كاتب الموضوع :
قرة عين امي
المنتدى :
القصص المكتمله من وحي قلم الاعضاء
رد: ضاقت فلما استحكمت حلقاتها فرجت وكنت اظنها لا تفرج
البارت الخامس والعشرون
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
؛؛؛؛؛؛؛؛؛؛؛؛؛؛
؛؛؛؛؛؛؛؛
؛؛؛
ماتحتاج أي تقويم او تاريخ عشان تعرف انه قرب شهر المغفرة والرحمات والا لا لان المظاهر توحي لك من غيرمايخالجك أي شك ..... بسبب انتشار بضائع الشهر الكريم في كل الاسواق اليمنية تمر،حليب ،كستر مهلبية ، جيلي ، شربة ، كريم كرميل ، ...... الخ
حتى داخل البيوت لا تخلوا من مظاهر قدوم الشهر الفضيل تغيير في ترتيب المنازل نظافة تامه في كل ارجاء البيت تخطيط وترتيب لاقامة يانفس ماتشتهي في اواخر ايام شعبان يعني بعد يوم الخامس والعشرون من شعبان بين ربات البيوت ،زملاء العمل ،صديقات الدراسة ..... وكل فئات المجتمع
عايدة تجلس على حافة السرير بعد ان قامت بتجهيز الاطباق اللي بتاخذهم معها للجلسة المتفق عليها ببيت ابوها عشان يانفس ماتشتهي راحت بذاكرتها للقريب
"مر على زواجي اربعة اشهر ومافي أي جديد الا ان جذوت الحب خفت وصار حمد كل وقته خارج البيت اما في العمل والا عند حماتي العزيزة اللي لا رحمتنا ولا خلت رحمة ربي توصلنا كل مارحت عندها القي التطنيش والتحقير كأني جماد ولو حمد مش جمبنا اسمع دعاوي عمري ماقد تخيلت اني بسمعها وتقوم عندها حملات تنظيف الطراريح والستائر والسجادت كنها ماقد نظفتهم من سنه ويلا ياعايدة شلي وحطي وكسري عظامك على شيء مايستحق التعب لان نجود بين فترة والثانيه تجي وتصفي البيت كلها وزيد على كذا انها تقول لي لا عاد تجيني مع ولدي خلي ولدي يحس بحريته ولا تقيديه مع انه حمد بنفسه اللي يحلف عليا اروح معه وكل ماقلت له ان عمتي تتضايق من جيتي معه يقول تهيات لحد ما سجلت له كلام امه لي صار حتى يتجنب يقول لي انه راح عندها وانا والله ماكان نفسي احطه بهذا الموقف بس هو الله يهديه اللي حدني على كذا يلا الان صار لي شهر من اخر مره رحت عندهم وحمد يقول لازم نروح اول رمضان نبارك لامه بالشهر الفضيل عسى الله يكتب بيننا المحبه وانا ناويه اكلم نجود تجي معنا لاني مااشتي اروح وتتفرد فيا امهم وان شاء الله تقدر تجي معنا يارب"
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
في منزل أوس عصراً تنتشر راحت البخور العدني في الاجواء وتصدح المواويل الدينيه في وسط الجمعة السعيدة للاصدقاء في المجلس الداخلي تجلس ام سيف وبجوارها ام علي وتجاورهم ام محمد وبعض نساء الجيران المقربات من ام سيف وامامهم مالذ وطاب من اصناف الطعام من حلويات وموالح المعد من جميع الحاضرات كلاً على حسب امكانياته ويتحاورن في امور شتي مما يشغل امهاتنا الحبيبات
وفي المجلس المجاور له تجلس بناتنا الغاليات امهات المستقبل ومربيات الاجيال
عايده : بنات شوفوا والله تزيدون فيها اقوم من عندكم اروح عند امي والله ان جلستهم تشرح الصدر على الاقل مجالس ذكر تحفها الملائكة مش مثل سخافاتكم
وفاء : الان قول الحقيقة صارت سخافة ايش قلنا احنا غير ان رمضان ماراح يبدي عندك زي عند الناس يعني انتي عارفه وهي تغمز لها بستفزاز بلاها الفضايح
