الآ ليت الزمان يعود

1




في مدرسه ثانويه للبنات في مبنى حكومي جديد
رن الجرس معلن عن بداية الحصه الخامسه
دخلت الوكيله بهدوووؤ وسمت ووقار : يالله يا معلمات كل وحده على حصتها لو سمحتن
وخرجت بهدوؤء مثل ما دخلت
قامن المعلمات للحصص وبقي معلمتين ودخلت الثالثه
معلمه عليا معلمة اللغه العربيه
:السلام عليكم من عليها القهوه اليوم راسي ييتصدع من الوجع
امينه:علي وابشري هالحين اصب لتس
وقامت وصبت بكوب ورقي : تفضلي ...سلامتس وش فيتس مصدعه
عليا: ابد ما نمت زين البارح
والليله عند ابوي عشا وبكرره زواج عليان
لاتنسووون انا بكره ماني جايه انتن عارفات حوستي
الله يمضي بكره على خيير

فايزه: اييييه وش صار على فستانس
اخبرس تقولين ماطلع من الخياط
عليا وكأنهاا تنبهت.:تصدقييين اظاهر انه هو اللي خلاني ما انام
من كثر ماقهرني الخياط
عساه ينشك بإبرره على قد ماقهرني
يومه يماطلني وهو عارف اني مستعجله
امينه : لا تدعين قولي حسبي الله وكفى
عليا: الا والله حسبي الله عليه هو واللي في بالي
فايزه لوت شفايفها :بس بس كفايه تتحسبين عليه



عليا و هالموضوع يثير عندها عرق الجنان
: الا بدعي وادعي واحمدي ربس ما ابتليتي نفس بلوتي
ردت فايزه : انتي اللي احمدي ربس منتي مثل حالتي
خلوني ساكته لا اتنكد وانكد عليكن
ودمعت عيونها واختنقت بغصه ومراره
وقامت تتوضا وتصلي الضحى
وتدعي ربي يفرج همها


امينه بلوم لعليا : افى عليا انتي عارفه ان فايزه وضعها متعبها ومتعب نفسيتها المفروض ما نكشتيها

عليا حست بالندم فايزه صديقتها الحبيبه وانها ماقدرت وضعهاواحساسها





*********************


الساعه 4 العصر

يابوي ترى كل شي جاهز بس عليان ماجاب الذبايح
ابو علي : اكيد على وصول بس الله الله بالعشا الزين
مثل ما عودتينا يا عيني
عليا بإبتسامه : من عيوني يا عيوني انت

ابو عليان : امتس واعيه
عليا : أي يا بوي توني عطيتها علاجها وفتحت لها اذاعة القران

ابو عليان :طيب يا عيني هاتي لي الشاهي حقي عندها مشتهي اسولف معها لي عنها من الصبح
عليا : هالحين يجيك احلى شاهي دقايق


"جلست بجنبها بعد ما حبيت راسها
تأملت حالها وتتبعت عيوني اثار الزمن
وخطوط المرض والتعب
سبع سنوات وهي على هذا الحال
ممده على سريرها ما يتحرك فيها الا عيونها
دليل انها واعيه معانا
يدها بيدي وعيوني تلتمع بدمعها
:ايييه يا شيخه الله يعظم لتس الاجر يا روح الروح
تلالت دمعتها بعيونها ورفعت نظرها لفووق
قلت أأيدها: صحيح الحمد لله ...الحمد لله
ودخلت علينا نوارة بيتنا عليا
قلت: ياعلني ما افقد زولس يا عيني

نزلت الشاهي وجلست على طرف سرير امها مقابله ابوها
:ابوي ممكن طلب صغييير
: ابشري
عليا :ابي نسرين تنام عندنا الليله

ابو عليان : حك دقنه امممم والله يا بنتي ان تنام عندس
غصبن عنها وعن ابوها
ولا يهمس انا اكلم ابوها الليله لا جو للعشا





سمعو صوت سياره داخله الحوش وقفت عليا وناظرت من الشباك
ابوي هذا عليان توه وصل انا رايحه اخذ منه الاغراض


********************

بعد المغرب.
:عليا همممم
جت خالتي منيره بسرعه بسسسرعه تبغاس
قامت عليا وغسلت يدها وتوجهت للصاله
وشافت منيره كاشخه بتايير اسود ضييييق مفصل جسمها المتناسق
وعقد ذهب جديد وكعب اسود دقيق
ناظرت بـ عليا: عسى بتستقبلين الناس بهالشكل
عليا ببرود : لا طبعاً بس توني افضى وانتي ونسرين
توكن تهزن طولكن وتجن
ولا وحده فكرت تجي بدري تساعدني
نسرين بإحراج :والله ابوي رفض وقال لارحت تروحين
وش اسوي يعني
منيره: لا تقعدين تحلطمين هذانا جينا وش تبين نسوي


عليا : ما ابي شي شكراً خلصت كل شي بس بطلع ألبس
واتجهز لإستقبال الناس


**********************

جالس ويشيش وعيونه على التلفزيون يتفرج
شريط مصارعه

جلست بعيد عنه وقالت بتردد تكرر محاولتها اليائسه
: ابو ساري اتجهز للعشا الليله
رد بتذمر ونرفزه :اووووهو بس يا مرره فكيينا قلت لا
دمعت عيونها: بس ابو عليان طلبك وانت وافقت

حذف لي الشيشه من يده :اقول تبين تقلعين من وجهي
والا انتي خابره وش بيجييس


طلعت من دون اي كلام عارفته مصارع مايفكر الابيده
مستحيل يستخدم عقله ولا كأنه انسان متعلم ومدير مدرسه محترم

ضحكت من كل قلبي " هه قال محترم قال
مفارقه هو وخشته المعفنه المروح
الله لا يسامحك كان من يوم اخذتك وانا في مرار وعذاب.

الله يسامحس يا يمه ويرحمس

**************

اذن العشاء و تجمعوا قدام باب مسجد الحاره
ابو عليان وازواج بناته ابو عبدالله وابو عادل
مع عليان وعبدالله وعادل وابو ساري وبعض الجيران
:ابوعليان بعد الصلاه انتظركم جميع في مجلسنا
لا يتأخر منكم احد الصغير والكبير
وناظر بابو ساري وشدد بالكلام
:ام ياسر تجيبها الليله يا بن آخي خلها تفرح وتشوف الناس
ابو ساري بضحكه باهته : تجي ان شالله تكلمني وكأني انا اللي امنعها عنكم!!!
هي اللي ماتحب الطلعات ولا الجمعات ذبحتني الله يهديها
ابو عليان يهز راسه يمشي له كلامه مع انه عارف حالهم



**************


دخل عليان غرفته بيغير اتفاجأ بالشغاله سوليسترا بغرفته
صرخ عليها: يا زفته كم مرره قايل لس ماتدخلين هنا
وفتح الباب: وقال براااااا
شالت سلة الغسيل وطلعت بهدوؤء

تعوذ من الشيطان وقفل الباب وغير ونزل بسرعه يوقف مع ابووه


*****************
دخل عليها وهو محترق من الغيض مايقدر يقول لابو عليان لا
:يا هييه وينس
وقفت باول الصاله وهي صاده عنه : نعم
قال بنرفزه : نعامه ترفس وجهس وافتك منتس
بالضبط عشر دقايق ابي تجهزين وتلبسين احسن ماعندس
بنروح للعشا


من دون اية كلمه كأنها طفله صغيرره
تبدلت دموعها من الحزن والقهر لدموع الفررح
واخييرا من سنتين ماخلاها زوجها الظالم تزور احد
او تستقبل احد
جهزت في دقايق في النهايه مابتنزل عباتها
وهي طالعه من غرفتها شافت نفسها بالمرايه
"كبرتي يا أم ياسر والهم كبرتس زياده
الله يحنن قلبك علي يا ياسر الله يحنن قلبك
ونزلت دمعتها غبن وقهر وشوق وحنين له


***************


اخر اللمسات على سفرة الرجال واقف معاها عليان ونسرين
:عليان اعجلي يا عليا ابوي لا يعصب علينا
عليا : خلاص كل شي تمام
نسرين: خالي علوي وش انت مسوي بنفسك كأنك محلووو
عليان بغرور مصطنع : محلوو!!!!
انا حلو من يوم خلقني ربي بس انتي اللي ما تشوفين


ولفها مع اكتافها ودفها برى المقلط :يالله برى بسرعه بنقلط الرجال
************



تعالت الاصوات في الصاله
" دخلت الصاله واشوف منيره اختي
تسلم على حرمه وضامتها وتصيح قربت وانا مستغربه منهي ذي
رفعت راسها وانصعقت ما توقعتها تجي من سنتين ما شفناها

حبيبتي خالتي وركظت لها اضمها واسلم عليها

جارتنا ام احمد جت تتهادى بمشيتها
حرمه كبيره وثقيله بثوبها الروز الاحمر المنقط
وطرحتها السودا القطن لكنها تجمع حنان الكون كله

