كاتب الموضوع :
الشجية
المنتدى :
القصص المكتمله من وحي قلم الاعضاء
رد: رواية هذا قدرنا ان رضينا وان زعلنا / بقلمي
الجزء الثالث
بعد ما لبست خرجت من غرفة التبديل ودرت حول نفسي وبإبتسامة وش رايك
تركي بحب : قمر ما شاء الله بس
جوري : لا تبسبس اف
قربت منها وسحبت يدها جلستها جمبي وحطيت يدي بظهرها : بس الظهر خالع
جوري : يوووووه تروك
قربتها زود لامست بيدي كتفها ونزلتها بنعومة لين اصابعها : وهذا كله خالع
حاولت اقوم ورجع سحبني جوري بزعل : اتركني
لامست بيدي ركبتها لين اصابع رجلها : وبعد هذا خالع انتِ حاسة انج لابسة
جوري بطفش : ابعد يا تركي
سحبتها لحضني وحطيت يدي بشعرها وجيت بتكلم وقطعت علي
جوري بقهر : لا يكون شعري خالع
تركي بضحك :ههههههههههههه ايه خالع ليش قصيتيه صار يبين ظهرج
ضربته بصدره بكل قوتي جوري : اهبل
تركي بحنية : يا حياتي افهمي انا ما ابي هاذي الملابس تنلبس لغيري صدقيني قلبي يحترق اذا احد شافج فيها
جوري : يعني وش البس وش ذا النكد الي فيك
تركي : لو تبين الحين اطلعج السوق بس هذا لا
جوري بدلع : تروكي عشاني
تركي بحزم : لا
جوري : بالله حتى المكياج ساويته الحين تبغاني امسحه واعيد
تركي : لو تبين انادي لج الكوافيرة
حاولت ابعد عن حضنه جوري : اتركني خنقتني
تركي بحنية : زعلانة
جوري : ايه
بعدتها عن حضني تركي : ازعلي لكن هاللبس ما تخرجين فيه
جوري تتخصر وتقلد صوته : بطلع غصب عنك
تركي واهوا رافع حاجب : بسوي نفسي ما سمعت
جوري قربت من اذنه وبصوت عالي : بطلع فيه
تركي بحدة : قد كلامج
جوري بعناد : ايه
تركي بحزم : تعرفين انه ما يهون علي اصرخ فيج ولو احد قال كلامج هذا كان قطعته اوصال بس انتِ غير بالنسبة لي وبختصار ما في طلعة
جوري برجاء : لا لا اسحب كلامي خلاص ببدل
تركي : ما في طلعة
جوري : تكفى تروكي
تركي واهوا كاتم ضحكته : لا
جوري واهيا تضرب الارض برجلها : تكفى
تركي : بشرط
جوري واهيا تحط اصباعها خلف اذنها : شنو
تركي : تفتحين الحين المصحف وطلعين لي الآية الي تتكلم عن اللباس وتشرحيها
جوري ( دايم يا تركي تحرجني وتبين انه في اشياء كثير اسويها خطأ وتخليني اطلع المصحف واكتشف من جد اني على خطأ ) : خلاص لما نرجع
تركي بعناد : الحين
جوري بإستسلام : طيب
( قال سبحانه وتعالى : ( وَلا يُبْدِينَ زِينَتَهُنَّ إِلاَّ لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ
بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوْ التَّابِعِينَ غَيْرِ أُوْلِي الإِرْبَةِ مِنْ
الرِّجَالِ أَوْ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاءِ وَلا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ وَتُوبُوا إِلَى اللَّهِ
جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ )
في هذه الآية حددت عورة المرأة امام الرجال الاجانب الا وهي قال ابن مسعـود رضي الله عنه : الزينـة زينتان : فالظاهـرة منهـا الثياب ، وما خفي الخلخالان والقرطـان والسواران .
و عـورة المرأة مع المرأة كعورة المـرأة مع محارمها ، لا كعورة الرجل مع الرجل فلا تُبدي لمحـارمـها ونسـاءها إلا
مواضع الـوضوء والزينة ، وهي : الوجـه والـرأس والعنق واليدين إلى المرفقين والقدمين .)
