسرها.. يجيب لها بنتها لـ حضنها.. يطمن قلبها.. يبي عينها تغفى من غير مهدئات.. اطلق تنهيدة قوية تعبر عن وجعة من وجع روحها..
..



أسيل : ماني مصدقة البنت عليها نحاسة حظ عمري في حياتي ما سمعت مثلها..!!
بندر : استغفر الله ويش هالحكي..؟! ما احد يقول للقدر هالكلام..؟!!
اسيل : استغفر الله مو قصدي .. يعني لا تفهم غلط..
مشاري : حاسبي على كلامكـ اسيل رب كلمة يقولها الرجل لا يلقي لها بالاً تهوي به في نار جهنم سبعين خريفاً..
اسيل فزعت : استغفر الله استغفر الله.. و الله مو قصدي كذا.. يعني بس احس المشاكل ملاحقة البنت.. انا ما اذكر شفتها مبسوطة و سعيدة..!!
بندر : ما بعد العسر الا اليسر.. ربي بـ يفرجها عليها من عالي سماه..
هنادي بـ صوت هاديء اقرب للهمس من الخجل بـ وجود مشاري و راكان.. : يااارب .. الله يطمن قلوبهم و يريحهم..
راكان : و الله قهر.. عاد هالبنت رغم انها كذبت علينا قبل.. الا ان غلاتها عندي غير..
ام مشاري : ايه و الله انها غالية يا عيني عليها.. الله يكون معاها و يصبر قليبها..
أثير : حتى خالتي فاطمه جالسة هناكـ كن ما ودها تجي..
بندر : ما ودها تتركهم.. على ان وعد طول الوقت ينومونها بس تهون على اخوي و عيالة..
أسيل : فاقدتها و الله.. شكلي حتى انا بـ اشيل قشي و بروح بيت اخوي..
مشاري : ويش اللي تروحين هناكـ وهم بـ هالظروف..
أسيل بـ دلع عفوي : عادي بيت اخوي.. و هو قالي تعالي بـأي وقت كلهم طالعين و انتِ الداخلة..
بندر : هيـــه حجية مصدقة روحكـ .. فايق لكـ ابراهيم يدلعكـ .. دوبه في بناتة.. خليه في مصيبتة ما هو فايق لـ بزارين.. روحي تدلعي على نويف..
انقهرت : مالكـ دخل بيني و بين اخوي ما يخصكـ .. و حتى نايف مالكـ دخل فيه..
بندر : لا و الله بـ ذات نايف ماني متدخل فيه بكف نفسي عنه لا خير و لا شر.. لأني لو بـ اتدخل بـ انصحة ما يبلش عمره فيكـ عوبا و لسانكـ طويل.. خليه يـاخذكـ و يفكنا من شركـ ..
اتسعت عيونها مقهورة منه و من اسلوبة معاها.. حتى بعد ما تزوج ما خلاها بـ حالها.. : لا و الله انا الشر..؟! اذا انا شر مثل ما تقول فا انت محراكـ الشر .. انت ساس البلا و المصايب كلها..
ام مشاري : أســــيل عيب عليكـ .. شوفي الفرق اللي بينكـ وبينه بالعمر.. لو متزوج من سنين عيالة اكبر منكـ ..
أسيل وقفت : و ليش ما تقولين له هو.. يناقرني.. ويش قلت له انا..!!
بندر : تكفين لا تصيحين.. حزنتيني..
هنادي همست : بندر حرام عليكـ زعلتها..
بندر مبتسم .. و ابتسامتة تستفز أسيل يكلم هنادي : ما عليكـ هاذي ما تحس..!!
أسيل : انا ما احس..!! و انا الشر.. و تهاوشوني بعد كلكم.. ما تقولون له ليش يناقرني.. ما كني اختة الصغيرة .. مالت عليكـ و علي بعد.. طلعت من بينهم مقهورة .. و بندر اطلق ضحكة عالية وصلت لمسامعها اكيد و خلت دموعها تنزل مقهورة منه و من نايف اللي ما سأل عنها بعد ما زعلها..
مشاري : بندر خف عليها.. ترى اسيل حساسة لا يغركـ طوالة لسانها..
بندر : مشاري تراني امزح.. و حتى هي تعرف هالشيء..
مشاري : هي ماهي واحد من اخوياكـ تمزح معها مزح ثقيل.. تراكـ محسسها انها ما عندها مشاعر.. ابصم لكـ بالعشرة الحين انها تبكي..!!
بندر وقف مستغرب : لا تقول.. معقولة تبكي..؟!
مشاري : ايه و لا تروح لها.. بـ تتضايق زود..
تحركـ بندر و مسكتة هنادي من معصمة : لا تروح لها.. بتحرجها زود.. اسمع كلام اخوكـ خلها لين تهدأ و راضيها..
بندر : ويش فيكم ما اتوقع انها بـ تزعل.. هي تعرفني و تعرف اسلوبي..
مشاري : اسلوبكـ مع كل البنات غير بنات اخواني و حتى اثير و معاها غير..
بندر : غير اروح اشوفها الحين..
