حبك خطيئة لاتغتفر/بقلمي

الجزء الثاني

في أحد الأيام الذي يصادف يوم الأحد فترة الظهيرة .. يعود حازم من كلية ليجد شابان يقفان على عتبة منزلهم ..
حازم :خير ان شاءالله وش عندكم
أكبر الشابين والذي يبدو بالثلاثينات :هذا منزل فهد ماجد ..
حازم :مو فيه ولا عاد هذا بيته ...
نفس الشاب :كل الناس تقول أن هذا بيت فهد ماجد ...
حازم بحلم :كان هذا بيت فهد ماجد بس ماعاد بيته ..
الأخر بغضب :فهد الزززفت وينه فيه ...
حازم :بقلعة وادرين تعرف وينها ولا أعطيك عنوانه ..
الشاب الغاضب يحاول الأشتباك مع حازم ولكن الأخر يمنعه :أنت ياورع أحشم الناس
حازم :الورع أبوك أنقلع عن وجهي ولاعاد أشوفك تووطوط قدام بيتي ...
الشاب الغاضب يعاود محاولة ظرب حازم ولكن الأكبر يمنعه ويدفعه للسيارة ويخبرة أن لاينزل منها الغاضب ينفذ الأوامر
بتأفف ..
يعود لحازم :أسمع أنت ماحنا جايين نتهاوش معك لأن مابينا وبينك شي حنا بس نبي فهد فيه بينا وبينه موضوع ...
حازم بصبر مضاعف :أسمع فهد مطرود من ذا البيت منفي وقاطعين علاقتنا فيه من وين أجيبة لك ..واذا كان ناصب
عليك روح بلغ عنه الشرطة وبتلاقي آلاف البلاغات عليه أنت مو بس الوحيد اللي تبحث عنه ..وترى عنده أنواع صكوك الأعسار يعني ماراح تحصل من وراة شي أطلب العوض من الله ...
الشاب :طيب ماتعرف وين أقدر الاقية والسالفة مو دين ولاشي السالفة أكبر من كذا شوي ..طيب انت وش تصير له ..
حازم :يقرب لي من بعيد ولد عم أبوي كنا مسكنينة عندنا شفقة ونصب علينا وطردناااه ولا أعرف له طريق ..
وعند أخر جملة كان حازم يقفل الباب بينه وبين الشخص الأخر لأنهاء هذا الحوار الذي أخذ منه الكثير ..
بالخارج الشاب يبدو عليه الهم ..يرى عجوزيين يخرجان من المنزل المقابل يذهب ليسألهما لعله يجد ضالته ..
الشاب :سلام ياعم
أبو بشاير:وعليكم السلام هلا حياك الله ..
الشاب:أقول ياعم ماتعرف جاركم فهد اللي كان ساكن بذا وين راح ..
أبو بشاير للعجوز الأخر :فهد شااد ..
العجوز الأخر صلاح :لاا عياله العاقيين طردوة ..
الشاب :طيب ماتدرون عن عمه
أبو بشاير يشير بعصاءة على صلاح المقابل له:هذا اللي قدامك هو عمه ..
الشاب :طيب ياعم ماتدري عن ولد أخوك
صلاح :فهد يغطس فترة ويطلع ولاندري له طريق
الشاب :وعياله اللي تقول عنهم مايدرون عنه
صلاح بغضب :عيالة عاقيين وطاردين ال**** ويتمنون موتي وموتة ...
الشاب :اسمع ياعم بما أنك ماأنت موصلنا لولد أخوك بقولك الشي اللي كنت أفضل يكون بيني وبينه ..
صلاح :أسلم وش عندك وش بينكم ..
الشاب :أفضل نكون على أنفراد ..
صلاح :حنا على أنفراد هذا أبو بشرى مانخبي عليه شي ..
الشاب يحاول أن يكون لطيف مع العجوز المسكين:الصراحة ولد أخوك نصاب
صلاح يهز رأسه بتصديق:ايه عارفين وش غير هذا عندك
الشاب بغضب :محتال ومايخاف الله ...من شياطين الأنس ..
صلاح :كلنا عارفين هالشي بس هو وش مسوي ..
الشاب بتردد وبصوت منخفض :جدتي عجوز بستين عشان عندها قرشين ولد أخوك مخطط عليها ومغازلها ويراسلها بالواتس اب لين لحس مخها واللحين بتتزوجة ...