************************************************** *******
ام جراح : خلصتي باقي شوي وتلاقيهم هنا
شجون : ايه خلصت
ام جراح بنبرة سخرية : الا وين الي ما تتسمى
شجون : حرام عليك يمه البنت طيوبة وعسل وتدخل القلب بسهولة
ام جراح بقهر : ماني قادرة ابلعها احس وراها شي قلبي ابد مب مرتاح
شجون : بالعكس يمه ومع اايام بترتاحين لها وتقولين شجون قالت
ام جراح : المهم وينها
شجون : طلبت مني انزلها المطبخ ونزلتها
ام جراح : كيف طلبت منك مو اهيا بكما
شجون : قصري صوتك يمه تخيلي طلعت وسمعتك طلبت مني عن طريق الكتابة
ام جراح : ايه زين
************************************************** **********
رشا : تعالوا المخزن بالليل
فهد : يعني وصلت البضاعة
رشا : ايه وصلت و راح اعطيكم كمية بسيطة لين ما ترجعون هيثم لــــــــــــــــــي
فهد بطفش : اوك اسبوع وهيثم يكون طرطور عندك
رشا بضحكة : لا يكفيني انه يحبني بس لاتتأخرون مرة
فهد : ليش
رشا : عندي سهرة
فهد : مع مين
رشا : واحد ما تعرفه وبعدين ترى اسئلتك كثرت ياليت تحتفظ فيها لنفسك
فهد بسخرية : من اي نوع السهرة
رشا بمياعة : لا تخاف فهودي سهرة عادية مب مثل ما انت فاهم
فهد ( مالت و ليش اخاف محسستني اني ميت عليك ) : اوك يلا باي
رشا : تشاو
************************************************** **
بعد ساعتين في مجلس البنات :
سارة : طيب يعني ما عندك اخوان
هزيت راسي بلا وبدأت الدموع تتجمع بعيني
غمزت لسارة البقرة بأنها تسكت شجون : ملاك وش اللون الي تحبيه
كتبت بالدفتر وردي
شجون بإبتسامة : مثل اخوي غويزي دايم وانا صغيرة كنت اضحك عليه واقوله اللون الوردي للبنات انا احب اللون الاصفر حيل
حلا : اقول رغدة وش فيكِ اليوم متكبرة علينا تعالي اجلسي معانا
رفعت عيني لها وبإستخفاف رغدة : ترانا بنفس الغرفة وتصدقون عاد سديتوا نفسي بروح الحديقة ابرك لي
شجون : شفيك بسم الله ما كانت حلا تقصد شي عالعموم انتِ تدري انه العزيمة فيها رجاجيل يمكن لو خرجتِ للحديقة احد يشوفك
سارة : يا هو شجون تقول هالكلام
رغدة ببرود : ما يهموني
شجون : استخفت الحمدلله والشكر
و اردفت : وليش ما اقول
سارة : افتكر اول ما كان يهمك
شجون بإبتسامة : زمان اول تحول
************************************************** *********
خرجت من الغرفة وبيدي شنطتي وانا ضايق خلقي ما كنت ابي هالطلعة خرجت من القصر من الباب الخلفي وجلست بالحديقة من الخلف ابي انعزل شوي ما ابي احد يتكلم ابي اروق ضايق خلقي حيل طلعت الدفتر من الشنطة وبديت اكتب
************************************************** *********
ام هيثم : ما شاء الله عليها بنت مين
ام جراح : بنت صديق زوجي توفى الله يرحمه
ام هيثم بحزن على ملاك : الله يرحمه يعني اهيا وحيدة
ام جراح : ايه بس سبحان الله من يوم ما جات عندنا وانا ما احس بالراحة اتجاهها
ام هيثم : الله يهديك ليش تقولين كذا بالعكس وجهها منور سبحان الله وجمالها ما ينوصف
*********************************************
وصلنا للمخزن بتخفي ولقينا رشا :
راشد بصوت واطي : كم صندوق
رشا : عشر صناديق مقدر اعطيكم اكثر ابوي بيكشفني
راشد واهوا يشيل صندوق: لا عشر تكفي
رشا : على وين
راشد بإستغراب : بوديه السيارة
رشا : ما اشوف هيثم رجع لي
فهد : لا تخافين كلها اسبوع واهوا عندك
رشا : وش يضمني وبعدين ابي افهم كيف بتردوه لي
فهد : الي يضمنك انه مكسبنا بيدك وكيف نرده خليه علينا اهم شي يرد لك
سكتت وبدينا نشيل الصناديق وندخلها للسيارة وشوي الا وصل مهند
مهند : خلصتوا
فهد بسخرية : ايه بدري ما شاء الله
راشد : مهند بتآخذ معاك صندوق
مهند : لا ما ابي خليه عندكم وكل يوم بآخذ كمية بسيطة
راشد : اوك
في السيارة :
راشد : لازم نتصرف ونرد هيثم لها
فهد : ياخي علة وتسد النفس رامية نفسها عليه وبكرة وبعد بكرة عندي مقابلة مع بنات وبعدهم راح نسوي السحر
راشد : وين نخبيه
فهد بمكر : في بيتهم
راشد بإستغراب : تستهبل انت و وجهك في بيتهم على طول يكشفونا
فهد : لا في مكان ما يخطر ع البال
راشد بإهتمام ركن السيارة على جنب : يعني وين
فهد : في ...........
