وهذا اخر بارتين انزلوا من الرواية

وووايد حلوة مشكورة على ابداع

السلام عليكم و رحمة الله و بركاته ..
الأمل صديق رائع ربما
يغيب لكنه لا يخون ابداً
مسائكم أمـــــل ..


لا اله الا الله محمد رسول الله .. سبحان الله و بحمده سبحان الله العظيم ..
القصة الثامنة و العشرون .. لا تلهيكم عن الصلاه .. قراءه ممتعه ..


الأنثى .. فراشة جميلة .. تزين ذاك الغصن الجاف المسمى بـ رجل !! ..
(مقتبس)


أمس .. فشقة بتال ..


واقفه قدام مراية الحمام .. الله يكرمكم .. بعد ما نضفتها من البخار ..
سكرت أزرار بجامتها .. لفت شعرها بـ منشفتها ..
قدرت تبعد عنه و هي بـ شقته كم دقيقه لكن الأيام الجايه كيف تبعد عنه ؟؟ ..


التفت لـ الباب .. حطت يدها المرتجفه على قلبها ..
غمضت عيونها تحبس دموعها .. حست ببلل على خدها .. أرفعت يدها اللي على صدرها لـ خدها .. مسحت دموعها الحاره بسرعه ..
قبل لا تضعف و تتلاشى قوتها ..


تقدمت لـ صنبور الماء .. أفتحته على البارد .. غسلت وجهها .. و هي تخفي دموعها بالماء .. أرفعت عيونها لـ السقف .. أخذت نفس عميق ..
يهديها و يهدي رجفت جسمها الشنيعه ..


التفتت لـ الباب اللي ينضرب .. أرجعت أخذت نفس طويل ..
ناظرت الباب الأبيض .. و مقبضه يتحرك .. سمعت صوته الكريه من ورى الباب ..
ينادي بـ اسمها بصوت يملأه الخبث ..


من ورى الباب ..


رامي جسمه على الباب .. مؤ قادر يصلب طوله من اللي شربه .. و بيده كاس الخمر .. و بيده اليمين ماسك مقبض الباب و يحركه ..
.. : غصـ آآـون .. سكت و هو يبغي يسمع جوابها لكن ما سمع منها أي إيجابه ..
ابتسم بـ خبث .. و بـ لسان ثقيل .. : كـ آآ ـل هـ الـ آآ ـوقت عشـ آآ ــان تكشـ آآآ ــخين لـ آآآـي .. قال بثقه و جرأه .. : أهـ آآم شي يكـ آآــون لونـ آآـه أحــ آآـمر ..


حست بماغص من كلامه .. التفت لـ المرايا .. ناظرت ملامحها .. تبغي تشوف أيش اللي خلاه يحب جمالها و يتعلق فيها كذا ؟! ..
نزلت المنشفه عن شعرها المبلول اللي غمق للونه بسبب الماء ..
عيونها الزرقاء ؟؟ .. أو شعرها الذهبي ؟؟ ..
أو ملامحها ؟؟..
أبعدت عيونها عن المرايا قبـل لا تكره حالها !! ..


التفت لـ الباب سمعت ضربه الخفيف عليه ..
تقدمت له و هي تهمس بـ اسم بتال .. و بـ بلعومها غصة وجع .. : بتال ؟! ..


من ورى الباب ..


نزل الكاس من على شفته و هو يبتسم ابتسامه واسعه و هو يسمع صوتها الرقيق .. قال بـ حب لـ جمالها .. : يا عيـ آآ ـونه ..


نار بصدرها شبت من كلمته لها .. كشرت ملامحها .. مدت يدها لـ قفل الباب أفتحته بـ هدوء غريب على ملامحها ..
شافته واقف قدام الباب .. تحولت ملامحها لـ الهدوء و هي تشوف حالته ..
يالله يتوازن بوقفته .. و بيده كاسه ..
أزارير ثوبه مفتوحه .. شعره محيوس .. لابس نظارته الطبيه ..

رفع عيونه لها و هو يشوفها قدامه ..

تقدمت له و بـ عيونها قهر و كره له و تحدي .. انطقت كلمة وحده بس .. : طلقني ..

رفع حاجبه لها .. ابتسم يغيضها .. : طلاآآق مافيـ آآ ـه ..


