كاتب الموضوع :
بيشَ
المنتدى :
القصص المهجورة والغير مكتملة
رد: رواية مافهمت وصلك والهجران للكاتبه انفاس الهجر
~ آلُبِآرُتَ آلِتّآسْعٌ ~
• خَلُآصٌ آقُتْلَوْنِيُ
• وَبٌكِفّنْيَ زٌفّوْنِيُ
فهد نفذ صبره وبعصبيه : قووول انطق ماراح اقول لأحد .
رويد : انا عرفت بالصدفه ان عامر ونايف يشربون شيشه .
فهد وهو رافع حاجبه : وبــس ؟
رويد : ايه بس .
فهد : رويد انا اشرب دخان عادي الموضوع ماتحول مثل موضوعهم وبعد عارف انهم مخبين شي من ورانا وش فيهم بعد ؟
رويد بخوف : صدقني هذا اللي اعرفه عنهم انتو اللي عايشين معاهم وش شايفين فيهم ؟
فهد : والله يارويد احنا نصبح واثقين فيهم ونمسي شاكين فيهم مالهم حل .
رويد : ما ادري عيالكم وانتم تعرفونهم اكثر مني .
فهد : وجيههم تدل على انهم يشربون دخان ويمكن يتعاطون وكلامهم يثبت انهم شباب صالحين .
رويد " والله وقربت للحقيقه ياخالي " : طيب ليش انت مشغل بالك خلاص اتركهم براحتهم .
***
سهام : ايه صدق الخبر .
سلوى : امااا اش هالحظ وليش خطبها هي ليش ماخطب صبا ؟
سهام بقهر : انا ما ادري اش شايفين بغيداء عاجبتهم ما ادري عاجبتهم على ثقالة دمها ولا على غباءها ولا على خوفها انا ما ادري ليش فيه ناس يفضلونها على بنتي مع انهم عايشين مع بعض .
امل : سبحان الله اللي بعيد عن امه ويتعذب بحياته دايم الناس يحبونه .. مو شفقه بس انه يصير غالي عندهم .
سهام : امل لاتقعدين تتفلسفين علي ترا غيداء مافيه احد حبها إلا الجوهره وبنتها ويمكن انتي .
امل : والله يا ام خالد ما ادري ليش انتي تكرهين غيداء صح انك تغارين منها بس مو لهالدرجه .
سهام بعصبيه : انا ما اغار منها ومن ايش اغار ؟ لو هي من يوم عرفتها وهي زوجة فهد اليحيى كان اقول ايه اغار منها لأنها ثريه .
امل : ويمكن تو اشتغلت الغيره عندك انتي ليش كذا ليش تكرهينها والله لو انها بنت ضرتك .
سهام : لو كان بنت ضرتي يمكن اشفق عليها عشان عبدالرحمن بس بنت عبدالله مستحيل ارحمها .
امل : يعني وين بتروحين من عذاب ربي وانتي دايم ظالمه غيداء ودعوة المظلوم مستجابه .
سهام وهي توقف : انتي اش اللي جابك هنا انقلعي من قدامي .
امل : هذا بيت زوجي ومو انتي اللي تطرديني منه .. انتي الطالعه وانا الداخله .
سهام بعصبيه : هذا بيت ابوي مو بيتك انتي وزوجك .
وقفت سلوى : بسم الله الرحمن الرحيم اش فيكم تعوذو من ابليس وانتي يا امل العاقله تتناقرين مع سهام عشان غيداء صدق انكم مخفه .
امل : والله هي اللي تنرفزني بكلامها وانا بس قلت لها وجهة نظري فقط واذا اختلفنا براينا مو تجين تطرديني من بيتي .
سهام : والله انتي اللي بديتي وياما حذرتك لاتدافعين عن غيداء قدامي يكفي خالد وابوه مطلعين روحي .
امل : انا ماقلت شي غلط .. وخلاص حقك علي وانا اسفه .
سهام وهي تجلس : اوووف .. متى تجي امي الجلسه عندكم ممله من يوم جلست وانتم كذا حتى انتي ياسلوى يا اختي صرتي مثل امل .
سلوى : الى متى ياسهام وانتي كذا الناس وصلو القمر وانتي لسه كل كلامك بالناس واعراضهم ترا ماراح تستفيدين شي .
سهام : الذنب علي انا .. خلاص مالكم دخل واذا كان انتو تدعون للاسلام فيه ناس غيري تحتاجكم .
سلوى بعصبيه : سهااام احنا مانرضى نشوف منكر ومانغيره احنا نأمر بالمعروف .
سهام : ودامكم تأمرون بالمعروف ليش تزعلون الناس وترفعون ضغطهم ؟
امل : خلاص يا سلوى الكلام والله ما ينفع معاها لاتتعبين نفسك .
