شلت في يدي بطانيتي الخفيفة وانا ارتجف من البرد يالله مو من جدهم البنات ينامو في الصقيع المتجمد ..

خرجت من الشاليه وقابلني المسبح بشكله المتناسق استخسرت اسبح فيه هذا حق استرخاء مو سباحة

حطيت البطانية فوق الكرسي وانا امشي بهدوء فوق العشب ضامة يدي واحاول اتدفى بحرارة جدة

اتأمل السواد اللي ماله نهاية ولا فيه حد مابين السما والبحر

صوت الامواج العالي .. اتنهدت وانا احس بثقل مشاعري وحجم المسؤولية اللي مقدمة عليها

رجعت لكرسيا الشبه سادح وغمض عيوني مااسمع الا هدوء الليل وصوت امواج البحر

بعد ساعتين فتحت عيوني وانا اسمع اذان الفجر رفرف قلبي بسعادة وشعور جميل

حققت امنيتي اني انام قبال البحر .. واصحى مع بداية انفاس الصباح

خلصت التاريخ المرضي وانا اعرض لدكتورة حالتي ..

سكت وهي تعدل جلستها وتبتسملي

: تصدقي انا معجبة فيك

ابتسمت بخجل

وردت على ابتسامتي : انا اتكلم من جد الكلام اللي قولتيه مايقوله حتى الاطباء المقيمين
انا فخورة فيك .. وعلى فكرة ما اصلح جلستي الا اذا اعجبت بالكلام ..


حسيت بسعادة وشعور لا يوصف وانا اعرض اول حاله لي واسمع ذا الكلام ..

شوفنا دكتور ومعاه اثنين من طلبة سادس

اشرت لصاحبتي وهم يدخلو للحاله اللي كتبناها اعطتني نظرة تشجيعية

وكل ماقربنا من الباب نرجع لمن انتبهو لنا ..

قولتلها نعد لثلاثة لو طردنا الدكتور عادي مو اول واحد يهزئنا ولازم نصير ملاقيف في العلم

واحد .. اثنين .. ثلاثة ..

وقفنا بكل ادب وهمست لي صاحبتي مو المفروض نستأذن ..

رحب بنا الدكتور بعد مااستأذنا وشوي جو ثنتين من صحباتي ..

فجئة قال الدكتور مين تعمل فحص للغد الليمفاوية ولأني اقرب وحده اشر علي

حمدت ربي انه طلب شيء اعرفه

فحصت وعدت سليمه وجلس يسألنا مره ويسأل الأولاد شوي لمن قال مين يعمل بيركشين

قولت انا .. وطبعا صحباتي انجلطو ووحده كحت من الفجعة وصارو يأشرولي لا افضحهم

طبعا انا اسوأ ادمية تعمله وهو انه تحطي كفك ع المريض وباصباع واحد من اليد الثانية تخبطي

وتسمعي الصوت وتعرفي لو هو طبيعي ولا فيه مويات في الرئه او هوا وووو

المهم حطيت يدي وحاولت اكون دفشة وحسيت بسعادة وانا اسمع الصوت واضح وشخصته صح لكن

شوفت الدكتور يكتم ابتسامته وباصباعينه يقفل ع فمه وكأنه يكتم ضحكته

وحضرتي كشرت لا شعوري
قال مارح اقول شيء قلب ع صحباتي وسألهم سمعتو صوت

وهم بصوت واحد لا ماسمعنا ..

قلب علي وقال ماينفع تكوني ناعمه مع المريض ترى مابتعوريه اخبطي بقوه

وبدأ يعلمني .. طالعت في يدي المحمره وكشرت بقهر وصحباتي يقولولي كان حفظتي موية وجهك وخليتي احد ثاني .. طنشتهم وانا مصره اني اكون احسن وحده تعملها


وسيندمون :/

خلال الاسبوع كل شوي اعمل بيركشين اللي هو اللي عملته فوق واتريق علي الدكتور

المهم جا سيشن والدكتورة اشرت علي ويالله افحصي المريض قبالي وع حظي جاني بيركشن

طالعت في صاحبتي وانا اسوي نفسي اني ابكي حطت يدها ع قلبها وهي تكشرلي بوجهها

جيت وبدأت افحصه وع حظي الدكتور شايفة نفسها مدري ايش

المهم انا سامعة البيركشن واضح المهم سحبت يدي وهي تتأفف وسحبت وحدة من البنات

وخلتها تعمله ووقفتها وخاصمتها وقالت بالله هذا بيركشن تعمليه وسحبتني زي النعجة من
لابكوتي ورجعتني اعمله

قولتلها انا بصدمه ووجهي مخطوف قالت ايوا حقك مزبوط

تنحت وانا مو مستوعبه انا حقي مزبوط صرت اطالع في صاحبتي وهي تشجعني

طيب واللي صار من شوي ايش



اكتشفت انه الدكاترة نفسيات وشكرا

انا اعشق الناس بمختلف الجنسيات .. ومختلف الالوان

ومختلف اللهجات

اعشقهم وماالاقي نفسي الا وسطهم .. حبهم مزروع في قلبي وسعادتي معاهم

ولمن مريض يقولي انتي قد بنتي عقبال ماتصيري دكتورة قد الدنيا

دعواتهم .. ابتسامتهم .. روحهم اشياء اعشقها وادمنتها

ادمنت الضحكة اللي اشاركهم هي ..

احمد الله ع نعمة الطب .. الطب حياة

احس بسعادتي تتجدد عند كل مريض ..