قرب لها و هو يمسك ملابسها .. رفع وجهه لها .. قال بـ تساؤل .. : وين الأحمـ آآـر ..
أبتعدت عنه و عن ريحته المقرفه .. سدت خشمها بـ أصابعها .. : أبعد ريحتك .. أفففف قرف ..

قرب لها و هو يبغي يبوس خدها ..
حطت يديها على صدره و هي ترميه على الأرض بخفه بسبب عدم توازنه ..

أركضت لـ الباب .. أسحبت المفتاح منه .. قفلة عليه الباب .. و هي تجلس جنب الباب ..

سمعت صوته يصرخ بـ اسمها .. ضرب الباب بكل قوته ..


اوقفت و هي تحس برجفت رجليها .. جلست على الكنبه بـ الصاله ..
تنهدت بـ راحه .. سدت اذنيها بـ أصابعها .. و هي تسمع الضرب على الباب كل ما له و يقوه ..
نامت بعد ما اختفى ضرب بتال على الباب .. و هي تدعي ربها أنه يخلصها من بتال ..


* * * *


اليوم .. فـ المستشفى ..


التفتت عنه بـ إنزعاج .. بصعوبه قدرت تلف لـ الجهة الثانيه من بطنها الدائري الكبير..


هزها من جديد من كتفها .. و همه الأول و الآخير صحتها .. شافها تلتف له بهدوء ..


و تفتح عيونها ببطء .. و التعب بأين بـ وجهها المرهق من الحمل .. شمر أكمام بدلته العسكريه .. فتح الحافظات .. : يالله قومي تغدي ..

سمر ناظرته و هي تعدل جلستها .. : توهم ما خذين الغداء مني .. قالت بتهرب .. : نعسانه و أبغي أنام .. أنسدحت بـ صعوبه من بطنها الكبيـر ..
و هي تتنفس بسرعه ..

قال بـ إصرار .. : ما عليه هذا الأكل أفود لك ..
أرفعت نظرها له .. واقف و بيده ملعقه صغيره .. و على الطاولة الحافظات المتفوحه .. : خلاص كايد ماني مشتهيته ..


كايد فتح عيونه عليها و الغضب زاد بـ وجهه .. : أنتي مؤ هامتني أهم شي ولدي يطلع بـ صحه و عافيه ..


قدم الطاوله لها و حط الملعقه داخل الحافظه بدون لا يحط لها بصحن ..
أنشغل بـ جواله .. و هو عارف وش هو ردها عليه ..


ناظرته بقهر و قالت بـ قوه و قهر منه .. : عيالـ... ابترت كلمتها و هي تحط يدها على بطنها الكبير .. و هي عارفه مصيرها مع كايد ..
قالت و هي تحاول تخفي توترها عنه .. : ولدي بخير إن شاء الله ..


ناظرت ملامحه تخاف أنه سمعها و بيروحون منها الاثنين ..
كيف غلطت قدامه ؟! .. هي حتى مع نفسها تخاف تذكرهم ..


كايد جلس و هو يشوف ملامحها اللي بدات تتغير .. ترك جواله على الطاولة الخشبيه .. قال بـ استهزاء لـ أول كلمة قالتها .. : ولدي ؟! .. نسيتي أني طلقتك ؟! .. من تولدين ولدي راح تكونين محرمه عليّ .. ولدي راح أخذه و تحلمين فيه ..


سمر ناظرته ببرود و أعصابها بارده .. تعودت على كلامه .. أبد صايره ما تتاثر فيه ..

التفتت لـ الجهة الثانيه تنهي النقاش العقيم معه .. مطنشه كايد الغاضب منها ..


دخلت يدها اليمين داخل اللحافها الأبيض .. حطتها على بطنها و هي تحس بـ حركتهم .. ابتسمت و هي تتخيل اشكالهم يشبونها و بــس ..
غمضت عيونها و راحت بـ نومه عميقه ..


* * * *


فـ شقة خالد ..


صحت على صوت المنبه .. سكرته و هي تجلس بكسل على السرير .. التفتت تشوف مكانه الخالي جنبها على السرير ..
مخداته مثل ما هي ما تحركوا .. يعني ما نام هنا أمس !! ..
وقفت و هي تتنهد بقهر ..
دخلت الحمام الله يكرمكم تغسل .. توجهت لـ دولابها أخذت ملابسها و بدلت لمت شعرها بـ إهمال ..


