البارت
-2-




.
.
.






تغير كل ما فينا..تغيرنا

تغير لون بشرتنا ...

تساقط زهر روضتنا

تهاوى سحر ماضينا

تغير كل ما فينا...تغيرنا

زمان كان يسعدنا ...نراه الآن يشقينا

وحب عاش في دمنا ...تسرب بين أيدينا

وشوق كان يحملنا ...فتسكرت أمانينا

ولحن كان يبعثنا ...إذا ماتت أغانينا تغيرنا

تغيرنا ....تغير كل ما فينا

*************

وأعجب من حكايتنا ...تكسر نبضها فينا

كهوف الصمت تجمعنا ...دروب الخوف تلقينا

وصرتِ حبيبتي طيفا لشيئ كان في صدري

قضينا العمر يفرحنا ....وعشنا العمر يبكينا

غدونا بعده موتى ..فمن يا قلب يحيينا ؟؟


فاروق جويدة





.
.
.





مستلقيه على الاريكة البيضاء .. وعينيها على نافذتها ، القت نظرة على هاتفها .. ثم امسكت به
لترد بهمس: سلطانه
بحب ابتسمت: يا عيونها .. وحشيتني يا القاطعة
وهم: انتِ اكثر .. متى راجعه من السفر ؟
سلطانه: رجعت البارحة بالليل .. وش اخبارك ؟!
بروح موجعة اردفت: تعبانة يا سلطانه ..
سلطانه بحنين: سلامتك من التعب .. وش فيك يا روح سلطانه
وهم: ما اقدر أسولف لك على الجوال .. تعالي عندي
سلطانه: الحين اكلم نواف واجي لك ...
وهم: عادي تجين في هالوقت
ابتسمت بحب: لعيونك اجي ... بشوف نواف وارد عليك خبر
وهم: طيب ...





.
.
.






في الجانب الآخر

كان نائم في سريره .. لتطرق الباب وتدخل داخل الغرفة .. فتحت المصابيح واقتربت منه ، لـ تضع يديها على كتفيه: نواف ... نواف قوم اصحى
عكر صفوة ملامحه ، لـ يفتح عين ويغلق عينه الاخرى ، وبتعجب
همس: سلطانه
رفعت يديها لشعرها لتدسها
وبخجل: تقدر تأخذني لـ صديقتي وهم
نظر لعينها وبعدم استيعاب
ليردف: الحين في هالوقت
سلطانه: ايه هي محتاجتني الحين .. تكفى نواف ودني لها
نواف: سلطانه الوقت متأخر .. ساعة 1 بالليل ، اجليها بكره ويصير خير إن شاء الله
سلطانه: نواف عشان خاطري البنت دقت علي تبكي تبيني اجي لها ، تكفى لا تكسر بخاطري
تنهد وبهمس: امري لله .. البسي عباتك على ما اغير ملابسي
ابتسمت بحب له: مشكور يا اخوي ... وسامحني على الإزعاج
لـ يأخذ المخدة ويرميها بوجهها: ما بينا هالكلام .. ولبسي عباتك قبل ما اغير رأيي
سلطانه: لالالا .. الحين طيران البس عباتي..
واختفت من امام عينيه .. لينهض من مكانه ويتجه لدورة المياه ويغسل وجهه ؛ تأمل عينيه ثم سحب بالمنشفة ليمسح وجهه ...







.
.
.






بعد نصف ساعة

وقف سيارته امام منزل أبو سلميان ، لـ يلتفت الى اخته
وبهمس: متى ما خلصتي دقي علي ...
لتهز رأسها علامة القبول ، ثم امسكت مقبض الباب وفتحته ، نزلت من السيارة ودخلت البيت ، والهدوء يسكن ارجاءه .. صعدت الى الدور الثاني ، وطرقت الباب لتدخل وسقطت عينيها على جسدها



