كاتب الموضوع :
اسطورة !
المنتدى :
القصص المكتمله
رد: لو سألتي الورد وهو ما بين إيدك أقطعك بيقول لك عمري فداك الكاتبة / ضحكة قهر
بسم الله الرحمن الرحيم..
السلام عليكم و رحمة الله وبركاتة..
شسمة ما ابي اكتب مقدمات مره مستعجلة و متأكدة انكم ما تقرونها لأني دايم اكتب موعد البارت الجاي وراء ذلك تنهال علي اسئلة متى البارت الجاي..؟!.. انا قلت البارت السبت و ما اعتقد اني حددت موعد الا ان صكني زهايمر الله و اعلم.. ربع الأسك انام و اصحى الاقي حول الثلاثين سؤال عن البارت..!!! طيب لسى ما انتهى اليوم.. باقي وقت.. و انا عمري ما اخلفت بوعد وعدتكم اياه.. ما ادري ليش ما انتم راضين تثقون فيني..!!!
كل اللي ردوا على الرواية سوري ان ما علقت عليكم لأني مره مره مره مستعجلة.. حياكم الله جميعاً و يسعدني اني اقرأ تعليقاتكم و اشوف حماسكم رجع مع رجعة الرواية..
البارت إهداء لـ نفسي إرضاء لـ نفسي .. عشانكم مزعليني..
البارت الرابع و الأربعون..
كان ودك بالجفا شد الرحال مستحيل أقول تكفى حبني.
لـ وحشتك "ناصر العنزي"
في غرفة التدريب..
غازي هادي جداً عكس البارح تماماً.. جالس على الأرض و حاط المركى عن يمينة و متكي يناظر رجالة من وراء نظارتة.. وليد معصب.. و الباقين متوترين..
وليد : ماهو بكيفك تتركني بالنص.. ما راح اسمح لك.. انت دخلتني بهالموضوع.. و انت بتخليني اطلع منه منتصر.. ما راح تستقيل و تترك الموضوع.. انا ما فكرت اضحي بحياتي عشان انت تجي باول خطوات لي تبعد عني.. ماهو بكيفك.. انا اخذت منك كلمة بتوقف معي للأخير و بتحميني.. عشان كذا انت مجبور توفي بـ وعدك لي..
عزام مسك ذراع وليد اللي شبه واقف على ركبة و يكلم غازي مقهور منه : وليد اهدأ الموضوع ما ينحل بهالطريقة..
وليد : ماني هادي.. ماهو اول ما بديت يتخلى عني كان ترك الموضوع قبل لا ادخل فيه.. ما خلاني لين اقابلهم و احرق بيت أبوي.. و شفت الحرس بعيوني يموتون.. ماهو بعد ما عرفتهم و عرفوني..
عساف تربع : علمنا ويش صار..؟! قولنا شلون قابلتهم..
وليد تربع بيحكي لهم كل شيء صار.. رغم انه البارح كان ناوي يتمنذل عليهم.. لكن يوم شاف غازي هو اللي بيبدأ بالنذالة قرر يوقف لعب بأعصابهم : ثاني يوم من فتحت الكشك جاني شخص مبين عليه كشخة و من الكبارية.. لف يدور بالمكان بعدها جلس على الكرسي.. سألني عن نفسي.. اسمي و عمري.. و انا كنت اعرض عليه البضاعة و انتهت بإنه ما شرا مني شيء.. و زارني بعدها بيومين.. و قالي ايش تدرس و شغلك شكلة ماهو ماشي.؟! و من وين جبت الفلوس عشان تفتح كشك البضاعة قيمتها غالية ابوك عنده فلوس..!؟
وليد يناظرهم كيف مهتمين و يسمعون كل كلمة ينطقها و عيونهم مركزة عليه وعيونة تدور عليهم واحد واحد و احيان يناظر الأرض : من أسئلتة حسيت انه ممكن يكون واحد منهم.. فا جاوبت مثل ما اتفقنا من قبل الوالد متوفي من زمان و أنا ادرس بالجامعة سنة ثالث.. و الفلوس شوي من الورث و الباقي اخذت قرض.. و مشيت حالي بعد بالدين.. لين تيسر اموري و اسدد الخلق.. فـ عرض علي يشتري مني الكشك مقابل تسديد كل ديوني و يخليني اشتغل فيه و اديرة له..
عساف : و رفضت..؟!
وليد بـتأكيد : طبعاً.. لأني لو وافقت ممكن يكون داخلة شك ان الكشك نقطة بداية بالطريق اللي يوصل لهم.. عدا اني ما كنت متأكد انه من العصابة.. قلت له لا .. انا فتحتة عشان استرزق.. انا انسان ادرس اغلب الوظايف تبي واحد متخرج من الجامعة.. و انا ما معاي الا ثانوي و فاشل فيها بعد.. قالي انا بشترية و بخليك انت تمسكة.. و رفضت عرضة اكيد ما شقيت و تسلفت عشان ابيعة.. اخر شيء قال لي طيب انا ابيك توظف عندي.. ما اتوقع يتعارض مع وظيفتك هنا و اذا تبي عطيتك واحد من موظفيني يساعدك..
سعود : طيب و بعدين..؟!
وليد سحب قارورة مويا من اللي بوسط جلستهم مرصوصة بالصينية.. و فتحها : قلت له على حسب الوظيفة عشان يعرف اني ماني شفقان عليهم و يشك فيني.. قالي الوظيفة حتى لو كانت صعبة بتلقى على كل شيء تسوية مقابل للي تسوية و فوقة حبة مسك.. فا قلت له اول نجرب فترة يمكن انا ما يعجبني الشغل و يمكن انت ما يعجبك شغلي.. حزتها بس عرفت مقدار الشر بعيونة قالي لا اللي يدخل معنا ما يطلع.. لأن الطلعة بتكلفة حياتة.. كل الشغلة عندنا تأخذ امر و تنفذة من غير أي سؤال و تأخذ عليه مقابل و بنفس الوقت لك عندنا حق الحماية نحميك من كل شيء يضرك.. و تأكد اننا كل شيء نسوية نبغي فيه الخير.. و نساعد فيه ناس كثير..
شرب من المويا يبل ريقة حس انه مجرد حكي اللي صار معاه ريقة ينشف كيف لما عاش الوضع.!! ما يدري شلون هو عايش للحين..؟! : و بديت ارواغ فيه قلت له طيب اعطني يومين افكر بالموضوع و رفض قال معاك ساعة موافق اتصل علي و حط لي بطاقة على الطاولة.. و قال لأن اول شغلة بتسويها بعد صلاة العشا.. و طلع من عندي.. خلال هالساعة كنت ابي اتواصل معاكم.. بس ما قدرت.. لأني حسيت انه ما جاني بعد يومين الا وهو عارف كل شيء عن ايمن المنذر.. و قبل ما تخلص الساعة بدقيقتين دقيت عليه و قلت له اني موافق و قالي خير بيجونك رجالي و يجيبونك لمكاني و لا تستغرب من أي اجراء يسوونة لك.. لأنها للاحتياط فقط.. تعرف انت توك جديد علينا و لسى ما عندنا عليك ضمانات.. و جوني رجالة في البداية كنت باخذ سلاحي معاي بس بعدين غيرت رأيي..
عساف احتد صوتة : خبـــل انت رايح بدون سلاح..؟! شلون كنت تفكر..؟!
وليد رد بحدة على عساف : انت اللي خبل تبيني اروح ومعاي سلاح.. على طول بيشكون فيني بأي صفة شايل معاي سلاح..؟! لكن لا دخلت معاهم اقدر اشيل سلاح من غير لا يشكون..
عماد يهدئ الوضع: طيب و بعدها..؟!
وليد يذكر تفاصيل اللي صار له مع الرجال من لحظة دخولة .. دخل مع الباب و انفتح الرباط عن عيونة غمض عيونة بقوة و فتحها دارت عيونة بالمكان البيت كله مفتوح على بعض صالتين بكنب و المطبخ و غرفة النوم كلها مفتوحة على بعض.. بابين بس المقفولة بالمكان.. ما يدري ويش وراها.. "يمكن حمامات".. قاطع تأملة الصوت المرحب ..
فاتح يدينة الثنتين : يا هلا بأيمن المنذر..
تقدم له بثقة و خطوات مدروسة وصافحة بهدوء و هو يرد على ترحيبة بالرغم من التوتر اللي يتملكة داخل بمكانهم بدون سلاح و مع واحد ما يدري ويش يبي فيه و الطامة لو كان الشخص مو من العصابة اللي يسعى لها : هلا فيك.. (ابتسم) الا صدق ما عرفت اسمك..؟!
ابتسم الشخص ابتسامة بسيطة مائلة على جنب و نطق بوتيرة بطيئة و كأنها نبرة تحذيرية لـ وليد : الــــصقـــر..
رفع حواجبة باستغراب من طريقتة : الصقر..!! (ابتسم له بلا مبالاة)..
مد يده باتجاة الجلسة : حياك خلنا نتكلم عندنا شغل مهم بعد ساعة..
تقدم وليد من بعد ما تقدم الصقر باتجاة الجلسة و جلسوا اثنينهم متقابلين بثقة متمردة على الصقر واضحة للأعمى حتى من نبرة صوتة و ثقة تهز اللي قدامة عشان يشككة بنفسة.. بالرغم من هذا جلس وليد بهدوء..
الصقر : هاذي الساعة المباركة اللي تنضم لنا..
وليد : ساعتك ابرك..
الصقر : ما ابي اضيع وقتي و وقتك يا ايمن انا ابي اشرح لك احنا مين و ويش هي اهدافنا..
وليد : تفضل اسمعك..
الصقر : احنا مجموعة فينا من الخير ما الله به عليم و لله الحمد..
وليد كان وده يتفل بوجهة من هالكلمة : الله يبارك فيكم.. < وده بس يزيد حرف النفي لا قبل يبارك.. بس ماسك نفسة بالرغم من التوتر عامل عمايلة فيه بس يتذكر هدفة اللي ابعد عن اهله عشانه يتحمل و يسكت..
الصقر : طبعاً.. انت تدري ان فيه ناس فيها حسد و ما تحب الخير لأحد.. و تبي تسوي اشياء كثير تفرق فيها الناس و تبعدهم عن الدين.. و احنا كله و لا ديننا..
وليد حس انه غلط.. و ان هالشخص ماهو من العصابة و انهم جماعة فيهم خير.. الثقة الطاغية على الشخص اللي قدامة خلتة يحس بهالاحساس : فعلاً اهم شيء الدين..
الصقر حط رجل على رجل و فارد يديه الثنتين على ظهر الكنبة العريضة اللي يجلس بوسطها : و احنا مهمتنا نوقف هالناس عن اللي يسوونة و نردعهم و نخليهم عبرة لغيرهم.. و عندنا رجال مكلفين بهالشيء و انت بتكون من ضمنهم.. تتلقى الأمر من غير لا تسأل عن أي شيء.. و تأخذ الخطة مثل ما هي و تنفذها بحذافيرها.. و لا تستغرب ان قريت اسم أي شخص سمعت فيه من قبل لأننا اكيد نعرف عنه شيء انت ما تعرفة.. و ما اخترناه الا انه يستاهل اللي بيصير له.. موافق تسوي اللي نبيه من غير أي سؤال و تنفذ اللي نبيه بالحرف.. و على فكرة عشان ما انسى راح تكون تحت حمايتنا..
وليد : طيب المقابل..؟!
الصقر ابتسم ابتسامة صغيرة مائلة على جنب : لا تخاف ما ينوكل عشاك و انت واحد من رجالي..
وليد : ويش هي المهمة اللي بعد ساعة..؟!
الصقر رفع حواجبة : ارتكبت اول خطأ.. قلت لا تسأل لأنك ما راح تعرف شيء انا ما ابيك تعرفة..
وليد : ما ارتكبت خطأ.. انت قلت فيه مهمة بعد ساعة و الساعة قربت تقضي..