دخلت المطبخ ..


ناظرت الأكل اللي أمس حضرته عشان العشاء ..
رمت اللي خاس بـ درام الزباله .. الله يكرمكم .. و هي تستغفر ربها ..
ندمت أنها ما دخلتهم بـ الثلاجه ..

طلعت كل اللي تحتاجه لـ الغداء ..


تحت عند باب العماره ..


نزل من سيارته و هو يتوجه لـ العمال اللي يشتغلون تحت الشمس بـ الحفريات ..
توجه لـ أقرب واحد له .. ابتسم له .. صافحه بـ يده .. و هو يسأله عن وقت شغلهم ..
ابتسم له و هو يقوله أن غدائهم اليوم عليه و هو ناويها صدقه لـ أبوه و أمه ..


مشى لـ شقته .. نادى عليها .. شافها بـ المطبخ ..


سمعت صوته ينادي لها ..
التفتت له و هي تبتسم له يمكن بـ ابتسامتها تغير حالها معه ..
شافته واقف قدام باب المطبخ .. و صوته يملأه الجفا و ملامحه تدل على جفاه لها ..


شافها التفتت له مبتسمه له .. قال بـ صوته الهادي اللي يملأه الجفا على شمس .. و الصندوق الخشبي بين عيونه .. : زيدي الغداء ..


شمس هزت رأسها له تحطمت أول ما شافت ملامحه الخاليه من حنانه .. التفتت تلهي نفسها بـ السلطه .. أمسكت السكين و هي تقطع الخياره بـ النص ..
سمعت خطوات رجليه تقترب لها ..
طاحت السكين .. و هي تحس بـ قربه و بـ أنفاسه قريبه لها ..

خالد و عيونه معلقها بـ ملامح شمس المرتبك .. : أرتحت بعد ما أخذت آخر شي يذكرك بـ الشايب ..


مسكها من يديها و هو يلفها له .. ناظر وجهها و هي واقفه قدامه و رأسها منزلته ..
مسكها من ذقنها و هو يرفع وجهها له ..
عيونها تتجاهل تناظر وجهه منحرجه منه و من اللي صار أمس ..


ناظرها و عيونه تحكي قهره عليها .. ابتسم شبه ابتسامها لها .. : كل شي أختفى من اللي يحبه .. قال بـ قهر .. : الشايب ..
ناظر يديها اللي تفركهن ببعض لتخفف من توترها .. خاليه من أي نقش حناء ..
قال بتملك .. : أنتي لــي ..
أرفعت عيونها له .. قالت و هي تبغي تبرر له موقفها .. : نسيت الصندوق بـ الدولاب و ,, ..
قال بحده و هو يقاطعها .. : كل شي قدرت أغيره فيك لكن .. ضرب صدرها بخفه .. : موجود فيه ؟؟ ..


جلست على الأرض و هي ترتجف من كلامه .. جلس على ركبته قدامها .. و ريقه جاف .. : يعني كلامي بـ محله ..
هزت رأسها بـ لا .. و لسانها عاجز عن الرد عليه ..
خالد و عيونه عليها .. شافها ترتجف و رأسها تحركه بـ لا .. : شمس تكلمي ..
شمس بـ قهر و غبن و هي تتجاهل نظراته الحاده لها .. : لا و الله لا ..
وقف و هو مرتاح من ردها .. ما فكر أنه يهديها أو يقول لها كلمة تغير من نفسيتها ..
لأنه يبغيها تندم على أنها بداته على الشايب .. مشى لـ باب المطبخ ..قال بجفا .. : جهزي الغداء ..


طلع تاركها و هو يسمع شهقتها العاليه اللي أوجعت قلبه ..
طلع بسرعه قبل لا يضمها و يهديها و يوجع قلبه أكثـر بسبب حنانه و طيبة قلبه عليها ..


يما توجع بـ طفولته و بـ شبابه و بـ رجولته ..
و هو يكره أنها تحس بهـ الوجع ..
لكن لابد أنه يعطيها درس .. لكنه أوجع قلبه و هو يسمع صوت شهقتها ..
توجه لـ أمه الجالسه بـ غرفتها ..


* * * *


فـ بيت الجده ..


