كاتب الموضوع :
♫ معزوفة حنين ♫
المنتدى :
الارشيف
رد: ليلة خميس ، للكاتبة : ضلع إعوجاج
"
ليلة خميس
ليلة ثالثة
مدخل:
والله اني يوم عزمت الفراق
و خاطرك من جد ضاق
ابكاماتي المخيفه
اعتذر لك وقتها
كانت سخيفه !
بس والله منظرك بالحزن لاق !
واعتذر لك
كنت مقهوره شويه !
واعتذر لك
كنت أقولك ما عليّه !
كنت تبكي !
وانا اردد داخلي خليه يبكي !
يا عسى دمعه هنا
لين العراق !
و بالطقاق !
اعتذر لك
كانت الكلمه مريره
وكان عادي وقتها ماهي كبيره !
لان سيد هاللقا كان الفراق
يوم قلت القلب ذايب
ارجعي تكفين تايب !
اعتذر لك ..
يوم اقولك اوووص
مو وقت اشتياق !
واعتذر لك ..
يوم كالني احبك !
قلت - يخسى فيك قلبك !
لان ما حسيت مره
خاطري لا جيت راق !
انت تذكر
يوم تتعمد بكاي !
وكنت ادعي !
يا عسى يلحق وفاي
كنت تضحك !
وانا اردد
يا عساها كبر جرحك !
ليه تبكي !
مات فرحك !
يا اخيييرا
كنت ادري !
المحبه ما تجي الا بطراق
وانا احبك !
موت احبك !
شفت وش نوع الفراق !
مو انا الي ابرحل
الجمود الي سكنك !
و هات قلبك
يا هلا به يوم فاق
×
ياقلب(ن) مات بـآفراحه.. بليالي في ضماها موت.. تبكي الهم واتراحه.. وتغني لميتم الذكرى.. قبل لا
يحضنها التابوت.. نبه سمعي لصوته ودق مفتاحه.. دفنت الخوف في صدري..
وحضنت اصابعي بكفي.. اساير خوفي المكبوت.. اخاف الوهم يبعثرني.. واشوفه بصوره اشبـآحه..
اشوفه يقترب مني.. وملامح بسمه مركمه.. على شفاته
يمد ايده.. يبيني اسكن اضلاعه.. زفرت الآه.. وصحت ابكي.. نسـآك الموت وجيت يمي.. تحيي روح
ذبلانه.. انتظرت يلمّني بكلي.. ويمسح دمعي الميهود.. ويحلف عاليمين وعود
انه مايخليني.. رحل من كلمتي.. واشوف سرابه يتبع اظلاله.. رحل مع صمته المعهود.. وخلاني.. مابين
الدمع وشهقاته.. اليمه قصه الاوهام.. تبعثرني بعد ماتحيي احزاني.. نسوك
الناس والدنيا وحلف ذكراك.. مايطري كلمه انسيني.. اشوفك حي في عيني.. واشوفك حلم في ليلي..
بعد مايضمني طيفك.. ويروي شوق مضنيني.. كثير احيان ابيك تعود.. وكثير احيان.. امسي في الم موجع
ودمع يعانقه جفني قبل لا ينام.. واحيان.. عطش شوقي يرسم قلب(ن) من
حنينه ضام.. غريق من رداة الهم.. كسير مبعثرالـآحلام.. آه.. يامرها الايام.. تروينا الفرح يومين
وتقطعنا من رواه اعوام.. ونهايه كل حكي قصه.. حبيب سنين في لحظه.. غدى
تحت الثرى مدفون.. كان سلطـآن في عشقه.. حينما احتوى بين ضلوعه.. قلب قطر الندى.. قبل ان
يحتضنه الثرى..
ساره: ضاحي استر علي الله يخليك
ضاحي: نعم وش ستره ي ام ستر.. المفروض ذاك اليوم ماتطلعين معي ماهقيت انك رخيصة
رخيصة
يا موجع الكلمه.. ليه تزود الجراح ليه
بهمس مخنوق: ضاحي حرام عليك انت.. مو دائما نخرج مع بعض
بلؤم: مزاج يابنت عمي.. عشان مرت(ن) ثانية ماتلعبين بالحبلين.. بنشوف تعليمك وش بيفدك
ساره: تسوي كل هذا عشاني متعلمه.. وشرطت عليك بالعقد اكمل تدريسي وماتمنعني عن الوظيفة.. ليه
يا ضاحي ليه..
