كاتب الموضوع :
Julianna
المنتدى :
القصص المكتمله من وحي قلم الاعضاء
رد: ذكريات وهل الحب ينسى
الفصل الاول
مسكت صورة ابوها وهي تمسح ملامحه الي تحبها باطراف اناملها صار له ست شهور متوفي وكانه توفى امس !! يوم جت امها لغرفتها تقول لها انهم بيروحون يسكنون قريب خالهم هي وعزيز وناصر وامها وانه شرى لهم بيت صغيرون قريب منهم بكت يومها وقالت لهم وشلون نخلي بيتنا وكانت تحاول انها تتمسك بكل ذكرى لها بهالبيت بيت جمعها بابوها ولكنهم اقنعوها وقالت بينها وبين نفسها بحزن اول الغيث قطرة.... وبنطلع من بيت ابونا والمكان الي انخلقت فيه !!
سبحان الله كيف تنقلب حياة البشر في لحظة من يصدق انهم تركوا بيتهم وجو يسكنون مثل ما قالو قريب العايلة كون امها اخذت واحد من بعيد وضلو بعيد لكن بعد رحيله كل شي تغير ما كفاها انها فقدت ابوها تحس ان موته اخذ اشيا حلوة بحياتها ليه لانه كان مالي حياتها حب وحنان وفرح واهتمام ابتسمت تذكرت كيف كان يحكي لها يوم عرف ان امها حامل بها يومها اندهش ولكنه ابد ما خجل كان شوي كبير في العمر بينها وبين اصغر اخوانها الشباب ست سنين وهي البنت الوحيدة تجمعت دموع بعينها وتذكرت كلام ابوها يوم
ولدت قال لها :
يوم ولدتي حسيت قلبي يرفرف ورجولي ما عادت حملتني وانا شايلك قطعة لحم صغيرة ربي خلقك باحسن تكوينه ولما فتحتي عيونك قلت هاذي بنتي ماني مزعلها والي تطلبه اوامر لا حرمني منها وقلت لا بد اسميك باسم غير ولحظتها بكيتي وليتك ما بكيتي لميتك بحظني ونسيت والله اني نسيت ان امك لها حق فيك يمكن اكثر مني ويمكن انتي حسيتي فيني لانك سكتي وعطيتك صبعي ورضعتيه وامك نعشت علي وقالت عطيني بنتي ارضعها وسميتك ذكريات لانك احلى ذكرى لي بدنيتي وعسى الله يقدرني وربيك واكبرك باحسن تربية وما اقصر عليك بشي.
فتحت عيونها والله ما قصرت باباتي بس اشتقت لك والله اني اشتقت لك.
///
///
///
في مكان ثاني عالم اخر كلام الحب يدور بين شخصين كان ريان يكلم خطيبته ريم وهي بنت خالته
-لامتى بننتظر ريم صحيح حنا مخطوبين سنة وشوي انتي وافقي وان شالله بتتيسر
ريم من الجهة قلبت عيونها:ريان انا ابى بيت بروحي صح خالتي وخواتك ما عليهن كلام بس انا ابى استقل كيف يعني عروس واسكن مع اهل ريلي !! لا استحي اصلا انت ليش تفتح هالموضوع واحنا كم مرة تكلمنا على نفس النقطة !!
ريان تنهد وما هو عارف وشو الحل بيته يباله تقريبا سنة يخلص وهاذي مش حاسة فيه: حبيبي يعني مليت وانا انتظر بيت يجمعنا سوى قلت لو مؤقت بنسكن في بيت اهلي وبعدين نروح لبيتنا لما يخلص بس الظاهر انتي للحين على رايك
ريان انا لو رضيت ابوي ما راح يرضى وانقطع كلامها بصراخ من ريان
ابوك وش دخلك ابوك انا مش ولد صغير سمعيني لين بغيت اخذك باخذك بس انا مطول بالي عليك ولنشوف لين متى !!
ريم حست ان الموضوع بينقلب عليها وهي عارفة انه ريان ولو انه ابن خالتها بس ابوها علاقتهم مش لهناك وحاولت تسايره: خلاص ريان حبيبي لا تزعل ....امممم ما بتزورنا ؟؟
ريان ضايق صاير صدره منها ولا هي حاسة: مدري يمكن باكر..
