روايتك جميله والقفله عذاب احس البارتات قصيره ماتشبع
استنا القادم بفااارغ الصبر تسلم اناملك

ان شاء الله تستمتعون بالقراءه..
..البارت الثالث..
وسكر الباب ومشي خطوه وانتبه لوجودي واعطاني ظهره بسرعه ووقف مكانه ينتظرني اطلع انا من الربكه واقفه مكاني لاني بالبدايه كنت راح ارجع جوا بس تذكرت انه هو بيدخل لما سمعته تنحنح بعدم صبر مشيت بخطوات سريعه وفتحت الباب وطلعت وانا احس بدقات قلبي السريعه تطن بأذني مع انها ثواني الي شفته فيها بس احس اني شفته زين ماتغير بس صار مشبع رجوله وثقل ولما مريت من عنده شميت ريحته كانت حواسي كلها متحفزه ارتبكت من وجوده المفأجئ وكانت طلته غير ان شاء الله مايفهمني غلط بديت اشك ان مافي شي تغير بس كانت مشاعري بغيابه موقفه ولما رجع رجعت هي بعد مجرد شك لاني صدق والله ع قد ربكتي فرحت بشوفته بدون مايكون شكلي غلط لانها راح تكون الاخيره كنت ابغى اشوفه بس دخلت بيتنا وسكرت الباب وانا اخذ نفس عميق بعد ماشليت الغطى ووعدت نفسي اني مره ثانيه اغض بصري غلط اركز فيه وماله داعي استرجع مشاعري يمكن علشان استمتعت بذيك الايام ابغى ارجعها بس الحين الموضوع اختلف كان اهتمامه وحنانه وخوفه علي وقربه وسؤاله يسعدني بس الحين لو رجعت راح تكون عدمها سبب لحزني علشان كذا ماابغى اتمادا ربي الي فيه خير لي يسره دخلت البيت.. كل الكلام الي فكرة فيه عدم طول الاسبوع وانا من غير مااحس بنفسي مركزه مع اي سالفه اسمعها عنه ولاادهى اني سألت وكل يوم قبل ماانام احس بغلطي واقرر ماانتبه يقولون ان فيه حب من النظر وفي حب من السمع وانا من كثر مااسمع عنه وطبعا السؤاليف الحلوه صرت اميل له اكثر من اول وكل يوم لما ازور ام رماح مايروح من بالي انه يعرف بعدين اني زرتها وانا قبل مااروح يكون في بالي الواجب وبس الي يخليني اروح سكرت المويه وطلعت من المطبخ لما سمعت باب الشارع يدق قلت""مين"" قال""انا زيدان""فتحت الباب وقلت""تفضل ادخل""دخل وسكرت الباب هذي اول مره يزورنا فيها قال وهو يمد الكتاب""في درس ماعرفت له يمكن نجود حلته""رجعت الكتاب له وقلت""ادخل نجود بالصاله""دخل وراي قالت نجود اول ماشافت زيدان""غريبه زايرنا"" قلت بصوت منخفض حاد""نجود"" ابتسم زيدان وقال""لو مو جاي اعرف الحل منك كان عرفت ارد(وفتح الكتاب ع صفحه)الاستاذ مصر نحلها تعرفيلها""وقفت وطالعت بالكتاب الي بيده قلت""تفضل اجلس زيد""اسم اسهل وهو يحبه ودخلت المطبخ وصبيت له كوب عصير واعطيت زيدان الي كان جالس وحده بالصاله قلت بأستغراب""وين نجود"" قال بعد ماشرب من العصير""دخلت تجيب الكتاب""بكره السبت وشوي ويأذن المغرب وتوه يحل تأخر مره نجود من يوم الخميس تحل بعد ماخلص من الحل راح وانا رحت اصلي وانا طالعه من الغرفه قال حامد الي جالس بالصاله""الحين فاضي اذا تبغين الاغراض الي وصيتيني