ضاحي: خلاص لاتزعجيني ورقة طلاقك بتوصل لك لاتعبين عمرك
شهقت: طــــــلاق
ضحك بصوت عالي.. كرهته بقدر ماحبيته.. قفل بووجهي ومسكت شعري واشده من الغيض والقهر..
بكيت وبقلة حيله.. وش اسوي بـ هالمصيبة والله لو ابوي شم خبر بس لا يطلعني
فوق السماء.. الله لا يسامحك يا ضاحي الله ينتقم لي منك.. يارب.. انت اعلم بحالي.. يارب استر علي
يارب..
شفت اطياف متزينه وريحة عطرها يسبقها
اطياف: وانتي للحين مالبستي
ساره: ماني رايحه
مرت حاذني ولما ابتعدت مسكت كفي
وتبتسم: وليه إن شاء الله.. وإلا مستحية من حبيب القلب ضويحي
بوجع: تكفين يا اطياف خليني بروحي.. ماحد ما اكلني
اطياف: انتي انهبلتي ولا صاب عقلك به بلا.. بنروح القصيم كلنا وانتي جالسة لي هنا..
وبهمس: اطياف اللي بترحون لهن انا ما اعرفهن من هن صغار.. مو يوم كبرنا ينشدون عنا..
اطياف: احنا مو براحين لناس(ن) غرب.. ألا انهن اهل(ن) وحبايب.. بس تعرفين من نقلنا للرياض انقطعت عنا اخبارهم
ساره: خلاص يا اطياف الله يخليك
اطياف: ولا تنسين جدتي اللي ماتدنى القطعية وش بتحس ان ماجيتي ولا سيرتي عليها.. يكفي غيابنا
سنين طويلة
بإرهاق: متى بنمشي
اطياف: بعد صلاة العشا.. يزيد بصلي وبيأخذنا.. جهزي نفسك بنقعد اسبوع أو يمكن شهر
خرجت اطياف وتركتني اهوجس
ليه يا اطياف مابي ارووح القصيم.. مابي اشوف حنيني هناك وعذابي.. انا هنا مرتاحه هههه حيل
مرتاحه.. ماتهز الارض خطوات عجوله.. يا خفوقِ زادني حبه متاعب..
من صدود.. الى نفور.. الى تلاعب.. الجفا والبعد والجرح وانيني.. اللقا.. والحب لا يمكن يزوله.. اجتهد
فيني.. وانا برضى ولكن.. المحبه ماتجيك بهالسهوله.. قلتلك يا صاحبي.. وان
جاك صدي.. عطني اعذاري الين.. ارجع اقوله .. لا تقول اني قدرت.. ولا تفكر.. ان عندي حس لا من
رحت ازوله !لا وربي دام عيني ممتليه مستحيل احساس قلبي يوصوله..
ومستحيل النوم من دونك يجيني وانا عيني لا غفت عينك هطوله.. ليه تظلمني.. وانا احلف لك وفيت.. ليه
احس اني وانا اشوفك ذلوله.. صاحبي هاجر.. وغيب ولا تجيني.. لا يغرك
ميل قلبي او ذبوله.. روح دام النفس طابت.. وانتهينا.. روح يا عرض الجفا عندي وطوله غلطتي اني
الين الحين ودي.. وقلبي الي قالب الدنيا تحدي.. غلطته.. قطعة وفا.. وجيت
امهبوله.. كاشفه اوراق قلبي وبايعه الدنيا بفوله..
×
سايق غلا.. وين أوديه قلي.. وطيفك ساهي ما فطلي.. دوم بيه أهلي.. وصلته وما وصلي.. وين أولي ..
وأنت من كل الجهات.. مأخذ روحي شتات.. وأناديك خلي.. وعنديِ يقين..
أنك تناظر بطرف عين.. وان الهوى في خاطرك يطري وتصدين.. وأنك تخفي.. مثل شايل الدين.. يوصل ويجفي.. من حين إلا حين.. ما تخافين.. يا ماخذه من النبض روح ورياحين
.. شعور وميادين.. مابيك تقضين.. وأزيد.. يا سيد , سيد الغيد.. ويا كامل الزين.. مالك مواعيد.. ومالي بالوعد عهد ومضامين.. من غير تخمين.. يوم تمرين.. عطرك يسابق طلتك..
