اليوم كان يوم الأمهات ولو بتشوفوا شو صار معي
من الصبح الهاتف ما وقف عن الرنين كل شوي حدا يتصل يباركلي بالعيد
دخلت عند جارتي لأشرب فنجان قهوه ويا سلام كل شوي يدق الباب ويطلعلي حدا من ولادي يقول

بسرعه ماما في حدا عالتلفون بدو يحكيكي وأنا إركض حتى إلحق المتصل قبل ما يقفل الخط وبقيت هيك ثلاث مرات كل ما إمسك فنجان القهوه ينادولي وبآخر مره قلتلن إذا حدا إتصل قولولو ماما نايمه وتعبانه ورجعت كمل فنجاني وجارتي تضحك عليي رفعت إيديي وصرخت ما كان هالعيد وما كان فنجان القهوه أحسن شي تجيبي القهوه وتطلعي لعندي حتى نشربها على رواق وبعد ما شربنا القهوه رجعوا نادولي رفعت إيديي للسما وقلت
يا رب يديم الأعياد حتى أحبابنا يسألوا عنا
وهيدا يللي صار معي اليوم والتلفون ما وقف عن الرنين
هيدي باقه ذهبيه لقلوب أمهات من ذهب

أحلى صباح مدونتي وكل يللي بيقراها

اليوم الأربعاء ومثل كل يوم نفس الشي تنظيف وترتيب وشغل ما بيخلص الله يعين كل إم ويقويها حتى تقدر تكمل واجبها تجاه ولادها وعيلتها
وأخيراً رجعوا لولاد عالمدرسه وخلصت العطله الله يحميهن

مسا الفل لكل يللي بيطل وبيلقي نظره على كلماتي البسيطه
مر وقت وما دخلت وكتبت أي كلام حاسي جواتي مليان كلام بس من كثر ما أنا مشغوله مش قادره ركب ولا جمله مفيده مثل وكأني فاقده التركيز بس اليوم قررت أكتب وخاصه إني اليوم بكمل 22 سنه زواج والحمد لله كانوا مثل العسل

مسا الفل أحبتي
اليوم قرأت جمله لفتتني

لولا نعمة النِسيان لأصبح الكثير منًا مجانين

كلمة نسيان كتير متداوله حتى صرنا نكرهها وبتسبب لنا مشاكل
وبالرغم من هيك بنتمناها أكثر الأحيان لمًا بتكثر مشاكلنا حتى نقدر ننسى الواقع الصعب يللي بنعيشه بهالأيام وإلاً بننجن
هههههههه عمركن شفتو أكثر من هيك تناقض ؟؟؟؟

مدونتي العزيزه وكل يللي بيمر ويلقي نظره مسا الانوار من زمان ما دخلت تلهيت بامور الحياة حتى نسيت اجمل واكثر شي بحبه وغالي على قلبي الكتابه
بس للاسف ما بلاقي وقت خاص فيني دايماً وقتي مقسم على كل يللي حواليي الله يحميهن
انا متاكده اني مش لوحدي بحس بقلة الوقت وكل ستات البيوت بيفكروا مثلي الله يعين كل ما كبروا الاولاد بتكبر المسؤليه وما بدي شي من رب العالمين غير الله يحميهن وتكون ايامن حلوي ويرضى عليهن رضا قلبي