:علامتسن تبتسن

اذكرن ربتسن (ربكن )
وكملت وصلة الضم والسلام على خالتي قمرا


مسحت قمرا انفها بطرحتها وقالت بصوت باكي : ابي اشوف اختي

اخذتها ومن اقبلت للغرفه وزاد صوت بكاها
وقفتها قبل لا تدخل عند امي
:خالتي تكفين امسكي نفسس امي تتأثر وتتعب كثير

ووقفتها قدام المغسله : غسلي وجهس واهدي شوي
نفذت خالتي وتنفست بعمق وهفت على وجهها
غصب عني رجعت احضنها بقووه وهمست لها
: والله نور بيتنا يا خالتي
وردت لي الضمه باقوى منها : يا بعد عيني ياحبيبتي انتي




"دخلت على اختي ام عليان اختي الكبيره الغاليه
اخر من بقى من ريحة اهلي
واحس اني اطير ما امشي لين جلست على سريرها
وشلتها في حضني وضميتها
وكأني متوقعه من شوقي لها انها بترد لي الضمه
:ياحيبتي ياحبيبتي
ونسيت وصات عليا لي اني اتمالك نفسي
ولا انهار قدام اختي
:يا ريحة اهلي انتي يا بعد هالدنيا
يا علني ما اذووق حر فرقاس ياختي


مسكتني عليا واخذت امها من بين ايدي
ورجعت سدحتها على السرير بحنان ورتبت الغطا فوقها

وقالت بإبتسامه : يمه شايفه خالتي قمرا جت تفرح معانا بعليان

ومسحت دموع امها: يمه اكييد هذي دموع الفرحه
من قدس يأم العريس

ورفعت كف امها وباسته بحب ورحمه



"سكت بحلقي غصه كبر هالكون واحساس مر علقم
على عيني ياختي اقطعس والا اغيب عنس ساعه الله لا يسامحك يا خلف الله يريحني منك




********
قبل بليله في جده

ياسر قم بسرعه ولد عمك يبيك

جلس ياسر وقال :اصلا ما نمت وتوجه للتلفون
: هلا والله يا ابو عبد الله
بندر :هلا بك وينك يا رجال
لي كم يوم و انا ادورك واتصل على بيتك ما ألقى رد
ياسر بإحراج :والله يا بندر كنت بالشرقيه عندي دوره لمدة اسبوع والبارح وصلت
بندر : اقولك عمي ابو عليان كل يوم وهو يتصل عليك بعد

ياسر اعتدل بجلسته :خيير صاير شي

بندر : ابد بس زواج عليان بعد بكره ويبيك تجي
واعتقد انك غبت بما فيه الكفايه
وتارك وراك امور مهمه لابد تجي وتشوفها

ياسر بضيق : ان شالله خير بس والله مضغوط ما اقدر اجي

اشوف اقرب فرصه واجي ان شالله
بندر بإلحاح : ضروري يا ياسر
ياسر بضيق : قلنا ان شالله يالله يالغالي تعبان بريح ووراي بكره دوام وقفل السماعه بعصبيه


ناظره سلطان وسكت لانه لو تكلم الان قامت الحرب العالميه الثالثه



*********


انتهى العشا وراحو الناس وما انتهت مشاغل عليا

لبست عباتها منيره وقالت لعليا

: بكرره الكوافيره اجيبها معي الظهر
نامي واشبعي نووم ورانا بكرره الف شغله


ابتسمت نسرين وقالت : ههههه تبين خالتي عليا تنام ووراها شغل مستحيل
قالت منيره : وش عندها سوليسترا تسوي كل شي
ردت عليا وهي تلم فناجيل الشاهي : أي ماشالله سوليسترا
الرجل الالي حقنا اللي ما يتعب
من تقوم الى تنام وهي تكرف حرام لازم اساعدها

شوفيها منهد حيلها المسكينه

قالت منيره لنسرين : تراهنين انها بتقول لسوليسترا روحي نامي
وهي بتكمل الشغل عنها

ردت نسرين : ما يحتاج اراهن ياخالتي لانها قالت وخلصت
وانا بتسحبني معاها نكمل شغل الاميره سوليسترا

:ياولد

دخل عادل بعد ما تنحنح

ركظت نسرين تتخبى في المطبخ عن ولد خالتها وولد عمها

:يمه يالله اخواني بالسياره بس باقي انتي
والتفت لخالته عليا ودنق يسلم عليها بود واحترام
:هلا بخالتي عليا الحلوه
ضمته عليا بحب: هلا حبيبي وضربته بقبضتها
: انت ياولد كل ما اشوفك القاك طولان اكثر
بس وقف وين ناوي توصل

عادل بضحكه خفيفه : ناوي اوصل للقمر


منيره : ابوك راح
عادل : لا واقف مع عمي بندر
تغطت : يالله بكره لا تنسون الظهر مو اجي القاكم نايمين
وطلعت وباقي عادل
:خالتي لا تنسين مشوارنا بكره الصبح ضروري
عليا : لا ما نسيت الساعه 10 انتظرك

*************





في بيت ثاني بنفس الليله


:يمه الله يخليس لي والله اني عارفه بس ما اقدر ما اقدر

ام فهد بدموع وحره :طيب ان كان قلبس يرضى عيال اختس
تربيهم وحده غريبه

طلعت وتركت فايزه بهم كبر الجبال


تذكرت اختها لولو الله يرحمها
مضى على وفاتها سنه
وعيال اختها عندهم في البيت
وزوج اختها يوميا يزورهم
قبل شهرين تكلم مع امها انه يدور له عروس
وهي اولى انه يتزوجها حتى ما يدخل مرة اب على عياله
وان خالتهم احن عليهم من الغريبه




رفضت في البدايه ولازالت رافضه

زوج اختي هو اللي مربيني من وانا صغيره كنت اعده اخوي الكبير
كيف اتزوجه
هو اصلا كيف فكر انه يتزوجني انا
كــــــيف
****************


سلطان : طيب انت متضايق ليه
على فكره انت السبب
تارك حياتك ملخبطه هناك
ياخي رح لمره وحده
وخلص امورك ولا عاد ترجع لهم ابد


ياسر يغطي راسه باللحاف : سلطان ياخي انت ما تمل
من هالسيره
رجعه للديره ذيك ولأهلها ما انا براجع
سلطان : طيب بعطيك الشور وانا والله ناصح لك
قم توضأ وصل ركعتين استخاره وشف وش ربي يختار لك
ياسر من تحت اللحاف
اقول : اطلع وصك الباب وراك بنام وراي دوام

طلع سلطان بعد ما ارضى ضميره بنصيحه لصديق عمره



نفض اللحاف ياسر وجلس ومسك راسه بيدينه
وشد شعره
يالله ياربي ان تريحني من هالهم اللي لي سنين وانا شايله


*******

في غرفة عليا

عليا تدرين ابوي من كلم البارح
عليا: من ؟؟
نسرين : هذاك
عليا بنرفزه: وجعة جدي له وللي يجيب طاريه
نسرين: عليا لازم تسمعين وش قاله ابوي
عليا لوت بوزها اقوى شي :ما ابي اعرف
نسرين: الا لازم تعرفين
عليا : هاااه وش قولي لا تموتين ماقلتي
نسرين : قاله ابوي غبت بما فيه الكفايه وراك امور مهمه لازم تجي تشوفها

رفعت راسها بحده والكلام
شد انتباها وحفز حماسها: اي وش رد عليه ذاك الغبي
نسرين هزت كتافها بمدري
:بس اشوف ابوي انبسط

عليا: عاد الي يشوف حماس ابوتس بيقول
اني موافقه
نسرين :خاله تكفين وافقي
عليا : نسرين حبيبتي ذا الموضوع ما احب
اعيد وازيد فيه انتي عارفه رأي فيه
وان عدتيه علي مرره ثانيه تراني بزعل واتضايق
نسرين نطت تحب راس خالتها
: لااااا تكفين الا الجنونه بتاعت الزعل
مش عاوزينها تبان
ضحكت عليا : ماشاء الله عليها سعديه
اثرت فيس ههههه
نسرين : تدرين بنت اللذينا تركت فراغ يوم راحت مصر
عليا : ماتدرين متى ترجع
نسرين : مدري ابوي ماقال شي
بس اكييد مو اكثر من اسبوعين
عليا نامي ورانا بكره يوم طويل




*************

:اف اوووووووف متى تخلصين

قطعت الخيط باسنانها وعطته الثوب
:هاك جهز ثوبك اللي كل ما زعلت قطعت ازاريره

رد بوقاحه :انتي السبب عارفتني ما احب احد يساألني وين انا رايح والا منين جاي

وطلع من غرفتها الصغيره دون ان يشكرها
او يقدرها لو بنظره
خرج من البيت وبيغيب عنه اسبوع او اكثر كالعاده
دون ان يتفقدها او يطمن عليها ولا رجع يكون باسوء حال
مخمور فاقد لعقله ولدينه