مثل المطر لا لامس الطين.. يا غيث ناديتك.. هجير.. وانا اصيح تكفين.. تحي الهدب.. تنعش عروقي وتروين.. الشوق بعضي وبعضي هلاوين.. لا تخيب ضنوني.. صافح عيوني..
ما في الخجل شين.. طبع العذاري والعذاري سلاطين.. في حكمهم قسوة.. وبقلوبهم لين.. بين الملايين.. يا نجمة مساى.. والمسا سر المحبين.. خذي غلاي.. ولا تقولين بعدين.. بي
حادي البين..يلعب بي لعب مرجوحه.. مابين حبلين.. ولك شهقة قلم.. ما بين سطرين.. خذيني عناويين.. لو أنك تسلين.. ولو بسلي .. على قلبي تمونين..
دخلت بيت عمي وشفته بوجهي.. عيوونه ذبلانه وجهه اللي يتعليه ملامح الأرق..
فتح عيوونه على وسعها وظل يناظر فيني وكنه يصدق انه.. انا هنا.. فرك عيونه
بحب: مياسه انتي وإلا طيفك اللي يمر علي كل يوم
بوجع: لا ماني بطيف يا ابو برهان
اقترب مني وانا عيوني تطلق شرار.. صرخت بوجهه
مياسه: لا تقرب
عنادني ولمني بقوة حسيت ضلوعي بتنكسر.. جيت بحكي إلا هو يغرقني ببوساته اللي حنيت لها
مياسه: حبيب وخر عني.. ابعد
حبيب: كذا يا ظالمه 6 شهور حارمتني من شوفة عيونك
دفيته بقوة غريبة علي.. وطنشته مشيت ودقيت باب المجلس الكبير اللي يجلس فيه عمي..
براق: ياهلا والله بنت(ن) اخوي
بصوت مرتجف انحنيت له وحبيت راسه ويده: شلونك ياعمي
براق: بخير ياجعل عمرك طويل
بعتاب: ماهقيتها منك ياعمي.. تزوجني لولدك وانا ثانيه له
بصوته الحنون: أفاا وانا عمك.. مير انك الاولى يابنت الغالي
ببكاء حزين: لا والله ياعمي ماني الاولى إلا شريكه ودخلت بالغلط .. مثل مادخلنا بالاحسان نخرج بالمعروف
بشموخ مطعون: ياعمك فهميني السالفة يمكن انها هرج(ن) حريم
بألم: ياعمي ولدك خدعني.. وجعني ياخذ بنت خاله على عين وعلى راس بعد.. بس انه يخدعني ومثل الاطرش بالزفه.. ادري من ناس(ن) ان زوجته ثانيه
اختنق وجهه وفتح ازرار ثوبه العلوي
بغصه: والله انه قليل خاتمة
بخوف: عمي انت بخير
براق: الحــ ــــبــــ
فتح الباب وشاف وجه ابوه المخطوف.. عرف انه ناسي حبة الضغط .. دخل يده بجيوب ابوه وفتح فم ابوه
بصعوبة وتناثرت الحبوب بالارضيه.. العلبه بيده اليمين وتلقف باليد الشمال الحبه
وضعها على فم ابوه شبه مخنوق وخذ كوب المويه القريبه منه وسقى ابوه.. شوي رجع للونه طبيعي..
بغضب وهو يضرب العكاز مصدره صوت مزعج
براق: تطلع من شوري ياحبيب من سنين وانا يا غافلكم الله.. لا احترمت شيبتي ولا قدرت كبري .. فوق هذا تاخذ بنت عمك ثانيه وتسحب علي وتخدعنا بمواعيد وعهود.. ما انت
برجال ولا تنشد لعلمومه(ن)
حبيب وهو يحب يد والده ويقبلها
وبحزن: يبه ماغلطت سترت على بنت خالي.. وانا مليت وانا انتظر موافقتها سنه يبه عشتها نار تكويني
وهي ولا تحس فيني ..