أفاقت من شرودها وبعدم تصديق
اردفت: سلطانه انتِ هنا
اسرعت إليها وحضنتها: يا عيونها .. وش فيك ؟!
وليه جالسة في هالظلمة !!
ابتعدت عنها واشعلت المصابيح ، لترى ملامح غائبه
امسكت يديها: وهم حبيبتي وش فيك !؟
نظرت لعين صديقتها وبألم: خانني يا سلطانه .. 3 سنين كنت متعشمة وواثقة فيه
في لحظة هدم كل شيء .. كل اللي بناه صار ولا شيء
وبعبرة: انا حامل منه يا سلطانه
بصدمة وضعت يديها على فمها: حــامل من جمال
وهم انتِ وش قاعدة تقولين ، مستوعبة الكلام اللي تقولينه
يعني عشان كذا قدمتوا موعد الزواج !!
بصمت وهي تهز رأسها بقبول
سلطانه: لا حول ولا قوة إلا بالله .. متى صار هالكلام
وهم: صار وانتهى .. ما ودي اخذه ما ابيه كرهته يا سلطانه .. بس مجبورة على عشان هالطفل ، ما ابيه ينولد بين ام واب مفارقين بعض
سلطانه: قلت لك 3 سنين طويلة ، بس شوفي عنادك وين وصلك
بنظرات عتاب: مو وقته ، انا ما كنت اعرف ان بسوي فيني .. تدرين يا سلطانه انه خنت عهد ابوي .. بس صدقيني مالي ذنب
سلطانه حضنتها وهي تمسح شعرها: خلاص يا وهم اللي صار شيء انتهى ، ابيك الحين تنسين شوي وتهتمين بنفسك .. ما عرفتك متغيرة كثير
ودمع لا يفارق عينيها: تعبت من كل شيء .. يا سلطانه ، وخايفة منه
سلطانه ابتسمت بحنان: لا تخافين .. قومي الحين وخذي لك شور تهدين اعصابك ، وانا بسوي لك عشاء بسيط
وهم: مالي نفس للأكل ما اشتهيه
سلطانه بعتاب: لازم تأكلين عشانك وعشان صحة الطفل
وهم وهي تشد روبها: طيب ...
ابتسمت لها: أي هذه وهم اللي اعرفها ..

ابتعدت سلطانه لتخطو بتثاقل ، وتفتح خزانة الملابس لتأخذ بجاما صوفية متجهة لدورة المياه ، لتسقط المياه وتغسل شعرها لعل برودته تطفي حرارة قلبها رغم برودة الجو ورجفة جسدها ، اغلقت المياه واخذت المنشفة البيضاء لـ تنشف شعرها الليلي ، ولبست لتخرج ثم وقفت ناحية الشرفة متأملة حديقتها وعينيها تبكي بغزارة

دخلت سلطانه وهي تضع الصحن على الطاولة .. لتقترب منها وهي تغلق النافذة
سلطانه بغضب: وهم توك متروشه وفاتحه لي شباك .. تبين تقتلين نفسك
رفعت نظرها لـ عيني سلطانه الغاضبة منها .. لتبتسم ببرود
وبهمس: عادي الجو مو بارد
وترجع بخطوات وتجلس على اريكتها المفضلة ..
سلطانه: يا ربي على تناقضك .. يدينك ترتجف من البرد وانتِ تقولين .. الجو مو بارد
ودي اعرف متى تتركين عادتك السيئة هذه .!!
اخذت شريحة من الخيارة لتمضغها وترتشف بعض الشاي ،
ثم ابتسمت: تعبتك معي .. سلطانه تنامين عندي
سلطانه: أي تبينها من الله انتِ
بـ استغراب: ما تبين تنامين عندي
سلطانه: مو عن كذا .. بس ما اعتقد نواف يوافق ، لأني صحيته من عز نومه .. اهم شيء الحين تطمنت عليك .. وبكره من العصر بكون عندك
وهم ابتسمت لها: شكرا سلطانه .. شكرا على كل شيء
تنهدت: على شنو تشكرين .. اكلي الحين وما اوصيك على نفسك ، تصبحين على خير
وهم: وانتِ من اهله .. دقي علي لا وصلتي البيت ...
وهي ترتدي عباءتها ، ثم لوحت لها بيديها: إن شاء الله





.
.
.