أبو بشاير :لاحول ولاقوة إلا بالله والله ياأبو ماجد أن ولد أخوك انجن على أخر عمرة ...
صلاح :وهو بياأخذها بالحرام يقولك بيتزوجهااا ..وأنت ياوليدي حرام تمنعون جدتكم عن نصيبها ...
الشاب بغضب :حنا أحفادها عندنا عيال تبينا نزوجه جدتنا أنت أنهبلت ..الظاهر أني جيت لشخص الخطأ ..
وأبتعد عنهم وهو يسب ويشتم بالعائلة المجنونة ...
أبو بشاير: وش هالكلام اللي قلته أنت رجال تخاف الله لاتطاوع ولد أخوك على خبالة ...
صلاح :هالعجوز عندها مليونين غير بيوتها وأراضيها خابر فهد وهو يعلمني عنهااا تبيني أوقف بوجهه ليه
خله يسترزق يمكن يحوشني خير من وراه ..ويابخت من جمع راسين بالحلال ..
أبو بشاير ينظر لصلاح بصدمة ويرجع لمنزلة وهو يردد :حسبنا الله ونعم الوكيل ...

,,,,,

يدخل صلاح المنزل ..الصالة خالية مازال التلفاز مطفيء بدون رسيفر ..الأطفال بالمطبخ يتناولون الغداء وقد أوصدوا
الباب تحسباً للهجوم العجوز على طعامهم ...
صلاح :مسكرين الباب تغديت مابيلكم عيشة يالعاقيين ..
يفتح الباب أول الخارجين معتز :أكيد تغديت عند أبو بشاير ..
سارة :فضحتنا معه أنا صرت أستحي أمر من عند بيتهم بسبب سواياك ...
صلاح بتهديد:والله أن قمت عليكم ماخليت فيكم عظم صاحي ...
بعد صمت قصير تخلله مشاكسات بين سارة ومعتز ...
صلاح :تدرون أنكم بتعضون أصابع الندم ...
هيونة التي خرجت للتو من المطبخ :على ايش أن شاءالله
صلاح :فهد طاح له على كنز ...
معتز بسخرية :ليش قراصنة الكاريبي
سارة بطمع ومخيلتها تصور له صناديق مليئة بالذهب والجواهر :كنز ويين طاح علية ..
صلاح :بيتزوج مليونيرة ..
سارة بصدمة :بابا بيتزوج مستحيل
معتز كمن تلقى صفعه :بيسكنها معنا
هيونة بضحكة :مليونيرة وش تبي فيه أكيد عانس فاتها قطار الزواج وبتنصب عليه ..
صلاح :ماهي عانس جدة عندها أحفاد بس فهد الثعلب دار ولف عليهاا لين رضت فيه بتورثه ملايين ...
زيد بصدمة:الجدات يتزوجون ...
عيد يكاد يغشى عليه من الضحك :بيتزوج جدة هههههههههههههههههههههههههه ...
زيد :هيونة الجدات عادي يتزوجون ...
معتز :طيب هي تصير جدتنا ولازوجة أبونااا ..
عيد مازال يضحك :جدتنا هههههههه بابا مرا يحبنا عشان ماكان عندنا جدة من قبل بيتزوج جدة تصير جدتنا ..
هيونة التي وجدت الموضوع مثير للسخرية تشاركة الضحك ..
سارة ومعتز على وشك البكاء ..
زيد يتوجة للمطبخ ليسأل حازم الذي يقوم بغسل المواعين :الجدات عادي يتزوجون ...
حازم غير مهتم بالموضوع وليس مستعد لأعطاء أي أجابة ...
,,,
واتس اب
هيونة :ابشرررررك
بشورة :صدق أبوك بيتزوج عجوز
هيونة :ترسل وجوة ضاحكة
بشورة :أبوي يقول أحفادها جايين يدورون فهد شكلهم بيذبحونه
هيونة :ليش الدنيا فوضى ماأتوقع توصل لهدرجة ..
بشورة :بس صدق أبوك ماهو صاحي
هيونة :أوما لو يتزوجها صدق بيكون أفضل شي سواة بحياتة ..
بشورة :يعني أنتي بعد راضية
هيونة :وليش ماأرضى عجوز ومليونيرة ياأختي بتقطع من الوناسة ..بسوي لفهودي عرس كل العالم تحكي عنه
وبكسر المنصة رقص ...