الصقر : لا تسأل عن أي شيء مهما يكون صغير.. الا شيء تبيه عن المهمة انا غفلت لا اعلمك اياه بس.. اما غيره لا تنشد عنه.. و أي مهمة توكل لك تأكد انك ما راح تعرفها قبل مدة من الوقت المحدد اللي احنا نبي نسويها فيه.. اكثر وقت ممكن نعطيك اياه ربع ساعة عشان تتجهز بس.. ايش قلت.؟!
وليد : اوكِ ما عندي مانع.. دام حقي بأخذة على دوز بارا..
الصقر ابتسم : متفائل فيك خير, و وجودك معانا بيدفعنا للأمام اكثر مما انا متخيل..
وليد وهو ما بين صراع المهمة هي الوحيدة اللي بتدلل هو من العصابة و الا لا هم فيهم خير و الا شر ما يبي يستبق الأحداث : ان شاء الله..
الصقر : تعرف تستخدم سلاح..؟!
وليد : يعني مو مره حِريف..
الصقر : كويس عشان ما نبدأ من تحت الصفر.. و نضطر نخلي واحد يرافقك لين تتعلم على السلاح.. و الآن جاء وقت انك تعرف المهمة ويش هي..؟
تقدم الاثنين بجلستهم كل واحد مسند كوعة على فخذة و شابك كفوفة في حركة مشتركة اتفق فيها الاثنين..
الصقر : مهمتك الأولى ابسط مهمة ممكن تأخذها.. لا يجي ببالك اني مستهين بقدراتك لأني لو مستهين ما جبتك و عنيت نفسي.. لكن هي اشبه باختبار لك بشوف تقدر تسوية كامل و تجيب الفل مارك و الا لا..
وليد : ببيض وجهك ان شاء الله..
الصقر : ابيك تروح لبيت شخص و تحرقة مــن,,, إلى..
وليد تفاجأ.. اولها حرق بيت!! وين الخير اللي توقعة قبل لحظات منه.. حاول يضبط نفسة : سهالات ان شاء الله..
الصقر : ما سألتني بيت مين..؟!
وليد رفع حواجبة باستغراب و هز اكتافة : ما قلت لي لا تسأل..؟!
انفجر الصقر بضحكة ترددت على مسامع وليد.. صلب ظهرة و نظرتة ما زالت على وليد : كفوو يعجبني المركز.. بيت ابراهيم بن مساعد بن سالم..
وليد جف ريقة حاول يتنفس بهدوء عشان ما يبين صدمتة..!! أي مهمة هاذي.؟! يختارة هو و عشان يحرق بيت ابوه..؟! معقولة شاك فيه..؟!.. ضاغط على يدية بقوة عشان يخفف من توترة اللي حس بيظهر على ملامحة و ينكشف بكل سهولة..
كمل الصقر بهدوء : ابراهيم بن مساعد اتوقع انك سمعت فيه من قبل لو بالاسم.. اللي ابيه منك تحرق بيتة كله..
وليد جاهد ان صوتة يطلع واثق و ثابت و كأن الموضوع ما يعنية : تهديد له.. < ما قالها بطريقة استفسار عشان ما يشك الصقر في الموضوع..
الصقر : له ,,,,, و لولدة سعود.. عصفورين بحجر واحد.. عدا كذا ابي اثبت لغازي بن حمدان اني اقدر اسوي اللي ابيه.. و هو يتفرج و لا يقدر يمنعني لا هو و لا رجالة..
وليد حس بريقة جاف : و عيلتة..؟! مو يمكن يكونون بالبيت..؟!
الصقر : اليوم خميس و عادتهم يطلعون الخميس من بيتهم.. و اذا لقيت احد .. اقتلة.. < نطق كلمتة الأخيرة ببرود قاتل.. و ما كأنه يهدر بارواح الخلق.. و يسفك دمهم..
وليد وده يمسك السلاح و يثور فيه.. اجل مهمتة يحرق بيت ابوه..؟!!! و اذا لقى احد يقتلة..؟!! يمكن وحدة من خواتة ما راحت..؟! يمكن اخوانة موجودين بالبيت.؟! اي قلوب يشيلونها بين ضلوعهم هاذي..؟!.. البيت ممكن يحرقة و يدري ان ابوه لو درى ما يزعل لأنه بيفهم انه انجبر.. لكن ان احد ينضر من عيلتة وهو اللي يضره هاذي اللي ما يتحملها..
: يـــــــــــــاهوه..
وليد رفع عيونة لـه من غير لا ينطق.. يحاول يتجاوز كل شيء.. عشان الأمن.. دامهم ناوين يحرقون البيت يروح هو يحرقة على الأقل يتأكد ان ما احد فيه و لا واحد منهم ينضر.. اما اذا هم راحوا ما يضمن ويش يصير.. أخذ نفس : تمام,,, عندكم خطة معينة..؟!
الصقر : ايش فيك سرحت..؟!
وليد : شيء طبيعي بـفكر بالموضوع.. مهما كان المهمة اللي تقولها ماهي سهلة.. تنحط تحت مسمى "جريمة" و هالخط دخولة بدون رجعة.. يعني لازم افكر..
الصقر رفع حواجبة : يعني ايش..؟! رافض المهمة.؟!
وليد : ما قلت كذا..؟!
الصقر بحدة : هذا معنى كلامك..؟!!
وليد ببساطة تستفز الصقر : ليش عصبت..؟!
الصقر : انت وافقت تشتغل معاي و ما جيتني هنا الا موافق على اللي بطلبة منك..
وليد بـ ثقة وقوة هو رضى ان يقدم روحة للموت فدا لوطنة.. ما راح يخاف ابداً هو قلق عشان اهلة بس : لا تغلط, انت اللي جبتني ماهو انا اللي جيتك هذا واحد.. اثنين انا كنت افكر بالموضوع بس.. لأن المهمة اللي انت تقول عليها سهلة ماهيب سهلة.. انت بتخليني ادخل بيت رجل اعمال اشهر من نار على علم.. و احرق بيتة.. ابسط شيء بيصير بيفتحون تحقيق و تجي المباحث..
الصقر : لا جات المباحث تكون انت قاضي من كل السالفة.. الا ان كنت غبي و تترك لك بصمات بالمكان او أي شيء يدل عليك.. و ترى ما احد من رجالي يراددني و انت ناوي ترفع خشمك علي من اول ساعة..!!
وليد يتجاهل كلام صقر الأخير : طيب.!!! اذا كان الوضع مره صعب.. يعني لو طلعوا كلهم بالبيت ما راح اقدر احرقة.. او يكون فيه شرطة قريب من المكان هم ما اقدر..
الصقر : معاك خمس رجال يعاونونك بيمشون على امرك.. (احتد صوتة بنبرة تحذيرية) و ان سويت شيء غلط.. بيقضون عليك بنفس المكان..
وليد رفع حواجبة : تهددني..؟!!! بامكاني اطلع من هالمكان و ما ارجع..
الصقر رسم ابتسامتة المايلة على جنب : تهقى..؟!! انا ما جبتك هنا عشان اخليك تروح.. ابيك تكون معانا و انت جالس تماطل.. عايز لا تحرق بيت..؟!
وليد بـ حدة : ماني عايز بس انت جالس تهددني..
الصقر : انا هنا رئيسك.. كلمتي هي اللي تمشي.. و تمشي عليك قبل غيرك.. ما احد يراددني ابد.. و انا وثقت فيك و وكلتك مهمة حتى قبل لا ادربك.. بس لاحقين على التدريب اول شيء نسوي لك اختبار قبول..
وليد : طيب.. موافق.. و رجالك بيمشون على كلامي..؟!
الصقر : بالحرف..
وليد وقف : اوكِ.. و اذا خلصت ارجع بيتي..؟!
الصقر : لا طبعاً .. راح تكون مع الشباب وهم بيجيبونك لي..
..
وليد يناظرهم : هذا كل اللي صار معاه.. و اديت المهمة.. و بعدها رحت معاهم و قابلت الباقين..
عماد : و شلون انقتلوا الشباب اللي حطيناهم عشان يكونون معاك..؟!
وليد : انا اول من دخل البيت.. و الباقين ظلوا برا.. و شافوهم كانوا يتتبعونا و دخلوهم البيت و اقتلوهم فيه.. ما قدرت اسوي شيء.. لأن الوقت اللي دخلوهم فيه انا كنت فوق اتأكد ان ما احد من اهلي فيه.. ابي انحشة قبل لا يصير شيء و يوم نزلت.. كيد ان هم رابطينهم بسلاسل و قاتلينهم بعدها ولعوا بالغرفة..
عساف : و الجثة الثالثة لمين..؟!
وليد : واحد منهم.. قالوا ان الرئيس امر انهم يقتلونة..
نايف : يذبحون الناس و يذبحون بعضهم بدم بارد..
غازي بعد ما كان مستمع فقط حتى على غضب وليد نطق اخيراً : كيف الصقر..؟!
وليد : يبيني اصبح و امسي عليه حضرتة كني ولده.. (مسح بيدة السليمة على شعره) يقول بيدربني بنفسة.. وما قد شاف احد و راق له عشان يتنازل هو و يدربة الا انا..
عماد ابتسم : يعني نقول بداية ثقة..؟!
وليد : ما يثق الا بنفسة.. عنده رجال من سنين و فوق هذا يشك فيهم..
سعود : و انت ايش دراك..؟!
وليد : هو قال لي..
سعود : و هذا ما يعني انه صادق..
وليد هز اكتافة.!! : ويش اللي يخليه يكذب..؟!
سعود مقهور من وليد : ويش اللي يخليك تصدقة..؟!
وليد لوى فمة : ما احس عنده سبب يخليه يكذب علي.. انا ماني مهم عنده عشان يكذب علي واحد توه جديد يقدر يمحيني برصاصة وحدة..
غازي بحزم صارم : كأنه راق لك..؟!
وليد : هه.. ويش فيكم..؟!!.. مو قصة راق لي.. بس مقهور عليه.. ويش اللي يخلي رجال بعمرة يفكر هالتفكير.. اول ما تكلم معاي راودني شك انه صادق و انه رجال فيه خير.. شكيت اني رحت للناس الغلط..!! بعد ما حكى لي كل شيء عرفت اني ما اخطيت..
نايف : لو فيه خير ما ربط على عيونك وما خلاك تشوف الدرب..
عزام : اذا بيصبح و يمسي عليك شلون جيتنا..؟!!
وليد قلت له بسافر روما استوعب المهمة اللي سويتها اسبوع.. و وافق بشرط اني ما اتأخر عندي تدريب.. و حجزت على روما و رجالة يتبعوني و انسلت منهم بالمطار و طلعت من جديد و جيتكم بالمزرعة..
غازي بحدة عالية : لا عاد تجينا.. الا ان طلبناك فاهم..؟! انت جالس تخاطر بحياتك بهالشكل و حياة غيرك..
وليد ناظرة بطرف عينة و ما علق على كلامة.. او بالأصح طريقة غازي الحادة..
غازي ضرب يدة على المركى جنبة و صرخ على وليد : لا كلمتك تحط عينك بعينك و ترد علي زي العالم و الناس..
اخذ نفس وليد و ناظرة : ان شاء الله .. و اذا ربي كتب لي عمر بعد هالمهمة تأكد اني ما راح اظل تحت امرك..
غازي : اذا ظليت على هالاستهتار اللي انت فيه تأكد انه بيجنا خبر موتك قبل لا تستقيل..
وليد بحدة مشابهة لـ غازي : ماني مستهتر.. اسوي اللي اشوفة صح.. يعني انت مو مستهتر يوم قررت تترك الشغل بالنص..؟! على الأقل انا ما فكرت اترك شيء نويت اسوية و بديت فيه و خطيت اول خطوة و طريق الرجعة اسهل لي من اني اكمل على الأقل اضمن حياتي اكثر من اني اعرض نفسي للخطر..