سهام : ليش اش قالو لك ما اسمع ولا ما افهم ؟
امل : لا ذي ولا ذي بس انك ماتعبرينا اذا احد نصحك لاتخانقينه وتقومين الدنيا على راسه ولاتعصبين قولي جزاك الله خير وسمع الله لمن حمده .
دخلت ام احمد ووراها بدور وسلمو على سهام وجلسو .
بدور : الف مبروك خطوبة غيداء والله اني فرحت لها .
سهام : الله يبارك فيك .
ام احمد : حمل وانزاح عنك يابنتي كلها اسبوعين ان شاء الله والبنت ببيت رجلها .
سهام : الله لايوفقها وجعلها ان شاء الله ترجع لي مطلقه .
ام احمد : خلاص لاتدعين عليها .
سهام : يمه انا ما ادري وش اللي جابها عندي انتي تدرين لو كرستينا طلعت بأي لحظه راح تنتهي حياتي .
ام احمد : اوووه اكيد نسيت اللي صار وخلاص ماعادت تذكر .
سهام : لا يايمه قبل 7 سنوات اتصلت علي وقالت لي انه السر هذا راح يطلع بأي وقت .
ام احمد : لا مستحيل يطلع السر هذا .
سلوى : يمه فهمونا السالفه وش صاير ؟
ام احمد : ماصار شي .
سلوى : وش سالفة كرستينا مع ام خالد ؟
سهام : مافيه لاسالفه ولا هم يحزنون .
سلوى : سهام انا مو مغفله السالفه اللي قاعدين تتكلمون عنها سر وتنتهي حياتك وش السالفه قولي لي .
سهام : شي خاص فيني ماراح اتكلم فيه جعلني للصمم قبل لا انطق فيه بحرف .
***
اقترب الموعد بكره زواج فـــهــد وغــيداء .
حاولت غيداء تنام ومو قادره النوم جفاها الليله هذي .
جلست " ياربي تمم لي على خير "
قرأت اذكار النوم وجالها ساعه تتقلب بفراشها مو قادره تنام .
رن جوالها وجلست وردت بـ : الو .
مدى : هلا وغلا بعروستنا .. اش اخبارك بقى 24 ساعه فقط .
حست غيداء بثلج انسكب بمعدتها : ايـ .. ايش ؟
مدى : هههههههه اقولك بقى الحين على موعد الزفه 24 ساعه .
غيداء وهي ترجف : خايفه يامدى وربي خايفه .
مدى : تراه انسان مو وحش .. وبعدين من ايش خايفه ؟
غيداء : اا انتي ماتذكرين يوم فهد قال لعمي اذا تزوجتها لو اقتلها محد له فيني دخل .
مدى : اهااا يعني الحين انتي خايفه من القتل بس .
غيداء : لا لا مو قصدي كذا بس يعني يسوي لي اي شي .
مدى : هو زوجك وبيخاف عليك ويصونك اكثر من عمك .
غيداء : آآه ليتني ابقى خدامه عند عمي ولا ادخل نار فهد .
مدى : حرام عليك والله ان اخوي طيب وحنون .
غيداء : قلتيها اخوك يعني على خواته ولا انا اكيد بيعذبني .
مدى : انا اخته واعرفه زين هو عنده رجوله .. والرجال مايمد يده على بنت وفهد اخوي واعرفه زين .
غيداء : لا عادي الرجوله مو كذا .
مدى : غيداء والله خوفتيني معاك خلاص تكفين حسيت ان اخوي وحش .
غيداء : آآه بس لو تحسين بربع الخوف اللي فيني .
مدى : تعوذي من ابليس وهذا الشيطان بيخوفك اذكري الله واقري قرآن وسمي بالله ونامي .
غيداء : مع السلامه الحين الساعه 2 ونص وانا مافيني نوم .
***
صلى فهد صلاة العصر واخذ له شور ولبس ثوب ابيض وغتره بيضاء وعدل عقال ع المرايه وتعطر من عطره ريتشي واخذ بشته الاسود وحطه على ذراعه وابتسم " القدر اللي رماك علي ياغيداء "
دخلت ام فهد وهي معاه المبخره وبخرت فهد : اسم الله عليك احلى عريس شفته بحياتي .
ابتسم فهد : يمه اش رايك فيني ؟
الجوهره بابتسامه : اسم الله عليك .. حلم كل بنت ان فارس احلامها مثلك رجوله ودين وكرم وحنون ومزيون .
دخلت مدى : يمه يله بسرعه تأخرنا الساعه 6 واحنا لسه مارحنا .
الجوهره : الحين جايه .
ونزلت المبخره ع التسريحه : يله حبيبي لاتتأخر .
فهد : اوك الحين بروح .
نزل فهد تحت وطلع للسياره وركب مع سايقه الخاص سعد : الف مبروك ياطويل العمر .
فهد بابتسامه : الله يبارك فيك .
طلعو لفندق الريتز كارلتون اللي فيه زواج فهد .
نزل فهد وكان وراه حرس وعلى يمينه مدير اعماله سامي .
