كاتب الموضوع :
قرة عين امي
المنتدى :
القصص المكتمله من وحي قلم الاعضاء
رد: ضاقت فلما استحكمت حلقاتها فرجت وكنت اظنها لا تفرج
السلام عليكم ورحمة الله
كيفكم حبايبي .... والله من الصباح وانا احاول انزل الجزء بس الاتصال اليوم سيء جداً
ارجوا تقبل اسفي واعتذاري
واليكم الجزء الثالث ...تمنياتي لكم قراءة ممتعة
البارات الثالث
ام علي : ياهلا اشرقت وانورت ... ياهلا بقرة عيني ... وببكري ... كيفك وايش اخبارك ... خلاص نسيتينا .. لاعاد حس ولا خبر ؟
وضحى تحتضن امها وتبكي من شوقها لهم :ينساكم الموت ... من قال اني نسيتكم .. بس الظروف تحكمك اوقات .. والحمدلله انا بخير له الفضل والمنه ... انتم ايش اخباركم ..فقدتكم كلكم ..وينهم اخواني وينها وفاء ؟
تدخل وفاء بمجرد انتهاء وضحى من السؤال عنها :ياهلا ويامرحبا .. ياهلا بالطش والرش
وضحى : ذكرنا القط جاء ينط ..كنت بذكر مليون بدل ماذكرت وجهك النحس هذا ههههههههه
وفاء تمثل الحزن وتعصر ملابسها من الدموع الوهمية :يوه ..يا عيب الشؤم عليك تقولي على أختك العزيزة كذا .. ايش بقيتي لبنت الجيران ..وبعدين انا استأهل جالس شهر مقطع نفسي بكاء من الشوق لك وهذا هو جزآي؟
وضحى تأخذ وفاء بالاحضان : اشتقت لك ياخبلا.... كيفك ؟
وفاء : تشتاق لك العافية ... الحمد لله ... بس تشتي الصدق فرحانة أني بغرفة لوحدي من غير منغصين ..ههههههه
وضحى :ها قلتي لي انك مقطع نفسك من الشوق قد هو باين
وفاء: امزح معك ...بعدين تعالي كذا تعالي ... لفي . لفي ..والله وحلويتي شكله صدق الزواج يخلي الوحده تحلو
وضحى بغرور مفتعل : ليش متى كنت مش حلوة ؟ طول عمري قمر..بس ايش نقول للحساد غير الذي ما يوصل للعنب يقول حامض
ام علي : بسكن من هذه المناقرة.... ما بتكبرين ؟ وتعالي يا بنتي قولي لي ايش اخبارك وكيفك مع زوجك ؟
وضحى : الحمد لله عادني ما شفت من الجمل إلا رأسه
وفاء وهي تغمزلوضحى : طولتي بالغيبه وين قضيتوا شهر العسل ياعسل انتي
وضحى : قصدك بصل وين يعني بالبيت
وفاء بدهشة : كذابه .... يعني خايفة على نفسك من عيني والله انها باردة
ام علي : بسك وفاء على اختك ... وبعدين صدق فالبيت هذا الشهر كله وانتم عرسان وحتى ماكلفتي على نفسك ترفعي التلفون وتكلمينا
: يمه واللي يرحمك ويرحم والدينك ماهو كبره عليكم بس والله ماعندي تلفون وماكنت اجسر اطلب منه انه اكلمكم وهو ماقالي
ام علي : ياحسرت قلبي عليك يابنتي لاتكوني خبل مثل امك تلحلحي وخليك فطين واكسبي زوجك لصفك
وضحى : ان شاء الله بصير مثل ماتقولين
وفاء: اقول وضحى ايش رأيك تنامي عندنا اليوم والله لك وحشه نفسي اجلس معك زي اول
ام علي :ايوه يا بنتي عشان كمان نعمل لك حفلة رد الجد بكره ها ايش قلتي ؟
وضحى : ما اعتقد ان سمير بيخليني ..بس بأكلمه بكره يجيبني بدري وانتم كلموا الذي تشتوا عشان بكره يجوا عندنا رد الجد
وفاء : بس ما بنعمل حفلة رسمي ..كذا جلسه لنسوان الحاره والاهل
وضحى : تمام كذا احسن ،واليوم قال سمير بيجي يأخذني بعد صلاة العشاء