هذا حال ام احمد ولدها الوحيد

*********

ياسر جالس في سريره ويفكر بعمق

"مخنووق وضايق سلطان نكش موضووع كريه كنت اتناساه

لمتى وانت تعاقبها !!
لازم تروح وتشوفها
هز راسه بالرفض
طيب كلمها حرام عليك مهما سوت
ما تستحق ان تحرمها صوتك طول هالسنين

تحسبني مبسوط وانا هاجرها.
ترى زعلي على قدر شرهتي
اعوذ بالله من الشيطان الرجيم
انا احسن حل اسويه اقوم اصلي ركعتين
استخيير ويارب ارتاح من هالهاجس
الي ما خلاني انام


********

اخر الليل

دخل عليان البيت وهووو منهد حيله
وحالته حاله محتاج ترويشه عاجله ونومه مريحه
وراه بكره اهم يوم في حياته
دخل الصاله عادةً بيتهم ذا الوقت فااضي
اخته عليا اكييد نايمه
ناظر ساعة الصاله لقاها 2 ونص راح لغرفته

وفتح الباب وتفاجأ بالبنت اللي في غرفته
وقف ثواني غير مستوعب
قربت منه وهي تحط
شعرها الاسود الفاحم على كتفها بدلال
وبهمس :أليان (عليان )
بقلبه تعوذ من الشيطان وبصوت مكتوم
: ا نا كم مررره قايل
لا تدخلين غرفتي برى يالله يا حيوانه
وقف برى الغرفه وهو ينتظرها تطلع
صدمة عمرها ما توقعت انه بيصدها اذا تزينت وسلمته نفسها
ناظرت فيه بعيون غايمه من الدموع
I love you:
مسكها بتقزز من شعرها ودفها برى الغرفه وصك الباب
وهي مصدومه من ردة فعله
طلعت تركظ لغرفتها
استغفر عليان وتروش وبعدها
راح لعليا بغرفتها دق الباب عليها


طلعت عليا وشرشفها للصلاه على راسها
هلا عليان
عليان :شوفي لي حل مع الخدامه
ما ابيها تقرب غرفتي سمعتي لاتدخل
عليا : وش فيه يا خوي
عليان : تعوذ من الشيطان
بس كذا ما ابيها تدخل حايسه اغراضي الله ياخذها
عليا : فاقد شي
عليان : لا خلاص بدخل انام يالله تصبحين على خيير



نزلت بعدها للمطبخ وجهزت صينيه
وحطت فيها الاكل المهروس والادويه
وتوجهت لغرفة امها
شافتها نايمه
صحتها بهدوء ومحبه يمه يماااه حبيبتي
جبت لس علاجس قومي يا كل دنياي
فتحت ام عليان عيونها الذابله ومحاجرها الغايره

عدلت مناير وضع امها ووجلستها بشكل مريح
وبدت تأكل امها وتسولف عليها
:يمه بقولس شي
نسرين قالته لي تقول ان ابو عبد الاله
اتصل على هذاك وقاله لازم تجي تنهي
امورك المعلقه
نزلت الملعقه ومسحت فم امها بنعومه
وابتسمت لعيون امها الغرقانه دموع
:يمه حبيبتي تصدقين احيانا اقول عساه للموت
واحيانا اقول ليته يجي ويريح ويرتاح
وينهي هالوضع البايخ
يمه بالله عليس عاجبس وضعي
و عمري اللي راح
احياناً اقول حلو الوضع اللي انا فيه
اني عندكم واني معاكم واهم شي
اني قريبه منس يمه
واحياناً اقول لا هذا وضع ما ينسكت عليه
انابوضع صعب معلقه وبيد من !!
بيد الخايس
اللي هاجر امه وتاركها تعاني من هجره
يمه ذا الانسان مريض
ياحرام يا خالتي قمرا والله تحزن
وين تلقاها من زوجها الشرس
اللي كنه ملاكم ويبقس فيها حارمنا منها
والا من ولدها اللي ما يسأل عنها
ارحمها كثيير وينه ما يجي
يعز امه ويكون لها سند ويوقف بوجه ابو ساري
سكتت شوي ورجعت تكمل
عليا : يمه حبيبتي لا تزعلين مني تكفين
اعرف ما ترضين عليه ولد اختس
بس انتي الوحيده يمه اللي اقدر اقولها
كل اللي بخاطري
باست راس امها وقامت يالله يمه حبيتي بقوم انام

********


قراءه ممتعه لكم وردود حلوه لي

السلام عليكم ورحمة الله وبركاته
اسعد الله اوقاتكم بالرضا وراحة البال
حابه اقول كم كلمه
اولا بخصوص اعمار ياسر وعليا
ياسر كان عمره 18 وغاب 18 سنه
عليا عمرها 10 سنوات ومر عليها 18 سنه
وما بينهم ملكه فقط
ثانيا موعد نزول الجزء بإذن الله جزء اسبوعيا وبيكون غالبا في اجازة نهاية الاسبوع
واذا بتأخر عليكم اكيد بترك خبر انتم جربتوني قبل كذا وعارفين ان شاء الله اني ملتزمه ومنتظمه
بس لا يخلو الامر من الطوارئ

والان اتركم مع الجزء الثالث




3



وسيع يا هالكون وسيع بس ما قدرت تاسع ضيقتي و همي الكبير
يارب يارب
ليله كامله اتقلب من التفكير عيني غفت لحظه بس هاللحظه اشبعت عيني من النوم
فزيت وانا اسمع اذان الفجر قمت اتوضا
ودخلت صحيت سلطان للصلاه
وبعدها ودعته :انا بعد الصلاه بمشي رايح لاهلي وانهي اموري كلها

سلطان ابتسم بكسل :وعلامك تقولها كذا كأنك رايح للموت
الله يوفقك في مسعاك ويكتب لك الخير وسلم على قمرا !!!
عطيته بوقس خفيف على معدته : الشرهه مو عليك على اللي يعلمك اسم امه
ضحك سلطان : يعني انا ماعلمتك وش اسم امي احمد ربك اسم امك حلو مو مثل اسم امي الله يرحمها
يالله اتكل على الله
ياسر : دعواتك
**********



ها حبيبي شرايك
عادل : ما يحتاج خطيره انتي ذوقس منتهى الجمال
اخذها عادل وتأملها اكثر بصراحه حلوه بس اكييد غاليه
عليا : ما يغلى على اخوي شي هذا الغالي
عادل : تراني اغار ياخالتي
عليا : انت غالي بس لا تزوجت ابشر بالهديه
اما الحين معصي
دفعت عليا ثمن الهديه
ورجعوو للبيت وكان مشوار ما اخذ ساعه

عادل : خالتي لا تنسين افطري من الفطور اللي مرسلته امي
ترى عارفس ما بتاكلين لين نرجع من العرس
نزلت عليا من سيارة عادل
ولقت بندر واقف قدام البيت
سترت عيونها اكثر ودخلت يدها بأكمام العباه
بندر وهو يتفحص بوقاحه زول عليا: صبحها بالخير
عليا : صباح النور ودخلت بسرعه وما عطته فرصه يكثر كلام
بندر يسأل عادل : وين كنتو
عادل : ابد يا عمي اخذتها للسوق وخذت كم غرض من ابو ريالين
: يالله يا عمي بكمل نوم عشان اصحصح على صلاة الظهر

ونزل من السياره وتوجه لبيت جده
**************************
:نسرين نسرينو حبيبتي
صحصحي معي يا قلبي
شوفي خالتس منيره مرسله فطور ملكي تعالي نفطر تحت عند امي
نسرين بكسل وهي ترتب شعرها الناعم : ابشري هالحين انزلي وانا اجي وراس


نزلت عليا عند امها وفرشت سفره خفيفه وعليها القهوه والشاي والحليب والقرصان بالسمن والتمر وفول وتميس
وقفت على راس السرير : وبإ بتسامه حلوه : صباح الخير
يمه

شلونس يا حبيبتي ورتبت شعر امها :
يمه ابي اوريس هديتس لعليان
: وراحت فتحت الكيس وطلعت العلبه المخمليه السودا
وعيون امها تتابعها بإهتمام
وطلعت العقد الفخم فص ازرق كحلي وداير ما يدور حوله فصوص الماس بشكل بيضاوي مطعم بالذهب الابيض
وحلق وخاتم وإسواره بنفس التصميم
: ها يمه عسى اعجبس ذوقي
ترا ابوي عطاني فلوس وقالي اشتري هديه لعليان
امس حالفه من سنين وهي بعافيتها ان تهدي عروسة عليان