دخلو بالقاعه والكل وقف وراح فهد ووقف جنب ابوه يستقبل المهنئين .
...
بقاعة الحريم .
كانت الفنانه واقفه وتغني بإسم غيداء .
صبا : يمه شوفي الناس الهاي هاي مو مثلنا .
سهام : وع دامه زواج غيدوه كل شي فيه مو زين .
صبا : آآه مالت علي وعلى حظي المنسدح .
سهام : الله يرزقك بأحسن من فهد .
ضحكت صبا : وفيه احسن من فهد ؟
سهام بأمل : يمكن يخطبك واحد من اخوانه ولا عيال عمانه .
صبا : والله ياليت .
وقـــت الزفـــه
نزل فهد مع الدرج وهو ماسك يد غيداء ويبتسم لها وغيداء منزله راسها للارض والكل يشهد لها بالجمال بفستانها الكات الابيض وشعرها الأسود المرفوع بتسريحه حلوه وتناسب العروس وميك ابها الاسود وفضي وطقمها الالماس محليها اكثر .. والفنانه الخليجيه تغني اغنية الزفه
لاإله إلا الله ... لاإله إلا الله الف الصلاة والسلام عليك ياحبيب الله محمد
ورده وكل الورد يمشي معاها ... ويزف خطوتها وينثر شذاها
والورد الابيض من عذوبة حياها ... يحمر لونه لو يلامس في يديها
بنت وهبها الله طهر السحابه ... عفه ورقه واحتشام ومهابه
وفي قلبها هدي الاله وكتابه ... وفي قلبها النور وسنة نبيه
وصلو الكوشه وباس فهد جبين غيداء وهي ترجف " حسبي الله على ابليسك "
وبالجهه الثانيه كانت وريف تبكي تحت غطاها " الله لايهنيك ياغيداء "
شربت ماء بارد تحاول انه يطفي النار اللي تستعر بداخلها .
ووقفت وبصوت مبحوح من البكاء : سارونه تعالي معاي ما ابي اجلس هنا .
ساره بابتسامه : اعذريني ياقلبي خلينا نشوف التصوير العروس والعريس كلهم روعه ربي يسعدهم .
وريف بهمس : اذا كان تعزيني وتحبيني لاتحاولين تحتكين فيها .
ساره : بس هذي زوجة فهد يعني بتسكن معانا بنفس البيت .
انعصر قلب وريف : فهد لي وبس .
سلمو على فهد محارمه وزوجات عمامه وباركو له ولغيداء .
ومسك فهد يد غيداء وتوجهو للجناح اللي مخصص لهم بنفس الفندق .
دخلو وغيداء تتمنى انها تموت ولا تبقى مع فهد بروحهم .
سكر فهد الباب : الف مبروك يا غيداء .
كانت غيداء ترجف ومنزله راسها للارض .
فهد : ممكن اعرف الرجفه هذي ليش .. خايفه مني ولا من ايش خايفه ؟ لاتخافين مو الحين وقت الانتقام بالايام الجايه .
غيداء : ..........
فهد : الحين انا قاعد اكلم صماء ولا اش فيك ؟
غيداء بخوف ودموعها تنذر بالهطول : عـ عـن اذنك .
فهد : وين رايحه ؟
غيداء " اي مكان بس خلني اتنفس شوي "
فهد : وش فيك ياغيداء ؟
غيداء : مافيني شي بس اتركني .
نزل فهد يدها اللي بيده ودخلت بالغرفه ورمت نفسها ع السرير وبكت حظها واطلقت آآآه من اعماق قلبها .
***
اماني : الله يوفقهم ويرزقهم بالذريه الصالحه .
الجوهره : امين .
اماني : ماشاء الله على غيداء جمالها مو ببنات العالم كله حتى كرستينا تقول انها جميله وهي دايم تسب فيها .
الجوهره : إلا كرستينا تدري انها بنتها ؟
اماني : ايه وتعرف عنها كل شي .
الجوهره باستغراب : وليش ما انقذتها من زوجة عمها ؟
اماني : كرستينا ناويه تروح لبيت عم غيداء من زمان بس كل ماتبي تروح انا امنعها اخاف عليها من زوجة عبدالرحمن .
الجوهره : واضح من شكل زوجة عم غيداء انها شريره حتى يوم جات تبارك لي واضح عليها القهر .
مدى : خلااااص يكفي حش .
ضحكت اماني : اش نسوي خذتنا السوالف الين وصلنا الحش .
ماريا : هههههه خالتي مدى ملتزمه .
مدى : والله اللي يجلس مع غيداء يلتزم غصب عنه هي دايم تذكرني بالحساب والعذاب يوم القيامه .
ماريا بابتسامه : خالي فهد طاح على كنز احلى بنت شفتها هي زوجته .
الجوهره : قولي ماشاء الله لاتحسدين ولدي .