عليها وماعرفتها البسي عبايتك اوديك"" قلت""دقيقه طيب""ورجعت دخلت لي اسبوع تقريبا اطلب شكله تعب مني ابتسمت مع ان الاغراض مو ضروريه مره بس ابغاها طلعت ومشيت بعده ونجود قدامنا وتقول""من الحين نتفق حامد كم السعر الي اوقف عنده"" قال وهو يفتح باب الشارع""خمسين وبس"" قالت تحاول تلين قلبه""والله الي ابغاها غاليه الكرتون الواحد بخمسه واربعين"" قال وهو يفتح السياره""خذي حبات ليش كرتون"" ضحكت وقلت وانا اركب جنب حامد""انا طبعا من غير حد لاني الي ابغاه للبيت"" قال وهو يحرك السياره""مو مشكله انتي مقتصده ماتأخذين الا الضروري بس المشكله الي ورا""مين لاعب عليه تو وانا اقول ببالي مو ضروريه اساسا معجزه اذا لقيت بنت مقتصده والفلوس مو لها بس اذا فلوسها الموضوع يختلف قبل مانوصل قال حامد وكأنه تو يتذكر""تذكرت بكره عمي بيزورنا هو وولده اذا ناقص شي خذيه""نزلنا وانا قول""متى شفت عمي"" قال""العصر وجلس يعتب ان احنا مانزوره ولا نسأل عنه وانه هو بيصير احسن منا ويزورنا"" قلت واحنا ندخل""استغفر الله ماكأنه هو الي قطع التواصل ابوي الله يرحمه كان مايقطعه وحتى يأخدني معاه وهو ماعنده بنات بس علشان نسلم عليه لين طرده من البيت ومن ذاك اليوم ماشفته انت متى اخر مره رحت بيته"" قال وهو يأخذ عربه""من زمان مااتذكر اساسا احس بيته شبهه من فعايل ولده ماعليك منه بكره يزورنا وبعدها ينسانا ثلاث سنوات وبعدها بيرجع يعتب""غصب عني ضحكت بس بصوت منخفظ طبعا بتمام وصفه اللتفت ادور ع نجود وقلت بقلق""وينها نجود مااشوفها"" قال حامد""ماعليك منها اول خذي الي تبغينه وانا اعرف وين مكانها ماعليها خوف دايما نجي هنا""بس ماارتحت لين شفتها واقفه عند انواع الحلويات قال""هذا مكانها المعتاد افكر اشتري ذيك الارض لها من كثر وقفتها هناك""ضحكت ورجعت لشغلي وحامد معايه بعد وقت رفعت علبه وقلت لحامد""هذا النوع ت.....""قبل مااخلص كلامي قطع كلامي وقال بأمر شوي فيه عصبيه وعيونه قدام""تعالي رؤيا""وهو يدف العربه مشيت معاه وانا مستغربه حتى وقف وقال بصوت القهر واضح فيه""لقيتك وين يعني بتروحين""طالعت بالبنت الكاشفه الي يكلمها حامد ويطالع فيها بصدمه عمره حامد مارفع عيونه بحرمه والحين جالس يكلم وحده كاشفه ولا كأنه يعرفها بعد ابتسمت البنت وعيونها بعيون حامد بنظرة تحدي وقالت""مرحبا(وطالعت فيني)مرحبا"" قال حامد بصوت حاد""مرحبا مليون ولا يسدون"" قالت البنت""شكرا""مع اني مستغربه من الموقف الا اني غصب ابتسمت اسلوبهم غريب قلت لجامد بنبرة عتب""تعرفها"" طالع فيني ورجع طالع بالبنت فتره وبعدها قال""مااتشرف""تغيرت ملامح البنت بس وبسرعه رجعت ابتسمت وطالعت فيني وقالت بتسأل""زوجته"" قلت""اخته""وانا مو فاهمه شي والعلبه لسى بيدي لما قالي تعالي مشيت معاه من غير ماارجعها قالت البنت وهي