البقية وضعية المتفرج .. غازي و وليد ما احد فيهم يقدر يدخل بالنص بينهم و يحل الموضوع بـ هدوء الاثنين يتناطحون و بالأخير يركدون.. غازي : و رب الكعبة يا وليد.. لو يراودني شك ربع بالمية انك ما انت بكفو لأسحبها منك و ارجعك بنفسي..
وليد وقف وعيونة على غازي فقط.. : ما راح اترك شيء بديتة..(آشر عليه بسبابتة) ولو انت شاك اني ماني بكفو ما كان عطيتيني اياها.. ولو انا مستصعبها على نفسي و انا ادري ان 99% بالمية ما اطلع منها عايش و مخاطر بحياتي ما كان رضيت.. و على فكرة لا راودك شك.. ما راح اكون هنا بكون هناك و علمني شلون بتطلعني من بينهم و تحافظ على حياتي.. قادرين يسوون اشياء كثيـر ما تخطر على بالكم.. معاهم ناس بشتى المجالات..
سعود : اجلس.. ما قلت لنا كل شيء..!؟ مبين فيه شيء ما قلتة..؟!
وليد : قلت كل شيء..
نايف : ما علمتنا لما رحت معاهم بعد ما سويت العملية حقتهم. ويش صار حزتها..؟!
وليد دف المركى برجلة و جلس عليها : قابلتهم.. صلاح و طقتة.. كانوا مهربينهم من السجن.. ما خلوني احضر اجتماعهم.. الصقر ماخذني ديزاين معاه.. خلاني اجلس بجناحة.. خلص اجتماع و رجع اخذني معاه..
عماد : ما حاولت تسمع شيء..؟!
وليد : ما بعد انهبلت عشان احاول اتنصت عليهم.. أي حركة ماهي محسوبة ما راح اسويها.. اخاف يكون مركبين كاميرات و يكشفوني بسهولة.. عشان كذا كل شيء اسوية اكون مفكر فيه قبل..
سعود : طيب.. تقدر تزرع هناك ادوات تنصت صغيرة احنا نعطيك اياها..؟!
وليد : سعود قلت لك ما راح اسوي حركة ماهي محسوبة.. صقر ما يخليني اعتب مكان لحالي.. ويوم راح الاجتماع جلسني بجناحة و قالي لا تعتب الباب تونس بأي شيء هنا.. لفيت بجناحة ما فيه أي شيء ملفت للإنتباة..
عساف حط يده على دقنة : اهتمام الصقر فيك غريب..؟!!
وليد يناظر عساف : تتوقع انه شاك فيني..؟!(قبل لا يرد عساف جاوب على سؤالة بنفسة) جاء في بالي هالشيء.. بس لو شاك ليش ما قتلني بارضي..؟! ليش يأخذني معاه لمكان اجتماعهم..؟!! كان تركني ببيتة..؟!
نايف : و انت جالس معاه ببيتة..؟!
وليد : يعني مو مره.. بس مسكني حتى بعد المهمة يبي يشوف كيف اصوب بالسلاح.. و يقول بيحط لي برنامج تدريبي على السلاح و بيدربني بنفسة..
عزام : غريب تصرفة معاك..؟!!!
وليد : حتى انا ملاحظ هالشيء.. بس لازم امشي فيه اشوف ويش تالية.. اذا حسيت انه شاك او يعرف شيء عني بنسحب منه بهدوء.. و اقفل الكشك و لا عاد ارجع له.. و اذا ما هو شاك بكمل فيه.. ادوام بالكشك و عنده متى ما ناداني..
نايف : طيب انت قضيت الليلة اللي بعد العملية عنده..؟! لأننا مراقبين شقتك ما رحت لها..!
وليد : ايه.. قضيتها عنده و قبل الفجر طلعنا للاجتماع و بعدها رجعني معاه و قلت له اني بسافر اسبوع.. الحين برجع له كتفي مكسور و بينشدني..؟!! بجهز لي تمثيلية تليق بحضرة جنابة.. (دخل وليد يده اليمين بجيبة و خرج بكت الدخان و الولاعة من غير لا يهتم بأحد تفكيرة مشغول و يبي يروق)..
اتسعت عيون سعود : ويش ذا..
وليد خرج السيجارة و حطها بـ فمة : ويش تشوف..؟!
عساف ما كان اقل صدمة من سعود : من متى تدخن..؟!!!
غازي بحدة : انقلع دخن برا..
وليد رجع بكت الدخان بس بجيبة العلوي على صدرة و خلاه فاتح اسهل له و ولع السيجارة : عاجبني المكان هنا..
سعود وقف و سحبها من فمة و داس عليها برجلة : هذا مكانها(آشر على الأرض مكان دوسة رجلة على السيجارة) ماهو فمك.. من متى انت تدخن هذا اللي علمك عليه الزفت اللي رحت له..؟! بيومين قلب راسك..؟!
عماد بـ بساطة : من زمان يدخن.. ماهو من يومين..
سعود ناظر وليد اللي ما اهتم و طلع له سيجارة جديدة كان بيسحبها سعود لكن وليد وقف و ابعد عنه .. وليد : مالكم دخل ادخن ما ادخن هذا شيء راجع لي.. اخوي الكبير على راسي بس شيء يخصني ما تدخل فيه دامني ما سمحت لك..
سعود سحب السيجارة بعناد من وليد و داس عليها و احتد صوتة على وليد : احترم وجودي قدامك.. و الا ما عدت تعرف ويش هو الإحترام..؟!
وليد تنرفز من حركة سعود : اللهم طولك يا روح.. ممكن تفكني من شرك.. ماني رايق لك.. ما جيت هنا عشان حضرتك تنشب لي..
سعود : لا يا شيخ.. الحين انا شر.. و هالسم اللي مفتخر فيه ماهو شر..؟!
وليد اعطاة ظهرة : مالكم دخل فيني.. ما عدت بزر واحدكم يتحكم فيني.. اكبر مني مالك زود عندي عن الإحترام.. غيره مالك عندي..
سعود : ماشاء الله يالإحترام اللي مقطعك..؟! تدخن قدامي..! و تكلمني معطيني ظهرك..! و فوقها لسانك طايل علي..!
وليد ينفخ فمة بـ ملل اخرج الهوا من فمة : اسمع.. كلمني باللي تبيه.. تبي بالشغل جلست و سولفت عليك لين بكرة.. لكن تجلس تقول تدخن و ما تدخن.. هذا شيء ما يعنيك.. شيء يخصني انا لحالي.. تفهم لحالي..
سعود كتف يدينة : خلاص بشوف يخصك لحالك شلون ان درى ابوي..
وليد : اذا بتتبع اسلوب غازي و تهددني بأبوي ما راح القي لك بال.. انا اسوي اللي ابيه.. ما عادني بزر.. تحفظ حق الأخوة تنصحني.. زود عنها ما تسوية..
عساف : لا انت انهبلت.. مبين تارك عقلك عندهم و راجع بلاه.. صاحي..!!
غازي : خلوه على راحتة.. انتم ما بغيتوا الا مصلحة وهو ماهو جاهل و عارف ويش هو ضرر التدخين.. ولو يكتب بالنت هالكلمة و يبحث بالصور بيشوف ويشي سوية السم بجسمة.. اذا اليوم هو بخير بيجية يوم و ينهد من اللي يشربة.. على قولة ماهو بزر عشان نتحكم فيه.. (وقف غازي عازم على انه يطلع) رجال شواربة خطت بوجهة و يرادد على شيء هو يعرف انه غلط.. طلع و تركهم مع وليد.. سعود متنرفز من وليد.. اللي مو مهتم.. سحب سيجارة ثالثة و هالمرة ما سحبها منه سعود.. و وليد يدخن قدامة..
نايف : تراهم خايفين عليك..ليش تعاند..؟!
وليد هز اكتافة بلا مبالاة : شيء راجع لي..
سعود : ماشي يا وليد.. بسكت عنك لكن تأكد ماهو على طول.. بيجي يوم اربيك من جديد على قلة احترامك..
ام سعود : بس يا امي من متى و انتِ تصيحين..؟!
ميار في حضن امها و شوفة سراب تركي مرهقة,, مرهقة حد الوجع لها.. ثلاث سنين متمسكة فيه و بحبة و برباط وثيق ارتبطت به تحت اسم زوجة.. ثلاث سنوات تشتكي من عذاب فراق اليم لـ روحها المحاربة وسط اقناع الجميع انفسهم بموتة و محاولة اقناعها بالتصديق و حل الرباط بينهم.. : ماما ماهو مصدقيني.. و الله تركي.. عيوني ما تخبط فيه.. انا اعرفة يا ماما و الله اعرفة..
ام سعود : اذكري ربك.. اخوانك يقولون اسمة راشد بن مسلم.. يعني هم ما يعرفونة..؟! بس يمكن يشبة لـ تركي.. و انتِ من زمان ما شفتية و تهيأ لك انه تركي.. الله يخلق من الشبه اربعين.. و انتِ شفقانة عليه..
ميار غطت عيونها بيديها يعني غلطانة..!! هي شوقها انهكها و خلاها تتخيل تركي بالناس..؟!!
ام سعود تكمل : يا امي ما يصير اصلاً اللي تسوينة الرجال ما يندرى عنه شيء.. انتِ تهدمين حياتك بإنتظارك له.. ابوك و اخوانك شايلين همك اكثر من باقي خواتك.. و بعد اللي سويتية ما ظنتي بتبقين على ذمتة..
فزعت جالسة : لا.. ما راح اسمح لكم.. الا اني اتطلق منه.. لا يا ماما تكفين لا تقولين كذا..
دخلت جود بعد ما طقت الباب : السلام عليكم..
: وعليكم السلام..
جود : سعود برا قال يبي يشوف ميار..
ام سعود : الله يستر ..(تناظر ميار) تحسبينة بيسكت ما تعرفين اخوك و الله اكيد انه مشتط وما احد ماسكة عنك.. زين اصلاً اللي اخوانك مخلينك للحين عايشة..
ماهي ناقصة قلق عشان امها تزيدة.. هي خايفة على تركي الغائب في الواقع الحاضر في روحها و خايفة على نفسها من اخوانها.. و قلقة من كل شيء.. حتى من انهم يجبرونها تنفصل عن تركي..
جود : ادخلة..؟!
ام سعود : دخلية يمه و الله يعين.. بخلي جوالي طارف عشان يلحقك ابوك قبل لا يذبحك..
ميار : ماما خلاص.. تكفين خلاص.. سعود اخوي و اخواني كلهم على راسي و انا ما سويت شيء غلط ماهو بيدي اللي صار كلهم يلوموني ماهو بيدي افهموني تكفون و الله تعبت (نزلت راسها على فخذها تبكي بنحيب) ما احد فيكم رحمني..
دخل سعود وهو يشوف ميار جالسة على طرف السرير ثانية رجولها تحتها و مدنقة تبكي : ميـــار..
ام سعود حاطة يدها على ظهر ميار تطبطب عليها لفت على ولدها : هلا سعود..
سعود سكر الباب و اتجه لميار جلس جنبها : افااا كل ذا صياح..؟! ليش بالله مين هو اللي مزعلك..؟!
ميار رفعت راسها عيونها صغرت من صياحها و خشمها و خدودها حمرا : اللي صار ماهو بيدي.. خلاص انا سمعت منكم كلكم.. يكفي..
سعود : لا ما بعد سمعتي اللي عندي.. بس ابيك قوية.. اذا انتِ على ذا الحالة ما اقدر اقولك من خوفي عليك..!؟
ام سعود زاد قلقها على بنتها و افكارها تودي و تجيب : خير يا ابوي ويش فيه.. تكفى طمنا و الله قليبها ماهو مرتاح..
سعود بهدوء عشان ميار ما تنفجع و يصير لها شيء من زود الفرحة او القلق و الخوف : ميار هي اللي كانت صح .. و احنا كلنا غلط..
