كاتب الموضوع :
دلع مغروره
المنتدى :
الارشيف
رد: بكيت على عمري يالي ضاع مني
5)كشفت حقيقتك!
"..هناك اشخاص..مهما حاولنا اثبات مكانتهم في قلوبنا..يظلون يلتهموننا بعدم الاهتمام..وهم لا يدركون مدى حبنا لهم ..الا بعد فوات الاوان.."
....
..كانوا ..طالعين من بيت عمهم عبد الزراق عسب كل وحده منهم اتسير البيت..ريان كانت مستانسه على الاغراض يالي اشتروها للسلمى فكانت تقول:تخيلي نوير انتي تعرسين ..مو انتي مثل سلموووه لاه
نويره اتسوي مالت:اذا عندج كلام خير قوليه ما عندج سكتي احسن..
ريان تضحك:اوييييين كلام خير حلوه هاي (تاشر لبدور يالي بعمرها)سمعتي بدور اوين كلام خير ..عيدي عيدي نوير خليني اسمعه مره ثانيه (وكملت ضحكاتها بقوه)
نوره تضربها:بس سكتي فضحتينا بصوتج
ريان تاخذ نفسه:الا نوير صج تكفين عيدي الكلمه مره ما سمعتها عدل
ضربتها نوره بجتفها وكملت ريان ضحكاتها..ابتسمت سليمه يالي بنفس عمر ريان بعد..وقالت:حشاج بسج بتموتين من الضحك..
ريان:سكتوا سكتوا ..هاي نوير اختي خخخخ تضحكني مرات ..يعني تحاول اتكون مطوعجيه بس ما تروم وياه ويهها..
نوره تطالعها بعين:ريان سكتي احسن لج(وهم يفجون باب الحوش ينفتح قبلهم ويدش حمدان نزل راسه وقال:السلام عليكم
البنات :وعليكم السلام ورحمه الله وبركاته..
ريان بمرح مصتنع:اعلومك ولد عمي ؟؟
حمدان:بخير تسرج حالتي انتي اعلومج وعلوم هل مسقط..
ريان :بخير تسلم(صدت الصوب الثاني عسب اطلع لسانها)
رفع راسه وناظر حوله وعقب سأل سليمه:الرياييل موجودين بالميلس؟؟
سليمه:هيه حياك تفضل
كمل طريقه للميلس ..ريان يت تغايض بنوير لكنها جافتها جنها تحبس انفاسها للحظه استغربت وهزتها:نويييييييييييييييييييييير وينج ؟؟
نوره فزت:انا اهني شو تبين فزعتيني
ريان تقلدها: "فزعتيني "...ابوي من صج فزعتج ما كنت ادري اتصدقيين
نوره ولا ردت عليها في عالم ثاني..ابتسمت ريان ابتسامه جانبيه ويلست اتكمل سوالفها لبدور لانه سليمه دشت بيتهم من بعدها..
وصلوا بدور البيت ..وبقت نوره وريان يتمشون لين البيت ..بيتهم موب بعيد لانه بيوت الاهل في الشرقيه قريبه من بعض ويعتبرون حاره الاهل ..فعسب جي وصلوا البيت بدقائق بس ..ونوره كملت طريقها لحجرتها..
تنهدت ريان وسارت الصاله لما جافت شهد يالسه تقلب بالقنوات:هاي..
شهد ما تصد صوبها:هايات..حمد لله شرفتوا مليت بروحي
ريان تبتسم:والله الحمد لله انتي يالي شرفتي عبالي بترقدين عند قوم عمج
شهد جافت عليها بعين وردت تطالع التفي..ريان ابتسمت اكثر:اقووول شهود
شهد بدون نفس:نععععععععم؟؟
ريان ترفع جتفها لما جافت نوره تطلع وهي تقول:ريانوه تعالي وياي نسيت فوني عند سليمه..
ريان تطالع شهد وتطالع الحجره ..بعدها ناظرت نوره وهي اتبين انها تعبانه:اوف تعبانه نوير ابي اسبح مالي بارض اسير ..سيري بروحج ياخي.