اوك انتظرك سلم على خالتي والبنات
يوصل مع السلامة
ريان هام مع نفسه قال ما في غير البحر وراح وتمشى وهو يفكر بريم شفيها يعني لو سكنت مع اهلي تراها خالتها والبنات مثل خواتها !!! دلوعة لا اكثر ولا اقل حبيتها وبتحمل فديت الريم انا
ريان 27 سنة رجل بكل ما تحمله الكلمة من معنى طول بعرض ووسامة يزين وجهه الاسمراني لحية خفيفة عيونه عسلية
ريم 25 سنة بنت دلوعة حلوة طولها متوسط شعرها اسود متوسط الطول عيونها سودا
ريم + ريان مخطوبين من سنة بس جمعتهم علاقة حب من سنين لين الله يسر وتمت الخطبة بينهم
قطع عليه تفكيره اتصال ناظر تلفونه وشاف انه من ولد عمته عزيز وحس بشوية ذنب من نقلو لهني وانا ما قعدت معهم رد: يا هلا ومرحب بولد العمة شلونك يا ولد الغالية
عزيز: بس عاد بلا خرابيط ولد الغالية وما اعرف شو وانت من يينا بلادكم ما شفنا رقعة وجهك
افا افا ولد سمية ارحب فيك وهاذي جزاتي اجل شتبي متصل؟؟
بل عليك والله ما تنعطى وجه انت وينك فيه ؟؟
حاليا اممم في البحر !!
الله يا الرومانسي طيب اقولك انا وولد الغالية الثاني طفرانين عندك وقت تفضى لنا ولا الجو ماخذ عقلك !!
افا عليك عزيز ولد مطر ثواني وانا عندك انتو وين فيه ؟؟
في البيت امي طفرت منا وتقدر تقول طردتني انا وناصر لذا ولد خالي تكرم علينا وتعال طلعنا وياك
تم وانا ولد خالك مسافة الطريق وانا عندكم
ام محمد : ها شو بتطلعون
عزيز وناصر ناظرو بعض: لا بنتم قاعدين على قلبك
ام محمد مقهورة منهم بطو جبدها هم وغلاستهم بس تكابر فديت عيالي:قم انت وياه لو ما طلعتو الحين بالخيزران
ناصر: هيه يا الدنيا تشوف عزيز بس قوية علينا نحن الفقارى وتهددنا بالخيزران بس بنتها المصون ما ظني يوم سمعتها هددتها بشي الا كله دلع بدلع
ام محمد: انطم مالك خص في بنتي ما يبالها تهديد فديتها تسمع الكلام ولا تغثني وتغلس علي وان قلت شي قالت تم
عزيز نفخ: صدق انت انطم يعني لازم نسمع الموشح عن الانسة ذكريات ما لها وما عليها ............
: طنت اذني ترى شفيها الانسة ذكريات
ناصر: بسم الله ....... انتي من وين طلعتي ؟
ناظرته بهبال: بالله من غرفتي تدري وينها فيه فوق السطح !!!
ام محمد تضحك من قلبها وتدعي بقلبها الله لا حرمني منهم .....
:هلا والله بوردة البيت تعالي عندي فديت هالعيون ...
مشت ذكريات لامها وهي تناظر اخوانها بطرف عينها يقال انها تغيضهم
قعدت عندها وامها كعادتها بدت تمسح على شعرها وهي تقرا عليها واخوانها يناظروها كانهم يشوفون ابوهم لكن بملامح انثوية..ذكريات كانت تشبه ابوها لحد كبير بس لون عينها اخذته من جدتها ام ابوها على قولة عزيز هالجين ما عرف يطلع الا فيك !! سبحان الله ابتسم عزيز وهو يحس بغصة لانه تذكر ابوه وياما بيتذكره
ذكريات: شو فيهم ماماتي مغلسين عليك ؟
ام محمد تمثل: اووووف الا خبلو فيني
ناصر وعزيز شهقو: الحق علينا قلنا بنقعد عند الغالية بس افا يا ام محمد هين ما تشوفين رقعة وجهنا و ..........
ام محمد: بس بس كلام في كلام صدعتو راسي قم شوف مين عالباب قم
عزيز وهو يساسر عمره: هين سووميووه انا اراويك
ام محمد: سوميوه بعينك قليل الادب العب معك بالشارع انا..
ودخل عليهم خالهم ابو ريان : السلام عليكم .. خير سمية شفيك عالعيال !!