واقف قدام سرير شيهانه و عيونه الصغار معلقها على الصغيرة و الابتسامه على شفايفه الحمراء ..
كشر بـملامحه و هو يسمع بكائها .. حط اصابعه على خدها و هو يضربه على خفيف لـ يهديها .. و يردد على لسانه .. : ننو تقيره اششش .. " نونو صغيرة أششش "


نزلت كاس الحليب بسرعه على الطاولة .. ابعدت يده بسرعه عن خد بنتها و هي تصرخ بـ وجهه ..
شيهانه بـ صراخ و هي مي طايقه محمد .. : اذلف لـ قوت ..
شالت بنتها لـ حضنها و هي تأخذ المميه و تحطها بـ فم بنتها بعد ما سمت بالله ..
التفت لـ قوت الواقفه بـ عباءتها عند الباب .. : قوت أخذي محمد ازعجني ..


قوت و هي تلف لفتها على شعرها قالت بقهر .. : ما تقدرين تتحملينه ؟؟ .. هذا و أنتي أخته ..
شيهانه قالت بـ إنزعاج .. : أوه أنا يالله نفسي و بنتي ..
تقدمت لـ شيهانه .. و هي تشوفها متحجبه بـ لفتها القطن و لابسه لبس النفاس و مدفيه نفسها عن البرد ما عن الغرفه دافيه ..
همست لها بقهر .. : يعني ما تقدرين تسايرينه تراه مريض لاتكونين أنتي و الزمن عليه ..
شيهانه و هي مي مهتمه بـ محمد و بعصبيه مي عارفه لها تفسير .. : أخذيه ترى و ربي مؤ طايقه نفسي ..


قوت تقدمت لـ محمد الواقف بصمت و القهر ملأ قلبها من شيهانه .. أمسكته من يده .. : أبوي بـ يطلع .. خلي لارين عندك و أطلبي من بلقيس تجهز المقلط له ..
شيهانه أرفعت رأسها بـ قهر .. : بيجي هنا ..
قوت و هي تمسح على شعر محمد .. : أيه تعبان و يبغي رعايه منا ..
شيهانه قالت بـ قهر .. : ليته أهتم فينا .. قالت بـ سخريه .. : عشان نهتم فيه ..
قوت مشت و هي متجاهله كلام شيهانه ..
ما عندها رد لها لأنها لو تكلمت معها راح تنفجر و تنطق بـ كرهها لـ معاملة سلمان لهن ..


توجهت لـ المجلس لـ جاسر اللي نايم فيه ..
شافته جالس على الكنبه و بيده كاسة الشاي .. نزل كاسته و هو يشوفها قدامه ابتسم لها ..
ردت له الابتسامه مجامله له .. قالت و بالها مع اللي بـ المستشفى .. : نمشي ..
رفع كاسته لها و عيونه بـ عيونها اللي موضحه همومها .. : اخلصه و نمشي ..
جلست جنبه و هي تهز رأسها له .. مسحت على شعر محمد الجالس عندها .. : حبيبي ..


رفع رأسه و هو متفاجاء من كلمتها له .. و الابتسامه توسعت على شفايفه .. لكنه أنصدم و هو يشوفها ملفته لـ محمد .. عقد حواجبه بـ قهر من حاله .. ناظر التلفزيون لـ يبعد عن باله اللي عكر مزاجه ..
قوت و هي تكمل كلامها لـ محمد .. : روح فوق لـ بلقيس ..


التفت لها و هو يحاول ما يوضح لها شي بسب كلمتها لـ محمد .. : ناخذه معنا ..
قوت قالت بـ أعتراض ..و هي عارفه مدى كره سلمان لـ محمد .. : لا ماله داعي ..
جاسر غمز لها بدون شعور منه .. : لا نكسر بخاطره ..


أرتجف جسمها و هي تشوفه يغمز لها .. نزلت رأسها و هي منحرجه منه .. سكتت و هي مي قادره ترد عليه ..
و مشاعرها متلخبطه أتجاه جاسر ..

وقف و هو حاس بـ اللي صار لها بسبب حركته الغير متوقعه .. : يالله مشينا ..


فـ المستشفى ..


دخل لـ غرفته بعد ما تطمئن على جميله ..
شاف قوت تطلع شنطته من الدولاب و هي تحطها على السرير ..
و جاسر جالس على الكنبه .. و فز أول ما شافه ..
حب رأسه و من بعده قوت البارده بسلامها له ..
جلس عند جاسر على الكنبه ..
انتبه لـ محمد الواقف بـ زاوية الغرفة و بيده قطعة شوكلاته ..


