قطر والامارات

كان في بنت اسمه مها طالبه توها متخرجه من الثانويه ، طالبة سنة أولى ، مها من الطالبات المجتهدات في دراستهم ، مستعدة تتخلى عن اي شي الا الدراسه ، وكانت تبعد نفسها عن اي شي يشغلها ، في يوم من الايام طلبت منهم المعلمه انه ينزلون برنامج الكيك يسهل على الطالبات التواصل وحل البروجكتات مع بعض ،
مها تسأل رفيجتها : انا يالله يالله استخدم البلاك بيري الحين طحنا فبرامج ، من المستحسن تعلميني لا اتعلق بكشتها تقصد المعلمه

ترد عليها رفيجتها هند : سهل يالخبله ، هاتي ارويج .
تسحب هند الايباد من يد مها وتقعد تراويها شلون تضيف ، خمس دقايق تمر
المعلمه : اجوفكم باجر بنات وعليكم امتحان هي اجنبيه لكن ترجمنالكم
مها: هديني عليها وهي تضحك وتسحب يد هند
هند : مع نفسج وتاخذ ورقه وقلم وتكتب حسابها على الورقه وتقول : لما توصلين البيت ضيفيني
مها: بطرف عين طيب وبصوت عالي بنات كتبولي حسابكم وبطرش للكل استفهام واللي تبي سؤال حق امتحان باجر تسأل

* مها وصلت للبيت كالعاده الغدا انسحب عليه ، راحت غرفتها ونامت وقامت على صلاة المغرب وصلت ، نزلت وفتحت الايباد وقعدت تضيف البنات ، وتطرش للكل استفهامات وقعدو البنات يسألونها

ويدخل اخو مها ويسحب يدها ويقلبها ويسالها : منو عمممممج ؟
مها : فك المهم مو انت فك لا اصرخ انادي امي
اخوها : اول شي قولي اسفه عمي ويرص على يدها اكثر
مها تبدا تدمع : انت عمي ، اسفه عمي هد والله يعور
اخوها يهد يدها ويعطيها نظرة انه قوي ويطلع
مها بصوت خفيف : وجججعة جدي ، كسر ان شاء الله ، قسم بالله دفش

وترد تجلس وتمسك الايباد ، وتطالع الا ياينها استفهام
سألت مها : منو انتي ؟
الحساب الثاني : انتي من ؟
مها : منو؟
الحساب الثاني : انا محمد
مها بخاطرها هذا كيف جا عندي وبصوت مسموع هذا مو حساب مريم
محمد يد يطرشلها : منو انتي ؟
مها: ولا احد ، مع السلامه

*وتسكر الايباد وتروح تجلس مع اهلها ، وتشتكي على مزح اخوها الثقيل لأمها
ام مها: انتي اللي تروحين عنده تستاهلين
مها : والله العظيم هو اللي جا انا كنت ادرس
ام مها: انتي واخوج انا مايخصني
مها : مب حاله
ام مها تطق عظمة ايدها ام مها مريضه مصابه بالسكري وسبب لها فشل في نص اعضاءها الداخليه وسبب لها خلل في عينها اليسرى ، مها تناظر امها وتقول بروح انام بكرة كليه
ام مها الله يوفقج : ولاتنسين دواج مها فيها السكري لكن مو خطر مثل امها
مها تبوس راس امها وتصعد حجرتها وتصيييييح ضيق لانه امها تعبانه وتخسرها يوم بعد يوم وموعارفه شتسوي

* ثاني يوم الصبح ، مها تقوم على منبه التلفون ، وتروح وتقوم خواتها وتنزل لامها وتقول لها انهم قامو وتروح تسبح وتتعدل للكليه ، توصل الدريوليه وتدق على تلفون مها رنه ، مها: يالله يمه طالعه انا مع السلامه تبوس راس امها وتطلع