ناصر: هي والله يا خالي جيت والله جابك امي صايرة ديكتادورية قعدنا معها ما بغت لا رحنا قالت ما تقعدون وياي وما عرف شو .....
ابو ريان: اجل روح من وجهي انت واخوك خلنا بحالنا اقعد مروق انا وهالامورات...
عزيز وناصر: كملت راحت علينا وانا اخوك
قامت ذكريات تسلم على خالها وحبت راسه: حي الله خالي
ابوريان ما يعرف ليش هالبنت يحسها قطعة من قلبها : حي الله حبيبة خالها شلونك وانا خالك ..؟
ذكريات : الحمدلله ..ليش البنات مو معك ؟؟
ابوريان: اف دخيلك صدعة انا وامك ما نبى اذا ذول ماذين امك ترى بنات خالك ماذييني..ناظر عيال اخته يلا انت وياه فارقو
فجاة ضحكت ذكريات على شكل اخوانها كانو بجد منصدمين يمكن حسو انهم خلاص ما لهم في الطيب نصيب وراحت عندهم ولمتهم اثنينهم : لا عاد خلاص الا اخواني فديتهم والله البيت من دونهم ما يسوى..
ناصر وعزيز تشققو: والله ما حد حاس فينا الا انتي يا سيس
ابتسم ابو ريان وهو يشوفهم وقعد عند اخته وفتحو مواضيع قديمة وجديدة ومستقبلية جو لا يخلو من مزح وخفة دم عزيز وناصر وشوية دلع من ذكريات كانو اسرة ام محمد مترابطة الاخوان فعلا اخوان ولو انهم يحسو بشوق لاخوهم العود محمد وحامد لانهم متزوجين وعايشين في المنطقة الي كانو فيها قبل لا يجو عند خالهم ما توقعو يتاقلمو لكن اخوها ما قصر معهم ابو ريان كان يعز اخته بشكل كبير وحس انه لا بد يوقف معها بعد وفاة زوجها وفعلا قال وفعل.....
ذكريات كانت تناظرهم بعين ما تشوف تذكرت ابوها واللمة لما يكونون سوى فقدت اعز الناس وهي عارفة ان امها تحاول تسد لو شي بسيط من الفراغ الي محتويها لكن ....ناظرت ايدها وحست انها لازم تكلم محمد كان رافض انتقالهم لانه ما في داعي بس امها اقنعته ووافق في الاخير على مضض ما درت انهم كانو يفكرون فيها اولا واخيرا.....
ذكريات 19 سنة بنت خلوقة وحبوبة تموت باهلها وخصوصا ابوها جميلة خصوصا عيونها لانها رمادية غامقة تزينها رمووش طويلة وحواجب مرسومة رسم طولها عادي وبشرتها عاجية
عزيز 25 سنة شاب قمة بالذوق والاخلاق حبوب وسيم له قفل اسمراني مثله مثل اخوانه.....يموت باخته
ناصر 27 سنة شاب حلو دمه خفيف وهو عزيز ممكن نقول تؤام الا بفرق واحد الطول لان عزيز اطول من اخوه
حامد 30 سنة متزوج وعايش برة يدرس دكتوراه هو وزوجته وعنده بنت يموت فيها
محمد اخوهم العود 33 سنة متزوج وعنده ثلاث اولاد ولد وبنتين يشبه بشكله اخته ذكريات لكن ما يشبه ابوه !! ويحس ان اخته بنته لانها صغيرة بالسن وقريبة منه كثير..
في بيت ابو ريان
:اقول ترى احنا فعلا قليلات ادب من متى عمتنا هني ولا زرناها ...!!
الثانية ردت: بس عاد يا الذوووق الباب يوسع جمل والسيارات عندك وشو ماسك رجولك
: اف انتي مين كلمك خلك بالبيبي ومالك شغل طيب والحين السوات ؟؟
ناظروها خواتها شهد وعايشة وقالو الاثنتين: تبين نروح قومي لا تصدعي فينا...
ميعاد: الله وقامت تناقز فوق الكنب انهبلت لانها بتتطلع تمووت ولا تقعد في البيت....يلا قومو البسو...وبقول حد حق من اخواني يوصلنا المول..
:شوووو مــــــــــول شوووو بعد
ميعاد مسكت اذونها: بس واه اذني شفيكم...