ميار هزت راسها يمين و يسار بشويش من غير لا تفهم شيء.. وكأنها تقوله عيد..!!
ام سعود : ويش يعني ذا..؟!
سعود : راشد هو تركي.. و تركي هو راشد..
اتسعت عيونها صدمة .. و كأنها تتلقى الخبر.. قلبها و عينيها هم اللي كانوا يخبرونها انه تركي وما احد غيره اللي شافتة.. لكن الضغط من اخوانها و امها يخليها تراجع الأمر من جديد خصوصاً ان شوقها صار يوهمها بأشياء مثل ما قالوا لها.. لكن اللي شافتة هو تركي.. تركي بن سبف نفسة..
ام سعود : يا مثبت العقل و الدين.. انت ويش قاعد تحكي..؟!
سعود عيونة على ميار الضائعة روحها ما بين فرحة رجعة و الصدمة لها بـ واقعها راشد!!: اقولك يمه راشد هو نفسة تركي..
همست ميار : كيف..!! راشد تركي..؟!
اطلق سعود تنهيدة : ما اقدر اقولك على التفاصيل لأنها معلومات امنية.. لكن تركي فقد الذاكرة من ثلاث سنوات و عاش بشخصية راشد عند ناس و اشتغل معانا.. وقت ما شفتية هو كان يعاني من صداع له فترة طويلة يعاني منه و سببة ذاكرتة اللي فاقدها..
ميار : ع.. عشان .. كذا .. ما عرفني..!!؟
سعود يبي يطمنها : الدكتور يقول احتمال ترجع له الذاكرة بس ما عنده وقت محدد يقدر يعطينا اياه.. لكن ان شاء الله قريب مع الأدوية و محاولة التذكر من اهلة..
ام سعود : يعني هو ما يعرف نفسة..؟!
سعود : و الله يمه ما ادري بس ما كنه يعرف نفسة او انه ضايع بين شخصين راشد و تركي.. لكن ان شاء الله انها فترة و تعدي..
ميار : بشوفة.. هو كان يناظرني يعني يمكن يتذكرني.. لازم اشوفة..
سعود بحزم صارم : لا.. قلت لك امن.. ما يصير تشوفينة.. لو بتشوفينة ممكن تروحين فيها.. شايفة كل اللي صار لـ وعد.. ممكن يصير لك اردى منه لأنك زوجتة.. و هو لا تذكر كل شيء بيتذكرك لا تشيلين هم هالشيء اهلة هم اللي بيساعدونة.. انتِ خليك بعيدة عن الموضوع..
ميار : لا .. مستحيل ما اقدر.. و الله بموت..
سعود : قلت لا.. ما احد راح يسمح لك.. اقولك ما يصير تروحين عشان خايفين عليك.. ممكن يأخذونك و الله ما يرجعونك عشان يقهرون تركي فيك.. تتوقعين لو رجعت له ذاكرتة بيقول ايه تعالي لي خليني اشوفك..؟! مستحيل لأنه بيعرف انه بيعرض حياتك للخطر..
ام سعود : يا أمي اصبري اللي صبرك سنين يصبرك فترة..
ميار ضربت فخذها : الى متى .. تعبت و انا صابرة.. ابي اتطمن عليه.. انا شفتة ماهو طبيعي.. و الله ماني مرتاحة.. تعبت و الله تعبت..
سعود : اصبري فترة اوعدك يا ميار اذا حسيت ان الوضع امان ابي اخذك بنفسي له.. قولي الحمدلله الحين عرفتي انه عايش و هنا يعني تيسر الموضوع كثير ماهو احسن من اول..؟!!
حزت راسها بإية من غير لا تحكي.. عبرتها متفجرة بحنجرتها.. يمنعونها من شوفتة بعد ثلاث سنين غياب.. و بعد ما شافتة دقايق هو فاقد ذاكرتة فيها.. و هي متشفقة عليه و انتبهت لتفاصيل التعب في وجهة..
سعود : خلاص اجل اصبري.. بس ادعي ربك الله يحمية و يشفية و ينهي الموضوع على خير.. الجئي لـ ربك و بس.. ومثل ما فرجها عليك برجعتة بـ يفرجها عليك بشوفتة طيب ان شاء الله بس قولي يارب..
ميار دنقت حتى تنطق بنبرة محملة بالوجع و الرجاء : يـــارب..
..
المغرب.. في جلسة بدوا يتأقلمون عليها.. الشباب جميعاً مع الرجال على رأسهم ابو عبدالرحمن..
نايف جوالة بيدة و بـ جو بعيد عن اجوائهم.. يسولف بالجوال و مو منتبة لأحد منهم..
راكان : بدا يطقني الملل.. (ما خلص كلمتة الا جوالة يطق رد مبسوط) هلا يا اخوي.. بخير جعلني ما افقدك.. افا عليك فينا الشدة ليش لا و الله اني طفشان.. ههههههههههههه لا تظلم مشاري ماله دخل.. خلاص وين نتقابل..؟! اهم شيء صباحي..!؟ ابد ما حولك احد.. جعلك سالم.. مع السلامة.. (ناظر مشاري) يسلم عليك حسام..
مشاري : عليك و عليه السلام.. من كلامك بتطلع..؟!
راكان : ايه و رجاءاً ما ابي محاضرات من احد.. بروح ابسط عمري.. بدال هالحكرة اللي ملينا منها كننا حريم خايفات و متخبيات ببيوتهن..
مشاري بـ أسلوبة اللين متفاهم : الله يرضى لي عليك.. لا تعاند.. و الله من خوفي عليك..
راكان : ادري بس هذا هم يطلعون ويروحون و يجون.. من حقي انا بعد اطلع..
مشعل : خذني معك تكفى ضايقة فيني الوسيعة..
ابو سعود : انتم من جدكم و الا انهبلتوا..
وقف راكان : انا ما انهبلت .. و بنهبل اذا جلست مقابلكم 24 ساعة.. (ناظر مشعل) يالله قم..
مشعل وقف.. ابو سعود : مشعل..؟!!!
مشعل : الله يخليك لي.. ابي اشوف الناس انكبت و الله.. ابي اشوف احد جديد..
سعود يناظر مشعل مقهور منه من بعد وليد واللي يسوية : انهبلت انت واخوك.. كل واحد بيمشي راية..؟!
مشعل مل من الوضع اللي جالسين فيه : انا مالي دخل بأحد.. و من جد طفشت.. صار لي كم يوم ما شافت عيني الشارع..؟!
احمد : مشعل لا تعاند من مصلحتك.. خايفين عليك..!!
مشعل رفع حواجبة : خايفين علي (ابتسم) كان اولى تخافون على غيري.. و مشى و وراه راكان..
سعود : ماشاء الله الناس صارت تخيط و تفصل من غير لا تشور احد..؟!
ياسر : معاهم حق.. من جد طفشنا.. انا عني بكرة بداوم.. بشوف شغلي ما ادري لو الدنيا سايبة.. ومن الحين اقولك لا تسوي لي سالفة انا بسوي اللي ابيه من غير لا احد ينصحني.. ماني بزر احد يخاف عليه..
ابو عبدالرحمن بحدة حتى يسكت الجميع: ابك انتم ما تريحون الواحد.. ما عندكم سوالف تونس.. ما غير تهاوشون..؟!
ابو عبدالله بصوت راكز : اقول يا عمي مساعد .. يومنا هنيا.. و احنا صرنا اهل.. و ان شاء الله قريب نفرح بالشباب كلهم.. حتى لو هي نتايج التحاليل تأخرت عن اليوم..
غازي كان هاديء جداً او بالأصح مو مبالي بـ شيء.. و كأنه ما يدري اخوة ويش يقول.. و الحقيقة ان اللي يقولة اخوة ما يثير اهتمامة.. مجرد شيء بيسوية عشان امه ترضى عنه و يقول انه خطب..
ابو عبدالرحمن : ان شاء الله.. بس تطلع نتايجهم و تتيسر امورنا كلهم يملكون..
ابو عبدالله اعتدل جالس : يا عمي احنا جماعة وحدة.. ولو اننا مو من فخذ واحد.. لكن عرقنا واحد.. و الدم ما يصير ماي حتى لو اختلفنا من سنين ماضيات.. و الحكي في الفايت نقصان في العقل..
ابو عبدالرحمن : عداك العيب يا ابو عبدالله انا اشهد انه منطوق رجال من ظهر رجال.. احنا كان بيننا و بينكم بنياتنا الثنتين.. و الحين بيصير بيننا ارواح متوالفة ان شاء الله..
كلهم مستغربين المقدمة اللي يتكلم فيها عامر.. و منتظرين يسمعون ويش وراه.. حتى عيالة ما يدرون ويش بيقول ابوهم.. بس اكيد انه ما يقول هالحكي كله الا وراه شيء..
ابو عبدالله : و احنا يا عمي يشرفنا نسبكم و قربكم.. ما هو بس بـ ولدي عماد.. و لا ببنياتي (يقصد شوق و هنادي).. احنا نبي قربكم و نخطب بنت ابراهيم الكبيرة لـ اخوي غازي.
صــــدمة...!! اتسعت عيونهم من الصدمة.. طبعاً عيال ابراهيم هم اكثرهم صدمة بالخطبة.. ندى.. و الثانية.. لكن الصدمة تحولت لـ غضب شديد على رد جدهم..
ابو عبدالرحمن : و الله انها ما تعرف غيرة حليلة ان الله كتب لكم.. هي من نصيبة..
ابو عبدالله ما توقع ان الموضوع ينتهي بـ هالسرعة.. لكنه نطق برزانة : الله يكبر قدرك يا عمي.. مير احنا نبيكم تنشدون البنية.. من حقها تقرر حياتها هي بـ تكون الثانية..
كان على وشك ياسر يسفل فيهم و يأخذ موضع الهجوم على خطبة ما يدري شلون اقدموا عليها.. لولا ان عمة بندر مسكة وهو يصر على اسنانة : اركد.. حكيك بيصغر ابوي.. اصبر..
ياسر يناظر عمة بندر حمقان : يعني عاجبك..؟!
بندر : لا.. و هجومك بعد ما راح يعجبني.. اصبر نشوف ابوك..
ابو سعود : دام ابوي عطاكم.. فـ بنيتي ما تطلع من شورنا..
غازي ما اهتم.. لو هو خطب قبل لا يصير له اللي سووه بناتة.. كان اصر على معرفة رأي ندى بنفسها .. كان خلى سعود يكلمها قبل و لا اقحمها بشيء.. اما الآن.. هو غير مبالي حتى بـ رايها.. مو لأنه ما يبيها.. و لا سمع منقود فيها.. لأنه ماهو حاس.. ماهو حاس بـ شيء ايجابي ابداً.. مشاعرة المكسورة بعد توأمة خلاه ما يفكر بـ طريقة صحيحة.. او ممكن يطري عليه الصح و لا يبي يسوية لأنه ماهو مهتم..
ابو عبدالله : اجل على بركة الله.. ان شاء الله يملكون مع الشباب..
لحظات حتى يقومون عيال ابراهيم.. واحد وراء الثاني.. و اولهم ياسر و حاتم ثم خالد و احمد و اخرهم سعود..
في غرفة جمعتهم.. معصبين.. الا مفولين.. من هالخطبة اللي انتهت حتى من غير لا ينرد الشور لأختهم.. و ياليتها الأولى بحياتة ما كانوا اعترضوا لكنها الثانية.. و الأكيد ان ردود افعالهم ماهي وحدة و الا اتفقوا على ردة فعل وحدة.. فيهم اللي معارض و بقوة و فيهم اللي متقبل الموضوع عادي.. يظل رجال غازي ينشرى و ما ينباع.. و نسبة مكسب..
ياسر يفتر بالغرفة : شلون جدي و ابوي يعطونهم من غير لا ينشدونها.. الثانية.. الثانية بحياتة ماهي الأولى..؟!!!