************************************************** **
بمجلس الرجال :
طلال بضحك : من زمان ما كلمتني عن جوليت مدري ليلى
مشاري واهوا رافع حاجب : جوليت حبيبتي منعتني اتكلم معاها اصيلة فديت قلبها
طلال : هههه اكذب على نفسك شكلك ما دخلت مزاجها
ظليت اتذكرها يوم كانت مريضة بالكباين والشهر الي قضيته معاها بالمستشفى آه يالبيه يا مشاعل
طلال : ههههييييييه وين رحت يا رجال
مشاري بهيام : فيها
طلال : يا زود غبائي يوم فتحت السالفة
************************************************** ******
دخلت المجلس انا و فهد :
راشد و فهد : السلام عليكم
رد الجميع : وعليكم السلام
قربنا وبدينا نسلم عليهم شخص شخص وانا اسلم انتبهت ناصر ابو عذاري وش هالصدف اجل يوم الكباين هي جات معاهم وانا اول
ما رحت وسلمت على الرجال ولو رحت كان شفت ابوها قربت منه ورفع عينه
دخل واحد للمجلس وانا كنت اتكلم مع ابو مشاري ماسمعت الصوت كويس ولو سمعته كان عرفته ويوم قرب يسلم و رفعت عيني تفآجأت بأنه
راشد راشد الي عذب بنتي ذوقها الويل جابها للبيت جثة بس تبكي الله لا يسامحك الله ياخذك الله يعذبك مثل ما عذبتها
راشد بنبرة سخرية : شخبارك يا ناصر
بعد لك عين تنطق ناصر كذا وكأني كبرك
ناصر : الحمد لله بخير
راشد : شدعوه حتى ما تسأل عن الحال
جلست وطنشته آه يا بنيتي لو شفتيه وش راح يصير فيك وعنده ولد ولا كأنه عنده ما ادري هذا الانسان من ايش مخلوق ايش حقه تتزوج دامك مانت بقد المسؤولية والله ولدك يقطع القلب يوم يسأل عنك ونقوله سافر ويقول متى يرد
مشيت وكملت سلام لين ما جا دور جراح مديت يدي اصافحه وبقيت يدي معلقة بالهوا لمدة دقيقة وبعدين نزلتها وسلمت على الي بجنبه هين يا جراح حسابك معاي معرفتني زين
************************************************** ************
غازي : السلام عليكم
الجميع : وعليكم السلام
سلمت على الجميع رغم اني ما اعرفهم وكل ما سلمت على واحد ابوي يعرفني عليه يوم وصلت عند واحد اسمه ناصر طلع اسمه مطابق تماماً لاسم
لعذاري لا تكون بنته جلست بجنب اخوي جراح رغم انه مب طايقني
غازي : جراحوه
جراح بدون نفس : خير
غازي : الرجال الي اسمه ناصر كم عدد اولاده
جراح : وش يهمك ما عنده اولاد عنده بنتين و وحدة من بناته متزوجة تركي الي جالس بجنب
قطع عليه غازي : ايه عارفه والبنت الثانية
جراح بإستغراب :شفيك تسأل البنت الثانية مطلقة من راشد
غازي : الي جالس قدامنا والصياعة تقطر من عينه
جراح بضحكة صاخبة : ايه
غازي : اخيراً تكرمت وضحكت عنده ولد منها
جراح : ايه يا حليله مدري وينه الا وينك من اول ما جيت تسلم
غازي : كنت اجهز حق شغلي
جراح : خلاص نعتمد ونقول دكتور غازي
غازي بإبتسامة : شفت الأحلام تتحق
جراح واهوا يناظر للبعيد : مب دايم
غازي : كون متفائل وش هذا التشاؤم
جراح بسخرية : مب تشاؤم لكن في اشياء كثيرة تتحطم والقليل ينجح
غازي : صرت تتكلم بالالغاز
جراح : بنظرك هاذي الغاز هي اشياء بسيطة ما يحس فيها الا الي عاشها وتعايشها
قطع عليهم صوت جوال جراح :
جراح : الو .... ايه .... من خلف القصر ..... بحفظ الرحمن
ناظرته غازي : شفيه
جراح : وصل العشا من خلف القصر و كراتين البيبسي والسفن من قدام
غازي : طيب بقوم اساعدك
جراح : لا انت صاحب العزيمة اجلس خليهم يتمعنون فيك
غازي بضحكة صاخبة : ههههههههههه حسستني اني عروسة
جراح رفع حاجب : والله مدري كيف انت بتصير دكتور شكلك ناجح بمقبول