يوم جديد





في صباح اليوم التالي

وهي تفطر ، وهاجر انحنت لها لتسلم عليها ..
وبهمس: اخبارك اليوم
ثم سحبت الكرسي لتجلس عليها وتسكب عصير البرتقال
لترد ببرود: الحمد لله ..
هاجر: اليوم بوديك لعيادة نتطمن على صحتك وعلى صحة البيبي
وهم نظرت لعين اختها ثم اردفت: ما يحتاج .. خلينا نخلص من التجهيزات
هاجر: وهم حبيبتي لازم اتطمن على صحتك
تقاطعها بوجع: أنا بخير لا تخافين ..
هاجر: براحتك ..





.
.
.








على الجانب الآخر




ياسمين: يمه ما شفتي جمال
أم جمال: لا يا أمك هو يجلس في البيت .. يا دوب يشرف على بيته عساني اشوف عياله قبل ما يأخذ ربي امانته
لتحضنها وبحب اردفت: جعل عمرك طويل يمه ..
أم جمال: دقيتي على اخوك بدر
ياسمين: أي يمه جاي الاربعاء من لندن ..
أم جمال بحنين: الله يرجعه لي سالم ...
ياسمين: اللهم آمين .. يمه احط لك الفطور ...
أم جمال: أي يا امك وشوفي ابوك اكيد انه برا في ورشته
ياسمين: إن شاء الله يمه .. الحين اروح اشوفه ..

لتبتعد وتخطو خطوات للخارج ، حيث الورشة .. فتحت الباب لتسمع صوت القرآن يبث السكينة والطمأنينة لترى ابيها يعمل بـ احدى نجارته
ابتسمت له: صبحك الله بالخير يبه
رفع رأسه لـ يرى ابنته: صبحك الله بالنور .. قربي يا ابوك
قربت منه وامسكت يده لتقبله: شلونك يبه عساك بخير اليوم
ابتسم لها: بخير جعلني اشوفك عروس يا ابوك
ابتسمت له بخجل: بوجودك يبه .. الفطور جاهز
ليترك ما بيده ويأخذ بعض المناديل: توكلنا على الله ...

لـ يدخلان داخل الصالة ... ثم يجلس على الارض
ابو جمال: الا وين جمال يا فاطمة
ام جمال: بشقته صحى من الفجر وقال لي لا تنتظروني على الفطور عسى الله يجمع بينهم بخير
أبو جمال: اللهم آمين .. يا ابوك دقي على بنت عمك
ياسمين: ابشر يبه ...





.
.
.






في الجانب الآخر



كانت ترتدي عباءتها ، لتسمع رنين الهاتف ، تقدمت بخطوات لتمسك به
وابتسمت: هلا ياسمين
ابتسم بحنان: حي الله بنيتي .. حي الله العروس
وهم بحنين: يا مرحبا فيك عمي .. كيف احوالك عساك طيب
ابو جمال: بخير يا ابوك ، بشريني عن علومك ، عسى مو قاصرك شيء
وهم: ما تقصر عمي .. خيرك سابق
أبو جمال: وأنا عمك وراه صوتك تعبان
بخوف: ابد عمي شوية ارهاق
ابو جمال ينظر لعيني زوجته ثم اردف: وهم فيك شيء يبه .. قولي تراني حسبة ابوك
وهم بوجع: ابد عمي ما فيني الا العافية .. الله يطولنا بعمرك يا عمي وعساك ذخر لنا ولا انحرم من حنانك
تنهد: زين يا ابوك ما اطول عليك .. اهتمي بنفسك والله يوفقك
وهم وهي تمسح دموعها: تسلم عمي على اتصالك ...
ابو جمال: يا ابوك واجبي ، وأي شيء تعوزينه ما يردك إلا لسانك
وهم تبتسم: إن شاء الله عمي ...