رجعت تطالع حامد""المفروض اعرف مين بترضى فيك""رجعتها له واحد واحد تقدم خطوه تهديديه وقال بخشونه""طبعا مو انتي اذا هذا سؤال وبعدين وين اهلك انتي كل مااروح مكان اشوفك""لو الكلام هذا موجه لي كان ماعرف والله اش راح احس فيه وطبعا ماراح ارد مثلها قالت بنبرة استخفاف واضح""اتبعك الحقك""حسيت حامد فارة اعصابه لانه قال بصوت عالي ولا همه المكان الي احنا فيه""مو غريبه عليك ويلله الحين تطلعين من هنا""مسكت يد حامد وقلت له""سيبها وخلاص يلله نحاسب وخلينا نروح نشوف نجود تأخرنا عليها"" قال بحده""روحي شوفيها وانتي(طالع بالبنت)يلله"" قالت البنت بابتسامه ع جنب""يلله وين انا ماابغى اروح معاك""حامد ماتحمل مسك ذراعها وتو بيتكلم بس انا قاطعته وانا اسحب يده عن البنت وانا اقول بعصبيه""حامد حرام شيل يدك"" قال وهو يغمض عيونه ويميل راسه""استغفر الله استغفر الله""وفتح عيونه وطالعها بنظرات ناريه قالت البنت بعصبيه""قليل ادب والله اني لاوريك طيب""وراحت البنت بخطوات سريعه طالعت بحامد كان يطالع فيها بنظرات استخفاف بتهديدها التفتت ع صوت نجود وهي تقول""خلصتو"" حرك راسي بطريقة ايوه وانا اقول""وانتي"" قالت""ايوه شفتي هذي البنت نفسها الي حكت السياره بخاتمها""ضحكت بس علشان كذا قال حامد وهو يطالع فيني بحده""يضحك يعني"" قلت""انت اش قلت لها وخليتها تسوي كذا"" قال وهو خلاص هدي هو بسرعه يعصب وبسرعه يهدى""سألتها تبغى اي بيت لانها غريبه وشكلها تدور لاحد وبس"" قلت بابتسامه""وبس في اشياء كثيره اكيد مخبيها مو معقوله""دف العربه وهو يقول""إلا معقوله قلت لها وقالت ماتسأل عن اي بيت جايه تشوف المكان بس وانا قلت انها كا.....انتي اش عرفك يلله بس نحاسب""عارفه اكيد غلط عليها بالكلام هو مايخلي شي بقلبه لازم يقوله كله بس ان يوصل يلمسها قويه هو صح دايم يتضارب مع الرايح والجاي بس انه يخاصم بنت انا مستغربه والبنت بعد عادي عندها تكلم رجال غريب بدون ماتستحي ولا تشد معاه بالكلام رفعت اكتافي صارو البنات مايستحون وصلنا البيت ع اذان العشى راح حامد يصلي وانا صليت وجهزت العشى وراجعت شوي مع نجود حتى رجع حامد وتعشينا سوا بعد العشى دخلت المطبخ ارتبه اللتفت لما سمعت صوت الباب طلعت من المطبخ وفتحت الباب كان حامد طالع قلت""بتتأخر"" قال وهو مستعجل""مدري سكري الباب""وطلع سكرت الباب وانا مو مستغربه مو اول مره يسويها رجعت المطبخ وكملت شغلي وبعدها اخذت دش ووضيت وصليت الوتر وقريت وردي من القران ولما سكرت القرآن وانسدحت سمعت الباب ينفتح طالعت بالساعه كانت احدعشر وانا ماكان معايه النوم علشان كذا طلعت ماكان موجود بالصاله دقيت باب غرفته وتو كنت بفتح الباب سمعت صوته من وراي يقول""انا هنا""صرخت بخرعه وانا الف له وقلت""خرعتني"" قال بعصبيه""في رجال بالمجلس يمديه سمع صوتك ونجود نايمه""طالعت فيه بستغراب ليش معصب صرختي مو عاليه واش رجال بهذا الوقت بس قلت""اسفه""وانا انتظره يوضح شي بس حتى هو تم ساكت والضيقه واضحه عليه قلت بخوف""اش فيك"" تنهد وقال""كانو طالبيني الشرطه""فتحت عيوني بصدمه وقلت""ليش"" تحولت ملامحه للعصبيه وقال بشراسه""بنت......