عايشة: من ياب طاري مول ..؟؟ كنا نتكلم عن العمة ليش العمة في المول؟؟
ميعاد ضربت اخته على راسها: يا اختي انتي صح ما عندك خيال واسع اقول روحي روحي....انا قصدي ناخذهم ونطلع وليش حكرة البيت والجو حلو يمه منكم بيتوتيات !!!
شهد: يمكن ما يبون يطلعون احس ذكريات انطوائية وما تحب الربشة ...ليش هي بعد ما زارتنا ..؟؟
عايشة: لا حرام عليك احسها حبوبة بعدين انتي يا الهبلة يعني وحدة ابوها ما كمل ست شهور متوفي شو تبينها تسوي تقوم ترقص من ثاني شهر صح ياهل..!!
شهد ولعت موتها ولا حد يقولها ياهل: انتي يا الياهل ترى بيني وبينك الا كم سنة ...
ميعاد: بـــــــــــس اووووف وش الفكة منكم الحين يالله قدامي عند امي خلنا نتصل فيهم يلا عاد انا ما لقيت غير يهالوه
ونزلو البنات تحت عند امهم ومن اصواتهم في الدرج مسكت امهم راسها وقالت: يالله سترك نزلو التتار
ضحك ابو ريان عليها ما احب على قلبه الا ربشة بناته وقام يهلي ويرحب: هلا هلا بالشيخات ميعاد وعواشة وشهووود
البنات استحوا من ابوهم وقربو منه وحبت كل وحدة راسه وقعدوا يصبو لهم شاي....
ام ريان: ها خير بنات حمد شعندكم متوالفات ومسوين هيصة ..
شهد: افا الوالدة يعني ما نتوالف الا يوم يكون عندنا شي..
ام ريان رفعت حاجبها: والله مدري بناتي واعرفكم...
ميعاد تسال تبي تمهد: اخواني وين..؟؟
ابو ريان: ريان نايم وفيصل طالع ليش..؟؟
ميعاد تتمسكن: لا بس شوي ضايقين قلنا نطلع بما انه الجو حلو ..
ابو ريان حط الشاي من ايده وتوه تذكر: الا تعالي انتي وياها ليش ما تروحون لعمتكم وذكريات وشو لاهين فيه ما تعرفون الاصول...
الا البنات فجاة ضحكو وكل وحدة مسكت الثانية من كثر الضحك الا بصرخة امهم تسكتهم: انهبلتو انتي وياها
سكتو وناظرو ابوهم الي كان منصدم ويناظرهم باستغراب: قلت شي يضحك قامت ميعاد لانها اكبرهم لا يا الغالي بس شكثر يعني قلوبنا عند بعض هذا ويلي يسلمك نبي نطلع ويا عمتنا وذكريات يعني فلة وكشتة......
ابتسم فرحان فيهم: صح الجو حلو وما يتعوض وين ناوين تروحون...؟
ميعاد على طول وقبل لا يكمل: ابوي تكفي مول مفتوح مش كورنيش تقطونا فيه كنا صغار ترى ملل !!
ام ريان ضحكت على خبال بنتها: وينه عنك خويلد يسمعك يا ام موول
ميعاد ولع وجهها: يمه
ام ريان ضحكت عليها: خلاص انا ما عندي شي الحين بكلم عمتكم وبنتفق نصلي المغرب وبنروح شرايك بو ريان..
ابو ريان يلعب على ميعاد: اي كلمي خالد يجي بعد
ميعاد طلعت عيونها: ليش ما في داعي بس احنا ما باخذ راحتي
عايشة تضحك على اختها: راحتك بشو يا الحلوة ؟؟
ميعاد: اقول انطمي
ابو ريان: بس يلا كل واحدة تجهز نفسها الصلاة بتخلص اشوفكم قدام الباب فهمتو
قامت ام ريان تكلم ام محمد اتفقو على الطلعة والبنات يتكركرو على ميعاد ....