براق: وتقوم تاخذ لك بنت خالتك اللي مقطوعه من شجرة
عيونه تشوف ولده راكع ومتذلل.. الذي طعنه برجولته ونحرها أمام بنت اخوه وبين جماعته
براق بغضب: حبيب الحين تطلقها تسمع وإلا والله وامانه الله لا اغضب عليك ليوم يبعثون وان تنسى لك أبو جزاع.. وبنت عم اسمها مياسه
ويضرب كتفه بالعكاز: توحي هرجي ياولد
حبيب بإختناق: بس انا عندي ولدين منها
براق: الله أكبر عليك.. قم عن وجهي قم.. حسبي الله عليك كان شوهت سمعتي بتالي كبري.. قم
حبيب يقوم وهو يشوف وجه ابوه اللي انقلب اسود: يبه هالهرج مو منك انت تعرف ليه اخذت بنت خالي
براق: لاتخليني اكره وجهك.. اللي سويته مايسويه عاقل.. عمرك كم عشان تتصرف هالتصرفات الطايشه.. وش خليت لأخوك شكري.. وهذا انت العاقل واللي اعتمد عليك
كنت اشوف مناقشتهم.. وانا قلبي يهوي وينكسر بألف انشطار.. عمي مثلي مايدري عن زواجه.. يعني معقولة مرة عمي هي المخططه على كل هذا اي ماتبي بنت اخوها تروح
لواحد(ن) غريب..
براق: مياسه تعالي وانا ابوك
قربت منه وهو لمني بحنان
وبهمس: لا اسمع سيرة طلاق منك.. كنك ماتبين زعلي.. وهالتيس الاربد بربيه لك ويطلقها وهو مايشوف درب
مياسه: بس ياعمي
براق: بيطلقها والولدين انا بربيهم وامهم تدور لها رجل(ن) ثاني غير حبيب
مياسه: لا ياعمي وش ذنب الاطفال يتشتوون بين امهم وابوهم.. خلاص ياعمي ان كان لي خاطر عندك تلبي طلبي ولاترفضه
براق: جاك يابنت دعاس
مياسه: جعل عمرك طويل ياعمي.. انا ابي طلاق.. لي 6 شهور فكرت فيها زين واستخرت ياعمي
بحزن: بس
مياسه: يحز علي افارق بيت احتضني.. بس هذه حال دنيا دوام الحال من المحال..
براق: يابنتي طلاق ابغض شيء
مياسه: سامحني قطعت كلامك.. بس والله انه ياعمي يوجعني اني مرتبطه به وهو اولى من غيري.. ولا تخاف علاقتنا ما راح تتأثر.. تأمريني علي شيء قبل ما امشي..
براق: سلامتك.. اهتمي لعمرك وان احتجتي اي شيء مايردك إلا لسانك وانا ابوك
حبيت راسه ويده وخرجت
حبيب بغضب: تعالي وين بتروحين
مياسه بخوف: وش تبي.. مو كفاية انك ما انت من نصيبي..
بسخرية: قسم بالله ان يجيني يوم واشوفك ما اخليك.. وجاء اليوم اللي انتظرته من 6 شهور.. تبين تختفين عن حياتي
مياسه: حفظك الله ياعمري.. ولي طلبه قبل لاسري.. ابي المس ورقة طلاقي بلونها البياض
بوجع: لاتطرين هالطلاق مرت(ن) ثانيه.. توحين هرجي يابنت دعاس
ببرود: اي اوحي يا ابو برهان.. لا تقلل من شيمتك اكثر.. ترى مافي شيء يستاهل.. انت بطريق وانا بطريق
وهو مفتون بي.. ويقبل عيوني بإشتياق
بهمس: لاتغيبن عن عيني.. انا غلطت اعترف بعيبي اني طيب.. وهذا قليبي من يوم كنا صغار
يبكي ودموعه ولا تبان
غمضت عيوني وانا اشوف داخل قلبي يسكن طيفه
وبوجع: هذا قليبي.. تبيه وش تبيه.. خله لزمن سيبه
×
أخافك.. ياعيون الليل.. برق و خيل.. وعيوني بالنهار عميا.. لا عصا.. لا وطن.. لا خيل.. لا روح تهف بتمتمات هيا.. لقيت روحي نهر..و إنت جسر.. من فوقي أكف يدي.. أوراق..
وغصن.. والماضي عيدي.. أخافك.. ياجناح الطير كل الغير.. و إنت عيوني.. و عيونك ليل.. باح سر النور بلمحة عيونك.. ذاق اللون لونك.. و إنتعش جيل.. ياعيون الليل..
طعم الليل بيني و بينك..
قلت له بوجع..