(سبه)تقول اني متهجم عليها ولان عمها مرتبته عاليه ماخذيني يحققون وبدون اي شهود مجرد كلامها لو مو رماح كان ثبتت التهمه علي وبالاخير اقتنعو باني اوقع تعهد اني مااتعدى عليها والله لو تبوس رجلي اني مااوقعه يوم طلعنا كنت منجد راح اخليهم يمسكوني بتهمه حقيقيه والله لوريها انا رجال طول بعرض تجي ذيك البنت تجرجرني بالشرطه طيب والله لوريها المهم سوي اي شي يتأكل اشغلت الرجال ماخليته يتعشى""منجدها البنت راحت تشتكي كلامه كان صدمه بنسبه لي بس لما قال ان رماح ساعده كبر بعيوني اكثر وحسيت بدقات قلبي اسرع لما عرفت انه قريب بالمجلس ولا يبغى يعشيه من يدي بعد قلت""طيب""ودخلت المطبخ بدون مااعلق ع موضوعه وشكله مااعجبه لانه دخل وراي وقال""عرفت اسمها يعني اقدر اوصلها اسهل بس تقدرين ت....."" قاطعته وانا اطلع الاغراض من الثلاجه""لا تدخلني بينكم وبعدين اش تبغى فيها شكلها قويه وماتخاف من شي"" قال""وانا مااخاف من شي والي يخطر في بالي بسويه هذي تحسب اني بسكت لها"" قلت وانا مشغوله بألي بيدي""حامد تكفى لا تدخل نفسك في مشاكل"" قال بعصبيه""رؤيا لا تخليني اعصب المفروض مو انا الي اخاف دامها بدت تشوف(سكت شوي)تأخرت ع الرجال ربع ساعه وبرجع حاولي تسرعين""يعني اش بيسوي لها هي مو شاب علشان يتعرض لها بطريق فاضي ويضربها مدري اش ناوي عليه ان شاء الله رماح يغيرله رايه هو شكله اعقل من حامد ومو اعصابه الي تمشيه ابتسمت يعجبني الشخص الي يتحكم بنفسه وبأعصابه حاولت اسرع اكثر للحين ماتعشى يعني مارجع للبيت للحين وهو اليوم الجمعه يعني كل يوم يداوم خلصت العشى وشلت
الصحن ومشيت بالتجاه الباب حطيته بالارض وفتحت الباب وشلته وحطيته برا ودقيت باب الصاله بيسمعه لان لو كان الباب مفتوح من اول ماامشي خطوتين عن باب الصاله بيشوفني وماابغى يتأخر دام اني خلصت يكفي الجوع الي حس فيه للحين ونسيت نجود الي نايمه بالغرفه بس الحمدلله جاء حامد واخذ الصحن وراح وسكرت الباب بدون ماتطلع من الغرفه ماصحيت جلست بالصاله انتظره وانا اتفرج ع التلفزيون علشان اتسلى بعد وقت طويل رجع حامد وجلس ع الكنبه ورجع راسه ورا وغمض وهو يقول ""مااشوف شي"" قلت بأبتسامه""طيب روح نام اش تنتظر"" فتح عيونه وقال""ماجبت الاكل معايه"" وقفت وقلت""اذا راح انا اروح اجيبه"" قال وهو يوقف""وصلت رماح للباب""وراح بتجاه غرفته وانا مشيت وفتحت باب الصاله وطلعت..
..نهاية البارت..
..عافاكم..
..عجايب..

ان شاء الله تستمتعون بالقراءه..
..البارت الرابع..