احمد : يعني ويش تبي ابوي يسوي..؟! جدي هو اللي عطاهم و ابوي لو تنطبق السماء على الأرض ما تراجع عن كلمة قالها جدي..
خالد : يعني تبي هالخطبة تتم..؟! من بعد عساف اللي هي اول بختة تأخذ غازي و الثانية بعد..!؟!
سعود بمحاولة لـ تهديئة الموضوع : اركدوا.. الموضوع ماهو سيء.. غازي بنفسة ما فيه عيب..
حاتم : بس متزوج يا سعود.. انا مو معترض على موضوع انها تكون الثانية.. لكني معترض ان رأيها ما انوخذ.. من حقها هي اللي تقرر حياتها لأنها هي اللي بتعيشها ماهو جدي و لا ابوي.. يمكن ما تقدر تحمل تكون الثانية بحياتة و هي تشوف عنده مرة و بنات..!!
ياسر : ماهو على كيفهم يحلون و يربطون من غير لا يشورونا ما احنا جدران جالسين..
احمد : احنا ما نوقف ضد ابوي.. و دام ابوي قال موافق فا غصباً عنك توافق.. مالك كلمة من وراه..
خالد : انتم ليش ما تحسون..؟! مستوعبين.. ان غازي بالأربعينات و عنده اربع بنات..؟!! و ندى ما يعيبها شيء..؟! ليش تبون تزوجونها انسان ما يصلح لها..؟! ما فيه بينهم أي توافق.؟!
سعود : خالد ماله داعي نضحك على بعض.. ندى ماهي صغيرة.. كم شهر و بتعتب على الـ 28 قلت فرصها بالخطبة .. و بعد فركشة خطبتها من عساف بتقل زيادة.. الناس بتنقدها و بيقولون لو فيها خير ما تركها ولد عمها.. فكر فيها شوي.. تبون لها الشين و الا الزين..؟!
ياسر اتسعت عيونة وهو يناظر سعود : يعني انت راضي..؟!
سعود : ايه.. لو فكرت في الموضوع بـ شوية ركازة.. بـ تشوف غازي مكسب لها.. تكون هي الثانية بحياة رجال و يعزها و يكرمها و لا تكون الأولى و ما تتهنى بحياتها و تقضيها كلها مشاكل..
خالد حط رجل على رجل : بتفهمني أي وحدة من خواتي لو جاها واحد طلبها الثانية ما ترفضة..؟! تذكر يوم حمد خطب وعد الثانية ويش سويت انت يوم دريت..؟!
سعود : تتوقع لو ندى اصغر من كذا كنت بـ وافق اكيد لا.. كنت بـ أقول يمكن يجيها ازين منه واحد عزابي هي اول بختة.. و لو وعد كانت بنفس مكان ندى الحين كنت بـ وافق انا ماني مفرق بين خواتي.. و حمد يوم خطب وعد الثانية حتى هي اصغر من عيالة ماهو صاحي.. ابوي من حزتها رفض لأنه مستحيل ينفع لها.. و حمد ترى ما جاء و خطبها.. الا انه سمع انه ترد خطابها وهم عزابية قال يجرب حظة يمكن تبي لها واحد متزوج..!! و مبين انه سأل عن وعد كثير عشان كذا صمل و تجرأ يخطب من عندنا له..
ياسر : ويش سمع ..؟! ويش تقصد..؟!
سعود : اقصد سأل عن مواصفاتها و راقت له.. كلنا نعرف ان وعد هي اكثر وحدة من خواتي انخطبت.. و اغلب اللي خطبوها عزابية و ردتهم فا هو جانا يجرب حظة بنت صغيرة و حلوة ترجع له شبابة..
احمد : انا مع سعود.. ماني شايف غازي فيه عيب حتى لو خاطب ندى الثانية.. ابوي لو ما تزوج خالتي منيرة و بغى يتزوج وحدة رابعة ما بعد تزوجت و لا احد فيكم بيعترض طريقة ابد.. الرجال ما يعيبة انه متزوج.. تعيبة اخلاقة.. و اخلاق غازي كلنا نعرفها..
ياسر ينقل نظراتة بين احمد و سعود : اشوفكم صفيتوا الاثنين مع بعض.. و عادي تخلونة يأخذ ندى..
سعود بـحدة : و انت بعد بيكون عندك عادي و بتفرح لها.. لأن ابوي عطاة كلامك و اعتراضك ماله معنى..
دخل بندر مقهور و جلس : استغفر الله العظيم.. جلستنا بهالمزرعة غلط بـ غلط.. يحلون و يربطون بمواضيع الزواج و لا همهم شيء.. بقي يزوجون ولد خالد و بنتة و نقضي..
ياسر يناظر اخوانة و يأشر على عمة : شفتوا حتى عمي ماهو راضي.. لأن الموضوع اصلاً ماهو منطقي..
بندر : لا بالله ماني راضي.. و اللي ما ارضاني اكثر ان ابوي عطاة و اكد عليه ابراهيم يوم قال بنتة ما تطلع من شورة.. ما هو رايح فيها الا البنية.. ابوكم استخف.. ما اعتبر من اللي سواه بـ وعد بيكمل على ندى..؟!! ابوكم مرات يحسسني انه لاقي بناتة بالشارع..
سعود : عمي الله يهداك ويش هالحكي.. هذا و انت تعرف ابوي و تدري ان ابوي ما يرخص وحده فيهن ولو هو شايف ان غازي ماهو كفو ما كان عطاة..
بندر : تكفى لا تنرفزني.. لا تخليني اطلع الخمير و الفطير.. بـشوف شلون بيتصرف بـ موضوع ميار.. و كيف بيزوج سها و دانه و جود..
ياسر يناظر عمة : و الحل يا عمي.. دامنا بأول الموضوع خلنا نتصرف و نمنعة قبل لا يملك عليها و يطلع الموضوع من يدينا..
احمد : ما انتم صاحين.. كلامك هذا قولة لأبوي وشوف ويش يقولك..؟! كنكم شايفين ابوي ما عاد له فايدة وكل قراراتة غلط.. تتوقعون لو غازي ماهو كفو كان جدي عطاه..!؟ و ابوي رضى و اكد على كلام جدي..؟! لو ابوي ما يهمه زواج أي وحدة من خواتي كان كلهن متزوجات من زمان و معيلات.. لكنه يعرف الرجال و يعرف غازي بإنه كفو ينعطى حتى لو هي الرابعة ماهو الثانية..
..
جمع بناتة بغرفة كلهن.. يبي يشوف اخر التطورات و يتطمن انهن تراضن بعد اللي صار من وراء نهى.. سلمن عليهن كلهن و وقفن ينتظرونة..
ابو سعود آشر لهن على الكنب : اجلسن بتكلم معاكن..
ندى جنبها دانه وسها و جود لحالها و ونهى و وعد جنب بعض.. قبل لا يجلس مسك وعد من عضدها : تعالي..
وقفت و جلست جنبة لما جلس.. ناظرها وهو محاوط كتفها بيدة اليمين و باين له نصف ملامحها : الحمدلله على سلامتك..
وعد ببرود : الله يسلمك..
ابو سعود ناظر بناتة : شخباركن..؟! مرتاحات هنا..؟!
جود تتحلطم : لا.. ترى ملينا نبي نرجع بيتنا..
ندى ناظرت جود : مرتاحات يبه ما علينا قاصر الحمدلله..
سها : بابا و الله طفش ملينا من الجلسة هنا.. ابي اداوم ابي اشوف ناس غير اللي هنا..
ابو سعود : مسرع مليتن ما صار لنا اسبوع حتى..؟! امداكن..؟! و بعدين الجامعة قلنا نأجل الموضوع فترة..
سها : بيعطوني حرمان يا بابا على غيابي.. و انت تعرف مشاكلي مع رئيسة القسم و الله غير تشوفني ماني كفو للتخصص..
ابو سعود : قلنا بنحل موضوع رئيسة قسمك و الحرمان لا تشيلين همة انا بجيب لك عذر طبي.. ما احد راح يعطيك حرمان و انتِ معاك عذر طبي..
ابو سعود ناظر ميار : ما سمعت صوتك ميار..؟!
ميار رفعت عيونها لأبوها : عادي ما عندي شيء اقولة..
ابو سعود : سعود كلمك.. عشان تركي..؟!
ميار : ايه.. بعد كل شيء يقولي خليك بعيدة لين نشوف الموضوع.. انا انتظرة من ثلاث سنين عشان اخر شيء تقولون هالحكي..!!!
ابو سعود : سعود خايف عليك.. يكفي علينا وعد صارت بنص القضية.. و ما نبي نضحي فيك بعد.. و هو خايف عليك لو دروا انك زوجة تركي ممكن يسعون وراك..
ميار : انا زوجة تركي.. ماني زوجة راشد اللي جلس يتكلم عنه سعود.. بابا افهمني الله يخليك.. سعود يقول فقد ذاكرتة و محتاج احد يذكرة بحياتة..
ابو سعود بـ حزم حتى يقطع تفكيرها بالموضوع : ابوه و اخوانة بيتولون الموضوع.. انتِ لا تدخلين.. لا من قريب و لا من بعيد..
ميار : و ان رجعت له ذاكرتة و ما ذكرني عشاني ما كنت معاه.. تراكم تذبحوني يا بابا.. و الله تذبحوني..
ابو سعود : ميار الله يرضى لي عليك.. ما عندي استعداد اضحي فيك.. اصبري فترة بس يتأكد سعود ان كل الأمور بخير انا بنفسي بوديك له.. و اجلس معاك لين تقضين و متى ما بغيتي خليتك تشوفينة.. بس الحين اصبري اللي صبرك ثلاث سنين يصبرك فترة ماهي طويلة ان شاء الله..
ميار تحس ان الموضوع خارج عن إرادتها متفقين و مخلصين ما راح يسمحون لها و وجودهم بالمزرعة يزيد ضعف صعوبة شوفة تركي : بصبر.. بس بابا ترى حتى الصبر له حد و ينتهي.. ما اضمن لك نفسي بطول و انا صابرة بعد ما شفت حالتة..
ابو سعود : ان شاء الله بتصبرين لين الوقت المناسب.. بس انتِ لا تفكرين بالموضوع ما ابيك تتعبين..
ميار اطلقت تنهيدة عميقة تعبيراً عن وجع بعد ما بكت كل الليل و الصبح بحضن امها و زادتها عليها سعود بكلامة : شلون ما افكر حتى و انا ما عندي شيء يشغلني..
ابو سعود : بتتيسر من عند ربك.. استعيني بالله..
ميار : و نعم بالله..
جود : شكلك جامعنا عشان نسمع حكيك لـ ميار و تحط وعيد بحضنك..؟! ما كني انا الصغيرة مكاني ماهو مكانها..
ابتسم ابو سعود : ما عقلتي انتِ كل ما شفتك اخبل من قبل..؟!
جود : و ليش اعقل و اكدر على خويطري.. خليني خبلة عشان ما اموت ناقصة عمر..
ابو سعود : بعد تقولينها قدامي بتزيدين خبال.. ما تستحين مني انتِ..؟!
جود : باباتي كأني قلت لك شيء عيب ترى عادي قلت لك بصير خبلة يعني عادي ماهو شيء استحي منه.. لازم تكون متعود على اني خبلة..
ابو سعود : انا ما ادري شلون بزوجك اخاف تفشليني بالرجال..!!
جود شقت الابتسامة وجهها : قول ان جايني عريس كود يطلعني من سجنكم ذا و ارتاح..
ابو سعود : عز الله العريس اللي بيخطبك ما يحتاج ينشد عنك بس يجي يتسمع لهالحكي و هذا وجهي (ضغط على دقنة باصباعة السبابة و الإبهام) كان شفناه مره ثانية...
جود عفست وجهها : اول مره اشوف اب يحطم بنتة التعيبينة..؟!!!