طلع ماهو مصدق ان وراء روحها الطفولية انسانة نفسية..!! اسيل غير.. عنده هو غير.. من جات البيت وهي مسوية جو في حياتة عكس اثير الهادية وين ما تحطها تلقاها.. سحبت منه بساط اخر العنقود حتى تستحلة هي.. و يليق عليها.. يليق عليها تدلع عليهم كلهم حتى على اخوانة.. طق باب الغرفة و دخل.. لفت و شافتة عطتة ظهرها و تمسح دموعها بسرعة..
بندر : قالوا لي انكـ بـ تكونين زعلانة بس ما صدقت.. معقولة تزعلين من مزحي..؟!
اسيل من غير لا تلتفت عليه : رجاءاً خليني بـ حالي.. اصلاً كلكم تجرحون فيني و لا تقولون اني ما احس..
بندر : مين كلنا..؟!
أسيل : ما لكـ دخل.. خلاص روح و فكني..
بندر جلس جنبها على السرير و باس راسها : من جدكـ اروح و انتِ زعلانة.. و الله ما دريت مزحي بـ يزعلكـ دايم اقولكـ حكي اقوى من كذا ما تزعلين ايش معنى هالمره زعلتِ..؟!
أسيل بكت و هي ما تبي تبكي قدامة : قلت لكـ روح خلاص..
بندر : أسولة .. و الله ما توقعتكـ تزعلين.. تراكـ غالية علي.. اختي الصغنونة.. افا تزعلين من بندر حبيبكـ .. خلاص اوعدكـ ما احارشكـ ابد.. بس انتِ لا تحارشيني.. ما اقدر اسكت عنكـ ..
أسيل تمسح دموعها و ساكتة : ...........
بندر يمسح على شعرها : أسيل عاد و الله ما عرفت بـ تزعلين و الا ما كنت زعلتكـ الا انتِ عاد ما ارضى عليكـ .. فكيها عادي.. خلاص اراضيكـ ويش رايـكـ اعشيكـ بـ مطعم اليوم..؟!
أسيل : خلاص راضية بس روح ابي اجلس لحالي انا متضايقة..
بندر رفع رجولة و تربع على السرير : لا تحاولين تقولين لي متضايقة و تبيني اطلع بعد.. شوفي احنا صدق مالنا سنين معاكم.. بس الدم ما يصير ماء.. انتم اخواني.. و الله اذا متضايقة اني اتضايق معاكـ .. ما يرضيني زعلكـ ..
أسيل : خلاص رضيت بس انا ابي اقعد لحالي..
بندر وقف و سحبها من يدها يوقفها : لا .. قومي اغسلي وجهكـ و بنطلع الحين نمر بـيت ابراهيم و بعدين نطلع نتعشى برا..
أسيل : تجيب لي رضاوة و افقركـ فيها..!!
بندر : ههههههههههههههههههه اوكِ و لا يهمكـ بس مو مره بعدين هنادي تطلبني فلوس من وين اعطيها يرضيكـ اخوكـ عريس ما صار له شهر متزوج ما يصرف على زوجتة..؟!!
أسيل تتعداه : ما احد قالكـ زعلني.. و زوجتكـ دكتورة عندها راتبها..
..
بيت عامر..
ام ناصر : و الله يا خية ما ادري.. بس ما ظنتي عماد بـ يسوي عرسة وهو بـ هالحالة..
اختها : ليش ويش بـ يده.. ما يندرى بنتة متى ترد له.. ما يصير يوقف حياتة..!!
ام ناصر : ما ادري عنه.. ما كلمتة.. صاير نار شابة ما ينتحاكى..!!
البتول : ماهو موجود في البيت..!؟
ام ناصر : الا .. راح لـ مكتب ابوه يدور له شغلة..
قامت البتول : بـ اروح اشوفة.. فيه احد بالبيت من العيال..؟!
ام ناصر : لا يا بنتي..
ام البتول : لا تنزلين عباتكـ ما يندرى يمكن احدهم يجي بأي حزة..
البتول : ان شاء الله..
طلعت البتول من عندهم متجة لـ مكتب عامر عشان تقابل عماد و تفرغ الحرة اللي فيها .. ما تبي عرسهم يتأجل على حساب بنت وعد..!!
ام البتول بـ صوت اقرب للهمس و يدها على ذراع اختها : ياخية انا ما ودي ولدكـ يـكسر بـ خاطر بنيتي.. زواجهم ما بقي له شيء..
ام ناصر : يكسر بخاطرها ليش..؟!
ام البتول : انه يأجلة لـ حزة ما يندرى متى تجي.. ما يهم لو ما يسوي عرس بس انه عشاء بسيط بيننا..
ام ناصر : لا تشيلين هم يا خيه ان شاء الله ما هو كاسر بـ خاطرها.. انا بـ اكلم ابو عبدالله وما يصير خاطركـ الا طيب.. هالأمور بـ يدة هو..
في المكتب دخلت شافتة جالس و سرحان .. تنحنحت .. التفت لها مصدوم من وجودها و بـ مكتب ابوه..
البتول و هي شابكة يدينها بـ بعض : السلام عليكم..
عماد : وعليكم السلام..