توصل الكليه تفتح الايباد مكتوب : انت ضايفتني من رقمي او ايميلي ؟
مها: شو هم ؟
محمد يكتب ارقامه رقم امريكي ، ورقم قطري ويكتب ايميله
مها تطالع الشاشه وتقول : الحمدلله والشكر ، وتكتب : لاماعرف
محمد : تعرفيني ؟
مها بخاطرها شبلاه هذا ما يفهم وتطنش

مها تمتحن وتخلص تلف على رفيجتها مريم وتسالها : انتي شو حسابج فالكيك ؟
ترد عليها مريم مع اختلاف حرف واحد عن اكاونت محمد

مها ترد البيت وتلاقي محمد حاط استفهامات وتعجب ، قالت بتششوف

كتبتله : اسفه غلطت فالحروف
محمد : متاكده ما تعرفيني
مها فخاطرها من كثرهم : هيه والله ما اعرفك

تاخذ محمد و مها السوالف يسولفون عن بعض ، صارت الساعه وحده فليل ، ومن عادة مها ما تتاخر فالنوم ام مها تدخل على مها : شفيج مطولة يالله روحي نامي بكرة كليه
مها : ثواني يمه وبسير
تطلع امها وتظل مها تسولف ويا محمد لين 4 الفجر ، وفجاه نامت مها بدون ما تقول لمحمد

ثاني يوم الصبح ، ام مها : مها ، مها قومي انا قلتلج لا تسهرين
مها : الساعه كم ؟ وتقوم ركض تتجهز
ام مها : لا تنسين دواج
مها وهي بسرعه بسرعه : حااااااضر وتدق الدريوليه على مها
الدريوليه : انا برا يالله طلعي

* مها تسحب الجوتي وتحط مكياجها فالشنطه ، وتركض للسياره ، وتبدا تتعدل فالسياره
الدريوليه : اول مرة تتاخرين
مها : راحت علي نومه

وصلو للكليه والا مها ناسيه بطاقتها التعريفيه لدخول الكليه وتدق على امها وتقول كنت عارفه بتنسينها حطيتها بملفج
مها : وتلوميني احبج
ام مها بدلع : واضح اصلا سكتي ودخلي
مها : ما تلحق تقول مع السلامه ينقفل الخط بوجهها وتقول : عادي اصلا عادي

تدخل مها الصف وتفتح الكيك وتلاقي محمد كاتب : وينج
مها : سوري نمت ما حسيت
محمد: لا عادي اصلا الحين فليل ويمكن انام
مها : اوك نام ولما ارد البيت بنتكلم
محمد : اوك

مها تظل تفكر : سبحان الله كيف ضفته بغلط مادري مها تموت على القطريين وهي اماراتيه

توصل مها البيت وم تنام ، وتظل تكلم محمد يوم و يومين وثلاث، وصارت تسهر معاه ، صار يوم مها كله تتكلم مع محمد ، وعن تفاصيل يومها ومحمد خلى مها اللي ما تاكل تاكل ، وبعد كم يوم جا عيد الاضحى ، مها ومحمد يعيدون على بعض

محمد يموت ع اليهال وكان يخص بكلامه بنت اخت مها وكل يوم مها تطرش صور بت اختها له ، وتطرش صور الصغاريه ،
مها تضحك كثير ، محمد قال لمها : شفيج ؟
مها : بسم الله ، شفيني
محمد : لا احس فيج شي
مها : هههههه مافيني شي

بعد كم يوم وهم يتكلمون ، مها تنفجر عند محمد بكل الي ضايقها من سنين ، محمد : ارتحتي بعد ما فضفضتي
مها : احسن

كثير من التفاصيل حذفت

بعد فتره محمد : مها بقولج شي
مها : محمد فيني نوم بكلمك بعدين
محمد : طيب ، بس ابي منج وعد
مها : على!!
محمد : ابيج تاكلين زين وم تتضايقين
مها : وعد، وفخاطرها انت موجود وين اتضايق

