السلام عليكم ورحمة الله وبركاته

يسعد الله اوقاتكم

حبايبي يسعدني ادعوكم لحفلة زفاف عليا وياسر
وبحضوركم يتم لنا الفرح والسرور
وذلك في تمام الساعه السابعه والنصف مساء

السلام عليكم ورحمة الله وبركاته
كل الشكر لكم يامن قرأتم حروفي
وكل الامتنان لكم يامن سطرتم اروع الردود
للاسف ضيق الوقت يمنعني من الرد
لكن والله سعيده جدا جدا بها
اسعدكم الله دنيا واخره مثل ما تسعدوني بردودكم

10
قمت من النوم وبالي خالي من اية تفكير
يمكن هذا الهدوء اللي قبل العاصفه
مع ان العاصفه مرت بي من يومين
يوم قال وابتسامه تملى وجهه
:باركي لنا يا خالتي دخلتي انا وعليا بعد يومين
حسيت انه صفقني بأقوى كف في وجهي
ماقدرت حتى اتنفس لين خالتي قمرا ضمتني بقوووه
وهي تقول : مبروك حبيبتي
دموعي تحجرت في عيوني ياكبرها غصتي
حسيت بطنين ماعدت اسمع شي
اشوفهم صحيح بس مفصوله تماما عن عالمهم

مدري كيف وصلت غرفتي اخر شي اذكره نظرته لي نظره لئيمه


هلت علي الاقتراحات والخدمات
كلهم يقولون مافي وقت ولازم اجهز بأسرع وقت
بس كنت جااامده مع الكل لين شفت عيون امي
امي يا ناس مبســــــــــوطه
والله من زمان ما شفتها تبتسم
ياربي ان كان هالشي بيوريني ابتسامة امي
لآانساق فيه ولو به موتي
جلست معها وقلت وانا مبهوره باللي اشوفه
: يمه انتي فرحانه لي صح
يمه والله ما اكسر فرحتس
رضاس يمه عندي بالدنيا ومافيها

*******
:بقولك ايه يا منيره انتي مش حتطلبي مني اية مساعده
انا عارفاكي
بصي انا بعز عليا والله كأنها اختي الصغيره
وعاوزه اخدمها
فقولي من الاخر ايه اللي عاوزاني اساعدك فيه
الوقت ديق ومش حتلحقي
منيره بإمتنان : والله ما تقصرين يا سعديه
شوفي انا امس رحت انا وخالتي واخذت لها اهم الاشياء
بس باقي الفستان
في محل يمدحونه خذي نسرين وخذي اكبرمن مقاسها برقم انا اثق بذوقس
سعديه : انتي تأمر ياجميل وانا في ديك الساعه
لما اخدمكو دنتو اهلي وحبايبي


**********

:لا صدقيني والله ا ن شافته لترميه في وجهس
انا اعرف خالتي لايمكن تلبس هالموديل
سعديه وبمكر : ههههههه ومن قالك اني حخليها تشوفو
دا هيا حتدبس بيه وحتلبسه غصبن عن عينها
دا انا سعديه والاجر على الله
نسرين : انا قلت لس لا تقولين ما علمتس بترميه في وجهس
سعديه وهي تبتسم : انتي اطلعي منها وهي تعمر
مالكيش صالح اتفقنا
نسرين بضحكه : اتفقنا
سعديه :بصي يا بت يا نسرين اوعي تجيبي سيره قدامها
انا عاوزه اصدمها يوووه يقطعني وهي تحط يدها على فمها

وبضحكه افاجأها
*********

يا شين السوق لارحتي تركظين ورجعتي تركظين والمشكله للحين وراي كم مشوار
قمرا: ههههه هالحين بتقنعيني انس ما انتي مبسوطه بهالدوجه بالسوق

منيره : ههههه الا والله مبسوطه مافي احلى من زحمة تجهيز عروسه
قمرا : العروسه عساها قاست اللي شريتيه لها
منيره : لا طبعا يا خالتي
انا احطه عندها وهي تقول زين خليه اشوفه بعدين

والاكياس مثل ما احطها مثل ما القاها ولا ناظرت فيها
الا يا خالتي ياسر ما قالس وش صار بينهم وشلون وافقت عقب ماكانت رافضه
قمرا : الا سألته وما قال الا ان الله هداها

*************
التجهيز كان من الكل تخيلو زواج في يومين
يالله يمدي ومن فضل ربي لقوا القاعه غير محجوزه
وتولى ابو عليان وعليان عزيمة الناس للزواج

*******
ادري اني لعبتها بخبث
وادري انها لا يمكن تقول غير اللي قلته
سويت اللي ابيه ارضيت امي بزواجي
وارضيت عمي بإكمال اللي بداه
بس زعلتها هي غصبتها وحطيتها قدام الامر الواقع
وادري انها لا يمكن بتعديها بالساهل
بس وش بتسوي مثلا بتزعل لها يومين وبترضى


من اصبح الصبح رحت البنك وسحبت مهرها وسلمته عمي
وكلمت سلطان ابيه يحظر زواجي هذا اخوي اللي ما جابته امي


*************


اليوم زواج صديقتي وابي احضره لو سمحت
سند : طيب مافي مشكله
فايزه بتردد : ابي اروح عند امي ومن هناك ابي اروح للعرس
سند : بتشترين لها هديه قبل ما تروحين
فايزه : لا بعطيها فلوس وهي تشتري اللي تبي
سند : اذا تبين رأيي انا اقول اشتري لها هديه
الفلوس بتصرفها وبتنساها مع الايام
اما الهديه كل ما تشوفها بتتذكرس فيها

فايزه : صحيح بس الزواج بالليل ومايمديني اشتري شي
سند بعد ماناظر في الساعه : تبين اوديس محلات الذهب قبل لا تروحين عند اهلس
ناظرها ينتظر منها جواب
فايزه كانت محرجه منه ما عندها رد
عرف انها محرجه منه قال :يالله قومي هالحين ألبسي عباتس
تنحت فايزه
ضحك سند : يالله ترى هالعرض لمدة عشر دقايق
بسرعه تحركت فايزه ولبست عباتها وطلعت له بالصاله
قالت انا جاهزه

********
رحت لبندر لازم اشو ف ردة فعله من بعد ماسمع عن زواج ياسر وعليا
وما تخيلته بتكون هذي ردة فعله
شفته واقف مع عليان وياسر مع العمال
يعلقون لمبات العرس ووعقود الاناره لخيمة الرجال

واشوفه يضحك ويعلق على ياسر
وبقلبي اقول الله يستر منك يابندر

*****************
مرتاح الحمد لله احس اني فرحان لهم وفرحان لنفسي
اني بترك هالهم اللي عقدني
لي كم ليله اترجى ربي وادعيه ان الله يصرف عني
هاجس عليا والتفكير فيها
من كلام بدر لي قبل كم يوم وانا الضيق خانقني
بس ربي مسح على قلبي
الراحه اللي احس فيها عقب كل مره ادعي ان الله
يصرف عني التفكير بعليا وهذا يزيدني اصرار
اني فعلا ما افكر فيها وادعي لها بالتوفيق
***************




صحيح امي ماتقدر تقوم معاي وتفرح فيني مثل كل ام
لكن انا بخليها تشوفني وانا اتجهز واتزين قدامها
كل شي بيكون لامي وتحت نظرها
وبخلي اللي مايتسمى ياخذني من غرفتها
وافرحها فيني زي ما تتمنى دايم
البارح جت ام احمد السودانيه ونقشت ايديني
وجت بتنقش رجولي
رفضت قلت خلاص يديني تكفي
منيره ماخلت كلمه ما قالتها انتي عروس
ولازم من هالكلام بس ما علي منها
نسرين معي من بعد الغدا
قالت : خالتي وش فيس ساكته
مرررره ما توقعتس بتستسلمين
كذا وانتي لس سنين تتوعدين وتهددين
قلت لها بعد ما عطيتها نظره
: انا عشان امي بس ماشيه بهالمهزله

انحرجت مني وحبت راسي

قالت طيب :شفتي فستانس
قلت لها : لا
قالت : علووي لازم تقيسينه يمكن ضيق يمكن واسع
قلت لها بقرف : بلبسه لو هو خيشه واسعه فكيني بالله
تبسمت نسرين


دخلت الريم وقالت جت الكوافيرا
وين تبينها تجلس
عليا : هاتيها هنا عند امي
شوي اتصلت على البيت فايزه وقالت بتمرني
وفعلا خمس دقايق وهي عندي
ياحياتي جايه تبارك وتقدم هديتها
قبل لا تمشي
قالت لي : حاولي تتقبلينه عشان تعيشين
قلت لها :يا فايزه انتي قدرتي تتقبلين سند ؟؟
ردت علي بأسى : انا غير وضعي غير وضعس
وتراني احاول المهم يا قلبي حاولي
والله يوفقس ويسعدس
وطلعت من عندي


رجعت اكمل التجهيييز

و جا وقت لبس الفستان وكان صاعقه لي
وماكان عندي الامنيره
خالتي والريم ونسرين في القاعه
:منيره انتي من صدقس جايبه لي هالمسخره وتبيني ألبسه
ضحكت منيره من كل قلبها : هههههه محد قالس ما تشوفينه
قلت بعصبيه بس بصوت واطي عشان امي
: دبريني هالحين هذا شلون بلبسه
ببرود قالت منيره :عااادي فكي ازاريره والبسيه
قلت لها وانا ودي اخنقها :بالله ! كذا ينلبس طيب
واذا بفصخه من بيفك الازارير ؟؟
قالت منيره بخباثه وإبتسامه عريضه : يعني مين بالله ؟؟
ويالله بسرعه البسي ودفتني
قلت لها متأكده ان هذا انتي اللي شريتيه ؟؟
مستحيل يكون ذوقس !!
ضحكت منيره وقالت : ههههه عرفت ان سعديه
بتجيب شي حلو بس تفاجأت بظهره وحمالاته
شهقت وتفاجأه : منييره يا دبى والله لااردها لس انتي وسعديه
وطلعت دموعي قهر شلت الفستان المصيبه ورحت البسه

الحمد لله ان الطرحه ثقيله وطويله
والا لو ايش ما اطلع بذا المنظر

بس هو للحقيقه فستان جدا حلو ابيض من قطعتين
الصدر بحمالات رفيعه جدا ومشغول كريستال كثيف
ويبدا يخف الى الخصر والظهر شفاف وكله ازار صغيره
والتنوره ذيل سمكه وبكريستال كثيف بالاطراف
ناديت منيره تقفل الازرار