اغلقت الهاتف لتنخرط في بكاء عميق ...
تنهدت هاجر بأسى: وبعدين يا وهم إلى متى وأنتِ تبكين ... استهدي بالله
وهم: ما ابيه احس اني خاينة .. خنت ابوي وعمي ، ليه اللي تصير لي هالمصايب
هاجر: استغفري ربك ولا تجزعين ما يجوز اللي تقولينه
رفعت رأسها لتنظر لعين اختها: اللهم لا اعتراض بس
هاجر بقسوة: من غير بس .. قومي غسلي وجهك يا دوب نلحق على الاسواق





.
.
.








بمكتبه

دخل سكرتيره ومعه اوراق ليهمس: طال عمرك ، هذه الملفات اللي طلبتها مني
ارتفعت انظار جمال له ثم ابتسم: ما تقصر يا سالم ..
ابتسم سالم: تأمرني على شيء ثاني
وهو ينظر في الاوراق: سلامتك ، تقدر تشوف شغلك ..

خرج سالم ، وحاول منع دخوله
فتح الباب بكل قوته لـ يدخل بخطوات واثقة
ثم نظر فيه بتعطرس: السلام عليكم
سالم: طال عمرك .. اعذرني هو دخل متهجم واصر إلا يدخل عليك
تفهم وبهمس: ما عليه سالم .. اتركنا بروحنا
سالم: حاضر ..
ونظر بحقد لـ جمال
رفع عينيه واردف: وعليكم السلام .. حياك تفضل اجلس
بغضب قاطعه: انا جاي هنا حتى تطلق بنت خالي وانا اولى فيها اكثر منك
ابتسم ببرود: المطلوب الحين
جاسم: تطلقها هي تستحق اللي احسن منك
ضحك بسخرية: وبنظرك مين اللي يستحقها .. لا يكون انت
جاسم: أي انا وش قاصرني دكتور ....
قاطعه بهدوء: اظن تدل الباب ..
جاسم: خارج لكن صدقني مصيرها ترجع لي
ضحك بتهكم: واثق بالحيل .. اقفل الباب وراك

ابتعد بخطوات غاضبة ليغلق الباب ...

امسك الهاتف لـ يتصل عليها ، ولكن ما من مجيب .. رمى الهاتف على الارض




.
.
.





في المساء

وهي تضع بعض الاشياء على الارض ، وترخي جسدها على الاريكة
وهم بتعب: انسي سالفة اني اطب السوق ثاني مره ..
هاجر: اهم شيء الاغراض وخلصتيها .. باقي تروحين لصالونات وتسوين تنظيفات
تقاطعها بوجع: هاجر يرحم امك فكيني .. احس ظهري متقطع .. بعدين انا مابي عرس وطقطقه
هاجر بصدمة: انتِ من جدك .. عمي حجز القاعة وزعنا الكروت
وهم: انا بكلمه يلغي لي كل شيء ...
هاجر: لا والله ، وتهقين عمي بـ يوافق على كلامك
وهم: ليه ما يوافق .. هاجر انا ما فيني اوقف على حيلي ، دخلت شهري ثاني ومتوجعة من هالحمل ... مابي عرس .. افهميني لو مرة في حياتي
هاجر: والله مدري وش اقولك .. بس شوفي زوجك واتفقي معه
ضحكت بألم: على اساس اننا متفاهمين عشان اتفق معه
تنهدت هاجر: استغفر الله العظيم .. وهم لازم تغيرين علاقتك فيه
بكره بـ يجمعكم سقف واحد ، وانتِ على عنادك هذا .. عز الله فلحتي بحياتك
وهم: ما هو عناد .. بس ماني مستعدة لزفة وزواج ، ليه ما تفهمين علي
، وبعدين تبيني انزف ببطني ، وش يقولون عني الناس ، دخل عليها قبل ما تتزوج
قربت منها وحضنتها: وهم استهدي بالله .. لا تبكين هالحمل مخليك حساسة .. ماني خابرتك ضعيفة بهالشكل
وهم: كارهة نفسي .. كارهة كل شيء من حولي
هاجر استغفرت ، ثم بهمس: قومي ارتاحي في سريرك ونامي
وهم بتعب: هاجر قولي لعمي مابي عرس
هاجر بحنان تمسح شعرها: إن شاء الله من عيوني بس ارتاحي الحين ...