ماريا : ماشاء الله .. ماما صح فيها شبه من كرستينا ؟
اماني : ايه فيها شبه منها بس مو كبير وغيداء احلى من كرستينا .
ماريا : بس حتى كرستينا حلوه .
ساره : ممكن تطلعون لأي مكان بتابع البرنامج والله ازعجتوني مو قادره اسمع شي .
اماني : انتـــي اطلعي من امس وانتي ع البرنامج هذا روحي تابعيه بمكان ثاني .
طلعت ساره وجلست ماريا جنب امها : ماما .
اماني : هلا ياروح امك .
ابتسمت ماريا : متى نرجع لالمانيا خلاص زواج خالي حضرناه وانتهى .
اماني : ان شاء الله بعد العيد .
شهقت ماريا : اجلس هنا الى العيد ؟
اماني : ايه .
ماريا : لا لا ماما بليز بنرجع بعد يومين ماما الله يخليكي .
اماني : غاليه والطلب رخيص بعد يومين نرجع لألمانيا .
ماريا وهي تبوس خد امها : الله يخليك لي .
الجوهره : لا اماني اجلسي عندنا ماشبعنا منك اش فيك ماتجين إلا بالسنه حسنه وماتجلسين كثير اكثر شي اسبوعين .
اماني : والله يايمه عيالي مايحبون يجلسون هنا رويد يقول بيرجع لألمانيا لو بروحه .
الجوهره : طيب اش فيهم وليش مايبون يجلسون هنا ؟
اماني : عشان الجو مو متعودين عليه ولا اذا جينا بإشتاء نجلس ان شاء الله شهر .
الجوهره : الله يخليهم لك .
اماني : امين .
***
اقلعت طــائرة فـهد وغيــداء الـى المانيا .
بالطياره الخاصه لفهد .
جلس قدام غيداء : وش فيك من امس ترجفين فيك شي انتي ؟
غيداء بخوف : هـاا .. لا لا مافيني شي بـ بس خايفه م من الطياره .
فهد : اهاا خايفه من الطياره يعني والخوف هذا من امس .
غيداء " ياربي هذا اش فيه "
فهد وهو يحط رجل على رجل : انتي لسه عروس ويبيلك اسبوع على ماتتعودين علي وبعد شهر ان شاء الله حسابي معاك عسير .
سكرت غيداء عيونها : فهد وربي انك فاهم السالفه غلط .
فهد : انا شفت كل شي بعيوني ماراح اكذب عيوني وكل اللي شفته يدل على انك قليلة ادب وماتربيتي .. بنت نصرانيه اشلون بتصير اخلاقك .
غيداء بقهر : والنصرانيه هذي والله ولا مره شفتها بحياتي عشان اخذ اخلاقها او عاداتها .
فهد : طيب اش فيك عصبتي انا قاعد اكلمك بهدوء ليش كل هالعصبيه .
غيداء : اسلوبك يخليني اعصب .
مسك فهد يدها : غيداء خلي الامور هاديه بيننا احسن احنا عرسان والى 4 اشهر الجايه عرسان وقدام الناس حياتنا زينه لو احنا نعيش بجحيم تسمعين لو ميدو تسألك عن حياتك .. تقولين حلوه واحلى حياه بعد وانا مايخفى علي شي لو قلتي لها اي شي راح اعرف .
هزت غيداء راسها بإيه : حاضر .
فهد : والله ياغيداء لو تقولين لأحد انه بيننا مشاكل وانا ما ابيك لأقلب لك حياتك جحيم .
غيداء : ماراح اقول لأحد .
فهد : اللي بيننا مايطلع لغيرنا فاهمه ؟ حتى اهلك لايعرفون بأي شي .
غيداء " هذي البدايه الله يعينني عليك يافهد شكل درب العنا قدامي طويييل "
فهد وهو يترك يدها : غيداء انتي عارفه ان ابوي جابرني عليك وانا ابي افهمك اني ما ابيك عشان ماتنصدمين مني .
غيداء ودموعها متحجره بعيونها : خلاص فهد ارجوك خلاص .
فهد : لا ياغيداء انا ابي كل اوراق حياتك مكشوفه قدامك ما ابيك تنصدمين بالواقع اللي تعيشينه .
غيداء وهي تمسح دموعها : انا تعودت على العذاب والحياه هذي مو غريبه علي .. بس خلاص لاتجرحني .
فهد : اذا كلامي هذا جرحك اجل الله يعينك على الجاي وانا عارف ان حياتنا ماراح تستمر اكثر من 6 اشهر .
حست غيداء انها مو قادره تتنفس وقامت من عند فهد وهي تبكي وجلست بعيد عنه وخلت لدموعها الحريه .
فهد " ان شاء الله انه كلامي خير لها اخاف تبني احلامها وامالها معاي وانا ماراح اسعدها "
وقف فهد عند الشباك وطالع بالسحب المتراكمه " ياربي ساعدني "
صحت غيداء من نوبة البكاء المريره وقامت وغسلت وجهها ورجعت لمكانها وخذت المرايه وحطتها قدامها وحطت كحل اسود داخل عيونها وروج زهري وسكرت شنطتها وطالعة بفهد اللي واضح عليه انه متضايق .