وتروح تنام ، ثاني يوم بعد الكليه ترد مها وبد حوار لين نص الليل ، تذكر انه محمد قال بيقولها شي
مها : محمد شو كنت تبا تقولي امس ؟
محمد : ولا شي
مها : والله ، تقول
محمد : اوف كله تحلفين ، زين
مها : انزين
محمد : مها انا عندي بنت
مها : متزوج ؟
محمد : لا
مها : مطلق ؟
محمد : لا
مها راح تفكيرها بعيد : علاقه ؟
محمد : لا
مها تفكيرها ابعد : انت بنيه ؟
محمد : لاااااااا شو
مها : اوف ، عيل متبني ؟
محمد : لا ، غبي انا ؟
مها : لا متزوج ولا مطلق ولا علاقه ، كيف عندك بنت ؟ عيل خاطب ؟
محمد : تقريبا
مها : اهاااااااا عندك حبيبه هههههههههههه
محمد يخبر مها السالفه كلها ، مها تقرا وفخاطرها الف ليش و ليش
وتقول ما بضايقه
محمد : كرهتيني
مها : ههههه لا ليش وعسا الله يهنيكم ويفرحكم ولو ما فرحتها ياويلك ،
محمد : ههههه اكيد
مها وفخاطرها خنقه : جب بروح انام
محمد :مها : بقولج شي باجر
مها : اوك

وبعد كثيرماتقلبت مها ع الفراش وهي تفكر ، بعمري ما كلمت ولد ولما كلمت جيه يصير ، سبحان الله بس

ثاني يوم بعد حوار طويل مها تدمع عيونها وتضحك مع محمد
يقولها محمد : مها انا بحذفج
مها وفخاطرها ، لا، مابي ، يومي بيصير فاضي ، اوف لكن ترد : اوك
محمد : بنكمل 24 ساعه بعدين نحذف بعض
مها : اووك

وفهاليوم ضيق مها الف ، قلت كلماتها ، تصلي وتدعي ، وتختصر كلامها
محمد : مها لو بعدنا وكنتي تبين تكلميني بشي ضروري ، كلميني
مها: لا محمد ، مابي ، عشان لازم اتعد ما اكلمك
محمد : يعطي مها رقمه ، دقيلي لو في شي ضروري
مها : لا بليز من تحذفني ، ينتهي كل شي اصيرلك ذكرى وتصيرلي ذكرى

في خاطرها لو عندي باب توصل معاك ، راح اكذب عليك بس عشان اكلمك ، خلاص محمد يروح ، مابي له شي ابيه بس ذكرى ما اشاركها احد

بعد 24 ساعه مها في مطاعم الكليه ، وقت الحذف ، تصيح مها لكن ترسل ضحكات لمحمد وتوصيه على عمره ، ويوصيها ، محمد يتكلم ومها تسكته وتقول احذف وانت ساكت وتكتب الضحكه
محمد : مها
مها : ما بزيد ولا حرف يا محمد خلاص احذف ، وتضحك
محمد : طيب ي عصبيه ههههه
محمد : مها ، لا تصيحين وكنه حس بدموعها

وحذفو بعض

مها ، بدت حصتها وتناظر الايباد تعودت تكلمه تبتسم وتقول

راح الغالي ومن دون ما يعرف وش في مغليته
عساه في حياته يتهنى ، ولو بيدي ما هديته




جمع محد ومها 9 ايام بالضبط وصار الكثير ، يمكن احساس مها حب ، او غلا ، من كثر ما تكلموا حسو انهم مكملين كثير ، محمد ماعاد يدري عن مها ، ولا عاد مها تدري عن محمد ، لكن قلب مها يذكر محمد ، ويمكن " عقل" محمد يذكر مها


مو كل فراق حزين بعض الفراق ، عن اراده ، وعن حب ، وعن شوق، لكن انت تختار الفراق ،

فراق ذكر خير
ولا فراق وجع قلب

في حالة مها محمد فراق خير لكن مع وجع قلب