.
.
.






بعد نصف ساعة


دخل البيت بخطوات مرهقة .. سمع صوت والداه ..
لـ يلتفت له وهو مستغرب: يبه ما نمت للحين !!
أبو جمال: وين يجي لي النوم .. وانت وراك جيت متأخر
ابتسم بثقل: ابد شغل الشركة والبيت .. تطمن الحين وريح بالك
شد عكازه: جمال وش صاير لبنت عمك ، ما هو صوت وهم اللي اعرفه
يبتسم بصعوبة: ابد يبه سلامتك بس تعرف خوف العروس
قاطعه بحده: من متى تكذب علي يا ولد
بصدمة: يبه الله يطول لي بعمرك وشوله اكذب عليك !!
أبو جمال: لا تغير السالفة .. وش اللي بينكم وما تبي تقوله
اقترب منه وقبل جبينه: ما بينا الا كل خير ..
أبو جمال: أي خير اللي تقول عنه ، وهي متصلة علي تبكي تقول ما تبي عرس وطقطقه ، وش وراك من علم يا جمال .!!
اتسعت عينيه بصدمة ثم تمتم ببرود: قلت لك يبه خوف العروس .. انا بكره اروح لها ونتفاهم في الموضوع ، ولا تشيل همي يا الغالي
أبو جمال: تحاول تنكر
جمال: انكر شنو .. تطمن يبه مو صاير الا كل خير
أبو جمال: الله يهديكم و يتمم لك على خير
ابتسم بوجع وقبل جبينه: تأمرني على شيء
أبو جمال: هالله الله في بنت عمك ، تراها مكسورة جناح ، ويتيمة خاف ربك فيها
تنهد ثم ابتسم له: إن شاء الله يبه ، هي في عيوني تطمن
القى نظرة صامته ثم انسحب بهدوء ...






.
.
.






يوم جديد



كانت غارقة في نوم عميق ، استيقظت على رنين هاتفها ، بكسل لتمد يديها
وتجيب وهي مغمضة العين: الو
بغضب: ثواني واشوفك تحت
فتحت عينها ثم شاهدت اسم المتصل ..
لـ تشهق: وش فيه يدق علي ، ويبيني انزله تحت بعد





فتحت الباب ودخلت عليها حليمه: ماما وهم .. بابا جمال في تحت ينتظر 10 دقيقة
عكرت حاجبيها: له عشر دقائق ، وسلمان وينه !!
حليمه: سلمان روح يلعب مع ولد جار ..
تنهدت بقهر: وش يبي .. له وجه يجي هنا !!




غسلت وجهها ثم نزلت بهدوء ، دخلت المجلس لتسقط عينيها
بـ وقوفه وهيبته ..



مرتديه قميص بحري يصل لنصف ساقيها ..
ارتفعت عينيه لـ يجد ذاك الجسد ممتلئ بفتنة ، وشعرها المهمل ساقط على كتفيها ناعمه

ليهمس بهدوء: الواحد لا دخل يسلم
تراجعت من ملامحه الغاضبة ... وجلست على طرف الاريكة
ابتسم في داخله على خوفها: وين لسانك .. اجل ما تبين العرس يا وهم
بخوف اردفت: ايه .. ما بي عرس .. مابي انفضح قدام خلق الله
مسك معصمها: انت زوجتي على سنة الله ورسوله .. وش له الكلام اللي ماله داعي
وهم ودموع تختنق بـ عينيها: أي زوجتك بس ما دخلت بيتك حتى تتحكم فيني
انت خيبت لي ظني ، انا كرهتك ...
امسك ذقنها وضغط بقوة: سلم لي على خيبة ظنك .. لا تنسين من شروطك تكون الملكة ثلاث سنين ، وهذا حقننا مطلبك تجازينا بـ ...
قاطعته وهي تضربه على صدره: ابعد عني .. يوم طلبت ثلاث سنين عشان افهمك
قاطعها بضحكة: السنين مرت وانا من حقي اطالب بحقوقي ..
بكت بوجع: بعد عني .. خاف ربك .. ما ابيك ليه ما تفهم
ابتسم بوجع: جاهل فيك تدرين عاد ، عناداً فيك في عرس
غمضت عيونها بوجع وألم أسفل ظهرها ...
ابتعد عنها وهو يتأمل وجهها المرهق: وش فيك
اغمضت عينها بوجع ، ورغبة قوية في تقيئ ، ودوران الارض من حولها لتسقط بين ذراعيه ...