عايدة : تنفجر ضاحكة كل هذا ومافضحتيني انسة وفاء كيف الفضايح عنديك طيب
وفاء : هههههههههههه احترمي نفسك مدام لو سمحتي والا سيدك سعيد ماملىء عينك
عايده : ههههههه تصدقين اوقات ارحم عيالكم انتي وسعيد كيف بيطلعون دام انتي وهو ابائهم
وفاء : ههههههههههههههه سريع تأخذين حقك بس لا تخافين راح يطلعون على عمتهم
وضحى : الله يهديكم بس يعني مايصلح تجتمعون بدون مناقرة ابداً
سناء : ليش انتي مش عارفه انهم كبريت وغاز لو اجتمعوا وماصار احتكاك بتكون معجزة
الجميع : هههههههههههههههههههههههه
عايدة : اقول ناويات تأكلون والا اكل وحدي ترى ماعاد اصبر لعابي يسيل والروائح ماترحم مشتهيه اكل كل اللي قدامي
وضحى : تعرفون بنات نفسي نبطل هذه العادة احسها ماهي حلوه بحقنا يعني الان نأكل كل شيء كننا بنموت جوع في رمضان
سناء: هههههههههه أي وانتي الصادقة الا يصير عندنا تخمة من كثر الاكل وتنوعه
عايدة : بس ايش نسوي قد تعودنا والله ان ماسويناها ماراح احس ان رمضان جاء
وفاء: هههههههههههه هذا لانك مفجوعة على الاكل
عايدة بستنكار : الان انا مفجوعة على الاكل مدام وفاء
وفاء : ايوه والدليل انك بتموتين علينا ان ماقمنا الان نأكل
سناء : ههههههههههه أي غطي على نفسك
عايدة : هههههههههههه لقطي وجهك وفاء هههههههههههه يارب لك الحمد اللي اخذت بحقي بوقته
وفاء : عادي ماني منحرجه ولا شيء مش انا اللي جالس من اول اقول لعابي سال ست عايدة ههههههههههههههههههه
وضحى : بس قومن كلنا بيجي العشاء وبنرجع نروح ونطرح كل شيء
سناء ووفاء بوقت واحد : عادي انا مابقصر هههههههههههههههههههههههههه
عايدة : مفاجيع زوجات اخواني والله
وضحى : هههههههههههههه بانت حقائق النفوس
الجميع : ههههههههههههههههههههههه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ام ماجد
انا مش عارفة ايش الذي محبب حمد بزوجته اكيد انها سحرته والا ايش الذي يخليه ميت عليها وفجاة صار مايرضى عليها بكلمه مهما كانت بعد ماكان يوعدني انه بيسيبها صار يغضب من كلامي عليها ومايقبله ويقول لي يمه اتقي الله فينا وفي نفسك............اه بس لو اعرف ايش الذي غيره عليا بس .....ماكنا ماشين بالخطه صح وانا كل يوم والثاني حاشيه دماغه على مرته وقايله له انها تكرهني وماتطيقني وانها بس تحترمني قدامه واذا قلت لها ارفعي كاسه والا اعملي شيء في البيت تقول انا ماجيت شغاله عندك وانها تطول لسانها عليا وتقول إن ماحرمتك من ولدك ماكون عايدة وكان يصدق كل شيء ويراضيني وصار له شهر مايتغداء الا عندي وانا بعيني شفت كيف صار يطنش اتصالاتها وما يهتم فيها وبخرجاتها وكيف تقريباً يومياً العصر يجي عندي ومطنشها على الاخر وقايل لها انه عنده شغل اضافي ايش الذي حصل الان وخلاه يقلب عليا ويرجع لصفها ........اه بس مع اني ماكان نفسي استخدم السحر بس الظاهر ماينفع معها الا السحر مثل ماقالت شعلا شكلني بكلمها واطلب مساعدتها عسى بس ينفع واخلاص من هذه العايده ويرجع لي ابني حبيبي طوع يدي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