شغاف: ترى ماني على خبرك.. لو إني على خبري
المكان اللي مشى دربك.. خطوته ضاعت من بدري
العين اللي كحلها شرك.. أدمت في مقتبل عمري
السما طاحت من عسرك.. و الخلا غيمته تبري
المسافه النجم وبعدك .. أشياء مكمله لفكري
يابعد روح القبر عمرك.. فدوة مراسيل السما عمري
يزيد: يـآشموخك انكساره.. يـآعذاب(ن) ارتجيه.. هي سنين وايام مرت وامتلت.. بعض صفحات الكتاب.. بين عشق وبين ذكرى والتيـآع..
تذكرين حبي لك طاهر مادنسه غير بياض صافي
شغاف: يزيد بتتحمل طفله حبت.. رغم ان الحب عيب.. طفله تعشق.. وتكتب الاشعار كيف.. شامخه بقلب حنون.. عارفه هي وش تكون
يزيد: احبك.. وابد ما اجني الاشواك ورد.. وترسمين المبسم ربيع.. وتطفي الحزن بشتاء.. ولامن جاك هالصقيع.. اشعلتي شموع دفا
شغاف: يزيد
يزيد: انتي بعيني انثى.. محتويها قلب طفله.. ياروح خاوها الشموخ.. وياشموخ(ن) انكسر.. وياقلب(ن) انهزم
شغاف: كم مره تقول.. مادريت الحب غيم.. ممتلي برق ورعود.. بين ضيم وبين خوف.. ويشعل الخافق بـ آه.. رغم العيب حبيتك وبجنون.. التحفني البرد قبل لاياتي الخريف..
وذبلت من مر الجفاف.. مثل زهرالياسمين..
يزيد: لا تزودين الجراح كلها شهر ويضم لك بيت(ن) يلمك ويحويك.. تكفين إلا العيون لاتدمع..
شغاف: احبك يزيد.. الله لا يحرمني منك
يزيد: ولامنك ياعيون مدمعي.. ياقلبي العصر اذن بروح الحق عالصلاة..
وبمزح اردف: ولا تهوجسين غير بي
بحب: من عيوني.. الله يحفظك
×
جاء المساء وغاب ضياء الشمس..
كنت اسمع صوت يزيد يناديني اعجل.. خذت شنطتي وخرجت من غرفتي إلا هو رقى وحمل شنطة مني..
وبعصبية: علامك تأخرتي الله يصلحك.. شكلك انك ناسيه ورانا مشوار(ن) طويل
انحنيت ووقبلت راسه
وبهمس: آسفه.. حقك علي
يزيد: ها يمه.. ناقصك شيء مو نرجع من طريقنا
أم يزيد: توكلنا على الله..
×
أم براق: يامرحبا يامرحبا ياجعلني ما اذوق حزنك
جزاع وينحني لها ويحب راسها بقبله حنونه
ويبتسم: الله يخليك لي وش له متعبه عميرك.. ارتاحي بسلم عليك وانتي جالسه
أم براق: ان ماوقفت لك اوقف لمن ياولد البراق
جزاع: تسلمين لي يمه.. جهزتوا العشاء ترى عمي خزام على وصول
أم براق: الله يجبيه بسلامه.. والله انه حنيت عليه القطوع لا ينشد عن سلومنا.. هالديرة اللي راح لها ماسوت خير
جزاع: افااا يمه الرياض مافي مثلها.. إن شاء الله اوديك يوم(ن) لها
أم براق: الله لا يقوله..
غرق بالضحك
وابتسم: يمه ليه حاقده على الرياض ترى جوها
قاطعت كلامه: اقول اقطع الهرج .. إلا كني لمحت مياسه.. وينه حبيب مايدري ان عمه على وصوول
براق: بيرجع يايمه انتي ريحي لي بالك..
أم براق: الله يهديه وهذا هو اعقل واحد فيهن.. ازهم عليه خل يستقبل عمه
جزاع: ان شاء الله انا بكلمه
دق على حبيب بس يعطيه مشغول..
أم براق: وين رايح
جزاع: شوي وراجع
خرج جزاع ورسل رسالة لاخوه .. سمع صوت سيارة رفع نظره وطاحت عينه على عمه اللي نزل من سيارة..
بترحيب: حي الله من لـفانا وياهلا بكم نورتو القصيم
خزام: منوره باهلها
جزاع: تفضل ياعمي حياك.. ياهلا والله بخالتي علومكن
أم يزيد: حمدلله اخبارك ياجزاع عساك طيب
جزاع: حمدلله بخير ياخالة حياك داخل..