ناظر محمد بـ نظرات كره .. نطق بـ كره له .. : وش له جايبينه ..
هرب لـ قوت و هو يرمي قطعة الشوكلاته على الأرض من الخوف و هو يتخبى وراها .. و خبى وجهه بـ عباءة قوت بخوف من أبوه ..
تفاجاءت من حركة محمد أرفعت عيونها و هي تشوف أبوها شافت الكره و التعب بـ ملامحه ..
مسحت على شعره و هي تلفه لها و تهديه و هي تمسح على ظهره و تعطيه الأمان ..


جاسر أخذ سلمان معه برى لـ أجل يهدي أعصابه .. و هو خايف على محمد من سلمان الغاضب ..


طلعت من الغرفه بعد ما رتبت أغراض سلمان ..
مشت و هي ماسكه محمد من يده ..
توجهت لـ أمها .. و لسانها يتمتم بـ الاستغفار .. و قلبها يخفق ..
أوقفت بـ زاويه و هي تناظر الشرطي اللي قام من على كرسيه و بيده كوب ..
مشت و هي تتلفت بـ خوف تخاف أنها تصادف سلمان ..


أوقفت قدام الباب و يدها على مقبض الباب .. أخذت نفس و هي تناظر الباب .. أحبست دموعها و هي تكتم شهقاتها .. حست بكتمه ما تعرف لها تفسير ..


مشتاقه لـ اللي داخل ..
مشتاقه تبوس رجليها و كفيها و رأسها و جبهتها ..


فتحت الباب و هي تسمي بالله و تتوكل على الله .. دخلت و معها محمد ..
أوقفت بـ نص الغرفه و هي تناظر أمها .. ما تغير شي مثل ما تركتها آخر مره شافتها ..
قوة قلبها و هي تتقدم لها .. و محمد واقف بـ صمت و عيونه على اللي نايمه بـ صمت ..


بأست جبهتها و هي تمسح على شعرها الكيرلي ..
طاحت دموعها على خد أمها .. مسحتهم بـ أصابع ترتجف ..
و هي تناظر الأجهزه من حول أمها .. و دموعها منعت الرؤيه عنها ..
أمسكت أصابع أمها .. قالت بـ غصه .. : يمه ..


حست بـ أصابع أمها تتحرك .. دق قلبها بـ عنف .. ناظرت وجه أمها المتعب الخالي من أي تفسير و أثار الحادث مازالت فيه ..
حست أنها تتوهم .. حطت يدها مره ثانيه بـ أصابع أمها .. قالت و هي فاقده الأمل .. : يمه تسمعيني ؟؟ ..
ما سمعت لها صوت و لا حست بـ حركتها ..


استغفرت ربها و هي تحس بـ خيبة أمل ..
و أمها ما حركت يدها ..
انتبهت لـ محمد الوقف جنبها و عيونه على أمه و هو ساكت ..
بأست رأس أمها و هي ترفع محمد لـ أمها ..
بأس خدها و هو يبتسم لها ..


مشت لـ برى الغرفه و هي تحس أن الدنيا أسودت بـ عيونها و أمها بهـ الحاله ..
قبضت يدها و هي ترتجف .. تمنت أن اللي توهمته صار صدق ..
مشت لـ غرفة سلمان .. و هي تخبي فرحتها بـ شوفت أمها ..
المهم أنها موجوده و تتنفس ..
و لو أن وجودها بهـ الحاله يوجعها .. لكن هي حست بـ فقدانها و لا تبغي تفقدها أكثر ..


* * * *


فشقة عناد ..


حطت الروج على شفايفها .. رتبت شعرها اللي فاتحته بـ طوله على ظهرها ..
دخل لـ الغرفه .. شافها واقفه قدام المرايا و الحلى مكتسيها .. التفت عنها قبل لا تفضحه نظراته لها ..
رمى شماغه على الكنبه و ثوبه معه .. انسدح على السرير بـ فلينته و سرواله ..
تجاهلها و لا كأنها موجوده .. غطى عيونه يحميها من جمال مسك ..
التفت تشوفه منسدح على سريرهم ..
اللي جمعهم أمس لكن كلن عاطي الثاني ظهره .. و كل واحد منهم نايم على الحفه ..