نوير:ريييييييييييانوه
ريان:اوف ياخي تدلين الدرب سيري بروحج مو فاضيه لج انا..(قامت متجهه للحجره وهي ترقع الباب وراها)
اما نوره جافت على شهد ..وشهد تطالع المكان يالي سارت منه ريان مستغربه تصرفات ريان..بعدها وجهت نظراتها لنوير يالي بعدت نظراتها وكشرت وهي اتبطل الباب طالعه من البيت..
عند ريان دشت الحجره وهي تحمل ابتسامه ."اليوم بكشفج نوير صبري علي"قامت تبطل الشنطه يالي يايه بها نوره الشرقيه..ومثل ما توقعت صندوقها العزيز والغالي موجود ..ضحكت بخبث ويت تبطله بس مسكر ..تافففت ويت اترده بس طاح مفتاح اصغير منه ..واكتملت فرحتها على الاخر..بطلعت الصندوق بالمفتاح وهي تجوف كومه اوراق مرميه باهمال ..فتذكرت يوم دشت عليها بالليل .."اكيد هي نفس الاوراق وكانت خايفه وقتها اني اجوفها "قامت تاخذ ورق ورقه وتقرأ المكتوب فيه ..مسكت فمها من الصدمه واحمر ويهها "نوير كيف اتسوي جي الكلبه"اخذت كمين ورقه من المبعثرات "ماراح تعرف اذا اختفوا يكفيها يالي عندها"خشتهم بجيوب جلابيتها وسكرت الصندوق بسرعه وحطته في الشنطه ..كانت مستانسه انه عرفت السر وفي نفس الوقت معصبه من اختها..
طلعت من الحجره وسارت ركض للصاله وهي تجوف شهد على حالها..يلست وهي تاخذ نفس..
شهد:شو بلاج انتي مو طبيعيه للمعلومه !!
همست ريان:شهدوووووووووووووووووووه
شهد تضربها:في عينج شهدوه يالغبيه(رفعت حاجبها مستغربه )شو بلاج؟؟
يلست تمسح ويهها وتضرب خدها وهي اتقول:لا تجوفين يالي جفته لا تجوفيييين بطحين من طولج صدقيني
شهد مسكت قلبها:اووويه ريانوه شو صار؟؟
دشت نوير البيت وريان قرصت شهد على انها تسكت ..ريان ابتسمت لنوره يالي قالت :ماشاء الله سرتي تتسبحي وايد..
ريان تاشر براسها:كيفي لما دشيت الحجره ما عدت ابي اتسبح ابي اطالع التفي ..
نوره :زين زولي اهم شئ يبت فوني ..
سارت نوره حجرتها ونطت ريان للشباك تطالع واول ما جافته شهقت اكثر ومسكت قلبها ..شهد لحد الحينه مستغربه منها..
شهد:ريان قولي لي شو صاير وياه ها الويهه؟؟
ريان تمسك فم شهد:سكتي بقول لج بوقته لا تحاتين..
ركضت ريان للحجره وشهد تطالعها بغباء..
....
كانت يالس بالحوش تسقى الزرع..وهي تطالع الشجر اشلون ينمو..ويعيش من دون هم ولا احزان..بلا احساس ولا شعور ..يعطي بلا مقابل .."ليش الناس ما تكون مثل الشجر كريمه حنونه بظلها..ليش"خذت نفس وهي تذكر امها وحنانها لما العيوز تنازعها..
ام الخنساء:خنساء يمه سيري يبي الهديه يالي شريتها ليدوه..
العيوز بعصبيه:لا حشاج ما اخذ انا هدايا من زباله..ما ابيه اذا يبته بعقه بزباله من الحينه اقول لج ..
وقتها حز بخاطر الخنساء ها الشئ وطاحت دموعها وهي تركض لحجرتها..فيت امها تراضيها وتستمح منها..
ام الخنساء:ماعلي يايمه تعرفين يدتج عصبيه اشوي وما تدري شو اتقول امسحيها بويهي..
الخنساء:يعني انا الغلطانه يوم شريت لها هديه اتقوم اتقطها بالزباله زين ليش شو سويت لها انا شو اميه ..(حضنتها بقوه)لا تخليني بها الدنيا بروحي امي انا ما اقدر اعيش بلاج..