البتول : كيف حالكـ ..؟!
عماد : ويش تشوفين..؟!
البتول : تعبان..؟!
عماد يلف بالكرسي يمين و يسار : واجد..
تقدمت البتول و جلست على المكتب قبالة : فضفض لي..!!
عماد : ما عندي شيء اقولة زود عن اللي تعرفينة..
البتول : كيف اخذوها من المستشفى..؟! ما فيه كاميرات و امن..؟!
عماد : ما ادري..
البتول : ليش ما تكون بنتكـ بالمستشفى وقت ما دورتوا عليها..؟!
عماد : لأننا قلبنا عليها المستشفى ماهي فيها..
البتول : و شفتها ان كانت بـ غرفة وعد او لا..؟!
عقد حواجبة بـ قوة : اذا بغرفة وعد ليش ندور عليها..؟!
البتول : ما فهمتني.. ليش ما تكون وعد مخبية البنت عشان انت ما تتزوج..!!
عماد : نعم..!! انتِ صاحية..؟!
البتول : ايه صاحية.. زوجتكـ مبين انها غيرانة مني.. تذكر كيف اتهمتني اني حكيت عليها.. ليش ما تكون هي مخبية بنتها و مسوية هالمسرحية كلها..؟!
عماد : مستحيل.. هي كانت منهارة و عمتي مريم كانت معاها شلون بـ تخبي بنتها..؟! بلاش غباء..
البتول بـ قهر : و ليش ما تكون متفقة مع احد ثاني.. و يمكن حتى عمتكـ تدري عنها..؟!
عماد وقف : كلام سخافات لا عاد تقولينة.. و لا اسمح لكـ تتكلمين على عمتي بـ هالشكل.. و لو مثل ما تقولين ليش وعد تنهار و ما تنام الا على مهدئات و كل الوقت تصارخ.. لا تخلين غيرتكـ تعميكـ ..
البتول وقفت : ايش فيكـ عصبت ما قصدت .. انا بس ابي اشوفكـ مرتاح.. شوف شكلكـ مبين عليكـ التعب..
..
بيت ابراهيم بعد العشا..
مريم تمسح على شعرها و تقرأ عليها.. مفتحة عيونها اول مره ما تصارخ عليهم و تنهار.. يمكن ضعفتها المهدئات.. : وعد..!!
وعد دموعها تنزل من زوايا عيونها كل دمعة تلحقها خويتها : اخذوا بنتي..!! اخذوها..
مريم : خلي املكـ بالله قوي.. ان شاء الله بـ ترجع لكـ .. توكلي على ربكـ ..
وعد : صغيرة..!! ما لها حمّل .. ما تقوى عليهم..!! ويش يسوون فيها..؟!
مريم ضمت راسها لـ صدرها حتى تحضنها ودها تفرغ كل اللي بـ وعد فيها وما تخليها تحمل هالعذاب : خلاص يا ماما لا تبكين..
وعد تعلقت فيها : لا تخليني.. لا تروحين عني..!!
مريم شدت عليها : ما راح اروح انا جنبكـ .. ارتاحي ماما.. خلاص نامي.. نامي انا عندكـ ..
دخلت دانه : حاتم بـ يدخل يشوف وعد..!!
ام سعود : خليه يدخل يا امي ما به احد غريب..
ام عبدالرحمن : يا وليدي خلي بنيتكـ تأكل ماهو زين لها ما حطت لقمة بـ فمها هي نفاس والدة بـ عملية..
زاد بكاء وعد أي نفاس.!.!! أي نفاس و بنتها ماهي عندها..!! أي عملية اللي ما تحس فيها..!! اللي تحسه وجع اعمق بـ كثير.. وجع يألم و يذبح..
مريم تمسح على شعرها : خلاص ماما اهدي..!!
حاتم : السلام عليكم..
: وعليكم السلام..
باس راس جدتة و خالاتة .. و سحب الطاولة و جلس قدام خالتة مريم لأن وعد منسدحة بـ حضنها.. : كيفها الحين..؟!
وعد نزلت راسها على رجل امها : حاتم..!! كلم عماد.. ابيه..
حاتم : ليش..!؟
وعد : ابيه.. ابي اشوفة..
حاتم : انتِ تدرين ان ابوي ما وده يشوفة.. كيف تبيني اقولة يجي هنا..!!
وعد جلست شالت اللحاف عن رجلها و وقفت.. وقفت معاها امها : وين رايحة يا ماما..!!
حاتم : وعد لازم تأخذين دواكـ و اركب لكـ مغذي ما يصير بـ تطيحين من طولكـ ..!!
وعد : ابي اروح لـ بابا.. ابي اشوف عماد..
مريم : ماما خلاص انا بـ اكلم عماد .. انتِ تعالي ارتاحي..
جود تكلم نهى : اختكـ استخفت..؟!
نهى : ليش متوقعة ان باقي فيها عقل..؟!
جود : اكيد لا..
نهى : ويش عنده ابوي ساكت عن غياباتكـ و لا كنكـ بـ ثالث ثانوي..؟!
جود عفست وجهها : الرازق في السماء و الحاسد بالأرض.. انتِ ويش عليكـ .. خليني افتكـ من الشيفة ذيكـ ..