شهد 15 سنة عسولة حالها حال بنات جيلها تحسهم عايشين بعالمهم الخاص ملامحها نعومة وقصيرة وشعرها قصير ^_^
عايشة 17 سنة طيبة لابعد حدود ودمها خفيف تتشابه بملامحها الحلوة اختها ميعاد
ميعاد 22 سنة فرفوشة تحب تطلع حبوبة جميلة شعرها بني متوسط تربطها علاقة اخوية قوية مع ريان وتموت بخطيبها خالد ^^
فيصل 24 سنة عايش حياته يحب خواته بس من بعيد لبعيد حبوب وسيم يموتون فيه البنات لكنه مسويلهم اجنور ^_^
ريان سبق وعرفته لكن مرة ثانية 27 سنة رجل بكل ما تحمله الكلمة من معنى طول بعرض ووسامة يزين وجهه الاسمراني لحية خفيفة عيونه عسلية يموت بخطيبته ريم ^_^
مريم 30 سنة اختهم الكبيرة متزوجة وعندها خمس اولاد اربع اولاد وبنت الكل يحبها لانها بالنسبة لهم امهم الثانية جميلة جدا وقلبها طيب ..
خالد 29 سنة طيب وحلو عصبي شوي يموت في خطيبته ميعاد عرفها لانها صديقة اخته وقريبا الزواج**
//
//
//
//
وقت الطلعة
ذكريات وهي تناظر المول كان حلو ومليان بشر لكنها بعد فترة بدت تتضايق وهي تحس بنظرات الناس عليها بسم الله ولا كانهم شايفين وحدة عينها فاتحة شوية !! وشلون وروموشها طويلة بعد يا سلام كملت !! كانت تمشي مع بنات خالها مربوشات بنات خالي فرحت يوم عرفت انهم بيطلعون لانها كانت ضايقة من جو البيت ووصلها طوق النجاة من ميعاد لانها عرفت انها فكرتها وما خبت عليها ويوم لمتها ميعاد وقالت لها: نحن خوات فديت هالوجه قلبك كلم قلبي وقاله هالحلوة تبي تطلع....وعلى طووول تم يا بعد قلبي وقفتها ميعاد عند محل مجوهرات ودخلت على قولتها تلقي نظرة وهي كانت تناظر ولا حاسة بالدنيا وفجاة:
هالحلو لو يبي المحل اشتريه له....
ذكريات تيبست وقلبها طار ووقع من ها الوقح يا ربي ميعاد والله لاذبحك وخطت خطوة من دون لا تناظر لجهة معاكسة للصوت ولكن....: افا زعل الحلو ما نقوى على زعل الحلوين
ودون اي حياة وقف قدامها شاب طويل ضعيف حلو ونظراته لها كانت تحرقها تمنت تموت بارضها ولا يصير هالموقف...
: خير يا الطيب تبي شي
غمضت عيونها وراحت لصاحب الصوت فديت ترابك يا اخوي...
الشاب ضيق عيونه ومن دون اي كلمة ومشى
ذكريات وهي تمشي بتموت راحت لعزيز ولفت نظرها انه في اثنين معه هو وناصر وبصراحة ما عرفتهم...ف ما تكلمت
عزيز وهو يبي يذبح هذاك الغبي كان شاهد على المشهد من اوله لاخره لانهم كانو بعيد عن اخته وبنت خاله مسافة متوسطة قال لها: ذكريات شتسوين وانا اخوك واقفة لحالك..
نزلت راسها وهي تفكر لو اخوها ما وصل شكان بيصير كلمته بصوت ما تبي احد يسمع: انتظر بنت خالي دخلت المحل مسكت ايد اخوها لو ما جيت اشكان صار ..؟؟؟
طحن عزيز ضروسه وطمنها: ما كان صار شي لانه انتي كنتي بتمشين وما اظن هو غبي لهدرجة يسوي اكثر عن الي سواه...المول فيه كاميرات لا تنسين..!!
ذكريات ناظرته وابتسمت: الحمدلله انك لحقت علي كنت بموت من الخوف...
عزيز: سلامة قلبك سيس
عزيز عاذرها ذكريات ما كانت تطلع كثير من البيت وان طلعت رجولها على رجول امها طبعا بعد ميت وصية من ابوهم لانه كان يخاف عليها من الهوى الطاير وشلون لو راحت للسوق !! عينك تشوف الي شفته يا مطر والله لو ابوي كان ذبحه ولا خلاه هالخسيس....
ناصر رحم اخته وقرب لها: هاو ار يو سيس (يقال يعني ثقافته انكليزية) ^^
ذكريات وخوفها بدى يتلاشى شوي شوي وهي مستغربة من اخونها كيف يكلموها وفي حد غريب معاهم...: الحمدلله..