اردف : او بواسطة
جلست رجل على رجل : الحين سنين عمري ضاعت وانت تقول بمقبول تذكر دايم واحنا صغار اجيب نتيجة اعلى منك
جراح : ايه اعترف كنت تجيب اعلى ومع ذلك مقتنع اني اذكى
غازي : واكسل وحدة شجون
جراح بإبتسامة تبين اسنانه : مع مرتبة الشرف المهم بروح اشوف العشا ضيعت الوقت
قمت وجيت بخرج بس عطيت راشد نظرة سخرية له عين يجي بعد الي ساواه والله ابد ما عنده كرامة نمسح فيه البلاط يوم خرجت خرج من الحمام
( اكرمكم الله ) تركي ابتسمت له وناداني
تركي بإبتسامة : وش عندج مستعجل
جراج : العشا وصل
تركي : طيب جاي اساعدج
جراح : لا ارتاح
تركي : شدعوة ما كأننا نتعامل بالشركة يا بعض كثير واعرفج زين
جراح : عيل براحتك انا بروح خلف القصر عشان آخذ العشا واعطيه الخدم وانت روح من قدام في بيسبسي وسفن
تركي : ابشر
************************************************** ****
رحت لخلف القصر للباب الخلفي و فتحته الرجال يعطوني التباسي وانا ادخلها يالله ابوي ماشاء الله كم تبسي طلب وش ذا كله شكرتهم وقفلت الباب اخذت واحد من التباسي وكنت رايح للمطبخ شفت بنت راسها على الطولة و واضح انها نايمة ما كنت حابب اطالع فيها بس شعرها نفس لون شعر رغدة واهيا صغيرة حطيت التبسي على الأرض وقربت بهدوء وطلعت صح رغدة وش نومها هنا كنت برجع بس في شي شدني شفت دفتري على الطاولة وبجنبه قلم الظاهر انها كتبت بالدفتر طيب وش وصله لها ما طولت بالتفكير اخذت الدفتر وفتحته قلبت بصفحاته وبجد حصلتها كاتبة
بخطها الناعم الراجف بديت اقرأ كلماتها حاولت افهمها بعكس الطريقة الي فهمتها لكن للأسف مب قادر الكلمات واضحة جداً
في الصفحة الأولى :
ِِ لماذا يا شيماء ِِِ
أحبك .. ومازلت أحتفظ بك كالسر في أعماقي
ومازلت أحتفظ بك كالنبضة في قلبي
ومازلت أحتفظ بك كالأمنية في خاطري
ومازلت أحتفظ بك كالجرح في داخلي
أحبك .. ويرعبني أن يأتي الشتاء وأنت بعيدة
ويرعبني أن يتفتح ورد الربيع وأنت بعيدة
ويرعبني أن تغيب الشمس وأنت بعيدة
ويرعبني أن تنتهي سنوات عمري
وأنت لست معي
ووللاسف بيديك انهيتها ايتها الحبيبة
الصفحة الثانية :
~ سألتمس لك العذر ايتها الحبيبة ~
أحبك .. ويأخذني الحنين إلى وجهك
فأبكيك
ويأخذني الحنين إلى صوتك
فأبكيك
ويأخذني الحنين إلى حنانك
فأبكيك
ويأخذني الحنين إلى حضنك
فأبكيك
ويأخذني الحنين إلى أيامك
فأبكيك
أحبك .. وأخاف أن أشتاق يوما
فلا أراك
وأخاف أن أفتقد وجودك يوما
فلا أراك
وخاف أن أشتهي عيونك يوما
فلا أراك
وأخاف أن أحن إليك يوما
فلا أراك
واتى هذا اليوم دون الوداع
الصفحة الثالة :
* احبك شيومتي *
أحبك .. وأخاف أن أكبر ولا تكوني بجانبي
وأخاف أن أبكي ولا تكوني بجانبي
وأخاف أن أمرض ولا تكوني بجانبي
وأخاف أن أموت ولا تكوني بجانبي
أحبك ..وكل الأشياء بعدك فقدت طعمها
وكل الأشياء بعدك فقدت لونها
وكل الأشياء بعدك فقدت عطرها
وكل الأشياء بعدك فقدت وجودها
اعترف بأنني في غيابك جسد فقدت روحها
الصفحة الرابعة :
<< إلى متى سيطول الغياب >>
أحبك .. ولا يدرك مقدار هذا الحب سواي
ولا يدرك حجم هذا الحنين سواي
ولا يدرك مرارة هذا الحزن سواي
ولا يدرك عمق هذا الجرح سواي
أحبك .. وأعلم أنك آخر من سيعلم
وأنك آخر من سيشعر
وأنك آخر من سيدرك
وأنك آخر من سيأتي
وانك من نهاني بفرقاك
الصفحة الخامسة :
$ نا وانتِ جسد ينبض بالحب $
أنا و أنتِ الموج والبحر
أنا الليل وأنتِ القمر
أنا وأنتِ القلب و الصدر
أنا الربيع وأنتِ الزهر
