كاتب الموضوع :
قرة عين امي
المنتدى :
القصص المكتمله من وحي قلم الاعضاء
رد: ضاقت فلما استحكمت حلقاتها فرجت وكنت اظنها لا تفرج
البارت التاسع والعشرون
؛؛؛؛؛؛؛؛؛؛؛؛؛؛
؛؛؛؛؛؛؛؛؛
؛؛؛؛؛
الحمدلله عدى رمضان على خير يالله انك تقبل توبتي وتكتبني من عتقاء رمضان ....هذه ثالث سنه من تبت وابصرت حياتي
سباء ذات العشرة اعوام : ها بابا حبيبي تحب اجيب لك شيء قبل اروح عند ساميه
وهو يمسح على راسها : لا حبيبتي بس خلي بالك من نفسك وارجعي المغرب لا تتأخري
: تمام
: مالك وقفتي في شيء
بتردد : يعني .... في سؤال ... والا اقول خلاص بس مافي شيء
: تعالي ... ايش فيك قولي وماتخافي
: يعني اسألك وما بتزعل مني ؟
: ان شاء الله .. انتي اسألي بس
: يعني ليش احنا ماعندنا اهل نزورهم ويزورونا زي بيت جيراننا ... هم معاهم اهل كثير عندهم اخوال وعندهم اعمام بس احنا ماعندنا احد انا وانت وبندر بس ليش وين اهلنا ؟... وين امي ليش ماتعيش معنا ؟
حسيت كلام سباء سكاكين تغرس بقلبي هيجت فيني ذكري اندفنت من سنين نبشت ماضي مؤلم مااشتي اتذكره وارجع اعيش تفاصيله الحزينه
طولت نظري عليها لحد ماخافت وقامت من قدامي وهي تمسح دموعها : انا اسفة اذا زعلتك .... خلاص مش ضروري اعرف وينهم
وهو يخفي دمعة الآم : لا مازعلت ولا شيء بس روحي الان وبعدين لمن ترجعون انتي واخوك بقول لكم وين اهلكم
تقبل راسه : خلاص تمام ... مع السلامة
؛؛؛؛؛؛؛؛؛؛؛؛؛؛؛؛؛؛؛
يارب إعصم قلبي رغم السنين اللي مرت على معرفتي للحقيقة الا اني احس السكين اللي انغرست فيني ذاك اليوم كانها اليوم صعب تكون عارف ان الناس اللي عايش معاهم مش اهلك وانت تعتبر نفسك واحد منهم يالله شعور مؤلم صرت اتحسس من كل حاجة وخاصة علاقتي باخواتي .... اقصد خوات علي .... يااااااااااااه والله انها موجعه صاروا يتغطون عني ... انا اصلاً ماعدت احتك فيهم واذا عرفت انه وحده منهم في البيت اتعمد اتأخر حتى لو جلست بالحاره وحدي المهم ماارجع البيت وهم فيه .... حتى امي صرت اتحاشى الاحتكاك فيها قدر المستطاع وان شاء الله بس اخلاص هذه السنه الثانويه العامة اقدم على منحه لتركيا وبعد ماراجع استقل ببيت لحالي ماعاد لي وجه اجلس عندهم وانا مش ولدهم
ام علي بفرحه : ياهلا وينك يالقاطع ماتقول امي تعبانه ... مريضة ... ضايقة ... وحدها ماعندها انيس ولا رفيق
قبلت راس امي اللي صحتني من شرودي اللي صار ملازم لي بالفترة الاخيرة ومانطقت بكلمة
ام علي بحنان : يابني خف على نفسك شويه بس الا كارف عمرك بهذه الكتب ماعاد نشوفك ولا نسمع صوتك
بنبرة حزن : والله يمه المذاكرة تأخذ كل وقتي وماعاد افضي وانتي عارفة ان هذه السنه وزاري وبتحدد مستقبلي .... السموحه منك يالغالية
بنظرة ذات معني : غاليه لوكنت غالية زي ماتقول ماكنت تهربت مني ومن الجلسه معنا زي ماكنت زمان والا تعتقد اني ماافهمك ولا اعرف ايش تفكر فيه
انا امك اللي ربيتك وعلمتك واعرفك اكثر مما تعرف نفسك ... وترى انعزالك هذا يقتلني ولا انا راضية فيه
بالم اكتسى صوته : ماعاد شيء زي زمان ...