نهى : للحين ترسل لكـ ..؟!
جود : كل يوم.. الله يحاسبها على كلامها.. حسبي الله فيها..
نهى : كلمي واحد من اخواني يغير لكـ الرقم..
جود : و مين فاضي لي..!؟! عدا ان دادي بعد موضوع مهاب حتى هو انضم لأمي و لا واحد فيهم يكلمني..!!
نهى : لا تلفقين عليه.. انتِ بعظمة لسانكـ قلتِ اخطيتي عليه بالحكي..
جود تحول الموضوع : اقولكـ ما انتِ ملاحظة ان ندى نايمة عندنا من البارح..؟!
نهى : هذا انا نايمة عندكم ويش اللي اختلف..؟!
جود : غبية.. لاحظي شكلها ماهي طبيعية.. اذا امس نامت يعني غازي مو عندها نشوف اليوم تروح بيتها و الا لا..
نهى : طيب هذا انا نايمة هنا و فيصل نايم لحالة عادي..
جود : انتِ مهملة لكن ندى سنعة..
نهى اتسعت عيونها : نعم..!!
جود : رجاءاً مو تسوين فيها زعلانة و كذا .. هذا الصدق يا ختي.. انتِ غير و ندى غير..
مريم : نهى..!!
نهى التفت لأمها : هلا..
مريم جلست بعد ما اخذت وعد لـ عند باب المجلس حتى تكلم ابوها مع حاتم : الى متى بـ تنامين هنا و تتركين بيتكـ ..؟!
ام عبدالرحمن : مضيعة السنع قليلة الحيا..
نهى : أي قليلة حيا ما سويت شيء فيصل راضي.. و اختي محتاجتني..
مريم : اليوم ترجعين لـ بيتكـ فاهمة..
نهى : ماما..!
مريم قاطعتها : نهى.. ما يصير اللي تسوينة.. عيب.. اختكـ عندها مين يرعاها
نهى : لا فيصل راضي عادي.. و انا مستحيل اتركـ وعد.. انتِ حدكـ 12 و تروحين..
مريم : معاها ابوكـ و خالاتكـ و اخوانكـ .. ماهي بـ عازتكـ تعالي من الصبح لليل.. بس بعدها ترجعين لـ بيتكـ .. ماهي زينة يا ماما اذا فيصل ساكت ما يعني انه راضي على سواتكـ عيب يا ماما ما صار لكم كثير متزوجين..
ام عبدالرحمن : ايه بالله علميها السنع اللي ما تستحي..
نهى : ويش فيكم علي.. ما عليش هاذي حياتي و انا متفاهمة مع فيصل ما احد له دخل..
ام عبدالرحمن ضربت بـ عصاتها على الأرض : اه يا قليلة الحيا مالنا دخل .. حق من يكسر هالعصاة على ظهركـ .. ابكـ لو ما تتصلين عليه و تذلفين الحين معاه يا ويلكـ .. تفهمين العلم و الا لا..؟!
نهى وقفت : انا بـ اروح اشوف وعد..!!
مشت نهى حتى تلحقها مريم و تمسكها من عضدها بعد ما ابتعدوا عن الكل : تعالي..
نهى : ماما..
مريم دخلت الغرفة اللي المجهزة لـ نفاس وعد و دخلت نهى وقفت قدام نهى : فيه شيء بينكـ و بين فيصل..؟!
نهى : ماما لا انتِ فاهمة غلط..
مريم : هذا اللي المفروض نفهمة لأنكـ توصلينة لنا كذا.. (رفعت شعر نهى عن وجهها) ماما انتِ صرتِ مرة متزوجة مسؤولة عن بيت لازم تشوفين فيصل ويش محتاج.. اذا هو قايل لكـ انه راضي عن جلستكـ و ساكت و مراعيكـ انتِ بعد راعية.. خلاص جلستي ثلاث ايام هنا كفاية لازم تروحين لـ بيتكـ و تقابلين زوجكـ و تعالي هنا كل يوم ما احد بـ يقول لكـ لا..
نهى : انا متفاهمـة معاه..
مريم تقاطعها : نهاوي ماما ادري انكـ جالسة هنا بـ رضاة.. مثل ما ارضاكـ ارضية.. لا كان صاحبكـ عسل لا تلحسة كله.. لا تحدينة يقولكـ ارجعي معاي البيت.. خليها تجي منكـ و تكبرين في عينة.. كل ليلة يجيكـ و يكلمكـ يوقف معاكـ .. ليش تصعبين عليه و تبعدين عنه.. خليكـ معاه و معانا.. انتِ مسؤولة عنه يا ماما..
نهى تنهي الموضوع : طيب..!!
مريم : ايش فيكـ زعلتِ..؟!
نهى : لا.. ليش ازعل..؟! انتِ تبين مصلحتي..
مريم قرصت خدودها : زين انكـ عارفة.. تعالي خليني احضنكـ حليااانة..
نهى ابتسمت باست خد امها : تلعبين علي..!!
مريم : و ليش العب عليكـ .. محلوة غصباً عن الكل.. و اسألي فيصل بعد..