باب الصاله وطلعت كان الهواء بارد ومنعش رحت سكرت باب الشارع علشان اتأكد ان محد بيدخل لان حامد بالعاده يرفض يسكر الباب ويخلي بعد المجلس مفتوح لاي احد كأنه شيخ القبيله ونسكر بس باب الصاله فتحت باب المجلس ودخلت واول شي لفت نظري محفظه رجاليه وجوال التفتت لباب الحمام خفت يكون احد موجود بس مافي ولا صوت تقدمت شوي علشان اتأكد من الباب اذا مسكر بالمفتاح راح اروح لو بوقت ثاني كان ع طول طلعت اول ماشفت الاغراض بس الوقت متأخر وحامد يقول وصله للباب علشان كذا مو خايفه عادي يمكن نسيها ومنجد كان باب الحمام مو مسكر وفتحته اتأكد مافي احد شلت الصحن مالي دخل بالاغراض ماراح اشيلها الي نسيها يرجعلها وطلعت وديت الصحن المطبخ وانا ارجع كل شي مكانه فكرت ان يمكن تنسرق باخذها والصبح اعطي حامد رجعت المجلس وشلتها وانا امشي وعيوني عليها صار نفسي افتحها بس غلط وعيب مو اغراضي المفروض ماافتحها بس هي اكيد لرماح محد جاء اليوم غيره وقفت عند باب الصاله ورجعت ظهري ع الجدار وفتحت المحفظه بس بتأكد انها له كان موجود فلوس وبطاقتين لما رفعتها كانت لبنوك رجعتها وطلعت ورقه لما جيت بفتحها ماعرفت لان الجوال بيدي فجلست ع الارض وحطيت الجوال بحظني وفتحت الورقه كانت ورقة استلام واخلاء مسؤليه مافهمت منها شي اسماء كثيره بس طالعت شوي بتوقيعه وبعدها طويت الورقه ورجعتها مكانها وفيه رخصة قياده لما طلعتها بسرعه رجعتها وانا احس بخوف كأنه منجد يطالع فيني يمكن يخاصم ليش افتحها شلت الجوال وقمت وسكرت المحفظه ودخلت وحطيتها ع الطاوله الي جنبي وانسدحت ع السرير وعيوني عليها اكيد بيحس انه نسيها عندنا بس اخاف يحس اني فتحتها شلون بيحس رجعت كل شي مكانه غمضت عيوني وقريت سورة الملك استعداد لنوم بس ارجع افتح عيوني واطالع باغراض رماح الي بتكون جنبي لصبح مديت يدي واخذت المحفظه ورفعت ظهري شوي ع المخده وفتحتها ورجعت طلعت الرخصه ورفعتها بشويش بس بشوف شكله قبل ماانام طالعت في صورته ودققت بكل شي فيه غمضت عيوني اتذكر طوله وجسمه لما شفته وانا طالعه من بيت امه مدري ليش رجعت الرخصه وسكرت المحفظه ورجعتها مكانها ورجعت انسدحت زين ليش اطالع فيه او افكر فيه اكيد اني مو في باله ولا لحظه فليش اعلق نفسي فيه هو اساسا ماخذ عني صوره خطا زمان ماادري تغيرت ولا هي نفسها مالهم اسبوع او اكثر شوي وانا احس كذا كيف بعد شهر استاهل ليش افكر فيه يمكن لان ذكرياتي معاه كثيره او يمكن لانه كان او يمكن يكون رجل احلامي او يمكن لاني مااعرف رجال غيره وش عرفني فيه يمكن تغير ثمان سنوات تغيره مليون بالميه تغيرت افكاره وشخصيته ويمكن حتى احلامه يمكن احب شخص مو موجود انقلبت للجهه الثانيه اذا استمر كذا راح انساه اذا ماجات اي لفته منه راح انساه مثل مانسيته اول بس هي هذي الفتره لانه رجع وجديد ع حياتي بعد فتره راح يكون عادي راح تخمد مشاعري شوي شوي بس يبي لي فتره بهذي الفكره تفائلة شوي وقمت وشلت الجوال والمحفظه وحطيتهم بالصاله ورجعت الغرفه وانسدحت وبعد شوي نمت.. الصبح اعطيت حامد الاغراض قبل مايطلع وقلت""لما رحت اشيل الاكل من المجلس لقيت هذي وجبتها علشان ماتنساها اكيد ضروريه""اخذها وقلبها بيده شوي وقال""هذي لرماح اكيد نسيها امس ايوه ضروريه""وهو طالع طلعت معاه نجود تأخرنا اليوم شوي لاني نمت متأخره والسياره راحت عليها حامد بيوصلها