تذكرت مدى " ياحبي لك والله اشتقت لك لي يوم ماسمعت صوتك "
رن جوال فهد : الوو .
سامي : هلا بك ياطويل العمر .. احجز لك على فندق ولا بتسكن بفيلتك ؟
فهد : لا بروح للفيلا .
سامي : خلاص انا انتظرك بالمطار .. كم بقى وتوصل ؟
فهد : تقريبآ نص ساعه .
سامي : توصلون بالسلامه ان شاء الله .. مع السلامه .
فهد : مع السلامه .
وقفل جواله لأنه المكالمات بالجو ممنوعه وخطره .
هبطت الطياره بمطار ميونخ وكان بإستقبالهم سامي وطلعو للسياره وركبو فهد وغيداء وراء والحرس قدامهم وبينهم ستائر .
فهد : الحين احنا بنروح لميونخ .. اتمنى تعجبك .
غيداء " اشلون تعجبني وانا معاك ؟"
طلع فهد زقارته وشغلها ونقث الدخان وغيداء طالعته بذهول " معقوله فهد يشرب دخان ؟؟"
وصلو للفيلا ونزلو وفهد مسك يد غيداء وسحبتها منه بقوه وصارت تمشي وراه فتح الباب .
وانذهلت غيداء من البيت اللي هي بتسكن فيه شهر حلو مرره " ولا كان في الاحلام اشوف بيت كذا اشلون وانا بسكن فيه "
فهد : ادخلي اش فيك تسمرتي .
انتبهت غيداء لنفسها ودخلت معاه .
***
كان خالد جالس مع اصدقائه بالاستراحه طلع القلم اللي بجيبه وكتب على الورقه
محبوبتي يا ناس للغير " مخطوبه ! ??"هز الحشا مركاد والخافق اتسلم!
هذا حكم ربي! .. والأقدار مكتوبه .. !! حدن يباركله وحدن له يسلم!
..
ياليتها لو كانت اليوم " مغصوبه ".. العيون وسط الناس هي لة وانا اتألم !
ياويل عين اللي فقد شوف "محبوبه" .. الكون كله من بعد شوفته " أظلم ".. !!
..
من البارحه يا ناس عايش في " غيبوبه "!!
من صدمتي لليوم موب قادر " أتكلم ".. !!
مشاري وهو يقطع الورقه : خلاص هي تزوجت مو مخطوبه وبس .
خالد بحزن : عارف بس مقهور من ابوي اشلون يزوجها وانا ابيها .
مشاري : ليه ماقلت له انك تبيها اتوقع انك ولد عمها واولى بها من الغريب .
خالد : بس ابوي وافق ولا خلاني اتكلم ولامعاي فرصه اكلمه .
مشاري : وابوك بعذره فيه احد بيرفض فهد اليحيى ؟
خالد : واللي انا مستغرب منه ابوي ما سأل عن فهد ولا قاله بيسأل وبعد فهد متأكد ان ابوي موافق ملك بنفس اليوم .
مشاري : هو متأكد انه مافيه احد بيرفضه وابوك مو سأل عنه هو يعرفه قبل لايخطب بنته مو لازم يسال .
خالد : آآآه ياقهري على بنت عمي راحت مني برمشة عين .
مشاري : انت الغلطان وتحمل غلطتك ليش ماقلت لأهلك من زمان انك تبيها ؟
خالد : كنت واثق ومتأكد ان ابوي مابيزوجها إلا لي .
مشاري : الله يهديك يا اسير الحب .. انت حظرت زواجها ؟
خالد : ايه حظرته وغصب عني.
مشاري : ياخي وش مشقيك بالحب هذي نهاية اللي يحبون اما تتزوج اللي هو يحب ولا تموت .
خالد بعصبيه : قاعد تستهبل علي انت ؟
مشاري : لا والله ما استهبل بس اخفف عنك .
خالد : مشكور نقطنا بسكاتك ماطلبت منك تخفف عني .
مشاري بمزح : الشرهه موب عليك علي انا اللي مقابلك ومخلي الشباب .
خالد : يكثر خيرك روح للشباب بجلس بروحي .
مشاري : خالد والله اتكلم جد لاتجلس تفكر فيها خلاص هي تزوجت .
خالد وهو يوقف : حتى انا ان شاء الله بتزوج الزوجه اللي تنسيني حبي لغيداء .
مشاري : ايييه فكر خلك مثل الاوادم .
***
صحى فهد من نومته وشاف غيداء نايمه ع الكنبه ودخل دورة المياه واخذ له شور ولبس بنطلون اسود ماركة كولكشن وبلوزه رمادي من نفس الماركه ونشف شعره اللي يوصل بنص رقبته ورجعه وراء وتعطر من عطره john varvatos ولبس ساعة جست كفالي لونها اسود ووقف عند غيداء : غيداء .
