كنت انتظر هذا الشعور .. لمن نسمات الهوا تداعب انفي

في يدي بنجرتين ذهب واذاني تزينها اقراط ذهب مع السلسلة والخلخال الذهب مشتاقة بس لريحة الغنم وتكمل الصوره .. مع الرملات اللي حولي .. حياة البر .. اطالع في النجوم الواضحة

الظلام .. والسماء منورة بها .. احساس جميل لمن تبعد عن حياة المدن ..

صبتلي ماما من الشاي اللي ع الحطب وصوت جدتي وهي تشعر يحي في قلبي سعادة

اغطي ولد اخوي اللي نايم في حضني واحس بالامومه اتجهاه .. احاول ادفيه بالشال اللي لافته ع راسي

فجئة توقف سيارتين جمس كلها شباب لفيت وانا اراقبهم بحذر

واول ماخرجو من السياره وقفت خالتي وماما وصارت الجلسة خاليه الا مني وانا اراقب الوضع بهدوء ..

وفجئة مالاقي الا عيال العيله قبالي .. اتلثمت بالشال لأنهم قربو مره وانا مصدومه من العدد ..
هذا وهم ماشاء الله ناقصين ..

ابتسمت بسعادة وانا اشوف صديق الطفوله يالله كبر اتذكره قصير .. غطيت منه قبل اهزمه في الكورة ..

جو عندنا وانا اسمي الله عليهم وراحو الشباب بس انتبهو لوجودنا وواضح انه وقوفهم كان بسبب انهم مابيدخلو سياراتهم لرمل اكثر خوف من انها تغرز ..

جلست خالتي وهي تقول الله يرزقني برودك .. ضحكت وانا ارد عليها

عارفة انه اولاد العيلة مابيقصرو .. غير اني ماابغى ازعج حمودي في النوم

كانت خرجة لطيفة للبر ..

اصعب شعور رغم لذته لمن تلاقي نفسك في مكان معين تحسي بذاتك فيه ..

ذيك السعاده اللي تنتشر في صدرك .. تترك ابتسامه في داخلك وكل يوم يمر تخافي من الفراق .. بذات لمن تكوني عارفه موعده ..

احاول انسى ذيك الايام واعيش لحظتي .. لكل شيء وقت بينتهي فيه كل شيء

وكل ماسرحت رجعت لذيك الايام .. شهر كان كفيل بتغير مزاجي وزيادة هرمونات السعاده

وعشان احافظ ع جمال الذكرى ماافكر في الرجوع

بعض الامور الافضل لو نحافظ ع جمالها بالابتعاد


.
.
.

القيادة الانثويه ..

الحرية .. كلها اشياء اعشقها .. طول عمري اهرب من القياده وكأنها جرب ..

خوف من اني اثقل على اعضاءي ..

النجاح مايولد من شخص لكن عشان ينجح مشروعك لازم تبدأ بنفسك

مثل صفوف الصلاة .. مرتبه ومنظمه وكل واحد يرتب نفسه قبل غيرو

صناعة القائد هذا كان اهتمام اكادميتي .. وبعد ماانضميت لبرنامج الموهبة والابداع

في جامعة الملك عبدالعزيز .. التحقت بدورات مكثفة عن القياده النسائيه

احساسي اشبه بمغترب رجع لأرضه ..


ماني انثى عادية حتى اقبل ب الاكل والشرب والتكاثر

عندي هدف واضح .. طريق واضح


:
:
:

احيان صوت الشوق في داخلنا يكون اقوى من اي شعور ..

يخليك تضمي نفسك وكأن قلبك ثقيل ماتكفيه ضمة ضلوعك ..

.
.
.

هي فترة قصيرة 7 سنوات تحدد مصيرك لـ 35 سنة ..

تتعب ع نفسك شويتين تحصد ثمار تعبك ..



غمضت عيوني بتعب وانا اتأفف : بنات خلاص والله مااتحمل اشوف عروقي قدام عيوني
ارفع اصباعي وانا اكمل باستهزاء شوفو صرت اشوف فلاشات وذباب طاير
اغطي عيوني وانا اتنهد

تخبطني صاحبتي بجهاز العيون ع راسي وهي تقولي ذحين بخليك تشوفي نجوم السما

بطلي دلع مارح تخرجي الا لمن اشوف optic desc عليك

رديت عليها بـ سهل اول شي ثبتيه ع عيونك واتحركي انتي لاتحركي الجهاز لاتكوني قبالي
خليك ع الزاوية وامسكي راسي

انا بطالع قدام وانت حاولي مره ثانيه يالله ...

فجئة صرخت وهي تنطنط شوفته والله شوفته بنااات واخيرا شوفته

صرت احاول اسكتها ..

: حسبي الله ع ابليسك العيادة جنبنا لايجي الدكتور ذحين

حطت يدها ع فمها وهي تضحك بسعاده

الحمدلله انك شوفتيه ولا عيوني كانت انعمت من الضو

.
.
.



وبدينا بـ طب العيون ..