نهى ابتعدت عن حضن امها : ما يحتاج اسأل انا اعرف نفسي.. مامي بـ اقولكـ شيء..
مريم : قولي ماما ايش فيكـ ..؟!
نهى : ابي انحف..
مريم : ليش ماما ايش فيه جسمكـ ماشاء الله .. حتى نحفتي قبل زواجكـ ..
نهى : ماما لا تطقطقين علي.. صح نحفت بس حتى ما وصلت للوزن المثالي لسى يبي لي..(حولت نبرتها للتردد) احس احيان..!! يعني.!.!
مريم : قولي لا تستحين..!
نهى : احس اني متغيرة عن زمان.. متغيرة على فيصل..
مريم : هو قالكـ هالحكي..؟!
نهى : لا ابداً.. بس انا احس كذا..
مريم : شوفي ماما يمكن تكونين زايدة عن المثالي شوي رغم اني ما اتوقع انا شايفة جسمكـ حلو و مشدود.. بس اذا ودكـ سوي ريجيم بسيط..
نهى بـ برود : لا ابي اسوي عملية..
مريم فتحت عيونها مستغربة : صاحية انتِ ..؟! ويش اللي عملية اقولكـ اصلاً ما تحتاجين ريجيم تقولين لي عملية..؟!
نهى : ماما اسمعيني.. نجرب نروح دكتورة و نسأل.. الله يخليكـ ..
مريم : لا.. ثم لا.. و لا حتى تفكرين بـ ذا الموضوع يا نهى.. ماني سامحة لكـ .. تبين اوديكـ دكتورة تغذية اوكـ ما عندي مانع.. بس تسوين عملية لا.. هالأشياء خطيرة .. اصلاً ما يسوونها لأي شخص و أي وزن.. على كيفكـ الشغلة هي..؟!
نهى : نجرب ما يمنع..
مريم : و انا قلت لكـ اللي عندي.. لو فيصل متضايق منكـ انكـ متغيرة على اللي يخبرة من سنين وما تبين تقولين.. انا بـساعدكـ يا ماما و تسوين ريجيم صحي..
نهى : ما ينفع جربت..
مريم : الا ينفع بالعزيمة يا ماما.. كملي رجيمكـ اللي قبل زواجكـ و بتنحفين عليه.. اما تقولين لي عمليات لا..
طلعت مريم و تركت نهى تتحلطم بالغرفة : غبية انا ليش قلت لها..؟! المفروض اروح مع فيصل بس انا ما ابيه يحس..!! الا ما القى حل..
في المجلس..
ابو سعود : انسدحي بابا شوي و بـ يجي عماد..
خالد : وعودة خلينا نجيب لكـ شوربة دافية..
وعد حاضنة عضد ابوها و راسها على كتفة : لا ما ابي..
حاتم : وعد ما يصير اللي تسوينة بـ نفسكـ .. هذا انتحار..
ابو سعود : بابا ما اكلتي شيء.. شوفي كيف ضعفتي.. صرتي عظام..
مشعل : صرتي هيكل عظمي متحركـ .. ويش ذا بنت.. يعني لو بنتكـ رجعت حتى ما تقدرين ترعينها لأن انتِ تحتاجين مين يرعاكـ ..!!
وعد : مالي نفس.. (بكت) و الله ما اقدر..
ابو سعود سحب يده منها و حطها وراء ظهرها حضنها : خلاص لا تبكين.. ما حسبت انكـ تسكتين يا بابا اهدي..
وعد ما زالت تبكي يكفيها فقد واحد يوجع.. ما تبي تفقد احد زود : بابا .. ما ابي ماما تروح..
ابو سعود غمض عيونة : حياها الله لو ترضى تجلس كلهم عيالي كلهم محارمها.. و انا قاعد هنا.. بس ما اظن خالكـ عامر يوافق.. حتى لو قلت لـ عمتي نوره تجي تنام عندنا..
مشعل يهمس لـ ياسر : ماشاء الله بيصير بيتنا فندق..
ياسر : اهم شيء وعد ترتاح لو نجيب اهل المدينة كلهم و نسكنهم عندنا..
وعد : طيب.. كلم.. غازي..
ابو سعود : يا بابا امكـ جالسة عند خالكـ عامر.. ما يصير نكلم الصغير.. و بعدين غازي بـ يقول بـ اشوف عامر.. هذا اذا ما رفض الموضوع..
وعد : طيب انا ابيها..!!
ابو سعود : خلاص طيب.. بـ اكلم خالكـ بـ اشوف ويش يقول.. بس اوعديني ما تزعلين لو ما رضى.. هي تجي كل يوم ما هي مقصرة..
وعد ابتعدت عنه بـ ضعف وهي تسند نفسها على كفها : لو ما رضى.. انت.. تتزوجها..
ابو سعود بـ صدمة : نـــعم..!!
نهى دخلت بعد ما سمعت اخر الكلام و ابتسمت اللي وعد تشاركها نفس الفكرة : و ليش استغربت..؟! ماما ما يعيبها شيء..
ابو سعود : انتن استخفيتن..؟!