فتحت غيداء عيونها : هممم .
فهد : يله اصحي بنطلع نتغدى .
غيداء : كم الساعه وصلاة العصر جات ولا لسه ؟
فهد وهو يجلس على طرف الكنبه اللي غيداء نايمه عليها : لا صلاة العصر باقي عليها ساعه ونص يله قومي بنطلع الجو رهيب .
قامت غيداء وخذت لها شور ولبست بنطلون جينز ازرق من ماركة فرساتشي وبلوزه ابيض بنص فخذها وجففت شعرها الأسود الناعم ورجعته وراء ولبست سبورت ابيض وطلعت للصاله تمشي بهدوء وقف فهد وهو يتحاشى النظر لها كانت جميله بمعنى الكلمه : انتي بتطلعين بالشارع كذا ؟ ولا شكلك متعوده على الشوارع بالشكل هذا ؟
بلعت غيداء ريقها : خـ خـلاص بروح البس عبايتي عبالي الوضع هنا يختلف عن السعوديه .
فهد بعصبيه : لا مايختلف ربي موجود ويحاسبنا على كل صغيره وكبير سواءً هنا او في السعوديه .
دخلت غيداء بالغرفه وخذت عبايتها ولبستها ولفت طرحتها وخذت شنطتها وطلعت ومسك فهد يدها وهي ترجف .
فهد : خلاص مايحتاج تتغطين بس لو تحطين مكياج تتغطين اوك ؟
هزت غيداء راسها : اوكي .
طلعو من القصر اللي من افخم قصور ومبانئ المانيا واشر فهد ع البودي قارد : go .
مشو وراه من بعيد .
غيداء : وين رايحين ؟
فهد : بنروح نتمشى المطعم قريب من هنا والجو رهيب ونمشي كذا احلى من السياره .
مشت غيداء معاها وهي تتمنى انها ماعرفت فهد " متى نرجع "
فهد : شكلك متضايقه يا غيداء .. فيك شي ؟
غيداء : لا مافيني شي بس كنت بسألك امي وين ساكنه ؟
فهد : اهااا وبديتي تقربين لأمك ؟ وش بتوصلين له ياغيداء ؟
غيداء بصوت مخنوق : بس ابي اشوف امي لو من بعيد لبعيد انا شفتها طوال 20 سنه اللي عشتها يمكن نص ساعه .
فهد شفق عليها : خلاص امك ساكنه ببرلين وبكره ان شاء الله اماني بتجي وتروحين معاها وتشوفين امك .
غيداء : لا لا انا ما ابي اروح لها .
فهد : والله ماعرفنا لك مره تقولين بروح لها ومره تقولين لا انتي اتوقع تختبريني اوافق ولا لا .
غيداء : لا ماقصدي بس انا ما ابي اروح لها ببيتها اكيد هي تعرفني وانا ما ابيها تعرفني .
فهد : ليش ؟ فيه وحده مثلك قلبها من حجر ماتبي تشوف امها ؟
غيداء وهي توقف وتطالع بفهد : لاتفسر الكلام على كيفك .. وامي نصرانيه ومايشرفني اني اجلس معاها .
سحبها فهد معه : حسابي معاك اذا رجعنا للبيت ولاتنرفزيني احنا بالشارع .
مشت غيداء معاه وهي تحاول تسحب يدها اللي ماسكها فهد وبقوه وهي تألمها .
دخلو مطعم kadewe وجلسو بزاوية المطعم اللي تطل على الشارع .
نزل رذاذ المطر وغيداء تطالع القطرات اللي ع الزجاج وفهد يطالعها .
جاب الويتر الاكل ووزعه ع الطاوله .
واخذ فهد الملعقه وبدا ياكل : ماتبين تتغدين ؟
طالعته غيداء : لا .
فهد : من امس ماكليتي شي اكلي ع الاقل اشربي عصير لاتموتين وتصير المصيبه على راسي .
غيداء : مالي نفس وما ابي اكل خلاص .
فهد : انتي مافيه احد مثلك اللي اعرفه العروس تستحي ثاني يوم بعد زواجها ويمكن الى شهر وهي تستحي انتي ماتستحين نهائيآ .
غيداء : والله انت اللي تنرفزني وتخلي المؤدب يقل ادبه .
ضحك فهد : المؤدب عمره ماقل ادبه .. ولاتضنين انك مؤدبه ومحترمه وانتي طالعه بالشارع .
غيداء : اوووف .
فهد : واقعك المر مافيه منه مفر وراح اذكرك باللي سويتيه الى اخر يوم بعمرك .
غيداء : انا ماسويت شي غلط فهد بليز لاتخليني اطلع عن طوري انا لسه ماسكه اعصابي .