ام علي : ايش تغير يعني هذا احنا زي محنا مافيش شيء تغير
بصوت فيه غصت البكاء المكتوم : الا في اشياء تغيرت .... كنت مااعرف الا اني ولدكم المدلل واخر العنقود ... ماكنت احمل همي ولا كان قلبي مليان احزان ولا كان عقلي مليان افكار وخواطر
ولا كنت افكر انه بيوم من الايام خواتي اللي احبهم اكثر من نفسي بيتغطون مني وبيتعاملون معي كأني اجنبي عنهم ... ماكان يجي في بالي ان امي اللي ربتني وانام بحظنها كل يوم ماهي امي الا خالتي بالرضاعة ... ماكنت اعتقد انه تغاضي ابي عن وجودي بسبب اني ماني ولده كنت افكر انه دلال ودلع لي يمه كل شيء كان مختلف والان صار موجع
ام علي : ياولدي ارمي همك ورى ظهرك وعيش حياتك ماراح يفيدك شيء ولا بتغير شيء الله كتبه وقدره عليك
زياد : يمه كل شيء في حياتي يجرحني وماني قادر استوعب واعيش زي ماكنت .. ... مافيش حاجة تشفعلي تفكيري الساذج بيوم اني ولدكم .... كيف ماعرفت من نفسي ؟ كان المفترض اصلاً اني اعرف من لون بشرتي الاسمر وانا اقول عرق طق كل شيء جايز يمكن جيت على واحد من اجدادي كان زي سماري ... حتى اسمي ماكنت افكر فيه مدري ايش من عقل كنت عايش فيه ... وتشتيني انسى كل هذا وارميه ورى ظهري واعيش حياتي صعب والله صعب عليا يمه سامحيني مااقدر
ام علي وبكاها يسبق كلامها : والله الصعب بعدك وانعزالك عننا ياولدي وضعك ماهو مريحني ولا مرضيني اموت بحسرتي الف مرة كل ماشفتك تغرق نفسك بوحدتك بعيد مننا ... ياحبيبي لوانك تعزني وتحبني ارجع زياد ولدي اللي اعرفه اللي مايفوت لمة الاهل حتى بالاكل صرت ماتاكل معنا والله راحتي بذمتك ....عشاني اضغط على نفسك وارجع مارس حياتك معنا ... والله انه من يوم قلت لك وانا مايهنى لي عيشه ... ياجعلني الموت ولا قلت لك ... ياليتني عجمت ولا نطقت بحرف واوجعتك
بفزع من دعائها على نفسها : بعيد الشر عنك يمه بعدين الحقيقة لازم كنت بعرفها اليوم والا بكره ومافيش شيء يتخبى ... سامحيني يمه اذا انا اوجعتك وتسببت بضيقتك والله يقدرني اريحك ...بحاول قد مااقدر ارجع زي ماكنت معاكم مع انها صعبه على نفسي
ام علي بفرحة : وبعدين مافي بالبيت احد يتغطى منك مافي غيري وابوك واخوك علي يعني ماراح تحس انك غريب معنا
: ان شاء الله .... ومايصير خاطرك الا طيب ... بس انتي سامحيني ولا تزعلي مني
: والله ماني زعلانه منك انا زعلانه عليك وعلى عمرك اللي دافنه بوحدتك هذه ... يلا مااشغلك ذاكر لك شويه لاحد ماياذن بتروح تصلي بالمسجد
: ان شاء الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بيت محمد بن سالم
حنان : يمه خير ايش في ليش تبكي
: مافي شيء لا تشغلي نفسك فيني وروحي شوفي لك شغلة
: يمه تبكي على عيالك صح ... تصدقين اخاف من كثر مانتي تبكي تعمي زي يعقوب عليه السلام
: حرقه بقلبي ومايطفيها شيء
: ويعني بكاك بيرجعهم لك والا بيطفي حرقتك
: نار تشتعل فيني احسها تهدى لا بكيت ونزلت دموعي ... محد منكم حاسس بلي انا عايشة فيه
محمود : من قال لك كلنا نشتي العيال يرجعون وانا كل يوم ادعي ان الله يرجعهم لنا