تلالت دمعه ثمينه بعيون شيخه
: ضمتها عليا بحب مبرووك يأم العريس

دخلت نسرين : السلام عليكم
واقبلت تسلم على جدتها
:شلونس يا جده ماشاء الله الوجه منور
وورفعت يد جدتها وباستها بحب
شافت هدية عليان
: ماشاء الله وش هالزين روعه اكيد ذوقس
عليا :أي ذوقي يالله رتبيها بالعلبه
وتعالي خلينا نفطر من فطور منيره
وجلسن يفطرن ويونسن امهن بحسهن وسوالفهن

دخل ابو عليان : وسلم وجلس يشرب شاي
ها يا بنتي عسى كل شي جاهز
قبل لا تكلم دخل عليان وهو منتفخ من النوم وبصوت نعسان :صباح الخير
حب راس ابوه وتوجه لسرير امه
وانسدح جنبها وضمها بين ايدينه بحبه وضمه وشمه عميقه تنفس : يمه اخذت جرعة الصباح عساني ما انحرم منس يا يمه

طبعا هذا حال عليان يوميا مع امه لازم هالسلام الصباحي
وممكن يمتد لساعات

عليا غمزت لنسرين عشان تسحب كيس الهديه

وبخفه سحبت الكيس وحطته بين ثنايا الكنبه الصغيره بجنب سرير جدتها

***************


ماشي بالسياره وكل احداث الماضي تلف وتدور قدام عيني


احداث لايمكن انساها
لا يمكن انسى صوت جدتي وهي تصدمني بالخبر
: امك في بيت ابو ساري
مبارك ياو لدي امك اعرست
قالتها ببرود وكأن الموضوع يستحق التهنئه
ما درت انها ذبحتني
طلعت مثل المجنون اركظ للسياره رايح
لبيت الخسيس ابو ساري خلف
اشوفه الناس تبارك له
وهو فاتح خشته ومبسوط
وصلت بيته وانا ألهث
كانت الساعه وحده بالليل
دقيت الباب باقوى ما عطاني ربي
: افتح يا كلب افتح افتح والله لاذبحك
بعد دقايق فتح الباب وهو ماسكه
وكان ب سروال وفانيله =) وطاقيه مخرمه تبين صلعته
وبإبتسامه صفرا : ياسر هلا
تبي شي؟؟
: دفيته بقووه ودخلت للبيت وقعدت انادي امي : يمااااااه يماااه
لحقني مثل الثور الهايج ومسكني من ياقة الثوب
وهزني ولصقني بالجدار
: خير خيير
تدخل كذا يا عين امك
مالك ام عندي يالله برى
بصراخ وقهر : يمااه .... طلع امي يا حيوان
والله لاذبحك يمااااه
وسمعت صوت امي بغرفه مقفل عليها الحقير : ياسر يا حبيبي والله غصبن عني والله غصبن عني
وقفت عند الباب حاولت افتحه بس
سحبني وبكل دناءه وجلافه طردني برى البيت وصك الباب في وجهي
وانا كل قهر العالم يتوقد بصدري دقيت الباب الا رجفته رجف بس محد عبرني : افتح افتح الباب افتحه يا حقير
مسحت دموعي مقهور مقهور مقهــــــــــــور

ركبت سيارتي ودعست بنزين ودي ابعد عن هالمكان
ولكن صار اللي ماقدرت اتفاداه
صدمت بسياره

ثواني بعد الاصطدام تمنيت اني مت فيه بس اسمع الناس تتكلم

الحق الحقو وانفتح باب السياره وسحبوني برى السياره

واشوف الدنيا تلف وتدور فيني بس شفتهم يطلعون الناس من السياره الثانيه
وصوت بكاء اطفال
. .
.
.
.
.


اذكر بعدها وعيت في المستشفى
وراسي يعورني وعمي ابو بندر وابو عليان جالسين
: الحمد لله على سلامتك
قال ابو بندر :ربك سلم الحمد لله
انا : وش صار
عمي ابو بندر : ماصار الا كل الخير
حادث بسيط صدمت سيارة واحد من الحاره
انا : مااات " كنت خايف يكون مات واورط
قال عمي : لا الحمد لله طيب
بس بنته الصغيره انكسرت يدها

ويالله قم خلاص الدكتور قال اذا قمت خلاص ناخذك


طلعنا وانا نفسيتي بالحضيض امي تزوجت
والخسيس زوجها طردني واهانني ولا خلاني اشوفها
وبعدها كمل علي هالحادث والبنت اللي تعورت بسببي
وقفنا بالممر وسأل عمي : ها يا ابو حمد شلون الريم ؟

ابو حمد وهو يوجه انظاره لياسر : طيبه الحمد لله
تكلمت و انا خجلان وفيه نفضه : سامحني يا عم ما قصدت
ابو حمد : مسامح يا ولدي
والحمد لله ماهي اعظم بس ياولدي العمر ماهو لعبه
وانت كنت مسرع
طاطيت راسي خجل وبعدها طلعت برى المستشفى وطلعو وراي اعمامي وهم يتعذرون لابو حمد اللي تنازل عني وسامحني بمحضر المرور


************


ريمو يالله يا قلبي تعالي اجلسي
يمه حبيبتي تكفين لا تروحين اخلص ونروح سويه
ام حمد : حبيبتي خالتس موجوده معس اما انا لازم اروح للصالة الافراح و استقبل الناس
وبتمتمه وهمس قرت اية الكرسي على بنتها ونفثت عليها
ووصت اختها وراحت للصاله
الكوافيرا: شو يا عروس نبلش نشتغل
ريمو: تفضلي
بعد وقت من التزيين والشغل في الشعر
الخاله ماشاء الله تبارك الرحمن يا بخت عليان
وكللللللللللللوللللييييش وضمة بنت اختها
وقرت عليها اية الكرسي
واتمت اللمسات الاخيره وتوجهت للقاعه بتبدأ حياتها مع زوجها هناك

************

منيره تعالي بالله خذي هالاغراض معاكم
ونسرين روحي مع خالتس
وانا ا ن شا الله اعطي امي ادويتها واجيكم اول ما توصل الممرضه

منيره : عليا لا تنسين اقري على نفسس
ترا الليله بتجلطين عجز الجماعه تجلطين
الله يعيييننا عليهن بنردهن كلهن
عليا بضحكه : هههههه لا انا ابي ام زوجي
تكون شابه صغيره ماهي عجوز عشان كذا الليله
ردي كل عجوز تسأل عني
ويالله امشن تأخرتن
نسرين اقري على نفسس يا قلبي تهبلين بالوردي ماشاء الله

نسرين : ابشري خالتي

*****************
حلقت وضبطت اموري ورجعت للبيت بزفه من عادل وعبد الله واصدقائي معي بسيارتهم
وبعدها راحو يودون منيره والبنات
دخلت عند امي و عليا عندها
وقعدت اذكر الله : ماشا الله يا عليا انتي العروس الليله
عليا تتأمل عليان وهي تدور حوالينه : ا ش اش اش يا عم
وعريسنا يابدر بادي دامت لياليك السرور
مبارك يا اخوي الله يتمم فرحكم

امي كانت نايمه حبيت راسها وطلعت : انا رايح اتجهز
عليا بصوت عالي : علياااان تروش بالحمام حقي غرفتك جاهزه ومبخره ومقفله مفتاحها معي
واغراضك على سريري جاهزه
رجع وحب راسها : ويلوموني بغلاس الله يسعدس يا عليا ويخليس لنا

***************
وصلت العصر واخذت لي غرفه في فندق بسيط
على طرف الديره اقرب ماله استراحه في محطه
نمت ساعتين وبعدها غيرت ثوبي و نزلت للسياره
وتوجهت لبيت الخسيس خلف
انا لازم اشوف امي غصبن عنه يكفي منعني عنها مرتين
والله لا اهين كرامته ان تجرأ ومنعني مره ثانيه


ماشي ومتعجب الدنيا كيف تغيرت وكل اللي خابره بهالديره
تطور وتبدل
ما دلني على الحاره الا قربها من المسجد الكبير
ولقيت تغيير كبيير بالحاره
وسالت عنه ودلوني على البيت طلع نفسه ما تغير
على حاله صغير ومشطب وصبغته رايحه وبابه مصدي

دقيت الباب محد رد
سألت عن بيت عمي ابو عليان دلوني عليه

نفس موقعه اول بس عدل في تصميمه وبنائه صار دورين وداير مايدور حوش ودقيت الباب ومحد رد
رجعت دقيت الباب
والجرس
بعد فتره ردت حرمه : مين
ياسر : ابو عليان موجود
عليا بإستغراب : ماهو فيه العرس بصالة الافراح
هناك بتلقاه
وضرب ياسر على راسه تذكر ان الليله زواج عليان
رجع قال:/ معليش أي صاله ؟
ردت عليا وهي مستغربه كثير " هذا وش فيه وردت
: مافي غيرها صالة الافراح
رد وقال : طيب شكرا وركب سيارته ورجع يسأل في الحاره كيف يوصل لصالة الافراح