أنا وأنتِ العين والبصر
أنا العود وأنتِ الوتر
أنا وأنتِ الروح والعمر
أنا الورق وأنتِ الحبر
أنا وأنتِ الألم والصبر
شنو هالكلام واضح مثل وضوح الشمس مصرحة عن حبها لبنت وكل ما افتح صفحة اشوف التصريح باين بطرية اكبر اجل بذاك اليوم بالمستشفى لما سمعتها تقول احبك وسحبت الجوال كانت تكلمها طالعتها للحظات ما ني مستوعب لو كانت تحب ولد كنت بقوم الدنيا وانا مستوعب الي يصير حولي اما بنت وبنت ما هي بداخله عقلي يعني سحاق انقلاب عن الفطرة ما اصدق يا رغدة ما اصدق من متى ؟ وكيف ؟ وليش ؟ وعشان ايش ؟ ومين هاذي ؟ ونسيتي حب طفولتنا ؟ تكيت يدي على الطاولة واخذت القلم وكتبت بغلاف الدفتر
مشيت من عندها وبديت ادخل التباسي للمطبخ من الباب الخلفي ما اصدق انتظرتها سنين وسنين وآخرتها تحب بنت كيف هان عليها عرش الرحمن يهتز كيف هان عليها تنقلب عن فطرة الرحمن كيف هان عليها تكتب بدفتري هالكلام كيف هان عليها تنسى حب الطفولة الواضح انها ما قرأت كلماتي وهذا الافضل لانها ما عاد تعنيني غرزت خنجر بأضلاعي ونست حبي الوفائي وش ابي فيها راح احاول اتناساك رغم النسيان اصعب آمالي بضيع اوقاتي بأشغالي و بحرق حبك بالنار
************************************************** *****
في مجلس الرجال :
مهند بإبتسامة : سلامتك ما تشوف شر
هيثم : الشر ما يجيك
مهند : بروح اجلس مع عمي
هيثم بشك : انت فيك شي غريب شفيك اربعة وعشرين ساعة مع ابوي
مهند : ابد ما في شي بس صرت اشتغل عنده وكذا وبعدين اشفيك علي قلت لك اني اهتديت
هيثم : الحمدلله
مشي مهند لابو هيثم و قرب بندر من هيثم
بندر : هيثم ابي اقولك شي
هيثم بضيق : بندر ما ابي اسمع منك شي
بندر بحدة : غصب بتسمع
هيثم وهوا رافع حاجب : لا والله
بند : السالفة بإختصار
قطعت عليه هيثم : قلت ما ابي اسمع
بندر بغضب : بتسمع كل الي سمعته في عمارتكم كذب
هيثم بعدم استيعاب : وش هو الكذب
بندر : اني خطيبها
هيثم : خطيب
قطعت عليه بندر : ايه ما ني خطيبها وقصر صوتك لا يسمعنا احد
هيثم بفرح : بندر جد تتكلم
بندر بحزن : ايه جد
هيثم : طيب ليش كذبت بذاك اليوم
بندر : لأني لو ما قلت كذا كان راح تصير هواشه وترى ابي اقولك شي ثاني بس ما ينفع هنا
هيثم : شي مفرح ولا محزن
بندر : مفرح
هيثم : طيب اقابلك بكرة 5 العصر
بندر : زين
************************************************
في مجلس البنات :
شجون : بروح اساعد امي
جيت بقوم مسكت بيدي ملاك
شجون بإبتسامة : تبين تجين معاي
هزيت راسي بـ ايه
مسكت يدها ومشيتها معي للمطبخ جلستها على الكرسي
شجون : غريبة امي مب موجودة بروح اناديها خليك هنا
هزيت راسي بالموافقة
خرجت للحديقة عشان ادور ميساء ويزن من اول بالحديقة شفت تركي يحمل كراتين قربت منه
جوري : حبيبي
التفت وشفت جوري تركي بإبتسامة : هلا حياتي لهدرجة وحشتك ما تبين تنتظرين لين نرجع البيت
جوري : مآخذ بنفسك مقلب ليش تحمل الكراتين تعب عليك خلي البودي قارد يحملونها
تركي : تخافين علي
جوري بخجل : واذا ما خفت عليك اخاف على مين
قربت منها وطبعت قبلة بخدها المورد
تركي : فديت الخوافين
جوري : لا جد ثقيلة عليك خلي احد يشيلها عنك
تركي : والله جراح يحب يسوي كل شي بيده ولو شافني خليت البودي قارد بيقول لا تساعدني
جوري : خلاص لا تساعده
تركي بضحكة : هههههه ترى ما صار شي كله كرتون شكله الحلوين رضوا علينا
توي اتذكر اني كنت زعلانة منه جوري بإنكار : وش رضيت بس شفقت عليك وكلمتك