: عارفة انكم تشتوهم وتفقدوهم لكن مانتم مثلي هذولا قطعة مني اخذوهم واحرقوا قلبي عليهم وماني قادر اصدق اني ماعاد بشوفهم ولا بضمهم لصدري
حنان : ان شاء الله بيرجعون وبتشوفيهم وتشبعين منهم مصير الحي يتلاقى ... والله قادر على كل شيء مش انتي قلتي لنا نكون ندعي وربي بيستجيب لنا عاجل والا اجل واننا نصبر والله مايخيب رجاء احد والا نسيتي
: الله يذكرك بالشهادة بس انا مانسيت وادعي ربي ليل ونهار بس هذا مايمنعني من البكاء عليهم ... واحسرت قلبي عليهم بس
محمود : يمه رجاءً لا عاد تبكين والله اني احزن عليك كثير ومااعرف ايش اسوي لك
: خلاص ماعاد ببكي ان شاء الله وين روان ورهف
محمود : يشوفون افلام الكرتون
حنان : دائماً تقولي لنا ماعاد بتبكي وترجعي تبكي
وضحى : خلاص هذه المره جد .... الله يصلحكم ويخليكم لي يارب
: ويخليك لنا ياحلا ماما
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
في بيت سامي
بنات العم جالسات في غرفة سامية
داليا : يوه منك ياسباء كل ماجينا بيت عمي لقيناك عندهم ... ماعندك اهل انتي
سامية بحده : داليـــــــــــــــــــــــــــــا ايش الكلام هذا وبعدين ايش دخلك منها انا اللي ادعيها تجي عندنا
داليا بغرور : لو كان عندها اهل ماكانت كل يوم وهي عندكم حتى بالاعياد ماقد جيت يوم وهي مش موجوده
سامية : مالك دخل فيها واخر مره اسمعك تسأليها الاسئلة البايخة زي وجهك
داليا: الان وجهي مش عاجبك ..طيب خلي اللي مابقول تنفعك
سامية : طز فيك بتفجعيني يعني وبعدين هذا وانتي الكبيره العاقلة تسوي عقلك بعقل الصغيرة
داليا: ماابلعها احسها لصقة ماعندهم بيت تضفهم وماعندهم اهل يروحوا لهم هي معك واخوها لاصق باخوانك
سباء ببكاء : الا عندنا اهل زي ماعندك بس هم بعيد مانقدر نروح لهم ... خلاص انا بروح وماعاد بجي هنا اشبعي بالبيت
سامية تضمها : لا تصدقيها انا اشتيك تجي عندي انا ماعندي خوات وانتي اختي والا نسيتي
سباء ببكاء : لا مانسيت بس كل بنات اهلكم مايحبوني وانا ماعاد بجي لمن يكونوا عندك ... خلاص فكيني اشتي اروح بيتنا
بعد ماخرجت سباء تجر خيبتها وتتجرع احزان وحدتها
سامية : الله يسامحكم كأنكم كدرتوا خاطر المسكينه والله انها بلسم تنطرح على الجرح يبراء ماني فاهمة ليش تكرهوهم هي واخوها
سرور : انا عن نفسي لا احبها ولا اكرهها وماتعني لي شيء
داليا : مدري ليش اكرهها احسكم كلكم مهتمين فيها من اصغركم لاكبركم حتى سامي
سامية : قولي انك تغارين منها عشان سامي ... بالمناسبة سامي مايعتبرك غير اخت يعني لا تخدعين نفسك وتغرقين
داليا : الله من جماله بغار عليه الله يبعدني عنه يارب
هيفاء : علينا هذا الكلام ... ان شاء الله تكوني صادقة
داليا : مالكم دخل فيني ... باي رايحه لامي
بعد خروجها
سحر : غرور الله يكفينا منها .. هذا نتائج دلع عمي لها
سرور: كل مااجتمعنا لازم داليا تخرب علينا الجلسه بدلعها وغرورها
سامية : وكملتها اليوم بمضايقة سباء
سرور: ههههههههه انتي المسكينه كل مرة تسوي فيها اعظم من كذا بس انتي ماتكوني موجوده