ام علي : ليش كذا مستعجل ايش وراكم من شهر ما شفناك الا اليوم وحتى ما رضي تجوا غداء وعادكم تشتوا تروحوا بسرعه ..ايش معاكم
وضحى: والله علمي علمك هو قال كذا وانا قررت ما ارادده من اول مره ..مره ثانيه ان شاء الله بجلس عندكم وقت اطول
وفاء: ها يا وضحى كيف الزواج يخوف ؟
ام علي :بس يابنت ما عاد في حياء بنات اخر زمن ... قومي جيبي لاختك شاي
وفاء : يوه يمه مالك عليا امزح معاها والا المزح صار حرام هذه الايام وانا مش عارفة؟
ام علي : لا حول ولا قوة الا بالله ... الله يهديك ويصلحك
يدخل علي عليهم ويقبل راس امه ويديها : السلام عليكم
ويحتضن وضحى :..ياهلا بنورالبيت كيفك ؟ والله لك وحشه ايش اخبارك فقدناك
وضحى تصافح علي : حياك الله . الحمد لله ..انت ايش اخبارك ؟ عادك انت والكرة ما كبرت ؟
علي : ليش اكبر عليها هذه رياضة والواحد ما يكبر على الرياضة لانها تفيد جسمه
وضحى: صدق هي مفيدة بس بنفس الوقت تضييع للوقت
علي : الحمد لله انا مرتب وقتي وما اخرج اللعب الا لمن اخلص كل الالتزامات الي عليا
وضحى : الحمدلله .... الا وين ابي وايش اخباره ؟
ام علي : هذك ابوك ماتغير على عادتة يتغداء وياخذ قاته ويروح يقيل ويصلي المغرب ويرجع البيت مافي شيء تبدل على حطة يدك
زياد يجري ليرتمي في حضن وضحى : وينك كل هذه الغيبة .. وفاء تقول ما بترجعي مرة ثانيه عندنا .. انا احبك لو سمحتي اجلسي عندنا على طول
وضحى وهي تحتضن زياد : والله وحشتني ياقلبي الصغير .. وبعدين بكون اجي دائماً بس انا خلاص قد عندي بيت ثاني ولمن ماما تجي عندي انت تعال معها شوف بيتي ..تمام ؟
زياد: خلاص تمام اهم حاجة انك تقولي لهم يجيبوني معاهم
وضحى : تمام ولا يهمك ... وين راحت وفاء ؟
ام علي : في المطبخ تجهز حلا نأكله الان مع بعض... الا اقول علي اختك ماعندها تلفون ومانقدر نتواصل معها ايش رايك تشتري لها تلفون بكره وهي بتجي نعمل لها حفلة رد الجد وبتاخذه
علي : تامرون امر وهذا جهازي والان برروح اصلي المغرب واشتري لك شريحة جديدة عشان ماينفع تأخذين رقمي
وضحى بحياء : الله يهديك يمه والله مايحتاج ولا شيء
علي بحمية : لا والله ماعاد يرجع هبه وجاتك والله ازعل منك
وضحى : طيب انا اخاف سمير ماتعجبه الفكرة
تدخل وفاء وبيدها الحلا والشاي بالحليب : والله هو بكيفه يعجبه والا مايعجبه اهم شيء نقدر نتواصل معك والا بنجلس تحت رحمته عز الله ماعاد بنشوفك ونسمع صوتك بالسنه الا اقل من عد الاصابع وقولي وفاء ماقالت ... وبطريقة كوميديه " يامؤمنه للرجال يامؤمنة الميه في الغربال " اسمعي كلامي وانا اختك هههههههه
علي : الان كل الرجال ماينأمن منهم طيب انا اوريك
وفاء : طبعاً مش كلهم بستثنائك لانك غير عن البشر
علي : كاني اشم استهزاء بكلامك
وفاء : لا والله اني صادقة ... هو في احد مثلك مااظن انت صنف مختلف
وضحى : الله يسعدك علي ويعطيك على قدر نيتك
ام علي : يلا قوم ياولدي قد هو يآذن المغرب
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بعد الانتهاء من صلاة المغرب في مسجد الحي خرج ابو علي مسرعاً الى بيته لعلمه من زياد ان وضحى في زيارتهم
وفي طريقه استوقفه ابو محمد