قربت له أهمست له بعذوبه .. : عناد ..


ريحة عطرها زادت من دقات قلبه لـ تعذبه .. تهمس بـ أّذنه بصوت عذب ..
يحس بـ انفاسها على وجهه .. قريبه عنده لـ حد كبير ..
تمنى أنها بهـ القرب من قبل لا يعطيها الشهر ..


التفت بسرعه عنها قبل لا يتراجع بـ كلامه ناظر الجدار اللي قدامه ..
هزته من كتفه لتنبه لها .. و هي متجاهله كل اللي يحس فيه ..


عناد بحده و هو ما زال على وضعيته .. : ميت نوم لا تزعجيني ..
مسك .. : تكفى عشان خاطري بس وصلني لـ أهلي ..
فتح عيونه و هو يبتسم جابت له الحال بدون لا تدري .. يبغي يبعدها عنه قبل لا يتهور ..
قال لها و هو معجب بـ شكلها .. جلس على السرير جنبها .. : تروشي ريحتك كلها عطر ..
مسك قالت بـ إنزعاج .. : لا تكفى .. محد راح يشم العطر ..


قال و هو خايف عليها من الذنب إذا أحد شم عطر فيها .. : و لو الحذر واجب يالله قومي ..
قامت وهي تبتسم .. تحس براحه ببعده عنها .. أخذت راحتها بالبس و بـ الكشخه .. بعدما واعدها أنه يعطيها شهر ..
و الأهم أنه ما راح يقترب لها و يتهنى بـ جمالها ..


شافها وهي تسحب روبها من الشماعه ..
سند رأسه على تاج السرير .. بـ يرتاح منها لو كم ساعه قبل لا يتهور و يخلف وعده لها ..


* * * *


حطت جوالها بـ جيب تنورتها .. و هي تركض على الدرج ..
تبغي التباشير من ولد جيرانهم اللي وكلته أنه يراقب بيت منصور بعد ما اغرته بـ مبلغ محترم ..


طلعت لـ الحوش الواسعه .. دورت عليه بـ عيونها شافته واقف قدام الباب الرئيسي ..


واقف تحت الشمس بـ ثوبه الأبيض و شماغه متلطه فيه و بين يديه جواله مشغول فيه ..
مشت له و هي تبتسم له .. : هاه بشر ..
رفع عيونه لها .. : أمس فـ الليل شال أغراضه و راح لـ الرياض .. و باع بيته ..
تهلل وجهها بـ فرح ملأ قلبها المبتور من اللي صار لها ..


دخلت يدها بجيبها و هي تطلع منه فلوس و تمدها له ..
نزل شماغه عن وجهه و هي تشوف ابتسامته على شفايفه .. أخذ منها الفلوس ..
مرر أصبعه السبابه على لسانه و هو يعد الفلوس ..


بلعت ريقها و هي تشوف شنبه و سكسوكته الكثيفه ..


هي مرتين قابلته مره لما شافته جايب أمه الكبيره بـ السن لـ جدتها ..
و قابلته بـ الحوش و البلا كان متلطم .. و بدون خجل و بدون لا تراعي نفسها أنها بـ العدة تكلمت معه بكل طلاقة لسان و بجرأه ..
و المره الثانيه هذي هي ..


طوله و جسمه النحيل و صوته اللي كان هادي ما يملأه الخشونه ..
كان يدل أنه ولد بـ الثانويه بـ أول أو ثاني أو ثالث .. ما يهم لكن المهم أنه أصغر منها و لو بـ سنه .. و هـ الشي ما يدعي أنها تتغطى منه أو تنحرج منه ..


لكن بهـ الوقت تغير كل شي ..
طوله نفسه متوسط الطول .. و صوته تسمعه خشن مثل صوت أي رجال ..


أرجعت كم خطوه على ورى و هي تبغي تخفي نفسها من هـ اللي تحول بـ يوم و ليلة لـ رجال !! ..


رفع عيونه لها و هو يحط فلوسه بجيبه .. : حنا حاضرين لـ الطبيبن .. أي شي تبغينه مني لا يردك الا لسانك ..


أركض لـ الباب الرئيسي .. تبغي تخفي ملامحها عن عيونه ..
و قلبها يانبها بسبب موقفها معه ..