تركي : علي
جوري بإستغباء : وش عليك
تركي وهوا يضيق عينه : تستغبين
جوري واهيا تشتت انظارها عشان ما يكشفها : لا
تركي : طيب براضيك بالبيت بطريقة جسدية
قربت منه وضربته بصدره جوري : قليل ادب
تركي بضحك : ههههههههههههه ما تعودتي من زمان وانا كذا
اعطيته ظهري وانا امشي : ولا راح اتعود
قربت منها وسحبتها لي بحيث صار ظهرها بصدري ويدي على بطنها همست بأذنها : اجلسي لين ما اخلص
حاولت افك يده جوري بخجل والحمرة تعتلي لصدرها : فكني ترى احنا بالحديقة مب بالبيت
تركي : بفكك بس اجلسي لين ما اخلص
جوري : طيب اوامر ثانية
تركي بإستفزاز : ايه
جوري : مع نفسك يا عمي
تركي لفها عليه و بغمزة : عمك ها بسمعك شعر
جوري واهيا تحاول تفك نفسها : تروك مو وقت اشعارك وبعدين اشعارك كلها ماسخة
تركي بضحكة : هذا اكثر شعر محترم احم احم استعدي
متغطرسه لو قصر الوصف تختص باهدابها لسان القصيده تقصه
هيكل يبي عالم تضاريس مختص يوصف مدرج خصرها للمنصه
متقسمه كل شيء خارج عن النص وجارت على فستان ملزم بنصه
الكعب يوم الخصر من كتفها ارتص الردف رص الساق والساق رصه
مشي المهار ايقاع وان عثرت وغص تك تك تك تك تتكتك طار نصه
الساق الايسر زلت تكتص تكتص تعرج وصدر القافيه فيه غصه
جوري وجهها احمر وحار من الخجل : تركي ابعد
تركي بضحكة صاخبة : ههههههههههههههههههههههههههههههههههههههههههههههه
جوري : اقسم بالله انك قليل ادب
تركي : ابي افهم وين قلة الادب زوجتي وحلال علي
جوي واهيا تحاول تفك يده من خصرها : تركي المكان مب مناسب
تركي فكها : طيب الوعد بالبيت
شفت الشغلات مب منتبهين ومشغولين صبيت لي بالكاس موية وقربت من عند الشباك الزجاجي الكبير وظليت اناظر الحديقة آه اشتقت لقصرنا آه يا حقير اكيد عايش حياتك وفرحان مب انا موجودة عند ناس ما اعرفهم بس للحاجة كله منك عذبتني الله يعذبك كان في الحديقة رجال يحمل كراتين وكان معطيني ظهره ومب شايفته شوي وشفت جوري تقرب منه وطالعها لا ماصدق طاحت الكاسة من يدي من كبر الصدمة شردت منك وآخر شي اشوفك ما اصدق عيوني يا تركي
************************************************** ******
حلا : رغدة رغدة قومي وش نومك هنا
رغدة : هممممم
حلا واهيا دقها بكتفها : قومي قومي
رغدة لا حياة لمن تنادي
حلا : اف
رحت لاحواض الزرع وبللت يدي ومسحته بوجهها
رغدة واهيا تتحرك بإنزعاج فتحت عينها و رجعت غمضتها
حلا رجعت تحرك رغدة : رغدة و وجع قومي
رغدة فتحت عيونها ببطأ : ها قمت وش تبين
حلا : وش منومك هنا
رغدة واهيا تطالع المكان : والله مدري كنت اكتب وبعدين نمت
حلا واهيا تسحب الدفتر : وش تكتبين
رغدة : حلا هاتي الدفتر
حلا بإستغراب : استني وش ذا الكلام
رغدة قربت منها وطالعت الغلاف : مدري
حلا واهيا تأشر على الدفتر : شوفي مكتوب ولد عمك جراح
رغدة بشهقة : ياويلي
حلا بإستغراب : ليش
رغدة بخوف : جراح عصبي وهذا دفتره والظاهر شافني نايمة هنا وشاف الدفتر وكتب فيه
حلا بضحك : هههههههههههههههههه من قالك تآخذين دفتره
رغدة : هاتي خليني اقرأ
حلا مدت الدفتر لرغدة حلا : اقرأي بصوت عالي بسمع
رغدة : طيب
* ضيعتني من يديك و أنا اللي مجنون فيك ياخسارة حبي فيك ضيعت أحلامي بيديك
* ليه الهوى مزروع دربه بالأشواك ؟ ليش النهاية في المحبه كئيبه ؟
* أبكتب خيانتك وبدونها بدفتر أشعـاري وأقول أكرهك أكرهك باولها وتاليها
* خنجر و أحسه بين الأضلاع لا هو ألي ذابحني ولا هو ألي قويته .