بشورة :صدق أنك مختلة ..
هيونة :ياأختي على قولة عمي صلاح أبوي طاح على كنز ...
بشورة :الحمدلله الذي عافانا عما أبتلاكم فيه ..
هيونة :ترسل وجوة ضاحكة
بشورة :شووو
هيونة :ياأختي صرعوني التوأم ضحك واحد يقول عادي الجدات يتزوجون والثاني متقطع ضحك يقول بابا بيتزوج
يجيب لنا جدة عشان ماكان عندنا زوجات ..
بشورة :أخوانك فاصليين ..
هيونة :بس الغريبة زوووز ماقال شي ماأدري وش يفكر فيه ..
بشورة :زين طلع واحد من عايلتكم المختلة عاقل ..
هيونة :المختلة أنتي وراسك ...
بشورة :ترسل وجوه ضاحك ..
هيونة :أقول مافيه حفلات قريبة
بشورة :الجمعة فيه حفلة خطوبة .. ايوة صح يوم الخميس معزوم على حفلة توديع عزوبية ...
هيونة :معزومين !!!!
بشورة :أيوة أنتي وأنا فجر صديقتها بتسوي حفل توديع عزوبية وعازمتنااا
هيونة :ماأعرفهم ؟!
بشورة :ياختي فجر بنت خالتي والباقيين تتعرفين عليهم المهم جهزي نفسك نبي نفلهاااا ...
هيونة :طيب يدرون وش مهنتنا ...
بشورة :لا لتخافين ..
تنخرط الفتيات بحديث آخر وهيونة تفكيرها مشغول بالحفلة هل تحضر أم لااا ...

,,,
يدفع عربته ويبحث وسط مايرمية الأخرين قد يجد مايفيدة ويفيد عائلته ..يراه من بعيد زميل له بالصف ويركض لملاقاته ..
يصله لاهثاً:معتز ..
معتز متبرماً فهو لايحب التلاقي مع أقرانه خارج أسوار المدرسة :نعم وش تبي
الصبي الاهث :تعال بعطيك شــي ..
معتز :وين
الصبي :لبيتنا عندنا أغراض بنوديها الجمعية تعال خوذ اللي تبــي ...
يسير معتز خلفه متردداً هل هو محق سيعطية أمر ما أو أنه يصير به لفخ ليتشمت به ويخبر عنه الزملاء ..
يدخل خلفه لمنزل ومن ثم للمخزن الخارجي ... الكثير والكثير من الأغراض ...
معتز بتردد :متأكد أن أهلك مايبغونها
الصبي يهز راسه بموافقة :ايوة أنا قلت لأمي عنك قالت أوكي خله يجي يأخذ الأغراض من كم يوم بقولك بس خفت بالمدرسة لو قلت لك تزعل لأنك ماتبغى الباقيين يدرون..
معتز يتأمل الأغراض ويفتش بداخلها ..يبتسم وكأنه وجد ضالته ..يرفع الجهاز بين يديه وبتسأل :عادي أخذ هذا..
الصبي :كل اللي هنا مسموح ..خوذ أغراضك بسرعة بروح أتابع مسلسلي ..
معتز الذي راق له الصبي :ايش مسلسلك ..؟!
انخرط الصبيان بحديث عن المسلسل الأجنبي الذي صادف أن كلاهما من متابعية ...
يخرج معتز من منزل زميله بالصف مودعاً وعلى أمل لقاء قريب خارج أسوار المدرسة ...
يدفعه عربيته الشبة ممتليئة ..
يوقفه أحد مراهقي الحارة
يتمتم بداخله :هل أصبحت اليوم مرئي للجميع ..
معتز بوجة مبتسم :لبييه وش تبي ..؟!
:وش عندك مع فادي ؟
معتز :مين فادي
:تو اللي طلعت من بيتهم
معتز :ايوة ايش فيه
:وش موديك عندهم
معتز:أخذ من عندهم أغراض
المراهق بعصبية :أنت خبلللل كيف تأخذ من عندهم شي ؟؟
معتز :ليييش يهود هم ..
المراهق :لا ياغبي أسوء ...
معتز بصدمة :ملحديين ...
المراهق :ياثوور أبوهم فيه أيدز ...