***********

بعدها بدقايق وصلت الممرضه واستلمت مهمة رعاية ام عليان من عليا بغيابها واخذت باقي اغراضها ولبست عباتها وطلعت لعادل اللي كان منتظرها بسيارته اللي جاب فيها الممرضه

**************


جاهزه وانتظر بس يجي علة القلب يوديني للعرس
اذن المغرب وصلو الناس
وانا اتحرقص ودي اكون مع بنات اختي
واستقبل المعازيم الله لا يربحك يا خلف
دخل البيت وهو نفسه براس خشمه يالله مشينا
وخليها حلق بإذنس الساعه تسع ونص
بنادي عليس تطلعين

سكت ما قلت شي هو يبيني اترجاه اقعد
عشان يذلني بس يخسى
هو لو على كيفه ما خلاني احضر العرس

وصلت الصاله وتغيرت نفسيتي ومزاجي : رحبت وهليت وضحكت واستانست ووحتى الرقص رقصت
وقفت مع بنات اختي وشفت ربعي وجماعتي
وعلى الساعه تسع سمعت صوته الشين ينادي بالمكرفون : بيت ابو ساري
ناظرت الساعه واستغربت جاي بدري نص ساعه
يبي ينكد علي بأي طريقه الله ينكد عليك
وشوشت منيره انها تعذر لي من الناس اني تعبت وطلعت
وبعد ما همست لعليا : يا قرادة حظ ولدي وياشين حظه اللي تارك الزين ومهمله
حبت راسي وقالت بضحكه : خالتي دخيلس انا فرحانه لا تعكرين مزاجي
ضحكت وغمزت لها : ابشري ي الله يا حبيبتي اطلع لا يهجم علينا هالثور


وطلعت له ولقيت معصب الا بينحرق من كثر العصبيه
سكت وحقرته
قال : توس تطلعين لي اكثر من عشر دقايق يا تبن واقف
وحرك بالسياره
: ليه ما تردين هااااه
ولطمها بقوه على وجهها
****************

وصلت لصالة الافراح وانا متردد ادخل
بس بدر انهى ترددي اقبل علي بفرحه : يا هلا ياهلا والله
يالغايب
ونادى عادل واقبل عليه شاب صغير وقاله نادي جدك بسرعه

اقبل عمي وبنظرة عيونه استغراب من شافني
بنظره سريعه وشديدة التركيز عرف من اللي واقف قباله : عتب شرهه فرح كل التعابير تحتار بوجه ابو عليان لكن تغلب الفرح وضمه وسلم عليه بحراره
يا هلا ياهلا واخيرا يا ياسر اخيرا يا ولدي

واخذ بيدي وما خلاني الا وهو معرف الناس علي
وسلمت على العريس عليان الدب
يا سبحان الله كبر وتغيير كثير
" يعني انا اللي ما كبرت !!

بدت تتفكك عقد حواجبي من الفرحه اللي شفتها بعيون اهلي لين طاحت عيني بعين خلف
بس عمي ابو عليان مسكني وهمس :هدي هدي يا ولدي
ناداه عمي واقبل علينا مثل الطاووس المنتف
: انا متأكد انه عرفني بس سوا نفسه منكرني وما تعرف علي
بس عمي انهى تمثيليته البايخه : ياسر يا خلف
وبكل خباثه مثل الفرحه : يا هلاااااااااا
ومد يده بس انا لا يمكن اسلم عليه وصديت عنه قدام الناس
انتفخ وزعل وطلع وهوو مولع ناااار من الفشيله والزعل


************

واخيرا رجع
الحين ممكن اقول عندي امل
شفته جالس لحاله بعد ما دخل عليان وعمي وابو حمد عشان يزفون العريس والرجال قلطو على العشا
رحبت فيه مره ثانيه وقلت له :هاا جاي تنهي امورك والا تتممها
قال بكل جديه : اكيييد انهيها عايش بها المهزله 18 سنه صار لابد انهيها

بصراحه طمني كلامه واخيييرا بيطلقها
*******************


في صاله الافراح قسم النساء
نظام مسرح والكوشه مرتفعه وعلى شكل دائري
و كرسيين كبار مذهبه بقطيفه حمرا تتوسط الكوشه
ام احمد جالسه بكرسي وتصفق بحماس للبنيات وحاشره نسرين بجنبها
منيره تشرف وبشكل كامل على الضيافه
واكييد السلام ما يخلص
عليا واقفه مع زميلاتها وتطلبهن يرقصن
قالت امينه انا برقص مصري بس اخاف ربعس ينقدون علي
ضحكت عليا : لا بالعكس يحبون الهز ياالله
عسى شريطس معس
امينه بضحكه غير بريئه : هههه اكييييييد معي
وراحت عليا للاستريو الكبير وحطت شريط امينه
وكانت اغنية ترقص
وجت امينه وهي رابطه خصرها بمنديل وتترقص بطرب كامل
وولعت الحماس في البنيات وعلى تصفيق وحماس
عليا وفايزه ومنيره ونسرين
وهي صارت تزيد دلال وشقاوه وسحبت عليا معاها

وتمايلت عليا برشاقه ورقه بس ما طولت
وخلت امييينه تكمل لحالها

نادتها ام حمد: عليا حبيبتي اخوس بيدخل ويبيكن معاه
طيب هالحين انادي منيره
ورفعت طرف فستانها وركظت برقه لمنيره وعلمتها
توجهت منيره ونسرين للغرفه المخصصه للعروسه
ولابسات عباياتهن عشان ابو العروسه واخوها موجودين

وقف عليان برى الغرفه وسلمن البنات عليه سأل منيره : وين عليا
ناظرت وراها ماشافتها
قالت هي جايه يالله ادخل عند عروستك
عليان: لا اصبري خل تجي عليا
ابو عليان وابو حمد داخل الغرفه مرتزين ينتظرون العريس يدخل والريم غايصه بفستانها من الخجل
عليان بهمس وعقدة حواجب: وين عليا نادوووها بسرعه ما راح ادخل لين تجي
وام حمد : يا ولدي جايه جايه بس انت ادخل
منيره :عليا اكييد ضاعت عباتها كله من هالغبرا سوليسترا فاتحه خشتها تسولف مع الشغالات وضيعت عباة عليا
عليان مرتبك وملخبط المشاعر همس لمنيره
:ابي عليا تجي بسرعه هي اللي بتزفني
منيره : وانا ما انفع يا دب هههههه
عليان بضحكه وروقااان : ما ينفعش يا روحي
محدش ينوب عن عليااا
:انااا جييت
عليان تنفس بارتياح : واخيرا وينس ترا كنت بنزف من دونس
عليا وهي تضمه : ما تقدر يا عليان اصلا انا محلفتك من حنا وصغاررر
نسرين : اقوول العرووس تنتظرك يا حلوو
علياا دست بيد اخوها الكيس : وهمست هذي هديتي امي وتقولك مبارك
ومسكته من يده ودخلته الغرفه عند العروووس ما تبيه يتأثر من حركة الهديه
********************

اختلطت اصوات المباركه والتهاني واخو العروس الصغيير يصور العرسان
اجواء كلها فرح ومشاعر جميله
طلعو الشيبان و قدر عليان يكتشف ملامح الريم
ماشافها قبل وهذ ي اول مررررره
لمح العيون الوساع الناعسه وغرق فيها
بس العواذل حوالينه

مسك يد الريم بلهفه خجوله تنحنح وقال :بنمشي ياعمه
ام حمد بحفظ الله ولا اوصيك يا ولدي ترى الريم امانه عندك هذي بنتي الوحيده
ولبستها امهاا عبايتها والريم تعلقت بامها
تصيح خوف وخجل وفراقها امها
*****************
انتهى العرس بزفة العريس للعروس
قلطت منيره المعازيم على العشا
وابتدأ مشوار الازعاج ومناداة الرجال لعوايلهم
بيت فلان اطلعوو بسرعه
بيت فلان ابوكم يقول يالله
ومافي بزر ما جرب المكيرفون
.
.
.
.
.