دام حبي لك ما توغل بالأعماق ما ضنتي تنفع مع كتابتي
* غدار ماريدك ولا أريد شوفتك خلاص قلبي تاب عن حب غدار
وكل كلمة خطيتها بأقلامي بدفتر احلامي لاتصدقيه
بحرق كل ملفاتي وكتاباتي بنسى ماضي الضبابي
لاتصدقين كتاباتي صارت مجرد ماضي
ولد عمك جراح
حلا : شفيك جمدتي وش كاتب
رغدة ملتزمة الصمت وتطالع الكلمات بصدمة
حلا : اقرأي شفيك
رغدة بدأت تفتح الصفحات الي كان كاتب فيها
************************************************** ******
في مجلس الرجال :
مهند : عمي اذا فاضيين بكرة انا واهلي جايين عندكم
ابو هيثم : حياكم الله
مهند بإبتسامة عريضة : الله يحيك يالله انا استأذن بروح البيت
ابو هيثم : الله معك
قربت من العجيزان وقبلت راسه ومشيت وسمعت دعوته : الله يرضى عليك يا ولدي
ههههههه وقسم بالله عجيزان مسكين ولا اختي الضعيفة ولا حلا الي مصدقة اني احبها واهوا مجرد اعجاب ولو طفشت ببدلها بغيرها
************************************************** ***
كان بأول صفحة :
اليوم بكتب عن حب طفولتي << رغدة >> بنت عمي
اول شي بوصفها
اموت على شعرها لونه بني طويل واهيا صغيرة قلت لها يا ويلك لو كبرتي وقصيته وقالت طيب
بس مدري وفت بوعدها او لا لكن الاكيد انها وفت احب عيونها الخضر وبياض بشرتها الي تنقلب
حمرة لما تخجل دايم واحنا صغار كنت العبها بس عقلي كله كان معاها مب مع اللعب اعترفت لها
بحبي لما صارت اول متوسط وبعدين غطت علي ما ادري اذا تذكر هالشي وان شاء الله تذكر خليها تخلص
دراستها و راح اتقدم لها ربي يوفقها
انصدمت حيل هذا الدفتر كان يكتب فيه كلام لي انا وهوا الحين زعلان يعني قرأ كلامي الي كتبته لأبلة شيماء واخذ فكرة غلط عني للاسف جراح انا قصيت شعري ونسيت كلمتك من زمان بس ما ابيك تزعل علي ما ابيك تضايق ما ابيك تشيل بخاطرك علي الحب ارق تعب عذاب اعترف بأني حبيتها غلط واعترف بأني حقيرة يوم نسيت حبك لي و وعدك لي وكلامك العسل بس ما ابيك تزعل ياربي ليش حظي كذا انا وش خرجني لبرى كاتب اذا قرأتي الكلام لا تصدقيه يعني اهوا زعلان وشايل بخاطره علي طيب كيف اراضيه بس انا احب ابلة شيماء لكن هالحب خطأ كأني لو حبيت جراح بيكون حب صح بس جراح رجال و ولد عمي وكاتب بخطبك لكن زعل طيب وش اسوي
قطع علي التفكير حلا واهيا تسحب الدفتر مني
رغدة بعصبية : حلا ارجوك ما ني بفايقة حق هبل هاتي الدفتر
حلا بطفش رمته بوحه رغدة ومشت واهيا تتحلطم
مشيت من عند رغدة وانا حدي معصبة وطفشانة و شوي الا صقعت بواحد رفعت عيني :
حلا : آ آ آسفة
مهند بإبتسامة عريضة حتى بانت اسنانه : عادي ما صار شي
جيت بمشي ناداني بدون مالتفت حلا : نعم
مهند : طالعيني
حلا : بأي حق وانا مب لابسة حجابي
مهند بجراءة قرب منها وهمس بإذنها : بحق انه بكرة جايينكم وبتصيرين خطيبتي قريب فخلينا نسبق الأحداث
مشيت وانا منزلة راسي و وجهي احمر و احس بحرارة عالية وتوتر وبرجفة شعور حلو وبنفس الوقت مخيف
اخيراً يا حلا بتصيرين لي مليت تمثيل عشان احصلك