معتز :كذااااب
المراهق :اقسم بالله اسأل أصغر ورع بالحارة بيقولك أن هالمعلومة صح ...
معتز :مستحييل
المراهق :انت تكذبني ..يعني كل يوم تفر بهالحارة ماعمرك سمعت هالمعلومة ..
معتز :اوووف خبررر ناررري تشااووو بروح أعلم أخواني ...
ودفع عربيتة أمام مسرعاً ..
المراهق بصوت عالي:أحرق الأغراض ياثور أذا جاك ايدز مالي شغلللل ...

,,,,
بغرفته يقوم بتمرينات الضغط .. الجزء العلوي من جسدة عاري مغطى بالعرق ..أنفاسة متسارعة ..
يعمل بأجتهاد على تمرين جسدة ...لكن تلك الفتاة المزعجة المستلقية حالياً على فراشة وتثرثر بكل مايجول بخاطرها ..
تثير غضبة ..صاح فيها :هيوووونة بسسس ...
هيونة بفزع :يمممه وش فيك الله يقلع وجهك روعتني ياحمار ...
حازم يلتقط المنشفة ويجفف جسمة :ازعجتيني أنا مشغول وانتي بس قرق ..
هيونة :وجعع الله ياأخذ عمرك طيحت قلبي عساك للماغص ..
حازم :انتي ماتصكين فمك كأنك بالعة راديو يوم كان عندك كلية كنت مرتاح منك ...
هيونة تلقي عليه بكتابة الذي بجوارها على سرير :عساك ترسب يالورع والله وطلع لك لسان ...
حازم يمد لسانه :عندي لسان من يوم ولدتني أمي ...
يخرج للحمام ليستحم تاركها خلفة ...
هيونة بغضب :والله هالورع عطيته وجه وصار يستقوي علي ...
تنزل للأسفل يسلمها عيد كيس مرسل من أحد الجارات ..
هيونة بسخرية :مصدقة عمرها هذي تبغاني أسويلها ورق عنب ..يالناس أحد مطلع علينا أشاعة أن أمنا شامية ..
عيد بنفس الأسلوب :السبب المحتمل معتز أكيد هو سبب الأشاعة ...
تدخل سارة تسحب مروان الباكي خلفها ..
هيونة :وش سويتي فيه ..
سارة :كنا نلعب بالشارع وكل الناس اللي تمر تناظر فيه ..
هيونة بصبر :واذا ناظروا فيه ...
سارة :أكيد عرفوا ..
هيونة بعصبية ترمي الكيس من يدها :وش عرفوا يالمجنوونة وش عرفوا
سارة :انتي عااارفة ...
عيد :اللحين أنتم متأكدين أن سارة ومعتز مو توأم ...
زيد يشاركة الرأي :أغبياء شبه بعض ...
هيونة :فرحانين أنت وياة مو كأنكم اللي علمتوها ..
زيد :أنا مالي شغل هو اللي خبرها ..
مروان يمسح دموعه:ابغى ألعب بالشارع طفشتووووني ..
هيونة :روح ألعب ..أنتي اذا طلعتي وراه كسرت رجولك ..
التقطت كيسها وذهبت للمطبخ وصاحت بسارة :تعااالي معي ...
يرن هاتف المنزل يتولى زيد الرد ..
زيد :الووو مين معي ...أيوة هلا .. ماعليك أوكي ...
يخرج من المنزل تحت أنظار عيد الذي يلحق به ليراه يصعد لسيارة غريبة يعود لهيونة ليخبرها بالخبر الحصري ...
هيونة :أنت مجنون وش تقول ..
عيد :والله العظيم
سارة :غبي كان سجلت رقم السيارة وأكملت تولول :ياويلي ياويلي اخوي انخطف بكرة نطلع بالثامنة نقول قصتنا ...
هيونة بعد أن سمعت صفير حازم المنتعش بعد الأستحمام :الحق أخوك أنخطف ..
حازم يرتشف كوب من الماء البارد :محمد اللي أخذه ...
عيد :مو سيارة محمد ..
حازم :سيارة صديقة ...
سارة :واااو كيف عرفت ..
حازم يظربها على راسها :شفته مع الشباك ياذكية ...
هيونة :ال*** وش يبي فيه ..
عيد :ممكن يبيه يساعده بنصبة أو اي شي ثاني ..