سامية بدهشة : قولي والله وانا اقول ليش البنت ماتشتي تجي والله انها خرجت روحي على مارضت بشرط مااخليها معكم وحدها ... الله يسامحكم بس ترها يتيمه ايش ذنبها انها وحيده
سحر : الله يسامح الجميع ... خلاص فكوها سيره وخلونا ننبسط
هيفاء : وانتي لا عاد تدعيها لمن نكون عندك
سامية باصرار : الا بدعيها عناد بالدلوعه داليا والا عنده اعترض يقولي مالكم دخل بضيوفي وبعدين انا صدق اعتبرها اختي اللي ماجابتها امي ... وعلى فكره اللي يجرحها كأنه يجرحني
هيفاء : خلاص استحملي مابيجيكم انتي واختك من داليا
سامية :داليا شغلها عند عمي وبيقدر يوقفها عند حدها هذا نهاية الدلع كأنها اول واخر وحده تكون وحيدته اهلها
سحر : لا تنسوش انها جاءت بعد عشر سنين وماعاد جابوا غيرها
سرور : بس هذا مايفسر تصرفاتها ماكأنها عدت العشرين تتصرف زي الاطفال بكره تتزوج وتتعذب وتعذبه معها
سامية : هههههه المهم مايكون سامي اخوي وتصطفل هي وزوجها
هيفاء : خلاص بنات كفاية حش فيها
سرور : ماتلاحظون ان كل مانجتمع تكون داليا وجبة دسمة للحش
سحر : ههههههه الله يقلع شيطانك على التشبيهات
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
على ضوء القمر جالس في حوش البيت يفكر
" يارب ماراح يهدى بالي الا اذا خليتها تتحجب بس كيف مااقدر اكلم وضحى اخاف تنتبهي اني احمل لها مشاعر وانا ماشتيش احد يعرف بس كيف اسوى يالله كيف يعني مايشوفوها كبرت لا من ابوها ولا من وضحى مع ان وضحى فطينه وتنتبه لهذه الامور بس مدري ايش تفكيرها ... البنت ماشاء الله عليها جمال وبياض مش طبيعي وهم عاملين لها طفلة ... ياربي والله انه ينحرق دمي اذا شفتها تمشي في الشارع واجيه عندنا من بيت جدها لا واللي يقهرني اكثر تجي وتتكلم وتلعب مع زياد ولا كأنه غريب عنها ... ايووووووووه فكره ... اذا جت عندنا اكلمها واقول لها تتحجب لانها قدهي كبيرة بس اخاف تزعل والا تتضايق ... طيب اقول لامي تقول لها لالالالا ماينفعش امي بتعرف على طول يارب اهديني طريق الحق "
علي بنقزة : بسم الله الرحمن الرحيم ... خوفتني يارجال ... تنحنح ... تكلم
زياد : ههههههههههههههههههههههههههه الحمد لله انك خفت قد كان بعقلي انك ماعندك احساس كل ماخوفتك ماتخاف
علي : هههههههههه يعني مع سابق الاصرار والترصد
زياد : حلوة هذه حسستني كأني في المحكمة ... اخبارك ؟
علي : تمام وعال العال ... كيف الدراسه معك ؟ محتاج شيء اسألني لا تقول مكمل من كم سنه وقد نسي الحمدلله الذاكره تمام
زياد : ماشاء الله ... صدق تتذكر انا بعض احيان انسى الي ادرسه السنه هذه اذا ماراجعت
علي : هذا بفضل حفظ القراءن لان الله يحفظ لك ذاكرتك
زياد : ايه لمن تكون كبير يعني مايجيك زهايمر وامراض الشيخوخه اللي تصيب الذاكرة مش الان وانت شباب
علي : تحفظ ذاكرتك طول حياتك وانت شباب وانت كهل ... يلا خلينا ندخل الجو برد مش طبيعي
وهو يمشي بجواره : ايه يقولون موجة صقيع هذه الايام