.
.
.



نهاية البارت الثاني






اعوذ بالله
من قبضة القلب وضيق النفس ، وبكاء الروح
- لا إله إلا انت سبحانك اني كنت من الظالمين


.
.

عمر الغياب

السلام عليكم مواجع
مثل ماتوقعت ان جمال دخل على وهم بالملكه يعني زوجها حلالها هو عرفا وحسب التقاليد مكروه لكن شرعا هو زوجها والخطأ خطأ من وافق ان تكون الملكه 3 سنين
بالنسبه لي ورأي الشخصي ان طول وقت الملكه مافيه خير ابد
احب تكون الملكه قبل الزواج بفترة بسيطه شهر بالكثير مع قلة المكالمات والزيارات هذا رأيي

بالنسبه لجاسم وشفيه جامدرعم على جمال وليه بكل بجاحه يجي يطالبه بالطلاق

حبيت علاقةوهم بصديقتها ومساندةالصديقه لها مهماكان
موفقه يارب

صباح الخير .. يسلمو على البارت الحلو مع انو تمنيت يكون اطول والاحداث اكثر .. بس ان شاء الله الايام الجاية بتكون في احداث وشخصيات اكثر


سلطانة

انا رايي مثل البنات مهما كانت الصداقة المسألة مو حياة او موت لدرجة انو بنت تصحي اخوها من عز نومته وتروح بيت صديقتها توقعت نواف بيكون اعقل من هالثنتين .. وسلطانة عندها وهم اهم من اخوها الي نايم ؟؟؟

تصحيه علشان شي تقدر تأجله للصباح ماخافت عليه يصيبه حادث شهالاستهتار .. لو الموقف يتطلب بنعذرها بس الموقف جدا مايستاهل

والشئ الثاني مين سكن مع وهم ماعرفنا شي كيف تدخل سلطان وتنزل تسوي العشاء يعني البيت مافيه ناس غير الخدامة ووهم وسليمان الي قالت عنه .. نحتاج توضيح حتى نستوعب الاحداث بشكل مقبول ومايشطح خيالنا بعيد


جاسم

شهالوقاحة الي فيه جاي للرجال طلق حرمتك انا ابغيها .. وانا احسن منك هو كيف عرف انو وهم ماتبغي جمال .. علشان جاي واثق الاخ .. مايعرف انو الي سواه مايجوز ويمكن هذي مو اول مرة لانو ردة فعل جمال مومتفاجئ وكان بارد يعني جاسم صار له موقف مشابه واعتقد هذا سبب من اسباب جمال انو ياخذ حقوقه .. وجات من صالحه الحمل بس مااعتقد جاسم راح يتنازل عن الي براسه على طول بمجرد انو يتم الزواج

وهم وجمال


وهم مو عارفين الحين سبب كرهها هل لانو جمال دخل عليها وصارت حامل منه ولا علشان علاقاته .. ماكانت واضحة بحكيها .. وبعدين طالما هي زوجة جمال امام الله ماعليها ذنب ولا هو عليه اصلا الزواج مجرد مظاهر واعلان للزواج لعامة الناس ولا هي متزوجة وعليها حقوق مثل مالها

وبعدين عذرها لتطويل فترة الملكة جدا تافه اغلب الي يتملكون ست شهور سنة بالكثير ويتممو الزواج كيف بتعرفه وهي ماعاشت معاه بصراحة عذرها ابد مو مقنع .. ومو من حقها بعد هالمدة تحرم ام جمال وابوه من فرحة العرس

انانية بتفكيرها همها نفسها ومشاعرها تحمد ربها غيرها يغدرو فيهم ازواجهم بمجرد ماياخذو حقوقهم بالملكة يطلقو ولا يهتمو ببنت الناس ولا يخافو من رد الدين بخواتهم

العناد مو وسيلة ولاتتوقع انها اذا دخلت بيته ومنعت نفسها عنه وعاندت برضي ربها لازم احد من هاجر او سلطانة الي عارفين عنها كل شئ يوضحو لها هالنقطة ... اذا زوجها تنازل عن حقوقه ماعليها شي بس اذا لا بتلعنها الملائكة ..