سارة :مقابل وجبة عشاء زيد ممكن يسوي أي شي ...
حازم :أنا بروح أدرس ماأبي أزعاج ...
معتز يعود بغنائمة ليخبر العائلة بالخبر الحصري ..
هيونة بفزع :أشوف وش جبت لازم نعقمها ..
سارة :الحرارة تقتل كل شي ...
معتز :ياأغبياء الرسيفر لاتعرضونه للحرارة يخرب ...
هيونة بتفكير :الرسيفر خلنا نمسحه بأي معقم ...
عيد :كلوركس يكفي بليييز لاتخربونة ماصدقنا نلاقي رسيفر ...
سارة :ايش أسم ابوهم يمكن بنتهم معنا ببتعد عنهاا ..
عيد بلؤم :تخيلي تكون صديقتك المقربة ..
سارة تطلع لسانها:الحمدلله ماعندي صديقات ..
عيد :زميلتك اللي تجلس بجنبك ..
سارة :اللي تجلس بجنبي مو سعودية وهم سعوديين لاتحاووول ...
معتز :فادي أصغر واحد بعائلتهم أنا أعرفه من أولى أبتدائي ...بس ماكنت أدري أن أبوهم عند أيدز ...
هيونة بحيرة:كيف بشورة ماعلمتني بالعادة أمها وأبوها مصدر أخبار الحارة ..
وبجهل تام تلقي النصائح على الصغار :المهم اللحين أنتم عرفتوا هالعائلة لاتحتكون فيهم ماعندنا فلووس نعالجكم
لو جاكم أيدز ..
سارة :لازم نعلم بابا وعمو صلاح ومحمد لوجاهم المرض بينقلونه لنااا ..
معتز :أنا بتصل على بابا ومحمد أخبرهم ..
هيونة :هذا إذا ردوا عليك ..
عيد :بقول لعامل البقالة المسكين مايدري دايم يتكلم مع فادي ...
وهكذا تشكر العائلة الفقيرة صدقات العائلة المبتلاة بأن تزيد جروحهم بنشــر أخبار بلاوهم على الملأ ..
,,,,
بالسيارة التي أستعارها محمد من صديقة ..زيد يثرثر بكل ماحدث بالأيام الماضية ...
محمد يتنهد:الله لنا يافهووود بتتزوج مليونيرة وتسحب علينااا ...
زيد :هيونة تقول بتسوي عرس كل الناس تتكلم عنه..
محمد :أيوة الطقاقة هذي شغلتها ..
زيد :لايسمعك أحد أنتي تبي تفضحنا ...
محمد:غبي أنت من بيسمعنا بالسيارة
زيد :يمكن خويك ذا مركب جهاز تنصت ...
محمد :انت عارف وش بتسوي اللحين ...
زيد :أيوة عارف أنا بزعجة بالأسئلة والتفتيش لين يبتعد عن المكتب ....وأنت بتستغل الفرصة وتسرق الفلوس ..
محمد :لاتقول تسرق أنت بتنكبنا الله يفضحك ..
زيد :المهم أكيد ماعندة كاميرة مراقبة ..
محمد :أيوة متأكد ...
زيد :المهم ترى أنا مو سروق بس عشان أنت مسكين مطرود وماعندك فلوس وحازم قال عادي نسرق لو محتاجيين ...
محمد بأرتباك وهو يقترب من مكان المهمة :طيب خلاص خليك قد الثقة لاترتبك ...
تنتهي المهمة بنجاح يعود زيد بغنيمته الصغيرة وجبة من ماك .. ويأخذ محمد الغنيمة الأكبر ..ويسجل الزمان أن فتاوي
هيونة وحازم قد أصبحت قوانين في دستور زيد الشخصي ...

,,,
عصر الأربعاء يترجل حازم من سيارة الأجرة عائد من جامعته ... يحيرة التواجد الكثيف لدوريات الشرطة بالحي ...
يدخل إلى المنزل بقلق ... يبادره العم صلاح :وين السلام داخل على يهود أنت ؟!
حازم :ماعليش ياعم ماشفتك السلام عليكم ..
صلاح :وعليكم السلام ..وش اللي ماخذ عقلك ماشفتني ..
حازم :الشرطة اللي بالحي ..
صلاح :ايه ذولي يدورون بنت ضايعه الله العالم أنها مخطوفة ...