بعدها اول شي سويته رحت سلمت على امي
وخليتها تشوفني
دمعت عيونها ادري بها فرحانه لي
قلت لها وانا ارجف: يمه الله خليس بلاها الدموع
الحين اخرب كل شي واقعد اصيح
والا اقول يمه تراني بهون وانا ابتسم لها



دخلت منيره جايبه المبخره
: كللووولييييش ماشاء الله تبارك الله
روعه يا عليا تهبلييين
تعالي اوقفي هنا خليني اعطرس وابخرس

امسكي الطرحه فوق خليني ابخر شعرس
قلت لها :خلاص خنقتيني خلاص يكفي


قالت لي منيره : اقول عليا اجيب لس سندويشه صغيره
انتي ما اكلتي شي
كشرت وقلت : لاا لا ما ابي بس ابي مويه ذبحني العطش

منيره : ابشري وبجيب لس شي تاكلينه غصب
قلت :لااااا ما اقدر معدتي احسها مقفله


بعد ساعه دخلت علينا خالتي قمراا وعليان

:ماشاء الله تبارك الله الف الف الف مبارك يا حبيبتي
وضمتني وصارت تقرا علي
كنت بحاجه للقراء ه ابي قلبي يتطمن
عليان عند امي ماسك يدها ويغني لها
ويلو يام العروسه الله يتمم هناكي



منيره لبست عباتها وخالتي تغطت وانا تجمدت اطرافي
عرفت ان ياسر بيدخل هالحين





كنت باهرب واطلع من الغرفه بس جمدت قلبي
فرحة امي وابوي تستاهل هالتضحيه وهالديكور

شوي دخل ابوي وفز له قلبي
كاشخ ببشته البني وشماغه وعقاله اللي ما يلبسه الا نادرا

واليوم لبسه عشاني فرحان فيني
بعـــــــــــــــــد قلبي يا بوي
ناظرني وتبسم وقال :

: تفضل
: سلم برسميه
وانا رديت بقلبي
لو ماهو واجب ما رديت
ابوي اقبل علي وتعلقت فيه ابي اتطمن بحضنه
قلت له بهمس : راضي علي يابوي
قالي بنفس الهمس : كل الرضا يا عيني
حبيت يده وراسه قلت له : يا ابوي هذا راس مالي

تبسم برضا وقال : الله يوفقس يا حبيبتي ووقف جنبي


ياسرسلم على امي وحب راسها وايدينها

والتفت لي وتوجه لي وانا من بعد ما سلمت
على ابوي جلست

وحطيت رجل على رجل وقعدت اهز رجلي بتوتر

اثر الكلام غير والواقع غييير
قالت خالتي: يالله يا ياسر سلم على عروستك
واقبل علي ماقمت من مكاني ولا طرى لي
بس عدلت جلستي
صافحني وجذبني بيدي ووقفت له
قال : مبروك يا بنت عمي

قلت وانا اضغط على الحروف :الله يبارك بك
جلس وانا جلست
ابوي قام يعطي ياسر من الوصايا
وهو يقول :عليا بعيوني لا توصي ياعم
وصها هي علي والتفت يشوف ردة فعلي
قالت خالتي:
لا والله انت اللي نوصيك عليا ما تطلع منها العيبه ابدا
ضحك وقال :كذا يمه ترا انا ولدس
قالت خالتي : كلكم عيالي

قال :مشينا ووقف
وطلع برى الغرفه هو وابوي وعليان
وانا توجهت لامي
وحضنتها بقوووه وقلت يمااااه
ما ابي ارووووح معاااه
وانهرت ابكي على صدر امي

*************

بعد ما شريت الهديه لعليا وصلني سند للبيت
ورحت وصلت هدية عليا وهناك يقالي بانصح عليا
ورجعت لي النصيحه
حاولي تعيشين وتتقبلين سند
ناظرت نفسي بالمرايه
وهزيت راسي الفكره مرفوضه تماما
كملت لف شعري بالفير
وتزينت وتمكيجت ولبست فستاني العودي
ورحت للزواج مع ابوي
انبسطت كثير غيرت جو بصراحه
بعدالعشا سمعت ابوي ينادي على اسم عيلتنا
ووادعت صديقاتي
ولبست عباتي وطلعت
وقعدت ادور ابوي وينه
بس ما دريت ان ابوي
راح وخلاني وارسل لي سند
وقف جنبي وقال: غطي عيونس
غطيت عيوني
ومسك يدي ومشى رايح للسياره
ركبت معاه ومشينا
شفته متوجه لبيته
قلت له : وديني لبيت اهلي
قال : رايحين للبيت
قلت له: خلينا نروح نجيب العيال
قال: نايمين بكره عمي بيجيبهم



**********
كنت جالس بالصاله اتفرج على التلفزيون
ودق تلفون البيت الا عمي
يقولي: روح جيب فايزه وروحو لبيتكم
والعيال نامو بكره اجيبهم لك

رحت للقاعه وناديت
وطلعت عرفتها من زولها
شفتها تدور بعيونها الكحيله يا سبحان ربي
وقفت جنبها وقلت غطي عيونس
وتغطت ومشينا للسياره
قالت لي : وديني بيت اهلي
قلت لها: رايحين لبيتنا
قالت : والعيال
قلت لها: بكره عمي بيجيبهم

اول ما وصلنا نزلت بسرعه وتوجهت بعباتها
للغرفه وصكت الباب عليها
لحقتها للغرفه
دقيت الباب فتحت لي
وهي منزويه ورى باب الغرفه بس بان لي وجهها

قالت بربكه : خير ابو ماجد تبي شي
قلت : في شي لازم اوضحه لس
دفيت الباب ودخلت
وليتني ما دخلت وليتني ما لحقتها
ماشاء الله جميله جدا كلها على بعض
ومع فستانها العودي وشعرها بسواده
زادها سحر
قلت وانا ابعد ناظري عنها

: اسمعي يافايزه اتمنى اذا كنتي برى
ما تكشفين عيونس وذاتا لاكنتي متزينه
قالت بإحراج : ابشر


وقفت مثل المراهق ما عندي شي بس ما ودي اطلع
قالت وهي منكمشه من الحيا تبي شي ثاني ابوماجد
قمت اتأمل بشوف فيها فوزه الله يرحمها
لكن ما شفت الا فايزه فايزه وبس
قلت : لا شكرا وجيت بطلع
بس رجعت لها وقلت : الا على فكره انتي قريتي
على نفسس اليوم قبل لا تروحين
قالت : أي الحمد لله

قريت بقلبي اية الكرسي وقربت منها ونفثت عليها

وطلعت
***************


انا بالله وش اسوي الحين
لي ساعه واقف بالصاله مع عليان وعمي رجع للمعازيم
جت منيره تتعذر : معليش يا سر
هالحين تطلع لك عليا بس تلبس عباتها

عذرتها اكيد الحين مسويه مناحاه تبكي
من يومها وهي بكايه
بس بنت اللذينا صايره قمر

طلعت لي لابسه عباتها ومتغطيه
رحب بها عليان : هلا والله بنوارة بيتنا
اللي من غيرها بيظلم وحضنها
قمت سحبتها من حضنه وهي بعنف نفضت يدي
تغاضيت عن هالشي ما ابي اعكر مزاجي

قلت :يالله اسمحو لنا
مشيت وهي وراي
ركبنا السياره ماتكلمت مشيت واخذت لفه بالحاره
ورجعت لبيتياللي هو اصلا ملاصق لبيت عمي من الخلف

قلت لها : يا حيالله عليا
ماردت علي
الله يعييين على المزاج الخربان عارفها لا يمكن يكون هذا حيا


نزلت وفتحت لها الباب ونزلت ودخلت البيت
ودخلنا الحوش اللي مضوي بعقود أنوار العرس

وقفتها وقلت : نورتي بيتي يا بنت عمي

وما زالت ملتزمه الصمت
بس هالمره سبقتني لداخل البيت
وتوجهت للصاله

وقالت : انا تعبانه وابي انام الله
يعافيك بلا ازعاج

قلت بمسخره: حاضر عمتي

دخلت غرفة النوم وانا وراها
نزلت بهدوء شديد عباتها
وتفاجأت باللي لابسته
وش ذا !!!!!!

************

خالتي قمرا تترجاني
ومنيره تتوعدني وانا معنده
لا يمكن اطلع واروح معاه بهذا الفستان
قلت تبوني اروح معاه
فكو ازارير الثوب واغير واروح معه
بعد محاولات باءت بالفشل
رضخو للي ابيه وفكت منيره الازارير مع كم قرصه في ظهري ويديني مقهوره مني

وركظ دخلت الحمام وتروشت وومسحت الخرابيط كلها
ولبست قميصي وطلعت لهم وشعري يرشح مويه
لقيتهم مجهزين لي فستان حق سهره
طنشته وقلت هاتو عباتي

هاوشتني منيره لين انبح صوتها
وخالتي اكتفت بترديد: لا حول ولا قوة الا بالله
جابت عباتي منيره بعد ما يأست مني
وطلعت له ورحت معاه
توقعت اني اروح معاه فندق
بس الحمد لله وداني لبيت خالتي
ودخلت لغرفة النوم بعد ما سفهته مرتين
والثالثه جبتها على بلاطه ما ابي ازعااج
لحقني للغرفه وانا قلبي يرقع مدري وش
ردة فعله على كلامي وسواتي
بس طز فيه ما يمشي كلامه علي وانا بنت ابوي

بس ما قدرت اتحمل ردة فعله
هههههههههههههه فكيتها ضحك


جا بيمسكني هربت منه على الحمام
وقفلت وانا اضحك اضحك
يكلمني من ورى الباب : يا مجنونه يا خبله اطلعي برى الحمام
صرت اهز راسي بلا كأنه يشوفني

اخر شي قلب الضحك بكى
ومن كثر البكى لاعت كبدي
وهو ما وقف دق على الباب
اخر شي صار يسمع استفراغي

:عليا خلاص افتحي وش صار

معدتي فاضيه
ومعدتي مصره تقلب علي
وقفت ورجولي تتراجف ورحت فتحت الباب
ياسر وقف بطريقي
قلت بضعف : الله يرحم والدينك
وخر من وجهي قسم بالله ماني طايقتك