فهد : وليش هو انتي عندك اعصاب ؟
طالعته غيداء وهي رافعه حاجبه : اي انسان عنده اعصاب واحساس ومشاعر وكرامه .
فهد : وفيه ناس يضيعون كرامتهم على حساب سعادتهم .
غيداء وهي تسند ظهرها ع الكرسي : اش تقصد ؟
فهد : قصدي عارفته زين وانا ما اقصد بكلامي الا انتي .
غيداء : ترا محد عرف بالموضوع إلا انت وانت اللي رحت تشهر فيني عند اهلك .. عمي لسه ماعرف بشي .
فهد بينرفزها : عارف ان عمك ماعنده خبر ولاكان قتلك وافتكيت منك وعشت حياتي مثل ما ابي مو مقيد .
غيداء بقهر : عيش حياتك مثل ماتبي .. اش عليك مني .
فهد : تلعبين علي ياغيداء يعني مايهمك امري ؟
غيداء : ومن انا عشان يهمني امرك يا استاذ فهد ؟
فهد : زوجتي يعني امري يهمك واتوقع اي وحده محترمه وتصون بيتها وزوجها يهمها زوجها ولا انتي متبلدة احساس ولا الاحساس منعدم عندك ؟
غيداء : لا انا عندي احساس وعندي مشاعر وكرامتي تمنعني ما اهتم لواحد مايبيني ولا انا ابيه اش اللي يخليني اهتم لأمره .
فهد : ايه شكلك ماتعرفين الاصول صح انك زوجتي وعلى ذمتي ومن اولى اهتماماتي بس ما ابيك وانتظر اقرب وقت ارتاح منك .
غيداء : طيب انا تفكيري غير وانت غير واتوقع انه مجرد ما ادخل بيتك بصير صاحبة البيت واكيد بهتم ببيتي .
فهد : ايه عارف بيتي هو بيتك بس زوجك تهتمين فيه ولا لا ؟
غيداء : لا .. انت امرك مايهمني كم مره قلت لك .
فهد : على فكره بنات الاصول عمره ماصار تفكيرهم كذا .. وانتي مو بنت اصول امك نصرانيه وانتي طالعه بالشارع اخر الليل .
غيداء : انت لاتوهم نفسك انك لقيتني بالشارع انت لقيتني مربوطه باستراحتك .
فهد : ايه صح بس بالشارع استر لك .. ههههه وعمر اللي انخدش حياها مايتستر بس يله محد يعرف الا احنا .
غيداء : فهد ما اسمح لك تقول عني كذا .
فهد : انا ماتبليت عليك كل شي شفته بعيني ينطقه لساني .
غيداء : وانت متأكد من كل معلومه قلتها عني ؟
فهد : ايه متأكد وانا اعرفك اكثر من نفسك خلاص مهلة اسبوعين عرفت عنك كل شي .
***
وريف : هااا اش قلتي ؟
ولاء بابتسامه : والله انك موب سهله يابنت خالتي انا موافقه بس اشلون وهي الحين عروس .
وريف : ههههه عروس ؟ هي بنت شوارع وفهد ما ادري اش نزله الى هالمستوى يرفضني انا ويتزوجها .
ولاء : وريف موضوعك ووافقت عليه على صعوبته والطريق اللي بروح معاه صعب ولو واحد من اخواني عرف باللي اسويه راح يدفنوني وانا حيه واكون عبره للي بعدي .
وريف : الموضوع مو الى هالدرجه صعب واذا انتي استسلمتي من البدايه فيه مليون وحده غيرك تخدمني بس انا اخترتك لأنك بنت خالتي وماراح تقولين انه مؤامره مني .. وحقك بيجيك بس كم تبين ؟
ولاء : تقدرين تعطيني المبلغ اللي اطلب ؟
وريف : اطلبي من الالف الى المليون وانا راح اعطيك اجرك بس بشرط .
ولاء : اش شرطك ؟
وريف : تنجح الخطه .
ولاء : ولا يهمك الخطه ناجحه ميه بالميه وتأكدي اني ماراح اخونك او اميل عن الخط المستقيم اللي رسمتي لي وانا راح انفذ كل شي بالحرف والكلمه .
وريف : خلاص بداية الخير والاتفاق اعطيك ثلاث مية الف كاش وبعد ماتخلص السالفه اعطيك مليون واذا تبين اكثر اطلبي .
ولاء بفرحه : يعني انا بيوم وليله بيصير بين يديني مليون ؟
وريف : والله لو تبين اكثر انا حاضره بس بعد ماينتهي كل شي .
وقامت وريف وفتحت درج الكومدينو وطلعت دفتر الشيكات ووقعت شيك بقيمة 300,000 ريال : تفضلي ياولاء .
ولاء وهي تبوس يد وريف : يابعد عمري يابنت خالتي جعلني فدوه لك .
ابتسمت وريف : لهالدرجه تحبين الفلوس .
ولاء وهي تتأمل الشيك : وفيه احد مايحب الفلوس .