في بيت اوس
وفاء : يالله تكسرت عظامي من تركيب الستائر ...كيف سهل تفكيهم ويالله على صعوبه لمن ترجعيهم
سناء : يلا هانت باقي بس ستائر المجلس الخارجي
وفاء: عمتي قالت مانصفيهم لانها عادها صفتهم هي وعايدة الشهر الاول
سناء :بس احنا نشتي نرتاح من همهم مش يجي اخر رمضان نشتي نصفيهم قد الان حمله وحده
ام سيف : لا يابنتي ان شاء الله مابنحتاج نصفيهم قبل العيد لننا مانحتاج المجلس بكثرة والستائر تتبهذل من كثر الغسيل
سناء : خلاص الذي يريحك ياعمه ....يلا ياوفاء نقلب السجاديد عشان قبل العيد بيوم نرجعهم ويكونوا قد صفيوا ورجعت لهم المعه حقهم ونفش وبرهم
وفاء : كان المفترض اننا قلبناهم من قبل والله هذه السنه تاخرنا شفتي السنه الاولى كيف كانوا صافيات بالزياده لانه كان لهم اكثر من شهر مقلوبات
سناء:مكانه الان ينفع بيجي العيد وقد لهم شهر واسبوع
وفاء: على قولك ....ايش عاده باقي لنا نعمل
ام سيف : خلاص ماعاد باقي شيء كفيتوا ووفيتوا ماشاء الله عليكم ....صفيتن البطانيات والطراريح ولمعتين موكتات الصاله والمداخل وغسلتين الستائر وقشعتين المطبخ وصفيتوا من اول الجدار الى الارض والان بتقلبين السجاديد
وفاء : الا باقي نمسح الجدران حق البيت
ام سيف : لا عايدة قالت بتجي اليوم عندنا وبتجلس يومين ان شاء الله وبتمسح الجدران هي
سناء : مايحتاج نتعبها معنا اكيد بتكون تعبت مع بيت عمها وفي بيتها عاد ناقص عليها بيتنا
تدخل عايدة وتقبل راس امها : السلام عليكم كيفكم .....ايش جالسين تحشوا فيني سمعت اسمي يلا اعترفوا
وفاء : لا بس نشتي نمسح الجدران وعمتي تقول بتمسحيهم انتي ...وسناء قالت لها ما يحتاج نتعبيك معنا كفايه عليك بيت عمك وبيتك
عايدة : لا والله مايصفيهم غيري وبعدين الله يحفظها نجود قد صفت بيت عمي مع وحده من معارفهم قبل يومين وبيتي الحمدلله كل شيء جديد ومايحتاج تنظيف يعني فاضيه وماعندي حاجة انتم الذي باقي عليكم شققكم وبيوت ابائكم والا نسيتوا
سناء : يوه كيف نسيت الله يسعدها وضحى قالت لي بتروح اليوم بيتنا عشان اجي معها اساعدها
وفاء : الله يسعدها شايله هم بيتنا وبيتكم مع اني قد قلت لها انا بساعد امي وماعاد يحتاج تجي تقول لي ليش شفتيني قليلت اصل اتنكر للبيت الذي ضفني عمري كله عشان قد عندي بديل والا من شدة امي على الشغل نساعدها مساعدة بس.... مع انها عارفة ان امي الله يحفظها ماتقر ولا ترتاح الا لو عملت العمل بنفسها حتى لو اننا حاملين البيت على روسنا لازم تمد يدها بكل شيء
ام سيف : الله يحفظكم كلكم يلا قومين كملوا شغلكم قبل لا ياذن المغرب
سناء : ياعايدة ساعدي وفاء بالسجاديد وانا بروح اكلم سيف يوديني بيت ابي يافضيحتي من وضحي بتقول طنشتها
وفاء : تطمني من هذه الناحيه بتعمل لك سبعين عذر وان مالقت بتقول يمكن عندها عذر ما اعرفه
سناء : الله يطول بعمرها والله ان اخوي محظوظ فيها يلا مع السلامه
: في امان الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
في بيت سالم
وهي بالكاد تلتقط انفاسها : يالله رحمتك اليوم هلكت صدق