وخر عني وانا رحت للسرير ورميت نفسي عليه
وسحبت اللحاف وتغطيت كلي
ابي ما اشوف شي
ابي انااام يمكن انسى انا وين ومع مين


************
بعد ما رجعت من العرس ودخلت الغرفه
لحقتني سعديه وهي تنزل عباتها
وكانت في منتهى الاناقه والجمال في فستان اسود وفضي

رحبت فيها بحب و انا ناوي اغير كل شي في حياتي للافضل

:هلا باللي لفاني ياهلا به عدد دقات قلبي في غيابه
قلتها بحب لسوسو
قالت بإبتسامه : ياوحش مخصماك ماتكلمنيش
قلت : افى وحش ومخاصمتني لا سوسو
وغنيت لها لك حق تزعل ولك حق نرضيك ما اقوى
زعل حبيب قلبي وعيني
قالت وهي تنام وتعطيني ظهرها :كلام في كلام

قلت لها وانا اعرف ارضيها
: انتي جربيني وشوفي
قالت بأسى لأنها متأكده من رده
: انت عارف كويس ايه اللي انا عاوزه وحموت لو ما عملتوش
قلت لها : قولي و انا اقول لس
شبيكي لبيكي اللي تبينه بين ا يديكي
قالت : وهي تلف وتمسح دموعها : عاوزه اروح لأم فالح

قلت وانا ابتسم واجلس جنبها
: تتوقعين ام فالح تستقبل احد هالوقت وانا اناظر الساعه
قالت بعدم فهم : لا طبعا
قلت اجل الصباح رباح نروح سوا لام فالح

نطت وقفت على ركبها مقابلي وقال بجد يا بندر انت ما تهزرش معاي صح
قلت لها وانا اضحك : لا ما بهزرش معاكي ههههه

قالت بفرح: ربنا يخليك ليا و ما يحرمنيش منك
قلت وانا صادق : ولا منس سوسو


********




يالله وش هالليله الطويله صاحي من بدري
وانكرف ابو جدي تجهيز سريع لغرفة النوم
وعرس واستقبال
وروحه وجيه وعريس فوق هذا كله

اصعقتني عليا بحركتها مرره
ما تخيلت انها ساخطه وغير متقبله للقرار
اللي صدمتها فيه
الا يوم شفتها بقميصها
مدري وش شافت في وجهي
لانها قامت تضحك تضحك
حسيتها انهبلت
جيت بمسكها اسمي عليها هربت مني
دخلت الحمام وقفلت على نفسها
صارت تضحك اكثر
شوي قلب ضحكها صياح والله خفت عليها
بالحمام وانا برى اطلبها تطلع
بس مافي فايده
نزلت بشت الندامه وحذفته على السرير
واستمريت اناديها وهي ماترد
انهبلت يوم سمعتها تستفرغ
ياويلي وش فيها ذي وش جاها
صرت اطق الباب بقوه وانا اترجاها تفتح لي
يالله بعد دقايق فتحت لي
وانا وقفت بوجهها ابي اساعدها
ابي اتطمن اكثر من اني اساعدها
قالت لي بصوت يرتجف : الله يرحم والدينك
وخر من وجهي قسم بالله ماني طايقتك
وراحت على السرير وتغطت وانا مثل ما انا واقف
رحت للمطبخ جبت لها ما ء وحطيته جنبها على الكومدينا
وطلعت للصاله منهد حيلي من كل شي وذي جت كملت علي


قراءه ممتعه لكم وردود حلوه لي



واسمحولي مضغوطه هالايام بوقف لفتره ولكن ان شاء الله راجعه لكم

السلام عليكم ورحمة الله وبركاته

عدت اليكم بعد انقطاع بسيط

شكرا لكل من سأل عني وواهتم لغيابي

كالعاده المبدعه اراده اتحفتنا برائعه من حروفها تصف فيها حال عليا
لست أدري
كيف احتملت ذاك الألم
لست أدري
كيف خرجت من ذاك النفق
الذي أحسست أنه يطبق على أضلعي
ينتزعني من روحي
يخنقـــــني
حتى لا أكاد أتنفس
هل كان مقدراً لي أن أعيش
لكي أكون الضحية
أم أنه مقدر لي أن أعيش
لكي أعاني الألم في سبيل نظرة رضا
في عيون من أحب
نحمل في دواخلنا
أحلاماً وآمالاً
بغدٍ مشرق
فنفاجأ بأنها
مجرد أحلام
لا تغادر دواخلنا
لا تلمني يا صديقي
إن رأيت العقل مني قد ذهب
فالقهر أحياناً يقذفنا إلى الجنون
في لحظة نخالها هي خلاصنا
من ذلك الألم
ضحكاتي ودموعي
ليست إلا
نزف قلبي
من جراحٍ كمنت في داخلي
عمراً
ما كنت أعلم
كيف أبعدها
دون أن أجرح من أحب
أو يجرحني من أحب

اراده





والان استلمو الجزء الجديد
11

مسحت دموعي فرحانه لهم
وودعتهم ورجعت عند اخيتي الله يشفيها
بعد ما ياسر تعب وهو يطلبني اروح معاهم لجده
وعليا تترجا فيني
لين حلفت ما اروح معاهم بس وعدتهم اجيهم




ياعزي عنس ياعليا طلعت وهي توصيني على امها
ودموعها وهي تحضن ابوها
وتعلقت بعليان
حسيت بغربتها
بس ان شالله ياسر يراعيها
و عارفه ومتأكده انه بيتعب معها كثيير
للحين البنت شايله بقلبها عليه
واكبر دليل اللي سواتها بفستانها ليلة العرس
هههههه يستاهل مايجيه
انا بصف عليا ان كانها بتأدبه



جلست مع ياسر قبل سفرهم بليله
وحلفته ووصيته بعليا
قلت له: اصبر وخلي بالك معاها طويييل
واعدني خير وطمني
عساه يصدق




*********


تعرفت على اهل ياسر
يوم زواجه
عمه وعيال عمه
واتفقنا اني ارجع بسيارته لجده
وهو وزوجته بيسافر بالطياره
واليوم الظهر سافر وجيت لعمه المغرب
ابي اخذ السياره

وحلف علي عمه بالعشا يوم جيت اخذ سيارة ياسر
وافقت بس على شرط يكون عشا بيت مايتكلفون
قلطني بالمجلس ودخل داخل

جوعاااان واحب طبخ البيت
من زمان عنه من توفت امي الله يرحمها
وانا وياسر مقضينها اكل عزابيه
جلست اقلب السبحه بين اصابعي واتأمل مجلسهم الكبير
واتحلم بالعشوه اللي اكيد لذيذه


انتبهت على البنت اللي دخلت
ومعاها كيس فتحته وقامت ترص المباخر بالدولاب الكبير
حاطه شرشفها على كتوفها

بس ماشفت منها الا ظهرها
وشعرها اللي مرفوع بكعكه مرخيه من نعومة الشعر
غضيت بصري وتنحنحت انبهها
ألتفتت لي وهي تقول :وجع عبد الله
وماكملت كلامها حذفت اللي بيدها وهربت

قعدت اضحك على شكلها مسكينه انفزعت




*******
اتصل جدي يبيني اجيه عنده ضيف
خالي عليان بعيد
وجيت بسرعه وانا ادخل شفت نسرين
تركظ بسرعه وتدخل للبيت
استغربت
ودخلت المجلس لقيت سلطان صديق ياسر
ورحبت فيه وسلمت عليه
لفت نظري الكيس اللي مرمي في الارض
والدولاب المفتوح والمباخر اللي ما اكتمل رصها

قال سلطان بإحراج : الاهل دخلو مايدرون ان فيه احد


"هبط قلبي
يعني نسرين دخلت المجلس وشافها سلطان
قلت: حصل خير
وانا ودي انها قدامي وافك رقبتها



جا جدي وهو شايل القهوه
واخذتها منه وقمت اقهوي وانا بالي باللي شافها سلطان
شلون يعني جدي ماعلمهم ان عنده رجال
حسيت بصداع من القهر

*********


ايه يابت مالك وشك مخطوف
رديت بنشفان ريق : هااه ولا شي
ودخلت المطبخ اشرب مي
ورجعت للصاله
سألتني خالتي منيره : الا وش فيس ؟ تعبانه !؟صاير شي ؟
قلت بسرعه ابيهم يسكتون عني : لا والله مافيني شي


اخذت كاسة شاهي وجلست في الزاويه مع خالتي منيره
وسوسو وخالتي قمرا
وريم راحت لبيت اهلها


بصراحه بيت جدي خالي من بعد عليا
الله يسعدها خالتي راحت وهي متنكده
اول مره اشوفها كذا قفلت اخر شنطه معها
ناوليني مناديل :
وصدت عني ومسحت عيونها

قلت :ياعلوي خلاص غارت عيونس من الصياح
قالت نسرين امانه امي عندس امانه تكفين كل يوم مريها

قلت :والله حفظت الدرس كل يوووم ان شالله اجيها
بس خلاص وقفي دموع




سمعت خالي عليان ينادي قمت له

وسويت الشاي زي ماطلب
وعرفت ان الدب اللي عند جدي بالمجلس هو صديق ياسر
سلطان

" يهب ياعيونه الدب
بعد ماتمقل وشبع تنحنح وجع

رجعت جلست مع الحريم
قالت سعديه بفطنه : هو انتي يابت لما روحتي المجلس
شفتي حد ؟؟
قلت بربكه : ايه كان في واحد بالمجلس
حذفت اللي بيدي وهربت
منيره: منهو
رديت: خالي عليان يقول صديق ياسر


******
وصلنا ابوي للمطار يالله ما اصعب الوداع
تقطع قلبي على ابوي وهو يمسح دموعه
وهو يوصي ياسرعلي

دخلنا لصالة الانتظار


جلسنا ننتظر الطياره وسرحت بحالي ووضعي مع ياسر



صباحية العرس لقيت ياسر نايم جنبي بثوبه
قمت بسرعه
صليت ولبست عباتي بروح لبيتنا ابي اشوف امي

جيت بفتح باب البيت لقيته مقفول بالمفتاح
رجفت الباب برجلي رجعت لغرفة النوم
ادور المفتاح
مالقيت شي اكيد انه بجيب ثوبه

