اوقفي ع الميزان

41 كيلو الطول 158

خلاص ادخلي هذي الغرفة وهذي ملابسك
احس بهدوء وانا اخذ منها لبس المستشفى

لمن قربت انتهي من اللبس دخلت الممرضة بعد ما استأذنت وهي تطقطق لي لبس العملية
ليش يقولوله عملية منظار !!

لبستني البندانه اللي تغطي شعري وخلتني انسدح وهي تغطيني بالشرشف

حاولت تدخل الابرة في وريدي لكن بسبب صغر حجم عروقي فشلت وطشطش دمي

مسحتلي هو وانا ابتسم لها واقولها انه ذي طبيعة جسمي ومكان واحد اللي تقدر

تدخله فيه ثبتت ع اصباعي جهاز القلب وعلى عضدي جهاز الضغط

ملامحي الشاحبة والجفاف اللي احس فيه اطراف اصابيعي الزرقة

غمضت عيوني وانا اتنهد ليش ذا كله وليش جايبيني هنا .. اتأففت من اللبس الواسع

يالله هو انا كل مالي اصغر ولا احجام الاشياء تكبر

بعد فترة جو ممرضتين وهم يسحبو سريري رجعت راسي اكثر في المخدة وانا امحي من دماغي

ذكريات عمليتي اللي فاتت هذا بسيط مو شيء يخوف ومارح تتألمي

دخلت الغرفة وانا ارتجف من البرد حطوني قريب من الجهاز

رجعت ركبتلي جهاز الضغط في رجولي وفي اصباعي جهاز القلب

صار جسمي ينفض من البرد وضغطي كل ماله وينزل

حطتلي اكسجين في انفي وبعد نص ساعه دخلت الدكتوره بعد ماضربولي مكان الابرة دوا

قالتلي شوي وبتنامي راح نعملك منظار للمعدة وبعدها بتفوقي بنسويلك منظار للقولون

مارديت عليها وانا احس بهدوء عند هذا الحد فقدت ذاكرتي

صحيت وانا اصرخ واسمع الدكتورة تقولي سامحيني انا اسف مقدرت اتحكم بدموعي بكيت
وانا اشد على يدي احاول اكتم بكيتي وانا اضغط على اسناني

صارت تهديني الدكتوره وهي تقول انا غلطانه والله غلطانه بس ياماما شوي ونخلص

طالعت في الشاشة وانا اشوف قرحة وشكلها في بدايتها سمعت الدكتوره تقول للممرضة انه هذي كمان فجئة غمضت عيوني وانا ابكي

سألتني فين يعورك والغريب اني بدل مااشر ع القولون اشرت على معدتي ..

رفعت راسي وانا احاول اشوف الشاشة وكأن الدكتورة شكت اني اشوف المنظار

قالتلي يالله اقلبي نفسك قلبت وانا ابكي وهي طلبتلي بنج زيادة

مسكت يد الممرضه وانااضمها وابكي قعدت انادي ماما ومااتذكر الا انها قالت اهو خلصنا

وفجئة شوفت ماما تدورلي وتدخل عندي وتسألني ليش تبكي طالعت في الغرفة متغيره مو نفس الظلام اللي كنت في عادت علي ماما سؤالها وهي تقولي تتألمي
هزيت راسي بالرفض واختفت ماما من عندي

جات الممرضة وهي تقولي في دوخه اشرت براسي لا قالتلي اوقفي وقفت وانا اقاوم الدوار

ردت علي لو في دوخه هذا مشكل كبير بعدين طيح مو كويس

رديت عليها مو دايخة فين ماما قالتلي روح يصرف دوا

لبست عبايتي والابره في يدي لقيت ماما تنتظر وبعد شوي نادو ع رقمي

اخذت الدوا وانا اقرأ اسم الدوا معقوله قرحه .!!؟

الى الان مو عارفه كيف حولوني لهنا وكيف شكو انه جهازي الهضمي معدوم

انتظر موعد الدكتوره بس عشان اعرف نوع القرحه .. الله يعين

ريحة الذكريات توجع القلب

هي ورقة اللي كنت بسلمها لكن المكان والزمان اثارو حنين قلبي

قبال النافورة وشجرات كلية الطب الورود المستوردة والنبتات الغريبة بألوانها الجذابة