علي : الحمدلله على كل حال .. يلا ايام وبتعدي على خير ان شاء الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اكملوا عشاهم بهدوء تام قامت سباء باخذ صحن العشاء لتنظيفه
ابو بندر : بس تخلصين تصفي تعالي بقلكم حاجة
سباء وقد عرفت مايرمي اليه اباها : على امرك خمس دقائق وانا عندكم
بندر : وجيبي لي معك ماء عطشان ومافيني شده اقوم اشرب
: ان شاء الله شيء ثاني حضرتك
بندر : يعني مابتجيب شيء قوليها بالصريح
سباء : لاني مش خدامه عندك قوم اخدم نفسك بنفسك كفايه عليا البيت وشغلته
بندر : بابا شوف سباء يعني قدهي بتروح المطبخ وبترجع هنا على طريقها تجيب لي ماء
ابو بندر يشاهد الاخبار : فكوها سيرة وكل واحد يعمل شغله بنفسه
ترفع حاجب وبنظرت انتصار : شفت
بندر بهمس : انا اوريك والله مااسوي لك شيء
سباء : ههههههههه عادي مانيش بحاجتك
بندر: بنشوف لمن تجي تراضي اروح عند ساميه اجيب لها شيء والا اخذ منها
سباء: مابقول لك بروح بنفسي
سباء : ها بابا ايش بتقول لنا
ابو بندر : دائماً وانتم تسألوني وين اهلنا ليش ماعندنا اهل زي الناس واليوم انا بقول لكم وينهم ... اكمل بصوت فيه الغصه .... بعد ماخلصت الثانوية قلنا بنسوي رحله لمنطقه خضراء سياحية وجهزنا انفسنا انا وامي وابي واثنين اخواني واختي كنا كلنا في سيارة واحدة ورحنا واحنا راجعين انا ركبت مع واحد صاحبي شفته هناك وسيارة اهلي حصل لها حادث ومانجى منهم احد
سباء بخوف ودهشه : ماتوا كلهم
بندر : اعمامي واجدادي مرة واحدة
ابو بندر يمسح دموعه : أي كلهم الله يرحمهم ويغفر لهم .... خلاص الان عرفتوا وينهم لاحد يسألني مرة ثانيه
بندر : طيب وماما وين لش ماتجي تعيش معنا
بضيق : مدري عنها لاتسألوني عليها
سباء : يعني هي ماتحبنا والا ليش ماهي معنا
ابو بندر بقتضاب : الا تحبكم بس الظروف ماجت لمصلحتها ... بس لا عاد تفتحون هذه السيرة والا مابيصير لكم طيب فاهمين عليا
بندر وسباء : ايه فاهمين
ابو بندر : الله يصلحكم ... وبالمناسبة انا ناوي اتزوج بهذه اليومين ان شاء الله
سباء : تتززززززززوج ؟
بندر : من ماما
ابو بندر: لا باخذ واحده بتحبكم وتحبوها وبتكون لكم ام بدل امكم
سباء : امي مالها بديل ... انا مااشتيش لي ام غير امي
بندر : الا ياهبلا نشتي امي زي احمد عنده ام
سباء : بس هذه ماهي امنا
بندر : عادي بتبقى امنا صح بابا
ابو بندر : أي صح وبتقولوا لها ماما .... الحين يلا قوموا على مراقدكم بكره وراكم دوامات
بندر وسباء : تصبح على خير
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عايدة : كريم حبيبي خلاص يلا نام ... والله تعبانه ومانيش فاضي لك
: ماما حبيبي بس اويييه اعب مع عيال وبعدين اتي تيب
: يالله من هذولا الاذيه
قامت من فراشها الى الصاله : حمـــــــاس ، ريــــــان ... يلا خذوا اخوانكم واطلعوا ناموا ماتشوفوش الساعة كم الناس نايمه وانتم تأذوا خلق الله يلا اعد العشرة مااشوف واحد فيكم والا ياويلكم مني
ريان : بس بكره عطله
عايدة بغضب : عطلة بعينك انا معي دوام واشتي انام يلا وروني عرض اكتافكم ...