شلت الفطور ورتبتها ودخلت الحمام وضيت وصليت الضحى وانسدحت مابروح اليوم عند ام رماح بعد ماتعبت كنت اروح لها كل يوم يومين وبعدها صارت بخير ووساعدتها في بيتها الحين كل شي تمام غمضت عيوني و ع الساعه احدعشر صحيت اخذت دش وبعدها سويت الغدا وانسدحت بالصاله انتظرهم ولا لحظه فكرت اني اشتغل اولا ممنوع مستحيل يرضى حامد وبعد انا من نفسي ماابغى صح انا احب النظام والمسؤليه بس مااقدر ع الضغط ابدا كذا مرتاحه مسؤله عن شخصين ووقتي تقريبا مليان بحد معقول واهم شي ماني مضغوطه بعد ماصليت الظهر نزلت الغدا لي ونجود مثل العاده حامد مايرجع هذا الوقت قالت نجود""ماابغى اروح مع الباص الصبح ابغى اروح مع حامد"" قلت""ليش"" قالت وهي تحرك يدها بكل الانحاء""كذا حلو حتى زيدان يوديه رماح(كملت بحماس)وانا مداومه الصبح مدحني""قلت بأبتسامه""زيدان ولا رماح"" قالت""لا رماح قال لي اني شاطره ماافتش بأغراض الناس"" غصب بلعت اللقمه وقلت بصدمه""ايش قال""انا متأكده اني رجعت كل شي مكانه قالت بصوت اعلى""قال لي رماح الصبح وانا مداومه اني شاطره لاني ماافتش بأغراض الناس"" قلت لها وانا مركزه بكلامها""ليش قلك ومتى"" قالت بملل""قال الصبح الصبح""قلت"ايوه الصبح بس اش قلتي له وقال لك كذا"" قالت وهي تاكل بين كل جمله وجمله لقمه""ماقلت له شي لما رحت ادق الباب الا هو انفتح من نفسه وطلع رماح وزيدان واعطيته الجوال والمحفظه وقلت له انها ناسيها امس عندنا وانك انتي لقيتيها وجبتيها البيت علشان ماتضيع واخذها وفتحها وبعده قال لي اني شاطره ما......""قاطعتها وانا اقول بعصبيه""ليش تسولفين معاه كان اعطيتيه ساكته هو من نفسه بيعرف انه نساها مو يلله تقولين له رؤيا لقيتها"" قالت وهي تطالع فيني بستغراب""ليش معصبه ماقلت له بأسمك اعرف عيب قلت له اختي بس"" قلبت ملامحي بقهر وقمت وقلت""اليوم انتي تلفين السفره""وجلست ع الكنبه وانا احس بأحراج كبيره والله فشله شلون عرف اني فتحتها اللتفتت ع نجود وقلت""وبعد ماقال لك شاطره مشيتي ولا بعد تكلمتو"" قالت""بكره علي اختبار ليش الف السفره""انا وين وهي وين قلت""حتى لو ماتأخذ منك عشرين ثانيه اسمعي نجود بس كذا كلامكم ماقال لك شي ثاني"" تأففت وهو تشيل الاكل""بحطه بس في المطبخ مابغسل شي ايوه بس كذا اساسا هو مستعجل""مستعجل ووصل هذي الرساله لو مو مستعجل كان نجود سولفت اكثر وهو وصل رساله اطول يعني طلعت بالنهايه قليلة ادب وامانه افتح أغراض الناس اساسا هو ماخذ عني فكره غلط اكيد ذاك اليوم لما كنت طالع من بيتهم ماتحركت لاني قليلة ادب ابغى اسلم عليه او ابغى اشوفه او هو يشوفني اش نقص الحين ان شاء الله يكون عارف قيمة الفلوس الي موجوده ولا بكون سراقه غمضت عيوني بالم من ذاك اليوم المشئوم راح يكون كل شي مني له معنى ثاني بنظره طيب مساعدتي لامه اش بيعتبرها ابغى احفظ اماكن الاشياء مثلا ولا احتمال احفظ تصميم البيت علشان بليل اقدر اتحرك من غير مايحسون فيني لا اكيد في باله علشان اعرف مكان غرفته وب...... قطع تفكيري صوت نجود""بخلص كل واجباتي قبل العصر والعصر بروح عند بنت جارتنا تبغاني اجيها بتوريني شي خالها جابه لها من خارج السعوديه انا قلت لها بالمدرسه كذابه وهي قالت تعالي علشان اوريك"" قلت""والاختبار"" قالت""لفيت السفره وماعندي اختبار بكره"" قلت""سيبي الكذب""ووقفت ومشيت