وعد : ليش استخفينا..؟! احنا نبيها..
ابو سعود : اولاً منيره بـ عدتها.. ثانياً امكـ متزوجة..!!
نهى : مطلقة امي و خلصت عدتها.. و منيره لا خلصت عدتها انت تتزوج ماما..
ابو سعود : سكرن هالموضوع و لا عاد ابي اسمعة..
وعد : ليش..؟!
ابو سعود : من غير ليش.. وعد ما ابي ازعلكـ فوق زعلكـ .. ترى فيني من الهم ما يكفيني..
نهى : بـ نسكت بابا بس نوعدكـ مو على طول.. اذا خلصت منيره عدتها لنا حكي ثاني..
ابو سعود يطنش حكيها : ادخلي يا نهى داخل شوي عماد بـ يجي..
وعد وقفت : انا .. ابي اقابلة برا لحالي..
ياسر وقف : لا.. اولاً انتِ تعبانة ما يصير تطلعين برا بـ هالجو.. ثانياً ما اضمن انه ما يسوي لكـ شيء.. ما اثق فيه..
وعد : انا ماني مطولة بـ اكلمة شوي.. و ما راح يسوي لي شيء.. لو قرب مني بـ اصارخ..
ياسر : قلت لكـ لا..
حاتم : ياسر لا تعقد الأمور.. خلهم يمكن يتفاهمون يمكن هالمشكلة تقربهم من بعضهم..
ابو سعود : لا.. (ناظر بـ وعد) وعد تدري اني مستحيل اردها له .. تحرم عليه حرمة امه و خواتة عليه..
حاتم فزع : يبه ويش هالحكي ما يصير..
ابو سعود : اللي عندي قلتة.. رجعة لـ عماد لا..
وعد : و انا ما ابي ارجع له.. بس بنتي.. هي بنتة..
ياسر : تقابلينة لحالكـ و برا لا يا وعد.. فاهمة.. اصلاً شلون تطلعين و انتِ لا صحتكـ تسمح.. عدا ان برا حرس و المكان ما راح يكون امن لكـ ..
ابو سعود : ياسر معاه حق يا وعد قابلية ما رديتكـ .. وما تبينا اوكـ اجلسي معاه بالمقلط اما تطلعين برا لا ..
ياسر التفت للباب بعد ما سمع صوت الجرس : هذا هو جاء.. راح ادخلة بالمقلط..
طلع ياسر و وعد لفت لأبوها : قول لـ ياسر يخليني على راحتي..
ابو سعود : خايف عليكـ ..
كتفت يديها و طلعت من المجلس و دخلت المقلط بالجهة المقابلة.. : السلام عليكم..
لف عماد و ناظرها.. كل واحد جسمة يحكي تعب و ارهاق و وجع من نوع مختلف.. : وعليكم السلام..
وعد ناظرت ياسر : ممكن..؟!!
ياسر صد بـ وجهة ما يبي يتركها معاه بعد كل شيء سواه فيها و اخرها كان قدامهم بالمستشفى ما راعاها ابد .. وعد ترجتة : بليـــز ياسر..
ياسر : عشانكـ بس.. (لف لـ عماد) و الله العظيم لو تغلط عليها اني ما اسكت لكـ .. لو بس اسمعكـ رافع صوتكـ عليها لا احاسبكـ على الأولي و التالي..
طنشة عماد مو لأنه ما يقدر يرد او خاف من تهديد ياسر لأنه ما يبي.. يكفية المغثة اللي قدامة بـ يشوف حضرتها ليش مناديتة..!
طلع ياسر و ترك الباب مفتوح.. جلست وعد و جلس عماد بعيد عنه بـ مسافة .. شيء طبيعي اذا ارواحهم متنافرة ما احد فيهم يحاول يخفف على الثاني.. ما احد فيهم يبي قرب الثاني او شوفتة..
عماد : ما اظن طلبتيني عشان تسكتين.. اذا ما عندكـ شيء تقولينة عندي اشياء اهم من مقابل وجهكـ ..
ضيقت عيونها وهي تناظر بالأرض : اسلوبكـ ما تعرف تعدلة.. دايم زفت..!!
عماد : لكل واحد ما يستحق..!!
غمضت عيونها بـ قوة يقصد يهينها .. لفت تناظرة : ابي بنتي..!!
عماد : ما احد قالكـ اهمليها و خليهم يأخذونها..
وعد حطت يدها على صدرها مصدومة : تلومني..!! و ليش ما تلوم نفسكـ ..؟!
عماد : الوم نفسي..؟! ليش مو انتِ اللي تركتيها..؟! انتِ غبية شلون تخلينهم يأخذونها للحضانة و هي ما تشكي من شيء..؟!
وعد : ليش مو انت كنت موجود وقت ولادتي.. ليش ما حكيت..!؟ انت بس تبي تحملني اخطاءك.. ما تبي تطلع نفسكـ غلطان في شيء.. انا ما اخطيت .. تفهم انا ما اخطيت.. بنتي معاهم بسببكـ .. لو انت مو ابوها ما كان خطفوها.. ابيكـ ترجعها.. انت المسؤول عن خطفها..