ويبتسم: العريس حي الله من جاء
لم ولد عمه: الله يبقيك..
جزاع: علومك وانت بتودع العزوبية بعد شهر
يزيد: بيني وبينك خايف من المسؤلية
ضحك: مو هذا اللي مهتويها
يزيد: عن طنازة عاد.. تعال ساعدني وانت ساكت
جزاع: على امرك يانقيب
×
دخلت امي واطياف وانا معهم واتمنى ما اشوف ضاحي لأن ساعتها مدري وش بسوي.. الله يعدي هاليوم على خير..
رحبوا فينا .. وجلست جنب جدتي اللي كل شوي تمسح شعري وتذكر الله علي..
أم براق: وراه ضويحي ماعجل الزواج.. احد(ن) يشوف هالزين ويفرطه
آه ياجدتي لاتقلبين المواجع ولي يسلمك ياجده..
أم براق: شفيتس يمه تعبانه.. يعورتس شيء
أم يزيد: والله مدري ياعميمه من يوم زواج طرفه وهي ماتبشر بالخير
وانا ابتسم لهن بتعب: يمه.. ياميمتي مرهقه شوي من طريق وإلا انا مافيني شيء
أم براق: الله يهديتس ياخزنه.. بنتس الوكاد بها بلا وشين بعد تأسنها انحته ( اصابتها عين )
أم يزيد: اسم الله على بنتي ياعميمه.. فاولي خير إن شاء الله مابها غير تعب طريق
أم براق: ايت ياساره ( تعالي ياساره)
وقفت بشموخ بان انكساره.. وطلتي الغربية بعيدة عن شخصيتي المرحه .. ابتسمت بهدوء.. ونزلت
جزمتي احترام وتقدير لجدتي اللي ماتدنى اتوطى واوسخ فراشها بجزمتي..
وارخيت جسمي وارخيت راسي بحضنها وتمددت بألم.. جفني رمش وتعب ياميمتي غرقت بدمعي والهدب.. وكنت أكثر من خفوق ووجه واحد.. وكنت أجمل لغز مجهول.. ايش
اقول.. مابقى عندي كلام.. حتى عيني تبوح.. ولاتنادي للمنام.. ساهره من امس المساء.. لا جفا قلبي غلاك ولانسى.. ولا اقتنعت اني على ضفة احساسيك ازوول.. ياميمتي كيف
اوصف لك شعوري.. وكيف ادراي شمعتي.. والقوانين اخذلتني.. والتواريخ اوصلتني.. لآخر أيام الذبول..
أم براق: يامتس علامتس اندهى عليتس وانتي ولا كنتس هنا.. علامتس تهوجسين بضوحي وبقرب جوزاتس
أم براق: علامها صخت تسذا.. اطياف وانا جدتس انشدي عن سدره خلها تعطيتس من زيت(ن) مقري عليه.. خل ادهن جسم(ن) صابه بلا قومي
اطياف: إن شاء الله جدتي..
أم براق: اسم الله عليتس.. الله اكبر من عيونهن الحسود.. جعلهن للمرض اللي يطيحن.. ما لقن غيرتس.. يمه سوير علامتس صاخه
انا من حسيت بالامان نمت وماحسيت إلا بصعيق فوق راسي.. فتحت عيوني إلا اشوف ابوي وعماني ولفيت إلا اشوف امي واقفه بعيدة عني
يزيد بحنو: ساره حبيتي تسمعيني انت وش اللي موجعك
بانكسار: تعبانه حيل
يزيد وهو يحملها بيدينه: جعل تعب فيني ولا فيك
ساره: آه ياخوي الوجع مايدواي اللي فيني مايدواه طب
أبو يزيد: قم خل ناخذها لدكتور
أم براق: قلت لكم انحته
شوي حسيت اصواتهن تختفي عن مسمعي.. وغمضت عيوني بدوخة احتاجتني بكل خلاياي
أبو يزيد: هاتها ماني عجزان عن شيلها..
يزيد: يبه
أبوي وهو يحمل جسدي اللي غاب عن دنيا فانيه اطالب منها زوال.. ويزيد فتح سيارة لابوي.. وصعدوا
سيارة ونقلوني للمستشفى
×
فيني ونه.. وبخاطري ارحل بعيد.. ومن عمق التناهيد.. سرحت
حبيب: احبك ..