دانه : انتِ تعيبينة ماشاء الله..؟! و لسانك ما وقف اجل لو طيبة ويش بتسوين..؟!
جود : قل اعوذ برب الفلق..!! اذكري الله لا تنظليني..
دانه : قلت ماشاء الله لا تخافين عيني باردة ما اصك احد بعين..
جود تمسح على شعرها بيديها الثنتين : بعد اخاف على جمالي لا تخربينة بعينك الصاروخية..
نهى وقفت : عن اذنكم..
ابو سعود : اجلسي.. ما بعد خلصت عشان تقومين..
نهى بصوت مرهق من البارح ما نامت : تعبانة بابا ابي ارتاح..
ابو سعود : اجلسي ماني مطول عليك.. (جلست نهى حتى يناظرها ابوها) ايش فيك..؟!
نهى : كل السالفة سهرانة و ابي انام..
ابو سعود : ليش من متى صاحية..؟!
نهى : امس العصر..
ابو سعود عقد حواجبة بقوة : ويش مسهرك فوق 24 ساعة..؟!
نهى : مالي خلق انام..
جود : يعني الحين لك خلق تنامين..!؟!
نهى رفعت رجولها و ثنتها : لا مالي خلق اسوي شيء..
جود بتسرع : كل ذا عشان اللي صار مع خالة مريم..؟!!
نهى نزلت رجولها و ناظرت جود و احتد صوتها عليها : ممكن ما تجيبين لي طاري هالموضوع.. كل من شافنا تكلم علينا ما تملون انتم خلاص عاد..
ابو سعود : نهـــى.. (نظرتة نهى لثانيتين و بعدها شتت نظرها عنه).. ويش اللي صاير بينك وبين امك.؟!
نهى : و لا شيء.. ما صار و لا شيء..
ابو سعود : نهى ادري للحين مو متقبلة الموضوع.. بس ما يصير اللي تسوينة.. انتِ بغيتي شوفتها و انتِ جيتيها بنفسك.. ما يصير تصدين امك بعد ما اعطيتيها امل ان كل شيء بيكون طبيعي بينك و بينها..
نهى : بابا سكر عالموضوع.. صدقاً انا تعبانة و ما ابي اعيد و ازيد بالحكي.. و لا لي خلق اتكلم بالموضوع.. الله يخليك لا تضغط علي.. من جد تعبانة و احس السخونة بترجع لي..
ابو سعود : بس ابي اقولك لا تحرمين نفسك من جنتك يا نهى.. ما انتِ صغيرة عشان تجهلين فتحي مخك..
نهى : ان شاء الله بحاول.. و الحين ممكن اطلع..؟!
ابو سعود : ممكن ليش لا..
وقفت نهى حتى تبوس راسة مسك يدها و حط باطن كفة على جبينها و حس انها فعلاً مسخنة : لساتك على ادويتك..؟!!
نهى وقفت عدل بعد ما كانت مدنقة على ابوها : لا شفت اني تحسنت و تركتها..
ابو سعود : عمرك سمعتي بمضاد حيوي يتركونة قبل يكمل سبع ايام..؟!
نهى : بابا لا تكبر الموضوع هذا عشاني سهرانة بنام و اصحى و اصير زينة..
ابو سعود : استغفر الله العظيم..
قبلت نهى راسة من جديد و طلعت قبل لا يسمعها محاضرة..
ابو سعود : انتبهوا لها شكلها هلكانة..
ندى : لا تشيل هم يبه..
ابو سعود : تراضيتوا بعد اللي صار بيت ابوي..؟!
سها : ما زعلنا عشان نرضى..
ابو سعود ابتسم : ما زعلتوا..!! ههههههههه ما كنت معكم وقتها ابد..
سها : الا صدق وقتها بس بعدين خلاص يعني أي خوات يتزاعلون ساعة ساعتين و كل شيء يرجع طبيعي و ما كأنه شيء صار..
ابو سعود رجع يده وراء وعد بعد ما شالها لما مسك نهى : و الشيخة ويش اخبارها..؟!
وعد : عايشة..
ابو سعود : بس..!! عايشة..؟!
وعد : ايه..
ابو سعود : شكلك زعلانة مني..؟!
وعد : لا ليش ازعل..؟! ما يحق لي اصلاً ازعل على احد..
ابو سعود ناظر بناتة : اطلعوا كلكم عدا ندى و الشيخة..
فعلاً طلعوا كلهم بعد ما باسوا راسة .. و بقت ندى و وعد معاه..
ابو سعود : للحين زعلانات من بعض..؟!
ندى : لا يبه كل شيء رجع طبيعي.. مثل ما قالت سها ساعة ساعتين و يرجع كل شيء طبيعي..
ابو سعود : اكيد..؟!!!
ندى ابتسمت : ايه..
ابو سعود ابتسم : طيب.. ابوك ويش له عندك..؟!
ندى : حياتي كلها..
ابو سعود : الله لا يحرمني منك.. انتِ تدرين انك غالية عندي.. انتِ غير بما انك اكبر البنات..
وعد تنرفزت.. ما تنكر ان الكلام نرفزها ضعف لو وعلاقتها بأبوها عادية.. و فوق هذا هو سمعها الحكي هي من بِد خواتها..
ندى : الله يخليك لي..
ابو سعود : ابيك تدرين يا امي مو كل شيء بالحياة نبيه نحصلة.. و مرات يصير لنا اشياء حتى لو رفضناها بالبداية بس نعطي انفسنا الفرصة لأننا نتقبلها بنحبها وما عاد نستغني عنها..
ندى توترت حست ان الموضوع فيه عساف و الموضوع بيتكرر عليها خافت ان اخوانها مغيرين راي ابوها.. : يبه ليش هالحكي..!؟
ابو سعود : جاك عريس..
سكتت ندى ما هو من طبعها تتسرع تبي تلقط الموضوع كله عشان يكون لها حق انها تتكلم..
ابو سعود : بصراحة ما يعيبة شيء.. رجال له مركز و اسم و نسب.. و راعي دين يخاف الله.. و يوم خطبك ابوي عطاه.. و انتِ تدرين اني ما ارد ابوي و اعرف انك ما راح تفشليني و تقصين وجهي و بتفهمين الموضوع.. ما راح تسوين لي سالفة اني ما اخذت شورك..
زادت توترها ابوها ما قال اسمة.. و فوق هذا يقول ان جدها اعطاه..!! يعني الموضوع حسبة منتهي..
ابو سعود : بس عنده شغلة ممكن ما ترضيك و انا ما اشوفها عيب لأنك لو تشوفينها عيب بيكون هالعيب فيني بعد..
ناظرت ابوها و هي تشوفة خالي من كل العيوب حتى لو خواتها يشوفونة متحجر هي ما تشوف التحجر اللي يقولون عنه.. حتى لو خواتها يقولون كابتهم و اشياء كثيرة حارمهم منها هي ما تشوف هالحرمان.. اما يكون عيب فيه..!! هي ما قد شافت بأبوها أي عيب..
ابو سعود : متزوج..
اتسعت عيونها.. ما كانت هي الوحيدة اللي انصدمت وعد بعد انصدمت من الكلمة..
ندى : و كم بيكون ترتيبي بين حريمة..؟!
ابو سعود : الثانية..
ندى : يعني ممكن يطق على راسي الثالثة و الرابعة..؟؟!
ابو سعود : و اللي يتزوج وحده ممكن يتزوج ثنتين و ثلاث.. يا امي و الله رجال ما فيه منه..
ندى حست بالعبرة خنقتها : ومين هذا اللي ما قدرتوا تردونة و تعطونة حتى لو اني الثانية بحياتة و لاني اول مره بحياتة..؟!
ابو سعود : غازي بن حمدان.. اكيد سمعتي باسمة كثير بالفترة الأخيرة..
دب الرعب بـ عروقها و هي تتذكر صراخ بنتة البارح : لا يبه تكفى و الله يذبحني..
ابو سعود ابتسم : ويش يذبحك.. هو طالبك زوجة مو ذبيحة للعيد.. هو صح تشوفينة تقولين انه عصبي و شديد لكن ما فيه رجال بالدنيا ما فيه رحمة..
ندى راح صوتها بـ تبكي : لا الله يخليك يبه الله يخليك.. و الله يصبحني بـ طراق و يمسيني بـ طراق.. عادي انا ما عندي مانع اتزوج أي واحد لو الرابعة.. بس غازي لا الله يخليك غازي لا..
ابو سعود زادت ابتسامتة بنتة شكلها من جدها خايفة : ويش هالحكي ما راح يصبحك و يمسيك بـ طراق انا واثق فيه.. لو ادري انه ممكن يمد يدة عليك ما قلت له اني موافق.. ماني مرخصك عشان اسمح له يضربك.. ما سمحت له نفسي امد يدي عليك عشان اسمح له يمد يده عليك..
ان كان كلامة كله يبي يريح فيه ندى.. فا أخر جملة كفيلة بأنه يجرح فيها اللي مجلسها جنبة ما سمحت لنفسي امد يدي عليك عشان اسمح له يمد يدة عليك.!! يعني لو عماد يضربها عادي دام هو سمح لـ نفسة يضربها.. !!!!..
ندى جالسة و ترجف كأنها تقلي على نار ماهي ثابتة بمكانها : و الله خايفة يبه و الله بموت..
ابو سعود : بسم الله عليك.. ويش هالحكي..؟! بخليك تشوفينة و يشوفك.. بتشوفين انه رجال فيه خير.. و اسمعي من اخوانك بعد و استخيري.. ماهو عيب يا ندى تكونين الثانية..
ندى : يبه عادي قلت لك لو اكون الرابعة ما يهمني.. بس غازي و الله اخاف منه..
ابو سعود : ليش ويش انتِ سامعة عنه..؟!
ندى دنقت ما تبي تقولة انه ضرب بنتة البارح و صراخها الكل سمعة.. حست بهالشي هي تجرح ريما لأن هذا الشيء خاص في ريما و اهلها ما يحق لها تقولة لأي احد حتى لو سمعتة..
ابو سعود : ما قلتِ لي ويش سمعتي..؟!
ندى : ما سمعت .. بس الكل يقول يخوف..
ابو سعود : اجل لا تحكمين على شيء قبل لا تشوفينة.. شوفية و اجلسي معاه بعدها ما تدرين يمكن قلبك يرتاح له..
ندى : لا ما ابي اجلس معاه.. بس.. خلاص انا بستخير.. بشوف امي..
ابو سعود : اللي يريحك.. ما تبين تشوفينة كيفك.. و اذا تبين ما عندي مانع بكلمة.. بس لا تفشلين ابوك يا ندى.. (ناظر وعد) حتى الشيخة ممكن تقولك رأيها بـ خالها..
وعد عقدت حواجبها من غير لا تناظر فيه : شكلك نسيت اني ما احب لها الخير و اني انانية و حسودة..
ندى : وعد قلنا الموضوع انتهى..!!
ابو سعود : قلتِ تراضيتن يا ندى..؟!
وعد : هالكلام مو ندى اللي قالتة انت اللي قلتة..
ندى بـ رجاء لـ وعد تقفل السيرة : وعد بليــــز!!!
وعد : انا ايش قلت لك البارح..!؟ ما قلت لك لا تدخلين بيننا..؟!! لا تحشرين نفسك بالموضوع.. مو انتِ سعيتي ان بابا يدري بشيء كان ماضي ما عاد يعني شيء لأحد.. لا تخربين الباقي بعد..
ابو سعود شد على وعد ما كان يبيها تعصب و تنفعل عشان كذا حضنها اكثر : و لا كأني جالس جنبك..!؟ تصارخين عليها قدامي..!؟! ما اعرف يا وعد شلون افهمك.. تصرفاتك ما تعجبني.. احيان اشك اني ربيتك مثل اخوانك..! ليش تجازيني بهالشكل..؟! علميني ويش الخطأ اللي ارتكبتة بتربيتك..!؟
وعد تعض شفايفها بـ قوة.. و لا تحاول حتى تناظر بـ ابوها..