عماد وقف : ما احتاج كلامكـ عشان ادور عن بنتي.. الحمدلله انها ما هي كبيرة عشان ما تسوي سواتكـ و لا تهتم باللي وراها و يدور عليها تقعد عند ناس شهر و لا تسأل عن اهلها..
وعد وقفت .. و صرخت فيه : انت تهيني..؟! انت شنو ما تحس..؟! ما مليت من كثر ما تجرح فيني..؟! فوق كل اللي سويتة و اخطاءك علي بعد تكملها..؟! ما تتوب..!!
طلعوا من المجلس و دخلوا عندهم على صراخها..!!
ابو سعود : ايش فيكـ وعد..؟!
عماد : عن اذنكم..
ياسر : ويش قلت لها يزعلها..؟!
عماد : و ليش ما يكون اختكـ غلطت..!!
ياسر ما تحمل زود هو اصلاً حمقان عليه من حركتة معاها بالمستشفى هجم على عماد و ضربة بـكس على بطنة..!!
تراجع عماد على وراء منحني و ضاغط على بطنة لكن ياسر رجع من جديد و عطاه بكس استوعب عماد انه ينضرب .. صلب نفسة بالقوة و هجم على ياسر حتى يتعراكـ الإثنين ضربة لـ عماد و ضربة لـ ياسر..
حاتم وقف بين الإثنين : صاحين انتم..؟!
عماد ماهو ناقصة احد يهدية و لا بعد من اهل وعد..!! طنش حاتم و ضرب ياسر على وجهة دنق ياسر و نزف فمة.. لكن ناره ما طفت من عماد بالعكس كل ثانية تزيد و تزيد .. هجم على عماد مره ثانية و ضربة ضربتين وحدة على وجهة و الثانية على بطنة.. عماد سحب يد ياسر و لفها له لين طقت و رفسة بـ رجولة على ظهرة.. ياسر تقدم لـ كم خطوة من رفسة عماد.. لف عليه بـ يضربة وقف ابوه بـ وجهة..
ابراهيم : بـــــــــــس..!! صاحين انتم..؟! ما كنكم رجال طول بـ عرض..؟!
..
بيت عبدالرحمن.. مجتمعين على اخبار سهاد بـخطبة سلمان لها..
ابو عساف : و اخوك يعرف الرجال يا بنتي.. و يمدحة..
عساف : ما فيه منه اثنين.. اضمنة بـ عمري.. و الله يا سهاد لو ما يستاهلكـ حتى ما افكر اني اشاورك بالموضوع..
سهاد منحرجة بين اهلها .. ما رفعت عيونها من الأرض و تفركـ يدينها بـ توتر..
ام عساف : استخيري يمه و فكري على مهلكـ ..
عبير : طيب تحسون ظروف بيت عمي ابراهيم تسمح لنا نفكر نزوج سهاد..؟!
ماجد : الموضوع مجرد خطبة اكيد ما راح نعلق الرجال شهور ما يندرى البنت متى بـ ترجع لأهلها.. و لسى ما صار شيء و لا قلنا بـ نسوي زواج..
عساف : هاذي خبلة ما ادري متى بـ تفكر زين..؟! ويش حاسبة انتِ..؟!
عبير : ماني حاسبة شيء بس اسألكم.. حرام ..؟! (ناظرت ابوها) بابا شوفهم..!!
ابو عساف : ما عليكـ فيهم خليهم يقولون اللي يقولونة..
ماجد يقلدها : بابا شوفهم..!! هيــــه انتِ اللي قدكـ عيالهم بالمتوسط..!!
عبير اتسعت عيونها : هذول اللي قدكـ يا عيني.. مو اللي قدي ترى عمري 19 شلون صاروا عيالي بالمتوسط..!؟
يزيد : يا حبكـ للمبالغة.. هذا انت فشلت نفسكـ ..
ماجد : اما فشلت نفسي..!! ما عاد الا بعير..
عبير : بعير في عينكـ يا قليل الأدب ما كنكـ دارس برا..
ماجد حمر عيونة فيها : من هو قليل الأدب..!!
عبير قامت و جلست جنب ابوها : انت..!!
عساف : ما عليكـ لو ما عرفت انها غلطانة ما احتمت بـ ابوي.. ماشي يا عبير على طوالة لسانكـ ذي اوريكـ ..
ابو عساف : و الله لو تنوشها يا ويلكـ يا عساف.. هذاني نبهتكـ ..
عساف : يبه .. ترى لسانها طايل و انت تحامي على غلطها..
ام عساف : هو صادق .. عيب تقول لأخيها هالحكي..
ابو عساف يده على كتف عبير : حتى هو غلط عليها.. هي تحترمة وهو يعطف عليها.. اما يتكلم عليها و تبونها تسكت لا..
ماجد : شككتني اني ماني ولدكـ يبه .. يعني انا تقولي قليل ادب زينة كم سنة بيني و بينها ما تحترمني..؟!
عبير : ويش فيكـ و الله امزح مثل ما تمزح انت..
عساف : ما تقولين لأخوكـ قليل ادب..!!