سناء بزعل : اصل انتي الله يهديك قتلتي نفسك والا في واحد عاقل يعمل زيك يعني انا جيت على المغرب وانتي قد صفيتي المطبخ وغسلتي الستائر شغل ثلاث ايام انا ووفاء عملتيه وحدك بثلاث ساعات مش هذا جنان
ام محمد بفزع: ياسين على بنتي اذكري الله لاتصيبي مرت اخوك عين
سناء: يمه كل شويه والثانيه تسمي عليها كنها هي بنتك وانا بنت الجيران
ام محمد: والله ان وضحي تسوى الدنيا كلها شايلتني انا وشيبتي على راسها ماهو كافيها ولدي وعياله والا ايش الذي بيننا وبينها غير اننا غاثين عليها عمرها
وضحى بخجل : والله يمه انكم على قلبي زي العسل ومانتم غاثيني ولا شيء كافي عليا حاسس معاكم بالحب الاسري والحنان وهذا اقل شيء اعمله عشان محمد الله لا يحرمني منه
سناء: ياعيني على الحب والله وتطورت الدنيا مدري ايش حصل لك انتي وهو ماعاد نشوف بعيونكم الا الحب يقطر ماتقدورن تخفوه
ام محمد : اعوذ بالله من عينك اذكري ربك يابنت وقومي شوفي شغله والا داري بنتك
سناء : الا صدق وين هي مقصوفة الرقبه مالها حس
وضحى : بدري على عمرك الان تسألي عنها وهي من العشاء مع العيال راحوا عند امي
سناء: ياويلي من وداهم لا يميتولي البنت
ام محمد : الله يخلف عليك وين كان عقليك لمن جت حنان تقول لك بيروحوا مع علي
: ههههههههههههههه ....ايه ذكرت هذا كله من مرت ولدك ماعاد خلت فيني عقل هلكت نفسها وهلكتني معها والا في حد يعمل كل شيء في يوم واحد لنا اسبوع انا ووفاء نصفي بيت عمي واليوم بس عملنا كل شيء هنا
ام محمد :ماشاء الله عليها وضحى ....اصلاً من كسلكم لكم اسبوع والا الشغل يشتي له مرأة باشت وإن كل شيء بينجز في يوم
سناء بتغيير للموضوع : متي ناوين تتوكلوا على بيتكم بتجزعوني معاكم بيتي
وضحى : محمد قال نبات الليله هنا يعني روحي لحقي على عمرك وكلمي زوجك
: يلا بروح اكلمه اشوف وينه ياويلي ليكون قد روح البيت بيعمل لي موال ماله اخر ليش ماكلمته من بدري وانتي الله يخليك خليهم يجيبوا حماس ماعاد اشتي نتاخر قد الساعه تسع
: يلا الان بكلم زياد يجيبهم انتي ماعليك روحي كلمي الرجال بس
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يعد ان ارقدت الاطفال تجلس في غرفتها ترتدي قميص سوسني اللون يبرز جمال بشرتها البرونزيه وحاطه لاول مرة من تزوجوا روج وردي لامع ومسكره وكحل تنتظر وصول زوجها
راحت سناء بعد ماخلتني افكر هل صدق انا احب محمد والا هي يتخايل لها لا والأدها انها تقول هو يحبني.... ماني مصدقه والله لكون اسعد وحدة لو طلع كلامها حقيقة صح انه ماقد جرحني لا بقول ولا بفعل زي النسمه بحياتي وصابر علي الثلاثه الاشهر هذه كلها ومكتفي بالقليل يعني ضمه والا بوسه .....صح انه صار احيان مايقدر يمسك نفسه ويخليني اذوب معه واروح عالم ثاني ماعمري عشت زيه مع طعم شهده بس مااعتقد ان هذا يعتبر حب مهما كان هو راجل وان زوجته مع وقف التنفيذ انا ماعندي مانع لان الخوف الذي كان يصيبني راح .....بس بنفس الوقت مش قادره اكون انا المبادره والله اني راحمته بس اشتيه هو الذي يبدى ووالله ماامنعه مدري هو مش ملاحظ والا انه عاجبه الوضع المهم بكيفه انا وايش دخلني