: السلام عليكم ياهلا بابوعلي اخبارك واخبار الاهل
ابو علي وهو يمد يده مصافحاً جاره : وعليكم السلام الحمد لله على كل حال ... اخبارك واخبار ولدك ؟
ابو محمد : الحمد لله ... الا ماقلت لي ايش اخبار كريمتكم العروس
ابو علي بإمتعاض : الحمد لله ليش تسأل
ابو محمد : والله ياخوي تشتي الصدق من يوم عرسها وانا متحير من وين هو زوجها باين عليه ماهو مننا
ابو علي برتياح : أي عشان شكله ماهو يمني ... بس تطمن هو يمني من حق الجنوب من شبوة مدري المهرة المهم من هذك المناطق
ابو محمد بستغراب من عدم معرفة ابو علي لبلد نسيبه : اها قلت لي ... الا من وين تعرفت عليه ؟
ابو علي : والله شفته كم مره في المقيل عند عاقل الحارة وعرف ان عندي بنات في سن زواج والنصيب سبحان الله يسوقك
ابو محمد : أي سبحان الله ... الله يوفقهم ويجعلها زواجه مباركه
ابو علي : آمين ... وعقبى للي عندك
ابو محمد : ربك كريم ... يلا في امان الكريم ماعطلك
ابو علي : في امان الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فتح باب منزله
ابو علي بصوت جهوري : يالله ... يالله ... السلام عليكم ... يااهل الدار وينكم
وضحى ترتدي عبايتها وتتقدم الى ابيها وتقبل راسه ويده : وعليكم السلام والرحمه ... كيفك يبه ... وايش هي اخبارك
ابو علي : الحمد لله ... انتي اخبارك واخبار زوجك
وضحى: الحمد لله .. طيبين ومانسال الا عليكم ... والله اشتقت لك يبه
ابو علي : تشتاق لك العافية .. على وين اشوفك لابسه
وضحى : البيت ... اصلاً قال بيجي بعد العشاء والان قد هم مخلصين الصلاة
ابو علي : أي اجل الله يوفقك ...يلا في امان الكريم
وتركها ودخل مكتبه وهو ينادي وفاء لتحضر له الشاي بالحليب
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
وهكذا مرت الايام والشهور تغيب عنهم الفترات الطويله ثم تأتي في العصرية وتعود بيتها دون ان تخبرهم شيء حتى لا يضيق صدر امها عليها ولا تتعقد اختها من الزواج ولم يكن احد يعرف ما تخبي وضحى في قلبها من معاملة زوجها لها
مرت 3 اشهر والحال على ما هو عليه الا ان سمير زاد غلاظة وتجبر على وضحى
وهي تكلم نفسها : ياربي من هذا التعب ...ماني قادر ارفع عيني... يالله نفسي انام طول اليوم ايش هذا الارهاق ؟
سمير بتجهم :قومي قامت القيامة على راسك ..يلا انا خارج قومي جهزي لي اكل ..يلا انا مستعجل
وضحى بصوت هامس حسبي الله ونعم الوكيل : تمام خمس دقائق والاكل جاهز
سمير : بنات اخر زمن ما يجين الا بالعين الحمراء
وضحى بضيق : يلا الاكل جاهز تعال كل
سمير وقد تملكه الغضب من نبرة صوتها فيمسك يدها بشدة: الوحدة لمن تكلم زوجها تكلمه بأدب مش تتصنع عليه انها عملت له شيء .فاهمة اخر مره تكلمينا بهذه النبرة مفهوم ؟
وضحى بخنوع : ان شاء الله
يخرج سمير فتتنفس وضحى الصعداء وتعود لتنام فهي تشعر بالارهاق وبالنوم طوال اليوم ولا تعلم السبب
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى الجزء الثالث
|
14-10-12, 02:39 PM
جديد مواضيع قسم القصص المكتمله من وحي قلم الاعضاء
العرض العادي