سهاد شافتهم لاهين في مشكلتهم طلعت حتى من غير لا تستأذن حتى ما ينتبهون لها منحرجة منهم..
ابو عساف : الحين هي تعذّر منه وهو يتعذّر منها..
وقفت عبير و باست راس ماجد.. و ماجد باس راسها.. عبير : عن اذنكم..
طلعت من بينهم.. تبي تلحق على سهاد و طقطق عليها على الأقل تتونس شوي..
عساف : يبه تراكـ مدلعها.. ما يصير اللي تسوية معاها.. دايم واقف معاها و كل طلباتها اوامر..!!
ابو عساف : ما يطاوعني قلبي اردها..
ماجد : يبه الدلع يخربها.. لا الشدة زينة و لا الدلع زين.. ايش معنى هي مدلعها..؟!
ابو عساف : ليش تبي تحط نقركـ من نقرها.. تراكـ رجال و هي بنية.. و لا تلحلحت و تزوجت و جاتكـ بنية تعرف ليش تدلعها..
ماجد : اما انا اتزوج.؟! و اتخطى كبيرنا.. (ضرب عساف على ظهرة)..
عساف : بقي تكسر ظهري..!! و لا تربط نفسكـ فيني.. انا ماني متزوج..
ام عساف : ليش يا ابوي انت بكرنا و اول فـرحتنا و فرحة العيلة كلها .. خلنا نفرح فيكـ ..
عساف : مالي خاطر.. لو لي فيه خاطر كنت تزوجت..
ام عساف : ويش اللي لادكـ عن الزيجة.. و الله عين و ما صلت على النبي..!!
ابو عساف : اللهم صلي على النبي.. لا عين و لا شيء.. ولدكـ به بلى ثاني.. مير ماهو راضي يركد..
عساف وقف حتى ينهي الموضوع : قفلوا هالسيرة انا الزواج شايلة من راسي بتاتاً..
ام عساف تناظر ولدها اللي اختفى بعد ما طلع لـ فوق.. لفت على زوجها : ويش بلاه انت تعرف ويش فيه..؟! نوديه شيخ يقرأ عليه..؟!
يزيد : يمه من جدكـ .. عساف ما يشكي من شيء.. بس هو ما يبي يتزوج..
ام عساف : اللي قده عيالهم بالإبتدائي.. هذا خالد ولد عمكم بينه و بين عساف حول الخمس سنين و ولده ثاني ابتدائي..
ماجد : عساف غير و خالد غير..
ام عساف : و انت ويش لادكـ ..؟! لا يكون خابرن لك مره برا..؟!
ماجد غمز لها : تعجبكـ يا ام عساف.. بـ اجيبها لكم قريب..
ابو عساف : تعقّب و الله ما تدخلها بيت و انا ولد ابوي..
ام عساف : قلوا عليكـ بنات دينكـ و ديرتكـ حتى تتزوج من الشقر.. هذا اللي ارسلناكـ تدرس له..؟! يا قليل الحيا..
ماجد : اووووه انتم أي شيء فيه حرمة على طول تصدقون.. لا تخافون ماني خابر احد و لا شيء.. بس ما لقيت مره تروق لي على مزاجي للحين..
ابو عساف : عندكـ بنات عمكـ ماشاء الله عليهن.. ميار و سهاد و جود..!!
ماجد : اما جود..!! من جدكـ يبه جود تحطها من ضمن الخيارات..؟!
ابو عساف حمّر عيونة بـ ماجد : ليش ويش ينقصها ان شاء الله..؟!
ماجد : ما ينقصها الا يزودها.. جود ما احسها الا اختي..
ابو عساف : ماهي اختكـ .. بنت عمكـ و يحل لكـ تتزوجها..
ماجد : يبه تكفى اصلاً شيل الموضوع من راسكـ انا عرس الحين ماني معرس..
ام عساف : خلاص طيب ما تبي من بنات عمكـ خذ من بنات خوالكـ ..
ابو عساف لف لـ زوجتة : ليش بنات ابراهيم يشكن من نقص..؟!
ام عساف : لا ماشاء الله عليهن.. بس كود الولد ماله خاطر بـ وحدة فيهن.. ليش نحده عليهن الله يرزقهن..
ابو عساف : ماله الا وحده فيهن (لف على ماجد) هذاني نبهتكـ .. وبس تخلص مشكلة بنت وعد نروح لـ بيت اخوي و نخطب لكـ ..
ماجد : يبه الموضوع ماهو بهالشكل.. ما يصير..
يزيد : يبه عدا انه ما يجوز خطبة المسلم على اخيه المسلم.. طلع جود من السالفة ما يصير..
ابو عساف : ابو سعود قالي ان بنتة ما تبي ولد خالها..
..
استغفر الله العظيم و أتوب إليه..

مواعيد البارتات كل سبت ان شاء الله..

لا أحلل نقل الرواية دون ذكر اسمي..

هاشتاق #رواية_لو_سألتي_الورد

ضحكة قهر..

يسلمووووووووووووو على البارت

عماد بدو قتل من كتر ما هو بقهر

ليه مو حاط واطي أنو غلطان جد واحد متخلف وكتيررررررر ظالم