عادل متفق مع خالته يجي اخذها بدري عشان امها
ومنيره بتشرف على جمع اغراضهم ومعاميلهم اللي جابوها
معاهم للصاله وبصراحه هذي اصعب مهمه
***************

توجهت لبيت خلف وكلي شوق لأمي
احس الشوق تفجر من دخلت هاالديره
يا قسوة قلبي كل هالسنين

وقفت عند باب بيته وانعاد الموقف
بس هالمرره انا هاااادي جدا ولايمكن يستفزني خلف

دقيت الباب دقيت كم مره
وكنت بمشي لولا سمعت صوت امي : ميين ؟
قلت بلهفه : يماااه افتحي انا ياسر

******
قراءه ممتعه لكم وردود حلوه لي

4





بعد زواج امي بفتره
كنت زعلان وشرهان على امي كثيير
بس مسكتني خالتي
:اسمع يا ياسر انا عارفه انك زعلان وعارفه انك مقهور
بس ترا امك انجبرت بذا الزواج
امي الله يسامحها خيرتها بين رضاها اذا وافقت وغضبها اذا رفضت

سكت ما عرفت وش اقول زاد قهري من جدتي
خالتي: ياسر حبيبي كان لي قدر عندك ومعزه
هالحين تروح لأمك اكيييد ولهانه عليك
حبيت راس خالتي وقلت لها : مدري اشوف
وطلعت منها

رحت ل سلطان زميلي في الثانويه
ومتفقين ندرس سويه
ومقدمين اوراقنا على جامعة الملك عبد العزيز
سلطان : ياسر ان شاء الله الاربعاء بمشي على جده
تخاويني والا بتلحقني بعدين
ياسر : انا بمشي معاك
سلطان : طيب احجز انا حجزت اليوم الصبح
ياسر : طيب
بعدها
رحت لامي في بيت الخسيس
ودقيت الباب وردت امي من ورى الباب بلهفه
: ياسر ياحبيبي ابو ساري مقفل الباب
ما اقدر افتح لك رح للبيت انا العصر اجي لبيتنا
حطيت راسي على الباب وانا مقهور ودي بشوفة امي
: يمه
تنهدت قمرا بقهر: يا قلبي رح وانا اليوم اجيك بالبيت
قلت: يمه تكفين انا انتظرس العصر لا تاخرين علي
مر العصر وجا الليل وامي ماجت
نمت من الضيقه تخيل تنتظر وتتأمل
وفي الاخير ما يصير شي وراح وقتك وطار املك
من بكره رحت لها مره ثانيه ووعدتني تجي اليوم
وانا من لهفتي على امي صدقت
ورحت وتكرر موقف البارح
وصلت حد الانفجار

كل ما مر الوقت زاد حقدي على خلف
كله من جدتي الله يسامحها
رحت عند ها يمكن تلقى لي حل
زعلت علي وقالت وهي تهز عصاها : لا تروح لها
والا ذنبك على جنبك هي بتجيك سامع
عصبت وتنرفزت من كلام جدتي: متى ياجده لها الحين كم
وهي ماجتنا
الجده : ياولدي ما اقدر اجبر الرجال هو حر بزوجته
بغيت اشق هدومي من كلام جدتي :جده كل هذا بسبتس
خربتي حياتنا انا وامي
الجده بعصبيه: اقطع واخس يا قليل الادب وتقلع عن وجهي لا اشوفك
:ما انتي بشايفتني بس هذا خلف انا اللي بربيه والله لا طلع كل ذا من عيونه
وطلعت من عندها معصب
سيطر الشيطان على في ذيك اللحظه
ورحت لبيته وكان للحين ما وصل سيارته ماهي فيه
انتظرته وانتظرته وانتظرته
وابليس ينفخ في نار قهري وكرهي له
وصل بعد مده وقبل لا ينزل من السياره هجمت
وكسرت قزاز سيارته وكسرت مرايتها وهوو يشوف
فتح الباب بيمسكني
وبكل ما عطاني ربي من قوه
هويت على راسه بالحديده اللي معي
من شفت دمه سال وعيونه جحظت
والناس التمت علي وامسكوني
تسارعت الاحداث
ولقيت نفسي بالشرطه
وعمي ابو بندر وجهه اسود وابو عليان يهدي فيه
ويكلم الشرطي : يا ابن الحلال مشكله عائليه
والرجال مسامحه مثل ولده
وهذا تنازله ومد ورقه على الشرطي
الشرطي ناظرني بقوه وقال : احمد ربك ان الرجال تنازل
عنك والا كان بتقعد عندنا

بصراحه ما صدقت انه تنازل
*******
رجعنا بسيارة عمي ابو عليان
وطول الطريق وانا اسمع هواش عمي ابو بندر لي
بس وقفنا عند البيت نزلت بسرعه و تركتهم
ما احد حاس بناري
امي تزوجت بدون رضاي وغصب عنها
وزوجها النذل حابسها و مقفل عليها لا شفناها ولا شافتنا
لا احد يلوومني ولو يستمر على ذا الوضع لأضربه مره ثانيه
ويمكن اذبحه بعد
نمت على هذي الفكره
وما صحيت الا على صوت امي تصحيني
: ياسر

فتحت عيوني ما صدق ان امي واقفه عند سريري
قمت حضنتها : يمه وقعدت اصيح
وهي مثلي متنكده بكا عيونها وارمه
كانت بعباتها سحبت نفسها من حضني وقالت : ياسر قم معي
قلت : وين يمه
وانتبهت لعمي ابو بندر وابو عليان موجودين

قالت بتردد : تعتذر لعمك ابو ساري

قمت من سريري وانتفضت عروقي قهر : نعم !!!!!
اعتذر له والله لو ايش ما اعتذرت
عمي ابو بندر بحده : بتعتذر
وانت الغلطان والرجال ماقصر سامحك
ومن حقه عليك تعتذر له
بنرفزه ووقاحة مراهق : يبلط البحر اول والله ما اعتذرله
قمرا: اول مررره تصرخ فيه مسكته بقووه من ذراعه
: بتعتذر له غصبا عليك
"ما اصدق : يمه لييييه ؟؟؟
هذا الانسان لا يمكن اعتذر له
كنت محتد ورافع صوتي
صفقتني كف : بتعتذر له والحيين
ودفتني بقووه : يالله قدامي هالحين ان ما اعتذرت بيشتكي عليك
عمانك اجبرووه يسامحك وهو شرط انك تعتذر
وانا كفلتك عنده
" انصعقت انا امي تضربني!!
صرخت بقهر وانا ماسك جيب ثوبي ابشقه : لييييييييه يماااااه لييييييه
ودمعت عيوني مقهوور طلعت من البيت
انا امي تضربني !!!!
وعشان من !!!!
ومن وقتها وانا حاقد زعلان شرهان كثير مشاعر بقلبي
***************

الليله لو وش تسوي امي لو تذبحني
ما قدر الا اقولها تمونين و اشتقت لس
وابي العفو يا يمه ابي الرضا
ردت امي : من ؟
ياسر : انا ياسر افتحي يمه
قمرا بصوت باكي : من ؟ ياااسر
اويلااه ولدي وصارت تهز الباب بقووه
ياسر حبيبي
ياسر بلهفه كبيره : يمه افتحي الباب
ردت وهي تهز الباب بقهر : مقفل الباب قفله وذلف
رجفت الباب وركلته برجولي : ولدي ياناس ولدي يااسر ياياسر
افتح لامك افتح لهاا
ياسر انهبل من بكا امه ورجفها للباب
حاول يدف الباب بقوه يمكن يفتح معاه بس الباب متين
قمرا مستمره ببكاها ومحاولة فتحها للباب
ياسر حاول يفتح الباب بس ما قدر
اخر شي قرب سيارته وطلع فوقها ونط للجدار العالي
ونزل لامه اللي كانت بحاله هستيريه

: يماه يمااه انا هنا خلاص
قمرا من شافته ضمته قووه
وببكا مرير : ولدي ولدي حيبيبي
اااه ياسر لا تخليني يا حبيبي
لا تخليني
ياسر : يمه انا جيت والله ما اتخلى عنس
يا يمه حبيبتي وضمها اكثر

دخل ابو ساري وهو محتضن امه
ابو ساري بصوت حاد : ماشاء الله هاجم على بيتي
مثلك مثل الحرامي
كنت ابرد عليه واعرفه قدره له عين يتكلم
بس امي تمسكت فيني بقووه: يمه ياسسر يماه لا لالالا
واغمى عليها بين ايديني
طار عقلي : يمااه ردي علي حاول يفوقها
ما فاقت
ابو ساري واقف يتفرج ولا كأن اللي اغمى عليها زوجته او تهمه
شالها ياسر بين يديه وصرخ با بو ساري: اذلف من وجهي وركظ للسياره وابو ساري يشووف

اخذت امي للمستشفى وطول الطريق اتتحسس وجهها
واصرخ اناديها
يماه تكفين

وصلت للطوارئ واستلموها مني
وانا معاهم سألوني ايش الحاله قلت مدري اغمى عليها
اركظ معاهم لغرفة الطوارئ
الممرضه تتفحصها نبضها وضغطها والدكتور يتابع
: ما تخاف ما تخاف
ضغطا منخفض كتيير
تأملت وجه امي من سنيين ما شفتس يا حبيبه
لفت نظري كدمه على خدها نزولا لشفتها
والدكتور بعد لاحظها
وتفحصها اكثر لقي كدمه ثانيه
برقبتها
وبظرة اتهام ونبره : شو هاد هي مضروبه
تنحت ثواني
:/ قلت بإستنكار مدري
انا ولدها واليوم جيت ومن شافتني صار اللي صار
بس توني انتبه
الدكتور : واضح اثار الاصابع على الوجه