اذا هي فتنة مثل ماوصفتيها بصراحة ماينلام جمال ثلاث سنين مانع نفسه من حلاله وهي تتغلى وتدلع بحجة التعارف مايعجبني البنت الي تماطل في هالمواضيع غيرها يملك ويتزوج على طول وهي ثلاث سنين لكن العتب مو عليها العتب على الكبار من ابوها وغيره الي وافقوها .. هذا وهي ميتة بحبه على قولتها اجل لو كارهته كم مدة الملكة بتكون ..

كيف وحدة بالشهر الثاني تقول الناس بتشوف بطنها اول مرة اعرف انو الحمل يبان قبل الرابع او بداية الخامس يعني اذا تزوجت بدون حتى زواج عائلي الناس مابتشك ولا بيتكلمو فيها

بصراحة هي الي بتفتح على نفسها ابواب بتصرفاتها والدليل عمها وشكه من مكالمة اجل لو زارها وشاف الي مسويته بحالتها مستحيل مابيطلب تفسير ..

دام الي صار مو حرام ولا يغضب رب العباد لاتجهد عمرها بالتفكير والي قاعدة تسويه وبدل كل هذا تدعي ربها يتم الموضوع على خير ولا يصير شي يمنع الزواج قبل مايبان حملها وتتحطم نفسيتها اكثر

وجمال محتاجين منه تفسير لجميع تصرفاته ... وهل ممكن بيوم يتحقق كلام جاسم وتصير وهم حرة وتتزوجه ...


في انتظار البارت القادم

السلام عليكم
هلابك عمر الغياب وحيااك بيننا قصه ممتعه بس هالوهم تشد الاعصاااب انا كل ماقالت انا تعبانه
خفت قلت الله يستر لا تسقط والا يجيها نزيف وتنفضح من قلب
الله يستر علينا وعلى حبايبنا صحيح هالشي حلال بس دامها مو في بيته الف فكره وفكره
بتدور براس الناس ودام هالشي صار المفروض تتقبله وتحافظ على نفسها لايصير شي
قبل الزواج لاتحمد عقبااه
ان شاءالله تمر ايام الزواج على خير ولا يجيها شي >فيس قلقان

جمااال .. الله يهدااك يعني مالقيت الا هالطريقه علشان ترضى وهم بتقديم الزواج والا السالفه انتقااام
عموما الحكي بالماضي نقص بالعقل والحين اهم شي انك تداريها مو تعصب عليه ولاتنسى انها بفتره وحم وهالشي يتعب نفسيتها فحاول وانا امك تراعي مشاعرها >فيس الام الحنون ههههههههه
وتاكل تبن اذا تكلمت مو كافي انك السبب باللي هي فيه >فيس قلب عليك هههههه


عمر الغياااب ..تسلم الايادي يالغاليه بس تكفين عجلي بالزواج لايصير بهالخبله شي ونبلش
عاد هذيك الحزه وش يرقعها
باانتظااارك ..

السلام عليكم ورحمة الله وبركاته

عذراً على الاسبوع ولكن كنت مضغوطة دراسياً ...
في واجبات ومشاريع ... بإذن الله غدا سـ يتم تنزيل البارت الثالث من الفصل الاول

علمًا ان لكل فصل 5 اجزاء / بارتات

البارت القادم ، نقله كبيرة في الاحداث ، حيث لا متوقع
شخصيات جديدة سوف تظهر لكم بـ التدريج ..


اشكر جميع من تابع / شاهد روايتي
الذين خلف الكواليس ألقي الضوء هنا وضعي ردكك

ردودكم هي الحافز لي ....


اشوفكم في الغد ~