رمت حالها على سريرها و هي تتنهد بـ راحه .. ارتاحت لما عرفت أن منصور أبتعد عنها ..

نست موضوع الرجال اللي كانت معه .. و الفرحه مي سايعتها ..


* * * *


فـ شقة بتال ..


قامت على صوت ضرب الباب و على صوت بتال يناديها ..
راحت لـ حمام الضيوف الله يكرمكم .. غسلت وجهها ..
مشت له .. ما عاد تسمع لا صوته و لا ضرب الباب .. أوقفت قدام باب الغرفه .. قالت بـ صوت حذر .. : بتال ..
ما تسمع أي صوت له .. دخلت المفتاح بـ الباب و هي بس تبغي تسمع ( أنتي طالق ) ..
تشجعت و هي تفتح الباب عليه ..
ناظرت الغرفه ما له أثر فيها .. تقدمت تدور عليه ..
حست بـ جسمه ملاصق جسمها .. حست بـ حراره .. و الخوف ملأ قلبها ..


داخل الغرفه ..


نام بعدما فقد الأمل فيها أنها تفتح له الباب ..
صحى و هو يحس بطنه بيتقطع من الجوع .. ضرب الباب و هو يتمنى أنها تفتح ..
تخبى ورى الباب و هو يسمع صوت قفل الباب ..
تقدم لها و هو يشوفها معطيته ظهرها .. الصق جسمه بـ جسمها .. همس لها بـخبث .. : وين بتروحين مني ..


أبتعدت عنه بسرعه و هي ترفع أصبعها السبابه بـ وجهه .. : لا تقرب ..
أركضت برى الغرفه و هي تشوفه يتقدم لها .. راحت لـ المطبخ .. دورت على سكين بـ دولايب المطبخ ..


مشى وراها .. و هو يشوفها تروح لـ المطبخ .. دخل و هو يشوف السكين بيدها ..


أرفعت السكين و أرفعت يدها اليسار .. قربت السكين لـ عروق يدها الواضحه ..
قالت و دموعها على خدها .. : خلني أروح بـ حال سبيل و إلا و الله لـ أبلشك بـ دمي .. قالت تأكد له .. : سويتها مرتين و أنتحرت ..


فتح عيونه مستغرب من حالتها .. : غصون أتركيها لا تقتلين نفسك .. تعوذي من الشيطان الرجيم ..
غصون قالت بقهر له .. : أموت و لا أعيش معك .. طلقني ..
قال و العرق يصب منه .. قال بـ صدق .. : يا بنت ماني متمسك فيك إلا عشان حريتي .. قال يهديها .. : وعد مني ما راح أقترب لك ..


هزت رأسها بـ لا .. تبغي البعد عنه لـ ترتاح و تطمئن ..
ما همها إلا راحتها .. حتى لو يطلقها و ابتعدت عنه و راحت لـ سلمان ..
نار سلمان اهون عندها من جنة بتال .. قالت بـ إصرار .. : ما راح أثق فيك طلقني ..


ما يشوفها الا حبل النجاه له ..
شافها تقرب السكين لـ يدها .. نطق الكلمه اللي هي تبغاها .. و الهم باين بـ ملامح وجهه .. : أنتي طالق ...


انتهت القصة ..
اللهم لك الحمد كما ينبغي لجلال وجهك وعظيم سلطانك ..


قال الشافعي رحمة الله .. : إن كنت في الطريق إلى الله فاركض وإن صعُب عليك فهرول
وإن تعبت فامش وإن لم تستطع كل هذا فسر ولو حبوا ولكن إياك والرجوع ..

كلام الكاتبة

اقتباس :-   المشاركة الأصلية كتبت بواسطة أوجاع قلبي

السلام عليكم و رحمة الله و بركاته .. كل عام و أنتم بخير أحبتي .. كيف حالكم إن شاء الله أنكم بـ أحسن حال .. أشتقت لكم و أشتقت لـ روايتي و ربي :) أعتذر على تأخيري لو بيدي ماغبت عنكم .. ما غبت عنكم إلا بسبب السفر و ظروفي اللي تعبتني كثير .. المهم القصة التاسعة و العشرون إن شاء الله يوم السبت أو الأحد الفجر .. أستودعكم ربي لحين لقانا بـ إذنه .. كونوا بخير ..