طبعا انا كنت اغلي كيف خلف الكلب يمد يده على امي
الدكتور :معافايه هلأ بدها تنام وترتاح للصبح
وانت فيك تجي الصبح تتطمن عليها

طلعت من المستشفى وبدوون تفكيير توجهت لبيت عمي ابو عليان
*********

وصلت من زواج عليان وطيران عند امي ولقيتها واعيه
سلمت عليها : مبروك يا يمه عليان مثل القمر ربي يبارك له
وعروسته بعد تهبل
:يمه حبيبتي اليووم جت خالتي قمرا وجت فلانه وجابت فلانه
وقضت الوقت وهي تسولف لامها عن العرس
وكأنها بتعوض امها عدم حضورها

نامت امي على سوالف عرس عليان
وانا قمت جوعانه
دق باب البيت وابوي قام يشوف من
من بيجي هالوقت
اكيد العيال جايبين الاغراض من صالة الافراح
تركت ابوي رد على العيال وتوجهت للمطبخ
حسيت بقرصة الجوع جلست بالمطبخ ساندويشة جبن وعلبة بيبسي

على مهلي اكل واتذكر تفاصيل العرس
مدري كم جلست بس حسيت اني ضايقه من فستاني البنفسجي

سحبت ذيل فستاني وطفيت لمبة المطبخ وتوجهت للدرج بطلع لغرفتي
بس شفت لمبات المجلس مفتوحه من الشباك المطل على الحوش
رحت اطفيها ابوي يزعل لا قام الفجر ولقى الاضاءه مفتوحه
تمخترت بمشيتي وفستاني يتباهى علي
تعرفون كيف الواحد يعجب بنفسه
ويخاف يحسدها من كثر ما الفستان مضبوط
هالخياط بدع بالفستان
بستاهل كل ريال وكل هوشه جته مني


دخلت المجلس ومديت يدي وطفيت اللمبات
بس تنحت ثواني
في واحد جالس بصدر المجلس
هربت اركظ يا فشيلتي ياااااااويلي من هذا ؟؟؟؟؟؟؟؟
واصقع في ابوي عند مدخل الصاله
قالي : وش فيس
قلت هاااه مافي شي
قال وهو مبتسم : رحتي للمجلس
نزلت راسي وامتلت عيوني من الاحراج
قال ابوي : ههه الحمد لله ما احد غريب وراح وخلاني
وانا انتافض من احراجي من ابوي
ركظت لغرفتي ووغيرت واندسيت بسريري
وش يقصد ابوي ما احد غريب من يكون ؟؟؟
**********

جالس بمجلس عمي ابو عليان استئذن مني دقايق
بعد ما علمته عن امي واللي صار معاها
قلت له ياعمي امي مالها رجعه لخلف
وابيك تدخل بالموضوع انا اخاف ابتلي فيه

قال عمي : يصير خير الحين نام ومن اصبح افلح
قلت له انا ماخذ غرفه في فندق باخر الديره
حلف علي ماروح والا انام عنده ما قدرت ارفض بصراحه منتهي وطافي من التعب
غاب عمي دقايق
بعدها جالس والا تدخل علي حوريه
جميلة الجميلات
زولها وطولها ياويلي على عنقها
ولابسه بنفسجي بعد مظهر بياضها بشكل مغري
وطفت اضاءة المجلس وقفت بالظلام ثواني
وبعدها هربت
وانا صنمت ما تحركت الا بدخلة عمي ابو عليان
وفتح اللمبه : وقال يا كافي علامك ؟
كان في وجهه ابتسامه
جلس جنبي ومد علي مفتاح
تنحنحت وحاولت اكون طبيعي: وش هالمفتح يا عمي
ابو عليان : مفتاح بيتك
انا جددت فيه امك كانت تبيك لارجعت تلقاه جاهز لك

"تشتت فكري
معقوله اللي دخلت علي عليا ؟؟
قالي عمي : ياسر سمعتني
قلت : هااه أي ياعم جزاك الله خير

تثاوب عمي وقام قال هالحين بجيب لك فراش وتنام وبكره نشوف وش بنسوي
رااح ورجع لي بمرتبه اسفنج ومخده ولحاف
ووراح ينام وانا ابتدا عندي السهر
غمضت عيني والا ام فستان بنفسجي قدامي
عقلي رافض انها عليا معقووول
هزيت راسي هذيك تصير مثل كذا
لا لاالالالااااااا
*****************


رجعت هلكانه للبيت بس حابه اجلس مع بدر جلسه حلووه
احب يشوفني وذاتا انه طلع قبل لا يشوفني للعرس
دخلت غرفتنا لقيته نايم
بصراحه زعلت وقلبي انكسر
توقعته متلهف يشوفني الليله
دايم اتذكر ليلة زواجنا واتحسر
واحاول اعوضها اذا حضرت زواج
كنت مقبله على احلى ايام عمري
والدنيا بعيني لونها بمبي مثل مايقولون
امنية حياتي تحققت
واخذت حبيب القلب بدر
اذكر ان حصه الله يرحمها تنكدت يومها
خايفه تصيح وامي وجدتي يهدن فيها
اما انا احس اني طايره من الفرحه
بس اتخيل ان بدر مثلي فرحان
وانه بس يتمنى الوقت يمضي بسرعه عشان يكون معي
بس صدمة حياتي كانت ذيك الليله
زفوه عندي بالغرفه
وكنت جدا مستحيه من ابوي وعمي ومرة عمي الله يرحمها
وامي دخلت شوي عندي وطلعت بسرعه
بعد ما طلعو
وبدر مثل ما دخل منزل راسه كأنه يفكر وساكت
كنت جالسه على السرير وقفت خجلانه مدري وش اسوي
صمت مافي غير الصمت
جلس هو على السرير ونزل بشته
بعده فرش سجادته وصلى ركعتين
ونزل ثوبه ولبس ثوب البيت
وانسدح على السريروغطى عيونه بذراعه
ولا كأني موجوده
واقفه على حالي انتظر منه أي كلمه
انتظر منه يعبرني
بس فعلا وقتها حسيت انه مو شايفني
او حاس بوجودي
دموعي بدت تتجمع الصدمه كبيره على قلبي
ماهو كذا ماهو بالصوره ذي تخيلت بتكون ليلتنا
بكاي صار شهقات من اقصى قلبي المجروح
ما قدرت الا اني اطلعع برى الغرفه وادخل الحمام
وابكي وابكي انكسار قلبي



وعيت على بوسه رقيقه
:هلا توس جايه
ناظرته بالمرايه وانا انزل الحلق : أي قبل شوي
رجع على السرير : تعالي بحضني
قلت دقيقه بس امسح مكياجي
قال بصوت ناعس : لا تعالي مثل ما انتي
عرووووس انتي اليووم عروس
لفي كذا اشووف دوووري خليني املي عيني من جمالس
ضحكت من كل قلبي خبيييث يا بدر
تعرف لي وتعرف كيف
تراضيني
********
تناظرني وبعدها تنزل عينها
وانا ودي اقولها يرحم امس ترا بتهبلين فيني
بس مسوي نفسي ثقيل
قلت لها : الريم مصدع احس راسي كبر بيتكم
تبسمت وهمست : سلامة راسك
معي بنادول اعطيك
قلت لها : أي تكفين
قامت تمشي مثل الغزال الريم اسم على مسمى
فتحت شنطة يدها وناولتني علبة البنادول
تناولت يدها وسحبتها جنبي
وانتثر شعرها الليلي على متني
قلت لها بهمس : شكرا يا الريم
وحاوطتها بيديني
**************




الساعه 8 صباحا
واقفه بالمطبخ بعد ما ناولت ابوي الفطور مع القهوه والشاهي
جاني ابوي صحاني الساعه 7
ياربي تغفر لنا كلنا فاتتنا صلاة الفجر
وعلمني ان ياسر جا البارح
وانه موجود عنده بالمجلس
وقف مخي عن التفكير بالاصح انا وقفت مخي
ما يستاهل اني افكر فيه
غير انه ما عندي وقت اضيعه عليه
رحت لامي وفطرتها ومشطت شعرها القصير
وجلست جنبها مافيني اتحرك مسترخيه على الاخير
اسمع اذاعة القران بجنب امي

فجأه صحيت ووعييت ان اللي دخلت عليه البارح هو ياسر
وصفقت وجهي بكفيني
يااااااااااااااافشيله يااااالله وش بيقول هالحين اف منه اف اف