تذكرت الشباك اللي بيننا وبين بيت خالتي
اللي يفتح على الصاله
طلعت للصاله كان فيه دولاب كبير فيه تلفزيون كبير
حاولت ادفه بس مرره ثقيل ويأست من الشباك
الشباك اللي معه تذكرت
يوم يحشر ياسر نفسه
فيه ويدخل للصاله ويظربني
اذكر يومها عضيته بقوه وما فكيته
لين جدتي قرصتني بفخذي عشان افكه
هههههه اذكر جدتي بعدها راضتني برضاوه طيبه 500 ريال
لاني قعدت مزاعلتها وما اكلمها
وهو امه قالت ان رجله ورمت من عضتي له
يستاهل اجل يضربني ويبيني اسكت له
انا عليا على سن ورمح ولا يمكن اترك حقي
رحت لغرفة النوم وقعدت اتحرك واصك الباب بقوه
وافتح الدولاب ابي ازعجه ابيه يقوم
بس مافي فايده
نايم بعمق
ناديته : هيه انت قم قم يالله
تحرك بس ما صحي
يوووه وش هالورطه
رحت للباب ودقيته
بشكل مزعج ومتواصل قووم قوووم قووووووووم قوووووووووووووووم

صرخ بإنزعاج :يوووووووه بس بسس
وقفي عن الازعاج
وجلس وانا وقفت قباله بعباتي وغطاي مرفوع فوق راسي
قال وهو يتمغط : خييير وش فيس ليه لابسه عباتس
قلت قم افتح لي الباب بروح اشوف امي
عقد حواجبه : أي باب

قلت له: باب الشارع قم يالله
قال وهو عاقد حواجبه وكأنه يتذكر :ما قفلته
قام متوجه للحوش وانصعق من ضوء الشمس وغطى عيونه بيده وتوجه للباب وانفتح معاه بكل سهوله
:ماكان مقفل
قالها بلوم
انصدمت توه كان مقفل شلون كذا
قال : ماهو مقفل بس انتي ودس تزعجيني
سفهته ونزلت غطاي ابطلع
مسكني من يدي وقال : على وين ان شالله
قلت له بعجله وتعصيب : على بيتنا فكني
قال وهو ينزل راسه عن ضو الشمس :
ادخلي هالحين اجهز ونروح مع بعض
قلت له : لاا انا اروح وانت بكيفك متى ما جيت
قال : لا وسحبني معاه للصاله وبعدها لغرفة النوم
قلت له ابي اروح
قال : طيب اصبري دقايق ماني مطول
جالسه بعباتي انتظره بالصاله واهز رجلي بتوتر
ابي اطيير لامي الساعه 11 وهذا على مهله
طلع لي وهو متكشخ على الاخر شماغه الاحمر وثوبه الابيض
بكبكاته السودا وجزمته اللامعه حسيت انه جديد في جديد
ينطق اناقه
لبس نظارته الشمسيه وطلع قبلي وركبنا سيارته
رايحين للبيتنا اللي في الجهه الثانيه





********
بعد ما تغدينا عند عمي رجعت للبيت
بعد ما ناداها عليان وقالت لي ابي اجلس مع امي
تركتها ما ألومها ابدا عليا من حنا صغار
وهي متعلقه بأمها
وين ما تلقى خالتي بتكون عليا اكيد معاها

رجعت للبيت وانا نعساان انتظرت صلاة العصر
صليت بالمسجد ورجعت نمت
صحيت العشا وراسي كنه طبل

توجهت لبيت عمي بالثوب ماطقت ألبس أي شي لوهي طاقيه

جلست بالمقلط مع امي وما شفت عليا

قالت امي : اشرب شاهي يمكن تصحصح
قلت : يمه مصدع نومه زي السم اعوذ بالله
سكتنا شوي وانا منسدح على رجل امي وهي تمسد شعري
قلت : شلونها خالتي اليوم
قالت امي :الحمد لله طيبه
قلت : ابي اسلم عليها
قالت امي : اخبر عليا نايمه عندها اصبر اشوف لك الدرب

دقيقه وامي جايه تقول تعال
دخلت معاها الا عمي وعليان
وعليا واقفه بطرف الغرفه بتصلي
دخلت سلمت وجلست على سرير خالتي
اسأل عن احوالها وهي ترد علي برمشة عيونها

عيني على عليا وهي تصلي

احاول اتجنب مناظرها بس عيني تخونني كل شوي

همس لي عليان بشويش: ارحم نفسك لارحتو بيتكم تمقلها
قلت لها وانا امد فنجالي: صب صب وانت ساكت
ضحك علي عليان وانا عدلت جلستي عشان ما اناظرها

خلصت صلاه وجلست عند عمي محتضنه ذراعه
جلست بمقابلي
وما شاركت ابدا بالكلام والضحك اللي صار



قال عمي : جهزو نفسكم بكره رحلتكم وانا بوديكم
قلت :ان شالله
التفت عمي لعليا وبإبتسامه : جاهزه اغراضس يا عيني
هزت راسها موافقه
قمت واقف : يالله ياعمي اسمح لنا بنروح ننام
وناظرت عليا : يالله ألبسي عباتس
قالت : بنام هنا
قال عمي : قومي يا عليا يالله مع زوجس
قامت ونظرتها كلها غل
لو النظرات تقتل كان قتلتني نظرتها


رجعنا للبيت قلت لها : بكره رحلتنا
ان شالله الساعه 11 الضحى لازم نكون هناك
ماردت علي قلت لها : وش سويتي في الدوام
قالت: اخذت اجازه
قلت : لازم تقدمين طلب نقل
قالت : يصير خير
دخلت الغرفه وصفقت الباب وراها
بغيت اقوم أأدبها حركه بايخه منها وش انا قايلها

جلست وجبت الجرايد المكومه من يوم جيت
وقعدت اقراها سطر سطر ما ابي ادخل عندها ونتهاوش

******
ايوه يا خالتي اوم فالح
في امل يعني
قالت ام فالح بهدوء مريح
: يابنتي الامل دايم بربي
وانتي بإذن الله ما عندس الاشي بسيط
مع العلاجات بتحملين اذا كتب ربي
سعديه تناظر منيره :طيب يا خالتي قد ايه حياخد العلاج
ام فالح تعدل برقعها القطن
وتقوم تاخذ من دولاب جنبها اكياس صغيره
: بإذن الله يا بنتي شهرين واذا مالله كتب حمل تعالي مره ثانيه
وناولت سعديه الاكياس
قامت منيره يالله يام فالح بنمشي هالحين
قالت سعديه : بكام دي الادويه
قالت ام فالح : عطيني اللي يقسمه ربي
ناولتها سعديه مبلغ وطلعت مع منيره

قالت سعديه : ياربي يجعل في ايدها الشفا
منيره :يارب يارب يفرح قلبس سعديه


**************

من يومين وانا في جده مع ياسر

جاامده جدا معاه واعاند بكل شي
على ان ياسر وبكل صراحه انسان محترم
توقعت بيعاندني بيقهرني بيستمر في نرفزته لي
لكنه كسر كل توقعاتي
بالمقابل انا اللي طلعت سخيفه لحد قلة الادب
احاول انرفزه اطلعه من طوره
وهو ما يرد او بالاصح يعاملني مثل معاملة طفل مدلع
تصبر عليييه وفي الاخير تنفجر بوجهه


واليوم انفجر في وجهي
معزومين عند ناس اصحابه ورفضت اني اروح
قال بعد العشا تكونين جاهزه وماراح اكثر كلام
وجا بعد العشا وانا منسدحه بالسرير وأقرا لي مجله
ومسويه قناع لشعري فيه بيض وزيت زيتون
عشان اخليه ييأس من روحتي

فتح الباب بقوه فجعني
قال بعصبيه : ليه ما تجهزتي
رديت وانا اتصفح المجله ببرود
المجله اللي حفظتهامن كثر ما قلبتها
:قلت لك ماني رايحه
قرب مني ومسكني من عضدي ووقفني بقوه
:معاس بالضبط عشر دقايق

قلت بقهر :ما ابي اروووح يا اخي انت ما تفهم
صرخ علي وقال : انتي اللي ماتفهمين يالله

وراح للشنطه حقتي الي ما فرغتها


وطلع فستان مشجر بدرجات البنفسج شاريته لي منيره
وطبعا ما قسته ولا جربته ماااهو ذوقي يعني


وحذفه بوجهي : البسي يالله
قلت له " شعري حاطه فيه بيض
رد علي بقرف : وليه حاطته يعني عشان ما تروحين
بس ماهي علي هالحركات بتروحين بزفرتس وزنخ البيض

قلت بإستسلام : طيب اصبر عطني ساعه اكون جهزت
قال وهو قافله معاه : نص ساعه وتروحين معي
بالشكل اللي انتي فيه


فركت شعري بالشامبو كم مرره ابي ريحة البيض تروح
اخر شي طلعت
وحطيت لي فحم خليني ابخره يمكن تخف الريحه

لبست تايير اسوود ونشفت شعري بهوا الاسشوار
وربطته ذيل حصان بعد ما بخرته بعوده
بخيييت عطر بكثافه ما ابي اشم اية ريحه شينه

تمكيجت ببساطه ماحب اكثر

دخل علي وهو متنرفز على الاخر


ما خلصتي
وقف وعيونه تتفحصني

خفف من حدة صوته وقال :يالله امشي تأخرنا وطلع
كشرررت مااا ودي يشوفني كذا
وبعد هو مدري وش يبي هو ونظراته
اف بس

************


اه يا قلبي ذي ناويه تجلطني
وش هالزين
بس ما ودك تتكلم والا تعصب تخرب زينها كله

طلعنا من البيت سحبت نفس واخترقتني ريحتها
: انتي ليه متعطره كذا
قالت وش فيك لا تصارخ
قلت لها : انكتمي اخر مرره تطلعين متعطره
ريحتها تجنن
عارف اني بنجلط الليله منها كل شي فيها يجلط


وصلنا بيت ابو وليد

قلت لها : هذا بيت مديري في العمل ابو وليد

نزلنا ودخلتها من ممر مدخل الحريم وانا رحت للرجال

وكان ابو وليد الله يجزاه خير متكلف جدا
احسه ابوي من كثر فرحته فيني


**********



دخلت واستقبلتني ام وليد
يا هلا ياهلا بعروستنا
اتفضلي يا مرحبا بك
السلام عليكم وكشفت غطاي وطاحت عباتي على كتوفي