غريبه الدنيا ..هديه تنعطي تنرفض ..وحنان وحضن ينقبل ..وقتها كان حضن الام الاغلى عند الخنساء ..كان الحضن يالي يواسيها ويردها قويه مره ثانيه ..لكن الحينه محد يوقف وياه..مرات حسين بس اغلبيه الوقت يكون مداوم ..والبعض الاخر ما يكون بخير..يتصرف تصرفات غريبه ويالي لحد الحينه عيزت الخنساء تفهم له ..
نشت من ها الذكري لما سمعت صراخ العيوز:انتي وصمخ شو ما تسمعين يالزباله..اناديلج مساعه ما تسميعن انتي ؟؟
الخنساء سكرت الماي وقالت بقواه عين:نعــــــــــــــــــــــــــــــــــــــم
فجاة وجنه امها كان حولها ..حس انها تقدر تواجهه العيوز..بس الضربه يالي يتها على ريلها طيحتها على الارض والسبب الخنزرانه كان قويه اشوي فما قدرت تستحمل الالم وطاحت ودموعها تسبقها..
العيوز:يالي ما تستحين اترادديني ها اترادديني؟؟
قامت الخنساء بالم وهي تصيح وتقول:انتي ليش تكرهيني ليش فهمني ..؟؟
العيوز:لسواد ويهج يالي ما تذكرينه لسواد ويهج يالي ما تستحين (ضربتها مره)قومي طسي عن ويهي قومي لا برك فيج ولا في الساعه يالي انولدتي فيها قومي ..
قامت الخنساء تركض لحجرتها..كلماتها كانت مؤلمه..تمنت حضن امها بها الوقت..بها الكلمات القاسيه.تمنت لكن ..ليس لها كلمه على القدر..
....
كنت يالس بعدني في الصاله من الملل ..ماكان خاطري ادش الحجره واتجاتل وياه نوير..وريان ها تصرفاتها بروحها اكشن ..مخرعتني ما ادري شو بلاها ..بعرف عقب شو فيهاا المهبوله..ما ادري ليش مر علي نظرات حمد المسكين ودموعه ..ها المريضه النفسيه فعلا مريضه ولا في ام جي اتسوي في ولدها ..متخلفه.. ومعقده بعد ..اساسا ما عمري حبيتها لا هي ولا تصرفاتها..والحينه بعد يالي صار لولدها اكد لي انها مريضه ..رميت الرموت بعيد عني وقمت..سبحان الله الريم مختفيه ولؤي بعد ما ادري وينهم ..
دشيت المطبخ اكل لي شئ وما حسيت الا بايد تسحبي لبرا المطبخ..شهقت بقوه وتخرعت الصراحه بس ريان قالت:هيييييييييه سكتي هاي انا ..
بعدت عنها وقلت:ياربي خرعتيني وطيحتي قلبي والله..عبالي امي ..
ضحكت ريان:شو مسويه انتي ها؟؟
رفعت جتفي:موب مسويه شئ بس امي ها الايام مستويه غير شكل..
ريان :المهم المهم اسمعي الخبر القنبله ..الا ليش تسمعي قريي وانتي ساكته بس ..
طلعت لي اوراق من جيوبها ويلست اطالعهن بعدها مدت لي الورقه الاولى:قريي ها اول..
مسكت راسها ويلست تضرب خدها وتتنطت في مكانها ..طالعتها بغباء وفجيت الورقه اقرأ..فجيت فمي وعيوني على وسعهن منصدمه من المكتوب ..معقوله ها مكتوب من نوير.. نوير نفسها..الكلام المكتوب اتحسه مال وحده عايشه قصه حب ومتعذب كلام خطير..
ريان تفج الثانيه:قريي ها بعد قريي يلا ابسرعه(وهي تطالع وراها)
فجيت الثاني وانا قرأ واقرأ كانت ثلاث ورقات مكتوبه
سألتني ريان:ليكون ها مرسوله؟؟
هزيت راسي:ما اتوقع ..بس اتصدقين انصدمت نوير اتحب (هزيت راسي يمين ويسار موب مصدقه)شئ ما اقدر اصدقه
ريان معصبه:كان خاطري ارمي الاوراق في ويهها واقول شو ها يالمطوعه بس مسكت عمري وقلت اقول لج بالاول..