ونسمات الهوا الباردة اللي تداعب انفي قاومت دموع اتجمعت في عيوني مشتاقة لذا

المكان لسا ذكريات قبولي في الطب ماتغيب عن عيني

اربعة سنوات ويبقالي سنتين وينتهي اول مشوار في الطب

دخلت لمكاني المفضل طالعت في العاملة وقولتلها واحد كوب قهوة تركي

ردت علي مع الحليب وسكر قليل ابتسمتلها بسعاده وانا افهم قصدها انها متذكرتني

ردت عليها ب ايوا

اطعم قهوة تركي ذوقتها في حياتي في فرق في طعم القهوة لمن تتسوى بحب

لقيت رساله من ولد خالتي يذكرني بأذكار الصباح .. اعترف انه محد حبني في حياتي قده

رددتها وقفلت جوالي وانا افتح كتاب الجراحة وفي اذني حاطة اناشيد اعترف

مقدر اذاكر في الهدوء .. اتنهدت بسعادة وانا ارجع اخذ نفس عميق

غمضت عيوني وانا اسمع نشيد اكاديميتي ابتسمت بوجع ودموعي رجعت اتجمعت

قبل امس كنت اطبق السديري تبع الدفاع المدني ووزارة الصحة طول عمري اتمنى اكون

عسكرية .. اتذكر كان التصريح بسبب ختم الدفاع المدني كل المخارج تنفتح لنا

حتى العساكر ينصدمو اننا تبع الدفاع المدني .. اتذكر في الاحتفال لمن وقف العقيد وهو يقول الوطن يفتخر ببناته وابناءه كانت كلمة كبيره اثرت فيني

رغم اننا محاربين من بعض فئات المجتمع المتخلفه الا انه الوطن يفتخر فينا وهذا اهم شيء

مو بس الوطن حتى الحجاج .. يالله كيف انسى الحاجة الجزائريه اللي ضمتني ع صدرها بقوة

وهي تكتم دموعها يالله قد ايش اتمنيت انها ماتتركني ..

والحاجة المصريه اللي سلمت ع خدي .. والحجاج اللي يمزحو معانا ويدعولنا ..

كيف اقدر انبسط مره ثانيه بعد ماتركت ذاك المكان احاول انسى وجعي واتأقلم مع العالم

لكن هذي الذكريات تقيدني .. مسحت دمعه نزلت من عيوني وانا اهرب من كل شيء

ماهو حدث عادي حتى اتجاوزه .. 10 ايام غيرت مسار حياتي ..

طالعت في جوالي وانا اتصل ع السواق لازم اتأقلم انه كل شيء انتهى ..

كنت سادحة واكلم ماما وولد اخوي ياكل حلاوة

فجئة صار النونو مو قادر يتنفس ويحاول يمشي

اتأملته شوي لمن اتأكدت انه الحلاوة قفلت على مجرى تنفسه

شلته وانا اعمله الاسعافات الاولية وجنبي ماما تصرخ

وتقول الله يرحمه مات الولد

طالعت فيها وانا مستمره باسعافه قولتلها لمن يموت قولي الله يرحمه

خرجت من الغرفة وكأنها ماتبغى تسمع خبر موته من الحلاوة

فجئة بكي وقلب علي وهو يضمني ويكحكح .. قولت لماما خلاااص تعالي

جات ووجها مخروش قولتلها ليش طلعتي .؟

ردت علي ماكنت ابغى اوترك ..


ثاني مره يشرغ ولد اخوي وانا موجودة يتهموني بالبرود بس هذا اللي درسته واتعلمته

بالهدوء راح اقدر اتصرف .. ضميته لي وانا امسح دموعه

طالع فيا وقال اواوة رديت عليه حلاوة لاء .. حط راسه ع كتفي وانا اكبسه

طالعته ماما ودموعها متجمعة ..

الى الآن مافهمت ايش اللي موترها شرغ الولد صح انه انكتم بس مو شيء يخوف ..


الحمدلله اني طب

اتذكرت كلمة بابا لازم يكون فيه طبيبة في العيله ..

في يدك سكينة وقدامك انسان غايب عن الوعي ..

وامامك خيارين : تقتليه او تعالجيه

الطب تماما نفس الشيء الجراح بدون علم ومعلومات مايفرق عن المجرم بشيء

وهذا هو قراركم .. تدرسو تفهمو كل نقطة تمر عليكم راجعو التشرح ووظائف الجسم قبل لا تقرأو عن المرض ..

كل واحد اختار المكان اللي هو فيه برغبة تامه

حاولت امنع تجمع الدموع في عيوني .. اتحولت الغرفة من النقاش

للهدوء .. الكل صامت اطالع في الدكتور وانا ابلع غصتي ..

خبط ع فخوده وهو يوقف .. وجه اصباعه علينا وقال مفهوم .؟

اختباركم النهائي الاسبوع الجاي اتمنى لكم التوفيق ..

اضم نفسي بتوتر .. ارهقت جدا وكأن الزمن وقف .. قلبي تعب من هذا الضغط اللي بنمر فيه

ضغطت ع راسي وانا اسحب نظارتي

طالعت في الاستيج .. دكتور وحاولينه 5 من الاطباء المقيمين

وفي المسرح بعد كل مجموعة طبيب يراقب سير الاختبار

قلبت الورقة والدكتور بوجه الصامت باقي 10 دقايق لمن اقول done عند النون كل الاقلام

تنزل ضحك بتشفي وهو يقول مفهوم ..

قد قولتها الدكاتره يحتاجو يصلحو الخلل النفسي اللي عندهم ..

وقفت بكسل وانا اسلم الورقة ..

اخ واخيرا خلصنا جراحة الله يعين ع سنة سادس ..

ترم واحد كفيل بإنهاء كل خلية في جسدي ..


ماني متخيله انه يوم الاحد عندي تدريب .. اه بس الله يكتب لنا الاجر