للمطبخ ونجود تتبعني""ها العصر اروح"" قلت""اذا خلصتي كل شي وطبعا راح اجي اشيك""راحت الغرفه وانا غسلت الصحون وعلشان عمي بيجي مثل ماقال لحامد سويت معمول لانه قرب يخلص وكيكه هشه يحبها حامد ولما جاء حامد اعطيته الغدا وانا اقول""متى بيجي عمي العصر ولا المغرب"" قال بعد ماسما بالله""ماادري بس اتوقع العصر"" قلت وانا اجلس""لا تناديني الا اذا عمي طلب يسلم"" قال وهو يطالع فيني""اذا جاء لين البيت خلاص يعتبر طلب يسلم عليك عيب يجي لين هنا وماتسلمين عليه"" قلت""صح بس والله مستحيه منه احسه رجال غريب"" قال""عمك مو رجال غريب""وبدا ياكل منجد احسه رجال غريب خلاص بسلم عليك بس راح الف الطرحه ع شعري قلت وانا اقوم""طيب المهم اعطيت اغراض الرجال ولا نسيت""سألته بترقب ابغى اعرف يعرف شي قال بعد ماتقلبت ملامح وجهه لتحقير ابغى قلبي يطيح بس لما سمعت كلامه ارتحت""اعطيت نجود تعطيه انا كنت اسخن السياره"" قلت بأستغراب اذا مايعرف ليش هذي النظرات""اش فيك ليش هذي النظرات"" قال""لا تذكريني بذاك اليوم مره ثانيه""امم قصده البنت الي اشتكت عليه سبحان الله ماعندي نص جراءة هذي البنت واقول لرماح ممكن ترجع مكان ماكنت ساكن وتريحنا.. جهزت كل شي بصحون وطلعتها الصاله واخذها حامد وثانيه ورجع واخذ الصحن الباقي لما شاف نظرات الاستغراب قال بضحكه""لا ارتاحي مارميتها اخذها رماح مني""وطلع يعني رماح هنا لا ويضيف في بيتنا بعد تو اجلس دخلت نجود وهي تضحك بقوه قلت بأستغراب""اش مرجعك بدري غريبه"" قالت وهي تجلس جنبي""دقيت بابهم ولما فتحت لي الباب اختها الكبيره قالت لي صاحيه الحين اناديها وبعد شوي رجعت وقالت لقيتها نايمه طلعت كذابه تتعذر والله بكره لافظحها اليوم تتفشخر قدام البنات"" قلت بأبتسامه""يمكن جد نامت انتي بثواني تنامين"" قالت""قولي ماشاء الله عمي متى جاء"" قلت""ماشاء الله قبل شوي"" قالت""بس عمي وحده ماجات مرته"" قلت""لا مو وحده ولده معاه ولاتروحين هناك عند الرجال عيب"" قالت بستعطاف""ليش مااروح يعني مااسلم ع عمي"" قلت بعد ضحكه""تسلمين عليه معاي"" قالت وهي توقف""طيب بطلع الحوش بجلس هناك مابروح عندهم(وكملت قبل ماتطلع)بيتنا واجلس مكان ماابغى""ع الي تبغونه اذا مو هي الحين راحت المجلس خلي حامد يخاصمها طفشت وانا اتكلم وحامد يقول لسى صغيره خلينا نشوف اذا دخلت عليه الحين بيقول لسى صغيره شوي ودخلت نجود بعجله وهي تقول بخوف""يتهاوشون والله اصواتهم عاليه""
..نهاية البارت..
..عافاكم..
..عجايب..
الحمدلله

ماشاء الله بدايه واعده واسلوب يجذب للقراءه
واصلي لا تنتظرين الردود ومع المواصله بتشوفين الاقبال اكثر واكبر اكثر ما ينفر القراءالا عدم الجديه والالتزام

نصيحه اتمنى تتقبلينها
اما بالنسبه للشخصيات حبيت نجود وحبيت انها كبيره بعمرها طفله بعقلها لان هذا الواقع حاليا
الجسم جسم شابه والعقل عقل طفله
بس بعد المفروض ما تتكلم مع الرجال ولابد تعويد من هم بعمرها على الستر والحياء

رؤياغلطة عمرها اللي سوته وهي مراهقه وعلى اساسه بتعيش بمرار تحسب كل خطوة وكل كلمه على اساس انه يتذكر جرائتها معه
رماح رجال يعجبوني اللي ما يتأثرون بالخرابيط ولا استغل غلطة بنت صغيره وقفها عند حدها ورباهاا العمر كله درس ماتنساه

اتوقع العم جاي يخطب رؤيا الله يستر

اتمنى لك التوفيق والردودوالمتابعه اللي تسر خاطرس