ابتسمت لها:زين سويتي..بس حمدان ها الخقاق..صج ما يلبق..
ريان:اساسا كنت متوقعه من نظراتها له اليوم ما ادري كيف وتاكدت بعد من جفته وهو راد بيتهم وهي يايه البيت
شهقت:شو قصدج يعني بينهم شئ؟؟
ريان:قسم بالله لو كان بخبر عليها وما تهمني
شهقت:انتي ينيتي ريانوه ينيتي شو؟؟ اذا خبرتي عليها احن راح انروح وراها ..ورا الشمس تعرفين امي بروحها تشكك وايد وعاد الا انا ..يعني اذا المطوعه حبت اكيد ريان الصايعه وراها سوالف وشهدوه بعد
ريان:عيل شو بنسوي؟؟
قلت بتفكير:بنراقب تصرفاتهم ترانا بعدنا بنكون اهني وبنجوف.. شو بيصير..
ريان:بعدني منقهر ابي ارمي الاوراق في ويهها ياخي
مسكتها من ايدها:لا اتسوين جي بتخربين كل شئ اتريي خلينا نتاكد بالاول
ريان:يعني انتي موب مصدقه ها التفهات ؟؟
هزيت راسي :الصراحه موب قادره اصدق ما ادري ريان
ريان معصبه مني:شو يعني انا أألف من عنديه ..اوكي بثبت لج انه ها حقيقه موب من خيالي والاوراق صج..
قلبت ويهها ودشت داخل ..تنهدت ..ياربي مو جي ها من صجها عصبت..ما كان قصدي زين ..بس نوير !!نوير اتحب ولا بعد حمدان ..عجيبه الدنيا ..ما توقعت ابد ها الشئ ولا حتى باحلامي..
بعد العشى سرت اغسل ايدي ..وبعدها دشيت الحجره وابتسامه ريان في استقبالي ..اشرت لي وجنها اتقول "اصبري علي انا برويج منو هيه ريان"
يلست وانا اطالعها من ادري شو براسها ها البنت ..اول ما انفتح الباب ودخلت نوره ..
ريان بدت مسرحيتها:اخييييييييييييج حمدانوه ها وايد جايف عمره ما ادري على شو خققققاق على الفاضي ..زين ابوي عرفنا انك ولد عرب واصول وشرقاوي وبعدين يعني وايد يغتر..(قامت من سريرها ويلست تمشي اوينها تقلده..)
ريان:شهدوه طالعي جي يمشي ويوم سلمت عليه نزل راسه مسوي عمره رزين..(اتثجل صوتها)اعلومج بنت عمي واعلوم اهل مسقط
كتمت ضحكتي في داخلي لانه يابتها صح ..قالت:والله خاطري اعطيه بنعالي مع صوته اعلوم اهل مسسقط قال..
صدت صوب نوره يالي بعدها واقفه تطالع ريان وما ادري وين سرحانه:نوووير شو رياج مو حمدان جي خقاقي ؟؟
نوره ولا عبالها..فصرخت ريان بصوت عالي:هييييييييييه اكلمج انا مو حمدان جي يمشي وخقاقي ..عاد ولا هو خقاق العايله بطرااني وكريه ما ادانيه..الله يعين يالي بتتزوجه..
نوير تطوفها وتسير صوب الكبات كان واضح عليها التوتر يوم انياب طاري الزواج ..ريان اتكمل:انا وشهود ما ندانيه صح شهود
هزيت راسي مستغربه منها وهي كملت:وانتي نوير بعد ما تدانيه صح..؟؟
القت نظراتها علي وعلى ريان بصدمه جنه الكلام اهني انحصر موب قادر يطلع من حلجها..!!
.
.
.
"..كم قاسيه هي قلوب البشر عندما تجبرنا على حبس مشاعرنا في داخلنا ..وعدم البوح بها.."
|
17-02-13, 01:10 PM
جديد مواضيع قسم الارشيف
العرض العادي