ام وليد : ماشا الله ماشاءالله ربي يحرسك
خجلت منها وهي تتفحصني
قالت لي : اتفضلي من هنا يا حبيبتي
مشيت وراها وعباتي تسحب وراي

وارفعها وتطيح حست فيها كأـني اول مره ألبسها
بس عرفت وش عيبها عباتي جديده وطويللللله
الله يسامحس يامنيره

دخلت مجلس ام وليد والا المجلس صاااك حريم

وبدت السلامات اثقل مهمه لا صرتي ما تعرفين احد منهم

كلللللهم جالسين بدون عباياتهم
وانا بجلس بعباتي ما تعودت انزل عباتي عند الناس
ووقفت قدامي ام وليد : اديني عبايتك
تبسمت بحرج : لا خليها
قالت ام وليد : وي اش خليها
هاتي عبايتك يالله انتي عروسه

مدري شلون نزلتها واكيد بان في وجهي اني مش متقبله

رتبت شعري بحرج وجلست
عن يميني عجوزه نحيفه و لابسه فستان كرته كحلي واطرافها ابيض
ومنديلها الابيض على راسها
وسبحتها في يدها وخاتمها الفيروز يزين اصابعها النحيله
قالت لي: مبروك يا عروسه منو المال ومنك العيال
قلت لها بحيا طاغي
مدري وش جاني: الله يبارك فيس
قالت اللي عن يساري وكانت بعد حرمه كبيره
بس مليانه :ايمتى كان فرحكم
قلت لها قبل اسبوع تقريبا
ضحكت بإستضراف : وي لسى دوبك جديده
ههههههههههه
مدري وش ارد عليها
تبسمت من غير نفس

دخلت المجلس وحده كنها القمر
وكانت لابسه قصيييييير وكعب عالي

وشعرها مرتب بشكل كأنها طالعه من مجله

جت عندي وقالت : اكيد انتي عليا
ياسر موصي عليكي
وقفت لها وبوستها وقلت بجفاف : اي انا عليا
من معي ؟؟
قالت برقه ودلع طبيعي : انا بشرى
اخت ابو وليد
قلت : اهلا تشرفنا
كانت الجلسه ثقيله على قلبي
حسيت نفسي غريبه
تمنيت اني في بيت اهلي وبين اهلي واحبابي
مع انهم رحبو فيني واسرفو في كرمهم لي
بس نااس غيررر
وانا غيير

بعد العشا اغلب الحريم راحو بقي
ام ابو وليد اللي هي ام كرته كحلي

وبنتها بشرى طبعا
جت جلست جنبي وقالت : انتي مدرسه صح
قلت لها: أي مدرسه
قالت انا لسى بدرس في الجامعه
وبدت تسولف :
اخويا ابو وليد بيحب ياسر كثيير ومعجب فيه
قلت بقلبي : وانتي بعد شكلس معجبه فيه

ضحكت وقالت بهمس :الكل في هادا البيت
بيحبو ياسر
طارت عيوني من جراائتها
ضحكت من كل قلبها على نظرتي
وقالت وهي تحاول تسكت : سامحيني يا عليا بس نظرتك وملامحك بتقتل كل كدا بتغيري عليه
حاولت اكون مؤدبه وحليمه عشان ما اقووم اصفقها

قالت وهي تمسح دموعها وبهمس : بس انا لا
الله يعينك على دموو التقييل
اخذت ثواني استوعب هي وش تقول
بعدين انا فكييييت ضحك
عجزت اسكت
اخيييييييييرا لقيت احد مثلي يشوف ياسر وثقل دمه


***********

ريمو علامس بس نايمه
قالت وهي يالله تفتح عيونها
: مدري بس ما اقدر افتح عيوني نعسااانه
عليان :طيب ازحفي ابي انام حتى انا
ريم : والله مافيني روح نام بمكاني
عليان : ما اعرف انام الا بمكاني
ريم وهي يالله تسحب نفسها واخذت مخدة عليان وعطته مخدتها
ضحك عليان ياحراميه عطيني مخدتي
تمسكت بقوه بالمخده وهي تشمها لاا خليها ياخي فيها ريحه تهبل
عليان :طيب بس لا عاد تقولين ياخي ناظر بريم لقاها نايمه وبعمق
عدل المخده ونام





من زواج عليا والعيال عند امي رافضه تجيبهم
ويوم راح سند يجيبهم
حلف ابوي مايطلعون من البيت الا بعد اسبوع
اتصلت على امي :
يمه ليه ليه ابوي يحلف
انتو عارفين اني هنا في بيت فوزه عشانهم
مو معقول والله اللي سويتوه

امي بهواش : بلا خرابيط انتي هالحين في بيتس ومع رجلتس

وفوزه الله يرحمها انسيها
لا تخلينها عذر وسبب لخراب بيتس
قلت بقهر : يمه سند اشتكى والا انا اشتكيت
قالت امي : ياافضحي وانتي تبين الرجال يشكي
قلت وانا ابكي : يمه تكفيييين انسوني انا وسند شيلونا من بالكم
قالت امي بزعل : انساتس انسى بنتي قطعه من قلبي
والله يا فايزه ان همتتس ماينومني الليل
قلت : يمه سامحيني بس ترا انتي مشغله حالتس
والا انا بخيير بس اعتقووني اعتقوووني


**********
من ليلة الزواج وهي تصدد عني
وانا بعد ما ودي اشوفها وما اقدر امنع نفسي ما اعجب
وزادها عمي بحركة العيال
ما تجي الامور كذا ياعمي
اسمح لي تصرفك غلط في وقت غلط


قررت اريح اعصابي واريح فايزه بعد
جهزت عزبة البر وطلعت مع واحد من اخواي
بعد ما بلغت عمي عشان يروح ياخذ
فايزه عنده بالبيت لمن ارجع
***********




قراءه ممتعه لكم وردود حلوه لي


ولكل من يختبر بالتوفيق يااارب

السلام عليكم ورحمة الله وبركاته





12



ما قدرت اغيب هي ليله اللي غبتها بالبر اشتقت لعيالي
وفايزه طول الوقت بين عيوني
تعذرت من خويي ورجعنا
دخلت البيت ابي انام واذا قمت اروح اجيبهم
دخلت الصاله استقبلني ماجد وفارس
وقامو ينتطوطون فرحانين برجعتي
: ابوي جا ابوي جا
ضميتهم لصدري ابي ادخلهم داخل قلبي من كثر ما اشتقت لهم
رفعت راسي واشوف فايزه شايله منوله
قمت لها : شلونس فايزه
ومديت يدي لمنوله اللي طارت لحضني
فايزه : الحمد لله بخير
قلت :ما رحتي لبيت عمي ؟
سحبت خصله لورى اذنها وقالت : لا ابوي جاب العيال
امس ونمنا هنا
قلت : ممكن تجهزين القهوه ونتقهوى مع بعض ابي اتكلم معاتس
قالت بهمس : طيب ان شالله دقايق
"مدري وش اللي خلاني اقول كذا وش ابقول وش ابحكي معها

***********

ركبنا السياره راجعين من بيت ابو وليد
سألني ياسر: كيف لقيتي الناس ؟
قلت : عادييين ناس مثل أي ناس
ياسر : استانستي يعني والا لا
قلت ابيه يسكت : ايه استانست
ياسر : اكيد شفتي الخاله زكيه
قلت : اكيد
ألتفت علي وقال متنرفز : انتي وش فيس هااه
ابي اعرف خياسة النفس اللي انتي فيها على ايش؟؟!!
قلت : وش انا قايله وتهدج صوتي فيني صيحه
اجل انا يصرخ فيني من دون سبب
قلت : ماهو عشان ابوي واخوي بعيد
بتستفرد فيني وتتقاوى علي وتحسب اني بسكت لك
التفت على الطريق وزفر بقوه : اعوذ بالله من الشيطان الرجيم
وكملنا الطريق ساكتين
نزلني للبيت وطلع
"بقلبي قلت احسن فارق انت و وجهك

نزلت عباتي وحذفتها بطول يدي
طولها قهرني وفشلني
الله يستر منس يا منيره انتي ومشترياتس العجيبه

قلت خليني اشوف وش انتي شاريه لي
فتحت الشنط وقعدت اقيس واجرد اللي اعجبني
واللي نص ونص والي ما عجبني قليل
بس الله ياهي مكثره من لبس المصاخه هههههه
قعدت اتأمل وش هي شاريه
كلها ما عجبتني الا قميص طويل
وردي وعليه روب اسود دنتيل
بسيط ونااااعم
مدري وش اللي ظربني براسي وخلاني ألبسه
وقفت قدام المرايه اتأمل شكلي
فكيت شعري وضبطت كحل عيوني
وزدت من روجي لبست صندلي وقعدت اتمشى قدام المرايه
قلت لنفسي بصوت عالي
: امممم ماهو شين هالقميص
رد علي ياسر : الا ياحلوه هالقميص
شهقت من كل قلبي بغى يوقف نفسي
***************

قاهرتني عليا هالحين انا وش قلت لها عشان تزعل
انا طلعت من بيت ابو وليد رايق
وكنت ناوي اخذ فيها لفه على البحر
بس هي نرفزتني بأسلوب ردها علي
تعوذت من ابليس وسكت ما ابي نغلط في بعض
ومن وصلتها للبيت طلعت
قعدت الف بالسياره مالي وجهه
ضايقني جدا اسلوب عليا رافضه تنسى لي جهالة زمان
تتعامل معي بحده وقوه
ماهو عجز مني اني اسكتها لكني ارحمها
لو بررد لها الصاع صاعين
واقل عقلي وارد عليها بالمثل كان ذبحتها من اول يوم
الله يلهمني الصبر ويلهمني القووه امسك اعصابي
لا تنفجر في وجهس يا عليا

ناظرت بالساعه ما احب اتركها لحالها بالليل

عبيت بنزين ورجعت
فتحت البيت ودخلت مالها حس
جلست بالصاله ما ابي احتك فيها
بس اسمع صوت بالغرفه
رحت اطل اشوف وش تسوي
آه ياقلبي وش هي لابسه وش هالزين اللي هي فيه
وقفت مذهول
معقول بتحن علي وتبينا نبدا حياتنا سويه
واقفه قدام المرايه تتأمل زينها وانا تذبحني بحركاتها