************************************************** **************
تعشيت وحمدت ربي : الحمد لله الذي أطعمني هذا ، ورزقنيه من غير حول مني ولا قوة قمت وغسلت يدي وصعدت لغرفتي اخذت الشريط واتصلت
على بندر بعدر رنة وحدة رد :
شجون : السلام عليكم
بندر : وعليكم السلام
شجون بضيق : تعال خلف القصر راح تحصل باب مردود ادخل وبيكون في مسبح اجلس هناك ودقايق وبجيك عندي موضوع مهم
بندر بإستغراب : حاضر اختي
شجون بحدة : لا تقول اختي مرة ثانية ما يشرفني اكون اختك
سكرت بدون ما اسمع رده رحت لعلاقة الملابس اخذت العباية ولبستها ونزلت بهدوء من المصعد قربت من الباب الخلفي للقصر لبست الغطوة اليشريتها قريب من السوق و رحت لباب المسبح الي فتحته الشغالة بأمر مني ودخلت وسكرت الباب عشان محد يشوفني معاه
وقفت بعد ماكنت جالس على الكرسي بندر بإبتسامة : نعم وش فيك زعلانة علي
شتت نظراتي بعيد عنه لانه ابتسامته حيل تربكني شجون بنبرة سخرية : تسأل ليش زعلانة
بندر ومازالت الابتسامة على محياه : ايه شفيك زعلانة
بينت يدي الي كانت خلف ظهري و رميت الشريط بوجهه شجون : عشان هذا
طالعت الشي الي رمته علي وطاح بالأرض وكان شريط مكتوب عليه بندر ليكون شريط فضحيتي لا ياربي من بين كل الناس اهيا الي شافته ليش اهيا ليش
كيف اخذتيه حسيت بخطواتها رفعت عيني وشفتها متوجهه للباب بتخرج بندر : شجون لازم تفهمين
شجون بصراخ بدون ما تلتفت : رجاء لا تنطق اسمي اخاف تلوثه
قربت منها شوي وبقي بيننا مترين تقريباً بندر : لازم تفهمين
شجون بضيق واحساس بالغثيان مسكت مقبض الباب بتفتحه : رجاء ما ابي افهم شي
عصبت حيل من تطنيشها لي مسكت يدها االي على مالقبض ولفيتها لي بقوة واهيا جسمها متكي على الباب حصرتها بيدي من الجهتين بندر : لما اقول شي تسمعينه غصب ووياويلك لو لفيتي ظهرك علي
شجون بخوف ومكابرة بنفس الوقت : مين انت عشان اسمع كلامك واحد سافل
رصيت على اسناني من العصبية وحاولت التزم بالهدوء قد ما اقدر بندر : شجون لازم نتفاهم وبعدين انتِ احكمي مثل ما تبين
شجون ببكى وخوف وصوتها متقطع : ما ابي اسمع شي
بندر بحنية : ليش تبكين الحين
شجون برجاء : رجاءً بندر ما ابي اسمع شي هالسالفة تخوفني حيل وتكدر خاطري رجاءً قفل عليها
يالله هالانسانة كيف تتلاعب بأعصابي بندر والشرار يطلع من عينه : انا وش قلت راح تسمعين كيف تحكمين من علقلك
شجون بإستسلام : تكلم
بندر : مرة زارني ...................
ما احلل نقل الرواية بدون ذكر اسمي ( معذبني حبك )
ولا ننسى اخواننا بسوريا
اللهم انصر المسلمين في سوريا بنصرك وأيدهم بتأيديك وأمدهم بجند من جندك واربط على قلوبهم وثبت أقدامهم ويسر أمورهم ووفقهم واحفظهم يارب العالمين.اللهم عليك بطاغوت سوريا وكل من طغى ودافع عنه، اللهم اقذف الرعب في قلبه ، اللهم صب عليه سوط عذاب ، اللهم ارنا فيه عجائب قدرتك وعذبه عذابا شديدا في الدنيا والآخرة عاجلا غير آجل ، وأرنا فيه بطشك وعقابك الذي لا يرد على القوم المجرمين ، واخسف به الأرض واجعله عبرة للعالمين.
اللهم عجل بهلاكه اللهم عجل بهلاكه اللهم عجل بهلاكه
|
30-06-13, 03:09 PM
جديد مواضيع قسم القصص المكتمله من وحي قلم الاعضاء
العرض العادي