محمد من خلفها : اللي ماخذ عقلك يتهني فيه
بربكه : وعليكم السلام ورحمة الله وبركاته........ متي دخلت ماحسيت فيك ؟
: من شويه ........كيفك يالغلا ...امي قالت انك صفيتي اليوم كل البيت الله يعطيك العافيه
: ماعملت شيء يستاهل وبعدين كانت سناء معي
: انا عارفك ماهو بيوم هذه ثلاث اشهر وزيادة ومن يومك وانتي اروع ما عرفت بحياتي ...عارف انك تقتلي نفسك بالشغل وتقولي ماعملت شيء ...كافي عليك العيال وشقاوتهم ولا عمري سمعتك تتذمري منهم والا تشكيهم
بحياء : هم صغار ولو تفهمت معاهم بالهداوة يفهموا وماعاد يكرروا الغلط مره ثاني وبعدين انا حاطك سلاح التخويف يعني للشيء الكبير ماهو على كل صغيرة وكبيرة اقول لك كافي عليك شغلك وهمومه
وهو يمسك بيدها ويلفها ويضمها اليه : الله يخليك لي ولعيالي .....لولك بعد الله مدري وايش كانت بتكون حياتي
بهمس وهي في حضنه : لولاكم ماكنت انا بالراحة والسعاده هذه ....انا من غيركم مااسوى فلس
رجعت على وراء قليل ومحمد ماهو عندي مدري وين راح تفكيره جلست اتامله من رقبته ياربي منها لقمة ادام معطيته جمال على جماله رفعت عيوني للسكسوكه الخفيفه المحددة وعوارضه المرسومه بدقه وشفايفه الممتلئه المزمومه وصلت لعيونه الكبار ياذي العيون اللي قتلتني كل ماوقعت عيني بعينه انزل نظري على طول اول مره اتأمله كذا عيونه عذاب سوداء وتحرسها روموشه الكثيفه الملتفه والحواجب الخفيفة المرسومة سبحان من خلقه وخشمه كحد السيف ياربي اثاريه وسيم فوق العاده وانا اخر من يعلم اول مره اشوفه من هذا القرب كذا عاد شعره غير ناعم وكثيف وممشط بأهمال شديت على يدي اقاوم رغبه اني امسد شعره وامسك وجهه وغمضت عيني امنع نفسي من التفكير فيه اكثر ....ياربي ايش جرالي اليوم الظاهر تخبلت وصرت مااجمع فتحت عيني شفت ابتسامه على وجهه مع نظرة فيها ضحكه حسيت ان وجهي يشتعل نار و صار احمرنزلت نظري لتحت بسرعة ياربي ايش الاحراج هذا وين اودي وجهي منه مدري من متى وهو يراقبني وانا مثل الخبلا خذيت نفس وانا احس يده تضغط على كتوفي ويضمني ........ضمني بقوة وهو يحط راسه على رقبتي ويشم شعري ويهمس : اشتقت لك
رفعت عيوني لعيونه بخجل وتوتر ورجفه مرت بكل جسمي وبنظره نابعه من قلبي...
كلها حب وأشتياق ...
هو بادالني النظر ....عيونه كانت فيها لمعه غير ....اول مره اشوفها مااقدر افسرها هي حب والا رغبه ... أرتفعت يده لوجهي وعيونه معلقه بعيوني إللى تشوفه بضطراب وحياء يرتجف له قلبي ....رفع خصله من قصتي كانت نازله على وجهي وردها ورى اذني يبعدها عن عيوني ...
همس بصوت شجي : مااحلا ها العيون ..
والوجه , والشفايف ... وهو يحط صبعه السبابه على خدي و يمرّرها على وجهي لحد ماوصل لتحت شفايفي ..
غمضت عيوني بقشعريره من حركته اللي حركت كل مشاعري ..
وآنا أخذ نفس ورا الثاني بتوتر .... ودقات قلبي تصم اذني ..
تقرب أكثر من وجهي لحد ماحسيت أن حرارة أنفاسه تلفح وجهي..
وهمس بمشاعر حسيتها بنبرت صوته : آجمل ماخلق ربي والكحل الي على عيونك جملك أكثر..
عضيت على شفايفي وأنا أفتح عيوني وأطالعه من تحت رموشي ...