قلت: صدقني انا اكثر ولاتسمح لنفسك تتحدى من يحب الثاني اكثر.. لان الاكيد انك بتخسر ..
بثقل: اتحدى قلتك وانا اقدر..
قلت : تصدق ياعذابي لما نكون بجمعتنا.. كلن في حضن محبوبه ..واللي منهم تتمنى.. يجيها الحبيب بلهفه لها ويتفدى ..
وبالم: يابخت حظوظهم ..
بسكون: وانتي من لك..
بحزن : انا لي الهواء والنجوم والقمر في ليلتي الظلما اشكيها واسامرها
بهمس: وش رايك اختطفك.. والمارد السحري لك اكون احقق احلامك واردك.. ولامن شاف ولامن درى
وبفزه خفوق: تقدر ..
حبيب:صدقيني.. بتكوني نجمه في ليلي ..واميره في كوني
مياسه: واهلي..
حبيب: انسيهم وانا معك هم ماراح يدرون عنك ..
اختطفني بدون صراخ وبدون صوت.. وبكل هدوء سرت في درب قلبه.. وكيف مايبغى اكون ..
فجاه: هاه بترجعين..
قلت بدلع :ايه مليت منك..
قال و في صوته فرح وبضحكه احساس الوله: للاسف ماعاد لك اهل واحباب.. كني سمعت ان عندهم عزاء لبنت(ن) توفت فجاه وبدون اسباب
ارتجفت وارتوت دمعات عيني.. عانقت كف يده
وابتسم :ياروح فيني.. هالدموع ليه يانور كوني
مياسه: وين اروح
طق صدره : انت لي والا نسيتي ..
مياسه: يامجنون فكني
حبيب: باخذك لبيتي
وانصدمت: امك ..خواتك ..والعيون اللي تناظر وبتسال من اكون ؟؟
حبيب: طفله في دربي لقيت.. راعوها واكرموها
بدلع قمت اتمايل واغتصب مناظر عيونه:
طفلتك ومحبوبتك وش بقى لك ماصرت ..
بنبره اربكتني خوفتني زلزلتني: تعرفين المستحيل
بهمس:ايه
حبيب: انتي عين المستحيل..
×
رفاء: اصحي يابنت.. مياسه
نظرت فيها وعيوني تدمع..
رفاء: آخخخ منك وش سويتي بيت عمي
بإختناق: طلبت الطلاق.. من حرتي طلبته حتى عمي إلا هو ابوه مايدري بسواته.. كله من امه سوسه
رفاء: لا حول ولا قوة إلا بالله
.
بتعب: ذبحني وهي يقولها.. انتظرتها سنه وهي طولت ولا ردت علي.. مايدري ان بهالسنة كنت اعاني
بعجز قلبي.. ولا لقيت لي طب وهو دواه.. آه شفتها يا رفاء بنت صغيرة والله
صغيرة أنا اكبر منها وكني عجوز.. هي عندها ولدين.. وانا سنين ضاعت كلها بالهوى ماوصلت لعاطفة
ام(ن) تشوف عيالها وتسهر عليهن.. آه يا رفاء يامكبر الاهانه لا جات لتس من حبيب وخاين.. الله لا يذوقتس
اللي ذاقته اختس
رفاء: ذكري الله يا مياسه.. لك 6 شهور وانتي على الحال ترى ترهقين جسدتس لا اكل تاكلين صويحي ولا
نوم كأن نوم عدو مو رفيقنا.. دام انتس طلبت طلاق ما الومتس اللي صار لتس مو هين.. وبعدين ماتدرين
الخيره وين.. هذا المكتوب ياقلب اختس اصبري واحتسبي الأجر والله بيرزقتس باللي احسن منه
مياسه: لا تخنقيني زود يا رفاء.. ما اقدر انساه ماخلى فيني مجال انسى حبه غرقني ببحر ماله لا ساحل
ولا مينا.. حبه يتشبث فيني مو راضي يفك قيده عني.. ماهقيت عمتي تسوي
فيني هالسوايا.. اشوفها ليه تكرهني وتنتظر مني الزله.. اثرها ماتبي شريكه لبنت اخوها.. الحين بس
فهمت وش سبب كرهها لي.. بس ما اقول غير حسبي الله عليك ياحبيب كنك
تاعبني بغيابك وبحضورك حسبي الله عليك
×
قسم وربي مشتاقه.. يا ظل الأيام.. و ضحكات السنين.. سنه من تفارقنا.. ما غابت طواريك.. قسم بالله..