معتز وعيد وزيد ينظرون بأنبهار للتلفاز الذي يعرض فلم رعب مقزز ...
حازم يسحب جهاز التحكم من يد معتز الغافل ويغلق التلفاز ...
عيد :ليييش
حازم :قوموا أدرسوا
زيد :بنشوف الفيلم حرام عليك
صلاح :شغله أنت وش فيك مبتلينا
حازم :ياعم هذا مايصلح لهم توهم صغار يتحلمون فيه بعدين يعلمهم على العنف...
صلاح :شغله لكسر هالعصا عن ظهرك ..
حازم :ماني مشغله قوموا يالله ...
معتز :اووف انت تبي تتحكم فينا مصدق نفسك ...
عيد :هيووونه تعالي شوفي حازم ..
هيونة من المطبخ بغضب :حلوو عن سماااي ..
يدخل عليها بالمطبخ :وش فيك ..
تمسح على شعرها بظهر يدها :اووف جنني هالحلى مو راضي يضبط ..
حازم يرتشف كوب من الماء البارد :وش الله حادك تسوين شي ماتعرفينه...
هيونه :أن ماأصدق احد يطلبني أسوي له بتشرط بعد أعرف أو لااا ..تعال أربط شعري ..
حازم يساعدها بأعادة ربط شعرها الذي هربت منه بعض الخصل لتحيط بوجهها :وش صار على الشغل..
هيونة :قدمت بكذا مكان وللحين ماردوا علي ..
تستمر هيونة بعملها وحازم يسحب كرسي ليجلس علية :سمعتي بالبنت المخطوفة ..؟!
هيونة :أيوة قالوا لي مخطوفة من المدرسة ...معتز يقول يعرفها وحيدة أهلها أصغر من سارة ...
حازم :والله الدنيا صارت تخوف .. إلا وينها سارة مو مع الشلة ..
هيونة :والله ماأدري وين هي غاطسة خلها باللي هي فيه لاتجي ترجني ...
حازم :ومروان وينه معها
هيونة :لامروان نايم بغرفتي ..كان عندي يلعب ونااام ..
حازم :اوكي أنا بروح أنام لي ساعتين الرجاء المحافظة على الهدواء ...
هيونة :اللي يزعجك أظربه ...
أنهت أصناف الحلى المطلوبة منها قامت بتنظيف المطبخ ..وذهبت للبحث عن سارة وهي تفكر بأنها كان طول اليوم غريبة ..هل حدث معها أمر سيء بالمدرسة ..
ولم تجدها بأي مكان بدأ القلق يساورها ..
صلاح :وش فيك تدورين تقل دجاج ..
هيونة :سارة ماأدري وين هي ..
معتز :لايكون أنخطفت ..
عيد :بروح أدورها بشارع .
زيد :يمكن تلعب بالمخزن ..
هيونة بأستغراب :المخزن ...
زيد :أيوة سارة دايم تفتحه وتلعب فيه وتختبأ فيه عن مروان ..
قررت البحث هناك لتزيح قلقها وصلت للمخزن لتجده مغلق من الخارج ..
ولكن أليس هناك صوت حركة بالداخل ...فتحت المزلاج ..ثواني حتى أعتادت عينيها على الظلام ..
هيونة بصدمة:ياووووووويلي ...وش تسوين هناااا ...
سارة التي جاءت تركض اسقطت كأس الماء من يدها :والله ماقصدي كنت بخوفها بس ونسيتهااا ووو ...كلمات
المعجم كله لن تستطيع أن تسعفها بتبرير لخطأها الفادح ..
هيونة تهجم عليها بظرب :يامجنووونة يامختله ياحيووووانه
يخرج الجميع على الأصوات لينصدموا بالواقع الفتاة المخطوفة التي تحدثوا عنها طيلة يومهم ووضعو آلاف الأحتمالات لشخصية الخاطف كان طول هذة المده محبوسة في مخزنهم والجاني هي سارة ذات الثمانية أعوام أي عقل سيصدق هذا ...
هنا نتوقف ..

كان معكم
فهد ماجد 54 سنة
محمد فهد ماجد 25 سنة
صلاح محمد 63 سنة
هيونة فهد 22 سنة
حازم فهد 19 سنة
معتز فهد 13 سنة
عيد وزيد فهد 11سنة
سارة فهد 8 سنوات
مروان 5 سنوات