صباح الورد .. اخيرا قدرت ارجع اكمل باقي البارتات قبل ماتتشعب اكثر وتزيد البارتات ويصعب علي قرأتهم .. امم احداث كثيرة مازالت على ماهي ومازالت الالغاز ماانفك منها شي واكيد الجاي اكثر تحميس ..

سيف وديما

لحد الان افضل ثنائي شدني في الرواية يمكن قصتهم متشابهة لبعض القصص الي قريناها لكن حبيت التناقض الي بسيف والي مصدره طليقته والماضي الي عاشه مع اننا مازلنا ننتظر توضيح اكثر

لكن ديما شخصيتها جدا جميلة حلو عشقها لكن انفجارها بشكل محبب هو الي يشدنا لها ملينا من الزوجة الضعيفة المنعدمة الكرامة وملينا من العنيد بشكل ينفر حلو الواقعية انو الزوجة تغلب زوجها بنقيض توقعاته وبشي مو مبالغ فيه وبنفس الوقت بأقل معاملة رقيقة وصادقة ممكن تأثر على مشاعرها لانو الانثى الحقيقية هي العاطفية الي عجبني في ديما محاولتها تكون قوية بشكل مقبول واكيد في النهاية بتكسر الاغلال وبتتحرر وبتنتصر وبتكسب سيف

الين وياسر

من خلال معرفتي بالسن الي صارت فيه الين ببيت ياسر استنكرت مشاعرها بقوة يعني هي تربت من نعومة اظافرها كأخت لياسر وهديل ليش ماصارت مشاعرها اخوية له كيف حبته حب بنت لرجل .. مهما كانت المبررات مااقتنعت بمشاعرها ولاحبها ليش يعني تربيتها من الطفولة مع ياسر وهديل ماكانت وحدة ولا كيف ممكن لو انها تربت عندهم من سن المراهقة بيكون الوضع مختلف بس هي بطفولتها تربت وهي ماتعرف معنى كونها لقيطة عكس لو كانت اكبر هي ايش شافت من ياسر خلاها تحبه كرجل مو كأخ ..

ماعجبتني مشاعرها لانه دليل انها مااعتبرت نفسها كبنت لاصحاب البيت ولا كانت تحمل براءة طفولية الا اذا كانت اصلا هي ماتحمل مشاعر حب مثل ماهي متوقعة يمكن هي تحبه كأخ بس الحواجز الي بينهم هي الي صورت لها هالمشاعر مع اني مااعتبر الحب من هالنوع حب عذري وبريء كون انثى اعطت مشاعرها لرجل اجنبي عنها لو كانت مسمية له من الطفولة بنقول لانها كبرت وهي عارفة انها ممكن بيوم تكون زوجة لهالرجل لذلك تعلقت فيه
بس هي حسستنا انو نظراتها لياسر ماكانت بريئة لذلك حطته براسها وهو اجنبي عنها

في شي معتقدته رنا ضد الين ماادري سببه وهو الي كرهها فيها مولان الين مجهولة النسب مستحيل .. واكيد محتاج لجلسة مواجهة

اتمنى زواج الين وياسر مايتم مولرفض الين لانها لقيطة او مجهولة النسب لا لاننا ملينا من التكرار يعني مابيكون في جديد بقصتهم

نبغي شئ غير متوقع وزوج الين يكون رجل مختلف حتى تزيد ثقة الين بنفسها او نقول اننا نعطي هالفئة حقوق المجتمع هضمها من انها مثل باقي البنات مرغوبة وتنخطب وتتزوج من اي شخص كان

زواج الين وياسر بيكون بارد هو متعاطف وحاسس بالذنب وهي بتظل طول عمرها تحس بزواجه شفقان ماراح ترتاح حتى لو كانت تحبه عكس لما تتزوج واحد ماتعرفه وهو الي سعى لزواجه منها شخصية الين مملة بصراحة ولو تزوجت ياسر مابيكون في تغيير بحياتها هي لانه افكارها مابتتغير ولا ثقتها بتزيد عكس لو طلعت من هالبيت ومن هالعيلة حتى لو بدايتها صعبة واثقة انها بتغير شخصيتها وبتواجه المجتمع بشخصية اقوى

مين ادهم ومين يكون وكيف رجعت هي للميتم اذا من يوم عمرها شهور هي ببيت ابو ياسر .. من وين لها الصديقات الي كانت تزورهم بالميتم في حلقة مفقودة ؟؟

وهل بيلتقي بألين بيوم وايش علاقته بمتعب او شاهين ؟؟ ننتظر مفاجأتك الغير متوقعة لالين بالذات

اسيل وشاهين

اسيل مملة بشكل لايطاق ابد ماتعجبني الشخصيات الانانية الي مثلها الي فيها موحب ولا وفاء الي فيها مرض نفسي وضعف ايمان بالقضاء والقدر وعدم رضا بالمكتوب

ملينا منها ومن افكارها انها انولدت زوجة لمتعبوكأنها تعلم انها ماانولدت لتكون زوجة لشاهين من الاساس ومتعب مجرد صلة وسبب للنصيب الحقيقي