كأني.. فاقده بسمتي.. و دموعي كل ليله سواريب.. حنانك يا الرفيقه.. يشابه
حنان أمي الفقيده.. ضمتك تروي حناني.. و تهدي بقلبي ونينه.. تعالي .. يا أمي يأختي يا الرفيقه.. تعالي
أبحكي ما حصل.. و أبكي بين أياديك.. صار الوقت محاصرني.. و الغربه
سوت فيني.. الطواريق.. لا تقولي صار عمري.. واحد وعشرين.. أنا طفله بدونك.. أبكي ظلمت الإحساس.. و غربة الوطن من غيرك.. أضيع .. يا ساره يا أميره يا شيختي و
المزايين.. أحبك و رب البيت.. مالقيت من يساويك.. غربتك طالت و السموحه لا زدت غربتك تغريب.. خذيني أخت للـعضيد اللي.. من حشاك.. فاز بضمتك و قاسمني فيك
يا ساره كل ما قال يزيد ياشغاف أبيك.. تشتعل فيني غيرة طفله من زوجها.. تحارشه تبي تعاديه.. قسم بالله.. كأني طفل يحسب الأيام في عقدة أياديه
مرتْ عشر و باقي ثلاثين.. و لا زلت للحين أحسب اليوم يومين.. يالله عسى بكرا تصير دقيقه و ألاقيك.. و أشوفك قبالي و أحضن أياديكـ
غادة: مشتاقة لها ياشغاف
شغاف: لها مدة طويلة ما دق علي.. وهي كل يوم تحارشني عشاني اكلم حبيبي يزيد ولا اكلمها.. تهقين ازعلت مني
غادة: والله مدري.. طيب ليه ماتدقين عليها
شغاف: دقيت فوق العشرين مرة بس ماترد
غادة: طيب والحل
شغاف: مدري انا خايفه صاير لها شيء ولا احد(ن) جنبها
غادة: طيب دقي على اطياف مو هي اختها الكبيرة
بخجل: لا استحي
غادة: المهم ترى العشا جاهز والكل ينتظرك تحت
شغاف: قلت لك مكان فيه همام ما ابيه
غادة: ياربي منك.. وبعدين يا شغاف ترى همام ماله ذنب باللي صار
شغاف: الا له ذنب.. هو اللي زن على امي وخلاها تروح لبلاد اليهود.. وتعبت وفارقتني
غادة: حرام عليك يا شغاف انتي تعرفين امي ما راحت إلا وهي مضطره.. وبعدين تعرفين وجع رجل امي
من يوم صار لها الحادث وهي صغيرة اثر عليها بكبرها.. وهمام تغرب
عن زوجته سنة كاملة عشان يعالج امي من بعد الله.. بس ربك مو مكتوب العلاج.. لا تحسين انك بس
الوحيدة اللي فاقدتها هم انا بعد وهمام اكثر واحد فينا اتركي انانيتك والتفتي
لاخوك لا تخسرينه بشيء هو ماله ذنب فيه.. ولاتعترضين على كتبة ربك
بحزن: الحين انا انانية مشكورة يا اختي يابنت امي وابوي
غادة: الله يهديك بس
نزلت وتركتها.. مايفيد معها الكلام.. كل مره نقول اعقلت ترجع وترد لعقلها صغير.. ما اقول غير الله
يصلحك ويهديك ياشغاف
×
همام: ماتبي تتعشا
ببتسامة: لقيتها نايمه
همام: حمدلله.. سفره دايمه
غادة: ماتعشيت
همام: ومن له نفس يتعشا.. هتوف جيبي معك مسكن راسي بدأ ثورته
×
نقف هنا
تاركين مساحة للعين والقلب لنستشعر النبض وإيقاعه الرغيد ...
أدلوا بفتنتكم هنا على شكل ردود على هذا الموضوع لنلقي نظرة عن كثب
على فراديس الورق النابض..
بوركتم القلم وحامله يا أحبة ..
ولنا موعد أخضر مع مساحة خضراء أخرى مع مساء آخر
اختكم في الله:
ضلع إعوجاج
×
|
21-11-12, 04:11 PM
ليلة خميس ، للكاتبة : ضلع إعوجاج
..
جديد مواضيع قسم الارشيف
العرض العادي