: امممم ماهو شين هالقميص
رديت بإبتسامه ونظره متفحصه : الا ياحلوه هالقميص
شهقت المسكينه حسيت ان قلبها بيوقف
قربت منها ويدي ورى ظهرها
ويد ماسكه كفها:بسم الله عليس انا ياسر
دفتني من صدري : بسم الله الرحمن الرحيم
بس انا مثبتها بين ايدي
قلت بهمس : خليس هنا عليا
تشنجت وابعدت وقالت بربكه : لا
كنت اقيس الملابس
قلت وعيوني بعيونها وانا اقرب منها : عليا انا اسف
اسف على كل شي

مسكت يدها بحنيه :انا متأكد ان اسفي هذا مايرضيس
من نظرة عيونس اللي تحكي اللي بخاطرس
قالت بشراسه : اسف على ايش والا ايش يا ولد عمي

اسف انك تركتني معلقه سنين
والا اسف على غصبك لي وحطك لي قدام الامر الواقع
ماهو مقبول ماهو مقبول يا ياسر
ودفتني بشراسه وطلعت وخلتني


*******

فايزه ابي اتكلم معتس بكل راحه
من دون ما تكشين مني
ابي لا ناظرتس تبادليني النظره
انتي زوجتي حلالي
" دمعت عيوني واحس بالغصه تسد حلقي
مقدر والله ياسند ما اقدر
كمل سند: فوزه الله يرحمها
وصدقيني ما انا بناسي طيب عشرتها ام عيالي
سكت يتعبر ناظرت عيونه
المليانه دموع
قلت بصوت مخنوق : اصبر علي ماهو بهالسهوله

سند: وانا ما ابي منس الا انتس تحاولين تتقبليني
مسك يدها يأكد كلامه وهي أجبرت نفسها ما تسحب يدها
**************


انت وش بلا ك بس تدور
وش عندك
نط وجلس جنبي : يمه
منيره : عادل قل وش عندك
عادل: يمه بتكلم بس لا تكسحيني تكفيين
منيره : ابشر قل يالله اسمعك
عادل : ابي تخطبون لي
منيره بإبتسامه عريضه : وشو
عادل بإبتسامة حرج :ابي تخطبون لي نسرين
منيره ولازالت مبتسمه
: وش معنى نسرين ؟؟
وبعدين انت للحين تدرس وصغار كلكم على الزواج
عادل : بس خطبه يمه اخاف تنخطب لغيري

ظربته منيره على يده بخفه : ياللي ما تستحي من متى وانت تفكر بالبنيه
عادل بضحكه وشوية خجل : يمااااه
..... هااا وش قلتي
منيره بتفكير : وش قلت بعد قلت لك يا حبيبي انت للحين تدرس
ادخل الجامعه ااول عشان اخطب لك

عادل تغيرت ملامحه وهبط حماسه بسماعه
كلام امه : يمه طيب علمي ابوي خليه يحط خبر عند عمي

منيره : يصير خير اقوله بس مدري بعد وش يقول ابوك

ويالله قم رح للمسجد الحق الصلاه
**********

دخلنا البيت وعلياان راح ركظ لغرفة امه
يا قلبي فرحان بيبشرها بحملي
دخلت وراه الغرفه فزت فيني خاله قمرا : ياعله سعيد ومبارك
مبروك يا الريم الله يتمه على خيرر
رحت حبيت راس عمتي ام عليان هالحرمه تعور قلبي

ما تعبر الا بعيونها

احس عيونها تنطق فرحه وحسره بنفس الوقت
يالله لو بتتكلم وش بتقول وش بتعبر عن فرحتها
بتبكي والا بتزغرد والا بتضحك والا كلهن
مهما تخيلت وش بتكون ردة فعلها
ما يمكن اتخيل الله يشفيس يا عمتي
الله يشفيس


جلست جنب عليان بلا شعور مني

انتبهت على إبتسامة خالتي قمرا

قمت من على سريرعمتي وجلست جنب الخاله قمرا
همست لي بمزحه : شكلس متوحمه عليه
ضحكت بفشيله وحطيت يدي على فمي اداري فشلتي
:هههه شكلي والله يا خاله ههههه تدرين ووش ودي اسوي
قمرا: بهمسه باسمه : وش ودس تسوين
الريم بهمس شديد: ودي اسحب شماغه اشم فيه ليين انااام
قمرا بضحكه : ههههه الله يزيد المحبه
بس انتي عكس الحريم يالريم
دايم اسمع ان الحريم يكرهن ازواجهن وقت الوحم
وانت عكسهن
الريم بخجل احمرت منه خدودها : ودي بس اتنشقه واشم ريحته يااااازينه هو وريحته الله يخليه لي
ضحكت قمرا بصوت عالي ماقدرت تتماسك اكثر : ههههههههههه
امين يا قلبي امييين
عليان يناظرهم : خير الله يجعله خير هالضحكه
ارتبكت الريم خجل وردت قمرا : ابد يا حبيبي تذكرت لي سالفه

*************



وش اخبارس يالعروس
عليا : عاادي مافي اخبار
فايزه : ياكذابه مومعقول اكيد قايمه حروب بينكم
عليا : ههههه لا والله هي مره بس دحرنا الشيطان
فايزه : اكيد هو اللي ادحره مو انتي ابد
ضحكت عليا : عفيه عليس عارفتني
طيب وانتي وش صار معس
فايزه : يختي مدري وش اقول
قبل كم يوم جلسنا وقالت لعليا كل شي
عليا : الله يعينس مدري وش اقول بس فعلا لازم تتقبلينه
فايزه : بضحكه : ههههه طيب يا ناصحه انصحي نفسس
والحين يالله منوله تبي تنام تمسين على همسة حب

عليا: هههههه أي بالاحلام
فايزه : انتي بس خففي على نفسس القيود
وعطيه فرصه يمكن تلقين فيه جانب يعجبس
عليا : متأكده ما في اي جانب بيعجبني
وخلاص روحي لمنوله
فايزه : يالله ابي اسمع اخبار طيبه المره الجايه
عليا : وانتي بعد
انتهت المكالمه وكل طرف يتفكر بالكلام اللي انقال
بس من ينفذ من؟؟؟؟
**************





راجع مطنقر من سيارتي طفت فجأه
واضطريت اوديها للصناعيه
ورجعت مع تاكسي فظخ راسي وهو يقرق علي

وصلت وانا ارشح عرق
اليوم الرطوبه عاليه وخنقه مافي نسمة هوا
دخلت البيت توجهت للمجلس اللي فراشي فيه اخذت منشفتي

وتوجهت للحمام الصغير
فتحت المويه ابي المويه تمشي عشان تنزل لي المويه البارده
بس مانزلت ولا تقطه
الحمام مافيه مويه وانا ابي تروش
فكرت اروح لحمام غرفة النوم
وفعلا توجهت للغرفه لقيت الباب مقفل
دقيت الباب بقووه
بعدها بثواني انفتح الباب.


كل مرره اشوفها تبهرني اكثر
للان ما أ صدق ان ذيك المنكوشه اللي زمان.واقفه قبالي
عيوني جالت بكل تفاصيلها وماحرمت نفسي ابد
هي مثل الاطفال واقفه ومتخصره وشعرها متناثر حول وجهها
:نعم تبي شي
خشنت صوتي : ليش قافله الغرفه
يعني بتمنعيني يعني

حسيتها مثل اللي صحت ووعت
وانتبهت لنفسها لانه واضح جدا انها نايمه تماماً
قالت : لا كذا قفلته عادي ما انتبهت

: طيب سوي لي عشا جوعاان بسرعه
عليا طيب ان شالله

قلت لها وانا اتوجه للحمام بتروش وان طلعت والعشا مو جاهز
بسود عيشتس
قالت : نعم وشو تسود عيشتي
ليش إن شالله
هذا وانا قلت طيب وان شالله
والا لازم تهاوش وتلقا لك فرصه وتغلط علي
اكيييد ابو طبيع مايجوز من ....
قربت منها انا مبتسم وسكتها غصباً عنها

وخرت عنها و حبيتها على خدها بسرعه :
امزح امزح يا بنت الحلال ما ينمزح معس
حطت يدها على شفايفها مذهوله مني

تركتها ودخلت للحمام وانا فيني ابتسامه.
انتعشت بالترويشه وطلعت وانا متأكد بلقاها في حال ثاني

فعلا صدقت هقوتي
ما تناظرني ابد حطت لي العشا وراحت للغرفه
تعشيت وانا مبتسم للحين يا عليا ما جاس شي
انتي مايجي معاس الا كذا من هنا ورايح



**********

في جلسه صباحيه بين الام زكيه والبنت بشرى
: زوجة ياسر عسل حبيتها يا ماما
تكفي هرجتها
الام بتحسر : صحيح
بس والله يا بنتي ياسر يااما تمنيته ليكي

بشرى تضحك: الحمد لله انو أتجوز وريح وارتاح
ما اتقل دمو

عكس صاحبو داك التخين

ابتسمت الام: سلطان عسل بس مسكين تخين تخيين
ربي يخفف عنووو
بشرى بإبتسامه كبييره : امييين
يالله يا ست الحبايب اسيبك دحينا اتجهز للجامعه
الام: ربي يوفقك ياحبييبتي ويسعدك ويرزقك بإبن الحلال
بشرى بهمس : آميييين

ياااااه يا رب يكون سلطان من نصيبي
كل ما افتكر ايام زمان
كانو ساكنين في العماره معانا قبل ما يبيع اخوي العماره

افتكر كنت دايم امر الحجه في طريقي
من المدرسه واشتري لو الحُمر
هههههه افتكر اول مره شافني فيها
وانا اشتري من عند الحجه
سألني : وش ذا اللي في يدتس

قلتلو : هادا حُمر
قال : يعني وش ؟
فكيت الكيس الصغير واخذت كم حبة حُمر ونزلتها في يدو
اكلها كلها مره وحده من دون ما يقشرها
صرخت فيه :لا لا مو كدا تتاكل يا فهيم
طلعها من فمو قرفان : وع وش ذا قشور
قشرتلو حبة حُمر واديته
تتاكل كدا وتخرج النواه الصغيره
بعد كدا صار كل ما يشوفني يطلب حُمر
وهو كمان كان دائما يجب لي معاه
حاجات حلوه شكلاته عصيرات
بس ياخساره اتنقلنا لبيتنا الجديد وتغطيت عنو
ومن زمان ما شفتو