وريف : فيه ناس تعتبرها قرف ووسخ دنيا وانا من اولهم .
ولاء : انتي من مهدك من قبل لاتطلعين على الدنيا وانتي ثريه وبنت كبار الشخصيات ومتعوده ولا انا بنت فقر حدي الف ريال .
وريف : خلاص حبيبتي بكره اتصل عليك ونتفق على موعد تنفيذ الخطه .
ولاء : حاضر .. تشاو يا احلى واغلى بنت فالعالم .
وريف بسخريه : كل هذا عشان فلوس الحمدلله بس .
طلعت ولاء من عند وريف وجلست وريف ع الاريكه وابتسمت ابتسامة خبث " الايام بيننا ياغيداء "
طق باب غرفتها : ادخل .
دخلت مشرفة الخدم المغربيه : كُنِا نسيق الدار وماكاين تا واحد وآجات اراتشي وجقت مونيا .
وقفت وريف بصدمه : وين امي ؟
....: ماكاين تا واحد .
وريف نزلت تركض وشافت الشغاله الهنديه اراتشي تضرب المغربيه مونيا وصرخت وريف : خير اش فيكم ؟
راحت لها مونيا : سيدتي هي بتسيق الكوزينا حدايا واني ما اتيق بيها واقلقتها وجقتني وطلعت لي الدم براسي .
وريف بعصبيه : اراتشي يله انقلعي من هنا .. وانتي بعد روحي على شغلك ولو تكرر هذا يا جوانا راح اعاقبك .
جوانا : واخا .
ومشت من عندهم وريف ودخلت بغرفتها وسكرت الباب وخذت جوالها واتصلت على امها : الوو .
نوره : هلا والله ببنتي صح النوم يانوامه .
وريف بابتسامه : صح بدنك مامي .. وينك ؟
نوره : انا ببيت عمتك الجوهره اماني بتمشي ورحت عندهم .
وريف : يمه تعالي شوفي العله اللي عندي تهاوشو واراتشي خنقت مونيا وكبرو السالفه .
نوره : اووه يا اراتشي ماتنتهي مشاكلها هذي ما ادري وش الحل اللي ينفع معاها .
وريف : يمه مافيه إلا تسفرونها خلاص طالت وشمخت .
نوره : لا حرام هي تصرف على 4 اطفال اشلون انهي خدمتها وهي باقي لها سنه .. وهي طيبه المشكله بمونيا .
وريف : لا لا مستحيل مونيا عندنا من 6 سنوات ماشفنا منها إلا الخير .. ع العموم مالي فيهم دخل بس ابيك ترجعين تشوفين لهم حل .
نوره : خلاص ان شاء الله راجعه الحين .
***
مدى : والله راح اشتاق لك يادووب .
رويد : وانتي من متى جلستي معاي عشان تشتاقين لي اربعه وعشرين ساعه مع امي و ماريا ولا انا ع الهامش .
ضحكت مدى وهي تضربه بخفه على صدره : حرام عليك يا رويد والله اني احبك اكثر من حبي لماريا .
رويد بابتسامه : خلاص يا احلى خاله فالدنيا راح اشتاق لك بس متى تجون لالمانيا والله من زمان ماجيتو عندنا .
مدى : اممم احتمال انا اجيكم على اخر اكتوبر او بداية نوفمبر .
رويد : ياليت تجين بدري قبل اكتوبر عشان تشوفين آزيال .
مدى : رويد كم مره اقولك البنت ماتصلح لك مسيحيه لاتتعلق فيها .
رويد : اوووف كلكم كذا طيب انا ماقلت بتزوجها هذي مجرد صديقه بس .
مدى وهي تحط يدها على خصرها : يسلااام يعني عندك صديقه وحبيبه وزوجه ؟
ضحك رويد : لا عاد انا ثقافتي مو المانيه خالصه انا عندي إسلام وعقيده وحدي الصداقه وبس واتزوج وصديقتي تبقى مثل ماهي .
مدى : رويد وربي تنرفز طيب ماريا عندها صديق ؟
عقد رويد حواجبه وطالع بمدى : لااا لو هي عندها اصدقاء كان ادفنها وهي حيه .
مدى : طيب وليش انت عندك صديقه العاده هذي من وين جايبها ؟
رويد : كذا طبيعة البلد اللي انا عايش فيه ولازم أتأثر .
مدى : طيب اش الفايده من الصديقه هذي وانت ماراح تتزوجها ؟
رويد : لازم لي صديقه لو ماتزوجتها .
مدى : خلاص حتى ماريا لازم لها صديق .
رويد : يكفيها ولد عمتي إياد اللي اربعه وعشرين ساعه مع بعض .
دخلت ساره تركض وبخوف : مـــدى صــارت كارثه لعامر ونايف .
|
14-04-14, 08:58 PM
جديد مواضيع قسم القصص المهجورة والغير مكتملة
العرض العادي