مانتبهت الا و شفايفه على شفايفي ومااستوعبت ايش الذي صار الاوهو يزيد من قوة قبلته ويضمني من خصري له وذبت بعالمنا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
قمت الصباح وانا مرتبكه ومستحيه موت ماني قادر ارفع عيني لعينه فتحت عيوني بهدوء ورجعت اغمضهم بسرعه وانا اشوفه متركي على يده ويتأملني ياربي والله مستحيه منه بعد الذي عملنا امس ماني قادره اشوفه ماانتبهت الا وهو يمسح على شعري ويبوسني على رقبتي ويهمس : انا اسف وضحى والله ماهو بكيفي كل ماشفتك امسك نفسي غصب وانتي الله يهديك ماتساعدينا كل يوم والثاني تصيري اجمل من قبل غمض عيونه وكمل :كل يوم يزيد حبي لك وتعلقي فيك ....اول ماادخل البيت عيوني تدورك وما يسكن قلبي سواء نظرة عيونك اللي ادمنت سكرها ....من يوم ماشفتك يوم زواجنا وانت الوحيده الشاغله عقلي ومع الايام بديتي تحتلي المساحة الاكبر في قلبي ما تتصوري الالم اللي حسيت فيه ذيك الليله مدري هو عشانك والا عشان اني حسيت اني مرفوض من حياتك ...تعبت وانا افكر فيك ...واحلم باليوم اللي نصير زوجين بحق مش على ورق .....وبداءت اول احلامي تتحقق بقبولك باحضاني وتماديت اكثر ووصلت للقبلات وكنتي تتجاوبي معي ....بس كل مره اشعر فيك وانتي تحاولي تبعدي عني ...وبدات افكر انك يمكن انغصبتي عليا وانك ماتشتيني بس انتي كل يوم تبيني لي اكثر من اليوم اللي قبله انك مرتاحه وسعيدة بحياتك معي ومع عيالي احترت معك وماقدرت ارسي على شيء ماكنت اشتي افرض نفسي عليك وبنفس الوقت اشتيك وماني قادر امسك نفسي وصممت اني اخليك تحبيني مثل ماخليتيني احبك فتح عيونه وفيها حزن ....شد انتباهي تغير نبرة صوته للالم وهو يقول : تعب قلبي وهو يحبك ويعشقك مسك يدي وهو يبوس باطنها وبتنهد : انا ياوضحى مااقدر اعيش بدونك ...اذا ماشفتك كل يوم اختنق لانك صرتي الهواء الذي اتنفسه...
مادريت الا وانتي مثل (النفس ) بين الحنايا إن شهقت أمووت منك وإن زفرت امووت فيك
رفعت عيوني لعيونه وهو شد علي يدي وقربها لصدره خلاني احس بدقات قلبه وهمس : ارحميني ياوضحى ...وارحمي قلبي اللي ينبض لك .....ماعدت قادر استحمل صدك ورفضك اللي ارهقني وخربط كل شيء في حياتي
دقات قلبي بدت تتعدى مسامعي ماني قادرة استوعب المشاعر اللي صبها محمد مره وحدة معقوله محمد يحبني لهذه الدرجه ماقدرت امسك دموعي ومن بين كل المشاعر المتضاربه همست وانا ارخي يدي عن صدره :محمد
رفع عيونه لي : ياروح محمد
خذيت نفس بالقوة وبرتباك : انا ما صديتك بارادتي وبنفسك شفت كيف كنت اضغط على نفسي عشان ما احسسك بالخوف اللي يعتريني من قربك مني ....لكن انت خليتني ارتاح من قربك حتى صرت مايجيني النوم بعيد عن حضنك وريحتك صارت جزء من حياتي مااقدر استغني عنها تحت أي ظرف واللي صار امس اكبر دليل اني متقبلتك وراضيه فيك
: وايش تفسيرك لتهربك مني الان غير انك نادمه على اللي عملتيه
عضيت شفايفي اقوي نفسي وغمضت عيوني : مستحيه منك ...بس والله العظيم اني مرتاحه معك واحبك
فتح عيونه بنظرة مشتعله وابتسامة غير مصدقه : عيدي اللي قلتي
ماقدرت اعيدها خليت يدي على رقبته وضميت نفسي له وانا اسمعه يقول : ضميني اكثر خلي قلبي يرتاح ويستكين بين ضلوعي اخيراً بيرتاح ويستقر