نفسي اشوفو زي زمان سلطان اطيب قلب
*********


في جلسه صباحيه ثانيه اجتمعن في غرفة ام عليان

قمرا وام احمد ومنيره وسعديه والريم
على فطور من يد الريم

قالت منيره : خالتي انتي ما رضعتي اختي حصه مع ياسر ؟؟
قالت قمرا الا وابطيت ارضعها
كان نفسي اول حمل لي تكون بنيه
بس الله رزقني بياسر
قالت سعديه : على كده ولاد حصه ربنا يرحمها
يبقو ولاد اخت ابنك وهو يبقى خالهم
قالت منيره :هههههه يعني محرم لنسرين حلووووو
قالت الريم : وليش ساكتين كل هالسنين
قالت قمرا بحررة جوف : اللي كنت فيه ينسي الواحد اسمه مو رضاعه الحمد لله تنذكر ما تنعاد يارب

*************





:اجهزو بنروح ناخذ عمره
: واااااااي شكرا شكرا شكرا يا بوي
ضحك بندر : كل ذي فرحه
نسرين : اشتقت لخالتي عليا اكييد بنمرهم
سعديه بقصد: اه ياحبيبي عاوزه تشوف خالها وخالتها
عقد حواجبه بندر بإستفهام : خالتها وعرفناها
بس منهو خالها ؟
سعديه بضحكه : ياسر يبقى خال ولادك
عبد الله : لا ماهو خالي زوج خالتي
سعديه : هو انا ما قلتلكووش مش خالتي قمرا
مرضعه حصه ربنا يرحمها مع ابنها ياسر
بندر تذكر : أي والله صحيح ياسر اخو حصه الله يغفر لها
شلوون نسيت هالشي

نسرين : شلووون يعني عسى تبوني اكشف عليه
مستحييييييل
ضحكو عليها وعلى موقفها من الخبر
سعديه :يا بت ياعبيطه ياسر ده يبقى خالك بلاش حركات نص كم
نسرين : نص كم كم طويل ما اكشف يعني ما اكشف
بندر :اذا تقابلنا يصير خيير

انا طالع الحين بشوف السياره
سعديه : بالسلامه يا حبيبي
***********


سلطان من شاف نسرين وهو يشاور نفسه
ملييت من العزوبيه اول ياسر يسليني
ونتعاون على الوحده والعزوبيه
بس الحين صفيت لحالي
ياسر انشغل بحياته وان كان ما ينساني يمرني يوميا
بغيت انجن انسى وانادي ياسر اتخيله للحين موجود

اليوم انا لازم اكلمه اشوف منهي ذي اللي شفتها في بيت عمه



بتوكل على الله واخطب منهم

**********


قراءه ممتعه لكم وردود حلوه لي

السلام عليكم ورحمة الله وبركاته

حيالله الجميع اعذروني على التأخيير

13

انهيت اتصالي بياسر وقمت استعد للسفر مع بندر وعياله
فرصه اخذ عمره وامر ياسر وعليا واتطمن على احوالهم
اول شي قمت لاختي و قلت لها :
اسمحي لي ياختي بغيب عنس يومين
اعتمر واتطمن على العيال ياسر وعليا
وراجعه ان شالله
وبإذن الله باخذ لس عمره ياختي واجيب لس معي من زمزم


دخل عليان وسلم علي
واحتضن امه وقال : اجل ياخاله رايحه مع بندر ان شالله
قلت : ان شالله يا ولدي يومين بالكثير وراجعه
عليان : خذي راحتس ياخاله الريم موجوده
ومنيره قريبه تطل علينا
انتي روحي وادعي لنا ياخالتي
:ابشر يا حبيبي
***********

: عليا بعد بكره ان شالله امي بتجي
عليا بفرحه : صدق
ياسر : ان شالله بتجي تاخذ عمره
عليا : الله يحييها
ياسر : بس انا كنت مخطط شي ثاني
اخذت شاليه ابو وليد
عشان نقضي فيه كم يوم انا وانتي
قالت عليا : عادي تروح معانا خالتي
قلت : بس امي بتجي مع بندر
لوت فمها من سيرة بندر: هو اللي بيجيبها ؟
ناظرت فيها بتأمل : ايه عندس اعتراض؟!
عليا رفعت كتوفها : واعترض ليه بكيفهم

"بصراحه من دريت انه بيجي
وانا ابليس اشتغل يوسوس لي
اكيييد جاي بيشوف وبيعرف اخبارنا
بيتبع حبيبة القلب
من طرى لي كلامه لبدر يوم يعترف بوقاحه
بحبه لعليا حسيت الدم يغلي بعروقي
والله من الجراءه يا بندر والوقاحه



قلت لعليا بحده قومي سو ي لي شاهي
ناظرتني مستغربه حدتي وما تحركت
قلت لهابصراخ : يللله قومي وش تنتظرين
قامت وهي تقول وتحب يدها وتحطها على جبهتها : الحمد لله والشكر سكنهم مساكنهم يالله


طيب كيف اروح وامي بتوصل بعد بكره شلون يدلون الشاليه
اممممم أي اكيد مالي غيرك يا سلطان هو اللي بيجيب لي امي

رحت للمطبخ وشفت عليا واقفه قدام الفرن تنتظر المويه تغلي

قربت منها وضميتها بقوووه
وكأني اثبت لنفسي انه من حقي ومن حقي اضمها متى مابي واحب




*******************


بسم الله الرحمن الرحيم وش بلاه هالرجال
ماهو بطبيعي اليوم من عرف ان امه جايه وهو في حاله غير طبيعيه

فجعني وانا واقفه بالمطبخ بضمته لي بدون ما احس بدخلته علي
حاولت اتملص منه بس ماش مثبتني ظهري لاصق بصدره وراسه مثبته على كتفي دقايق وهو على هالوضع
خطف انفاسي بانفاسه الدافيه
ارخى من ضمته لي ولفني اواجهه
غرقت بحياي ماعرف وش يجيني لا صار قريب مني كذا ينربط لساني
رفعت عيوني له وتعلقت بعيونه
اول مرره انتبه لعيونه ورموشه آآآه ياقلبي
ياهي تحكي نظراته مرررره خجلت من نظراته


تنحنح بخشونه
قال : بروح لسلطان ارجع القاس تجهزتي بنروح اليوم للشاليه
طلع وتركني
اووووه توني تذكرت وتنفست ما اقولكم خطف انفاسي

********************

جاهزين بنمشي وركبنا السياره
وعفشنا مربط فوق جمسنا
ادور حوالين السياره اتفقدها
و ننتظر ام ياسر تطلع عشان بنمشي
ناداني بدر واخذني على جنب
متردد بس قالها بوجهي صريحه : بندر ليه رايح للحجاز
ناظرته مافهمت سؤاله ومتعجب قلت : ابي اعتمر
حط عيونه بعيوني : بس يا بندر
قلت : وش عندك يا بدر يعني وش
بيخليني اتعنى غير العمرة
قال بدر: يعني عليا مالها دخل
عقدت حواجبي غضب : بدر بنت عمي الله يستر عليها
محيت كل اثر لها بقلبي
اصلا ماكان لها شي كانت وساوس ابليس
والله يخلي لي ام محمد( سعديه ) يناديها احياناا ام محمد
بدر شد على كتفي : كفو ياخوي كفو
يالله تسهلوو وحافظكم ربي وطوى عنكم الارض

سلمت على بدر وانا اغلي زعلان زعلان
يشهد الله علي ماجت عليا في بالي من قبل زواجها بياسر
اشمأزيت من حالي زمان
وتحمدت ربي الله من علي بان هداني ومسح على قلبي
ركبت السياره لقيت سعديه راكبه قدام
قلت لعبد الله اللي جالس في المرتبه الاخيره : ورااك راجع
قال وهو يعدل المخدات تحته : بنااام يبه وراانا خط شطوله
ضحكت عليه قلت: ترا بنص الخط بتجي تكمل عني
والتفت لسعديه : يا حيا الله بنت الشيخ سيد
ضحكت سوسو : يحيك ويبقيك يا خوياا
قلت بضحكه : بطليهااا اخويا ذي قولي حبيبي عمري
الا اخوياااا انا مش اخوكي ياست
سعديه بنقابها الواسع وحواجبها الظاهره منه
: حاضر ياسيدي دانتا تأمر امر
ناظرت بنسرين : الشيخه نسرين علومس يمه
نطت لاصقه بمقعد ابوها: الله يخليك يبه
والله الشيخه نسرين مبسوطه بالمره
وتنتظر بس الوصول
انفتح الباب وركبت قمرا السياره
بجنب نسرين : السلام عليكم ابو عبد الله
بندر: هلا هلا والله بام ياسر
تو ما تباركت السياره
قمرا الله يبارك بك وبعيالك ومالك وصحتك
يا ابو عبد الله ويخلي لك هالسكره
سعديه : تعيشي يختي
قلت : جااهزييين يالله بنمشي
: ناظر في سعديه : هاتي القهوه والشاهي قدام
عشان تقهووويني في الطريق
قالت نسرين :لا معليش ابوي هذي مهمتي ارتاحووو
قالت سعديه : يعني حتكوني المضيفه بتاعت الرحله ديه
ههههههه
نسرين : حلم حياتي اكون مضيفه
قالت سعديه : هيا وظيفه حلوه بس متعبه
عندك استعداد تخدمي على كل المسافرين
قالت نسرين بحماس : طبعا
قالت سعديه : طيب لو حد منهم داخ وألبت معدته
وعملها ورجع حتمسحي لو وسخاته
قرفت نسرين : وااااع لاا ما ابي ما ابي انا ابي بس اسافر واشوف الدنيا
عبد الله : اقول اسكتي بس قال مضيفه قال مدرسه ويخب عليس وظربها على راسها بشويش
صرخت نسرين بدلع : يباااه شف السخيف عبدالله
ناظر بندر بحزم لعبدالله : اصحك تمد يدك علييها هذي الشيخه نسرين
وخلااص خلوني اسوق بتركييز

وانطلقووو في طريقهم
**********

لابس ومتشخص بروح لياسر
ابي اكلمه عن موضوعي ابيه يسعى لي في خطبتي
ناظرت نفسي في المرايه
ما رضيت عن نفسي ابد الفتره اللي فاتت زاد وزني بشكل كبير
شكلي مايشجع ابد اخاف مايرضون والسبب وزني
دب مثلي بيخطب عصفوره مثل ذيك طبيعي ما يوافقون