ابو سعود : ما تردين علي..؟! علميني ويش هو الخطأ عشان نصلحة و ننتهي من الموضوع.. بدل ما كل شوي مطولة لسانك..؟!
ندى : يبه الله يخليك.. خلاص انسى الموضوع.. احنا تصالحنا.. وهذا هو المهم.. و الموضوع صدق قديم وما ينلقى بال.. ما فيه شيء يستاهل زعلك و زعلها.. بس وعودة تعبانة من بعد ما اسلبت (سقطت= اجهضت).. يومين و بتحسن نفسيتها..
ابو سعود : ندى لا تدافعين عنها و عن غلطها.. لا تخلينها تحس انها ما غلطت.. انا للحين ماني راضي عنها..
وعد ابعدت يده عن كتفها و لفت جهتة : ما انت راضي..؟! و لا انا راضية.. انت تغلط علي من غير لا تحس و لا تحسب حساب لخاطري.. كل مره تظلمني.. كل ما صار أي خلاف بيني و بينك قلت انك ما ربيتني.. اوكِ انا ما تربيت و قليلة ادب و حسودة و ما احب الخير لأحد وما استاهل انك ترضى عني.. بعد فيه شيء بخاطرك ما قلتة..!؟!
ناظر بـ عيونها حسها غير.. غير عن بنتة اللي من فترة ماهي بعيدة كانت هي وعد..!! هاذي غير.. غيـر عن وعد بنتة.. حتى نبرة صوتها غريبة عليه.. و كأن الحياة انسحبت من نبرة صوتها.. مد يده حتى يلامس خدها : أنتِ تعبانة..؟!!!
هزت رأسها بـ لا و طلعت بعد ما باست راسة.. ناظر ندى اللي كانت حاضرة جلستة.. ما توقع من وعد تطلع و هو يقولها ماني راضي عنك..!! ما يهمها رضاة..؟! لو ما يهمها ما كان باست راسة..؟! ايش التناقض اللي تعيش فيه..!!
ندى قامت و جلست جنبة : يبه لا تضايق.. هي بس مرهقة من كل شيء.. اصبر عليها يومين و هي بتجيك تدور رضاك..
ابو سعود : انا اعرف بنتي اعرف وعد.. بس هاذي غير..! ندى ويش صاير لها..؟! تهاوشت مع امها..؟!
ندى : لا.. نهى هي اللي تهاوشت مع خالتي مريم.. ما ادري ويش صاير لهن الثنتين.. بس وعد ممكن للحين ما تخطت ازمة انها اسلبت.. لكن نهى البارح قالت لخالة مريم كلام كثير ليـن ضربتها..
ابو سعود رفع حواجبة : مريم ضربت نهى..؟!
ندى : ايه.. انا مستغربة من نهى.. و دخلت بعدها عند وعد وما طلعت الا لما ناديتنا.. لو لقيت العذر لـ وعد باللي تسوية ماني لاقيتة لـ نهى..
ابو سعود : يمكنها كانت مسخنة و خارتها بالحكي..؟! شفتيها ويش سوت يوم سخنت قالت حكي ما ينقال..!!
ندى : ما كان فيها شيء .. بس سها تقول هي متأثرة بـ وعد..
ابو سعود : شلون..؟! نهى متأثرة بـ وعد..! اولاً نهى اكبر.. ثانياً نهى شخصيتها ماهي ضعيفة عشان تتبع احد براية.. لو قلتِ سها دانه اقولك ايه ممكن أي احد يأثر عليهم بس نهى لا..
ندى : قلت لـ سها انها شخصيتها قوية ماهي ضعيفة عشان احد يأثر عليها..!! قالت لي ان نهى ما راح تتأثر بـ احد فينا كثر وعد.. بدليل لما نهى قررت تشوف امها وعد كانت بعيدة.. بينما لو هي قريبة ما راح تشوفها.. و الدليل اللي يصير الحين.. و لو نهى تبعد عن وعد ممكن بعد فترة تلجأ نهى لأمها..
ابو سعود : يعني انتن تقولن ان وعد تعبي راس نهى..؟!
ندى : لا..
ابو سعود كتف يدينة : يالله .. توك ويش قلتِ..؟!
ندى ابتسمت ابوها مو فاهم فلسفة سها : مو شرط وعد تعبي راس نهى.. لكن نهى لما تشوف وعد اللي هي اصغر منها ترفض القرب من امها بتتأثر فيها.. لأن وعد بتتكلم بالموضوع بشكل سلبي لخالة مريم انتِ تركتينا وما همِناك و من هالحكي و نهى لما تسمعها بما ان وعد هي الوحيدة اللي عايشة معاها بنفس المشكلة بتأثر فيها..
ابو سعود : طيب يعني اذا ابعدت الثنتين عن بعض ممكن يصلح حالهن مع امهن..؟! لأن خوالهم كلموني كم مرة.. و انا بعد هالوضع ماهو عاجبني و ما ابيهن يضيعن جنتهن..
ندى : ممكن.. بس يبة لازم تعرف ان خالة مريم لازم تجتهد.. هي ولا مره سعت انها تجلس معاهن لحالها.. هي ما جربت هالشيء بصراحة هي مقصرة معاهن.. تطالبهن بإحترام و حب و اشياء نهى و وعد يشوفون مالها حق فيها هن للحين ما شافن منها الا الجانب السيء.. ما اعطتهن شيء من حنانها حتى لو بالإجبار.. اتوقع اذا ضغطت عليهن بتلقى شيء ايجابي ولو ان البداية بتكون صعبة بس ما لازم تيأس لأن اللي سوتة ماهو قليل خصوصاً ان وعد عرفت ان خالة مريم كانت تبي تسقط الجنين وقت ما كانت حامل فيها..
ابو سعود استغرب : ومين اللي علمها..؟!
ندى : ما اعرف و الله.. عشان كذا خالة مريم لازم تحمل نتيجة اللي سوتة لأنها اخطت و لازم تتحمل نتيجة خطأها.. مهما كان هذولي بناتها و لو اليوم صدنها و بكره صدنها اللي بعده بيلجئن لها هي لأنها امهن و شافن طيبتها بعد ما كانن يعرفنها..
ابو سعود : طيب انا بقول لخوالهن هالكلام.. بس ويش رايك احسن الثنتين مع بعض و الا كل وحدة لحال..؟!
ندى : حالياً ما تقدر تبعد الثنتين عن بعض.. هن بيبتعدن اذا رجعنا لـ بيوتنا وعد بترجع مع عماد و نهى بتتزوج فيصل.. وقتها ممكن تشوف كل وحدة لحالها من غير انت ما يكون لك يد.. لأنهن لو حسن ان فيه احد بيبعدهن عن بعض ممكن يتهاوشون مع الكل.. لكن خالة مريم لازم تجرب حظها الحين لو بالغصيبة.. لو دخلت عنده في جناح عماد اصلاً ما راح يتجرأن يطردنها برا.. ممكن يقولون لها لا تدخلين بحياتنا اما يطردنها من المكان اكيد لا..
ابو سعود ابتسم : ان شاء الله ما اكون اخطيت و غازي يعرف قيمتك..
ما قدرت تبتسم شتت نظرها عن ابوها.. رجع لها الخوف من جديد.. معادلة فاشلة يطغى فيها الخوف على كل شيء.. ما تقدر تتخيلة الا يضربها!!! رفعت نظرها لأبوها : يبه.. ليش هو قرر يتزوج على زوجتة..؟!
ابو سعود : كنت متوقع تسأليني هالسؤال.. بصراحة ما ادري.. وما يهم السبب لأن المعنى واحد.. هو بيتزوج وما خالف الشرع في شيء..
ندى : بس هو صار له مدة طويلة مع زوجتة.. ما فكر يتزوج عليها ايش معنى الحين..؟! يعني لو زوجتة فيها شيء ما راق لحضرتة كان تزوج عليها من سنين مو من الحين.. عدا ان بناتة صاروا كبار..؟!! و انا شفت زوجتة ماشاء الله كاملة و الكامل الله ذربة و سنعة و ما فيها عيب لا خَلقي و لا خُلقي..!!
ابو سعود : الرجال اذا اشتهى يتزوج بيتزوج متى ما طق براسة.. انا تزوجت على ام سعود بعد سنة و شوي من زواجنا.. و تزوجت على ام احمد بعد سنة و شوي بعد.. هذا يعني ان فيهن عيوب.؟!
ندى : لا بابا و الله ما قصدت.. طيب متى تزوجت خالة مريم..؟!
ابو سعود : يعني بعد اربع سنوات تقريباً ماني فاكر بالضبط كبرنا.. خلينا من سالفة زواجي.. ابيك تفكرين صح بالموضوع و تستخيرين..
ندى : ان شاء الله.. انت ارضى علي و الله بيكتب لي الخير من رضاك انت و امي..
ابو سعود ابتسم : راضي عليك .. الله يرضى عليك دنيا و آخرة.. ما ابيك تتركين خواتك.. ادري لسان كل وحدة ويش طولة بس انتِ الكبيرة و العاقلة..
ندى : و الله جالسة احاول.. و ان شاء الله اني بقدر عليهن..
..
في جناح عماد ..
نهى منسدحة : تقولينة من جدك و الا تمزحين..؟!
وعد : كلام ابوك..!! انا خاطري افهم جنس الرجال كيف يفكرون..؟! و مو بس كذا تخيلي بابا يقولها اذا تشوفينة عيب فا هو فيني هالعيب.. يضغط على ندى بالحكي.. من جد انقهرت و هي خبلة بعد تقول ما عندي مانع اكون الرابعة بس غازي لا..!!
نهى : مالت بس صامت صامت و بتفطر على بصلة.. هاذي اخرتها بيزوجها الثانية..؟! شلون يوافق ابو سعود ما توقعت..؟! و اخواني وين مكانهم من الإعراب..!؟
وعد لفت حتى تنسدح على جنب : تبيني اعلمك بأراء اخواني احمد و خالد ما راح يعترضون الا اذا ندى اعترضت و ياسر و سعود بيقولون غازي رجال و النعم فيه ما ينرد نسبة ينشرى ما ينباع خصوصاً بعد ما ندى فركشت خطبتها من عساف.. و مشعل و وليد نما راح يبدون رأيهم بالموضوع..
نهى : و حاتم..؟!
وعد : ما ادري ويش بيكون رأية.. ما بعد عرفت تفكيرة من أي فئة فيهم.. عموماً الأهم هو رأي بروو لأنه على قولة جدي عطاه و ما يبي ندى تفشلة..
نهى : ما توقعت ابوي يفكر بهالطريقة..؟! يعني مو الثانية..؟!
وعد جلست حتى تربع : عمرك سمعتي برجال متزوج اربع حريم يعارض أي احد غيره انه يتزوج..؟! حتى لو كانت بنتة العروس..
نهى : بس انتِ قبل انخطبتي لـ واحد متزوج و أبوي ردة من عند الباب..!!
وعد : لأني صغيرة و متأمل يجيني احسن.. او بالأصح بابا كان ينتظر عساف او عمر.. بما ان جدي حيرني.. اكيد ما راح يزوجني لـ واحد متزوج و عيالة اكبر مني و هو يدري ممكن يجيني نصيب ازين..
نهى : طيب انتِ ايش رايك بـ غازي..؟!
وعد : غازي شكلة طيب و متفهم و محترم.. رغم ان بناتة يشكون من بُعدة عنهم يعني ندى لازم تحسب حساب ذا الشيء ما راح يكون لها وقت كبير في حياتة خصوصاً هي الثانية و عنده زوجة غيرها و بنات..