ابتعد عني شويه ويده على رقبتي واصابعه تتخلل شعري وتسبب لي قشعريره وبنظرات مليئة بالحب والشوق قرب من اذني وهمس : ناويه تقتليني بشكلك وعيونك ورجفت شفايفك وقرب وجهه مني وانفاسه تصدم بوجهي غمضت عيوني وأنا أحسه يقبلني بكل رقة قبلني بعمق ولطف وشوي شوي خف من قوة قبلته وهو يبتعد ببطئ عني وأنفاسه إلي تلهث بصوت مسموع متناغمه مع أنفاسي
غمضت عيوني وأنا أحس بيديه إلي تتحرك على خصري وهو يحاول يبعدهم عني
قال بصوت مبحوح : ليت واحنا في بيتنا ....حبيبتي خلينا نقوم قبل مانسوي شيء طايش على الصبح ....وبعدين امي بتقوم تدرو علينا واحنا ماخرجنا من الغرفة
حسيت بالحراره تتصاعد لوجهي أكثر وأنا أفهم قصده , نزلت عيوني
أقترب مني أكثر وهو يمد يدينه لخصري ويضمني له ويقول: ارحميني ياقلبي ....وابتعدعني وقال :انا رايح الحمام وانتي جهزي لنا فطور عرسان .....ههههههههههه
الله يحفظه ويطول عمره حبيب قلبي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
شقة سعيد بن اوس
قمت الصباح وانا عارف ان وفائي زعلانه مني ...عشان كذا انا مجهز لها هديه... اليوم بتروح بيت عمي تساعد اختها وبالليل بوريها المفاجاة ...صح انها تقهرني لانه كم صار لنا مع بعض والى الان ماتفرق بين سفاطي والحقيقه يعني عشاني قلت لها ماسويتي شيء يستاهل وجالسه بس تتأففي وتعبانه وغثيتي عليا ...."عظامي متكسره وتعبانه ومرهقة موت "....قلبت عليا مره وحده وماعاد كلمتني وانا والله كنت امزح معها بس ايش نعمل لعقلها الصغير
بصوت عالي : وفائي ...يااحلا وفاء في الكون ...انا قمت وينك ؟
جت وهي تتخصر : وخير .....وقمت ايش تشتي مني يعني ...الان صرت مني فايدة والا اعمل شيء مفيد
تقرب منها ومسك يدها : حقك عليا يالزعول ...بعدين امس كنت امزح معك انتي اللي خليتيها جد
بستهزاء : تمزح ياحبت عيني ...لامن يمرعك عليا ...كم مرة قلت لك لا تمزح معي وانا مش طايقه نفسي بس ايش نعمل لعقلك ....اللي براسك تسويه ومايهمك مشاعر احد
بمفاجاة : الان انا كذا ...ايوه طلعي ...طلعي اللي براسك وفكي شويه عن نفسك وها جلسنا وماورنا الا نخفف عليك
: خليني اروح احسن لي ...بدل مالكلمة تجر كلمه واننا متقاطعين من غير شيء يسوى
: الله يكملك بعقلك ياحياتي ...بس لو سمحتي جهزي لي الفطور وبوديك بيت ابوك بعد ماافطر
: ليش بتوديني من الان ...انا اشتي اروح العصر
: مايفرق ياقلبي قد الساعه عشر ونص يعني بنخرج بعد ساعة اقل شيء من الان وانا عندي مشاوير مااعتقد بقدر ارجع لك
:الله على ايام زمان لمن كنت اول اهتماماتك والان صارت مشاويرك اهم عندك مني ....وين بتروح ليش ؟
: الله يهديك بس ....انتي عارفه انه لازم اروح اسدد الماء والكهرباء والتلفون والنت .....وبعدين بروح مكتب السفريات اشوف فيز العمرة طلعت والا مالنا نصيب السنه هذه ....وبرجع اروح اشتري مقاضي رمضان ....واخر شيء بسروس سيارتي وبضحكه وغمزه :عشان اليوم معي موعد مع مزة قموره داخله قلبي ومتربعه فيه ....ويعني انتي عارفه باقي كم يوم ويدخل رمضان نشتي نتوب ونستغفر ربنا
دفته بغضب ومشت عنه : خلي المزة حقك تصلح لك فطور انا بروح اتجهز وانت دبر حالك
: هههههههههههههههههه الله يكون بعوني لحد ما ترضي عني ياقمووورة
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
نهاية البارت الخامس والعشرون
قراءة ممتعة للجميع
ودمتم بالف خير
المحية أسمــــــــــــــــــــــــــــــــــــــــــاء
|
20-12-12, 09:15 AM
جديد مواضيع قسم القصص المكتمله من وحي قلم الاعضاء
العرض العادي