هبطت عزيمتي وحسيت بنكد فضيع
وترددت اني اكلم ياسر
بس ياسر فاجأني بجيته لعندي
فتحت له الباب : اكشخ اكشخ وين طالع ومتكشخ كذا سلطون
: سلطون في عينك كنت بطلع وبطلت
ياسر : لا يكون انا السبب عادي ترا بس جاي اقولك كلمتين وماشي
قلت : لا مو انت السبب هات وش عندك
ياسر: اليوم بطلع انا واهلي لشاليه ابو وليد
وبكره او بعده امي جايه مع ولد عمي بندر
ابيك تجيبهم للشاليه رقم البيت عندهم بيتصلون فيك
: طيب ابشر
نزلت شماغي وجلست بإحبااط بان بملامحي
قلت لياسر : ياسر لو عندك اخت وخطبت منك تزوجني
ناظرني ياسر بضحكه : اكييييد وازوج مندوبك بعد وش عندك نويت يالدب
هو قال دب وزاااد احباطي احبااااط
قلت له : هي نيه مترردد فيها بس شكلي ببطل منها
ياسر جلس جنبي وقال : افى ليه وش اللي مخليك متردد
قلت : وانا ااناظر بجسمي دب من بيقبل يزوج بنته دب

قالي ياسر : انحف رح تعالج شف لك حل في وزنك
مشكلتك يا سلطان انك مهمل نفسك
لابد تتعالج انت حالتك ماهي صعبه صدقني
قلت بإحباط : ياسر انت عارف اني ياما حاولت
ياسر أي حاولت بس ما تواصل
حدك اسبوع اسبوعين وتبرد همتك
بس الحين لازم يكون عند اصرار اكبر
يالله قلي من كنت ناوي تخطب اكيييييييد بشرى
قلت بعدم فهم : من بشرى ؟؟؟
ضحك ياسر : بشرى اخت ابو وليد
قلت له بنفي وتأكيد: لااااا هذولي لا يمكن يزوجوني انا بالذات
قال ياسر ؟ وليه بالله
قلت : انت عارف هم حضر وانا بدوي
هم نحااااف وانا دب
قال ياسر : ما عتقد هالنظره عند ابو وليد اصلا ياما لمح تنكر والا لا
قلت : قصدك ياما لمح لك كان متأمل تخطب منه اخته
ياسر : ما اظن لانه كان عارف اني خاطب ومملك
الله اعلم انه كان يلمح لك انت
قلت: لااا ما ابي اغامر وانكسح

انا بخطب منك انتم ابي اخطب اخت مرتك
عقد حواجبه ياسر: زوجتي اصغر خواتها
حكيت راسي :اجل من هي اللي شفتها في مجلسهم
طارت عيون ياسر : انت شايفن احد هناك
قلت بخجل : أي يوم رحت اخذ سيارتك دخلت علي وحده
ياسر ظرب راسه : يالخبل لا يكون زوجة عليان
وقعد يضحك وانا اضحك معه بس مو من قلبي
طلعت متزووجه وانا يوم نويت واخترت اخترت متزوجه

*************

اخذت العيال وطلعنا للبر
واتفقت مع عمي نتلاقى هناك
من العصر ذبحنا ذبيحتنا وتكفلت بالشوي
وفايزه معي تساعدني وعمي وعمتي جالسين
خلفنا والعيال يلعبون عندهم
نويت هالطلعه كسر لروتين وتغيير عن اجواء البيت
واصريت ان فايزه تساعدني بس بيني وبين نفسي


هاتي لي يا فايزه امسكي يافايزه
كنت اابي اكتشفها وابيها تكتشفني
ابي تخف الحواجزما بيننا
كنت اسولف مع عمي وعمتي
كانت سوالفنا كلها عن قصص البر والمقالب بين الشباب

كنت اهف على الشوي واقلب فيه
وفايزه جنبي تجهز الدفعه الثانيه من الشوي
قلت لها
: ابعدي شوي لا تنكتمين من الدخان
قالت بهدوء : لا عادي ما يجيني انت اللي مقابله وانخنقت
تعلقت عيوني فيها ببلوزتها البنيه الماسكه عليها
ونحرها الابيض وشعرها المرفوع بجمال
قالي عمي وهوو يضحك : ياولد انحرقت العيشه
التفت للشوي اللي تفحمت اطرافه


رفعته بسرعه بيدي ونسيت انه حااار
احرق اصابعي وطااار من يدي بعد مانفظته من الحراره
ضحك عمي علي
: انتبه ياولدي انتبه ترانا نبي عشانا
انحرجت منه ومن فايزه
اللي قامت جابت لي ماء بارد من الترمس البرتقالي ><

: حط يدك هنا يبرد عليك الحرق
شكرتهااا وحطيت يدي ابيها تبردد
************


بسم الله عليك
قلتها يوم انحرقت يده
حسيت ابوي احرجه وهوو احرجني بنظراته فيني
عارفه وحاسه بتغيره ناحيتي وعدته اني اتقبله

واتقبل حياتي معاه
جالسه مقابله وسرحت فيه وفي حياتي معاه
نبهتني يد سند على يدي رفعت عيني فيه تبسم لي واجبرت نفسي على الابتسامه
مد يده بقطعة شوي بيأكلني اياها
مديت يدي باخذها رفض وقربها من فمي
قالت امي : كلي من يد زوجتس
فتحت فمي بحيا واكلتها من يده
قال فراس : وانا انا ابي تاكلني يبه
قال ماجد :لا انا ابوي بيأكلني
صار يأكلهم وانا قمت اوسع لهم
وتحججت بمنوله اللي اخذتها من يد الشغاله

************

وصلنا للشاليه العصر
اللي كان راقي جدا واحلى مافيه خصوصيته على البحر
له شاطي خاص فيه
تفقد ت المكان مررررره حلوووو
وارتاحت نفسي فيه
واقفة برى على الرمل الدافي
للحين عباتي علي
: تقدرين تاخذين راحتس هنا عليا البحر لنا ومحد بيضايقنا
تبسمت وقلت : ماشالله مكان حلووو
قال بإبتسامه عريضه : والله انتي احلى
سكت وتقدمت للبحر لين الموج غرق رجولي
نزلت عباتي وحذفتها على اقرب كرسي
غاب ياسر داخل الشاليه وانا غبت في تأملي للبحر يضرب الموج بنعومه وكأنه يترجاني ادخل اكثر
رفعت تنورتي لنص سيقاني وتجرأت شوي
لين وصلت المويه لنص ساقي وتبللت اطراف التنوره اكثر
: هااا عليا عجبس البحر ودخلتي
التفت عليه وصديت بسرعه
كان مغير بشورت سباحه اسود
حسيت فيه ورااي بالتمام قال تعرفين تسبحين
هزيت راسي بلا
قال : طيب شرايس اعلمس السباحه
التفت له وهزيت راسي بلا كم مره
قال وهو يضحك: الا يالله لازم تسبحين
وشالني بسرعه ودخل فيني للبحر
وانا اصرخ : لاالاا ياسر لااا تكفى لا مابي
وهو ميت من الضحك علي : يالله ياجبانه ونزلني للبحر
وانا تعلقت برقبته : تكفى ياسر تكفى لا تخليني
حاول يفك يدي عنه
وانا متمسكه فيه لدرجة رفعت سيقاني على خصره
وايدين متشابكه ورى رقبته

ضحك من كل قلبه : فكيني خنقتيني
صرخت برعب :لا ياسر واللي يعافيك واللي يخليك لا تتركني
ركز عيونه بعيوني وحضني بنعومه وقرب مني اكثر



*********

:يااااااوويلس من الله يا عليا حارمتني هالحلا
دفتني بقوه وتركتها
نزلت في المويه وبدت تتخبط وكأنها بتغرق

مسكتها بسرعه وصرخت فيها ابيها توقف تخبيط
وربشه بالمويه
:علياااا وقفي على رجولس هنا موغريق

ماصدقتني عليااا ناظري شوفيني واقف
ومديت لها يدي :هناك الغريق ورى الكساره هنا امااان
وقفت على رجولها واستوعبت انها بأمان
وتتنفس بقووووه
منظرها وسط البحر
بجمالها كأنها حوريه شعرها الطويل
كحلها الملخبط روجها اللي مسحته
بلوزتها اللي لصقت فيها كلها شكلت لي فتنه

خبطتني على كتفي : حرام عليك بغى يوقف قلبي
قلت بلهفه وحب: بسم الله على قلبس

رمشت وصدت عني بحيا
: لا عاد تسوي فيني كذا
ضحكت عليها غطست اسبح
صارت تلعب بالمويه وهي واقفه
وانا سبحت حوالينها ما ابعدت



سمعنا اذان المغرب طلعنا وغيرنا وصلينا
كنت اتنافض من الجوع
لقيت عليا مجهزه خفايف مع الشاهي
اخذت الصينيه وجلسنا برى على الشاطئ
قلت ابي اسولف معاها ونكسر الحواجز
:عليا وش تدرسين
قالت : يعني ماتعرف
قلت لها : لا والله مدري
قالت: لغه عربيه
قلت لها :ليش اخترتي هالتخصص
قالت : احبه واستمتع فيه
قلت : لها اجل انتي عكسي ما احب العربي
وكان مسبب لي مشكله
ودخلت علمي عشان افتك منه
قالت : زمان اذكرك شاطر دايم من الاوائل
تبسمت بإستغراب : الحمد لله تذكرين شي عني زين
ضحكت بنعومه : ههههه هالشي الوحيد الزين فيك
رفعت حاجبي موعاجبني الكلام
ضحكت بقووه ووحاولت تكتم ضحكتها
: هههههه زماان لاتزعل زمان
مع اني للحين ماعرفت وش زينك من شينك هالحين
قلت بجديه بعد ما جلست بجنبها : بالله شفتي مني شين هالايام اللي قضيناها مع بعض
قالت وهي تتحاشا تناظر بعيوني ويدها تلعب في ظفيرتها : بصراحه لا
ضحكت قلت لها: طيب ناظريني وقوليها لي
قالت بصوت مخنوق حيا : وش اقول
مسكت وجهها باطراف اصابعي ولفيته لي : ناظريني عليا
بالغصب ر فعت نظرها لي غيبتني بنظرتها
وغيبتها بحبي لها ووعدي لها
بحياه ما تشوف فيها مني الا السعاده


قراءه ممتعه لكم وردود حلوه لي