وما درت انهم مش غرب كانو عيال خالها ريان وفيصل كانو الاثنين مبلمين ما شافوها قبل الحين هذي هي صاحبة الاسم الغريب جوهرة ابوها مثل ما قال عنها عزيز مرة....كانت قمر وهي وعيونها ما ينلام هذاك الخبل لا وقف قدامها نسى ان امن المول بياخذه من دون لا يسمي عليه بس اعجبو فيها باين عليها خلوقة وفي حالها ضحك عليها فيصل وهو يشوفها كيف بتتجمد يوم وقف قدامها...
ناصر: ذكريات اقدملك عيال خالي....ريان وفيصل
ذكريات ما ركزت نظرها على حد فيهم: هلا عيال خالي
ريان: اهلين بنت العمة
فيصل: هلا ملايين.... الحمدلله على السلامة....
عزيز قتله بنظرة بمعنى انطم احسن...
بس هيي ما رد ولا كان حد تكلم واخوه ريان يقوله بعيونه والله انك تافه
بس ناصر حب يلطف الجو وسالها: وين بنت خالي عنك؟؟
ذكريات ناظرت المحل: شكلها نست اني معها من دخلت للحين ما طلعت ما سمعت كلمة خالي يوم قالي بتندمين لا رحتي معها !!!
وانفجر ريان من الضحك على اخته وطبعها: يلا مشينا نروح نشوفها
مشت ذكريات وهي تكلم عزيز: ييتو صدفة او حد كلمكم تلحقونا
عزيز: خالي كلمنا كنا طالعين ويا هالمخبول ولد خالك فيصل وبدخلتنا شفنا ريان ...وانتي طبعا
ذكريات بينها وبين نفسها صدق خبل قال الحمدلله على السلامة ...
ميعاد تساسر نفسها هييه واه ذكريات مع من ماشية شلة شباب واه فضحتي عين حمد تشوفنا لدفني بارضي بس لمحت وجه مالوف ها ريان ؟؟؟ ونادت: ذكريات
طبعا ذكريات ما التفتت لحالها الا الشلة على قولة ميعاد التفتت معها كانو اخونها وشبين ما تعرفهم !! ^_^
ذكريات معصبة: كان فرشتي ونمتي في المحل احسن..
قربت ميعاد اوف مصيبة يوم تعصب بنت العمة وقربت لاخونها: قلت لك بتاخر
ريان: وانتي والمجوهرات الله يعين الي في بالي بيفلس الفقير..
عزيز وناصر مثل الاطرش بالزفة لكن اختهم انقذتهم: ميعاد اخواني عبدالعزيز وناصر
ميعاد واااه قال شلة شباب: السلام عليكم
عزيز وناصر : وعليكم السلام
فيصل يسال اخته: وين الشعب في اي جهة..؟
ميعاد: اكيد طلعو برة اتفقنا ناكل بمطعم .......... موافقين
ريان: دام ابوك بيدفع طبعا
ميعاد: لو انت بخيل بصدق ما ظنتي
ذكريات تكلم عزيز: هالطلعة ناقصة محمد وعائلته الكريمة
عزيز: لا الا عيالها دخيلك
ذكريات: حرام عليك فديتهم كلهم عسل
عزيز: الا انتي العسل مجرمين عيال اخوك ما هم بشر
ذكريات: يتهيالك لو انت تلعبهم وتعطيهم حلويات كان غير ترى هم اطفال بس يبون مساير
عزيز: خلنا من عيال اخوك الدلع كله اصلا لعيال اختي فديتها الا لعب وحلاوة وشمات هوى هيه والله فديتهم
ناصر: هيه انت تتفداهم وللحين ما جو شوف اختك تراها بعدها ياهل ...
عزيز: اقول انطم عيال اختي وانا حر فيهم...انا خالهم المفضل بكون صح ولا ذكورتي
ميعاد من دون لا تمسك نفسها: اااعع ذكورتي شو بعد يقال يعني دلعها خلك من الدلع وناديها باسمها !!!
وما حست الا بكوع من ريان في نص خاصرتها: انتي سكتي ولا تدخلين حشرية خانم
ريان كان يضحك للحوار الي بين عيال عمته حسهم قريبين للقلب...