وحدة بعقلها المريض المفروض اهلها يرفضون يزوجها الين تتعافى يخلوها تحضر مجالس تتثقف دينيا .. هي مو مراهقة ماتفهم هي بنت ناضجة وعاقلة .. هي ماتضر نفسها بالعكس تضر الي حولها

شاهين ياليت يكون اعقل منها مايتعامل معاها بأسلوب منفر .. يترك العصبية لانها ماراح تكون علاج عليه بتكثيف العلاج الديني وياليت لو تزوجها يكون زواج حقيقي .. مايسوي مثل باقي هالروايات ياخذه القهر ويكون زواجهم على ورق لانه الزواج الحقيقي هو الي يزرع المودة بين الزوجين ومايصير نحرف في المعنى الحقيقي للزواج الي للاسف كاتباب كثيرات استاهنو بعظمة نوم الزوج غضبان من تمنع زوجته عنه وتهاونها في حقوقه

فواز وجيهان

وهالمريضة النفسية الثانية جد جد كل مشهد انفر منها مملة بتفكيرها مملة بتصرفاتها منفرة لحد كبير .. وحتى فواز مولهدرجة وحدة تطاول عليه وتحتقره يصير خروف عندها تحت كلمة عاشق .. اذا في فترة الملكة الي يكون الخجل من الزوجة كبير وهذي تصرفاتها اجل بعد الزواج كيف بيكون كلامها بصراحة ماحبيت تمسك فواز فيها دامها رافضته ومن اول يوم كان تركها .. انانية الرجل للاسف بعض الاحيان تخليهم يتمسكو بأمور مومقبولة والضحاية في المستقبل هم العيال ..
يعني الطلاق بالملكة اهون من بعدين .. كثير روايات طرحت كره الحرمة لزوجها وهو مصر يكمل معاها تحت مسمى الحب وبعدين بقدرة قادر تصير الزوجة تبادله الحب .. مع انو بواقعنا مستحيل رجل يرضى على نفسه يكمل مع وحدة عايفته بكل ماللكلمة من معنى والي خلقها خلق غيرها كل واحد يروح في نصيبه احسن

سلطان وغزل

وهالثنائي بعد ماادري ايش سالفتهم بس انا شاكة انو غزل فعلا ماهي مثل مااعتقد ابوها شكلها عايفة سلطان يمكن لانها مجبورة لكن خوفها حيرني اذا فعلا هي مفرطة بشرفها للاسف ماراح تخسر دام سلطان الغبي بياخذها بيته وبما انو مابيدخل عليها في البداية مهما صار بعدين هي الربحانة لانو بيكون لها مدة ببيته لو كشفها بعدين اقل شي بيطلقها وماراح تخسر لاهي ولا ابوها لانه سمعتها مابتضرر ولا بتنال عقابها الي تستحقه

بس اذا كان العكس هي اوهمت ابوها بهالشي لغرض براسها والتخلص من سلطان يمكن عيشتهم مع بعض تقلب الموازين ماراح نستبق الاحداث واكيد بجعبتك الجديد والغير متوقع لهالاثنين

بالنسبة لسلمان للان متأكدة انو وراه لغز وكبير جدا مو معقولة بيقتل اخوه وبنفس الوقت بيحب ولد اخوه وبيربيه .. في سر كبير غير متوقع وسلمان مابيكون له يد بقتل اخوه وهو يجاري احمد لانه شاك بشخص يبغي يوصل له

لو كان قاتل ماكان انكشف من البداية .. وليش مصر على انو سلطان يتزوج غزل سنة بالذات ماقال كم شهر .. مع انو احمد وهو اغبياء لاعتقادهم انو ممكن مايصير شي بين سلطان وغزل طول هالمدة مافي رجال طبيعي تكون معاه انثى كاملة وحلاله وتحت سقف واحد وبيقاومها عادي .. بصراحة اكثر شي مشوقني كشف الغموض في الجريمة

عناد

حلو تعامله مع اخته ومراعاته لسنها واتمنى تتناقش معاه اكثر حتى تعرف انها سليمة حتى ماتتعقد مع مرور الوقت يكفي انها ماراح تنسى الي صار لها لكن لو عرفت انها ماتضررت راح تكون نفسيتها وثقتها افضل

باقي عناد ننتظر نصفه الثاني .. مع اني اشوف لوهو يتزوج الين بيكون مناسب لها لانه بيعرف يطلع الي بنفسيتها وغير كذا شخصيته ناضجة مافيها تهور والين تحتاج لرجل يحتويها ويفهم كل الي بداخلها ..

او يمكن تكون ارجوان لانو شخصيتها جدا جميلة وايضا تناسب عناد .. ولو ماسلطان بيدبس نفسه بغزل كان ممكن يكون لارجوان لاني حابة يكون لها ظهور قوي اكيد بيكون ممتع

عارفة طولت بس هذا تعليقي على اكثر من بارت