********
دخل ابوي علينا واحس وجهي قلب احمر متفشله من ابوي وانه عرف اني دخلت وشفته وشافني

قالي ابوي :عليا يا عيني
قمت وقلت : هلا يا بوي
ابوي : خالتس قمرا بالمستشفى وبروح مع ياسر
نشوف وش صار معاها
فزعت : يووه شفيها خالتي
قال : تدلل شافت ولدها واغمى عليها
قلت بصدق : طبيعي يابوي والله ما تنلام كم له
وهو هاجرها ما يخاف ربي
قال ابوي : يا بنتي ماهو وقت لووم وخلينا من هالكلام

الغدا اليوم متكفل فيه بدر انتي ارتاحي
وانا بروح مع ياسر

لبس ابوي شماغه وطلع

************
اتصلت على منيره ما ترد
على نسرين
رد علي بندر : السلام عليكم
بندر: وعليكم السلااااام والرحمه والاكرااااام
قلت : وين نسرين
رد باسلوبه الكريه : نايمه
وكمل :مبروك ما سويتو لعليان
قلت بجديه : الله يبارك فيك
قال : عقبال ما نفرح بس
قلت : يالله مع السلامه اذا صحت نسرين خلها تجي بسرعه
وقفلت السماعه وما عطيته مجال يرد ويستظرف


بندر انهبل من سنتين وهو ماهو طبيعي
طول عمري اعد بندر اخوي الكبير واحترمه واقدره
بس من شافني مره يوم زواج صديقتي امينه
مريت نسرين وباخذها معي تحضر العرس
ونزلت عباتي عشان سعديه تشوف فستاني ومكياجي
سعديه : الله الله ايه الجمال ده كلو
فيييينك يا عريسها تعال واخطفها وريحنا منها
ضحكت على كلام سعديه العسل
: مش حيجي يا حبيبتي اصل هو هربان
ومش عايز يرجع سيبنا من سيرتو المنيله
ضحكت سعديه وقالت : ربنا يفتح عليكي د انتي بأيتي لب لب بتحكي مصري كويس اوي اوي


دخل علينا الصاله
انا تخبيت ورا سعديه وهو تعذر وطلع

بس بعدها تغير معي صار وقح بنظراته ويحاول يستظرف اذا كلمت على نسرين
صرت اتحاشا أي تواصل او احتكاك عشان ذا الوضع تعبني وازم نفسيتي
****************

توجهنا للمستشفى ودخلت عند امي
لقيتها نايمه نزلت احب يدينها وراسها
سامحيني يمه
يدي تتلمس كدمتها اللي في وجهها
فتحت عيونها بشويش وبصوت متقطع هامس
: ياسر ودمعت عيونها
ياسر حبيبي انت هنا والا انا اتحلم
ضميت يدها و ابوس خدها وراسها :
يمه حبيبتي انا هنا جنبس
قمرا: ياربي لك الحمد احسبني اتحلم مثل دايم
ياربي لك الحمد
دخل الدكتور امي بوهن رفعت الشرشف
على وجهها ما تبي الدكتور يشوفها
قال الدكتور : صباح الخير كيفك يا ست قمرا
امي بوهن : الحمد لله
الدكتور لازال لضغط منخفض كتير
من شان هيك بدك تضلي عنا كام يوم لحد ما يتعدل
وناظر ياسر
ما تخافش الست الوالده بدها تشووف غلاها
كتب في الملف تقريره الصباحي
وطلع وسحب ياسر معاه
اخ ياسر : انا من مسؤليتي ابلغك انو لازم تتسجل
حالة اعتدا بالضرب على الست الوالده
ابو عليان وقف معهم : قال ياسر وهو حريص
على سيرة وسمعة امه : ما يحتاج حنا بنتصرف
بدون تبليغ وارجو انك تتفهم انه حاجه عائليه
تفهم الدكتور واستأذن وتركهم يكمل جولته الصباحيه
ابو عليان برضا من موقف ياسر : خير ما سويت
وابو ساري انا بتصدى له
اول جدتك واقفتن لنا ما تبينا نتدخل وبعدها
هو عزل امك عنا ولا سألنها عن حالها
تحمدت ربها وسكتت
ياسر :يا عم الحين اهم شي امي ما ترجع له مهما كان
ابو عليان : يصير خير ياولدي انا الحين بروح وانت شف امك وحالها ووين بيحطونها وبعدها تجيب اغرضك وتجي للغدا

*********
: احلفي
:ماني حالفه يعني اكذب عليس مثلا
منيره بضحكه : وكيف شكله الشين تغير كبر
وش صار فيه
عليا وهي تزيت شعرها عقب السبراي مثبت الشعر
:تبين الصدق مناير ماكأنه هو
كش عليه واااحد ثاني تماما
كنه حجازي لابس غتره بيضا وعوارضه خفيفه
منيييره طاحت ضحك على السرير
: كل هذا شفتيه بلحظه ههههههه
عليا تفشلت : بلا بياخه هذا اللي شفته تبيني اكذب يعني
اقووول روحي تحت على ما اتروش وانزل
اكيييد عليان والريم على ووصول

******

يمه بموت من خجلي
ماسك يدي ودخلنا بيت اهله
استقبلتنا اخته منيره بحفاوه وبنت اخته نسرين
بعدها سحبني على غرفة عمتي ام عليان ترك يدي وتوجه لسرير امه
يا قلبي عليهم والله اني حزنت على عليان وامه
هو صار مثل الطفل يبوس بامه ويتودد لها
ويضمها : يماااه اشتقت لس
ومد يده لي وانا قربت وحبيت راسها شلونس يا عمه
مسكينه والله
دخلت علينا نسرين بالقهوه وجلسنا في غرفة عمتي
وجت عليا وزانت الجلسه اكثر
بعدها تركني عليان رايح للرجل بعد ما همس بأذني : يا حلوس ذبحتيني
انا صرت حمرا من كثر الخجل تفشلت من خواته وبنت اخته

************
اتفقت انا ومناير نروح نزور خالتي قمرا
بالمستشفى ونسرين تجلس مع امي

اذن العصر اخذنا عبد الله وعادل
الثنين يتكلمون عن ياسر وكيف انه كان ماخذ المجلس بسوالفه واسلوبه
وانا اقول بقلبي : مالت الا مالت
منيره تسألهم وتستفسر
: ما قال وش بيسوي
انا هنا مغصني بطني : " وش بيسوي بعد اللي لازم يسويه من زمان خله يطلقني ويذلف


وصلنا للمستشفى وتوجهنا لغرفة خالتي
اللي فرحت فينا كثيير وخاصة انا
بس تمسك يدي وتبوسها وانا ارد لها البوسه
تفاجأت بوجهها انا ومنيره بس ما علقنا
مسكينه فيها اللي مكفيها
فتحت شنطتي وطلعت المشط ورتبت شعرها
وربطته لها بجديله
ونزلت نقابي وسحبت منديلي
ولفيته على وجهها بترتيب وهي تتشكر وممتنه
: أي والله ياعليا استريني يا بنتي الله يسترس
الدكتور شبع من شوفة وجهي
قالت منيره الليله يا خالتي ارسل لس غيارات مع عادل
يالله عليا العيال اكيد نزلو للسياره
انفتح الباب فجأه ودخل ياسر
بسرعه تخبيت ورا منيره ورفعت نقابي اتغطى فيه
فلتت مني كلمة : عمى بعينك ما تعرف تدق الباب
قرصتني منييره بقوووه : وقالت هلا ياسر
هو تفاجأ بالحريم عند امه ما توقع فيه احد لان وقت الزياره انتهي
نزل نظره بعد مالمح عليا بشعرها المرفوع
وبشرتها الصافيه من أي تجميل
وسمعها تقول عمى بعينك ما تعرف تدق اباب
قال : السموحه ما دريت ان احد عندس يمه
منيره هلا ياسر / قال بتردد هلا بك
قالت قمرا:هذي بنت خالتك منيره ام عادل
رحب بها وهي ما قصرت بالسلام والسؤال عن الحال
قمرا قالت لياسر : سلم على عليا يا ياسر

رفع نظره للي ورا منيره
اهلين عليا شلونس
عليا بجمود ورسميه : الحمد لله
دفت منيره من ظهرها
يالله بنمشي يا خالتي ونزلت حبت راس خالتها
ومرت من قدام ياسر طالعه من الغرفه
ولحقتها منيره
ياسر : يمه دقيقه
طلع معاهن ياسر : لحظه ام عادل
من جايبكم
منيره : عادل وعبد الله
طيب بوصلكم لتحت ومشى قبلهن
ومنيره تنغز عليا وبهمس: ماشا الله تهنيين يا عليا شباب
وطول وبسبابتها على خدها : ومزيووووون
عليا بكره : وع الحمد لله والشكر وتكفين
ترا كبدي حايمه لاتزيدينها علي
منيره بضحكه : اقول اص بس وامشي لا تحلطمين
.
.
ماشي ومبتسم سامع همسهن وحشهن فيه
وصلهن لتحت وتأكد انهن بالسياره وطلع لامه




قراءه ممتعه لكم وردود حلوه لي