نهى : طيب و ندى..!؟
وعد : ندوش هي اللي لازم تقرر.. هي تعرف نفسها و تشوف نفسها اذا تقدر تتحمل يكون عنده مره غيرها و تترك غيرة الحريم و شغل الطباين و الا لا.. لأن خالي ماهو فاضي لـ حنة حريم و لا يبيها.. و بصراحة انا احس الموضوع منتهي.. اولا جدي عطاة.. ثانياً كلام ابوي لـ ندى.. و اخيراً رأي ندى بأنه ما يهمها لو تكون الرابعة..
نهى : طيب بما انك تقولين ان الرجال اللي متزوج ما يمنع أي رجال انه يتزوج وحده الثانية حتى لو بنتة.. لو حولنا الموضوع.. و قلنا يتزوج على بنتة مثل حالتك تتوقعين بيرفض بابا إن عماد يتزوج عليك..؟!
وعد : لا.. لأنه ابسط شيء عماد بيقولة حليتة على نفسك ما يحق لك تحرمة علي..! بابا ما راح يقول شيء.. ترى الرجال ما يشوفون الزواج من كم حرمة فيها اشكالية..
نهى : و انتِ اكيد بتطلبين الطلاق..؟!!
وعد : لا.. بجلس علة على كبدة..
نهى انصدمت .. اعتدلت جالسة : طبعاً تمزحين..؟!
وعد : لا ما امزح.. اطلب الطلاق لما اكون عارفة لو رحت لـ بابا قلت له عماد بيتزوج علي بيمنعة.. و اخواني بيوقفون معاي.. لكن ما ابي اتطلق الحين.. ما صار لي اربع شهور متزوجة عشان اتطلق.. الناس بتحكي فيني مو في عماد خصوصاً اني قد انخطفت.. ما احد بيرحمني..
نهى : الله اكبر من متى يهمك كلام الناس..؟!
وعد : ما يهمني.. لأنهم لو ما لقوا اللي يحكون فيه بيحكون بأنفسهم.. لكن انا بجلس فترة مع عماد.. اذا اعجبني الوضع كملت و اذا ما اعجبني فيه لي مين يضفني..
نهى : انتِ متأكدة انك بكامل قواك العقلية..؟!
وعد : ايه.. عماد متوقع اني بزعل عشانة بيتزوج علي و اسوي له سالفة ويش طولها و بيأثر فيني الموضوع.. لكن يهبى.. و الله لأخلية يحس انه ولا شيء بحياتي.. اذا هو تزوج عشان يقهرني.. انا بعلمة ان زواجة ما فيه احد تضرر فيه الا هو و القهر له هو مو لي..
نهى : ما انتِ صاحية.. انا متأكدة انك ما انتِ صاحية..!!
وعد : الا صاحية.. انا تحديت عماد مرتين وما راح انسحب و اخليه يكسب التحدي..
نهى : بتضيعين حياتك على حساب تحدي تافة قدر يستغلك فيه..؟!
وعد : انتِ تشوفينة تافة انا اشوفة غيــر..
..
شوق : ما يصير من البارح و احنا منومينها و مهدئ وراء الثاني..؟!
هنادي : ويش تبينا نسوي..؟! هي لا صحت و تذكرت اللي صار تصارخ.. و تنفعل..
امال : مو معقول يا هنادي بتظل كل الوقت نايمة..!؟
هنادي : عمتي هي تعرضت لأشبة بصدمة نفسية .. انصدمت بـ عمي و اللي سواه فيها هي الحين تحت عارض نفسي اللي هو الخوف.. و الخوف هو اللي مسبب لها اضطراب في نبضات القلب..
ام عامر تأشر على هنادي بعصاتها : اسمعيني يا بنتي انا ما فهمت من خثردتك ذي شيء.. علمينا ويش هو علاجها و نجيبة لها..
هنادي : يمه علاجها نفسي ماهو طبي.. انا الحين لما اعطيها منوم عشان اخليها تسترخي و اخفف من سرعة نبضها عشان ما يصير لها شيء لا سمح الله..
ام عامر احتد صوتها قل صبرها حالة ريما من البارح رديئة لأبعد حد : ويش القرقرة ذي.. عطينا العلم الوكاد..
هنادي ناظرت جدتها يأسة من انها تفهم هي ويش تقصد.. : يمه.. تدرين ويش هو علاج الخوف..؟!
ام عامر : ويش هو..؟!
هنادي سكتت شوي : المواجهة..
امال تكلمت بسرعة : لا .. لا تشوف ابوها لا.. اصلاً هو ما فكر يسأل عنها من البارح.. نسى ويش سوى فيها.. وهي ما بعد نست اللي سواة.. والله لو تشوفة يصير فيها شيء..
ام عامر : حسبي الله و نعم الوكيل.. انا ما ادري ويش اللي خلى ابليس يركب راسة..
دخلت مريم : السلام عليكم..
: وعليكم السلام..
مريم : كيفها الحين..!؟
امال امسح على شعر ريما النايمة : على حالتها من البارح..
مريم استندت على الدولاب : ما ادري ويش صار بـ غازي شكلة استخف..(ناظرت امها و امال) تدرون انه بيتزوج..!؟
هنادي هي الوحيدة انصدمت.. اما البقية ردود افعالهم كفيلة تخبرهم انهم يدرون من قبل..
مريم اعتدلت بـ وقفتها : كنتوا تدرون..؟!
ام عامر : ايه.. ويش يقصرة ما يتزوج..؟!
مريم : و زوجتة..؟! و بناتة..؟!
امال : انا ما عندي مانع يا مريم.. و بناتة ان كان قبل بيعمل حسابهم الحين ما ظنتي..
شوق : ماما لا تقولين كذا.. اوكِ اللي سواه بابا ماهو بسيط.. بس من البارح و انتِ وجدتي تحسبون عليه و تسبونة.. مو معقول تنسون كل شيء يسويه لنا.. غلط على ريما ما أقول لا.. لكن ما يصير بعد انتم تغلطون عليه..
مريم جلست على سرير ريما و ناظرت امها مقابلها : انتِ طلبتي منه يمه صح..؟!
ام عامر : ايه انا.. ويش عندك جاية تحاسبيني..؟! اولى انا احاسبك على تركك لـ زوجك و عيالك تراني امك..
مريم اخذت نفس : يمه الله يرضى لي عليك لا تدخلين موضوع بـ موضوع غازي.. غازي شكى لك من شيء عشان تزوجينة..؟!
ام عامر : ماهو شرط يشكي لي.. انا اميتة و ابي له الزين.. و هو لازمة له و لـ بنياتة ولد.. ولو امال قادرة تجيب له عيال ما كان قلت له يتزوج.. بس كلنا نعرف و ما نقدر نعترض على حكمة ربي.. و انا اخترت له زينة البنات ماشاء الله..
مريم : بنت ابراهيم..؟! امداك تعرفين زينها من شينها..؟! مالك كم يوم من شفتيها..؟!!
ام عامر : ما يحتاج اعرفها من سنين طويلة.. البنية سنعة و السنع يبان من الأول و فيها من الزين اللي يشلع القلب..
مريم : و تتوقعين ان غازي يدور على الزين..؟! غازي حتى لو يفكر يتزوج يبي له وحده عتبت على الـ 35 نضج تفكيرها.. ما عنده وقت يسمع سخافات حريم..
ام عامر : بنية ابراهيم ما حولها سخافات.. و الله اني من شفتها قلبي شفق لها.. و ودي اشوفها بـ بيت ولدي حليلة له على سنة الله و رسولة..
مريم : عاد بنت ابراهيم..؟! قلوا الناس يمه..؟! بنات ابراهيم يأكلن الواحد لحم و يرمنة عظم.. شوفي بناتي كيف و اختهم الصغيرة..
ام عامر : بناتك من سواتك يالرفلة.. و اختهم الصغيرة عادها بزر.. لا كبرت حاسبيها..
هنادي همست لـ شوق جنبها : من جدك عمي غازي بيتزوج ندى..؟!
شوق : ايه.. ما ادري اذا خطب او لا بس قال لنا انه بيتزوج..
هنادي : و انتن ويش قلتن له..؟!
شوق : ريما هي الوحيدة اللي اعترضت انا كنت مستغربة الموضوع و لينا ما اعترضت و لا فتحت فمها بكلمة.. و امي موافقة..
هنادي لفت تناظر شوق : مو معقول عمي غازي ضرب ريما عشانها معترضة على زواجة..؟!
شوق : لا عشان شيء ثاني..
هنادي عقدت حواجبها : الا صدق وين لينا ما شفتها..؟!
شوق شتت نظرها : ما ادري..
هنادي استغربت من شوق .. ناظرت جدتها و مرت عمها : وين لينا..!؟!
ناظرنها الثنتين بـ قوة.. و كأنهن يتذكرن من جديد التوأم اللي حاولوا يلتهون عن موضوعها و لا يفكرون هي مع مين رايحة..
مريم : ايه صدق انا ما شفتها..؟! وينها..؟!
ام عامر بحدة : لا احد ينشد عنها.. و الله ان سمعت وحدتن فيكن تجيب طاريها يا ويلها.. و سكرن على ذا الموضوع و لا عاد اسمع طارية..
وقفت ام عامر حتى تخرج من الغرفة وسط استغراب مريم و هنادي.. و صمت شوق و امال.. و اعتكاف ريما تحت المهدئات..
..
ام عبدالرحمن : ماشاء الله عليه ابو شوق رجالن ما ينرد..
عفست وجهها نوال : عمتي من جدك..؟! انا ابيك تكلمين ابو سعود..
ام عبدالرحمن بحزم : اكلمة بـ ويش هاه..؟! ما تقولين ان جدها عطاها.. مالنا كلمة خلاص.. ابو عبدالرحمن هو ادرى بالرجال..
ام حاتم : عمة الله يخليك اسمعيني.. انا ما عندي اعتراض على اخلاق الرجال.. كلن يعرفة و يذكرة بالخيــر..
ام عبدالرحمن تقاطعها : اجل ليــش ما تبينه لـ بنيتك..!؟ كارهة لها الزين..؟!
ام حاتم تحاول تطول بالها من قالت لها ندى وهي اعتفست نفسيتها ابنتها قريباً تصح على اعتاب الـ 28 .. فرطت بـ عريس ثمين كا عساف حتى ترضى بـ رجل متزوج.. : ما ابيها تكون الثانية يا عمة.. بنتي ماهو قاصرها شيء..
ام عبدالرحمن : ليش ابو سعود يشوف بنيتة ناقصة..؟! يوم رضى على عطية ابوه لـ ولد حمدان..؟! بنيتك ان شاء الله يكون من نصيبها ابو شوق.. و الله انه بيعزها و يغنينها و يكرمها..
سكتت ام حاتم هي كا أي ام لا تريد لأبنتها سوا شخص يكرمها و يحترمها و تكون هي اول نصيبة.. ليست الثانية..
ام عمر همست لـ ام حاتم : هونيها ياخيه..
ام حاتم : ماني راضية بس ما بيدي شيء..
ام عمر : المشكلة ان عمي تدخل بالموضوع و عطاهم.. لو ما عطاهم كان ابو سعود اخذ شور بنتة..
ام حاتم : المشكلة ندى خايفة منه بس.. تعرفين بعد اللي سواه ببنتة البارح.. هذا همها و اللي باط كبدي انها قايلة لأبوها ما يهمها تأخذ متزوج بس ما تبي غازي.. و ابوها بيقنعها ان غازي و نعم الرجال دام ما عندها اعتراض على انها تأخذ معدد..
ام عمر : ما هقوتي ان قلتِ لها ما انتِ موافقة بتقول لأبوها انها راضية..
ام حاتم : قلتيها يا خيه عمي عطاهم يعني رأيي ماله معنى الحين..
..
لا حول و لا قوة الا بالله..
لا احلل نقل الرواية دون ذكر اسمي..
هشتاق #رواية_لو_سألتي_الورد
ضحكة قهر..
|
09-01-15, 01:39 AM
جديد مواضيع قسم القصص المكتمله
العرض العادي