في طريق الرجعة بعد الهيصة الي سووها البنات بس كانت طلعة ولا احلى الكل دون استثناء فرحو فيها غيرو الروتين ولمة العايلة كانت غير واصرو البنات على ذكريات انها تكمل هاليوم وتجي عندهم تنام لكنها رفضت ولكن وين ترفض وخالها عجبته الفكرة : ليش ما تنامين تراهم خواتك وما في حد غريب ولو على عيال خالك محد مقرب صوبكم ابد
وسكتت ما تكلمت ما حبت تحرج خالها او تكسر بخاطره وعزيز عرف لها بس ما تكلم ما تحب تنام بمكان غير بيتها يلمها تحت سقف واحد ويا اخوانها وامها وكان زمان ابوها لكن سبحان مغير الاحوال !!
سيارة ريان
ريان مستغرب من خواته شكثر هو وريم مخطوبين ومع انها بنت خالتهم ما يذكر مرة طلبوا منها تنام عندهم استغرب لكنه ما حط في باله يمكن ذكريات لانها صغيرة ومالها خوات والواضح ان ابوه يحبها لانه اصر عليها وهو متاكد هي ما وافقت الا علشانه...
ميعاد لفت تشوف ذكريات الي قاعدة وساكتة: ذكريات ما قلتي بتكملين دراستك؟؟
ذكريات : ان شالله بما ان راح علي فصل كامل على السنة الجديدة..
ريان رفع نظره يشوفها من منظرة السيارة: وشو التخصص ولا ما قررتي؟
ذكريات لا اراديا التفت عليه وعيناها جت بعينه سهام من الرماد وجهتها له: ما قررت !!
ريان بينه وبين نفسه ما شالله تبارك الله شو هالعيون الي عليها...
ريان ما قدر يكبت السؤال: ليش ما قلتو للريم انكم طالعين او تخلوها تجي تنام عندكم؟؟
ميعاد اووف عاد ريانو هو والريم: اخوي العزيز الريم كذا مرة عزمناها بس هي رفضت وما قمنا نقول لها وبعدين هي ما تحب تنام برة بيتها !!
ميعاد توضح لان اكيد الي وراها مش فاهمة شي: الريم بنت خالتي خطيبة ريان...
ذكريات: مشكورة عالتوضيح...
وضحكو الاثنتين
ريان مالت على شو الضحك: لو اصريتي عليها اكيد بتوافق
ميعاد وهي مش فاهمة الموضوع اخوها لوين يبي يوصلها: ليش انا من متى اصر على حد شي ما يبيه؟؟
ريان: انا حاس انكم مش قريبين من بعض ميعاد هي بتصير زوجتي لا تخلي الحساسيات تكون بينكم...
ذكريات بلمت وهي تشوف الجو تكهرب معقول تحسس لانهم عزموني انا ؟؟؟ وما كتمت الي في خاطرها:
ولد خالي مضايق من وجودي بدل خطيبتك؟؟
ميعاد وريان صخو ما كان المفروض يدخلون بحوار عقيم اصلا بوجود ذكريات وهي المسكينة لا لها ولا عليها
ريان عطى اخته نظرة وتنهد: لا بنت عمتي انتي مكانك محفوظ اسف لو ضايقتك ما قصدي
ميعاد: فديتك ذكريات لا تحطي بخاطرك شي
ذكريات بطيبة: لا ابدا بس يا ريان تراني حتى انا ما جيت لولا اصرار خالي لاني مثل خطيبتك ما احب انام برة بيتي لكن اليوم استثناء
ميعاد حشى لا والله منتي مثل الريم يا ذكريات
ريان ابتسم ليه حب مقارنتها بالريم وقال انه اول ما ينزلهم بكلمها بعد ذاك اليوم الي صرخ فيه عليها قامت تتغلى..
ميعاد: هين يا ذكريات والله لعلم عليك (فطيم) امها خلها دير بالها على (حمد) ابوها منك
ذكريات ضحكت وضحكتها نغم: يمه منك تراه خالي
ميعاد: ما يهمني لا وصلنا خبرت عليك امي استثناء قال
وصلو ونزلو البنات وريان حاس بتانيب الضمير: ذكريات
لفت عليه: نعم...
ريان: ماخذة على خاطرك
ذكريات: ابدا توكل ولد خالي
//
//
اول الغيث قطرة....
وبداية النهاية
|
20-12-12, 11:59 AM
جديد مواضيع قسم القصص المكتمله من وحي قلم الاعضاء
العرض العادي