ريان وحماس : اوووووف يعني مانلعب حتى وهو عطله
عايدة بغضب : والله والله وهذاني حلفت ان ماتطلعتوا لتنضربون وقد اعذر من انذر ... سبحان الله .... والحمدلله ... والله اكبر ... ولا اله الا الله
لم تكمل جملها الاربع الا وهم مختفين من البيت
الحمدلله نشبه مايطلعون الا بخرجت الروح تدف ولدها : يلا انت قدامي على فراشك
: ماما حبيبي ليس انتي زعان واصيح
:كرررررررررريم نام .. انخمد احسن لك لا ترفع ظغطي
وهو يغمض عينيه بيديه : خلس ماما انا نام
تحضنه بحب : تصبح على خير حبيب ماما يلا قول بعدي دعاء النوم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
وفاء وسناء : ههههههههههههههههههههههههههه
وفاء : كرفنكم عمتكم تستأهلون قلنا لكم العبوا هنا مارضيتوا بتنزلون
سناء : والله كاسرة خاطر هالعايدة وهم ينقرون فوق راسها هم ازعاج ازعاج هنا والا تحت
وفاء : عاد هنا ارحم من لمن يكونوا تحت
سناء : صادقة يلا خاطرك بروح انومهم
وفاء : هههههههه اذا قدرتي تفصليهم خلي عيالي يجون
سناء : ان شاء الله ... بعشيهم وبعدين اخليهم يجوك
وفاء : تسوين خير لاني ماني ناوي اصلح عشاء
سناء : قدني عارفتك ... يالله من الكسل
وفاء : مش كسل بس سعيد مايتعشاء وانا احس وزني زايد الايام هذه اقول اخفف
سناء : أي والعيال يروحوا فيها
وفاء : عادي ياكلون أي شيء والا لو بقاء من حق الغداء
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يوم جديد ....في بيت اوس
ام علي : الله يصلحم هذولا العيال مايقرون ولا يهجعون
ام سيف : امين ... وانتي الصادقة اهلكونا .. زمان كنا نتمنى واحد والان الحمدلله
ام محمد : اللهم صلي على النبي ... هم كذا لجتمعوا يصيرون شغاغة
عايدة : قد حنا فاتحين حضانه
وفاء : ماشاء الله .... تف تف ... الصلاة على عيالي
سناء : وعلى عيالي والا عيالك بس اللي بيمترعون
وضحى : اصلاً عارفه انهم الاكثر شيطنه
عايدة : ههههههههه وشهد شاهد من اهله
وفاء بفخر : يحصل لكم زي ريان وتسنيم
عايدة بستهزاء : الحمدلله والشكر الاسماء قمة الرومنسيه والهدواء بس هي بصوب والمسماين بصوب ههههههههههه
سناء ووضحى : هههههههههههههههه
وفاء : يمه شوفيهم كيف يتيرجون على عيالي
ام سيف : كلهم فيهم شيطنه عجيبه ريان وتسنيم وحماس ونورالدين وزكريا وحتى كريم قد بدي يدخل معهم بالخط
الجميع : هههههههههههههههههههه
وفاء : الحمدلله يعني كلنا في الهواء سواء
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
علي يسير عائد الي المنزل ويلمح حنان على باب بيت جدها
" يالله فرصه وجائتني " : حنان ... تعالي
حنان ببراءة : ايش .... ماما مش بالبيت راحت عند خاله وفاء
علي : انا عارف ... انتي ايش موقفك بالباب
حنان : انتظر محمود راح يشتري لنا جعاله
: طيب انتظريه في البيت لان البنت الشاطرة اللي تحب الله ورسوله ماتخرج الشارع
: بس انا لابس البالطوا والطرحه
: ايه قدك كبير وللازم تتلثمين وماعاد تخرجين الشارع ابداً زي ماما وكل الحريم طيب
: ان شاء الله
علي بامر : يعني هذه اخر مرة اشوفك فيها تمام ..... وماتكلمين أي رجال
: حتى لو انت وزياد
بحدة : ايه حتى انا وزياد والا محنا رجال
بربكه : الا رجال بس انتم زي اخوالي
: كم مرة بفهمك ان حنا مش اخوالك احنا رجال اجانب عنك... انتي ماتفهميش
ببكاء : الا افهم ...خلاص طيب
بحنان : اسف حقك عليا ... خلاص سامحينا ....
حنان : مسامحتك بس ليش انت تعصب عليا ... ماعاد احبك لمن تعصب ماتصير حلو
بضحكه وبهمس : يعني لمن اروق تحبيني ....
حنان : ايش قلت
علي : ولا شي ....يلا ادخلي داخل
: مع السلامه
: بحفظ الله ورعايته
" ااااااااااااه ... الحمدلله الان برتاح ومحد بيشوفها حتى لواني بشتاق لها بس بصبر احسن من تصير منظره للناس ...يالله تحفظها من كل شر وتجمعني بها على خير "
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
نهاية البارت التاسع والعشرون
ودمتم بالف خير
المبحبه اسمـــــــــــــــــــــــــــــــــــــاء
|
02-01-13, 11:57 PM
جديد مواضيع قسم القصص المكتمله من وحي قلم الاعضاء
العرض العادي
